Tɔglɔ A Malekere Naŋ Puoro Jehoova Yelmennoŋ Poɔŋ Na

1-2. (a) Bo yɛlɛ mine poɔŋ la ka malekere neŋ nensaaleba ba yitaa? (b) Bo yɛlɛ mine la ka malekere neŋ nensaaleba zaa na baŋ e?

JEHOOVA la soŋ bo hoŋ wa a yelmeŋɛ puoruu poɔ. Azuŋ, ho wa poɔ la Jehoova booree na poɔŋ. Jehoova puorebiiri naŋ be a donɛɛ lombori zaa wa leɛ la ho yɔɔmine. A malekere turituri naŋ be sazuŋ na meŋ poɔ la Jehoova booree na poɔŋ. (Daan. 7:9, 10) Kyɛ, aminekaŋaŋ te na teɛreŋ ka te neŋ a malekere ba yitaa, azuŋ sobuoŋ ka te ne ba na toɔ̃ laŋ booree? Aŋa mannoo poɔŋ, a malekere bebeŋ kɔɔre yaga zaa sɛre ka Jehoova wa maale Adama. (Joob 38:4, 7) A malekere lɛ taaɛ kpeɛ̃o gaŋ te. Te eɛ noba naŋ ba pɛgeyi, kyɛ a malekere yɛŋ eɛ forifori, a maŋ erɛ yɛlɛ naŋ tori meŋ wagre zaa.​—Luk. 9:26.

² A yi yɛlɛ mine poɔŋ te neŋ a malekere yɛlɛ ba yitaa. Kyɛ, yɛlɛ mine meŋ bebeŋ ka te neŋ a malekere zaa na baŋ e. Aŋa mannoo poɔŋ, a malekere na baŋ tɔglɛɛ Jehoova gyog-sonne na. A malekere taaɛ apoɔsori ka ba derɛ ba menne gbɛɛ. A malekere yeni yeni zaa taaɛ ba yoe, ka ba kaŋa zaa meŋ taa gyogo naŋ e o yoŋ. Lɛ naane teŋ meŋ waa bee? A maleke kaŋa zaa taaɛ toŋ-noɔre Jehoova naŋ koo ka o tonɔ, aŋa lɛ na Jehoova naŋ de toma eŋ te kaŋa zaa nuuriŋ na. Te neŋ a malekere zaa baŋɛɛŋ ka a eɛ nimizeɛ ka te puoro Jehoova.​—1 Pit. 1:12.

3. Bo yɛlɛ teŋ na zanne a zannoo ŋa poɔŋ a kyaare a malekere naŋ puoro Jehoova yelmennoŋ poɔŋ na?

³ Aŋa lɛ na te naŋ nyɛ na, te neŋ a malekere taaɛ apoɔsoe ka te erɛ yɛlɛ mine. Azuŋ, ka teneeŋ zanne a malekere ewuli soŋ na, a na eŋ teŋ faŋa yaga, a lɛ soŋ te ka te moɔ̃ niŋe a erɛ yɛlɛ naŋ soma. A yi a zannoo ŋa poɔŋ, te na zannɛɛ lɛ na a malekere naŋ puoro Jehoova yelmennoŋ poɔŋ naŋ sigri ba menne, a wulo nɔmmo korɔ noba, a dire kannyiri, ane moɔbo na baŋ moɔrɔ ka ba vɛŋ ka a lantaapuoruu e forifori na. Te na lɛ zannɛɛ lɛ teŋ na toɔ̃ e a tɔglɔ ba ewuli soŋ na.

A MALEKERE TAAƐ SIGRIMENNOŊ GYOGO

4. (a) Wala ka a malekere e a de wuli ka ba sigree ba menne? (b) Bonso ka a malekere sigri ba menne lɛ? (Yieme 89:7a)

