Tɔglɔ Yezu A De Eŋnyagroŋ Moɔlɔ A Duorisoŋ

1. Bo yɛlɛŋ maŋ vɛŋ teŋ baŋ ka Jehoova Sieree Deme la a yelmeŋɛ Kristabiiri?

KA BA naŋ soore bo ka, bo yɛlɛŋ na toɔ̃ vɛŋ ka te baŋ ka Jehoova Sieree Deme la a yelmeŋɛ Kristabiiri, wala hoŋ na iri a noɔre? Aminekaŋaŋ, ho na yeliŋ ka, lɛ na baŋ maŋ de eŋnyagroŋ moɔlɔ a duorisoŋ na. (Tit. 2:14) Kyɛ, saŋa kaŋa a maŋ eɛ kpeɛŋaa ko te ka te de eŋnyagroŋ moɔlɔ a duorisoŋ. A lantaapuoruu neŋkpoŋ kaŋa naŋ tonɔ tonkpeɛne yaga yeleeŋ ka: “Saŋa kaŋa, N ba maŋ taa a boɔbo ka N yi te moɔle a duorisoŋ ko noba.” Saŋa kaŋa, lɛ hoŋ meŋ maŋ teɛre bee?

2. Bo yɛlɛ mine la na baŋ vɛŋ ka a e kpeɛŋaa ko te ka te naŋ kyɛnɛ de eŋnyagroŋ moɔlɔ a duorisoŋ?

² Saŋa kaŋa, te enne maŋ nyagraŋ ka te de te menne eŋ Jehoova puoruu toma mine poɔŋ, a gaŋ teŋ na de te menne eŋ a naaŋ moɔloo toma poɔŋ. Bonso, ka teneeŋ wa soŋ mɛ te puoruu ziiri na, kyɛbee a soŋ te yɔɔmine naŋ tuore sããmmo kpoŋ kaŋa, bee a eŋ te yɔɔmine faŋa a nyɛ lɛ na baŋ wulo nimipa na, te enne zaaŋ maŋ mãã. Te maŋ nyɛŋ ka te sereŋ toŋɛɛ tonsonne. Ka te ne te yɔɔmineŋ wa laŋ tonɔ toma, emmaaroŋ maŋ be la te kpakyagaŋ, a maŋ lɛ yuo sori ko te teŋ wulo ba nɔmmo meŋ. Te maŋ baŋeŋ ka ba niŋe paalɛɛ yɛlɛ na teŋ erɛ korɔ ba na. Kyɛ, aminekaŋaŋ te be la zie kaŋa a moɔlɔ a duorisoŋ yuomo yaga, kyɛ ka noba fẽẽ lɛ yoŋ kyɛllɛ te duoro na. Noba mine meŋ ba maŋ nɔŋ ka ba wono te duoro na yɛlɛ fẽẽ zaa. Saŋa na a donɛɛ ŋa baaroo naŋ tagra tara na, noba na iri zɔɔrɔ ne teŋ a duorisoŋ zuŋ. (Mat. 10:22) Bo yɛlɛŋ na baŋ soŋ te ka te naŋ kyɛnɛ de eŋnyagroŋ naŋ e kpoŋ moɔlɔ a duorisoŋ?

3. Bo ka yɛlɛ naŋ be Luka 13:6-9 wuli a kyaare eŋnyagroŋ na Yezu naŋ da taa na?

³ Te na baŋ zannɛɛ yelnimizeɛ kaŋa yi Yezu zieŋ a kyaare lɛ aŋ seŋ ka te de eŋnyagroŋ moɔlɔ a duorisoŋ. Saŋa na Yezu naŋ da be a teŋɛzuŋ na, o da maŋ de la eŋnyagroŋ moɔlɔ a duorisoŋ wagre zaa. Saŋa na wagre naŋ gɛrɛ nimitɔɔre na, o eŋnyagroŋ meŋ da duoree saa. (Kanne Luka 13:6-9.) A yi yelmannaa kaŋa poɔŋ, Yezu da de la o duorisoŋ moɔloo toma na manne neŋ dɔɔ kaŋa naŋ de yuomo ata a sɛle kaŋkanteɛ a kaara o zu. Kyɛ, a baaraa zaa a kaŋkanteɛ da ba wɔŋ wɔmɔ. Kyɛ, a dɔɔ eŋɛ da ba kyoɔre a kaŋkanteɛ yɛlɛ. Lɛ neŋ o zu la, Yezu de la yuomo aŋa ata moɔle a duorisoŋ ko a Gyuu noba. Kyɛ, ba kpoŋ zie zaa da ba sage de a duorisoŋ. Kyɛ, Yezu eŋɛ da ba kyoɔre a noba eŋɛŋ, a da ba vɛŋ ka o eŋnyagroŋ na meŋ sigi teŋɛ. Yezu da moɔ la o moɔbo zaa ka o soŋ a Gyuu noba ka ba sage de a duorisoŋ.

