Daŋ Ta Wa Yire A Siiloŋ Poɔ Paradiisi Na Poɔŋ

1. Boŋ la a siiloŋ poɔ paradiisi na, ka boŋ aŋ seŋ ka te e siri ka te e?

SIILOŊ poɔ paradiisi be la a teŋɛzu kyɛ zenɛ ŋa ka noba yaga naŋ be o poɔŋ nimiri moɔ̃ baŋ tonɔ tonsonne. Noba turituri yaga naŋ taa emmaaroŋ meŋɛmeŋɛ la be o poɔŋ. Noba na zaa naŋ be o poɔŋ na eɛ siri ka ba daŋ koŋ yi a siiloŋ poɔ paradiisi ŋa poɔŋ zaa. Ba maŋ boɔrɔŋ ka ba soŋ noba yaga zaa baŋ na toɔ̃ ka ba meŋ wa poɔ ba eŋɛŋ a siiloŋ poɔ paradiisi na poɔŋ!a

2. Bo yɛlɛŋ e nɔmãã yaga zaa a kyaare a siiloŋ poɔ paradiisi na?

² A eɛ nɔmãã yaga zaa Jehoova naŋ toɔ̃ soŋ o puorebiiri baŋ wa lantaa a taa noɔreyeni ane emmaaroŋ yaga zaa a Setaana donɛɛ ŋa naŋ paale neŋ kyiire taa, yelfaare ane dabeɛ̃ yaga zaa ŋa poɔŋ. (1 Gyn. 5:19; Yel. 12:12) Te Naaŋmen naŋ taa nɔmmo yaga zaa na nyɛrɛɛ lɛ Setaana donɛɛ ŋa naŋ saana noba yaga zaa yɛlɛ aseŋ, kyɛ o maŋ soŋɛɛ o puorebiiri baŋ taa gomeŋɛ ka lɛ na vɛŋ ka ba toɔ̃ puoruu neŋ popeɛloŋ. O Yelbiri na mannɛɛ a siiloŋ poɔ paradiisi na yɛlɛ ka o eɛ “lirizie” ane “dabaga baŋ mire koɔ̃.” (Aiz. 4:6; 58:11) Jehoova maaloo zuŋ, noba na zaa naŋ be a paradiisi ŋa poɔŋ na taa la gomeŋɛ ane popeɛloŋ a bebi-baaree ŋa naŋ e kpeɛŋaa ŋa poɔŋ.—Aiz. 54:14; 2 Tim. 3:1.

3. Sobuo ka a daŋyelbo naŋ be Aizeeya zuri 65 na da nyɛ eebo a takoreŋ Izerayɛl biiri saŋa na?

³ Jehoova da tu la daŋyele Aizeeya eŋɛŋ kyɛ manne wuli lɛ a siiloŋ poɔ paradiisi kpeɛbo naŋ na waa. A yɛlɛ ŋa be la Aizeeya zuri 65, a dɛndɛŋ saŋa a yɛlɛ ŋa naŋ nyɛ eebo la yuoni 537 B.C.E saŋa. A lɛ saŋa na, a Gyuumine na naŋ da e kaŋdabaŋkalɛ na da nyɛ la someŋɛ a yi a Baabilɔŋ gbaŋgbaaloŋ poɔŋ, a leɛ gaa ba meŋɛ paaloŋ. Jehoova da ko la o noba maaloo a soŋ ba baŋ leɛ mɛ Gyɛruzɛlɛm teŋɛ na oŋ veɛlɛ, a leɛ mɛ a ŋmenpuoredie meŋ ka be e zie baŋ da lɛ puoro Jehoova yelmennoŋ poɔŋ a Izerayɛl paaloŋ.—Aiz. 51:11; Zek. 8:3.