⁴ A malekere naŋ puoro Jehoova yelmennoŋ poɔŋ na taaɛ sigrimennoŋ gyogo. Aneazaa ka ba kyillɛɛŋ soŋ, a taa kpeɛ̃o, ane yɛŋ naŋ e zuluŋ meŋ, kyɛ ba maŋ de la Jehoova sowuli tonɔ neŋ toma wagre zaa. (Yiem. 103:20) Ka ba naŋ wa te toŋ toma zaa a baare, ba ba maŋ de yɛlɛ na baŋ toɔ̃ e na zɛgrɛ neŋ ba menne. Ba ba maŋ de ba kpeɛ̃o na meŋ erɛ yelseɛlɛ, ka lɛ na vɛŋ ka noba teɛroŋ wa ba eŋɛŋ. Ba maŋ de la popeɛloŋ a erɛ yɛlɛ Jehoova naŋ boɔrɔ, haali ka nobaŋ ba baŋ ba yoe gba.a (Mun. 32:24, 29; 2 Nam. 19:35) Yieme 89:7a yeleeŋ ka: ‘O eɛ Naaŋmen naŋ seŋ neŋ zoobu yaga zaa a neŋpɛgeyiribe [kyɛbee malekere] lammoŋ.’ A malekere ba maŋ sage ka noba de gyeremɛ neŋ pugibu ko ba. Ba maŋ de la a pugibu neŋ a gyeremɛ zaa korɔ Jehoova. A malekere nɔŋ la Jehoova, a lɛ taa gyeremɛ meŋ naŋ e zuluŋ koo, azuŋ baŋ maŋ sigri ba menne lɛ.

5. Saŋa na a maleke naŋ da derɛ kawane korɔ bitontona Gyɔɔn na, wala oŋ da e a de wuli ka o sigree o meŋɛ? (Kaa a foto.)

⁵ A Baabole vɛŋɛɛŋ teŋ baŋ ka a malekere taaɛ sigrimennoŋ gyogo. Aŋa yuoni 96 C.E. maleke kaŋa a Baabole naŋ ba boɔle o yuori da de la yelnyɛ kaŋa naŋ wulo yeltegrɛ mine naŋ na nyɛ eebo wa wuli bitontona Gyɔɔn. (Yel. 1:1) Saŋa na Gyɔɔn naŋ da wa nyɛ a yɛlɛ zaa baare na, o da boɔrɔŋ ka o de puoruu ko a maleke. Kyɛ, a maleke da lonneeŋ wieoŋ a yelko Gyɔɔn ka: “A ba fere ka ho e a lɛ! N waa la ho tonton-tɔsoba a laŋ ne a ho yɔɔmine . . . Puoro Naaŋmen!” (Yel. 19:10) A maleke ŋa sigree o meŋɛ paa! O da ba boɔrɔ gyeremɛ bee pugibu zaa. O da lonnee wieoŋ a yelko Gyɔɔn ka o puoro Jehoova Naaŋmen. A maleke da ba teɛre ka oŋ e maleke na zuŋ, o eɛ neŋtegroŋ gaŋ Gyɔɔn. Aneazaa ka a maleke de la yuomo yaga a puore Jehoova, a lɛ taa kpeɛ̃o gaŋ Gyɔɔn meŋ, kyɛ o da boɔlɛɛ Gyɔɔn ka o tonton-tɔsoba. Yelmeŋɛ la, a da fɛrɛɛŋ ka a maleke de kawane ko Gyɔɔn. Azuŋ, a maleke da yi la nimimaaroŋ poɔŋ a koo a kawane. A maleke da nyɛɛŋ ka yɛlɛ na Gyɔɔn naŋ nyɛ na da vɛŋɛɛŋ ka o noɔre mãã yaga zaa, azuŋ oŋ da boɔrɔ ka o de puoruu koo.

6. Wala teŋ na baŋ e a de wuli ka te tɔglɛɛ a malekere sigrimennoŋ gyogo na?

⁶ Wala teŋ na baŋ e a de wuli ka te tɔglɛɛ a malekere sigrimennoŋ gyogo na? Ka teneeŋ wa tonɔ tonkpeɛne Jehoova puoruu poɔŋ, ka a vɛŋ ka yɛlɛ nyɛrɛ nimitɔɔre gaabo, kyɛbee ka teneeŋ wa baŋ yɛlɛ mine eebo velaa zaa, a na somaŋ yaga ka te tɔglɔ a malekere a naŋ kyɛnɛ sigre te menne. (1 Kor. 4:7) Ane meŋ, ka teneeŋ de yuomo yaga puore Jehoova, kyɛbee a taa apoɔsoe mine te taaba naŋ ba taa, kyɛ a ba seŋ ka te daŋ teɛre ka te seɛ baŋ zaa. Ho baŋɛɛ yelnimizeɛ kaŋa? Ka teneeŋ wa taa apoɔsoe yaga Jehoova puoruu poɔŋ, a saŋa la aŋ maaleŋ e nimizeɛ yaga zaa ka te naŋ kyɛnɛ sigre te menne. (Luk. 9:48) Aseŋ ka te tɔglɔ a malekere a maŋ tonɔ korɔ te taaba. A ba seŋ ka te maŋ erɛ yɛlɛ naŋ wuli ka te boɔrɛɛ yuori korɔ te menne.