4. Bo yɛlɛ anaare mine la teŋ na zanne yi Yezu zieŋ?

⁴ A zannoo ŋa poɔŋ, te na nyɛɛ lɛ na Yezu naŋ da de eŋnyagroŋ moɔlɔ a duorisoŋ saŋa na aŋ da wa kyɛre kyuuri ayoɔbo ka ba koo na. Te na zannɛɛ yɛlɛ na oŋ da maŋ wulo noba, ane yɛlɛ na oŋ da e. A na soŋ teŋ ka te nyɛ lɛ teŋ meŋ na baŋ tɔgloo a de eŋnyagroŋ moɔlɔ a duorisoŋ zenɛ ŋa. Te na zannɛɛ yɛlɛ anaare mine a kyaare Yezu a yi a zannoo ŋa poɔŋ. A dɛndɛŋ soba, o da de la o teɛroŋ zaa eŋ Naaŋmen boɔbo eebo eŋɛŋ. Ayi soba, o da de la o teɛroŋ eŋ Baabole daŋyelbo eŋɛŋ. Ata soba, o da taaɛ sagediibu ka Jehoova na somooŋ. Anaare soba, o da taaɛ teɛretɔ ka noba mine na kyɛllɛɛ o yɛlɛ na.

O DA DE LA O TEƐROŊ ZAA EŊ JEHOOVA BOƆBO EEBO EŊƐŊ

5. Wala ka Yezu da e a de wuli ka o de la o teɛroŋ zaa eŋ Naaŋmen boɔbo eebo eŋɛŋ?

⁵ Yezu da baŋɛɛ yɛlɛ na Naaŋmen naŋ boɔrɔ ka o e. Azuŋ, o da de la eŋnyagroŋ moɔlɔ ‘a Naaŋmen Naaloŋ duorisoŋ’ na. (Luk. 4:43) A naaŋ moɔloo toma da la tonnimizeɛ a ko Yezu o zemmo poɔŋ. Haali aŋ da wa kyɛre fẽẽ ka ba koo na, kyɛ o da maŋ tu la sori a gaa ‘teŋbɛrɛ ane a tembilii poore’ a te moɔlɔ a duorisoŋ korɔ noba. (Luk. 13:22) Yezu da de la wuluu naŋ seŋ neŋ ko o potuuribo na, ka lɛ na vɛŋ ka ba meŋ tɔgloo a moɔlɔ a duorisoŋ korɔ noba.—Luk. 10:1.

6. Aneazaa ka Jehoova boɔrɔŋ ka te tonɔ o puoruu toma na mine, kyɛ bo teɛroŋ ka Jehoova taa kyaare a naaŋ moɔloo toma? (Kaa a foto.)

