Moɔ̃ Niŋe A Kyɛnɛ Neŋ Sagediibu

1. Bonso ka bitontona Pɔɔl poɔ da pɛle ne yɛlɛ na oŋ de o nyɔvore zemmo zaa e neŋ na?

BITONTONA Pɔɔl da baŋɛɛŋ ka ba waanaŋ ka ba iri o nyɔvore. Kyɛ, yɛlɛ na oŋ de o nyɔvore e neŋ na vɛŋɛɛŋ oŋ taa popeɛloŋ yaga zaa. O meŋɛ da yeleeŋ ka: ‘N zo la a zoobu baare, N taa la a sagediibu velaa.’ (2 Tim. 4:6-8) Pɔɔl da de la gbɛre ka o na de la o nyɔvore zemmo zaa tonɔ Jehoova puoruu toma. A da eɛ gbɛ-soŋ meŋɛ o naŋ de. O da baŋɛɛŋ meŋ ka Jehoova poɔ pɛle ne o la. Ka teneeŋ meŋ de gbɛɛ naŋ soma, Naaŋmen poɔ na pɛle ne teŋ. Sobuo teŋ na toɔ̃ tu a e lɛ?

2. Ka a Baaboleŋ wa yelka sagediibu la ka te kyɛnɛ ne, wala ka lɛ wuli?

² Pɔɔl da yeleeŋ a kyaare o meŋɛ, ane o Kristabitaaba ka: ‘Sagediibu la ka te kyɛnɛ ne, a ba e yɛlɛ te naŋ nyɛrɛ.’ (2 Kor. 5:7) Wala ka Pɔɔl da boɔrɔ ka o wuli? Ka a Baaboleŋ wa yelka neɛ kaŋa ‘kyɛnɛŋ,’ a wulee yɛlɛ na o soba naŋ de o nyɔvore erɛ neŋ. Ka neɛŋ vɛŋ ka yɛlɛ na oŋ nyɛrɛ wuluu sori ka o kyɛnɛ, yɛlɛ o soba naŋ maŋ wono, a teɛrɛ, a de o nimiri nyɛrɛ zuŋ oŋ maŋ are a derɛ gbɛɛ. Kyɛ, noba naŋ taa sagediibu Jehoova eŋɛŋ maŋ dɛlɛɛ Jehoova, a vɛŋ oŋ wulo ba sori baŋ derɛ gbɛɛ. O soba yel-eree maŋ wuliŋ ka o taaɛ sagediibu ka Naaŋmen na ko oŋ saŋyɔɔ. O maŋ lɛ baŋeŋ ka, ka onaŋ de Jehoova sowuli naŋ be a Baabole poɔŋ toŋ neŋ toma, o na nyɛɛ maaloo yaga.​—Yiem. 119:66; Hib. 11:6.

3. Bo maaloo teŋ na nyɛ ka teneeŋ kyɛnɛ ne sagediibu? (2 Korinti 4:18)

³ Yelmeŋɛ la, saŋa kaŋa yɛlɛ te naŋ de te nimie nyɛrɛ, kyɛbee yɛlɛ te naŋ wono, bee a teɛrɛ na baŋ soŋ teŋ ka te de gbɛɛ. Kyɛ, ka teneeŋ maŋ are yɛlɛ na teŋ nyɛrɛ kyɛbee a wono eŋɛŋ yoŋ a derɛ gbɛɛ naŋ e nimizeɛ, gbɛɛ yaga te na maŋ de la toɔrɔ waneŋ te menne zuŋ. Bonso teŋ yeli lɛ? Ananso la ka, yɛlɛ na teŋ maŋ nyɛrɛ a kyɛ wono ba maŋ tori te baare. Haali ka lɛŋ ba e gba, kyɛ ka teneeŋ vɛŋ ka yɛlɛ te naŋ nyɛrɛ bee a wono wulo te sori ka te derɛ gbɛɛ, te na wa baŋna ka te zagrɛɛ Naaŋmen sowuli bare, a kyɛ erɛ te menne boɔbo. (Ikil. 11:9; Mat. 24:37-39) Ka teneeŋ kyɛnɛ ne sagediibu, a na soŋ teŋ ka te maŋ derɛ gbɛɛ naŋ “pɛlɛ a Daana poɔ.” (Efe. 5:10) Ka teneeŋ de Naaŋmen sowuli tonɔ neŋ toma, a na vɛŋeŋ ka te taa sukyirimaaroŋ ane popeɛloŋ meŋɛmeŋɛ. (Yiem. 16:8, 9; Aiz. 48:17, 18) Ka teneeŋ moɔ̃ niŋe a kyɛnɛ ne sagediibu, te na nyɛɛ nyɔvore naŋ ba taa baaraa nendaare kaŋa.​—Kanne 2 Korinti 4:18.

