Sobuo Teŋ Maŋ Tu Kyɛ Moɔlɔ A Duorisoŋ?

A koŋ kɔɔre Jehoova na tu la o Naaloŋ na eŋɛŋ kyɛ iri te yelwonnii zaa bare. A yɛlɛ ŋa e la duorisoŋ, azuŋ aseŋ ka neɛzaa woŋaa. Yezu da boɔrɔŋ ka o potuuribo na moɔle a duorisoŋ ŋa ko neɛzaa! (Matio 28:​19, 20) Sobuo ka Jehoova Sieree Deme maŋ tu kyɛ tonɔ toma na Yezu naŋ ko ba ka ba tonɔ na?

1. Sobuo ka yɛlɛ naŋ be Matio 24:​14 na nyɛrɛ eebo zenɛ ŋa?

Yezu da yeleeŋ ka: “Ba na moɔle la a Naaloŋ duorisoŋ a tendaa lombori zaa.” (Matio 24:​14) Jehoova Sieree Deme maŋ de la popeɛloŋ tonɔ neŋ a toŋ nimizeɛ ŋa. Te moɔlɛɛ a duorisoŋ ŋa a donɛɛ lombori zaa a yi kɔkɔɛ naŋ pare 1,000 poɔŋ! Jehoova Sieree Deme seŋ ka ba sɛgre yɛlɛ soŋ, a kyɛ mɔɔ ba mɔɔbo zaa sɛre kyɛ na baŋ toŋ a toŋ kpɛŋ ŋa. Jehoova sommo zuŋ baŋ toɔ̃ tonɔ a toma.

2. Sobobo teŋ maŋ tu kyɛ moɔlɔ a duorisoŋ korɔ noba?

Zie zaa noba naŋ be, te maŋ gaa la be a te moɔle a duorisoŋ ko ba. Aŋa lɛ na a dɛndɛŋ Kristabiiri naŋ da maŋ e na, te meŋ maŋ gaa la “die la die zaa poɔŋ” a te moɔle a duorisoŋ ko noba. (Toma 5:42) A sori ŋa teŋ maŋ tu na maŋ vɛmeŋ teŋ toɔ̃ moɔle a duorisoŋ ko noba turituri yuoni zaa. Wagre zaa naane ka noba maŋ be deriŋ, azuŋ te maŋ moɔlɛɛ a duorisoŋ ziiri noba naŋ maŋ be yaga. Vuo zaa te naŋ nyɛ, te maŋ mɔɔrɔŋ ka te moɔle Jehoova ane o poboɔbo na yɛlɛ ko noba.

3. Aŋ mineŋ seŋ ka ba moɔlɔ a duorisoŋ?

Aseŋ ka yelmeŋɛ Kristabiiri zaa moɔlɔ a duorisoŋ korɔ noba. Lɛŋ vɛŋ teŋ de a toma ŋa nimizeɛ yaga zaa lɛ. Te maŋ mɔɔrɛɛ te mɔɔbo zaa ka te moɔle a duorisoŋ ko noba, bonso te baŋɛɛŋ ka a na toɔ̃ soŋ baŋ ka ba nyɛ nyɔvore. (Kanne 1 Timoti 4:16.) Ba ba maŋ yɔɔ te sɛre kyɛ teŋ tonɔ a toma ŋa, bonso a Baabole yelka: “Zaala zaala yɛŋ deɛ, yɛ korɔ zaala zaala.” (Matio 10:7, 8) Neɛzaa naaneŋ maŋ sage de duorisoŋ na teŋ moɔlɔ na. Kyɛ, te naŋ maŋ moɔ̃ la nimiri a moɔlɔ a duorisoŋ bonso, a duorisoŋ moɔloo poɔ la te puoruu toma poɔŋ, a kyɛ maŋ lɛ vɛŋ ka Jehoova meŋ poɔ pɛle.

ZANNE YƐLƐ YAGA POƆ

4. Te maŋ mɔɔrɛɛ te mɔɔbo zaa ka te moɔle a duorisoŋ ko neɛzaa

VIDIO: A Naaŋ Duoro Te Naŋ Moɔla Te Ta “A Donɛɛ Baaraa Tɔɔre Tɔɔre Zaa” (7:33)

• Sobuo ka lɛ na Jehoova Sieree Deme naŋ maŋ mɔɔrɔ ba mɔɔbo zaa ka ba moɔle a duorisoŋ na tɔ ho sukyiri a seŋ?

Kanne Matio 22:39 ane Urom 10:13-15, a kyɛ gyieli a soorebie naŋ tu na yɛlɛ:

• Sobuo ka a duorisoŋ na teŋ moɔlɔ na wuli ka te taa la nɔmmo ko te taaba?

• Bo teɛroŋ ka Jehoova taa kyaare noba naŋ moɔlɔ a duorisoŋ na?​—Kaa o wɛlbo 15 na.

