Ho Na Baŋ Sagediŋ Ka Jehoova Nɔnɔ Boŋ

1. Bonso hoŋ de ho meŋɛ a ko Jehoova? (Kaa a foto.)

HO TEƐRƐƐ bebiri na hoŋ puore sɔre Jehoova a yelkoo ka ho boɔrɔŋ ka ho puoro o yoŋ na? Saŋa na hoŋ zanne Jehoova yɛlɛ a bamoo velaa na, lɛ eŋ boŋ faŋa hoŋ de ana gbɛre na. Ho da eŋɛɛ Jehoova noɔre ka ho na maŋ de la o boɔbo eebo de weɛ ho zemmo poɔŋ, a lɛ de ho sukyiri, nyɔvore, teɛroŋ ane faŋa zaa puoroo. (Mak. 12:30) A yi ana saŋa na a wa ta zenɛ, nɔmmo na hoŋ taa ko Jehoova na maaleŋ eɛ zuluŋ. Azuŋ, ka neɛ kaŋaŋ soore bo ka, “Ho sereŋ nɔŋɛɛ Jehoova bee?” Wala hoŋ na iri a noɔre? Te baŋɛɛŋ ka ho na lonneŋ wieoŋ a deɛ yelka, “Ɛɛ, N nɔŋɛɛ Jehoova a gaŋ neɛzaa bee bonzaa!”

2-3. Boŋ ka Jehoova boɔrɔ ka te sagedi peɛlaaŋ? Bo yɛlɛ teŋ na zanne a zannoo ŋa poɔŋ? (Jeremaiya 31:3)

² Kyɛ ka neɛ kaŋaŋ soore bo ka, “Ho sereŋ sagedieŋ peɛlaaŋ ka Jehoova nɔŋ boŋ?” Wala hoŋ na iri a noɔre? Ana eɛ kpeɛŋaa ko bo ka ho yelka ɛɛ bee? Aminekaŋaŋ, ho na baŋ piili teɛrɛŋ ka ho ba seŋ neŋ Jehoova nɔmmo. Te yɔɔpɔge kaŋa naŋ tuore yelkpeɛne yaga o bibiiloŋ saŋa yeleeŋ ka: “Maaŋ yɛŋ baŋɛɛŋ ka N nɔŋɛɛ Jehoova. N baŋɛɛ lɛ peɛlaaŋ. Kyɛ, yɛlɛ maŋ ba baŋ te baare a maŋ peɛrɛ N meŋɛ gbɛɛ yaga la ka, Jehoova nɔŋ maŋ bee?” Tɔɔ, boŋ na baŋ soŋ bo ka ho sagedi peɛlaaŋ ka Jehoova nɔnɔ boŋ?

³ Jehoova boɔrɔŋ ka ho sagedi peɛlaaŋ ka o nɔnɔ boŋ. (Kanne Jeremaiya 31:3.) Ho nyɛɛ, a yɛlɛ yelmeŋɛ la ka, Jehoova la kaa iri bo ka ho wa puoruu. Saŋa na hoŋ de ho meŋɛ koo a de suobu na, Jehoova ko boŋ kyɔɔtaa kaŋa naŋ e tegroŋ yaga zaa. A kyɔɔtaa la o yelmeŋɛ nɔmmo na. A nɔmmo ŋa eɛ nɔmmo naŋ e zuluŋ a maŋ vɛŋ ka Jehoova mare neɛ a ba bara. A nɔmmo ŋa zuŋ ka Jehoova yelka o yelmeŋɛ puorebiiri zaa eɛ ‘noba naŋ e neŋtegrɛ’ koo. (Maal. 3:17) Lɛ wuleeŋ ka ho meŋ eɛ neŋtegroŋ ko Jehoova. Bitontona Pɔɔl da sagedieŋ peɛlaaŋ ka Jehoova nɔmooŋ. Azuŋ, o da de la nyaa a sɛge ka: “Bonso, N baŋ taɛ la ka kũũ bee nyɔvore, bee malekere, bee namine, bee boma naŋ bebe a zenɛ, bee boma naŋ na wa, bee kpeɛ̃o deme, bee boma naŋ do saa, bee zizuluŋ, bee bon-iraa zaa kontoɔ̃ wɛle te yi a Naaŋmen nɔmmo.” (Uro. 8:​38, 39) Jehoova boɔrɔŋ ka ho meŋ sagedi peɛlaaŋ ka o nɔnɔ boŋ. A zannoo ŋa poɔŋ, te na zannɛɛ bon nanso aŋ e nimizeɛ ka te sagedi peɛlaaŋ ka Jehoova nɔnɔ teŋ, ane yɛlɛ naŋ na toɔ̃ soŋ te ka te e lɛ.

