Naaŋmen Nɔmmo Bebeŋ Tegitegilɛ

1-2. Bo yelkpeɛne mine la ka Kristabiiri yaga maŋ tuoro?

KA HOOŊ kaa a gane ŋa gampɛlɛ 13, ho na nyɛɛ foto kaŋa. A foto wulee maŋgbori kaŋa naŋ be mane poɔŋ ka sasɛkpeɛne vaaroo yaga zaa. Ka a yɛlɛ ŋaŋ wa pɔge maŋgbori mɔneba, a maŋ eɛ kpeɛŋaa ko ba yaga. Bonso a saseɛ na baŋ ŋmɛɛ a maŋgbori ka o leɛ kyigi a mane poɔŋ. Ka hooŋ kaa a foto, ho na nyɛɛ bonkaŋa ba naŋ de lɔɔ eŋ a mane poɔŋ. A bon maŋ vɛŋeŋ ka a maŋgbori toɔ̃ are a sasɛkpeɛŋaa noɔreŋ ka yelfaa zaa ba pɔgoo.

² Aŋa lɛ na a maŋgbori naŋ be a mane poɔŋ ka sasɛkpeɛne vaaroo na, ka hooŋ wa tuoro yelkpeɛne yaga, a na baŋ waa ŋa sasɛkpeɛne naŋ vaara bo. Saŋa kaŋa ho maŋ taaɛ sukyirimaaroŋ, saŋa kaŋa meŋ ka ho eŋɛ kyerɛ. Bebiri kaŋa, ho maŋ nyɛŋ ka Jehoova sereŋ sonnɔ boŋ yaga zaa. Bebiri kaŋa meŋ, ho maŋ teɛreŋ ka Jehoova gyɛ boŋ bare. (Yiem. 10:1; 13:1) Aminekaŋaŋ, ho zɔmeŋɛ kaŋa yelee yɛlɛ a dii ho sukyiri, ka lɛ vɛŋ ka ho eŋɛ a mãã bo fẽẽ. (Yeng. 17:17; 25:11) Kyɛ, ho naŋ na baŋ teɛrɛŋ ka Jehoova ba sonnɔ bo. Ka hooŋ ba kaa soŋ gba, ho na baŋ teɛreŋ ka Jehoova ba nɔŋ ho yɛlɛ. Ka hooŋ wa tuoro yelkpeɛne, boŋ na baŋ soŋ bo ka ho sagedi peɛlaaŋ ka Jehoova nɔŋɛɛ ho yɛlɛ, a kyɛ lɛ sonnɔ bo meŋ?

3. (a) Aŋa lɛ na Yieme 31:7 ane 136:1 naŋ wuli na, ka ba naŋ yelka neɛ taaɛ yelmeŋɛ nɔmmo, wala ka lɛ wuli? (b) Bonso teŋ na baŋ yelka Jehoova la neɛ naŋ taa yelmeŋɛ nɔmmo a gaŋ neɛzaa? (Kaa a foto.)

³ Ka hooŋ wa tuoro yelkpeɛne a leɛteɛre Jehoova yelmeŋɛ nɔmmo na yɛlɛ, a na soŋ boŋ ka ho are kpeɛŋaa. (Kanne Yieme 31:7; 136:1.) Ka neɛŋ wa taa nɔmmo naŋ e zuluŋ ko neɛ kaŋa, a are o soba puoriŋ kpeɛŋaakpeɛŋaa, te na baŋ yeliŋ ka o soba taaɛ yelmeŋɛ nɔmmo. Jehoova la taa yelmeŋɛ nɔmmo a gaŋ neɛzaa. A Baabole gba yeleeŋ ka Jehoova “paalɛɛŋ neŋ yelmeŋɛ nɔmmo.” (Yiib. 34:​6, 7) A Baabole lɛ yeleeŋ a kyaare Jehoova ka: “Ho paalɛɛŋ neŋ yelmeŋɛ nɔmmo a ko noba naŋ boɔlɔ bo na.” (Yiem. 86:5) Teɛre a Baabole sɛgre ama yɛlɛ gaa tɔɔre. A wuleeŋ ka Jehoova daaŋ koŋ gyɛ o yelmeŋɛ puorebiiri bare zaa. Ka teneeŋ maŋ teɛre ka Jehoova waa la yelmeŋɛ soba, a na soŋ teŋ ka te are kpeɛŋaa, saŋa na teŋ wa tuoro yelkpeɛne.—Yiem. 23:4.

