Yɛ “Moɔ̃ Niŋe A Gɛrɛ Nimitɔɔre A Wa E Noba Naŋ Kyile”

1. Bo ka Jehoova boɔrɔ yire te zie?

KA KULTAA demeŋ wa dɔge bie ba poɔ zaaŋ maŋ pɛle. Aneazaa ka a bidɔgreba na nɔŋ la ba bie na, kyɛ ba koŋ boɔrɔ ka o e bilɛɛ wagre zaa. Azuŋ a na dɔnnɔ baŋ yaga zaa ka ba bie naŋ ba baara. Lɛ meŋ la, Jehoova poɔ maŋ pɛleŋ ka teneeŋ wa piili zanna o yɛlɛ, kyɛ O ba maŋ boɔrɔ ka te vɛŋ ka a baare be. (1 Kor. 3:1) Azuŋ, o boɔrɔŋ ka te e “nembɛrɛ” Kristaaloŋ poɔŋ.​—1 Kor. 14:20.

2. Bo yɛlɛ teŋ na zanne a zannoo ŋa poɔŋ?

² Wala ka Kristabie naŋ kyile maŋ teɛrɛ kyɛ erɛ o yɛlɛ? Bo aŋ seŋ ka te e a toɔ̃ baa a wa leɛ Kristabiiri naŋ kyile? Ka teneeŋ zanna a Baabole poɔ yɛlɛ gɛrɛ tɔɔre, sobuo aŋ na baŋ soŋ te ka te neŋ Jehoova niiloŋ e kpeɛŋaa? Ananso la wala aŋ ba seŋ ka te teɛrɛ ka te kyilɛɛŋ baare azuŋ a ba lɛ fɛre ka te nyɛrɛ nimitɔɔre gaabo? A zannoo ŋa poɔŋ te na nyɛɛ a soorebie ŋa nɔɛ iribo.

WALA KA KRISTABIE NAŊ KYILE MAŊ TEƐRƐ KYƐ ERƐ O YƐLƐ?

3. Ka ba naŋ yelka neɛ baayɛŋ Kristaaloŋ poɔŋ wala ka lɛ wuli?

³ A Baabole poɔŋ a Giriki yelbiri naŋ are ko “nembɛrɛ” na tɛgɛ la “neɛ naŋ kyile” bee “neɛ naŋ paale pie.”a (1 Kor. 2:6) Aŋa lɛ bibile naŋ maŋ baa a wa leɛ neŋkpoŋ na, lɛ aŋ seŋ ka te meŋ baara Jehoova puoruu poɔŋ a wa leɛ Kristabiiri naŋ kyile. Ka teneeŋ gbaŋ wa leɛ Kristabiiri naŋ kyile, aseŋ ka te naŋ moɔ̃ nimiri a nyɛrɛ nimitɔɔre gaabo. (1 Tim. 4:15) Azuŋ te zaa ane baapaalba meŋ gba na baŋ nyɛɛ nimitɔɔre gaabo a wa leɛ Kristabiiri naŋ kyile. Kyɛ wala teŋ na baŋ e baŋ ka te kyilɛɛŋ Kristaaloŋ poɔŋ?

4. Boŋ maŋ wuli ka neɛ eɛ Kristabie naŋ kyile?

⁴ Kristabie naŋ kyile maŋ tuuree yelzaa Jehoova naŋ yelka o erɛ, kyɛ o ba maŋ tuuro bege na yoŋ oŋ boɔrɔ kyɛ bare ana na oŋ ba boɔrɔ na. Kyɛ onaŋ e neɛ naŋ ba pɛgeyi na zuŋ saŋa kaŋa ona maŋ ŋmɛɛ gbɛɛ. Kyɛ bebiri zaa o maŋ mɔɔrɔŋ ka o teɛrɛ ane o yel-eree zaa pɛle Jehoova poɔ. O de la a gyog-paalaa na su, a kyɛ maŋ mɔɔrɔ o moɔbo zaa ka o taa teɛroŋ na Naaŋmen naŋ taa na. (Efe. 4:22-24) O maŋ teɛrɛɛ Jehoova sowuli ane o bege yɛlɛ gaa tɔɔre aŋ somoo oŋ derɛ gbɛ-sonne. Azuŋ, a ba fɛre ka Jehoova koo bege yaga sɛre kyɛ ka o baŋ yɛlɛ naŋ seŋ ka o e ane yɛlɛ naŋ ba seŋ ka o e. Ka o naŋ wa de gbɛre, o maŋ mɔɔrɛɛ o moɔbo zaa ka o e yɛlɛ na o naŋ de gbɛre ka o e na.​—1 Kor. 9:26, 27.