7. Wala teŋ na baŋ e a de wuli ka te sigree te menne saŋa na teŋ wa korɔ neɛ kaŋa kawane na?

⁷ Ka teneeŋ waana ka te ko te Kristabitɔ kaŋa, kyɛbee te bie kawane, te na baŋ lɛ wulee sigrimennoŋ gyogo. Saŋa kaŋa a maŋ fɛreŋ ka te vɛŋ ka o soba baŋ ka yɛlɛ na oŋ e na ba tori fẽẽ zaa. Nyɛ lɛ aŋ na soma yaga zaa ka teneeŋ tɔgle a maleke, a yi nimimaaroŋ poɔŋ a soŋ o soba ka o nyɛ ka yɛlɛ na oŋ e na ba tori. Ka teneeŋ e lɛ, o soba eŋɛ koŋ kyoɔre. Ka teneeŋ sigri te menne, te na maŋ yi la gyeremɛ ane nimimaaroŋ poɔŋ a de Baabole poɔ kawane korɔ te taaba.​—Kol. 4:6.

A MALEKERE NƆNƆ LA NOBA

8. (a) Aŋa lɛ na Luka 15:10 naŋ wuli na, wala ka a malekere maŋ e a de wuli ka ba nɔnɔ la noba? (b) Sobuo ka a malekere sonnɔ te a naaŋ moɔloo toma poɔŋ? (Kaa a foto.)

⁸ A malekere nɔnɔ la nensaaleba. Bonso teŋ yeli lɛ? Ka toŋfatonaŋ wa leɛre o eebo, a leɛ wa Jehoova zie, a malekere poore zaaŋ maŋ pɛle. Ka neɛŋ mɔɔ a bare yelfaare oŋ erɛ a kyɛ wa puoro Jehoova, a malekere poore maŋ pɛleŋ yaga. (Kanne Luka 15:10.) A malekere la sonnɔ te teŋ tonɔ a naaŋ moɔloo toma. (Yel. 14:6) Yelmeŋɛ la, a malekere menne naaneŋ maŋ gaa a noba zie a te moɔle a duorisoŋ ko ba. Kyɛ, a na baŋ wuli teŋ sori ka te gaa noba naŋ boɔrɔ ka ba zanne Jehoova yɛlɛ zie. Te koŋ baŋ yelka neɛzaa teŋ pɔge a naaŋ moɔloo poɔŋ, a malekere la wuli te sori teŋ gaa o zie. Kyɛ, yɛlɛ teŋ baŋ la ka, Jehoova na baŋ tu la soe yaga a soŋ o puorebiiri ka ba gaa sukyirisonne deme zie. Aŋa mannoo poɔŋ, o na baŋ tu la o vooroŋ soŋ na eŋɛŋ a wulo te sori. (Tom. 16:6, 7) Kyɛ, a malekere la ka Jehoova kaa iri ka ba sonnɔ te a naaŋ moɔloo toma poɔŋ. Azuŋ, ka teneeŋ wa moɔlɔ a duorisoŋ korɔ noba, te na baŋ taaɛ sagediibu ka a malekere na sonnɔ teŋ.—Kanne yɛlɛ naŋ be a daga ŋa poɔŋ, “Naaŋmen Da Iree Ba Puoro Nɔɛ Ko Ba.”