4. Wala ka neɛ na toɔ̃ e baŋ ka o kyɛnɛ neŋ la sagediibu, kyɛbee o kyɛnɛ neŋ la yɛlɛ o naŋ nyɛrɛ?

⁴ Boŋ na baŋ soŋ te ka te baŋ ka te kyɛnɛ neŋ la sagediibu, kyɛbee te kyɛnɛ neŋ la yɛlɛ te naŋ nyɛrɛ? Soore ho meŋɛ ka: ‘Bo yɛlɛ eŋɛŋ maŋ maŋ are a zuŋ kyɛ derɛ gbɛɛ? N maŋ vɛŋeŋ ka yɛlɛ na maŋ nyɛrɛ na yoŋ wulo ma gbɛɛ naŋ seŋ ka N de, kyɛbee N maŋ vɛŋeŋ ka Jehoova sowuli wulo ma sori?’ Te na zannɛɛ yelnimizeere ata mine naŋ na baŋ soŋ te ka te kyɛnɛ neŋ sagediibu. A dɛndɛŋ soba, saŋa na teŋ wa ire toma na teŋ na tonɔ. Ayi soba, saŋa na teŋ waana ka te iri te kultatɔ. Ata soba, saŋa na Jehoova lantaapuoruu naŋ wa korɔ te sowuli. A yi a yɛlɛ ata ŋa zaa poɔŋ, te na di la dama a kyaare yɛlɛ aŋ seŋ ka te teɛre a yɛlɛ gaa tɔɔre sɛre kyɛ derɛ gbɛre.

SAŊA NA TEŊ WA KAA IRE TOMA NA TEŊ NA TONƆ

5. Ka teneeŋ wa waana ka te kaa iri toma teŋ na tonɔ, bo yɛlɛ aŋ seŋ ka te maŋ teɛre a yɛlɛ gaa tɔɔre?

⁵ Te zaa taaɛ yelfɛree, ka te booree deme meŋ taa yelfɛree. Azuŋ, te maŋ moɔrɔŋ ka te soŋ te neŋ te booree deme ka ba nyɛ ba yelfɛree. (Ikil. 7:12; 1 Tim. 5:8) Toma mine bebeŋ ka a saŋyɔɔ maŋ soma yaga. A toma na baŋ soŋɛɛ neɛ ka o nyɛrɛ o bebiri zaa yelfɛree, a maŋ lɛ de a libie mine maale biŋ nendaare kaŋa zuŋ. Kyɛ toma mine bebeŋ, a saŋyɔɔ yɛlɛ ba maŋ taa nimiri. Azuŋ, ka neɛŋ tonɔ a toma, o booree deme yelfɛree yoŋ oŋ na baŋ nyɛ a ko ba. Ka te nuŋ wa kpɛ toma kaŋa, gbɛɛ yaga te maŋ teɛrɛɛ a saŋyɔɔ yɛlɛ. Lɛ ba e faa. Kyɛ, ka neɛŋ are ana yɛlɛ na yoŋ zuŋ a derɛ gbɛre, a na baŋ wuliŋ ka o soba kyɛnɛ neŋ la yɛlɛ o naŋ nyɛrɛ.

