Ho Eɛ Siri Kyɛnlɛ A Dɔgroŋ Kpoŋ Bee?

1. Ananso la wala ka yɛŋ bebe ka te maŋ nare te menne ko saammo bɛrɛ?

TE NA nyɛɛ faabo ka teneeŋ nare te menne. Aŋa mannoo poɔŋ, ka saammo kpoŋ kaŋaŋ wa wa, noba na naŋ nare ba menne soŋ na yoŋ la na baŋ nyɛ faabo a kyɛ toɔ̃ soŋ ba taaba mine meŋ. Laŋnoɔre kaŋa naŋ maŋ sonnɔ noba naŋ be Europe paaloŋ yeleeŋ ka: “Ka nobaŋ wa nare ba menne soŋ a maŋ faa la nyɔvoɛ.”

2. Ananso la wala aŋ seŋ ka te nare te menne ko a dɔgroŋ kpoŋ? (Matio 24:44)

² A ‘dɔgroŋ kpoŋ’ na wa la saŋa na noba naŋ ba kaara soriŋ. (Mat. 24:21) Kyɛ a dɔgroŋ kpoŋ yɛŋ koŋ wa aŋa lɛ saammo bɛrɛ naŋ maŋ wa uri noba na, bonso noba mine baŋ ka o waanaŋ. Yuomo 2,000 naŋ pare, Yezu da kpãã la o potuuribo ka ba nare ba menne ko ana bebiri na. (Kanne Matio 24:44.) Ka teneeŋ nare te menne, a na eɛ mɔlɔ ka te toɔ̃ are a wagre kpeɛne naŋ waana na noɔreŋ a kyɛ toɔ̃ soŋ noba mine meŋ ka ba e lɛ.​—Luk. 21:36.

3. Sobuo ka kannyiri, nyonono, ane nɔmmo na baŋ soŋ te ka te nare te menne ko a dɔgroŋ kpoŋ?

³ Aseŋ ka te taa gyogri ata mine naŋ na baŋ soŋ te ka te nare te menne ko a dɔgroŋ kpoŋ. Ka ba naŋ yelka te moɔle sɛrɛɛ diibu duoro kpeɛŋaa kpeɛŋaa ko noba, ka noba naŋ ba puoro Jehoova meŋ iri zɔɔrɔ neŋ te, wala teŋ na e? (Yel. 16:21) Aseŋ ka te taa kannyiri sɛre kyɛ na baŋ sage Jehoova noɔre, a taa sagediibu ka o na go teŋ. Wala teŋ na e ka te yɔɔmineŋ kɔŋ ba bontaree mine bee a kɔŋ ba bontaree zaa? (Hab. 3:17, 18) Nyonono te naŋ taa ko ba zuŋ te na soŋ baŋ ne bonzaa yɛlɛ naŋ fɛre ba. Ka a paalonne laŋnoɔreŋ wa iri zɔɔrɔ ne te ka lɛ vɛŋ ka a fɛre ka te neŋ te yɔɔmine laŋ kpeɛrɛ, bo gyogo aŋ seŋ ka te taa? (Izik. 38:10-12) Aseŋ ka te taa nɔmmo naŋ e kpeɛŋaa sɛre kyɛ ka ba na baŋ soŋ te ka te are a yelkpeɛne noɔreŋ.