4. Sobuo ka a daŋyelbo naŋ be Aizeeya zuri 65 na nyɛrɛ eebo zenɛ ŋa?

⁴ Aizeeya daŋyelbo na da lɛ piili nyɛrɛɛ eebo yuoni 1919 C.E., saŋa na Jehoova puorebiiri naŋ da nyɛ someŋɛ yi Baabilɔŋ Kpoŋ poɔŋ. A lɛ saŋa, a siiloŋ poɔ paradiisi da piileeŋ a baara fẽẽfẽẽ fẽẽfẽẽ a donɛɛ lombori zaa. Naaŋ moɔleba naŋ taa eŋnyagroŋ yaga zaa da piileeŋ a sonnɔ noba yaga baŋ wa puoro Jehoova ka lantaapuoruu yaga wa bebe, baŋ da wulo Kristabiiloŋ gyogri meŋ yaga zaa. Dɔbɔ ane pɔgeba yaga naŋ da taa gyog-dɛgɛ yaga zaa da toɔ̃ barɛɛ a lɛ gyogri na kyɛ de “a gyog-paalaa na Naaŋmen naŋ tu o meŋɛ boɔbo poɔŋ a maale” na su pɔge ba menne. (Efe. 4:24) Yelmeŋɛ la, maaloo na zaa Aizeeya naŋ yel a yɛlɛ na na nyɛɛ eebo meŋɛmeŋɛ a donpaalaa poɔŋ. Kyɛ pampana ŋa gba te naŋ be a siiloŋ poɔ paradiisi poɔ na, te nyɛrɛɛ maaloo yaga. Te na wa zanne nyɛɛ tɔnɔ te naŋ nyɛrɛ yire a siiloŋ poɔ paradiisi na ane ananso aŋ ba seŋ ka te yi o poɔŋ.

TƆNƆ NOBA NAŊ BE A SIILOŊ POƆ PARADIISI NAŊ NYƐRƐ

5. Aŋa lɛ a noɔre emmo naŋ be Aizeeya 65:13 naŋ yel na, bo tɔnɔ mine teŋ nyɛrɛ a siiloŋ poɔ paradiisi na poɔŋ?

⁵ Ba maŋ di tigeŋ a nyɛ pɛnnoo. Aizeeya daŋyelbo na wulee tɛɛtɛɛloŋ yaga naŋ be noba naŋ be a siiloŋ poɔ paradiisi na ane noba naŋ ba kye a siiloŋ poɔ paradiisi na kpakyagaŋ. (Kanne Aizeeya 65:13.) Jehoova maŋ ko la o puorebiiri bonzaa yɛlɛ naŋ fɛre ba ka lɛ na baŋ vɛŋ ka ba tagra peɛloo. O ko teŋ o vooroŋ soŋ, o Yelbiri ane siiloŋ poɔ bondirii yaga zaa ka te na maŋ ‘di, . . . a nyu, . . . a kyillɛ.’ (De manne Yel-iriwulaa 22:17.) Kyɛ noba naŋ ba be a siiloŋ poɔ paradiisi na ba nyɛrɛ a boma ŋa kaŋa zaa, azuŋ ka “kɔŋ na [maŋ] kpɛ [ba] . . . , [ka] kɔŋnyuuri [meŋ kpɛ ba] . . . , [ka] vi . . . nyɔge [ba].” Ba neŋ Naaŋmen ba taa niiloŋ zaa.— Eem. 8:11.

6. Sobuo ka Jooel 2:​21-24 manne a siiloŋ poɔ kyɔɔtaare na te naŋ maŋ nyɛrɛ na, ka wala teŋ na baŋ e a nyɛ tɔnɔ yi a poɔŋ?

⁶ Gyoowɛl da de la boma mine a e yelmannaa o daŋyelbo na poɔŋ. A boma ŋa mine la bonbie, dãã, ane olive kãã a de wuli ka Jehoova maŋ korɛɛ O puorebiiri bonzaa yɛlɛ naŋ fɛre ba ane Baabole sowuli ka lɛ na vɛŋ ka ba sagediibu e kpeɛŋaa. (Jool. 2:​21-24) O maŋ eɛ lɛ a tuuro a Baabole ane te gama na poɔŋ, te intanɛt toma zie, te lammo bilii, gbandige lammore, ane te lammo bɛrɛ zaa. Bebiri zaa te na baŋ nyɛ la tɔnɔ a yi a boma ŋa eŋɛ, ka lɛ soŋ te ka te maŋ di tige a nyɛ pɛnnoo.

7. Boŋ maŋ soŋ te ka te “sukyie [maŋ] paale neŋ kyilloo”? (Aizeeya 65:14)

⁷ Ba maŋ taa la popeɛloŋ ka bonzaa ba naŋ taa seŋ ba. Naaŋmen noba maŋ “kyillɛŋ yaga” zaa bonso ba niŋe paɛ boma na zaa Jehoova naŋ maŋ ko ba na. (Kanne Aizeeya 65:14.) A yelmenne naŋ eŋnɛ faŋa yaga zaa ane nɔ-ennee na zaa naŋ be Naaŋmen Yelbiri na poɔŋ, ane teɛretɔ na te naŋ taa a Krista yɔɔdeɛbo sareka na zuŋ, te “sukyie [maŋ paaleŋ] neŋ kyilloo.” Ka te neŋ te yɔɔmineŋ wa dire dama kyaare a yɛlɛ ŋa, a maŋ vɛŋeŋ teŋ taa popeɛloŋ yaga zaa!—Yiem. 34:8; 133:​1-3.

