Sori Jehoova Naŋ Maŋ Tu A Sonnɔ Te Teŋ Dire Kannyiri

1. Bonso aŋ fɛre ka te dire kannyiri? Nembuoŋ na toɔ̃ soŋ te ka te dire kannyiri? (1 Piita 5:10)

A YI a donɛɛ bebi-baaree naŋ e kpeɛŋaa ŋa poɔŋ, a fɛrɛɛŋ ka Jehoova puorebiiri zaa dire kannyiri. Te mine, baaloŋ faa kaŋa la kpɛ te teŋ tegoo lɛɛŋ a te bale. Te mine meŋ nɔŋneba kpieŋ kyɛ bare te. Ka te mine meŋ dɔgreba ane gɔmenante nembɛrɛ dɔgrɔ te te naŋ e Kristabiiri zuŋ. (Mat. 10:​18, 36, 37) Kyɛ, te boɔrɔŋ ka ho baŋ peɛlaaŋ ka, yelkpeɛŋaa zaa hoŋ tuoro, Jehoova na toɔ̃ soŋ boŋ ka ho are a noɔreŋ.—Kanne 1 Piita 5:10.

2. Boŋ maŋ toɔ̃ soŋ Kristabiiri baŋ dire kannyiri?

² Kannyiri soba maŋ nyɔgɛɛ o teɛretɔ na kpeɛŋaakpeɛŋaa, haali saŋa na oŋ tuoro yelkpeɛne, dɔgroŋ, yeltuo, ane pigrinyɛ. Jehoova la maŋ sonnɔ Kristabiiri baŋ toɔ̃ dire a kannyiri ŋa tɔ. Bonso a Baabole yeleeŋ ka Jehoova la maŋ ko te “kpeɛ̃o ŋa naŋ ba taa mannoo.” (2 Kor. 4:7) A zannoo ŋa poɔŋ, te na zannɛɛ boma anaare mine Jehoova naŋ ko te ka a soŋ te ka te dire kannyiri. Te na lɛ nyɛɛ lɛ na teŋ na baŋ de a boma kaŋa zaa tonɔ neŋ toma.

PUORO

3. Bonso teŋ na baŋ yelka puoro eɛ soseɛlee kaŋa teŋ maŋ tu a yele yɛlɛ korɔ Jehoova?

³ Puoro eɛ soseɛlee na kaŋa Jehoova naŋ maŋ tu a soŋ te teŋ dire kannyiri. Te eɛ noba naŋ ba pɛgeyi, kyɛ Jehoova naŋ yuo la sori ko te ka te maŋ puoro sɔroo. (Hib. 4:16) Wagre zaa te naŋ boɔrɔ, te na baŋ puore sɔrɛɛ Jehoova a yeli yelzaa te naŋ boɔrɔ koo. Kɔkɔre zaa te naŋ yele, kyɛbee zie zaa te naŋ be, haali ka tenee e te yoŋ, kyɛbee a be nempɔgedieŋ gba, kyɛ Jehoova maŋ kyɛllɛɛ te puore sɔroo. (Joona 2:​1, 2; Tom. 16:​25, 26) Ka yɛlɛŋ wa dɔɔnɔ te yaga zaa ka te ba baŋ yɛlɛ teŋ na manne ko Jehoova puoro poɔŋ, kyɛ o naŋ maŋ baŋɛɛ yɛlɛ na teŋ da boɔrɔ ka te yeli. (Uro. 8:​26, 27) Yelmeŋɛ zaa, puoro eɛ soseɛlee kaŋa teŋ maŋ tu a yele yɛlɛ korɔ Jehoova!

