Ho Na Baŋ Sagediŋ Peɛlaaŋ Ka Jehoova Di La Suuri Ko Bo

1-2. Ka yelfa-erebaŋ wa e kaŋdabaŋkalɛ, wala ka Jehoova maŋ e? (Kaa a foto.)

KA BA naŋ yele noba naŋ e yelfaare aŋ dɔɔnɔ ba yaga zaa, te koŋ baŋ iri Naa Deevid yuori bare. (Yiem. 40:12; 51:3; a piilee yɛlɛ) Deevid da ŋmɛɛ gbɛɛ mine naŋ e nimizeɛ yaga o zemmo poɔŋ. Kyɛ, o da yi la o poɔ zaa a e kaŋdabaŋkalɛ, ka Jehoova di suuri koo. (2 Saa. 12:13) Saŋa na Deevid naŋ wa baŋ ka Jehoova di la suuri koo na, o poɔ zaaŋ da pɛle.—Yiem. 32:1.

² Aŋa Deevid, ka teneeŋ meŋ wa baŋ ka Jehoova zo la te nembaaloŋ a di suuri ko te, te maŋ taaɛ popeɛloŋ. Ka teneeŋ yi te poɔ zaa a e kaŋdabaŋkalɛ, a kyiiri te yelfaare, a moɔrɔ te moɔbo zaa ka te ta lɛ erɛ yelfaare, Jehoova na di la suuri ko te. A yɛlɛ ŋa diiree sukyiri yaga zaa. (Yeng. 28:13; Tom. 26:20; 1 Gyn. 1:9) Nyɛ, Jehoova maŋ eɛrɛɛ te yelfaa na bare kpɛlɛŋkpɛlɛŋ, a maŋ waa ŋa teŋ daaŋ ba e yelfaa gba. Lɛ ka Jehoova maŋ di suuri ko te aseŋ.—Izik. 33:16.

3-4. Wala ka te yɔɔpɔge kaŋa yeli o suobu deebo puoriŋ? Bo yɛlɛ teŋ na zanne a zannoo ŋa poɔŋ?

³ Saŋa kaŋa a maŋ eɛ kpeɛŋaa ko noba mine ka ba sagedi ka Jehoova di la suuri ko ba. Te de Jennifer zemmo yɛlɛ wuli a muni. Jehoova puoruu poɔŋ ka o dɔgreba guoloo. Saŋa na oŋ wa leɛ baapaalaa na, o da sɔglɔ erɛɛ yelfaare. Yuomo mine puoriŋ, o da leɛrɛɛ o eebo a leɛ wa Jehoova zie. O da nyɛɛ nimitɔɔre gaabo a wa seŋ neŋ suobu deebo. Ŋaaŋ oŋ yeli: “Saŋa kaŋa naŋ pare, N da maŋ tonɛɛ peɛ̃mo toma, a maŋ nyu dãã kuoli, a taa sutoloŋ, a da de libi-bɔ de weɛ N zemmo poɔŋ. N baŋɛɛŋ ka a Baabole yeleeŋ ka a tuuro Yezu kũũ sareka na eŋɛŋ, Jehoova di la yelfaare na maŋ e na suuri ko ma. Kyɛ, a eɛ kpeɛŋaa ko ma ka N de N sukyiri zaa sage ka Jehoova sereŋ di la suuri ko ma.”

⁴ Saŋa kaŋa a maŋ eɛ kpeɛŋaa ko bo ka ho sage neŋ ho sukyiri zaa ka Jehoova di la yelfaare na hoŋ e saŋa kaŋa naŋ pare na suuri ko bo bee? Deevid da sagedieŋ peɛlaaŋ ka Jehoova di la suuri koo. Jehoova boɔrɔŋ ka ho meŋ sagedi peɛlaaŋ ka o di la suuri ko bo. A zannoo ŋa poɔŋ, te na zannɛɛ bon nanso aŋ e nimizeɛ ka te sagedi ka Jehoova di la te yelfaare suuri ko te, ane yɛlɛ naŋ na toɔ̃ soŋ te ka te e lɛ.

BONSO AŊ E NIMIZEƐ YAGA ZAA KA TE SAGEDI KA JEHOOVA DI LA SUURI KO TE?