5. Boŋ na baŋ pɔge neɛ naŋ ba kyile Kristaaloŋ poɔŋ? (Efesu 4:14, 15)

⁵ Kyɛ Kristabie naŋ ba kyile yɛŋ, a maŋ eɛ mɔlɔ lɛ ka o sage “bɛnlɛ yɛlɛ” ane zirii “daware deme” naŋ maŋ ŋmaara intanɛt zuŋ na, ane zirii nɔzagreba naŋ maŋ ŋmaara na.b (Kanne Efesu 4:​14, 15.) Kaapɔge o na maŋ erɛɛ o taaba nyuuri, a maŋ taa zɔɔre neŋ o taaba wagre zaa, ka o suuri meŋ ba yaara iribo. Ka o naŋ wa tuore pigrinyɛ meŋ a maŋ eɛ mɔlɔ lɛ ka o le a pigrinyɛ poɔŋ.​—1 Kor. 3:3.

6. Ananso la wala teŋ na baŋ de lɛ na bie naŋ maŋ baara na manne neŋ lɛ neɛ naŋ maŋ nyɛ nimitɔɔre gaabo a wa e Kristabie naŋ kyile? (Kaa a foto meŋ.)

⁶ Aŋa lɛ teŋ nyɛ a zannoo piileeŋ na, a Baabole de la lɛ na neɛ naŋ maŋ nyɛ nimitɔɔre gaabo a wa leɛ Kristabie naŋ kyile na manne neŋ lɛ na bie naŋ maŋ baa a wa leɛ neŋkpoŋ na. Bibile ba maŋ baŋ yɛlɛ yaga nimiri soŋ, azuŋ a maŋ somaŋ ka neŋkpoŋ kaŋa bebe a goruu a kyɛ wuluu yɛlɛ naŋ seŋ ka o e. Aŋa mannoo poɔŋ, ka bi-ma neŋ o bieŋ wa ŋmaara sori, o maŋ vɛŋeŋ ka a bie ti o nuŋ kyɛ baŋ zaa ŋmaa a sori. Saŋa na a bie naŋ baara na, aminekaŋaŋ a bi-ma na maŋ vɛŋeŋ ka a bie ŋmaa a sori o yoŋ tɛgɛ, kyɛ o na maŋ teɛrɛɛ a bie ka o kaa o nu gɔɔ ane o nu duri soŋ sɛre kyɛ ŋmaara a sori. Ka a bieŋ wa baa o meŋ na baŋɛɛ lɛ oŋ na maŋ e a kaara o meŋɛ soŋ ka o naŋ wa ŋmaara sori. Aŋa lɛ na aŋ seŋ ka neŋkpoŋ kaŋa sonnɔ bie naŋ naŋ baara ka yelfaa zaa ta pɔge o na, lɛ meŋ la aŋ seŋ ka Kristabiiri naŋ kyile sonnɔ Kristabiiri naŋ ba kyile ka ba ta wa erɛ yelzaa naŋ na baŋ sãã ba neŋ Jehoova niiloŋ na, a kyɛ derɛ gbɛ-sonne ba zemmo poɔŋ. Kyɛ Kristabiiri naŋ kyile yɛŋ, sɛre baŋ na de gbɛre, ba maŋ teɛrɛɛ a Baabole poɔ yɛlɛ gaa tɔɔre a nyɛ teɛroŋ na Jehoova naŋ taa kyaare a yɛlɛ, kyɛ pãã de a gbɛre ka ane Jehoova boɔbo kyaare taa.