4. Sobuo ka a Baabole wuli ka te naŋ kyɛnɛ boɔrɔ kannyiri, nyonono, ane nɔmmo?

⁴ A Baabole eŋnɛ teŋ faŋa ka te boɔrɔ kannyiri, nyonono, ane nɔmmo. Luka 21:19 yelka: “A yɛ kannyiri diibu zuŋ, yɛ na nyɛ la nyɔvore.” Kolosi 3:12 meŋ yelka: “Yɛ de nyonono . . . su pɔge yɛmenne.” Ka 1 Tɛsalonika 4:9, 10 meŋ yelka: “Naaŋmen da wuli yɛ la ka yɛ nɔnɔ taa. . . . Kyɛ anealɛzaa, te poyɛŋ noba, te sɔrɔ yɛ la ka yɛ maaleŋ erɛ a lɛ yaga zaa.” Ba da sɛgɛɛ a yɛlɛ ŋa ko Kristabiiri naŋ da wulo kannyiri, nyonono, ane nɔmmo. Kyɛ a da seŋ ka ba naŋ moɔ̃ nimiri zanna lɛ baŋ na toɔ̃ e taa ana gyogri ŋa yaga zaa. Lɛ aŋ seŋ ka te meŋ erɛ. Yɛlɛ naŋ na soŋ te la ŋa, te na zanne nyɛɛ lɛ a dɛndɛŋ Kristabiiri naŋ da maŋ wuli ana gyogo ŋa kaŋa zaa. Te pãã na la nyɛɛ lɛ teŋ na baŋ tɔgle ba a de wuli ka te e la siri ko a dɔgroŋ kpoŋ.

VƐŊ KA HO KANNYIRI DIIBU MAALEŊ E KPEƐŊAA

5. Sobuo ka a dɛndɛŋ Kristabiiri na da toɔ̃ are yelkpeɛne noɔreŋ?

⁵ A dɛndɛŋ Kristabiiri na da seŋ ka ba taa kannyiri. (Hib. 10:36) Ba da tuoree yelkpeɛne na neɛzaa meŋ naŋ da tuoro na, kyɛ da la tuoro yelkpeɛne mine meŋ ba naŋ e Kristabiiri zuŋ. Ba yaga zie meŋ, a Gyuumine ŋmenpuore wedeɛreba ane a Urom namine yoŋ naaneŋ da dɔgrɔ ba, ba menne booree deme mine meŋ da dɔgrɔ baŋ. (Mat. 10:21) A da seŋ ka ba mɔɔ ba mɔɔbo zaa meŋ ka a bɛnlebɛnleba wuluu naŋ waana neŋ wɛltaa a lantaapuoruu poɔŋ na ta nyɛ kpeɛ̃o ba zuŋ. (Tom. 20:29, 30) Kyɛ a Kristabiiri ŋa da toɔ̃ arɛɛ a noɔreŋ. (Yel. 2:3) Boŋ da soŋ ba? Ba da maŋ leɛ teɛrɛɛ lɛ noba mine naŋ wuli kannyiri diibu aŋ be a Sɛgre poɔŋ, aŋa Gyoob. (Gyi. 5:10, 11) Ba da maŋ puore sɔreŋ ka Jehoova ko ba faŋa. (Tom. 4:29-31) Ba da maŋ teɛrɛɛ maaloo na Jehoova naŋ na ko ba ka ba naŋ moɔ̃ nimiri dire kannyiri.​—Tom. 5:41.

6. Lɛ na Merita naŋ e a toɔ̃ are o yelkpeɛne noɔreŋ na, boŋ ho zanne yi be?

⁶ Te meŋ na baŋ taa la kannyiri ka teneeŋ maŋ zanna noba mine naŋ da wuli kannyiri baŋ sɛge ba yɛlɛ eŋ a Baabole ane te gama na poɔŋ. Te yɔɔpɔge kaŋa yuori naŋ di Merita naŋ yi Albania naŋ da erɛ lɛ zuŋ na, saŋa na o booree deme naŋ da dɔgroo yaga zaa na, o da toɔ̃ arɛɛ a noɔreŋ. O yelka: “Gyoob zemmo yɛlɛ naŋ be a Baabole poɔŋ na da eŋ maŋ faŋa yaga zaa. O da di la dɔgɛɛ yaga, kyɛ da ba baŋ neɛ na naŋ vɛŋ oŋ dire ana dɔgɛɛ na zaa, kyɛ o da yeleeŋ ka: ‘A gɛrɛ N kũũ N daŋ koŋ vɛŋ ka N mennoŋ yi N seŋ!’ (Joob 27:5) N da nyɛɛŋ ka N yelkpeɛne na ba peɛle Gyoob deme na gba. Gyoob yɛŋ da ba baŋ neɛ na naŋ vɛŋ oŋ dire a dɔgɛɛ, kyɛ maaŋ yɛŋ baŋɛɛŋ.”