⁶ Zenɛ ŋa meŋ, Jehoova ne Yezu boɔrɔŋ ka te de a naaŋ moɔloo toma tegroŋ yaga zaa. (Mat. 24:14; 28:19, 20) Toma zaa te naŋ tonɔ korɔ Jehoova ne a naaŋ moɔloo toma kyaarɛɛ taa. Aŋa mannoo poɔŋ, te maŋ mɛ la Lammoziiri ka lɛ na vɛŋ ka noba naŋ sage de a duorisoŋ na baŋ laŋ beŋ a de puoruu ko Jehoova. Toma na teŋ tonɔ Bɛɛtiliŋ, kyɛbee ziyobo na meŋ maŋ sonnɔŋ ka a naaŋ moɔloo toma nyɛrɛ nimitɔɔre gaabo. Ka te yɔɔmineŋ wa tuore sããmmo bɛrɛ, te maŋ de la sommo naŋ seŋ neŋ te ko ba. Lɛ maŋ eŋɛɛ te yɔɔmine ŋa faŋa baŋ lɛ toɔ̃ tonɔ Jehoova puoruu toma, aŋa a naaŋ moɔloo. Azuŋ, a naaŋ moɔloo toma eɛ toŋ tegroŋ yaga zaa, a toma ŋa la ka Jehoova boɔrɔ ka te tonɔ a gaŋ toma zaa. Ka a yɛlɛ ŋaŋ be te teɛroŋ poɔŋ, a na soŋ teŋ ka te maŋ de te menne eŋ a naaŋ moɔloo poɔŋ wagre zaa. János eɛ a lantaapuoruu neŋkpoŋ kaŋa naŋ be Hungary paaloŋ. O yeleeŋ ka, “Wagre zaa, N maŋ leɛteɛrɛɛ N meŋɛ ka, Jehoova puoruu toma zaa kyebe a e tegroŋ gaŋ a naaŋ moɔloo toma. Toma na meŋɛ Jehoova naŋ de ko te ka te tonɔ la lɛ.”

7. Bonso ka Jehoova boɔrɔ ka te naŋ moɔ̃ niŋe moɔlɔ a duorisoŋ? (1 Timoti 2:3, 4)

⁷ Ka teneeŋ taa teɛroŋ na Jehoova naŋ taa kyaare noba, ana soŋ teŋ ka te maaleŋ de eŋnyagroŋ tonɔ a naaŋ moɔloo toma. Jehoova boɔrɔŋ ka noba yaga woŋ a duorisoŋ, a sage de a duorisoŋ meŋ. (Kanne 1 Timoti 2:3, 4.) Azuŋ, Jehoova mɔɔrɛɛ o moɔbo zaa a sonnɔ te, ka lɛ na vɛŋ ka te moɔlɔ a duorisoŋ naŋ terɛ nyɔvore na korɔ noba velaa zaa. Aŋa mannoo poɔŋ, a Nɔnɔ Noba—Soŋ Ba Ka Ba Leɛ Yezu Potuuribo gambile na taaɛ sowuli naŋ na baŋ soŋ te ka te ne noba piili dama diibu, a te ta saŋa na te ne ba naŋ na piili zanna a Baabole. Haali ka nobaŋ ba sage de a duorisoŋ pampana, kyɛ sori naŋ yuo ko baŋ ka ba sage de a duorisoŋ a te ta saŋa na a dɔgroŋ kpoŋ naŋ na baare. Nendaare kaŋa, aminekaŋaŋ ba na teɛrɛɛ yɛlɛ na teŋ manne ko ba na, ka lɛ vɛŋ ka ba de gbɛre a wa puoro Jehoova. Lɛ wuleeŋ ka aseŋ ka te naŋ moɔ̃ niŋe moɔlɔ a duorisoŋ korɔ ba.

O DA DE LA O TEƐROŊ EŊ BAABOLE DAŊYELBO EŊƐŊ

8. Sobuo ka Baabole daŋyelbo da soŋ Yezu oŋ de o wagre tonɔ neŋ toma soŋ?

⁸ Yezu da baŋɛɛ sori na Baabole daŋyelbo naŋ na tu a nyɛ eebo. O da baŋɛɛŋ ka o na de la yuomo ata neŋ kyɛlee toŋ o naaŋ moɔloo toma na. (Daan. 9:26, 27) O da lɛ baŋɛɛ yɛlɛ na a Baabole naŋ yeli a kyaare saŋa, ane sori na oŋ na tu a kpi. (Luk. 18:31-34) A bammo ŋa Yezu naŋ da taa na da vɛŋɛɛŋ oŋ de o wagre tonɔ neŋ toma soŋ. Azuŋ, o da de la eŋnyagroŋ moɔlɔ a duorisoŋ, a moɔrɔ o moɔbo zaa ka o toŋ a toma na baŋ de eŋ o nuuriŋ na baare.