9. Wala teŋ na baŋ e a tɔglɔ a malekere a wulo noba nɔmmo?

⁹ Wala teŋ na baŋ e a tɔglɔ a malekere a wulo noba nɔmmo? Ka ba naŋ wa tere moɔlɔ a lammozieŋ, ka ba leɛ deɛ la neɛ kaŋa waneŋ a lantaapuoruu poɔŋ, te maŋ tɔglɛɛ a malekere a kyillɛ. Te maŋ yi la te poɔ zaa a vɛŋ ka te yɔɔ na baŋ ka te naŋ nɔmooŋ. Te maŋ lɛ vɛŋeŋ oŋ baŋ ka te poɔ pɛlɛɛŋ yaga oŋ leɛ wa poɔ te eŋɛŋ teŋ zaa puoro Jehoova. (Luk. 15:4-7; 2 Kor. 2:6-8) Ka teneeŋ maŋ moɔrɔ te moɔbo zaa a naaŋ moɔloo toma poɔŋ, a lɛ eɛ sori kaŋa teŋ lɛ tu a tɔglɔ a malekere. (Ikil. 11:6) A malekere maŋ sonnɔ teŋ a naaŋ moɔloo toma poɔŋ. Aseŋ ka te meŋ maŋ sonnɔ te yɔɔmine a naaŋ moɔloo poɔŋ. Aŋa mannoo poɔŋ, te neŋ neɛ kaŋa naŋ piili a naaŋ moɔloo toma aŋ ba kɔɔre na toɔ̃ gaaɛ a naaŋ moɔloo. Te na baŋ lɛ narɛɛ te menne ka te neŋ te yɔɔmine yuomo naŋ nyɛ nimitɔɔre gaabo gaa a naaŋ moɔloo.

10. Bo yɛlɛ teŋ na baŋ zanne yi Sara zemmo yɛlɛ ŋa poɔŋ?

¹⁰ Kyɛ, te de ka te zemmo yɛlɛ ba korɔ te sori ka te tonɔ toma yaga Jehoova puoruu poɔŋ, wala aŋ seŋ ka te e? Te na baŋ bɔ la so-yobo mine teŋ na baŋ tu ka te neŋ a malekere laŋ tonɔ toma a naaŋ moɔloo poɔŋ. Te zanne yɛlɛ yi te yɔɔpɔge Sarab zemmo yɛlɛ ŋa poɔŋ. India paaloŋ ka Sara be. O da moɔ̃ la niŋe a tonɔ a paaneɛ toma aŋa yuomo 20, kyɛ ka baaloŋ kpeɛŋaa kaŋa da kpɛ o, ka lɛ vɛŋ oŋ maŋ gaŋ gado zuŋ wagre zaa. O koŋ baŋ iri o meŋɛŋ a yi yeŋe. Oo, a yɛlɛ ŋa da vɛŋɛɛŋ ka Sara eŋɛ zaa kyoɔre. Azuŋ, te yɔɔmine na da emooŋ faŋa yaga zaa. Sara da moɔ̃ la niŋe a kanna a Baabole meŋ. A yɛlɛ ŋa zaa da somooŋ oŋ leɛ taa popeɛloŋ. Kyɛ, Sara koŋ baŋ iri zeŋ gba. Azuŋ, wala oŋ na toɔ̃ e sɛge lɛtare ko noba? Sara da nyɛɛŋ ka aseŋ ka o tu so-yuo kaŋa a tonɔ a naaŋ moɔloo toma. O da maŋ tu la fone zuŋ a moɔlɔ a duorisoŋ korɔ noba. O da maŋ lɛ boɔlɛɛ noba na o ne ba naŋ di dama na. Ba mine da maŋ lɛ ko oŋ noba mine meŋ poɔ naŋ pɛle a duorisoŋ yɛlɛ nambare. Aŋa kyuuri awala mine kpakyagaŋ, Sara neŋ noba naŋ ta 70 da zannɛɛ a Baabole. O gba da ba nyɛrɛ wagre korɔ o Baabole zannezanneba na zaa. Azuŋ, o da de la ba mine ko a lantaapuoruu noba mine ka ba ne ba zanna. O Baabole zannezanneba na kpoŋ zie zaa waanɛɛ te lammore na. Ka a malekereŋ wa nyɛ noba naŋ waa ŋa Sara naŋ moɔrɔ ba moɔbo zaa a naaŋ moɔloo poɔŋ, ba poore zaaŋ maŋ pɛle.