4. Bonso teŋ na baŋ yelka a eɛ Jehoova boɔbo ka te maŋ puoro sɔroo ka o soŋ te ka te are kpeɛŋaa?

⁴ Jehoova vɛŋɛɛŋ teŋ baŋ a yi a Baabole poɔŋ ka, “ka tenee wa sɔre bonzaa naŋ tu O poboɔbo, O maŋ kyɛlle woŋ la.” (1 Gyn. 5:14) Te na baŋ puore sɔrɛɛ Jehoova ka o soŋ te ka te dire kannyiri. A eɛ Jehoova boɔbo ka te dire kannyiri. Ka teneeŋ wa are te yelkpeɛne noɔreŋ, Jehoova maŋ iree yɛlɛ noɔre ko Setaana a Dɛɛvul. (Yeng. 27:11) Ane meŋ, a Baabole lɛ yeleeŋ ka Jehoova eŋɛ maŋ nyagraŋ ka o ‘wuli ka o eɛ kpeɛ̃o daana a ko noba na sukyie naŋ dɛloo.’ (2 Tun. 16:9) Azuŋ, te na baŋ sagediŋ peɛlaaŋ ka Jehoova boɔrɔŋ ka o soŋ te ka te dire kannyiri, o lɛ taaɛ a kpeɛ̃o meŋ ka o soŋ te.—Aiz. 30:18; 41:10; Luk. 11:13.

5. Sobuo ka puoro na baŋ soŋ te ka te taa teɛroŋ yeni? (Aizeeya 26:3)

⁵ A Baabole yeleeŋ ka, ka teneeŋ wa puoro sɔrɔ Jehoova nimizeɛ̃, o na vɛŋeŋ ka ‘a Naaŋmen maaroŋ naŋ zuo bammo zaa na gu te sukyie ane te teɛrɛ a Krista Yezu eŋɛ.’ (Fil. 4:7) Sobuo ka lɛ na toɔ̃ soŋ te ka te dire kannyiri? Noba naŋ ba puoro Jehoova meŋ tuoree yelkpeɛne. Ba mine maŋ eɛ yɛlɛ yaga a moɔrɔ ka ba inni ba yelkpeɛne na. Kyɛ, a Naaŋmen maaroŋ na la na baŋ ko neɛ teɛroŋ yeni meŋɛmeŋɛ a gaŋ yelzaa. Ka teneeŋ wa puoro sɔrɔ Jehoova, a wuleeŋ ka te dɛlooŋ. Azuŋ, o naŋ na ‘kyɛnɛ korɔ teŋ emmaaroŋ.’ (Kanne Aizeeya 26:3.) Saŋa kaŋa Jehoova maŋ soŋ teŋ teŋ leɛteɛre yelnimizeere mine naŋ diire sukyiri teŋ zanne yi a Baabole poɔŋ. A yelnimizeere ŋa maŋ vɛŋeŋ teŋ taa teɛroŋ yeni neŋ sukyirimaaroŋ, bonso te baŋɛɛŋ ka Jehoova kaarɛɛ te zu velaa, a boɔrɔ ka te yɛlɛ meŋ zaa maale.—Yiem. 62:​1, 2.

6. Bo yɛlɛ mine la hoŋ na baŋ puore sɔre ho puore sɔroo poɔŋ? (Kaa a foto.)

⁶ Yɛlɛ hoŋ na baŋ e. Ka hooŋ wa tuoro yelkpeɛne, puore sɔre Jehoova ka o soŋ bo. ‘De ho tuo-tegrɛ dɔgle Jehoova eŋɛŋ,’ sɔroo ka o ko bo a Naaŋmen maaroŋ. (Yiem. 55:22) Sɔre Jehoova ka o ko bo yɛŋ ka ho toɔ̃ are ho yelkpeɛne na noɔreŋ. (Yeng. 2:​10, 11) Saŋa na hoŋ moɔ̃ niŋe a puoro sɔrɔ Jehoova ka o soŋ bo ka ho dire kannyiri na, ta wa inne ka ho puoroo bareka meŋ. (Fil. 4:6) Kaara boɔrɔ soe na Jehoova naŋ tuuro a kyɛ sonnɔ bo hoŋ are a yelkpeɛŋaa noɔreŋ, maŋ puoroo bareka neŋ sommo na oŋ sonnɔ bo na. Aminekaŋaŋ, yelkpeɛŋaa na hoŋ tuoro na vɛŋɛɛŋ hoŋ dire dɔgɛɛ yaga, kyɛ ta vɛŋ ka lɛ pigi bo sori ka ho ba lɛ nyɛrɛ lɛ na Jehoova naŋ sonnɔ bo na.—Yiem. 16:​5, 6.

