Jehoova Sieree Deme Maŋ Wɛlɛɛ Booree Bee Ba Maŋ Tage La Booree Deme Lantaa?

Jehoova Sieree Deme maŋ mɔɔrɛɛ ba moɔbo zaa ka noɔreyeni be ba booree poɔŋ, a kyɛ lɛ soŋ ka noɔreyeni meŋ be ba laŋkpeɛreba booree poɔŋ. Te taaɛ gyeremɛ ko Naaŋmen bonso o Zie ka booree zaa yi wa. (Munpiilee 2:​21-​24; Efesu 3:​14, 15) A yi a Baabole poɔŋ, o ko teŋ sowuli naŋ na baŋ soŋ neɛzaa naŋ be a donɛɛ lombori zaa ka ba taa niiloŋ naŋ e kpeɛŋaa ba kultaa poɔŋ ane popeɛloŋ meŋ.

Lɛ Jehoova Sieree Deme naŋ maŋ e ka lɛ vɛŋ baŋ taa noɔreyeni ba booree poɔŋ

Te maŋ mɔɔrɛɛ te moɔbo zaa ka te de a Baabole kawane tonɔ neŋ toma, bonso a Baabole kawane la maŋ soŋ te teŋ e sereba, pɔgeba ane bidɔgreba naŋ soma. (Yeng Yelibie 31:10-​31; Efesu 5:22–​6:4; 1 Timoti 5:8) Kawane naŋ be a Baabole poɔ na na toɔ̃ soŋɛɛ booree deme naŋ ba kye puoruu bonyeni poɔŋ ka ba toɔ̃ taa zeŋ laafeɛ a booree poɔŋ. (1 Piita 3:​1, 2) Hooŋ leɛ nyɛ lɛ noba mine naŋ ba e Jehoova Sieree Deme kyɛ ka ba kultatɔ kaŋa e Jehoova Sieree Deme naŋ taa ka ba yel:

• “Te kultaa na dɛndɛŋ yuomo ayoɔbɔ poɔŋ, te da maŋ ŋmeɛrɛɛ nɔkpeɛne yaga a kyɛ zɔɔrɔ meŋ. Kyɛ, saŋa na Ivete naŋ wa e Jehoova Sieree Deme kaŋa na, o da leɛ taaɛ nɔmmo ane kannyiri ko ma. Lɛ na o naŋ leɛre o eebo naŋ vɛŋ ka te kultaa na ba sãã.”​—Clauir, naŋ be Brazil paaloŋ.

• “Saŋa na N serɛ Chansa naŋ da wa piili ka o neŋ Jehoova Sieree Deme zanna a Baabole na, N poɔ da ba pɛle fẽẽ zaa, bonso N da teɛre ka ba maŋ waanɛɛ wɛltaa booree poɔŋ. A piili a lɛ saŋa waana zenɛ, maaŋ meŋɛ wa nyɛɛŋ ka a Baabole soŋɛɛŋ ka emmaaroŋ be te kultaa na poɔŋ.”​—Agness, naŋ be Zambia paaloŋ..

A yi te naaŋ moɔloo toma na poɔŋ, te maŋ wulee te laŋkpeɛreba lɛ baŋ na toɔ̃ de Baabole kawane toŋ toma ka lɛ vɛŋ ka ba

• Kaa iri kultatɔ naŋ soma

• Toɔ̃ di kannyiri ba dɛndɛŋ yuoni na ba kultaa poɔŋ

• Neŋ ba deɛŋ-mine toɔ̃ di dama

• Dire ba libie yɛŋ poɔŋ

• Bare nɔkpeɛne ŋmeɛbo

• Zanne lɛ baŋ na toɔ̃ dire suuri ko taa

• Wuli ba bibiiri soŋ

Ka neɛ kaŋaŋ wa leɛ Jehoova Sieree Deme kaŋa lɛ maŋ vɛmeŋ ka zɔɔre be ba booree na poɔŋ bee?

Yelmeŋɛ la, saŋa kaŋa a maŋ wannɛɛ zɔɔre a booree poɔŋ. Aŋa mannoo poɔŋ, tomazie kaŋa naŋ maŋ peɛrɛ yɛlɛ baŋ boɔlɔ Sofres naŋ da peɛre yɛlɛ yuoni 1998 poɔŋ na, ba da wa nyɛɛŋ ka, a yi kultaa 20 zaa poɔŋ ka a kultatɔ kaŋaŋ wa leɛ Jehoova Sieree Deme kaŋa, ba poɔ 1 soba maŋ yeleŋ ka ba tuoree yelkpeɛne yaga saŋa na ba tɔsoba na naŋ wa leɛ Jehoova Sieree Deme kaŋa na.