SAŊA NA TEŊ WA PIILI ZANNA A BAABOLE, TE DA ZANNƐƐŊ KA JEHOOVA NƆŊ TEŊ

4. Manne yɛlɛ na mine teŋ zanne saŋa na teŋ wa piili zanna a Baabole, ane bon nanso teŋ sagaadi kpeɛŋaakpeɛŋaa.

⁴ Saŋa na teŋ wa piili zanna a Baabole na, te zannɛɛ yelnimizeere yaga yi o poɔŋ. A yɛlɛ kaŋa la ka, Jehoova nɔŋ teŋ. Ka teneeŋ maŋ teɛrɛ a yɛlɛ ŋa saŋa na teŋ wa tuoro yelkpeɛne, a na soŋ teŋ ka te are kpeɛŋaa. Ho teɛrɛɛ yɛlɛ na mine hoŋ zanne, saŋa na hoŋ wa piili zanna a Baabole? Aŋa mannoo poɔŋ, ho zannɛɛŋ ka Naaŋmen yuori la Jehoova, Yezu la Naaŋmen Bidɔɔyenaa, kũũni ba baŋ yelzaa. Ho zannɛɛŋ meŋ ka a teŋgane ŋa na leɛ la paradiisi ka noba zeŋ o zuŋ tegitegilɛ. (Yiem. 83:18; Ikil. 9:5; Gyn. 3:16; Yel. 21:​3, 4) Saŋa na hoŋ wa sage a yɛlɛ ama di na, neɛ kyebe a na baŋ lɛ bɛnle bo. Ananso la wala? Ananso la ka, ho meŋɛ wa nyɛɛŋ ka a eɛ yelmeŋɛ yoŋ. Lɛ neŋ o zu la, ka hooŋ sagedi ka Jehoova nɔŋɛɛ ho yɛlɛ, a na soŋ boŋ ka ho iri teɛroŋ zaa hoŋ taa ka Jehoova na gyɛ boŋ bare yi ho teɛroŋ poɔŋ. Yɛ vɛŋ ka te zanne a yɛlɛ ŋa gaa tɔɔre a nyɛ.

5. Manne sori na neɛ naŋ maŋ tu a bare zirii wuluu.

⁵ Saŋa na hoŋ wa piili zanna a Baabole na, bo yɛlɛŋ soŋ bo hoŋ zagre zirii puoruu bare? Aminekaŋaŋ, ho da de la yɛlɛ na hoŋ zanna yire a Baabole poɔŋ na manne neŋ yɛlɛ na ho puoruu naŋ wulo na. Aŋa mannoo poɔŋ, te de ka ho da sagedieŋ ka Yezu la a Kpeɛ̃o Zaa Daana Naaŋmen. Kyɛ, saŋa na hoŋ wa zanna a Baabole na, ho wa soorɛɛ ho meŋɛ ka ‘Yezu sereŋ la a Kpeɛ̃o Zaa Daana Naaŋmen bee?’ Yɛlɛ na hoŋ zanne yi a Baabole poɔŋ na soŋ boŋ hoŋ wa nyɛ ka Yezu ba e a Kpeɛ̃o Zaa Daana Naaŋmen. Ho wa nyɛɛŋ ka a Baabole wuloŋ ka Yezu la “a bidɛndɛŋ a bon-iri zaa poɔ,” ane “a Naaŋmen Bi-yeni.” (Kol. 1:15; Gyn. 3:18) Lɛ vɛŋɛɛŋ hoŋ zagre a zirii wuluu ŋa bare, a kyɛ leɛ sage a yelmeŋɛ di. Yelmeŋɛ la, a na baŋ eɛ kpeɛŋaa yaga zaa ko noba mine ka ba bare zirii wuluu mine. (2 Kor. 10:​4, 5) Kyɛ, ka hooŋ wa mɔɔ a baraa, ho ba maŋ leɛ te de a.—Fil. 3:13.