7. Ka teneeŋ ba tuoro yelkpeɛne pampana, bo aŋ seŋ ka te erɛ pampana?

⁷ Te meŋ na baŋ taa la kannyiri yaga zaa ka teneeŋ maŋ puoro korɔ Jehoova wagre zaa a yele te yelfɛree zaa koroo. (Fil. 4:6; 1 Tɛs. 5:17) Aminekaŋaŋ ho ba tuoro yelkpeɛŋaa zaa pampana. Kyɛ, ka yelkaŋaŋ e ka ho suuri iri, ka teɛroŋ gyereŋ kpɛ bo, bee ka ho ba baŋ lɛ zaa ho naŋ na e, ka lɛ ho maŋ puore sɔrɛɛ Jehoova ka o soŋ bo? Ka hooŋ maŋ sɔre Naaŋmen sommo ho bebiri zaa yelbilii bilii poɔŋ, a na eɛ mɔlɔ ka ho sɔroo sommo ka hooŋ wa tuoro yelbɛrɛ meŋ. Lɛ meŋ na vɛmeŋ ka ho taa sagediibu yaga zaa ka o baŋɛɛ saŋa na a naŋ seŋ ka o soŋ bo ane lɛ oŋ na e a toɔ̃ soŋ bo.​—Yiem. 27:1, 3.

8. Sobuo ka Mira zemmo yɛlɛ wuli ka, ka teneeŋ are yelkpeɛne noɔreŋ zenɛ, a na baŋ soŋ teŋ ka te toɔ̃ are mine noɔreŋ nendaare kaŋa? (Gyimisi 1:2-4) (Kaa a foto meŋ.)

⁸ Ka teneeŋ toɔ̃ are te yelkpeɛne noɔreŋ pampana, a na eɛ mɔlɔ ko te ka te toɔ̃ are yelkpeɛne na teŋ na tuore a dɔgroŋ kpoŋ saŋa na. (Uro. 5:3) Ananso la wala teŋ na baŋ yel lɛ? Te yɔɔmine yaga yeleeŋ ka, ka ba naŋ wa tuore yelkpeɛŋaa kaŋa a kyɛ toɔ̃ are a noɔreŋ, ba maŋ lɛ toɔ̃ arɛɛ yelkpeɛŋaa zaa naŋ na tu wa noɔreŋ. Jehoova sommoŋ, ka ba naŋ wa toɔ̃ are a yelkpeɛŋaa noɔreŋ, a maŋ eŋɛɛ ba sagediibu faŋa ka Jehoova sereŋ boɔrɔŋ ka o soŋ ba. A lɛ sagediibu na maŋ soŋ baŋ baŋ toɔ̃ are yelkpeɛŋaa zaa naŋ na wa a puoriŋ. (Kanne Gyimisi 1:2-4.) Te yɔɔpɔge Mira naŋ e paaneɛ a be Albania paaloŋ wa nyɛɛŋ ka, o naŋ toɔ̃ are yelkpeɛne mine oŋ da tuore saŋa kaŋa naŋ pare noɔreŋ na somooŋ oŋ are yelkpeɛne o naŋ tuoro pampana noɔreŋ. O yeleeŋ ka saŋa kaŋa o maŋ teɛrɛ ka ona yoŋ la tuoro yelkpeɛne yaga. Kyɛ o leɛteɛrɛɛ lɛ Jehoova naŋ somoo yuomo 20 naŋ pare poɔŋ, o da yelko la o meŋɛ ka: ‘Naŋ dire yelmennoŋ. Jehoova soŋ boŋ hoŋ toɔ̃ are yelkpeɛne yaga noɔreŋ, pampana naane aŋ seŋ ka ho bare Jehoova puoruu.’ Ho meŋ na baŋ leɛteɛrɛɛ lɛ Jehoova naŋ da soŋ bo hoŋ toɔ̃ are ho yelkpeɛne noɔreŋ. Taa sagediibu ka, ka hooŋ wa toɔ̃ are yelkpeɛŋaa zaa noɔreŋ Jehoova maŋ baŋeŋ, o na ko boŋ maaloo meŋ. (Mat. 5:10-12) Saŋa na a dɔgroŋ kpoŋ naŋ na wa piili na, ho na baŋɛɛ lɛ hoŋ na baŋ e are yelkpeɛne noɔreŋ, a e siri meŋ ka ho are a noɔreŋ.