A BAABOLE

7. Sobuo ka a Baabole zannoo na baŋ soŋ te ka te dire kannyiri?

⁷ A Baabole eɛ bon na kaŋa Jehoova naŋ ko te ka o de soŋ te ka te dire kannyiri. A Baabole poɔ yɛlɛ vɛŋɛɛŋ teŋ baŋ ka Jehoova na maŋ sonnɔ teŋ. Aŋa mannoo poɔŋ, Matio 6:8 yeleeŋ ka: “Yɛ Saa maŋ daŋ baŋ la bon yɛ naŋ boɔrɔ ka yɛ naŋ ba sɔre O sɛre.” Yezu la baŋ Jehoova velaa a gaŋ neɛzaa. Azuŋ, a yɛlɛ ŋa oŋ yeli na vɛŋɛɛŋ teŋ baŋ peɛlaaŋ ka, ka teneeŋ wa tuoro yelkpeɛne, Jehoova maŋ baŋɛɛ yɛlɛ naŋ na baŋ soŋ te ka te are a yelkpeɛne noɔreŋ. A yɛlɛ ama taa gyamaa be la a Baabole poɔŋ. A na baŋ eŋ teŋ faŋa ka te dire kannyiri.—Yiem. 94:19.

8. (a) Manne Baabole sowuli kaŋa naŋ na baŋ soŋ te ka te dire kannyiri. (b) Boŋ na baŋ soŋ te ka te maŋ teɛrɛ Baabole sowuli naŋ na baŋ soŋ te te yelkpeɛne saŋa?

⁸ Baabole sowuli na baŋ soŋ teŋ ka te dire kannyiri. Baabole sowuli maŋ vɛŋeŋ teŋ e yɛmbaŋneba, azuŋ, te maŋ derɛɛ gbɛ-sonne. (Yeng. 2:​6, 7) Aŋa mannoo poɔŋ, a Baabole ko teŋ kawane ka bebiri zaa maŋ taaɛ o yelwonii, azuŋ a ba seŋ ka te maŋ vɛŋ ka bieu yɛlɛ maaleŋ dɔɔnɔ te yaga zaa te gaali. (Mat. 6:34) Ka teneeŋ maŋ kanna a Baabole bebiri zaa, a maŋ teɛrɛ o poɔ yɛlɛ gɛrɛ tɔɔre, a na soŋ teŋ ka te maŋ teɛre Baabole sowuli naŋ na baŋ soŋ te saŋa na teŋ wa tuoro yelkpeɛne.

9. Sobuo ka yɛlɛ naŋ be a Baabole poɔŋ na na baŋ soŋ te ka te baŋ ka Jehoova na soŋ teŋ?

⁹ Ka hooŋ kaa a Baabole poɔŋ, ho na nyɛŋ ka ba sɛgɛɛ noba mine naŋ da dɛle Jehoova oŋ soŋ ba zemmo yɛlɛ eŋ beŋ. Ba meŋ da tuoree yelkpeɛne aŋa tenee. (Hib. 11:​32-34; Gyi. 5:17) Ka teneeŋ maŋ kanne ana yɛlɛ na a teɛre a yɛlɛ gaa tɔɔre, a na eŋ teŋ faŋa ka te taa sagediibu ka Jehoova la “te lirizie ane te faŋa, O eɛ sonnɔ naŋ bebe wagre zaa a ko toɔrɔ saŋa.” (Yiem. 46:1) Ka teneeŋ wa kanne a Baabole a nyɛ lɛ na Jehoova puorebiiri naŋ da puoruu yelmennoŋ poɔŋ na, a maŋ tɔɛ te sukyie teŋ tɔglɔ ba sagediibu ane kannyiri diibu na.—Gyi. 5:​10, 11.