BON NANSO AŊ SEŊ KA TE SAGEDI KA JEHOOVA NƆNƆ TEŊ

4. Wala teŋ na baŋ e a zɔɔtoɔ̃ Setaana nyaayɛlɛ na?

⁴ Ka teneeŋ sagedi peɛlaaŋ ka Jehoova nɔnɔ teŋ, ana soŋ teŋ ka te zɔɔtoɔ̃ Setaana “nyaayɛlɛ” na kaŋa. (Efe. 6:11) Yelzaa Setaana naŋ na e a vɛŋ ka te bare Jehoova puoruu o na eŋ. Setaana nyaayɛlɛ na kaŋa la moɔbo na oŋ maŋ moɔrɔ ka o vɛŋ ka te sagedi ka Jehoova ba nɔŋ te yɛlɛ na. Ka yɛlɛ te naŋ tuore saŋa kaŋa naŋ pare, kyɛbee yelkpeɛne te naŋ tuoro pampana, kyɛbee ka nendaare kaŋa yɛlɛŋ wa dɔɔnɔ te yaga zaa te gaali ka te enne kyoɔre, Setaana maŋ de la ana vuo na a boɔrɔ ka o sãã te neŋ Jehoova niiloŋ na. (Yeng. 24:10) Setaana waa ŋa gbeŋni naŋ maŋ nyɔge duŋo naŋ e baala a ɔɔ. Azuŋ, ka te enneŋ wa kyoɔre yaga zaa, o maŋ boɔrɔŋ ka o eŋ te biinii ka te bare Jehoova puoruu. Kyɛ, ka teneeŋ sagedi peɛlaaŋ ka Jehoova nɔnɔ teŋ, a na eŋ teŋ faŋa ka te nare te menne a “kyaare” Setaana neŋ nyaa, a lɛ zagre o daware yɛlɛ neŋ o nyaayɛlɛ na meŋ zaa bare.—1 Pit. 5:​8, 9; Gyi. 4:7.

5. Bonso aŋ e nimizeɛ ka te baŋ ka Jehoova nɔnɔ teŋ yaga?

⁵ Ka teneeŋ sagedi ka Jehoova nɔnɔ teŋ, ana vɛŋeŋ ka te tage peɛloo. Bonso teŋ yeli lɛ? Lɛ na Jehoova naŋ maale te na vɛŋɛɛŋ teŋ maŋ boɔrɔ ka noba nɔnɔ te yɛlɛ, a kyɛ lɛ wulo te taaba nɔmmo meŋ. Azuŋ, ka nobaŋ wa wuli te nɔmmo, te meŋ maŋ boɔrɔŋ ka te wuli ba nɔmmo. Ka teneeŋ sagedi peɛlaaŋ ka Jehoova nɔŋ teŋ, ana eŋ teŋ faŋa ka te meŋ nɔmoo. (1 Gyn. 4:19) Ka te nɔmmo na teŋ taa ko Jehoova naŋ wa e zuluŋ, Jehoova meŋ nɔmmo na oŋ taa ko te na meŋ na maaleŋ eɛ zuluŋ. A Baabole yeleeŋ ka: “Yɛ tage peɛle Naaŋmen, O na tage peɛle yɛ la.” (Gyi. 4:8) Kyɛ, boŋ na baŋ soŋ te ka te maaleŋ sagedi peɛlaaŋ ka Jehoova nɔnɔ teŋ?