Yezu da yeleeŋ ka, saŋa kaŋa ka nobaŋ wa de o wulibo na tonɔ neŋ toma ba na tuoree yelkpeɛne ba booree poɔŋ. (Matio 10:32-​36) Dɔɔ kaŋa naŋ maŋ sɛgrɛ takoreŋ yɛlɛ baŋ boɔlɔ Will Durant da yeleeŋ a kyaare Kristabiiri naŋ da be a Urom paaloŋ na poɔŋ ka, “Noba da maŋ yeleŋ ka Kristabiiri da maŋ waanɛɛ wɛltaa booree poɔŋ.”a Lɛ ka noba maŋ yele kyaara Jehoova Sieree Deme zenɛ ŋa meŋ. Kyɛ, lɛ wuleeŋ ka Jehoova Sieree Deme naŋ be a booree poɔŋ la maŋ waaneŋ zɔɔre ba booree na poɔŋ bee?

Saŋa na a European Court of Human Rights naŋ da wa dire Jehoova Sieree Deme sɛrɛɛ a kyaare lɛ noba naŋ maŋ yelka ba waanɛɛ wɛltaa booree poɔŋ na, a Court da yeleeŋ ka, booree deme naŋ ba e Jehoova Sieree Deme na la maŋ waaneŋ a zɔɔre saŋa na baŋ maŋ zagre “ka ba sage a kyɛ wulo gyeremɛ a korɔ sori na ba booree deme na naŋ taa ka ba puoro Naaŋmen a kyɛ de ba puoruu yɛlɛ tonɔ neŋ toma na.” A Court da lɛ yeleeŋ ka: “Ka nobaŋ ba kye puoruu bonyeni poɔŋ kyɛ kultaa ba maŋ tuoree a yelkpeɛne ŋa, Jehoova Sieree Deme yoŋ zie naane aŋ maŋ yi.”b Haali saŋa na Jehoova Sieree Deme booree deme naŋ maŋ wa iri zɔɔrɔ ne ba na, ba maŋ mɔɔrɔŋ ka ba de a Baabole kawane ŋa toŋ neŋ toma: “Yɛ ta de faaloŋ yɔɔ ne neɛzaa naŋ e yɛ faaloŋ . . . Ka anaŋ na toɔ̃ nyɛ eebo yɛ zie, yɛ taa emmaaroŋ ne a noba zaa.”​—Urom 12:17, 18.

Bonso ka Jehoova Sieree Deme maŋ wulo ka aseŋ ka ba puorebiiri maŋ kulo ba puorebitaaba

Jehoova Sieree Deme maŋ de la a Baabole sowuli naŋ la ka ba kulo taa “a Daana eŋɛ” na tonɔ neŋ toma. Lɛ wuleeŋ ka aseŋ ka ba kuli neɛ kaŋa ba ne o naŋ laŋ sagediibu. (1 Korinti 7:​39) A Baabole poɔŋ ka a sowuli ŋa be, yɛŋ bebeŋ ka te de o tonɔ neŋ toma meŋ. Aŋa mannoo poɔŋ, gane kaŋa baŋ da sɛge yuoni 2010 poɔŋ baŋ boɔlɔ Journal of Marriage and Family da yeleeŋ ka “kultaa deme naŋ be puoruu bonyeni poɔŋ, a maŋ laŋ erɛ yelyenaa a kyɛ taa sagediibu bonyeni” maŋ taaɛ zeŋ laafeɛ ba kultaa na poɔŋ.c

Kyɛ, lɛ ba wuli ka ka Jehoova Sieree Deme kaŋaŋ taa kultatɔ naŋ ba puoro Jehoova aseŋ ka o soba bare a kultaa o kultatɔ na naŋ ba e Jehoova Sieree Deme kaŋa na zuŋ. A Baabole yelka: “Ka Kristabie zaa wa taa pɔge naŋ ba sage de a Krista yɛlɛ, kyɛ ka a pɔge sage na kpeɛrɛ ne o, a ba seŋ ka o bare a pɔge. Ka Krista-bipɔge zaa meŋ wa taa serɛ naŋ ba sage de a Krista yɛlɛ, kyɛ ka a dɔɔ sage na laŋ kpeɛrɛ ne o, a ba seŋ ka o bare a dɔɔ.” (1 Korinti 7:​12, 13) Jehoova Sieree Deme maŋ deɛ a sowuli ŋa meŋ tonɔ neŋ toma.