10. Sobuo ka a Baabole poɔ yɛlɛ na baŋ soŋ bo?

¹⁰ Yɛlɛ hoŋ na baŋ e. Maŋ mɔɔ a kanne a Baabole bebiri zaa. Maŋ sɛge Baabole sɛgre naŋ na baŋ soŋ bo eŋ zie kaŋaŋ. Te yɔɔmine yaga maŋ kannɛɛ a bebiri zaa Baabole sɛgre na beguo zaa. A maŋ soŋ baŋ baŋ teɛrɛ a Baabole sɛgre yɛlɛ a bebiri zaa. Te yɔɔpɔge Mariea dɔgreba taaɛ kansa baaloŋ. O yeleeŋ ka a bebiri zaa Baabole sɛgre na somooŋ yaga. O wulee bon naŋ somoo oŋ dire kannyiri a kaara o dɔgreba zu saŋa na aŋ da wa kyɛre fẽẽ ka ba kpi na. O yeleeŋ ka: “Bebiri zaa beguo saŋa, N maŋ kannɛɛ a Baabole sɛgre naŋ be a Examining the Scriptures Daily gambile na poɔŋ a teɛre o yɛlɛ gaa tɔɔre. A maŋ soŋ maŋ maŋ de N teɛroŋ eŋ Jehoova ane yelsonne na oŋ wulo te yire a Baabole poɔŋ na eŋɛŋ. Azuŋ, N ba maŋ de N teɛroŋ zaa eŋ yelkpeɛne na maŋ tuoro na eŋɛŋ.”—Yiem. 61:2.

TE YƆƆMINE

11. Saŋa na teŋ wa baŋ ka te yoŋ naane wono tuo na, sobuo aŋ na baŋ soŋ te ka te dire kannyiri?

¹¹ Jehoova ko teŋ te yɔɔmine ka ba soŋ te ka te toɔ̃ dire kannyiri. A Baabole yeleeŋ ka, “yɛ yɔɔmine ane a yɛ yɔɔpuuli naŋ be a tendaa lamboe zaa meŋ wono la a tuo ŋa tɔ.” (1 Pit. 5:9) A yɛlɛ ŋa yoŋ gba maŋ dii la te sukyie teŋ baŋ ka te ba e te yoŋ. Azuŋ, yelkpeɛŋaa zaa hoŋ tuoro, baŋ ka ho yoŋ naaneŋ tuoro ana yelkpeɛŋaa na. Noba mine meŋ daŋ tuoraaŋ a kyɛ toɔ̃ are a noɔreŋ. Lɛ wuleeŋ ka ho meŋ na toɔ̃ arɛɛ a noɔreŋ.—Tom. 14:22.

12. Sobobo poɔŋ ka te yɔɔmine na baŋ tu a soŋ te? Bo yɛlɛ teŋ meŋ na toɔ̃ e ko ba? (2 Korinti 1:​3, 4)

¹² Te yɔɔmine na baŋ tu la ba yelyelii ane ba yel-eree eŋɛŋ a eŋ te faŋa ka te naŋ kyɛnɛ dire kannyiri. Lɛ ka bitontona Pɔɔl Kristabitaaba da erɛ koroo. Gbɛɛ yaga, o da maŋ boɔlɛɛ noba naŋ da sonnoo saŋa na baŋ da nyɔgoo pɔge dieŋ na yoe a puore ba bareka. Ba da maŋ dii la Pɔɔl sukyiri, a emoo faŋa, a lɛ e yɛlɛ mine meŋ a somoo. (Fil. 2:​25, 29, 30; Kol. 4:​10, 11) Zenɛ ŋa meŋ te yɔɔmine na toɔ̃ eɛ lɛ a soŋ te. Ka teneeŋ wa boɔrɔ sommo ka te are te yelkpeɛne noɔreŋ, te yɔɔmine maŋ wa soŋ teŋ. Ka ba naŋ meŋ wa boɔrɔ sommo, te maŋ lonneŋ wieoŋ a de sommo naŋ seŋ neŋ a te ko ba.—Kanne 2 Korinti 1:​3, 4. 

13. Boŋ da soŋ te yɔɔpɔge Maya oŋ dire kannyiri?

¹³ Russia paaloŋ ka te yɔɔpɔge Maya be. Te yɔɔmine na emooŋ faŋa yaga zaa. Yuoni 2020, polisiri da wa welɛɛ o die zaa. A puoriŋ ba da de oŋ gaaneŋ sɛrɛɛ diibu zie a te sooroo yɛlɛ a kyaare o sagediibu. Maya yeleeŋ ka: “A da wa ta la saŋa kaŋa ka N eŋɛ zaa kyoɔre. Te yɔɔmine na da boɔle maŋ fone zuŋ, a sɛge lɛtare meŋ a de toɔle ma, a vɛŋ maŋ baŋ ka ba nɔŋ maŋ. N da baŋɛɛŋ peɛlaaŋ ka N yɔɔmine na nɔŋɛɛ maaŋ neŋ N booree deme. Kyɛ, yɛlɛ naŋ e 2020 na vɛŋɛɛŋ ka a yɛlɛ ŋa maaleŋ pɛle ko ma yaga zaa.”