5. Bo ka Setaana boɔrɔ ka te sagedi? De yelmannaa kaŋa wuli a muni.

⁵ Ka teneeŋ sereŋ sagedi ka Jehoova di la suuri ko te, te koŋ sage Setaana bɛnlɛ na di. Leɛteɛre ka, yelzaa Setaana naŋ na e a vɛŋ ka te bare Jehoova puoruu, o na eŋ. Azuŋ, saŋa kaŋa o maŋ boɔrɔŋ ka te sagedi ka Jehoova daaŋ koŋ di te yelfaare na suuri ko te zaa. Te de a dɔɔ na naŋ da be Korinti a toŋ peɛ̃mo toma baŋ iroo yi a lantaapuoruu poɔŋ yɛlɛ na wuli neŋ a yɛlɛ ŋa muni. (1 Kor. 5:​1, 5, 13) Saŋa na oŋ da leɛre o eebo na, Setaana da boɔrɔŋ ka noba naŋ be a lantaapuoruu poɔŋ na zagre ka ba di suuri koo. O da ba lɛ boɔrɔ ka ba deɛ a dɔɔ waneŋ a lantaapuoruu poɔŋ. Setaana da boɔrɔŋ ka a dɔɔ ŋa naŋ leɛre o eebo na teɛre ka o daaŋ koŋ baŋ nyɛ sudi zaa. Lɛ da naŋ vɛŋeŋ ka a dɔɔ ŋa taa “posãã-kpoŋ ka a te zuo o faŋa,” ka o bare Jehoova puoruu. A daware yɛlɛ ŋa neŋ a zu ka Setaana de tonɔ neŋ toma zenɛ ŋa. Kyɛ “te ba be babammo poɔ a kyaare ne o poteɛrɛ.”—2 Kor. 2:​5-11.

6. Ka yelfaare na teŋ e saŋa kaŋa naŋ pare na yɛlɛŋ wa dɔɔnɔ te yaga zaa, wala teŋ na baŋ e?

⁶ Ka teneeŋ sagedi ka Jehoova di la suuri ko te, te na taaɛ popeɛloŋ. Ka teneeŋ wa e yelfaa, a maŋ dɔɔnɔ teŋ. (Yiem. 51:17) Lɛ somaŋ. Ka a yɛlɛŋ dɔɔnɔ te zoma, a na soŋ teŋ ka te de gbɛɛ a leɛre te eebo. (2 Kor. 7:​10, 11) Kyɛ, ka teneeŋ leɛre te eebo a kyɛ naŋ vɛŋ ka yelfaa na teŋ e na naŋ dɔɔnɔ te yaga zaa te gaali, a na toɔ̃ vɛŋeŋ ka te enne kyoɔre. Kyɛ, ka teneeŋ wa sagedi ka Jehoova di la suuri ko te, te koŋ lɛ vɛŋ ka a yɛlɛ dɔɔnɔ te yaga zaa te gaali. A na vɛŋeŋ ka te de zoma naŋ e forifori ane popeɛloŋ meŋɛmeŋɛ a puoro neŋ Jehoova. Lɛ ka Jehoova meŋ boɔrɔ. (Kol. 1:​10, 11; 2 Tim. 1:3) Kyɛ, wala teŋ na baŋ e a sagedi neŋ te sukyiri zaa ka Jehoova di la suuri ko te?

BOŊ NA BAŊ SOŊ TE KA TE SAGEDI PEƐLAAŊ KA JEHOOVA DI LA SUURI KO TE?

7-8. Bo yɛlɛ ka Jehoova yeli kyaare o meŋɛ a ko Moosis? Bo ka yɛlɛ na oŋ yeli na vɛŋ teŋ sagedi peɛlaaŋ? (Yiibu 34:​6, 7)

⁷ Teɛre yɛlɛ na Jehoova naŋ yeli kyaare o meŋɛ na yɛlɛ gaa tɔɔre. Aŋa mannoo poɔŋ, nyɛ yɛlɛ na Jehoova naŋ yelko Moosis Sainai Taŋa na zuŋ.a (Kanne Yiibu 34:​6, 7.) Jehoova da naŋ baŋ yelee yɛlɛ yaga a kyaare o gyogri ane o soe. Kyɛ, o da yeleeŋ ka o eɛ “nembazo ane nimibaaloŋ Naaŋmen.” Ka lɛ ka Naaŋmen sereŋ waa yɛŋ, ho teɛre ka ka hooŋ e yelfaa kaŋa a yi ho poɔ zaa a leɛre ho eebo, o koŋ di suuri ko bo bee? Ka Naaŋmeneŋ zagre ka o di suuri ko bo, lɛ yɛŋ o waa la neɛ sukyiri naŋ ko, a lɛ e potuo soba meŋ. Jehoova daaŋ koŋ baŋ waa lɛ meŋ zaa.

⁸ Jehoova ba e bampuori kombampoɔ soba. Azuŋ, ka onaŋ yelka o waa la nembazo ane nimibaaloŋ Naaŋmen, te na baŋ sagediŋ peɛlaaŋ ka lɛ oŋ sereŋ waa, bonso yelmenne yoŋ oŋ maŋ yele. (Yiem. 31:5) Te na baŋ sagɛɛ yɛlɛ na Jehoova naŋ yeli na di kpɛlɛŋkpɛlɛŋ. Ka yɛlɛ na hoŋ e saŋa kaŋa naŋ pare naŋ dɔɔnɔ bo yaga zaa, soore ho meŋɛ ka: ‘N sagedieŋ ka Jehoova sereŋ eɛ nembazo ane nimibaaloŋ soba naŋ daaŋ koŋ zagre ka o di noba naŋ leɛre ba eebo yelfaare suuri ko ba bee?’ Ka hooŋ sage lɛ di yɛŋ, ho na baŋ sagediŋ peɛlaaŋ ka Jehoova di la ho yelfaare suuri ko bo.