8. Bo yelnimizeere ayi la be a siiloŋ poɔ paradiisi poɔŋ?

⁸ A nɔmmo ane noɔreyeni na Naaŋmen puorebiiri naŋ taa na la yɛlɛ ayi naŋ e nimizeɛ yaga zaa a siiloŋ poɔ paradiisi na poɔŋ. A “noɔreyeni” na te naŋ taa na maŋ soŋ teŋ teŋ baŋ lɛ zemmo naŋ na waa a donpaalaa poɔŋ. A lɛ saŋa na, Jehoova puorebiiri na taa la nɔmmo ane noɔreyeni yaga zaa a gaŋ pampana ŋa. (Kol. 3:14) Te yɔɔpɔge kaŋa mannɛɛ yɛlɛ oŋ da nyɛ a dɛndɛŋ saŋa na o naŋ nyɛ Jehoova puorebiiri na: “N da ba baŋ lɛ maŋ na e a taa popeɛloŋ N zemmo poɔŋ ane N booree poɔŋ. A dɛndɛŋ saŋa na maŋ nyɛ lɛ noba naŋ maŋ wulo yelmeŋɛ nɔmmo a korɔ taa la saŋa na maŋ da nyɛ Jehoova Sieree Deme na.” Ka neɛŋ boɔrɔ ka o taa popeɛloŋ meŋɛmeŋɛ ka bonzaa o naŋ taa yɛlɛ seŋ o yɛŋ, lɛ yɛŋ aseŋ ka o wa a siiloŋ poɔ paradiisi na. Lɛ zaa a donɛɛ deme naŋ teɛrɛ kyaare Jehoova puorebiiri, kyɛ ba taa la yosoŋ Jehoova ane o puorebiiri zaa naŋ be a aŋdonɛɛ zaa nimitɔɔreŋ.—Aiz. 65:15.

9. Bo noɔre emmo la ka Aizeeya 65:​16, 17 eŋ kyaare dɔgɛɛ na te naŋ dire pampana ŋa?

⁹ Ba maŋ mãã la ba menne a e bɔin. Aizeeya 65:14 yeleeŋ ka noba naŋ ba kye a siiloŋ poɔ paradiisi poɔ na “sukyie naŋ dɔɔnɔ [ba] zuŋ, [ba] na koŋeŋ, [ba] enne naŋ kyoɔre zuŋ, [ba] na ŋmeɛrɛɛ kpɛlle.” Kyɛ ka yɛlɛ na zaa naŋ vɛŋ ka Naaŋmen puorebiiri dire dɔgɛɛ yaga zaa na meŋ? A koŋ kɔɔre, “ba na innee a dɔgɛɛ na naŋ da bebe na; [Naaŋmen] nimie koŋ la nyɛ a.” (Kanne Aizeeya 65:​16, 17.) Jehoova na iree te dɔgɛɛ zaa bare, a gba na wa ta la saŋa kaŋa teŋ koŋ lɛ teɛre dɔgɛɛ na teŋ da maŋ dire na yɛlɛ.

10. Ananso la wala ka ho poɔ maŋ pɛle ka ho laŋna neŋ ho Kristabitaaba? (Kaa a foto meŋ.)

¹⁰ Te maŋ taa la sukyirimaaroŋ ka teneeŋ wa gaa te Kristabiiri lammore, bonso a maŋ soŋ teŋ teŋ e bɔin a kyɛ iri te teɛroŋ yi yɛlɛ naŋ maŋ vɛŋ teŋ dire dɔgɛɛ na eŋɛŋ. Ka teneeŋ wulo nɔmmo, popeɛloŋ, emmaaroŋ, nimimaaroŋ, ane bɔinloŋ naŋ e a Naaŋmen vooroŋ soŋ wɔnee gyogri na mine, a na soŋɛɛ te yɔɔmine ka ba taa sukyirimaaroŋ. (Gal. 5:​22, 23) Te poɔ pɛlɛɛŋ yaga zaa te naŋ poɔ Jehoova laŋnoɔre puoruu na poɔŋ! Ka Naaŋmen nɔ-ennee zaa o naŋ eŋ ka o na leɛ maalɛɛ “sazu paala ane teŋgaŋ-paalaa” naŋ wa nyɛ eebo, neɛzaa naŋ na be a siiloŋ poɔ paradiisi poɔŋ te ta a baaraa na nyɛɛ a maaloo.