6. Bonso teŋ na baŋ sagedi kpeɛŋaakpeɛŋaa ka Jehoova ‘nɔmmo naŋ ba baara bebeŋ a gɛrɛ wagre zaa’?

⁶ Te na baŋ de la a yɛlɛ ŋa manne neŋ lɛ na a Baabole naŋ wulo ka Jehoova nɔŋ teŋ na yɛlɛ. Saŋa na hoŋ wa tuoro yelkpeɛne, ho na baŋ piili teɛrɛŋ ka Jehoova ba nɔŋ ho yɛlɛ. Kyɛ, a na somaŋ ka ho soore ho meŋɛ ka, ‘A teɛroŋ ŋa toreeŋ bee?’ Ba iree a zannoo ŋa Baabole sɛgre na yi Yieme 136:1. Be mannɛɛ Jehoova nɔmmo yɛlɛ. Ho na baŋ lɛ soorɛɛ ho meŋɛ ka: ‘Bonso ka Jehoova de a yelbiri “yelmeŋɛ” a poɔ o nɔmmo na poɔŋ, a yelka o taaɛ yelmeŋɛ nɔmmo? Bonso ka a Baabole yeli gbɛɛ yaga ka, “o nɔmmo naŋ ba baara bebeŋ a gɛrɛ wagre zaa”?’ Aŋa lɛ na hoŋ sage yɛlɛ na hoŋ da zanna yire a Baabole poɔŋ a piilee saŋa di na, lɛ meŋ hoŋ na baŋ sage yɛlɛ na a Baabole naŋ wulo ka Jehoova taaɛ yelmeŋɛ nɔmmo ko bo na di. Bonso a wuluu ŋa poɔ la yelnimizeere na a Baabole naŋ wulo na poɔŋ. Ka maleke bee nensaalaa zaaŋ wa yelka Jehoova ba nɔŋ te yɛlɛ, azuŋ te ba taa tɔnɔ zaa a koo, ziri-kpoŋ meŋɛ la oŋ ŋma. Azuŋ, aseŋ ka ho zagre o yɛlɛ na bare, aŋa lɛ na hoŋ zagre zirii wuluu bare na!

7. Manne a Baabole sɛgre mine naŋ wuli ka Jehoova sereŋ nɔŋ teŋ.

⁷ Ka hooŋ kaa a Baabole poɔŋ, ho na nyɛɛ sieree yaga naŋ sereŋ wuli ka Jehoova nɔŋ teŋ. Aŋa mannoo poɔŋ, Yezu da yelko la o potuuribo ka: “Yɛ taa la tɔnɔ yaga zaa a gaŋ a daviime.” (Mat. 10:31) Jehoova meŋɛ da yelko la o puorebiiri ka: ‘N na eŋ yɛŋ faŋa yaga zaa, ɛɛ, N na soŋ yɛŋ, N na de la N sontuubu nuduluŋ na nyɔge yɛ taa.’ (Aiz. 41:10) Ho ba nyɛ ka Jehoova neŋ Yezu yelee a yɛlɛ aŋ pɛle ko te bee? Yezu ba yelka ‘Aminekaŋaŋ, yɛ taaɛ tɔnɔ yaga.’ Jehoova meŋ ba yelka, ‘Aminekaŋaŋ, N na soŋ yɛŋ.’ Kyɛ, Yezu yeleeŋ ka: “Yɛ taa la tɔnɔ yaga zaa,” ka Jehoova meŋ yelka ‘N na soŋ yɛŋ.’ Ka hooŋ wa tuoro yelkpeɛne, ka lɛ vɛŋ ka ho piili teɛrɛ ka Jehoova ba nɔŋ ho yɛlɛ. Ka hooŋ maŋ teɛre a sɛgre ama yɛlɛ soŋ, a na dii la ho sukyiri, a lɛ vɛŋ ka ho baŋ peɛlaaŋ ka Jehoova sereŋ nɔŋ boŋ. Yɛlɛ na a Baabole sɛgre ama naŋ yeli na eɛ yelmenne naŋ daaŋ koŋ baŋ leɛre zaa. 1 Gyɔɔn 4:16 yeleeŋ ka: “Te baŋɛɛ la kyɛ sage a nɔmmo Naaŋmen naŋ nɔŋ te.” Ka hooŋ maŋ teɛre a yɛlɛ gaa tɔɔre, a lɛ puore sɔre Jehoova meŋ, a na vɛŋeŋ ka ho sage yɛlɛ naŋ be 1 Gyɔɔn 4:16 na di.a

8. Ka hooŋ naŋ teɛrɛ ka Jehoova ba nɔŋ ho yɛlɛ, wala hoŋ na baŋ e?

⁸ Kyɛ, te de ka a naŋ eɛ kpeɛŋaa ko bo ka ho sagedi ka Jehoova nɔŋ boŋ, wala hoŋ na baŋ e? De yɛlɛ na hoŋ teɛrɛ na manne neŋ yɛlɛ na hoŋ baŋ. Wagre zaa naane ka teɛroŋ na hoŋ maŋ taa na maŋ tori. Kyɛ yɛlɛ na a Baabole naŋ wulo a kyaare Jehoova nɔmmo na eɛ yelmeŋɛ naŋ daaŋ koŋ baŋ leɛre zaa. Ka teneeŋ ba sagedi ka Jehoova nɔŋ teŋ, a waa ŋa te naŋ yele ka yɛlɛ na a Baabole naŋ yelka “Naaŋmen waa la nɔmmo” na eɛ zirii.—1 Gyn. 4:8.