6. Ka teneeŋ waana ka te kaa iri toma teŋ na tonɔ, wala teŋ na toɔ̃ e te yɛlɛ a de wuli ka te kyɛnɛ neŋ la sagediibu? (Hiburu 13:5)

⁶ Ka teneeŋ kyɛnɛ neŋ sagediibu, te na teɛrɛɛ lɛ na a toma naŋ na baŋ nyɛ kpeɛ̃o te neŋ Jehoova niiloŋ na eŋɛŋ. A na somaŋ ka te soore te menne ka: ‘A toma ŋa na vɛŋeŋ ka N erɛ yɛlɛ Jehoova naŋ ba boɔrɔ bee?’ (Yeng. 6:16-19) ‘A toma na pigi maŋ sori ka N koŋ baŋ gaa a lammore zaa bee? A toma na vɛŋeŋ ka N koŋ nyɛrɛ wagre a gɛrɛ a naaŋ moɔloo, kyɛbee a erɛ N meŋɛ zannoo bee? A toma na vɛŋeŋ ka N koŋ lɛ nyɛrɛ wagre korɔ N booree deme bee?’ (Fil. 1:10) Ka hooŋ iri a soorebiri kaŋa zaa noɔre ka ɛɛ, lɛ yɛŋ a na somaŋ ka ho bare a toma, haali ka toma nyaaboŋ e tuo. Te eɛ noba naŋ kyɛnɛ neŋ sagediibu, azuŋ te maŋ derɛɛ gbɛɛ naŋ wulo ka, te sagedieŋ ka Jehoova na ko teŋ boma yɛlɛ naŋ ferɛ te.—Mat. 6:33; kanne Hiburu 13:5.

7-8. Wala ka te yɔɔ kaŋa naŋ be South America teŋɛ e a de wuli ka o kyɛnɛ neŋ la sagediibu? (Kaa a foto.)

⁷ South America teŋɛ ka te yɔɔ Javiera be. O da nyɛɛŋ ka aseŋ ka o kyɛnɛ neŋ sagediibu. Ŋaaŋ oŋ yeli: “N da tonɛɛ toma mine, kyɛ N da lɛ ŋmaaɛ gane te ko N tomazie na zikpoŋ ka N boɔrɛɛ arezi-kpoŋ. A arezi-kpoŋ ŋa na vɛŋeŋ ka N nyɛrɛ libie yaga, a lɛ taa zeŋ laafeɛ meŋ.” Kyɛ, Javier da boɔrɔŋ ka o piili a paaneɛ toma. Ŋaaŋ oŋ lɛ yeli: “Ba da toŋboɔle maŋ ka N wa ka ba peɛre ma yɛlɛ a kyaare a toma. Kyɛ, sɛre maŋ na kpɛ a die ka ba peɛre ma a yɛlɛ na, N da puore sɔrɛɛ Jehoova ka o soŋ ma ka N de gbɛ-soŋ. N baŋɛɛŋ ka Jehoova baŋɛɛ yɛlɛ naŋ soma ko ma. Yelmeŋɛ la, N boɔrɔŋ ka N nyɛ nimitɔɔre gaabo N toma poɔŋ, kyɛ N ba boɔrɔ ka a toma ŋa pigi ma sori ka N koŋ toɔ̃ ta yɛlɛ na maŋ de biŋ N nimitɔɔreŋ Jehoova puoruu poɔŋ na.”

⁸ Javier yeleeŋ ka: “Saŋa na baŋ wa peɛre ma a yɛlɛ na, a tomazie neŋkpoŋ da yelko maŋ ka, gbɛɛ yaga N na maŋ de la N wagre kpoŋ zie zaa tonɔ a toma. N da de la kɔkɔmaaroŋ a yelkoo ka, N puoruu yɛlɛ zuŋ N koŋ toɔ̃ e lɛ.” Javier da ba sage de a toma. Daaraayi puoriŋ, o da piilee a paaneɛ toma. Yuoni gbuli puoriŋ, o da nyɛɛ toma na oŋ maŋ de o wagre fẽẽ lɛ tonɔ neŋ. O lɛ yeleeŋ ka: “Jehoova da iree N puoro noɔre ko ma, o soŋ maŋ maŋ nyɛ toma naŋ sonnɔ ma a paaneɛ toma poɔŋ. N poɔ pɛlɛɛŋ yaga zaa Jehoova naŋ soŋ ma maŋ nyɛ toma naŋ vɛŋ maŋ de N wagre kpoŋ zie zaa tonɔ koroo ane N yɔɔmine.”