A MALEKERE NYƆGRƐƐ BA MENNE

11. Wala ka a malekere e a de wuli ka ba nyɔgrɛɛ ba menne yaga zaa?

¹¹ A malekere eɛ ewuli soŋ yaga zaa a kyaare nyɔge meŋɛ. A yuomo turituri ŋa zaa poɔŋ, a malekere de la ba nimie a nyɛ daŋkyagre ane potu-yɛlɛ na Jehoova naŋ tuore na. Aŋa mannoo poɔŋ, ba neŋ Setaana neŋ a malekefaare zaaŋ da laŋ puoro Jehoova yelmennoŋ poɔŋ. Kyɛ, ka Setaana neŋ a malekefaare de taawae a zagre Jehoova puoruu bare. (Mun. 3:1; 6:1, 2; Gyud. 6) A Baabole gba yeleeŋ ka Jehoova da toŋ la a maleke kaŋa ka o te toŋ toma mine, kyɛ a malekefaa kaŋa naŋ taa kpeɛ̃o da tuorooŋ soriŋ, a moɔrɔ ka o pigoo sori. (Daan. 10:13) A yi nensaaleba zemmo zaa poɔŋ, a malekere nyɛɛŋ ka noba fẽẽ lɛ yoŋ naŋ be a teŋɛzuŋ la maŋ puoro Jehoova yelmennoŋ poɔŋ. Aneazaa, a malekere naŋ de la popeɛloŋ ane eŋnyagroŋ puoro neŋ Jehoova. A malekere baŋɛɛŋ ka wagre naŋ seŋ neŋ poɔŋ, Naaŋmen na iree daŋkyagre zaa bare.

12. Boŋ na baŋ soŋ te ka te nyɔgrɔ te menne?

¹² Wala teŋ na baŋ e a tɔglɔ a malekere a meŋ nyɔgrɔ te menne? Te meŋ eɛ noba naŋ nyɛrɛ daŋkyagre, ka noba maŋ lɛ iri zɔɔrɔ ne te meŋ. Kyɛ, te meŋ taaɛ sagediibu ka, wagre naŋ seŋ neŋ poɔŋ, Naaŋmen na iree yelfaare neŋ neŋfaare zaa bare. Azuŋ, te ba maŋ ‘vɛŋ ka te nuuri kyoɔre ne tonsonne tommo.’ (Gal. 6:9) Naaŋmen eŋ teŋ noɔre ka o na sonnɔ teŋ ka te nyɔgrɔ te menne. (1 Kor. 10:13) Te na baŋ puore sɔrɛɛ Jehoova ka o soŋ te neŋ o vooroŋ soŋ na. A vooroŋ soŋ na baŋ soŋ teŋ ka te dire kannyiri, a lɛ taa popeɛloŋ meŋ. (Gal. 5:22; Kol. 1:11) Ka nobaŋ wa iri zɔɔrɔ ne te, wala aŋ seŋ ka te e? A ba seŋ ka te zoro dabeɛ̃, kyɛ aseŋ ka te dɛle Jehoova kpɛlɛŋkpɛlɛŋ. Jehoova naŋ na sonnɛɛ o puorebiiri a eŋnɛ ba faŋa meŋ.—Hib. 13:6.

A MALEKERE MAŊ MOƆRƆŊ KA BA VƐŊ KA A LANTAAPUORUU E FORIFORI

13. Bo toŋ tegroŋ la ka Jehoova de eŋ a malekere nuuriŋ a bebi-baaree ŋa poɔŋ? (Matio 13:47-49)

¹³ A bebi-baaree ŋa poɔŋ, Jehoova de la toŋ tegroŋ kaŋa eŋ a malekere nuuriŋ. (Kanne Matio 13:​47-49.) A naaŋ moɔloo toma yuo la sori ko noba turituri yaga baŋ wa leɛ Jehoova puorebiiri. Ba mine maŋ leɛrɛɛ ba eebo a wa puoro Jehoova, kyɛ ka ba mine meŋ zagre. A eɛ a malekere ferebo toma ka ba ‘wɛle a neŋfaare yi a nemmenne poɔ.’ Lɛ wuleeŋ ka, Jehoova kaa iri baŋ ka ba moɔ a vɛŋ ka a lantaapuoruu e forifori. Lɛ ba wuli ka, ka neɛ kaŋaŋ bare Jehoova puoruu, o soba koŋ toɔ̃ leɛ wa. A ba lɛ wuli meŋ ka yɛlɛ na kyɛnɛɛ soŋ zaa a lantaapuoruu poɔŋ wagre zaa. Kyɛ, te na baŋ taaɛ sagediibu ka a malekere moɔrɛɛ ba moɔbo zaa ka ba vɛŋ ka a lantaapuoruu e forifori.