MAŊ TEƐRƐ NƆMMO NA JEHOOVA NAŊ TAA KO BO NA YƐLƐ

9-10. Ka hooŋ kaa yɛlɛ naŋ be Gyɔɔn 16:​26, 27 soŋ, saŋa na Yezu naŋ wa yelka, “A Saa meŋɛ nɔŋ yɛ la” na, wala oŋ da boɔrɔ ka o wuli? (Kaa a foto.)

⁹ Yezu da mannɛɛ Jehoova yɛlɛ ko o potuuribo. Yɛlɛ na oŋ yelko ba na na baŋ soŋ teŋ ka te baŋ ka Jehoova nɔŋ teŋ. Yezu da yeleeŋ ka: “A Saa meŋɛ nɔŋ yɛ la.” (Kanne Gyɔɔn 16:​26, 27.) Yezu da ba yeli a yɛlɛ ŋa o naŋ boɔrɔ ka o potuuribo na taa popeɛloŋ zuŋ. Ka hooŋ kaa a na sɛgre na soŋ, ho na nyɛŋ ka popeɛloŋ yɛlɛ naane ka Yezu da manna korɔ ba. Kyɛ, Yezu da mannɛɛ puoro yɛlɛ korɔ ba.

¹⁰ Yezu da wulee o potuuribo na ka ba maŋ tu o yuori eŋɛ a puore sɔre Jehoova. (Gyn. 16:​23, 24) A da eɛ nimizeɛ yaga zaa ka ba baŋ a yɛlɛ ŋa. Bonso, saŋa na Yezu naŋ wa iri yi kũũni poɔŋ na, o potuuribo na mine da na baŋ leɛ puoro sɔrɛɛ Yezu. Yezu naŋ da e ba zɔmeŋɛ zuŋ, a na baŋ eɛ mɔlɔ ka ba e lɛ. Ba da na baŋ teɛreŋ ka Yezu naŋ nɔŋ ba yɛlɛ zuŋ, o na maŋ kyɛlle woŋee ba puore sɔroo na a pãã de gaaneŋ Jehoova zie a te manne koo. Kyɛ, Yezu da yeleeŋ ka ba iri a teɛroŋ ŋa bare ba teɛroŋ poɔŋ. Ananso la wala? Yezu meŋɛ da iree a noɔre ka: “A Saa meŋɛ nɔŋ yɛ la.” Yezu da boɔrɔŋ ka o wuli ka Jehoova meŋɛ la maŋ kyɛllɛ te puore sɔroo. A wuluu ŋa poɔ la yelnimizeɛ na a Baabole naŋ wulo a kyaare puore sɔroo. Teɛre a yɛlɛ ŋa soŋ. A yi ho Baabole zannoo poɔŋ, ho wa baŋɛɛ Yezu velaa ka lɛ vɛŋ hoŋ nɔmoo. (Gyn. 14:21) Kyɛ, aŋa lɛ na Yezu naŋ da yelko o potuuribo na, ho meŋ na baŋ de la nyaa a puore sɔre, bonso Jehoova ‘meŋɛ nɔŋ bo la.’ Wagre zaa hoŋ wa puoro sɔrɔ Jehoova, ho maŋ wuliŋ ka ho sagɛɛ a yɛlɛ ŋa di.—1 Gyn. 5:14.