9. Bo yɛlɛ hoŋ zanne yi Trésor zemmo yɛlɛ ŋa poɔŋ?

⁹ Te de ka toma na teŋ tonɔ pampana na vɛŋɛɛŋ teŋ ba kyɛnɛ neŋ sagediibu, wala aŋ seŋ ka te e? Congo paaloŋ ka Trésor be. Ho na baŋ zannɛɛ yelkaŋa yi o zemmo yɛlɛ ŋa poɔŋ. Trésor yeleeŋ ka: “Ton-paalaa na maŋ nyɛ na da eɛ toma maŋ boɔrɔ yaga zaa. A ton-paalaa ŋa poɔŋ, ba da yɔɔrɔ maŋ saŋyɔɔ na maŋ da nyɛrɛ N ton-koroo na poɔŋ gbɛre bota. Noba da taaɛ gyeremɛ naŋ e zuluŋ meŋ ko ma a tomazieŋ.” Kyɛ a toma zuŋ, Trésor ba maŋ toɔ̃nɔ gɛrɛ a lammore zaa. Saŋa mine meŋ a tomazie noba da maŋ fɛrooŋ ka o ŋma zirii a pɔge yelkaŋa a tomazie naŋ ba e soŋ. Trésor da boɔrɔŋ ka o bare a toma. Kyɛ o maŋ leɛteɛreŋ ka, bo toma oŋ na bare a toma ŋa kyɛ te tonɔ. Boŋ da somoo? O yeleeŋ ka: “Habaakuk 3:17-19 da soŋ maŋ maŋ baŋ ka, ka a toma ŋaŋ yi N nuuriŋ gba, kyɛ Jehoova naŋ na kaarɛɛ N zu. Azuŋ, N da barɛɛ a toma.” O baarɛɛ a yɛlɛ ka: “Noba mine maŋ eɛ siri ka ba de ba booree deme zemmo yɛlɛ ane ba puoruu yɛlɛ, kyɛbee bonzaa a iri neŋ sareka, ka lɛ vɛŋ ka ba taa toma na naŋ korɔ ba libie yaga. Kyɛ, maaŋ yɛŋ poɔ pɛlɛɛŋ yaga N neŋ Jehoova naŋ taa niiloŋ naŋ soma. Yuoni gbuli puoriŋ, Jehoova da soŋ maŋ maŋ nyɛ toma naŋ sonnɔ ma maŋ nyɛrɛ libie fẽẽ, a kyɛ lɛ ko ma wagre yaga maŋ tonɔ o puoruu toma. Ka teneeŋ de Jehoova yɛlɛ de weɛ, aminekaŋaŋ wagre fẽẽ kaŋa poɔŋ, te libi-yɛlɛ koŋ taa nimiri, kyɛ Jehoova na kaa la te zu velaa.” Ka teneeŋ taa sagediibu Jehoova sowuli ane o nɔ-ennee eŋɛŋ, a na soŋ teŋ ka te kyɛnɛ neŋ sagediibu. Lɛ eebo na vɛŋeŋ ka te nyɛ maaloo yaga zaa.

SAŊA NA TEŊ WAANA KA TE IRI TE KULTATƆ

10. Ka teneeŋ waana ka te kaa iri kultatɔ, bo yɛlɛŋ na baŋ wuli ka te kyɛnɛ neŋ la yɛlɛ te naŋ nyɛrɛ?

¹⁰ Kultaa eɛ kyɔɔtaa naŋ yi Jehoova zie. Ka neɛŋ boɔrɔ ka o kpɛ kultaa poɔ a ba e faa. Sɛre ka te yɔɔpɔge kaŋa na kaa iri te yɔɔdɔɔ kaŋa ka o e o serɛ na, aminekaŋaŋ, o na kaaɛ o gyogo, o waaloŋ, yosoŋ o naŋ taa, o libi-yɛlɛ, ferebo toma oŋ taa o booree poɔŋ, ane lɛ na a dɔɔ naŋ maŋ vɛŋ oŋ taa popeɛloŋ na yɛlɛ.b A yɛlɛ ama zaa eɛ nimizeɛ. Kyɛ, ka te yɔɔpɔge naŋ teɛrɛ a yɛlɛ ama yoŋ, lɛ na baŋ wuliŋ ka o kyɛnɛ neŋ la yɛlɛ o naŋ nyɛrɛ.