9. Bonso ka Baabole daŋyelbo maŋ eŋ te faŋa teŋ moɔlɔ a duorisoŋ ne eŋnyagroŋ?

⁹ Ka teneeŋ maŋ teɛrɛ Baabole daŋyelbo yɛlɛ gɛrɛ tɔɔre, a na baŋ soŋ teŋ ka te de eŋnyagroŋ moɔlɔ a duorisoŋ. Te baŋɛɛŋ ka a kyɛre fẽẽ lɛ ka a donfaa ŋa na wa o baaroo. A Baabole wulee gyogri na noba naŋ na taa te saŋa ŋaŋ, ane yɛlɛ naŋ na nyɛrɛ eebo. Te zaa de la te nimie a nyɛrɛ a yɛlɛ ama zaa naŋ nyɛrɛ eebo. Te lɛ nyɛɛ lɛ na a Anglo-American Donɛɛ Zaa Naaŋ Diibu Kpeɛ̃o na neŋ Russia neŋ paalonne naŋ are o puoriŋ na naŋ zɔɔrɔ. A yɛlɛ ŋa vɛŋɛɛŋ ka a Baabole daŋyelbo naŋ kyaare a samun-duri sɛŋ naa, ane a samun-gɔɔ sɛŋ naa naŋ na bebe a “baaraa saŋa” na nyɛrɛ eebo. (Daan. 11:40) Te lɛ baŋɛɛŋ meŋ ka a bonmeɛraa yɛlɛ naŋ be Daaniel 2:43-45 na gbɛ-sampama na are ko la a Anglo-American Donɛɛ Zaa Naaŋ Diibu Kpeɛ̃o na. Aŋa lɛ na a daŋyelbo naŋ wuli na, a koŋ kɔɔre Naaŋmen Naaloŋ na wa sãã la nensaaleba gɔmenantere ŋa zaa kpɛlɛŋkpɛlɛŋ. Te taaɛ sagediibu ka a yɛlɛ ŋa na nyɛɛ eebo. A daŋyelbo ama zaa wuli teŋ zie na teŋ ta a donɛɛ yɛlɛ poɔŋ, azuŋ aseŋ ka a eŋ te faŋa ka te de eŋnyagroŋ moɔlɔ a duorisoŋ nimizeɛ̃.

10. Sobobo poɔŋ la ka Baabole daŋyelbo na baŋ eŋ te faŋa ka te naŋ moɔ̃ niŋe moɔlɔ a duorisoŋ?

¹⁰ Lɛ na a Baabole naŋ yeli kyaare nendaare kaŋa na maŋ lɛ eŋ teŋ faŋa teŋ moɔlɔ a duorisoŋ korɔ noba. Te yɔɔpɔge Carrie be la Dominican Republic paaloŋ. Ŋaaŋ oŋ yeli: “Ka maaŋ wa teɛrɛ yɛlɛ na Jehoova naŋ eŋ noɔre ka o na e ko teŋ nendaare kaŋa na, a maŋ tɔɛ N sukyiri maŋ manna a yɛlɛ korɔ noba. Ka maaŋ wa nyɛ noba naŋ tuoro yelkpeɛne ba zemmo poɔŋ, N maŋ nyɛŋ ka Jehoova nɔ-ennee na na baŋ soŋɛɛ ba meŋ.” Baabole daŋyelbo maŋ eŋ teŋ faŋa teŋ moɔlɔ a duorisoŋ, bonso, te baŋɛɛŋ ka a toma eɛ Jehoova toma, azuŋ o na sonnɔ teŋ ka te tonɔ a toma. Hungary paaloŋ ka Leila be. Ŋaaŋ oŋ yeli: “Aizeeya 11:6-9 maŋ eŋ maŋ faŋa maŋ moɔlɔ a duorisoŋ korɔ neɛzaa, haali noba na yel-eree naŋ waa ŋa ba koŋ sage de a duorisoŋ. N baŋɛɛŋ ka Jehoova na baŋ soŋɛɛ neɛzaa ka o leɛre o eebo.” Te yɔɔdɔɔ Christopher be la Zambia paaloŋ. O meŋ yeleeŋ ka: “Aŋa lɛ na Marko 13:10 naŋ wuli na, a duorisoŋ yaara gɛrɛɛ a tendaa lombori zaa. Maaŋ yɛŋ zieŋ, a eɛ apoɔsori naŋ e kpoŋ ka N meŋ e yelkaŋa a soŋ ka a daŋyelbo ŋa nyɛ eebo.” A Baabole daŋyelbo a bobo la maŋ eŋ bo faŋa hoŋ moɔ̃ niŋe moɔlɔ a duorisoŋ?