7. A maŋ fɛreŋ ka Kristabiiri naŋ kyile bɔ sommo yi ba taaba zieŋ saŋa kaŋa bee?

⁷ Ka lɛ neɛ naŋ kyile Kristaaloŋ poɔŋ yɛŋ ba boɔrɔ neɛ zaa sommo bee? Ai. Saŋa kaŋa a na maŋ fɛreŋ ka Kristabiiri naŋ kyile meŋ bɔ sommo yi neɛ kaŋa zie. Kyɛ neɛ naŋ ba kyile maŋ boɔrɔŋ ka neɛ kaŋa wuluu yɛlɛ naŋ seŋ ka o e ane gbɛre naŋ seŋ ka o de. Kristabie naŋ kyile yɛŋ maŋ bɔ la sommo yi noba naŋ taa yɛŋ ane bammo yaga zie, kyɛ baŋ ka a eɛ o meŋɛ ferebo toma ka o de gbɛre, a baŋ meŋ ka o na “tuo la o meŋɛ tuobu.”—Gal. 6:5.

8. Bo yɛlɛ poɔŋ la ka Kristabiiri naŋ kyile yɛlɛ ba maŋ yitaa?

⁸ Aŋa lɛ noba zaa naŋ baa a e nembɛrɛ naŋ ba maŋ yi taa ba waaloŋ poɔŋ na, lɛ meŋ la ka Kristabiiri zaa naŋ kyile ba taa gyogri naŋ yitaa. Ba mine taa la yɛŋ yaga zaa, ka ba mine meŋ taa nyaa yaga zaa, ka ba mine meŋ maŋ yuoro ba nu yaga zaa, ka ba mine meŋ maŋ taa nembaalonzoe yaga zaa. Azuŋ ka Kristabiiri bayi naŋ kyileŋ wa derɛ gbɛre a kyaare yelkaŋa, aminekaŋaŋ ba zaa gbɛ de na koŋ yitaa kyɛ ane Baabole sowuli na kyaarɛɛ taa. Gbɛɛ yaga a yɛlɛ ŋa maŋ eŋ ka a gbɛ deŋ wa kyaare zoma neɛ naŋ taa eŋɛŋ. Azuŋ ba koŋ maŋ dire taa sɛrɛɛ ka ba gbɛ deŋ ba wa kyaare taa. Kyɛ ba maŋ mɔɔrɔŋ ka ba taa noɔreyeni.​—Uro. 14:10; 1 Kor. 1:10.

BO AŊ SEŊ KA TE E A TOƆ̃ BAA A WA LEƐ KRISTABIIRI NAŊ KYILE?

9. Neɛ na baŋ baaŋ a wa leɛ Kristabie naŋ kyile zaala lɛ bee? Wuli a muni.

⁹ Ka bieŋ wa baara, lɛ zaa naŋ la o na baaŋ a wa leɛ neŋkpoŋ. Kyɛ ka neɛŋ na wa leɛ Kristabie naŋ kyile yɛŋ, aseŋ ka o e yelkaŋa sɛre kyɛ na baŋ nyɛ nimitɔɔre gaabo a wa leɛ Kristabie naŋ kyile. Aŋa mannoo poɔŋ, Kristabiiri naŋ da be Korinti na da sage la a duorisoŋ a wa de suobu, ka Jehoova ko ba a vooroŋ soŋ, baŋ da zanne yɛlɛ yaga meŋ yi yɛlɛ na Pɔɔl naŋ da wuli ba na. (Tom. 18:8-11) Kyɛ baŋ da wa de suobu baare yuomo mine puoriŋ na, ba yaga zie zaa da naŋ ba e Kristabiiri naŋ kyile. (1 Kor. 3:2) Kyɛ wala ka teneeŋ yɛŋ na baŋ e a toɔ̃ nyɛrɛ nimitɔɔre gaabo wieoŋ a wa e Kristabiiri naŋ kyile?