14. Sobuo ka te yɔɔmine na toɔ̃ soŋ te ka te naŋ kyɛnɛ dire kannyiri? (Kaa a foto.)

¹⁴ Yɛlɛ hoŋ na baŋ e. Ka hooŋ tagra peɛlɛ ho yɔɔdɔba neŋ ho yɔɔpɔgeba, ba na soŋ boŋ ka ho naŋ kyɛnɛ dire kannyiri. Ta maŋ naara ka ho sɔre sommo yi a lantaapuoruu nembɛrɛ zieŋ. Ba na toɔ̃ eɛ “lirizie a yi sasekpeɛŋaa eŋɛŋ, a e sɔglezie a yi saa saseɛ eŋɛŋ.” (Aiz. 32:2) Leɛteɛre meŋ ka ho Kristabitaaba meŋ tuoree yelkpeɛne a kyɛ dire kannyiri. Azuŋ, ka hooŋ e yelsoŋ kaŋa ko neɛ kaŋa naŋ boɔrɔ sommo, haali saŋa na hoŋ tuoro yelkpeɛne, a na vɛŋeŋ ka ho taa popeɛloŋ, a lɛ soŋ bo ka ho are ho yelkpeɛne na noɔreŋ.—Tom. 20:35.

TE TEƐRETƆ NA

15. (a) Sobuo ka teɛretɔ na Yezu naŋ da taa na da somoo? (b) Sobuo ka teɛretɔ na baŋ soŋ te meŋ? (Hiburu 12:2)

¹⁵ Teɛretɔ na Jehoova naŋ ko te na na toɔ̃ soŋ teŋ ka te naŋ kyɛnɛ dire kannyiri. (Uro. 15:13) Leɛteɛre lɛ na teɛretɔ naŋ da soŋ Yezu saŋa na oŋ da tuore yɛlɛ naŋ e kpeɛŋaa gaŋ yelzaa a teŋɛ ŋa zuŋ. (Kanne Hiburu 12:2.) Yezu da baŋɛɛŋ ka, ka onaŋ are kpeɛŋaa te ta a baaraa, a na vɛŋeŋ ka Jehoova yuori na pɛgeyi. Yezu da de la o teɛroŋ zaa eŋ lɛ na oŋ na leɛ gaa sazu a te be o Saa zieŋ, ane saŋa na a noba 144,000 naŋ na do wa o zie sazuŋ ka o ne ba dire naaloŋ na eŋɛŋ. Teɛretɔ na teŋ taa ka te na zeŋ la Paradiisi poɔŋ tegitegilɛ na na toɔ̃ soŋ teŋ ka te are yelkpeɛne zaa teŋ na tuore Setaana donfaa ŋa poɔŋ na noɔreŋ.

16. Sobuo ka teɛretɔ na Jehoova naŋ ko te na soŋ te yɔɔpɔge kaŋa oŋ dire kannyiri? Bo yɛlɛ hoŋ zanne yi yɛlɛ na oŋ yeli na poɔŋ?

¹⁶ Russia paaloŋ ka te yɔɔpɔge Alla be. Teɛretɔ na Jehoova naŋ ko te na somooŋ yaga zaa. Ba da nyɔgɛɛ o serɛ te eŋ nempɔgedieŋ oŋ bebe a gɛrɛ bebiri na baŋ na de o gaaneŋ sɛrɛɛ diibu zie a te di o sɛrɛɛ. Saŋa na a yɛlɛ ŋa naŋ wa e na, Alla yeleeŋ ka: “N maŋ puore sɔrɛɛ Jehoova a manne teɛretɔ na oŋ ko ma na yɛlɛ koo, N maŋ lɛ teɛrɛɛ nendaare kaŋa maaloo na maŋ na nyɛ na yɛlɛ, azuŋ, N eŋɛ ba maŋ kyoɔre yaga zaa. N baŋɛɛŋ ka a yɛlɛ baaroo naane ŋa. Jehoova na zɔɔtoɔ̃ la, te meŋ na zɔɔtoɔ̃ la.”