11. Aŋa lɛ Aizeeya 65:​18, 19 naŋ yel na, te naŋ be a siiloŋ poɔ paradiisi na zuŋ, boŋ aŋ seŋ ka te erɛ?

¹¹ Ba maŋ taa la nimipa ane kyilloo. Aizeeya da lɛ wulee ananso aseŋ ka te “kyillɛ a taa popeɛloŋ” a siiloŋ poɔ paradiisi poɔŋ. Jehoova la maale a siiloŋ poɔ paradiisi ŋa. (Kanne Aizeeya 65:​18, 19.) Zirii puoruu ba wulo ba puorebiiri yelmeŋɛ naŋ kyaare Naaŋmen, azuŋ a ba e te nɔmãã Jehoova naŋ de te tonɔ neŋ toma a sonnɔ noba ka ba tage ba menne yi a donɛɛ ŋa ziri-ŋma puoruu zaa eŋɛŋ, ka lɛ na vɛŋ ka te toɔ̃ soŋ ba ka ba meŋ wa poɔ a siiloŋ poɔ paradiisi na poɔŋ! Te taa la popeɛloŋ yaga zaa ane maaloo na te naŋ maŋ nyɛ te naŋ be a yelmeŋɛ puoruu poɔŋ zuŋ, lɛ zuŋ teŋ maŋ de eŋnyagroŋ a moɔlɔ a duorisoŋ korɔ noba.—Jer. 31:12.

12. Ka hooŋ wa teɛre nɔ-ennee na zaa naŋ be Aizeeya 65:​20-24 na, wala aŋ maŋ erɛ bo, ka ananso la wala?

¹² Te taa la nimipa ane kyilloo neŋ teɛretɔ na te naŋ taa te neŋ Jehoova naŋ taa niiloŋ naŋ soma na zuŋ. Hooŋ teɛre nyɛ yɛlɛ na zaa teŋ na nyɛ ane yɛlɛ na zaa teŋ na e Naaŋmen donpaalaa na poɔŋ! A Baabole eŋɛɛ noɔre ka: “Ba daŋ koŋ lɛ nyɛ bibile . . . aŋ na taa nyɔvore beraa wala yoŋ, bee a nyɛ dɔɔ nyaaŋaa aŋ koŋ paale o beri.” Te na “mɛ la deri, a kpeɛrɛ a pooreŋ, [te na] sɛlɛɛ zemberemɛ teere a di a wɔmɔ.” Te koŋ “toŋ toma kpali” bonso te na eɛ noba ‘Jehoova naŋ ko maaloo.’ Jehoova eŋɛɛ noɔre ka o na ko teŋ zemmo naŋ soma, ka te taa gomeŋɛ, ka te zemmo meŋ taa tɔnɔ. “Sɛre kyɛ ka ba boɔle, ho na [sagɛɛ ba] boɔlɔ,” o na baŋɛɛ neɛzaa yelfɛree a “ko bonvori zaa o sukyiri poɔ yelboɔraa.”—Aiz. 65:​20-24; Yiem. 145:16.

13. Sobuoŋ ka Aizeeya 65:25 manne leɛroo na noba mine naŋ maŋ e ba zemmo poɔŋ ka ba naŋ wa piili puoro Jehoova?

¹³ Ba taa la emmaaroŋ ane gomeŋɛ. Naaŋmen vooroŋ soŋ na toɔ̃ soŋɛɛ noba naŋ da taa sutuloŋ ane gyog-faare yaga zaa baŋ leɛre ba eebo. (Kanne Aizeeya 65:25.) Ba mɔɔ la ba moɔbo zaa a bare ba gyog-faare na zaa. (Uro. 12:2; Efe. 4:​22-24) Yelmeŋɛ la, Naaŋmen puorebiiri ba pɛgeyi, azuŋ te naŋ na maŋ ŋmɛ la gbɛɛ. Kyɛ Jehoova vɛŋɛɛŋ ka “nemboorɔ zaa” naŋ nɔmoo a nɔŋ ba taaba meŋ wa lantaa, a taa emmaaroŋ meŋɛmeŋɛ ane noɔreyeni. (Tit. 2:11) A yɛlɛ ŋa eɛ yelseɛlee a kpeɛ̃o zaa daana Naaŋmen yoŋ naŋ na baŋ e!