BOŊ NA BAŊ SOŊ TE KA TE SAGEDI PEƐLAAŊ KA JEHOOVA NƆNƆ TEŊ?

6. Ka a naŋ e kpeɛŋaa ko bo ka ho sagedi ka Jehoova nɔnɔ boŋ, wala hoŋ na baŋ e?

⁶ Maŋ puore sɔre Jehoova ka o soŋ bo ka ho sagedi peɛlaaŋ ka o nɔnɔ boŋ. (Luk. 18:1; Uro. 12:12) Maŋ puore sɔre Jehoova ka o soŋ bo ka ho sereŋ baŋ ka o nɔŋɛɛ ho yɛlɛ. Yelmeŋɛ la, ka te sukyiriŋ wa korɔ te sããnaa, ana baŋ eɛ kpeɛŋaa ko te ka te sagedi ka Jehoova sereŋ nɔnɔ teŋ. Kyɛ, aseŋ ka te maŋ leɛteɛre ka Jehoova eɛ kpoŋ gaŋ te sukyie. (1 Gyn. 3:​19, 20) Jehoova baŋ boŋ velaa a gaŋ lɛ na hoŋ baŋ ho meŋɛ na. (1 Saa. 16:7; 2 Tun. 6:30) Azuŋ, ta zoro dabeɛ̃ ka ho yeli ho sukyiri poɔ yɛlɛ koo. Puore sɔre Jehoova ka o soŋ bo ka ho sagedi ka o sereŋ nɔŋ boŋ. (Yiem. 62:8) Ka hooŋ wa puore sɔre Jehoova baare, a eɛ nimizeɛ ka ho de a yɛlɛ ama toŋ neŋ toma.

7-8. Bo yɛlɛŋ be a Yieme gane poɔŋ a vɛŋ teŋ baŋ ka Jehoova nɔnɔ teŋ yaga?

⁷ Ho na baŋ sagɛɛ yɛlɛ na Jehoova naŋ yeli baŋ sɛgaa eŋ a Baabole poɔŋ na di kpɛlɛŋkpɛlɛŋ. Jehoova de la o vooroŋ soŋ na soŋ noba baŋ sɛge o gyog-sonne yɛlɛ eŋ a Baabole poɔŋ. Nyɛ yɛlɛ na a yieloŋ yiele Deevid naŋ da yi nɔmmo poɔŋ a yeli kyaare Jehoova. O da yeleeŋ ka: “Jehoova peɛlɛɛ noba na sukyie naŋ gyɛre; o maŋ faaɛ noba na enne naŋ kyoɔre na.” (Yiem. 34:18) Ka ho eŋɛŋ wa kyoɔre, ho na baŋ piili teɛrɛŋ ka ho eɛ ho yoŋ. Kyɛ, Jehoova eŋɛɛ noɔre ka, ka hooŋ wa be ana yɛlɛ na poɔŋ, o na tage peɛle boŋ, bonso ana saŋa la hoŋ boɔrɔ o sommo yaga zaa. Deevid da lɛ sɛgɛɛŋ ka: “De N neŋtaŋ eŋ ho wuoɔ na poɔŋ.” (Yiem. 56:8) Ka ho poɔŋ wa sãã ka ho dire dɔgɛɛ, Jehoova maŋ baŋeŋ. Jehoova nɔŋɛɛ ho yɛlɛ yaga, azuŋ o ba boɔrɔ ka ho dire dɔgɛɛ. Aŋa lɛ na neɛ naŋ tuuro sori takoreŋ saŋa naŋ maŋ de koɔ̃ wuoɔ gɛrɛ neŋ na, sori kaŋa poɔŋ na Jehoova maŋ de la neŋtaŋ na zaa hoŋ ŋmaara na eŋ o wuoɔ poɔŋ. Ananso la ka, ka teneeŋ wa kono a maŋ dɔɔnɛɛ Jehoova. Yieme 139:3 yeleeŋ a kyaare Jehoova ka: “Ho baŋɛɛ N soe zaa.” Jehoova baŋɛɛ ho soe zaa, kyɛ o maŋ de la o teɛroŋ eŋ yelsonne na hoŋ erɛ na eŋɛŋ. (Hib. 6:10) Bonso teŋ yeli lɛ? Ananso la ka Jehoova niŋe paalɛɛ moɔbo na zaa hoŋ moɔrɔ ka ho erɛ yɛlɛ naŋ pɛlɛ o poɔ na.