O DA TAAƐ SAGEDIIBU KA JEHOOVA NA SOMOOŊ

11. Bonso aŋ da e nimizeɛ yaga zaa ka Yezu dɛle Jehoova sɛre kyɛ na baŋ de eŋnyagroŋ tonɔ a naaŋ moɔloo toma? (Luka 12:49, 53)

¹¹ Yezu da taaɛ sagediibu ka Jehoova na somoo ka o naŋ kyɛnɛ de eŋnyagroŋ moɔlɔ a duorisoŋ. Yezu maŋ yi la gyeremɛ poɔŋ a manna a duorisoŋ yɛlɛ korɔ noba. Kyɛ, o da baŋɛɛŋ ka noba mine na iri zɔɔrɔ neŋ la a Naaloŋ duorisoŋ. Ba mine gba suuri maŋ iriŋ saŋa na baŋ wa woŋ a duorisoŋ na. (Kanne Luka 12:49, 53.) A ŋmenpuore wedeɛreba da ba boɔrɔ duoro na Yezu naŋ da moɔlɔ na, azuŋ, ba da boɔrɔŋ ka ba koo. (Gyn. 8:59; 10:31, 39) Kyɛ, Yezu da moɔ̃ la niŋe a moɔlɔ a duorisoŋ, bonso, o da baŋɛɛŋ ka Jehoova be la o zieŋ. Yezu da yeleeŋ ka: ‘N ba e N yoŋ. Bonso a Saa naŋ toŋ ma na be la N zie. . . . O ba bare ma maŋ e N yoŋ. Bonso N maŋ erɛɛ yɛlɛ naŋ pɛlɛ o poɔ wagre zaa.’—Gyn. 8:16, 29.

12. Sobuo ka Yezu da tu a soŋ o potuuribo na baŋ naŋ moɔ̃ niŋe moɔlɔ a duorisoŋ saŋa na baŋ wa tuoro dɔgroŋ?

¹² Yezu da vɛŋɛɛŋ ka o potuuribo na baŋ ka, ka ba naŋ dɛle Jehoova, o na soŋ baŋ. O da vɛŋɛɛŋ baŋ baŋ peɛlaaŋ ka Jehoova na soŋ baŋ saŋa na baŋ wa tuoro dɔgroŋ na. (Mat. 10:18-20; Luk. 12:11, 12) Kyɛ, Yezu da lɛ kpãã baŋ ka ba kaara ba menne velaa. (Mat. 10:16; Luk. 10:3) O da lɛ yelko baŋ ka, ka neɛ kaŋaŋ ba wa boɔrɔ ka o kyɛlle woŋ a duorisoŋ, ba ta wa derɛ a yɛlɛ ferɛ neŋ o soba. (Luk. 10:10, 11) O da yelko baŋ ka, ka ba naŋ wa dɔgrɔ ba zie kaŋaŋ, ba zo yi be. (Mat. 10:23) Yelmeŋɛ la, Yezu da taaɛ eŋnyagroŋ, a da dɛle Jehoova meŋ, kyɛ o da ba maŋ de o meŋɛ te eŋnɛ yɛlɛ naŋ na baŋ de toɔrɔ waneŋ o zuŋ.—Gyn. 11:53, 54.