ASEŊ KA HO BAŊ YƐLƐ NAŊ NA BAŊ VƐŊ KA HO TEƐRE KA JEHOOVA BA NƆŊ HO YƐLƐ

11. Ka teneeŋ ba sagedi ka Jehoova nɔŋ teŋ, bonso aŋ maŋ vɛŋ ka Setaana poɔ pɛle yaga?

¹¹ Bo yɛlɛŋ maŋ vɛŋ aŋ e kpeɛŋaa ko te ka te sagedi ka Jehoova nɔŋ teŋ? Aminekaŋaŋ, ho na iree a noɔre ka Setaana. Ka hooŋ yeli lɛ, ho ba ŋma zirii. Bonso a Dɛɛvul waa ŋa gbeŋni naŋ boɔrɔ ka o nyɔge te ɔɔ, azuŋ ka teneeŋ ba sagedi ka Jehoova nɔŋ teŋ, o poɔ na pɛleŋ yaga zaa. (1 Pit. 5:8) Nɔmmo zuŋ ka Jehoova toŋ o Bidɔɔ oŋ wa kpi a yɔɔdeɛ te. Setaana boɔrɔŋ ka te teɛre ka te yelfaare zuŋ, te koŋ baŋ nyɛ tɔnɔ yi a yɔɔdeɛbo eŋɛŋ. (Hib. 2:9) Azuŋ, nembuo poɔŋ na pɛle ka teneeŋ ba sagedi ka Jehoova nɔŋɛɛ te yɛlɛ? Setaana. Nembuoŋ boɔrɔ ka te bare Jehoova puoruu saŋa na teŋ wa tuoro yelkpeɛne? Setaana. Kyɛ, hooŋ leɛteɛre a yɛlɛ ŋa soŋ. Nembuo ka Jehoova daaŋ koŋ nɔŋ o yɛlɛ zaa? Setaana. Ho nyɛɛ, Setaana “nyaayɛlɛ” zuŋ, o boɔrɔŋ ka te meŋ teɛre ka Jehoova daaŋ koŋ nɔŋ te yɛlɛ zaa, azuŋ o na zagre teŋ bare. (Efe. 6:11) Ka teneeŋ baŋ lɛ na te dɔndɔma Setaana naŋ boɔrɔ ka o sãã te teɛroŋ aseŋ, ana eŋ teŋ faŋa ka te ‘kyaare a Dɛɛvul ne nyaa.’—Gyi. 4:7.

12-13. Sobuo ka faaloŋ na baŋ dɔge ne te na na toɔ̃ vɛŋ ka a e kpeɛŋaa ko te ka te sagedi ka Jehoova nɔŋ teŋ?

¹² Yelkaŋa la bebeŋ a na baŋ vɛŋ ka a e kpeɛŋaa ko te ka te sagedi ka Jehoova nɔŋ teŋ. A yɛlɛ la faaloŋ na baŋ dɔge ne te na. (Yiem. 51:5; Uro. 5:12) A faaloŋ ŋa sããŋɛɛ niiloŋ naŋ be Jehoova neŋ nensaaleba kpakyagaŋ na. A faaloŋ maŋ vɛŋeŋ teŋ taa teɛroŋ faare, ka te sukyiri teɛrɛ maŋ e faa, ka te laafeeloŋ meŋ ba maŋ paale.

¹³ Faaloŋ vɛŋɛɛŋ teŋ maŋ taa poteɛre faare. Azuŋ, te maŋ korɛɛ te menne sããnaa, a taa eŋkyere, ka vi meŋ maŋ kpɛ te te faaloŋ na zuŋ. Te yel-eree maŋ wuliŋ ka te ba taa gomeŋɛ. Ka teneeŋ wa e yelfaa kaŋa, a saŋa ka a yɛlɛ ama maŋ dɔɔnɔ te yaga zaa. Ho nyɛɛ, Jehoova ba maale te ka faaloŋ be te enneŋ, azuŋ faaloŋ naŋ be te enneŋ zuŋ, te sukyiri na maŋ korɔ teŋ sããnaa wagre zaa. (Uro. 8:​20, 21) Ka lɔɔreŋ nyɛ pɔnkya, o maŋ zoro faanaŋ. Lɛ neŋ o zu la, te naŋ e noba naŋ ba pɛgeyi na zuŋ, te koŋ baŋ e yɛlɛ na Jehoova naŋ maale te ka te erɛ na te baare. A ba e seɛlee aŋ maŋ e kpeɛŋaa ko te ka te sagedi peɛlaaŋ ka Jehoova nɔŋ teŋ. Ka a naŋ wa e kpeɛŋaa ko te ka te sagedi ka Jehoova nɔŋ teŋ, aseŋ ka te leɛteɛre ka Jehoova eɛ Naaŋmen naŋ e kpoŋ a taa gyeremɛ yaga, a maŋ wulo yelmeŋɛ nɔmmo korɔ noba naŋ nɔmoo a de o bege meŋ tonɔ neŋ toma.—Niih. 1:5.