⁸ Yɛlɛ na Jehoova naŋ vɛŋ baŋ sɛge eŋ a Baabole poɔŋ na diiree sukyiri yaga zaa. Sori kaŋa poɔŋ Jehoova yele korɔ boŋ ka: “N boɔrɔŋ ka ho baŋ ka N nɔnɔ boŋ yaga zaa, a taa ho yɛlɛŋ meŋ.” Aŋa te naŋ zanne a zannoo piiluu saŋa na, Setaana boɔrɔŋ ka te sagedi ka Jehoova ba nɔnɔ te. Azuŋ, wagre mine ka hooŋ wa taa bonnoo ka Jehoova ba nɔnɔ ho yɛlɛ, mãã ho meŋɛ a soore ho meŋɛ ka, ‘Setaana la a “zir-ŋmaareba zaa saa,” ka Jehoova meŋ e “a yelmeŋɛ Naaŋmen,” ka a noba bayi ŋa kaŋaŋ wa yeli yɛlɛ, ba buo soba maŋ na baŋ sagedi?’—Gyn. 8:44; Yiem. 31:5.

9. Bo noɔre ka Jehoova eŋ ko noba naŋ nɔmoo na? (Yiibu 20:​5, 6)

⁹ Teɛre lɛ na Jehoova naŋ nɔŋ noba naŋ nɔmoo na yɛlɛ. Ho teɛrɛɛ yɛlɛ na Jehoova naŋ da yelko Moosis ane a Izerayɛl biiri na? (Kanne Yiibu 20:​5, 6.) Jehoova eŋɛɛ noɔre ka o naŋ na wulee noba naŋ nɔmoo yelmeŋɛ nɔmmo. A noɔre emmo ŋa vɛŋɛɛŋ teŋ baŋ ka ka teneeŋ wulo Jehoova nɔmmo, Jehoova meŋ na wulo teŋ nɔmmo. (Niih. 1:5) Azuŋ, saŋa kaŋa ka a naŋ wa e kpeɛŋaa ko bo ka ho sagedi ka Jehoova nɔnɔ boŋ, mãã ho meŋɛ a soore ho meŋɛ ka, ‘N nɔŋɛɛ Jehoova bee?’ Pãã teɛre a yɛlɛ ŋa soŋ: Ka hooŋ nɔŋ Jehoova, a moɔrɔ ho moɔbo zaa ka ho erɛ yɛlɛ naŋ pɛlɛ o poɔ, lɛ yɛŋ ho na baŋ sagediŋ peɛlaaŋ ka Jehoova meŋ nɔnɔ boŋ yaga. (Daan. 9:4; 1 Kor. 8:3) Yɛlɛ teŋ boɔrɔ ka te wuli la ka, Jehoova daaŋ koŋ sage deɛ nɔmmo na hoŋ wuloo na, a kyɛ zagre ka o meŋ wuli bo nɔmmo. Azuŋ, ka hooŋ ba taa bonnoo zaa ka ho nɔŋɛɛ Jehoova, lɛ yɛŋ ho na baŋ sagediŋ peɛlaaŋ ka Jehoova meŋ nɔnɔ boŋ. Jehoova daaŋ koŋ gyɛ bo bare zaa.