13. Bonso hoŋ na baŋ sagedi peɛlaaŋ ka Jehoova na soŋ boŋ?

¹³ Zenɛ ŋa meŋ, Jehoova la maŋ sonnɔ te teŋ moɔlɔ a duorisoŋ neŋ eŋnyagroŋ. (Yel. 12:17) Bonso teŋ na baŋ sagedi peɛlaaŋ ka Jehoova na sonnɔ teŋ? Puoro na Yezu naŋ puore sɔre baŋ sɛgaa eŋ Gyɔɔn zuri 17 na vɛŋɛɛŋ teŋ baŋ ka Jehoova na soŋ teŋ. Yezu da puore sɔrɛɛ Jehoova ka o kaara o puorebiiri na zu velaa. A Toma gane na wulee lɛ na Jehoova naŋ da soŋ a bitontonee baŋ de eŋnyagroŋ moɔlɔ a duorisoŋ, aneazaa ka ba da tuoree dɔgroŋ. A yi Yezu puore sɔroo na poɔŋ, o da lɛ yeleeŋ ka Jehoova kaara noba naŋ na sage de a bitontonee duoro na zu velaa. Ho meŋ poɔ la be. A naŋ wa ta zenɛ ŋa, Jehoova naŋ iree Yezu puore sɔroo na noɔre. Azuŋ, O na soŋ la ho meŋ, aŋa lɛ na Oŋ da soŋ a bitontonee na.—Gyn. 17:11, 15, 20.

14. Wala teŋ e baŋ ka te naŋ na baŋ moɔlɛɛ a duorisoŋ wagre kpeɛne saŋa? (Kaa a foto.)

¹⁴ Saŋa na a donɛɛ ŋa baaroo naŋ tagra tara na, a duorisoŋ moɔloo toma na maaleŋ eɛ kpeɛŋaa yaga zaa. Kyɛ, Yezu vɛŋɛɛŋ teŋ baŋ ka o na sonnɔ teŋ ka te de eŋnyagroŋ tonɔ a toma. (Luk. 21:12-15) Aŋa lɛ na Yezu ne o potuuribo naŋ da e na, te meŋ maŋ ko la noba sori ka ba kaa iri yɛlɛ ba naŋ boɔrɔ. Ba mine maŋ sage de la a duorisoŋ, ka ba mine meŋ zagre. Kyɛ, te ba maŋ vɛŋ ka te ne ba ŋmeɛrɛ nɔkpeɛne. Haali ziiri na baŋ de ba nu dɔgle te puoruu toma zu na, kyɛ te yɔɔmine naŋ moɔ̃ la niŋe moɔlɔ a duorisoŋ korɔ noba. Ba ba dɛle ba menne faŋa, kyɛ ba dɛlɛɛ Jehoova. Aŋa lɛ na Jehoova naŋ da ko a dɛndɛŋ Kristabiiri faŋa na, zenɛ ŋa meŋ, Jehoova korɔ teŋ faŋa teŋ na toɔ̃ de “moɔle a Ŋmen-yelnoore zaa pabo,” a te ta saŋa na Ona meŋɛ naŋ na yelka a seŋɛɛŋ. (2 Tim. 4:17) Azuŋ, baŋ peɛlaaŋ ka, ka hooŋ dɛle Jehoova, ho na baŋ de la eŋnyagroŋ moɔlɔ a duorisoŋ.

O DA NAŊ TAAƐ TEƐRETƆ KA NOBA MINE NA KYƐLLƐƐ O YƐLƐ NA

15. Bo yɛlɛŋ wuli ka Yezu da taaɛ teɛroŋ soŋ a kyaare a naaŋ moɔloo toma?

¹⁵ Yezu da taaɛ teɛroŋ soŋ a kyaare a naaŋ moɔloo toma. Lɛ da somooŋ oŋ de eŋnyagroŋ tonɔ a toma. Aŋa mannoo poɔŋ, yuoni 30 C.E. baaroo saŋa, Yezu da baŋɛɛŋ ka noba yaga da eɛ siri ka ba sage de a duorisoŋ. Azuŋ, Yezu da de la ana noba na manne neŋ weɛ boma naŋ seŋ neŋ kyeɛbo. (Gyn. 4:35) Yuoni gbuli puoriŋ, o da yelko la o potuuribo na ka: “A weɛ boma waa la yaga a seŋ kyeɛbo.” (Mat. 9:37, 38) A puoriŋ, o da lɛ yelee a yeli ŋa neŋ o zu ko ba. O da yeleeŋ ka: “A weɛ boma maalɛɛ la yaga . . . yɛ sɔre a weɛ boma Daana ka o toŋ tontonema ka ba gaa te de a weɛ boma.” (Luk. 10:2) Yezu da taaɛ teɛretɔ ka noba mine na sage de la a duorisoŋ. Saŋa na a noba naŋ wa sage de a duorisoŋ na, o poɔ zaaŋ da maŋ pɛle.—Luk. 10:21.