14. Ka teneeŋ maŋ teɛrɛ a yɔɔdeɛbo sareka yɛlɛ, sobuo aŋ na soŋ te ka te sagedi ka Jehoova nɔŋ teŋ? (Urom 5:8) (Kaa a daga, “Yɛ Go Yɛ Menne A Yi ‘Yelbebe Bɛllɛ’ Eŋɛŋ.”)

¹⁴ Yelmeŋɛ la, saŋa kaŋa te na maŋ teɛreŋ ka te ba seŋ neŋ Jehoova nɔmmo. Yelmeŋɛ yelmeŋɛ zaa yɛŋ, te ba seŋ neŋ Jehoova nɔmmo. Kyɛ, lɛŋ vɛŋ ka Jehoova nɔmmo na e o yoŋ. Yelsonne teŋ na baŋ e zuŋ naane ka Jehoova nɔŋ te yɛlɛ. Yezu yɔɔdeɛbo sareka na la maŋ pɔge te faaloŋ. Jehoova naŋ nɔŋ te zuŋ oŋ ko te a kyɔɔtaa ŋa. (1 Gyn. 4:10) Leɛteɛre meŋ ka noba naŋ pɛgeyi naane ka Yezu wa ka o faa, kyɛ o waɛŋ ka o faa yelfa-erebɛ. (Kanne Urom 5:8.) Te kaŋa zaa kyebe a na baŋ erɛ yɛlɛ a gɛrɛ a daaŋ koŋ ŋmɛ gbɛre zaa. Jehoova baŋɛɛŋ ka te na maŋ ŋmeɛrɛɛ gbɛɛ. Ka teneeŋ wa baŋ ka faaloŋ naŋ be te enneŋ na na baŋ vɛŋeŋ ka a e kpeɛŋaa ko te ka te sagedi ka Jehoova nɔŋ teŋ, a na eŋ teŋ faŋa ka te are kpeɛŋaa, a ta vɛŋ ka faaloŋ zɔɔtoɔ̃ te.—Uro. 7:​24, 25.

NAŊ DIRE YELMENNOŊ KORƆ JEHOOVA

15-16. Ka teneeŋ naŋ kyɛnɛ dire yelmennoŋ korɔ Jehoova, bo yɛlɛ teŋ na baŋ sagedi peɛlaaŋ, ka ananso la wala? (2 Saamiuel 22:26)

¹⁵ Ka teneeŋ kaa iri ka te na puoree Jehoova, a eɛ yɛlɛ naŋ soma. Jehoova boɔrɔŋ ka te de a na gbɛre na. O boɔrɔŋ ka te dire yelmennoŋ koroo. (Dut. 30:​19, 20) Ka teneeŋ e lɛ, te na baŋ taaɛ sagediibu ka Jehoova meŋ na diree yelmennoŋ korɔ te. (Kanne 2 Saamiuel 22:26.) Ka teneeŋ dire yelmennoŋ korɔ Jehoova, te na baŋ taaɛ sagediibu ka, lɛ zaa yɛlɛ naŋ na waa te zemmo poɔŋ, kyɛbee yelzaa naŋ na pɔge te, kyɛ Jehoova na arɛɛ te puoriŋ a sonnɔ te.

¹⁶ Aŋa lɛ na teŋ nyɛ a zannoo ŋa poɔŋ na, a ba seŋ ka te zoro yelkpeɛne na teŋ na tuore pampana bee nendaare kaŋa na dabeɛ̃. Bonso te baŋɛɛŋ ka Jehoova nɔŋ teŋ a na sonnɔ te meŋ. Yelnimizeɛ kaŋa a Baabole naŋ wulo la lɛ. Ka a naŋ daŋ wa e kpeɛŋaa ko te ka te sagedi ka Jehoova nɔŋ teŋ, aseŋ ka te maŋ teɛre yɛlɛ na teŋ baŋ ka a eɛ yelmeŋɛ a gaŋ teŋ na dɛle te menne teɛrɛ. Azuŋ, yɛ vɛŋ ka te zaa naŋ kyɛnɛ sagedi kpeɛŋaakpeɛŋaa ka yɛlɛ na a Baabole naŋ wulo ka Jehoova yelmeŋɛ nɔmmo bebeŋ tegitegilɛ na eɛ yelmeŋɛ naŋ koŋ baŋ leɛre.