11. Ka teneeŋ waana ka te kaa iri te kultatɔ, wala teŋ na baŋ e a de wuli ka te kyɛnɛ neŋ la sagediibu? (1 Korinti 7:39)

¹¹ Ka te yɔɔdɔba ne te yɔɔpɔgebaŋ wa de Jehoova sowuli tonɔ neŋ toma saŋa na baŋ waana ka ba iri kultatɔ, a maŋ vɛŋeŋ ka Jehoova poɔ pɛle. Aŋa mannoo poɔŋ, ba maŋ mãã la ba menne a te ta saŋa na ba gaŋneŋ taa vɔlaa naŋ wa mãã sɛre kyɛ baŋ kpeɛrɛ kultaa poɔ. (1 Kor. 7:36) Jehoova wulee gyogri na ser-soŋ ane pɔg-soŋ naŋ seŋ ka o taa. A gyogri ŋa ka te yɔɔdɔba neŋ te yɔɔpɔgeba maŋ boɔrɔ ka ba nyɛ neɛ na baŋ boɔrɔ ka ba kaa iri ka o e ba kultatɔ na eŋɛŋ. (Yeng. 31:10-13, 26-28; Efe. 5:33; 1 Tim. 5:8) Ka neɛ kaŋa naŋ ba e Jehoova puorebieŋ wa yelka o boɔrɔ baŋ, ba maŋ zagreŋ, bonso ba maŋ de la Jehoova kawane naŋ la ka ba kulo taa “a Daana eŋɛ” yoŋ tonɔ neŋ toma. (Kanne 1 Korinti 7:39.) Ba moɔ̃ la niŋe a kyɛnɛ neŋ sagediibu, bonso ba baŋɛɛŋ ka Jehoova koŋ sage de bonsoŋ zaa sɔgle ba.—Yiem. 55:22.

12. Bo yɛlɛ hoŋ zanne yi Rosa zemmo yɛlɛ na poɔŋ?

¹² Colombia paaloŋ ka Rosa be. O eɛ paaneɛ. Ho na baŋ zannɛɛ yɛlɛ yi o zemmo yɛlɛ ŋa poɔŋ. Toma na oŋ da tonɔ na da vɛŋɛɛŋ ka o ne dɔɔ kaŋa naŋ ba puoro Jehoova laŋ erɛ yɛlɛ. A dɔɔ da boɔrooŋ. Rosa meŋ niŋe da pɛlɛɛ a dɔɔ yɛlɛ. O yeleeŋ ka: “O yɛlɛ da somaŋ. O da maŋ de la o meŋɛ tere a sonnɔ o gbandige na noba, a da e dɔɔ kpeɛŋaa meŋ. O da wulo maŋ nimimaaroŋ. Gyogri na maŋ da boɔrɔ ka N serɛ taa na zaa ka a dɔɔ ŋa da taa. Kyɛ, o da ba e Jehoova Sieree Deme kaŋa. A da eɛ kpeɛŋaa ka N yelkoo ka N ba boɔroo, bonso N sukyiri da boɔrɛɛ o yɛlɛ. Ana saŋa na, N da teɛrɛɛŋ ka N eɛ N yoŋ, azuŋ N da boɔrɔŋ ka N kuli serɛ. Kyɛ, dɔɔ zaa naŋ e Jehoova Sieree Deme kaŋa naŋ ba wa yelko ma ka o boɔrɔ maŋ.” Rosa da ba de o teɛroŋ zaa eŋ bon na oŋ nyɛrɛ na eŋɛŋ. O da teɛrɛɛ lɛ na o gbɛ-de naŋ na baŋ nyɛ kpeɛ̃o o neŋ Jehoova niiloŋ na eŋɛŋ. O da ŋmaaɛ o yɛlɛ yi a dɔɔ zieŋ, a kyɛ de o wagre kpoŋ zie zaa tonɔ Jehoova puoruu toma. A da ba kɔɔre kyɛ baŋ toŋboɔloo a Naaloŋ Duori-Enneba Sakuu. Pampana ŋa, o eɛ special paaneɛ. Rosa yeleeŋ ka: “Jehoova vɛŋɛɛŋ maŋ taa popeɛloŋ yaga zaa.” Ka te sukyiriŋ wa boɔrɔ yelkaŋa yaga zaa, a maŋ eɛ kpeɛŋaa ka te kyɛnɛ neŋ sagediibu, kyɛ ka te naŋ moɔ a erɛ lɛ, te na nyɛɛ maaloo yaga.