WULO NYONONO

9. Sobuo ka a lantaapuoruu naŋ be Antoɔki teŋɛ naŋ be Siiriya paaloŋ da wuli nyonono?

⁹ Te nyɛ lɛ Kristabiiri naŋ da soŋ ba yɔɔmine naŋ be Gyudiya saŋa na kɔŋ kpoŋ naŋ da le be na. Saŋa na a lantaapuoruu naŋ be Antoɔki teŋɛ naŋ be Siiriya paaloŋ naŋ da wa woŋ a kɔŋ yɛlɛ na, nɔkpeɛne zaa kyebe ka ba da taa la nyonono ko ba yɔɔmine naŋ be Gyudiya na. Azuŋ ba da eɛ yelkaŋa a soŋ ba yɔɔmine na. Ba kaŋa zaa da “maŋ tere seŋ [la] o faŋa naŋ ta lɛ ka ba na de soŋ ne a yelderebɛ naŋ be a Gyudiya teŋɛ poɔ.” (Tom. 11:27-30) Aneazaa ka Gyudiya teŋɛ ane Antoɔki da e la tɔɔre, kyɛ ba yɔɔmine naŋ be Antoɔki na da eɛ siri ka ba soŋ ba.​—1 Gyn. 3:17, 18.

10. Ka saammo kpoŋ kaŋaŋ wa pɔge te yɔɔmine wala teŋ na baŋ e wuli ba nyonono? (Kaa a foto meŋ.)

¹⁰ Te meŋ na baŋ wulee nyonono ka teneeŋ wa woŋ ka saammo kpoŋ kaŋa pɔgɛɛ te yɔɔmine. Te maŋ eɛ wieoŋ a soŋ ba, aminekaŋaŋ te maŋ soorɛɛ te lantaapuoruu nembɛrɛ ka te na baŋ nyɛɛ a vuo a te soŋ ba bee, a iri libie soŋ a donɛɛ zaa puoruu toma na, kyɛbee a maŋ puoro korɔ te yɔɔmine na a saammo kpoŋ naŋ pɔge na.b (Yeng. 17:17) Aŋa mannoo poɔŋ, a yi yuoni 2020 poɔŋ, ba da iree Saammo Bɛrɛ Sommo Komitii noɔre naŋ ta 950 naŋ be a donɛɛ lombori zaa ka ba de sommo te ko te yɔɔmine naŋ da boɔrɔ sommo a COVID-19 baaloŋ saŋa na. Te puoree te yɔɔmine zaa naŋ tonɔ a saammo bɛrɛ sommo toma ŋa bareka yaga zaa. Ba naŋ taa nyonono yaga zaa ko ba yɔɔmine na zuŋ, ba maŋ de la bontaree te soŋ ba yɔɔmine, a ko ba sukyiri dii yi a Baabole poɔŋ, a gba maŋ maale ba yɔɔmine dere bee a leɛ mɛ ba dere ane te puoruu ziiri naŋ sãã na ko ba.​—De 2 Korinti 8:1-4 manne neŋ.