16. Sobuo ka Yezu yelmannee na na baŋ soŋ te ka te taa teɛroŋ naŋ soma a kyaare a naaŋ moɔloo? (Luka 13:18-21) (Kaa a foto.)

¹⁶ Yezu da wulee o potuuribo na ka ba maŋ taa teɛretɔ ka noba mine na sage de la a duorisoŋ. Lɛ na eŋ baŋ faŋa ka ba naŋ kyɛnɛ de eŋnyagroŋ moɔlɔ a duorisoŋ. Yezu da de la yelmannee ayi mine wuli a yɛlɛ ŋa velaa. (Kanne Luka 13:18-21.) A yi a yelmannaa kaŋa poɔŋ, Yezu da de la a Naaloŋ duoro manne neŋ mɔstaad biri ba naŋ sɛle oŋ baa a leɛ te-kpoŋ. Lɛ wuleeŋ ka noba yaga na sage de la a duorisoŋ. Neɛzaa kyebe a na baŋ pigi a yɛlɛ ŋa sori ka a ta nyɛ eebo. A yelmannaa kaŋa meŋ poɔŋ, Yezu da de la a Naaloŋ duoro manne neŋ bilɛ. Lɛ wuleeŋ ka a Naaloŋ duoro na ta la a donɛɛ lombori zaa, a soŋ noba ka ba leɛre ba eebo meŋ. Saŋa kaŋa, a maŋ eɛ kpeɛŋaa ka te nyɛ a leɛroo na a noba naŋ erɛ na. Yezu da vɛŋɛɛŋ ka o potuuribo na baŋ ka a duorisoŋ na baŋ moɔlɔ na na soŋɛɛ noba yaga.

17. Bo yɛlɛ mine zuŋ la aŋ seŋ ka te naŋ kyɛnɛ taa teɛroŋ naŋ soma a kyaare a naaŋ moɔloo?

¹⁷ Ka teneeŋ leɛteɛre lɛ na a naaŋ moɔloo toma naŋ sonnɔ noba a donɛɛ lombori zaa na, a maŋ eŋ teŋ faŋa teŋ moɔ̃ niŋe a de eŋnyagroŋ moɔlɔ a duorisoŋ. Yuoni zaa, noba turituri naŋ boɔrɔ a duorisoŋ maŋ wa la a Yezu Kũũ Leɛteɛroo lammo na. Te ne ba maŋ zannɛɛ a Baabole meŋ. Noba yaga meŋ maŋ de la suobu, a de ba menne eŋ a naaŋ moɔloo toma poɔŋ. Te ba baŋ lɛ na noba naŋ na sage de a duorisoŋ naŋ na e yaga seŋ, kyɛ te baŋɛɛŋ ka, Jehoova lagrɛɛ nembeɛoŋ naŋ na nyɛ faabo a dɔgroŋ kpoŋ saŋa. (Yel. 7:9, 14) Jehoova la a toma Zukaara, O taaɛ teɛretɔ meŋ ka noba yaga naŋ na sage de la a duorisoŋ. Azuŋ, aseŋ ka te naŋ moɔ̃ niŋe moɔlɔ a duorisoŋ.

18. Bo yɛlɛ teŋ boɔrɔ ka noba baŋ a kyaare te?

¹⁸ Yezu yelmeŋɛ potuuribo maŋ de la eŋnyagroŋ moɔlɔ a duorisoŋ wagre zaa. Saŋa na noba naŋ da nyɛ lɛ na a bitontonee naŋ da de nyaa a dire noba sieree na, “ba da baŋ ka ba da waa la a Yezu potuuribo.” (Tom. 4:13) Ka nobaŋ wa nyɛ lɛ na teŋ de eŋnyagroŋ moɔlɔ a duorisoŋ na, a na vɛŋeŋ ka ba baŋ ka te tɔglɛɛ Yezu eŋnyagroŋ na.