10. Boŋ aŋ seŋ ka te e a wa leɛ Kristabiiri naŋ kyile? (Gyud 20)

¹⁰ Ka teneeŋ taa a boɔbo ka te e Kristabiiri naŋ kyile, lɛŋ na baŋ soŋ te ka te toɔ̃ e lɛ. Bana na naŋ “boɔrɔ babammo” na ba maŋ boɔrɔ ka ba nyɛ nimitɔɔre gaabo, ba daŋ koŋ baŋ nyɛ nimitɔɔre gaabo zaa meŋ. (Yeng. 1:22) Te ba boɔrɔ ka te waa ŋa neɛ naŋ baa a leɛ neŋkpoŋ kyɛ ba boɔrɔ ka ferebo toma zaa dɔgle o zuŋ, ka lɛ vɛŋ oŋ maŋ boɔrɔ ka o dɔgreba naŋ derɛ gbɛɛ koroo. Kyɛ aseŋ ka te vɛŋ ka a e te meŋɛ ferebo toma ka te mɔɔrɔ ka te nyɛ nimitɔɔre gaabo ka te neŋ Jehoova niiloŋ e kpeɛŋaa yaga zaa. (Kanne Gyud 20.) Ka hooŋ naŋ mɔɔrɔ ka ho nyɛ nimitɔɔre gaabo a wa leɛ Kristabie naŋ kyile, puore sɔre Jehoova ka o ko bo “a boɔbo ane a kpeɛ̃o ka [ho] de toŋ neŋ toma.”—Fil. 2:13.

11. Bo yɛlɛ ka Jehoova maŋ e a soŋ te ka te nyɛ nimitɔɔre gaabo a wa leɛ Kristabiiri naŋ kyile? (Efesu 4:11-13)

¹¹ Jehoova ba kaara soriŋ ka te nyɛ nimitɔɔre gaabo a wa e Kristabiiri naŋ kyile te meŋɛ. Te yɔɔmine naŋ e pekyeeneba ane wulwulibo a Krista lantaapuoruu poɔŋ na eɛ siri ka ba soŋ te zaa ka te neŋ Jehoova niiloŋ e kpeɛŋaa yaga zaa, a wa e noba “naŋ seŋ lɛ na Krista naŋ waa na meŋɛmeŋɛ.” (Kanne Efesu 4:​11-13.) Jehoova maŋ la ko teŋ o vooroŋ soŋ ka o soŋ te ka te taa a “Krista teɛroŋ.” (1 Kor. 2:14-16) A Duorisoŋ Gama anaare na Naaŋmen vooroŋ soŋ naŋ vɛŋ baŋ sɛge na meŋ wuli teŋ Yezu teɛrɛ, o yelyaga, ane o yel-eree saŋa na oŋ da be a donɛɛ zuŋ kyɛ a tonɔ o naaŋ moɔloo toma na. Ka hooŋ tɔglɔ lɛ Yezu naŋ da maŋ teɛrɛ yɛlɛ ane o yel-eree, a na soŋ boŋ ka ho nyɛ nimitɔɔre gaabo a wa leɛ Kristabie naŋ kyile.