17. Wala teŋ na baŋ e a de wuli ka te deɛ teɛretɔ na Jehoova naŋ ko te na tegroŋ yaga zaa? (Kaa a foto.)

¹⁷ Yɛlɛ hoŋ na baŋ e. Maŋ bɔ wagre a teɛrɛ maaloo na Jehoova naŋ eŋ noɔre ka o na ko bon nendaare kaŋa na yɛlɛ. Maŋ ŋmaa foto ho teɛroŋ poɔŋ, a nyɛ ho meŋɛ Paradiisi poɔŋ. Maŋ teɛrɛ maaloo na hoŋ na nyɛ na yɛlɛ. Ka hooŋ de ana maaloo na manne neŋ yelkpeɛne na hoŋ tuoro pampana na, ho na nyɛŋ ka a yelkpeɛne eɛ yɛlɛ naŋ bebe “belaa” lɛ. (2 Kor. 4:17) Moɔrɔ ho moɔbo zaa a manna ho sagediibu yɛlɛ korɔ noba. Noba yaga bebeŋ a ba baŋ nɔɛ na Jehoova naŋ eŋ a kyaare nendaare kaŋa. Azuŋ, nyɛ lɛ na aŋ na e kpeɛŋaa ko ba ka ba are ba yelkpeɛne noɔreŋ. Ka ho ne baŋ di dama ŋmaaŋmaa lɛ, kyɛ a na baŋ soŋ baŋ ka ba boɔrɔ ka ba zanne yɛlɛ yaga a kyaare a Naaloŋ ane Jehoova nɔ-ennee.

18. Bonso teŋ na baŋ sagedi ka nɔɛ na Jehoova naŋ eŋ na nyɛɛ eebo?

¹⁸ Saŋa na Gyoob naŋ da di kannyiri a are o yelkpeɛne zaa noɔreŋ baare na, o da yelko la Jehoova ka: “Pampana ŋa maŋ baŋ ka ho na baŋ eɛ yelzaa ka yelzaa kyebe a be ho teɛroŋ poɔŋ a e kpeɛŋaa ko bo ka ho e.” (Joob 42:2) Gyoob wa nyɛɛŋ ka yelzaa kyebe a na baŋ pigi Jehoova sori ka o poboɔbo ta nyɛ eebo. A yɛlɛ ŋa na baŋ eŋ teŋ faŋa saŋa na teŋ are te yelkpeɛne noɔreŋ na. Te de yelmannaa kaŋa wuli a muni. Te de ka pɔge kaŋa beɛrɛŋ nimizeɛ̃, ka dɔktare yaga tegoo lɛɛŋ kyɛ o ba nyɛrɛ laafeɛ. Azuŋ, a pɔge eŋɛ zaaŋ kyoɔre. Kyɛ, saŋa na dɔkta kaŋa naŋ kyile a baŋ yɛlɛ yaga nimiri naŋ wa baŋ baaloŋ na naŋ dɔɔnɔ a pɔge na, o mannɛɛ sori na oŋ na tu a saŋ o baaloŋ na koo. Saŋa na a pɔg-baala naŋ wa woŋ a dɔkta yɛlɛ na, o sukyiri zaaŋ da mãã, aneazaa ka a na de la wagre sɛre kyɛ ka o toɔ̃ nyɛ baaloŋ saŋ. Teɛretɔ na oŋ taa ka bebiri kaŋa o na nyɛɛ laafeɛ na na toɔ̃ somoo ka o maaleŋ dire kannyiri. Lɛ neŋ o zu la, teɛretɔ na teŋ taa ka Paradiisi na waŋ na na toɔ̃ soŋ teŋ ka te maaleŋ dire kannyiri.

19. Boŋ na baŋ soŋ te ka te naŋ kyɛnɛ dire kannyiri?

¹⁹ Bo yɛlɛ teŋ zanne? Te zannɛɛŋ ka Jehoova maŋ tu la puore sɔroo, a Baabole, te yɔɔmine ane te teɛretɔ na eŋɛŋ a sonnɔ te teŋ dire kannyiri. Ka teneeŋ de a boma ama tonɔ neŋ toma velaa zaa, Jehoova na soŋ teŋ ka te are te yelkpeɛne zaa noɔreŋ a te ta bebiri na oŋ na iri Setaana donfaa ŋa bare na.—Fil. 4:13.