10-11. Bo teɛroŋ ka Jehoova boɔrɔ ka ho taa kyaare neŋ a yɔɔdeɛbo? (Galesiya 2:20)

¹⁰ Maŋ teɛrɛ a Yezu yɔɔdeɛbo sareka na yɛlɛ. Jehoova ko teŋ kyɔɔtaare yaga, kyɛ kyɔɔtaa naŋ e tegroŋ gaŋ a zaa la Yezu Krista kũũ sareka na. (Gyn. 3:16) Te na baŋ yeliŋ ka Jehoova toŋɛɛ o Bidɔɔ na ka o wa kpi ko hooŋ. Bonso teŋ na baŋ yeli lɛ? Te de bitontona Pɔɔl zemmo yɛlɛ wuli a muni. Leɛteɛre ka o da eɛ yelfaare mine naŋ e nimizeɛ yaga zaa sɛre kyɛ wa leɛ Kristabie. O da lɛ taaɛ gbɛ ŋmɛ mine meŋ naŋ da dɔɔnoo yaga zaa. (Uro. 7:​24, 25; 1 Tim. 1:​12-14) Kyɛ, o wa nyɛɛŋ ka Jehoova toŋɛɛ o Bidɔɔ na ka o wa kpi koo. (Kanne Galesiya 2:20.) Leɛteɛre meŋ ka Jehoova la de o vooroŋ soŋ na soŋ Pɔɔl oŋ sɛge a yɛlɛ ŋa. Yɛlɛ na zaa naŋ be a Baabole poɔŋ na na baŋ wuli teŋ. (Uro. 15:4) Yɛlɛ na Pɔɔl naŋ sɛge na wulee teɛroŋ na Jehoova naŋ boɔrɔ ka ho taa kyaare a yɔɔdeɛbo sareka. Jehoova boɔrɔŋ ka ho baŋ ka a yɔɔdeɛbo eɛ kyɔɔtaa oŋ de ko hooŋ meŋɛ. Ka hooŋ taa a teɛroŋ ŋa tɔ a kyaare a yɔɔdeɛbo, a na soŋ boŋ ka ho sagedi peɛlaaŋ ka Jehoova nɔŋɛɛ ho yɛlɛ.

¹¹ Te puoree Jehoova bareka yaga o naŋ toŋ o Bidɔɔ oŋ wa a teŋɛzu a wa kpi ko te. Kyɛ, Yezu da lɛ waɛ a teŋɛzu ka o wuli te a yelmeŋɛ a kyaare Naaŋmen. (Gyn. 18:37) A yelmeŋɛ na kaŋa oŋ da wuli noba la ka, Jehoova nɔŋɛɛ o biiri yaga zaa.

YEZU SOŊ TEŊ TEŊ BAŊ PEƐLAAŊ KA JEHOOVA NƆNƆ TEŊ

12. Bonso teŋ na baŋ sage yɛlɛ na Yezu naŋ yeli kyaare Jehoova na di?

¹² Saŋa na Yezu naŋ da be a teŋɛzuŋ na, o da vɛŋɛɛŋ ka noba baŋ neɛ na meŋɛ Jehoova naŋ waa. (Luk. 10:22) Yezu neŋ Jehoova da be la sazu yuomo yaga sɛre ka Yezu wa a teŋɛzu. (Kol. 1:15) Azuŋ, te na baŋ sagɛɛ yɛlɛ na zaa Yezu naŋ yeli kyaare Jehoova na di. Yezu meŋɛ na baŋɛɛ lɛ Jehoova naŋ nɔmoo aseŋ. O lɛ de la o nimiri a nyɛ lɛ na Jehoova naŋ maŋ wulo o bidɔba ane o pɔgeyaare nɔmmo. Wala ka Yezu da e a soŋ te teŋ baŋ ka Naaŋmen nɔnɔ teŋ?