KA TENEEŊ ZANNA A BAABOLE POƆ YƐLƐ GƐRƐ TƆƆRE, SOBUO AŊ NA BAŊ SOŊ TE KA TE NEŊ JEHOOVA NIILOŊ E KPEƐŊAA

12. Bo la a yɛlɛ na “ba naŋ da piili [wulo] te kyaare ne a Krista” na?

¹² Ka teneeŋ na baŋ nyɛ nimitɔɔre gaabo a kyile Kristaaloŋ poɔŋ, aseŋ ka te zanna boma yaga zaa a gaŋ “Krista wuluu piiluu yɛlɛ” teŋ da zanne a piilee saŋa na. A yɛlɛ na mine teŋ da zanne a piilee saŋa na la, yelbebe sudi, sagediibu, suobu deebo, ane kũũ leɛ-iruu yɛlɛ. (Hib. 6:1, 2) A eɛ yɛlɛ na Kristabiiri zaa naŋ sagedi. A lɛ zuŋ ka a bitontona Piita da manne a yɛlɛ ŋa neŋ a zu ko a noba saŋa na oŋ da moɔlɔ a duorisoŋ korɔ a nembeɛoŋ Pɛnteko bebiri na. (Tom. 2:32-35, 38) Aseŋ ka te sage a yɛlɛ ŋa teŋ da zanne a piilee saŋa na kyɛ na baŋ wa leɛ Krista potuuribo. Aŋa mannoo poɔŋ, Pɔɔl da kpãã la a Kristabiiri ka neɛzaa naŋ zagre a kũũni leɛ-iruu wuluu na, koŋ baŋ e Krista potuuro. (1 Kor. 15:12-14) Kyɛ a ba seŋ ka te vɛŋ ka yɛlɛ na teŋ da zanne a piilee saŋa na yoŋ seŋ te.

13. Ka teneeŋ maŋ zanna Naaŋmen Yelbiri na gɛrɛ tɔɔre, bo tɔnɔ teŋ na nyɛ aŋa lɛ Hiburu 5:14 naŋ yel na? (Kaa a foto meŋ.)

¹³ A piilee yɛlɛ na te naŋ maŋ zanne na maŋ soŋ teŋ teŋ baŋ Jehoova bege, kyɛ ka teneeŋ wa zanna Jehoova yɛlɛ gɛrɛ tɔɔre a maŋ soŋ teŋ teŋ baŋ Jehoova sowuli meŋ, a sowuli ŋa maŋ soŋ teŋ teŋ baŋ teɛroŋ na Jehoova naŋ taa. Ka teneeŋ na baŋ nyɛ tɔnɔ yi a yɛlɛ ŋa poɔŋ aseŋ ka te maŋ zanne Naaŋmen Yelbiri na, a maŋ teɛrɛ yɛlɛ na te naŋ zanna na gɛrɛ tɔɔre, a de tonɔ neŋ toma meŋ te zemmo poɔŋ. Ka teneeŋ wa erɛ lɛ, a na soŋ teŋ ka te baŋ gbɛɛ na a naŋ seŋ ka te de ka a pɛle Naaŋmen poɔ.c—Kanne Hiburu 5:14.

14. Sobuo ka Pɔɔl da tu kyɛ soŋ a Kristabiiri naŋ da be Korinti na baŋ wa leɛ Kristabiiri naŋ kyile?

¹⁴ Ka Baabole bege zaaŋ ba wa kyebe a kyaare yelkaŋa, a maŋ eɛ kpeɛŋaa ka Kristabiiri naŋ ba kyile de gbɛre naŋ soma. Ka anaŋ wa waa lɛ, ba mine maŋ teɛrɛŋ ka ba na baŋ eɛ lɛ zaa ba naŋ boɔrɔ. Ba mine meŋ maŋ boɔrɔŋ ka ba ko ba bege ka Baabole bege zaaŋ ba wa kyebe kyaare a yɛlɛ. Aŋa mannoo poɔŋ, aminekaŋaŋ Kristabiiri naŋ da be Korinti na da soorɛɛ Pɔɔl ka ka lɛ a tu la sori ka ba di bondirii ba naŋ de maale maala ko tebɛ bee a ba tu sori? Pɔɔl da wuli baŋ ka ba kaŋa zaa taa la sori ka o kaa iri bon na o naŋ “boɔrɔ.” O da wuli baŋ Baabole sowuli mine naŋ na soŋ ba ka ba ta de gbɛre naŋ na vɛŋ ka ba zoma dɔnnɔ ba ka ba erɛ wa ŋmɛ gbɛre. (1 Kor. 8:4, 7-9) Pɔɔl da wulee a Kristabiiri naŋ be Korinti na lɛ baŋ na baŋ peɛre a sɛgre poɔ yɛlɛ a de ba menne gbɛɛ, a gaŋ baŋ na kaara neɛ kaŋa ka o de gbɛre ko ba bee a boɔrɔ ka ba nyɛ bege naŋ na wuli ba yɛlɛ naŋ seŋ ka ba e. Azuŋ o da sonnɔ baŋ ka ba wa leɛ Kristabiiri naŋ kyile.