5. Te e la Naaŋmen tontoŋtaaba

Sieree yaga bebeŋ a wuli ka Naaŋmen la wulo te sori teŋ tonɔ a toma ŋa. Aŋa mannoo poɔŋ, New Zealand paaloŋ poɔŋ, bebiri kaŋa ŋmenaa saŋa, te yɔɔdɔɔ kaŋa baŋ boɔlɔ Pɔɔl da gaaɛ pɔge kaŋa zie a die neŋ die naaŋ moɔloo toma na poɔŋ. Ana bebiri na beguo saŋa, a pɔge da puore ko la Naaŋmen a boɔle o yuori Jehoova na, a yelkoo ka o vɛŋ ka neɛ kaŋa wa o zie. Pɔɔl yeleeŋ ka “aware ata puoreŋ, maŋ da wa o zie.”

Kanne 1 Korinti 3:9, a kyɛ gyieli a soorebiri naŋ tu na yɛlɛ:

• Sobuo ka a yɛlɛ ŋa naŋ e New Zealand paaloŋ na wuli ka Jehoova la wulo te sori teŋ moɔlɔ a duorisoŋ?

Kanne Toma 1:8, a kyɛ gyieli a soorebiri naŋ tu na yɛlɛ:

• Bonso aŋ seŋ ka Jehoova soŋ te sɛre kyɛ ka te na baŋ toŋ a naaŋ moɔloo toma?

Ho da baŋɛɛŋ?

Daagbuli zaa, te maŋ e la daagbuli poɔ lammo. Ba maŋ de la wuluu naŋ na toɔ̃ soŋ te ka te moɔle a duorisoŋ ko te. Ka hooŋ daŋ gaa a lammore ŋa kaŋa, wala hoŋ teɛre kyaare wuluu na baŋ maŋ korɔ te na?

6. Te moɔlɛɛ a duorisoŋ bonso Naaŋmen la ko te noɔre ka te e lɛ

A dɛndɛŋ yuoŋ kɔɔ na saŋa, noba mine da boɔrɔŋ ka ba pigi Yezu potuuribo na sori ka ba ta moɔlɔ a duorisoŋ. A dɛndɛŋ Kristabiiri da seŋ ka ba mɔɔ ba mɔɔbo zaa a tu ‘bege sori kyɛ go sori na ba naŋ taa ka ba moɔle a duorisoŋ na.’ (Filipae 1:7) Lɛ neŋ o zu ka Jehoova Sieree Deme erɛ zenɛ ŋa.a

VIDIO: Lɛ Ba Naŋ Tu Bege Sori Kyɛ Go Sori Na Teŋ Taa Ka Te Moɔlɔ A Duorisoŋ Na (2:28)

Kanne Toma 5:27-42, a kyɛ gyieli a soorebiri naŋ tu na yɛlɛ:

• Bonso teŋ koŋ bare a duorisoŋ moɔloo?—Kaa o wɛlbo 29, 38, ane 39 na.

A ZANNOO YELNIMIZEERE

Yezu da yelko la o potuuribo ka ba moɔle a duorisoŋ ko neɛzaa naŋ be a donɛɛ lombori zaa. Jehoova la sonnɔ te teŋ toɔ̃ tonɔ a toma ŋa.

Bo Hoŋ Zanne

• Sobuo baŋ tu kyɛ moɔlɔ a duorisoŋ a donɛɛ lombori zaa?

• Sobuo ka a naaloŋ duorisoŋ na teŋ moɔlɔ na wuli ka te nɔnɔ la te taaba?

• Ho teɛre ka ka hooŋ moɔlɔ a duorisoŋ, ho na taaɛ popeɛloŋ bee? Bonso hoŋ yel lɛ?

YƐLƐ MINE NAŊ LƐ BEBE

Kaa a vidio ŋa a nyɛ lɛ Jehoova Sieree Deme naŋ maŋ moɔle a duorisoŋ ko noba naŋ be teŋbɛrɛ pooreŋ.

Lɛ Na Ba Naŋ Moɔlɔ A Duorisoŋ Paris Teŋkpɛŋ Na Poɔŋ (5:11)

Wala ka Jehoova Sieree Deme e a toɔ̃ soŋ noba naŋ zo yi ba paaloŋ a boɔrɔ lirizie?

Ba Wulee Saamma A Yelmeŋɛ (5:59)

Kaa a vidio a nyɛ bon naŋso te yɔɔpɔge kaŋa poɔ naŋ pɛle yaga zaa o naŋ de o wagre zaa moɔlɔ a duorisoŋ.

N Poɔ Pɛlɛɛŋ Yaga N Naŋ Kaa Iri A Toma Ŋa (6:29)

Kanne nyɛ lɛ courtere mine sɛrɛɛ diibu naŋ vɛŋ ka a duorisoŋ moɔloo nyɛrɛ nimitɔɔre gaabo.

“A Naaloŋ Duori-Enneba De La A Yɛlɛ Gaaneŋ Court” (Naaŋmen Naaloŋ Na Diree Naaŋ!, zuri 13)