14. Sobuo ka Aizeeya 65:25 nyɛ eebo te yɔɔdɔɔ kaŋa zemmo poɔŋ?

¹⁴ Ka lɛ neɛ na baŋ barɛɛ gyog-faare o naŋ taa na bee? Te nyɛ neɛ kaŋa zemmo yɛlɛ. Bipɔlee kaŋa baŋ da nyɔge o eŋ nempɔgedieŋ gbɛɛ yaga saŋa na oŋ da nyɛ yuomo 20 na, da taa la sutuloŋ yaga zaa a kyɛ da maŋ de o meŋɛ eŋnɛ peɛ̃mo toma poɔŋ. Ba da nyɔgooŋ eŋ a nempɔgedieŋ o naŋ zu lɔɔre, a kɔɔ kpɛ neɛ kaŋa die ane toŋfaare mine o naŋ toŋ zuŋ. O da maŋ eɛ siri meŋ ka o zɔɔzɔɔre wagre zaa. Saŋa na oŋ da wa woŋ yelmeŋɛ naŋ be a Baabole poɔŋ a piili gɛrɛ Jehoova Sieree Deme lammore na, o da wa nyɛɛŋ ka o nyɔvore taa la tɔnɔ, ka ana la oŋ na puoro Jehoova a siiloŋ poɔ paradiisi na poɔŋ. Saŋa na oŋ da wa de suobu baare na, gbɛɛ yaga o da maŋ teɛrɛɛ lɛ Aizeeya 65:25 naŋ kyaaroo. O da toɔ̃ barɛɛ o sutuloŋ na o naŋ da taa aŋ vɛŋ oŋ da waa ŋa gbeŋni na, kyɛ wa e neɛ naŋ boɔrɔ emmaaroŋ yaga zaa aŋa pilee.

15. Ananso la wala teŋ boɔrɔ ka te soŋ noba ka ba wa poɔ te eŋɛŋ a siiloŋ poɔ paradiisi na poɔŋ, ka wala teŋ na baŋ e lɛ?

¹⁵ Aizeeya 65:13 na piileeŋ a yelka: “Ŋaaŋ ka a Soobu Kpeɛ̃o Zaa Daana Jehoova yeli.” O wɛlbo 25 baaraa zie na meŋ yeleeŋ ka: “Jehoova la yeli.” O nɔ-ennee zaa maŋ nyɛɛ eebo. (Aiz. 55:​10, 11) A siiloŋ poɔ paradiisi na wa bebeŋ meŋɛmeŋɛ. Jehoova vɛŋɛɛŋ ka noba yaga wa lantaa a e booree deme naŋ puoruu. Te naŋ poɔ o booree na poɔŋ zuŋ, te taa la emmaaroŋ ane gomeŋɛ aneazaa ka te be la a donfaa ŋa poɔŋ. (Yiem. 72:7) Lɛ zuŋ teŋ boɔrɔ ka te soŋ noba yaga zaa te naŋ na toɔ̃, ka ba meŋ wa poɔ Jehoova booree na poɔŋ. Te na toɔ̃ eɛ lɛ ka teneeŋ mɔɔrɔ te moɔbo zaa ka te soŋ noba ka ba wa leɛ Krista potuuribo.—Mat. 28:​19, 20.

LƐ TEŊ NA BAŊ E SOŊ NOBA MINE KA BA MEŊ BOƆRƆ KA BA WA POƆ A SIILOŊ POƆ PARADIISI NA

16. Boŋ na baŋ soŋ noba ka ba meŋ boɔrɔ ka ba wa poɔ a siiloŋ poɔ paradiisi na poɔŋ?

¹⁶ Te kaŋa la kaŋa zaa taa la ferebo toma aŋ seŋ ka te toŋ a soŋ ka a siiloŋ poɔ paradiisi na maaleŋ veɛlɛ yaga zaa a ko noba. Ka teneeŋ na toɔ̃ toŋ a ferebo toma ŋa aseŋ ka te tɔglɔ Jehoova. O ba maŋ ferɛ noba ka ba wa poɔ o laŋnoɔre puoruu na poɔŋ. Kyɛ o maŋ yi la bɔinloŋ poɔŋ a ‘tagra’ noba peɛlɛ o meŋɛ. (Gyn. 6:44; Jer. 31:3) Ka sukyiri sonne demeŋ wa zanne Jehoova yɛlɛ a nyɛ lɛ oŋ taa nɔmmo ane gyog-sonne yaga zaa na, a maŋ vɛŋeŋ baŋ boɔrɔ ka ba tage peɛloo. Wala teŋ na baŋ e ka nobaŋ wa nyɛ te gyog-sonne ane te yel-eree ka ba meŋ boɔrɔ ka ba wa poɔ a siiloŋ poɔ paradiisi na poɔŋ?