14-15. A malekere maŋ moɔrɛɛ ba moɔbo zaa ka ba vɛŋ ka a lantaapuoruu e forifori, wala teŋ na baŋ e a tɔglɔ ba ewuli soŋ na? (Kaa a fotori.)

¹⁴ Wala teŋ na baŋ e a tɔglɔ a malekere a erɛ yɛlɛ naŋ na vɛŋ ka a lantaapuoruu e forifori? Aseŋ ka te moɔ te moɔbo zaa a erɛ yɛlɛ naŋ na vɛŋ ka te e forifori, a lɛ vɛŋ ka te neŋ Jehoova niiloŋ na e kpeɛŋaa. Lɛ wuleeŋ ka aseŋ ka te kaa iri te zɔmenne velaa, a lɛ tage te menne yi yelzaa naŋ na toɔ̃ vɛŋ ka te taa gyog-sããnee meŋ eŋɛŋ. Lɛ eebo na soŋ teŋ ka te go te sukyie. (Yiem. 101:3) Te na baŋ lɛ soŋɛɛ te yɔɔmine meŋ ka ba naŋ kyɛnɛ dire yelmennoŋ korɔ Jehoova. Aŋa mannoo poɔŋ, ka teneeŋ wa baŋ ka te yɔɔ kaŋa eɛ yelfaa kaŋa naŋ e nimizeɛ, wala aŋ seŋ ka te e? Te naŋ nɔŋ o soba zuŋ, te na yi la nimimaaroŋ poɔŋ a emoo faŋa ka o gaa a lantaapuoruu nembɛrɛ zie a te bɔ sommo. Ka o sobaŋ zagre ka o manne a yɛlɛ ko a lantaapuoruu nembɛrɛ, lɛ yɛŋ te menne na de la gbɛre a te manne a yɛlɛ ko a lantaapuoruu nembɛrɛ. Bonso, te boɔrɔŋ ka ba soŋ te yɔɔ na neŋ Jehoova niiloŋ naŋ sãã na wieoŋ.—Gyi. 5:14, 15.

¹⁵ A yɛlɛ nembao zie la ka, noba mine naŋ e yelfaare naŋ e nimizeɛ ba maŋ leɛre ba eebo, azuŋ a maŋ wa fɛreŋ ka ba iri ba bare a lantaapuoruu poɔŋ. Te ba maŋ lɛ laŋna neŋ noba ba naŋ iri bare.c (1 Kor. 5:9-13) A yelsɛgraa ŋa maŋ vɛŋeŋ ka a lantaapuoruu e forifori. Lɛ eebo meŋ maŋ soŋ baŋ yaga zaa. A maŋ vɛŋeŋ baŋ nyɛ ka ba ŋmɛɛ gbɛre naŋ e nimizeɛ. Azuŋ, ba mine maŋ leɛrɛɛ ba eebo a leɛ wa Jehoova zie. Ka ba naŋ e lɛ, te ne Jehoova ane a malekere zaa maŋ laŋ kyillɛŋ.​—Luk. 15:7.

16. Bo yɛlɛ mine la hoŋ na baŋ e a de wuli ka ho tɔglɛɛ a malekere?

¹⁶ Nyɛ apoɔsori naŋ seŋ lɛ ka Jehoova ko te. O vɛŋɛɛŋ teŋ baŋ a malekere yɛlɛ, a lɛ vɛŋ ka te ne ba laŋ tonɔ toma. Azuŋ, yɛ vɛŋ ka te zaa moɔ̃ niŋe a tɔglɔ a malekere, a naŋ sigri te menne, a nɔnɔ noba, a nyɔgrɔ te menne, a erɛ yɛlɛ naŋ na vɛŋ ka a lantaapuoruu e forifori meŋ. Ka teneeŋ tɔglɔ a malekere, te na wa poɔ la Jehoova booree naŋ na zeŋ tegitegilɛ a de puoruu naŋ seŋ neŋ koroo na poɔŋ.