13. Bo teɛroŋ ka Yezu boɔrɔ ka te taa kyaare Jehoova?

¹³ Yezu boɔrɔŋ ka te baŋ ka Jehoova nɔŋɛɛ te yɛlɛ. Ka hooŋ kaa a Duorisoŋ Gama poɔŋ, ho na nyɛŋ ka Yezu maŋ boɔlɛɛ Jehoova ka “Saa.” O boɔlooŋ lɛ gbɛɛ yaga. Ka o neŋ o potuuriboŋ wa yele yɛlɛ, gbɛɛ yaga o maŋ yelko baŋ ka “yɛ Saa,” kyɛbee ‘yɛ sazu Saa.’ (Mat. 5:16; 6:26) Sɛre ka Yezu na wa a teŋɛzu na, Naaŋmen puorebiiri da maŋ de la gyeremɛ yo-dɔglɔ mine aŋa ‘Kpeɛ̃o Zaa Daana,’ ‘Neɛ naŋ do saa yaga,’ ane ‘Neɛ naŋ iri boma zaa’ a boɔle neŋ Jehoova. Kyɛ, Yezu yɛŋ naŋ da maŋ boɔle Jehoova ka ‘Saa’ na wulee lɛ na Jehoova naŋ peɛle o puorebiiri aseŋ. Yezu baŋɛɛŋ ka Jehoova eɛ Bi-saa naŋ taa nɔmmo, a ba deɛnɛ neŋ o biiri yɛlɛ. Yezu boɔrɔŋ ka te taa teɛroŋ na oŋ taa kyaare Jehoova na. Yɛ vɛŋ ka te kaa a Baabole poɔŋ a nyɛ ziiri ayi mine Yezu naŋ de a yelbiri “Saa” toŋ neŋ toma.

14. Wala ka Yezu yeli ka lɛ vɛŋ teŋ baŋ ka te yeni yeni zaa eɛ neŋtegrɛ ko Jehoova? (Matio 10:​29-31) (Kaa a foto.)

¹⁴ Kanne Matio 10:​29-31. Bo ka Yezu da boɔrɔ ka o wuli a zie ŋaŋ? Daviime eɛ nuuli naŋ e bilii lɛ. A daaŋ koŋ baŋ nɔŋ Jehoova, kyɛbee a puoruu. Kyɛ, ka daviinii kaŋaŋ wa le teŋɛŋ, Jehoova maŋ baŋeŋ, bonso a daviime eɛ tegroŋ yaga zaa koo. Ka a daviimeŋ e tegroŋ seŋ ŋaaŋ ko Jehoova yɛŋ, wala hoŋ teɛre ka noba naŋ nɔŋ Jehoova a puoruu na na eɛ tegroŋ ko Jehoova aseŋ? Yezu lɛ yeleeŋ ka Jehoova baŋɛɛ te “zukɔɔloŋ zaa noɔre.” Lɛ wuleeŋ ka Jehoova baŋ teŋ velaa zaa a gaŋ lɛ na teŋ na baŋ teɛre. Jehoova boɔrɛɛ te yeni yeni zaa yɛlɛ. Nyɛ, Yezu boɔrɔŋ ka te ture sagedi peɛlaaŋ ka te Saa naŋ be sazuŋ na de la te yeni yeni zaa tegroŋ yaga.

15. Bo ka yɛlɛ na Yezu naŋ yeli aŋ be Gyɔɔn 6:44 wuli bo a kyaare Jehoova?

¹⁵ Te lɛ kanne a Baabole zie kaŋa Yezu naŋ de a yelbiri “Saa” toŋ neŋ toma. (Kanne Gyɔɔn 6:44.) A Baabole zie ŋa vɛŋɛɛŋ teŋ baŋ ka ho Saa naŋ be sazuŋ na la kaa iri bo hoŋ wa a yelmeŋɛ puoruu poɔŋ. Bonso ka Jehoova kaa iri bo? Ananso la ka, Jehoova nyɛɛŋ ka ho taaɛ sukyiri soŋ. (Tom. 13:48) A yi Jeremaiya 31:3 Jehoova da yelko la o puorebiiri ka: “A lɛ zuŋ maŋ de yelmeŋɛ nɔmmo a tage [yɛ] waneŋ N zie.” Aminekaŋaŋ, yɛlɛ na Jehoova naŋ yeli aŋ be Jeremaiya 31:3 na la ka Yezu da de toŋ neŋ toma saŋa na oŋ manne yɛlɛ naŋ be Gyɔɔn 6:44 na. (De manne neŋ Hozeeya 11:4.) Teɛre a yɛlɛ ŋa soŋ. Te Saa naŋ be sazuŋ na nyɛrɛɛ yelsonne ho eŋɛŋ, haali ka hooŋ meŋɛŋ ba nyɛrɛ ana yelsonne na ho eŋɛŋ.