15. Wala ka Pɔɔl da e soŋ a Hiburu Kristabiiri na ka ba neŋ Jehoova niiloŋ maaleŋ e kpeɛŋaa?

¹⁵ Te lɛ zannɛɛ yelnimizeɛ kaŋa yi lɛtɛ na Pɔɔl naŋ da sɛge ko a Hiburu Kristabiiri na. Ba mine da ba lɛ mɔɔrɔ ba mɔɔbo zaa ka ba neŋ Jehoova niiloŋ e kpeɛŋaa; ba da leɛ eɛ “noba naŋ hiena beroŋ, a kyɛ ba hiena [bondi tage].” (Hib. 5:12) Ba da ba lɛ zanne a wa sage yelpaala na Jehoova lantaapuoruu naŋ da wulo ba na. (Yeng. 4:18) Aŋa mannoo poɔŋ, a Gyuumine yaga zie zaa da naŋ maŋ yeleŋ ka aseŋ ka ba tuuro a Moosis Bege na, kyɛ yuomo 30 naŋ da pare Yezu kũũ sareka na zuŋ, a Bege da ba lɛ tonɔ toma. (Uro. 10:4; Tit. 1:10) Yuomo 30 da eɛ wagre naŋ kɔɔre yaga zaa, a da ko a Gyuumine vuo ka ba wa sage ka a ba lɛ seŋ ka ba tuuro a Moosis Bege! Azuŋ Pɔɔl pãã da mɔɔrɔŋ ka o soŋ ba ka ba zanne a yelmenne ŋa naŋ e zuluŋ yaga zaa a yi lɛtɛ na oŋ da sɛge ko ba na poɔŋ. A yɛlɛ ŋa da eŋɛɛ ba sagediibu faŋa yaga zaa, a kyɛ lɛ soŋ ba baŋ wa nyɛ ka a Krista puoruu na Yezu naŋ de wane na la soma gaŋ sori na baŋ da maŋ tu kyɛ puoro Jehoova na. A da lɛ soŋ ba baŋ taa nyaa a moɔlɔ a duorisoŋ aneazaa ka a Gyuumine da dɔgrɔ baŋ.​—Hib. 10:19-23.

ANANSO LA WALA AŊ BA SEŊ KA TE TEƐRƐ KA TE KYILƐƐŊ BAARE AZUŊ A BA LƐ FƐRE KA TE NYƐRƐ NIMITƆƆRE GAABO?

16. Ka teneeŋ wa e Kristabiiri naŋ kyile kyɛ bo aŋ seŋ ka te naŋ erɛ?

¹⁶ Ka teneeŋ wa e Kristabiiri naŋ kyile kyɛ aseŋ ka te naŋ mɔɔrɔ te moɔbo zaa ka te naŋ kyɛnɛ e noba naŋ kyile a Kristaaloŋ poɔŋ wagre zaa. Azuŋ te daŋ ta wa bɛnlɛ te menne ka te kyile baarɛɛŋ azuŋ a ba lɛ fɛre ka te naŋ mɔɔrɔ te moɔbo zaa ka te neŋ Jehoova niiloŋ na e kpeɛŋaa. (1 Kor. 10:12) Aseŋ ka te naŋ “kyɛnɛ peɛrɛ” te menne nyɛrɛ ka te nyɛrɛɛ nimitɔɔre gaabo bee.​—2 Kor. 13:5.

17. Sobuo ka lɛtɛ na Pɔɔl naŋ da sɛge ko a Kolosi deme na soŋ te teŋ nyɛ lɛ aŋ e nimizeɛ ka te naŋ kyɛnɛ e noba naŋ kyile a Kristaaloŋ poɔŋ?