SAŊA NA JEHOOVA LANTAAPUORUU NAŊ WA KORƆ TE SOWULI

13. Bo yɛlɛ mineŋ na baŋ vɛŋ ka te kyɛnɛ neŋ yɛlɛ te naŋ nyɛrɛ, saŋa na Jehoova lantaapuoruu naŋ wa korɔ te sowuli?

¹³ Gbɛɛ yaga a Lantaa Zukaareba, bɛɛtil tomazie, gbandige zukaareba, ane a lantaapuoruu nembɛrɛ maŋ korɔ teŋ sowuli naŋ maŋ sonnɔ te teŋ puoro Jehoova soŋ. Kyɛ, te de ka te ba baŋ a sowuli na baŋ ko te na pare te baare, wala aŋ seŋ ka te e? Te na baŋ piili teɛrɛɛ toɔrɔ naŋ na baŋ yi a sowuli poɔŋ a wa te zuŋ. Ka teneeŋ ba kaa soŋ gba, te na leɛ piili teɛrɛɛ te yɔɔmine naŋ korɔ te a sowuli na gbɛ-ŋmɛ yɛlɛ.

14. Bo yɛlɛŋ na baŋ soŋ te ka te kyɛnɛ neŋ sagediibu, saŋa na Jehoova lantaapuoruu naŋ wa ko te sowuli na? (Hiburu 13:17)

¹⁴ Ka teneeŋ kyɛnɛ neŋ sagediibu, a na soŋ teŋ ka te baŋ ka Jehoova la wulo o lantaapuoruu na sori. Jehoova baŋɛɛ yɛlɛ na zaa teŋ tuoro meŋ. Azuŋ, te maŋ de la gyog-soŋ a lonne wieoŋ a de a sowuli toŋ neŋ toma. (Kanne Hiburu 13:17.) Te noɔre sagebo maŋ vɛŋeŋ ka noɔreyeni be a lantaapuoruu poɔŋ. (Efe. 4:2, 3) Yelmeŋɛ la, te yɔɔmine naŋ derɛ te weɛ na eɛ noba naŋ ba pɛgeyi, kyɛ ka teneeŋ sagra ba nɔɛ, Jehoova na ko teŋ maaloo yaga. (1 Saa. 15:22) Wagre naŋ gɛrɛ poɔŋ na, Jehoova na sɛgrɛɛ yelzaa te naŋ teɛrɛ ka a ba tori ka a tori soŋ zaa.—Maik. 7:7.

15-16. Aneazaa ka te yɔɔ kaŋa da naaraŋ ka o de sowuli kaŋa toŋ neŋ toma, kyɛ boŋ da somoo oŋ de a sowuli toŋ neŋ toma? (Kaa a foto.)

¹⁵ Te waanaŋ ka te manne yɛlɛ mine naŋ da e. A yɛlɛ wulee maaloo teŋ maŋ nyɛ saŋa na teŋ wa derɛ sowuli Jehoova lantaapuoruu naŋ korɔ te na tonɔ neŋ toma. Peru paaloŋ poɔŋ, Spanish kɔkɔre ka ba kpoŋ zie zaa yele. Kyɛ noba mine meŋ maŋ yelee kɔkɔ-yobo. A kɔkɔre kaŋa la Kɛkyuwa. Te yɔɔmine naŋ wono a Kɛkyuwa kɔkɔre de la yuomo yaga a bɔ noba naŋ wono Kɛkyuwa kɔkɔre ba gbandige naŋ. Kyɛ, a paaloŋ gɔmenante da wanɛɛ beg-paalaa kaŋa a kyaare sori na aŋ seŋ ka noba tu a bɔ noba naŋ yele kɔkɔ-yobo. Azuŋ, Jehoova lantaapuoruu na meŋ da leɛrɛɛ sori na te yɔɔmine naŋ maŋ tu a boɔrɔ noba naŋ wono Kɛkyuwa kɔkɔre na. (Uro. 13:1) A leɛroo ŋa a lantaapuoruu naŋ da waneŋ na da vɛŋɛɛŋ ka te yɔɔmine na mine teɛre ka a naaŋ moɔloo toma koŋ nyɛ nimitɔɔre gaabo ba gbandige naŋ. Kyɛ, te yɔɔmine na da de la a sowuli paalaa ŋa toŋ neŋ toma. Lɛ da vɛŋɛɛŋ ka Jehoova soŋ ba baŋ nyɛ noba yaga naŋ wono a Kɛkyuwa kɔkɔre.