16. (a) Sori kaŋa poɔŋ na, bo ka Yezu yele korɔ te? Bonso aŋ seŋ ka te sage yɛlɛ na oŋ yele na di? (b) Boŋ na baŋ soŋ bo ka ho sagedi peɛlaaŋ ka Jehoova la Bi-saa naŋ soma gaŋ bi-saa zaa? (Kaa a daga, “Saa Na Te Zaa Naŋ Boɔrɔ.”)

¹⁶ Yezu taaɛ ananso oŋ maŋ boɔlɔ Jehoova ka te Saa. Sori kaŋa poɔŋ na, Yezu yele korɔ teŋ ka: “Jehoova ba e maaŋ yoŋ Saa; kyɛ o eɛ ho meŋ Saa. N boɔrɔŋ ka ho baŋ ka Jehoova nɔŋɛɛ ho yɛlɛ, a taa ho yɛlɛŋ meŋ yaga zaa.” Saŋa kaŋa ka a naŋ maŋ wa e kpeɛŋaa ko bo ka ho sagedi ka Jehoova nɔnɔ boŋ, mãã ho meŋɛ a soore ho meŋɛ ka, ‘Yezu la baŋ te Saa na a gaŋ neɛzaa, wagre zaa meŋ o maŋ yelee yelmeŋɛ. Azuŋ, ka o naŋ yelka Jehoova nɔnɔ maŋ, N koŋ baŋ sage lɛ di bee?’—1 Pit. 2:22.

NAŊ SAGEDI PEƐLAAŊ KA JEHOOVA NƆNƆ BOŊ

17. Bonso aŋ e nimizeɛ yaga zaa ka te naŋ sagedi ka Jehoova nɔnɔ teŋ?

¹⁷ A eɛ nimizeɛ yaga zaa ka te naŋ sagedi ka Jehoova nɔnɔ teŋ. Aŋa lɛ na teŋ yeli a zannoo ŋa poɔŋ na, Setaana waa la daware soba, azuŋ o na mɔɔ la o moɔbo zaa ka o vɛŋ ka te bare Jehoova puoruu. Sori na kaŋa Setaana naŋ boɔrɔ ka o tu a e lɛ la, oŋ na vɛŋ ka te teɛre ka Naaŋmen ba nɔŋ te yɛlɛ. Ta vɛŋ ka Setaana bɛnle bo.—Joob 27:5.

18. Bo yɛlɛŋ na baŋ soŋ bo ka ho sagedi peɛlaaŋ ka Jehoova nɔnɔ boŋ?

¹⁸ Bo yɛlɛŋ na baŋ soŋ bo ka ho sagedi peɛlaaŋ ka Jehoova nɔnɔ boŋ? Puore sɔre Jehoova ka o soŋ bo ka ho baŋ ka o nɔŋ boŋ. Maŋ teɛrɛ lɛ a Baabole sɛgsɛgreba naŋ wuli lɛ na Jehoova naŋ nɔŋ te aseŋ. Leɛteɛre meŋ ka, ka hooŋ wulo Jehoova nɔmmo, Jehoova meŋ na wulo boŋ nɔmmo. O koŋ sage deɛ ho nɔmmo na a kyɛ zagre ka o wuli bo nɔmmo. Daŋ ta wa inne meŋ ka a yɔɔdeɛbo sareka eɛ kyɔɔtaa Jehoova naŋ de ko bo. Ho na baŋ sagɛɛ yɛlɛ na zaa Yezu naŋ yelka Jehoova eɛ ho Saa na di. Ka hooŋ erɛ a yɛlɛ ama a na soŋ boŋ ka ho sagedi ka Jehoova sereŋ nɔnɔ boŋ. Azuŋ, ka neɛ kaŋaŋ wa soore bo ka: “Ho sagedieŋ peɛlaaŋ ka Jehoova nɔnɔ boŋ?” Ho na de la nyaa a deɛ yelka: “Ɛɛ, Jehoova nɔnɔ maŋ! Bebiri zaa N maŋ moɔrɛɛ N moɔbo zaa ka N wuloo ka N meŋ nɔmooŋ.”