11. Ka teneeŋ wa wulo nyonono sobuo aŋ maŋ de emmo korɔ Jehoova?

¹¹ Ka saammo kpoŋ kaŋaŋ wa pɔge te yɔɔmine ka te wuli ba nyonono, noba mine maŋ nyɛɛ te deterebo gyogo na. Aŋa mannoo poɔŋ, yuoni 2019 poɔŋ, sasekpeɛŋaa kaŋa ba naŋ boɔlɔ Hurricane Dorian da wa sãã la te Lammozie kaŋa naŋ be Bahamas. Saŋa na baŋ da leɛ meɛrɛ a Lammozie na, ba da yelko la demeɛrɛ kaŋa ka o wuli ba sane ba naŋ na ŋmɛ kyɛ ka o toŋ toma mine ko ba. O da yelko baŋ ka: “N na boɔrɔŋ ka N de . . . a tontoŋ boma ane a boma maŋ na de toŋ a toma na ko yɛ zaala, a toŋ a toma meŋ ko yɛ zaala. . . . N deɛ boɔrɔŋ ka N e a yɛlɛ ŋa ko yɛ lantaapuoruu na. A e maŋ noɔ̃ yaga zaa ane lɛ na [yɛ] naŋ maŋ wulo nɔmmo korɔ yɛ zɔmenne na.” Noba yaga naŋ be a donɛɛ ŋa zuŋ ba baŋ Jehoova. Kyɛ noba yaga maŋ nyɛɛ yɛlɛ Jehoova Sieree Deme naŋ maŋ erɛ a sonnɔ ba taaba na. A maŋ e teŋ popeɛloŋ yaga zaa ka teneeŋ wa wulo noba nyonono ka noba mine meŋ nyɛ a boɔrɔ ka ba wa zanne Jehoova yɛlɛ!​—Efe. 2:4.

12. Ka teneeŋ wulo nyonono pampana sobuo aŋ na baŋ sɛgre te ko a dɔgroŋ kpoŋ? (Yel-iriwulaa 13:16, 17)

¹² Ananso la wala aŋ na seŋ ka te wulo nyonono a dɔgroŋ kpoŋ saŋa? A Baabole yelka bana naŋ koŋ tu a donɛɛ ŋa namine puoriŋ na na tuoree dɔgroŋ pampana ane a dɔgroŋ kpoŋ saŋa. (Kanne Yel-iriwulaa 13:16, 17.) Aminekaŋaŋ te yɔɔmine na boɔrɛɛ sommo ka ba toɔ̃ nyɛ boma yɛlɛ naŋ fɛreba. Saŋa na te Naa Yezu Krista naŋ na wa ka o di noba sɛrɛɛ na, te boɔbo la ka o wa nyɛ te ka te wulo nyonono, ka o toŋ boɔle te ka te wa “di a Naaloŋ gbandiruŋ.”​—Mat. 25:34-40.

EŊ HO NƆMMO NA FAŊA

13. Aŋa lɛ na Urom 15:7 naŋ wuli na, wala ka dɛndɛŋ Kristabiiri na da e a naŋ kyɛnɛ wulo nɔmmo korɔ taa?

¹³ Neɛzaa da baŋɛɛŋ ka a dɛndɛŋ Kristabiiri na da taa la nɔmmo ko taa yaga zaa. Kyɛ a da maŋ e la mɔlɔ ko ba ka ba e lɛ? Ka hooŋ nyɛ, noba naŋ yi ziiri tɛɛtɛɛ la da wa lantaa be a Urom lantaapuoruu na poɔŋ. Ba mine da eɛ Gyuumine baŋ da wuli ba a yi ba biiloŋ saŋa zaa ka ba tuuro Moosis Bege na, ka ba mine meŋ da yi paaloŋ yobo, ka lɛ ba naŋ guoli ba na meŋ e o yoŋ. Aminekaŋaŋ a Kristabiiri mine da eɛ gbaŋgbaare ka ba mine meŋ da ba e gbaŋgbaare. Kaapɔge ba mine meŋ gba da taa la gbaŋgbaare. Kyɛ sobuo baŋ da naŋ kyɛnɛ wulo nɔmmo korɔ taa aneazaa ka tɛɛtɛɛ da be la ba kpakyagaŋ? A bitontona Pɔɔl da eŋ baŋ faŋa ka ba “derɛ taa saannoŋ.” (Kanne Urom 15:7.) Wala oŋ da boɔrɔ ka o wuli? A yelbiri “derɛ saannoŋ” wuleeŋ ka hoŋ na wulo saannoŋ korɔ noba, a deɛ ba wa ne ho die bee a deɛ ba poɔ ho zɔmenne poɔŋ. Aŋa mannoo poɔŋ, Pɔɔl da yelko la Filimɔn lɛ oŋ na baŋ leɛ deɛ o gbaŋgbaa Onesimu naŋ da zo yi o zieŋ na, o da yelka: “Tuore de o.” (Flm. 17) Peresela ane Akuyɛla meŋ da de la Apolo saannoŋ. Apolo da eɛ neɛ naŋ ba baŋ a Kristabiiloŋ yɛlɛ te seŋ Peresela ane Akuyɛla, azuŋ ba “da taa o la yi ne ba yoŋ zie.” (Tom. 18:26) A dɛndɛŋ Kristabiiri ŋa da ba tere sori ka tɛɛtɛɛ naŋ da be ba kpakyagaŋ na wane wɛltaa ba kpakyagaŋ.