¹⁶ Kevin eɛ a lantaapuoruu neŋkpoŋ kaŋa naŋ be lantaapuoruu kaŋa baŋ yele Kɛkyuwa kɔkɔre. O da poɔ la te yɔɔmine naŋ da naara ka ba de a sowuli toŋ neŋ toma na poɔŋ. O yeleeŋ ka: “N da teɛrɛɛŋ ka, ‘Wala teŋ na toɔ̃ e a nyɛ noba naŋ wono Kɛkyuwa kɔkɔre?’” Azuŋ, wala ka Kevin da e? O yeleeŋ ka: “N da teɛrɛɛ yɛlɛ naŋ be Yeng Yelibie 3:5. N da teɛrɛɛ Moosis meŋ yɛlɛ. Jehoova da ko oŋ sowuli ka o de a Izerayɛl biiri weɛ a gaa te ta a Maŋzeɛ noɔre, saŋa na a Igyipiti noba naŋ da te yi ba puoriŋ a waana na, a da waa ŋa ba naŋ pigi ba. Moosis da sagɛɛ Jehoova noɔre, azuŋ Jehoova da tu la soseɛlee kaŋa poɔŋ a faa ba.” (Yiib. 14:1, 2, 9-11, 21, 22) Kevin da yi la o poɔ zaa a de a sowuli paalaa naŋ kyaare a naaŋ moɔloo toma na toŋ neŋ toma. Bo yɛlɛŋ da yi a poɔŋ wa? O yeleeŋ ka: “Maaloo na Jehoova naŋ ko te na da vɛŋɛɛŋ ka N noɔre mãã. Saŋa kaŋa naŋ pare, te da maŋ kyɛŋ gaaɛ tɔɔre sɛre kyɛ nyɛ neŋyeni kyɛbee noba bayi naŋ wono Kɛkyuwa kɔkɔre. Kyɛ pampana, te maŋ gɛrɛɛ ziiri na noba naŋ wono Kɛkyuwa kɔkɔre. Lɛ vɛŋɛɛŋ ka te ne noba yaga piili dama diibu, te maŋ leɛ gaaɛ ba zie ka te ne ba piili Baabole zannoo. Noba yaga meŋ waanɛɛ te lammore na.” Ka teneeŋ kyɛnɛ neŋ sagediibu, Jehoova na maŋ ko teŋ maaloo wagre zaa.

17. Bo yɛlɛ teŋ zanne yi a zannoo ŋa poɔŋ?

¹⁷ Te zannɛɛ lɛ na teŋ na baŋ kyɛnɛ neŋ sagediibu yelnimizeere ata mine poɔŋ. Kyɛ, aseŋ ka te kyɛnɛ neŋ sagediibu te zemmo yɛlɛ zaa poɔŋ. Aseŋ ka te kyɛnɛ neŋ sagediibu saŋa na teŋ wa kaa ire yɛlɛ teŋ na de pɛlɛ neŋ te niŋe, saŋa na teŋ wa derɛ gbɛɛ a kyaara sakuu gaabo yɛlɛ, kyɛbee biiri guoloo yɛlɛ. Ka teneeŋ waana ka te de gbɛre zaa, a ba seŋ ka te maŋ are yɛlɛ na teŋ de te nimie nyɛrɛ na yoŋ eŋɛŋ kyɛ derɛ a gbɛre. Kyɛ, aseŋ ka te maŋ teɛre te ne Jehoova niiloŋ na yɛlɛ, a bɔ o sowuli, a lɛ teɛre noɔre na oŋ eŋ ka o na kaarɛɛ te zu na meŋ yɛlɛ. Ka teneeŋ e lɛ, te na ‘kyɛnɛɛ Jehoova te Naaŋmen na yuoriŋ a gɛrɛ wagre naŋ ba taa baaraa.’​—Maik. 4:5.