¹⁷ A lɛtɛ na Pɔɔl naŋ da sɛge ko a Kolosi deme na poɔŋ, o da lɛ wulee lɛ a naŋ e nimizeɛ ka te naŋ mɔɔrɔ te moɔbo zaa ka te naŋ e noba naŋ kyile. Aneazaa ka Kristabiiri naŋ da be Kolosi na da kyilɛɛŋ, kyɛ Pɔɔl da kpãã baŋ ka aseŋ ka ba naŋ kaara ba menne soŋ ka a donɛɛ teɛroŋ ta wa bɛnle ba. (Kol. 2:6-10) Epaferase meŋ naŋ da baŋ a lantaapuoruu noba yaga zaa na da maŋ puoro sɔrɔŋ wagre zaa ka ba “baa ta noba,” bee a e noba naŋ kyile. (Kol. 4:12) Bo teŋ na baŋ zanne yi a yɛlɛ ŋa poɔŋ? Pɔɔl ane Epaferase zaa da baŋɛɛŋ ka aseŋ ka Naaŋmen soŋ te ka te e noba naŋ kyile, a kyɛ lɛ baŋ meŋ ka aseŋ ka te meŋ mɔɔrɔ te moɔbo zaa ka te neŋ Naaŋmen taa niiloŋ naŋ soma. Ba da boɔrɔŋ ka ba soŋ a Kolosi noba ka ba naŋ e noba naŋ kyile, bee a e kpeɛne a Kristaaloŋ poɔŋ aneazaa ka ba da tuoree yelkpeɛne ba zemmo poɔŋ.

18. Boŋ na baŋ pɔge Kristabie naŋ kyile? (Kaa a foto meŋ.)

¹⁸ Pɔɔl da kpãã la a Hiburu deme na ka ka Kristabie naŋ kyileŋ ba kaara soŋ, o neŋ Naaŋmen niiloŋ na baŋ sãã kpɛlɛŋkpɛlɛŋ. Ka Kristabieŋ zagre ka o sage Jehoova noɔre a na baŋ sãã la o neŋ Jehoova niiloŋ yaga zaa ka o sukyiri zaa ko ka o koŋ baŋ lɛ e kaŋdabaŋkalɛ ka Naaŋmen di suuri koo. A popɛle yɛlɛ naŋ bebe la ka, a Hiburu Kristabiiri na neŋ Jehoova niiloŋ da ba sãã gaa tɔɔre. (Hib. 6:4-9) Ka bana na meŋ naŋ maŋ bare lammozie waabo bee baŋ iri ba bare a lantaapuoruu poɔŋ kyɛ ka a puoriŋ baŋ wa e kaŋdabaŋkalɛ na meŋ? Ka ba naŋ sigre ba menne a e kaŋdabaŋkalɛ a leɛ wa, a wuleeŋ ka bana yɛŋ ba poɔ noba na Pɔɔl naŋ da yele ba yɛlɛ na. Kyɛ ka ba naŋ wa leɛ wa Jehoova zie, a na fɛreŋ ka ba sage sommo na Jehoova naŋ na ko ba na. (Izik. 34:15, 16) Aminekaŋaŋ a lantaapuoruu nembɛrɛ na iree te yɔɔ kaŋa naŋ kyile ka o soŋ a soba ka o neŋ Jehoova niiloŋ lɛ e kpeɛŋaa.

19. Bo yɛlɛ aŋ seŋ ka te de biŋ te nimitɔɔreŋ?

¹⁹ Ka hooŋ mɔɔrɔ ho moɔbo zaa ka ho e Kristabie naŋ kyile, ho na toɔ̃ eɛ lɛ! Naŋ moɔ̃ nimiri a zanna Baabole poɔ yelmenne naŋ e tigrɛ, a maŋ teɛrɛ a yɛlɛ gɛrɛ tɔɔre, a na soŋ boŋ ka ho taa Jehoova teɛroŋ. Ka hooŋ e Kristabie naŋ kyile meŋ, mɔɔrɔ ho moɔbo zaa ka ho naŋ e Kristabie naŋ kyile a gɛrɛ wagre naŋ ba taa baaraa.