14. Sobuo ka Anna ane o serɛ wuli nɔmmɔ?

¹⁴ Te meŋ na baŋ wulee nɔmmo ko te yɔɔmine a maŋ nyɔgrɔ ba zɔmennoŋ ka te ne ba laŋ erɛ yɛlɛ. Lɛ na vɛmeŋ ka ba meŋ wulo nɔmmo korɔ te. (2 Kor. 6:11-13) Te nyɛ Anna ane o serɛ zemmo yɛlɛ. Saŋa na baŋ da de ba gaaneŋ Africa Saniŋe seŋ ka ba te tonɔ a missionary toma na, a da ba kɔɔre kyɛ ka a COVID-19 baaloŋ da piili. A da eɛ kpeɛŋaa ka ba toɔ̃ baŋ te yɔɔmine naŋ be a lantaapuoruu poɔŋ, bonso ba da koŋ baŋ nyɛ taa. Wala baŋ da e a wuli nɔmmo? Ba da maŋ tu la videoconferencing zuŋ kyɛ boɔle te yɔɔmine na, a maŋ yelko ba ka ba eŋɛ zaaŋ nyagra ka ba baŋ ba soŋ. A nɔmmo ŋa baŋ da wuli na da tɔ la a booree deme naŋ bebe na sukyie baŋ meŋ da maŋ boɔle ba wagre zaa a puore ba bee a toɔle ba massage saŋa kaŋa. Ananso la wala ka a kultaa deme ŋa da mɔɔrɔ ka ba baŋ te yɔɔmine naŋ be a lantaapuoruu poɔŋ na? Anna yelka, “N daŋ koŋ inni lɛ te yɔɔmine naŋ daŋ wuli N neŋ N booree deme nɔmmo wagre kpeɛne ane wagre sonne poɔŋ. Ba eebo na la eŋ ma faŋa maŋ meŋ boɔrɔ ka N wulo nɔmmo korɔ N taaba.”

15. Boŋ hoŋ zanne yi Vanessa ewuluu na poɔŋ a kyaare nɔmmo teŋ na wulo korɔ te yɔɔmine na? (Kaa a foto meŋ.)

¹⁵ Te yaga zie zaa lantaapuoruu na pooreŋ te naŋ be na, te yɔɔmine naŋ be a lantaapuoruu poɔŋ na zemmo yɛlɛ neŋ te zemmo yɛlɛ ba yi taa. Ka teneeŋ de te teɛroŋ zaa eŋ te yɔɔmine gyog sonne eŋɛŋ, a na eɛ mɔlɔ ka te wulo ba nɔmmo yaga zaa. Te yɔɔpɔge kaŋa yuori naŋ di Vanessa naŋ be New Zealand paaloŋ da nyɛɛŋ ka a da maŋ eɛ kpeɛŋaa koo ka o ne o yɔɔmine naŋ be a lantaapuoruu poɔŋ taa niiloŋ naŋ soma. Kyɛ o da deɛ gbɛre ka o koŋ maŋ tagra o meŋɛ yire te yɔɔmine na yeleree naŋ maŋ vɛŋ ka o suuri iri na, kyɛ o na maŋ vɛmeŋ ka o neŋ ba laŋ erɛ yɛlɛ. Oŋ da erɛ lɛ na da somooŋ oŋ nyɛ yɛlɛ na Jehoova naŋ nɔŋ a kyaare te yɔɔmine ŋa. O yelka: “Pampana N serɛ naŋ wa e gbandige zukaara na zuŋ, te neŋ te yɔɔmine yaga naŋ taa gyogri tɛɛtɛɛ la maŋ lanna, N nyɛɛŋ meŋ ka a maŋ eɛ mɔlɔ ka N lanna neŋ ba. Pampana ŋa N nɔŋ la a gyog tɛɛtɛɛ na N yɔɔmine naŋ taa na. Nɔkpeɛne zaa kyebe ka Jehoova meŋ nɔŋ a la, bonso o vɛmeŋ ka noba naŋ yi ziiri tɛɛtɛɛ yaga wa puoruu.” Ka teneeŋ wa nyɛrɛ noba aŋa lɛ Jehoova naŋ nyɛrɛ ba na, te maŋ wuliŋ ka te nɔŋ baŋ.​—2 Kor. 8:24.