17. Bo gyogo aŋ seŋ ka te taa ka lɛ na baŋ soŋ noba ka ba meŋ boɔrɔ ka ba wa a siiloŋ poɔ paradiisi na poɔŋ?

¹⁷ Sori na kaŋa teŋ na baŋ tu kyɛ tage noba waneŋ a siiloŋ poɔ paradiisi la ka te wulo nɔmmo ane nimimaaroŋ a korɔ te Kristabitaaba. Ka nempaalbaŋ wa wa te Kristabiiri lammore na, te boɔrɔŋ ka ba meŋ maŋ taa teɛroŋ na noba naŋ da ba e Kristabiiri naŋ da be Korinti a takoreŋ saŋa na meŋ naŋ da maŋ taa ka ba naŋ wa gaa a Kristabiiri lammore a lɛ saŋa. Ba da maŋ yeleŋ ka: “Naaŋmen sereŋ be la yɛ sogɔŋ.” (1 Kor. 14:​24, 25; Zek. 8:23) Azuŋ aseŋ ka te maŋ de a kawane naŋ yelka “yɛ taa emmaaroŋ a yɛ poɔ” na tonɔ neŋ toma.—1 Tɛs. 5:13.

18. Boŋ na baŋ vɛŋ ka noba boɔrɔ ka ba wa poɔ te laŋnoɔre puoruu na poɔŋ?

¹⁸ Te maŋ taa teɛroŋ na Jehoova naŋ taa kyaare te Kristabitaaba na. Ka teneeŋ boɔrɔ ka te erɛ lɛ yɛŋ, aseŋ ka te kaara ba gyog-sonne a kyɛ ta de te teɛroŋ zaa eŋ ba gyog-faare naŋ koŋ bebe gɛrɛ na yoŋ eŋɛŋ. Te na toɔ̃ sɛgrɛɛ nɔkpeɛne zaa naŋ be te neŋ te taaba kpakyagaŋ soŋ zaa lɛ ka teneeŋ maŋ wulo nɔmmo wagre zaa a “wulo taa nimimaaroŋ, a taa nyonono meŋ a ko taa, a vɛnɛ korɔ taa zaala zaala.” (Efe. 4:32) Lɛ na vɛŋeŋ ka noba naŋ boɔrɔ ka ba taaba maŋ wulo a gyogri ŋa korɔ ba na meŋ boɔrɔ ka ba wa poɔ a siiloŋ poɔ paradiisi na poɔŋ.b

NAŊ KYƐNƐ BE A SIILOŊ POƆ PARADIISI NA POƆŊ

19. (a) Aŋa lɛ te naŋ nyɛ a daga ŋa “Ba Yieŋ Kyɛ Leɛ Wa” poɔŋ na, wala ka noba mine naŋ da yi a siiloŋ poɔ paradiisi kyɛ leɛ wa na yel? (b) Bo aŋ seŋ ka te e siri ka te na eŋ? (Kaa a foto meŋ.)

¹⁹ Te niŋe paɛ̃ ane te siiloŋ poɔ paradiisi na yaga zaa! O veɛlɛŋ yaga zaa a gaŋ saŋa zaa naŋ pare, ka noba yaga meŋ naŋ puoro Jehoova be o poɔŋ. Te naŋ kyɛnɛ taa nimipa yaga zaa a ko a siiloŋ poɔ paradiisi na Jehoova naŋ maale ko te na. Neɛzaa naŋ boɔrɔ ka o nyɛ pɛnnoo, ka bonzaa o naŋ taa yɛlɛ seŋ o, a e bɔin, a kyɛ taa gomeŋɛ seŋ ka o wa a siiloŋ poɔ paradiisi a bebe gɛrɛ tegitegilɛ! Kyɛ aseŋ ka te kaara soŋ bonso Setaana boɔrɔŋ ka o bɛnle te ka te yi o poɔŋ. (1 Pit. 5:8; Yel. 12:9) Kyɛ a ba seŋ ka te koo vuo. Yɛ vɛŋ ka te mɔɔrɔ te moɔbo zaa ka a siiloŋ poɔ paradiisi na naŋ veɛlɛ, a e forifori, kyɛ ka emmaaroŋ meŋ bebe.