16. Ananso la wala aŋ na ferɛ ka te taa nɔmmo a dɔgroŋ kpoŋ saŋa? (Kaa a foto meŋ.)

¹⁶ A na fɛreŋ ka te nɔŋ te yɔɔmine a dɔgroŋ kpoŋ saŋa. Ka a dɔgroŋ kpoŋ wa piili, wala ka Jehoova na e kyɛ go te? Te nyɛ yɛlɛ na Jehoova naŋ da yelko o noba ka ba e saŋa na baŋ da wa ka ba sãã Baabilɔŋ na: “N noba, yɛ wa. Yɛ kpɛ yɛ dekie, a pɔge yɛ di-noɛ eŋ yɛ menne. Yɛ sɔgle beɛla a waana wagre a suuri aŋ na wa pari.” (Aiz. 26:20) A yelbie ŋa kyaarɛɛ te bana na a dɔgroŋ kpoŋ naŋ na wa pɔge na. Aminekaŋaŋ a “dekie” na are ko la a lantaapuoruu na poore te naŋ be na. Jehoova eŋɛɛ noɔre ka a dɔgroŋ kpoŋ saŋa o na go teŋ ka teneeŋ naŋ moɔ̃ nimiri puoruu a lanne te yɔɔdɔba ne te yɔɔpɔgeba. Azuŋ, te neŋ te yɔɔmine naŋ na lanna pampana yoŋ naaneŋ fɛre, kyɛ aseŋ ka te taa nɔmmo ko ba yaga zaa. Aminekaŋaŋ be teŋ na tu nyɛ nyɔvore.

SEGRƐ HO MEŊƐ PAMPANA

17. Ka teneeŋ sɛgre te menne pampana, bo yɛlɛ teŋ na toɔ̃ e a dɔgroŋ kpoŋ saŋa?

¹⁷ “Jehoova bebikpoŋ na” na eɛ wagre kpeɛŋaa yaga a ko nensaaleba. (Zef. 1:14, 15) Jehoova puorebiiri meŋ na tuoree yelkpeɛne. Kyɛ ka teneeŋ sɛgre te menne pampana, te na eɛ bɔĩĩ, kyɛ toɔ̃ soŋ te taaba meŋ. Te na toɔ̃ arɛɛ yelkpeɛŋaa zaa teŋ na tuore noɔreŋ. Ka te Kristabitaabaŋ wa dire dɔgɛɛ, te na mɔɔ la te mɔɔre zaa ka te ko ba pɛnnoo a yi teŋ na wulo ba nyonono a kyɛ korɔ ba boma yɛlɛ naŋ na fɛre ba. Azuŋ ka teneeŋ wulo nɔmmo korɔ te yɔɔmine pampana, te na wuli baŋ nɔmmo nendaare kaŋa meŋ naŋ waana. Ka Jehoova meŋ pãã ko te nyɔvore naŋ ba taa baaraa, ana saŋa te na innee saammo bɛrɛ ane dɔgɛɛ zaa yɛlɛ.​—Aiz. 65:17.