9. Bo ka Yieme 32:5 wuli te a kyaare lɛ na Jehoova naŋ maŋ di suuri ko te?

⁹ Teɛre yɛlɛ na Jehoova naŋ de o vooroŋ soŋ na soŋ noba baŋ sɛge a kyaare o sudi yɛlɛ eŋ a Baabole poɔŋ. Aŋa mannoo poɔŋ, nyɛ yɛlɛ na Deevid naŋ yeli a kyaare Jehoova sudi yɛlɛ. (Kanne Yieme 32:5.) Deevid yeleeŋ ka: “Hoŋ di N yelfaare . . . suuri ko ma.” A Hiburu yelbiri na baŋ de toŋ neŋ toma a kyaare sudi na wulee neɛ naŋ “de bon,” kyɛbee a “iri bonkaŋa” bee “a de bonkaŋa gaa.” Deevid da boɔrɔŋ ka o wuli ka Jehoova iree o yelfaare naŋ tuo o zuŋ oŋ gore na bare. Jehoova sudi na da vɛŋɛɛŋ ka Deevid nyɛ pɛnnoo. Azuŋ, o sukyiri da ba lɛ dɔɔnoo. (Yiem. 32:​2-4) Te meŋ na baŋ nyɛɛ a pɛnnoo ŋa tɔ. Ka teneeŋ yi te poɔ zaa a e kaŋdabaŋkalɛ a kyaare yelfaare na teŋ e na, te na baŋ taaɛ sagediibu ka Jehoova na iree yelfaare na teŋ e na lɔɔ bare. Azuŋ, a ba seŋ ka te vɛŋ ka a yɛlɛ maaleŋ dɔɔnɔ te yaga zaa te gaali.

10-11. A Baabole yeleeŋ ka Jehoova ‘eɛ siri ka o di suuri ko noba,’ bo ka a yɛlɛ ŋa wulo te a kyaare Jehoova? (Yieme 86:5)

¹⁰ Kanne Yieme 86:5. Ka hooŋ kaa a sɛgre soŋ, ho na nyɛŋ ka Deevid yeleeŋ ka Jehoova ‘eɛ siri ka o di suuri ko noba.’ A kyaare a yɛlɛ ŋa, yelpeɛre gane kaŋa yeleeŋ a kyaare Jehoova ka: “[O] eɛ ‘neɛ naŋ dire suuri korɔ noba,’ o ‘gyogo’ la lɛ.” Bonso teŋ na baŋ yelka sudi eɛ Jehoova gyogo? A sɛgre na teŋ kanne na baaraa zie yeleeŋ ka: “Ho paalɛɛŋ neŋ yelmeŋɛ nɔmmo a ko noba naŋ boɔlɔ bo na.” Aŋa lɛ na teŋ zanne a zannoo naŋ pare na poɔŋ na, yelmeŋɛ nɔmmo la maŋ vɛŋ ka Jehoova mare o yelmeŋɛ puorebiiri a ba bara. Jehoova naŋ taa yelmeŋɛ nɔmmo zuŋ, o na vɛŋ ko la yelfa-erebɛ zaa naŋ e kaŋdabaŋkalɛ kpɛlɛŋkpɛlɛŋ. (Aiz. 55:7) Ka a naŋ e kpeɛŋaa ko bo ka ho sagedi ka Naaŋmen di la suuri ko bo, mãã ho meŋɛ a soore ho meŋɛ ka: ‘N sereŋ sagedieŋ ka Jehoova eɛ Neɛ naŋ maŋ dire suuri korɔ noba? A lɛ e Neɛ naŋ maŋ e siri ka o di noba na zaa naŋ e kaŋdabaŋkalɛ a koŋ sɔroo ka o zo ba nembaaloŋ bee? Ka hooŋ iri a noɔre ka ɛɛ, lɛ yɛŋ ho na baŋ sagediŋ peɛlaaŋ ka, ka hooŋ koŋ sɔre Jehoova ka o zo ho nembaaloŋ, o na di la suuri ko bo.

¹¹ A Baabole lɛ vɛŋɛɛŋ teŋ baŋ ka Jehoova baŋɛɛŋ ka te eɛ noba naŋ ba pɛgeyi. (Yiem. 139:​1, 2) Deevid da sɛgɛɛ a yɛlɛ ŋa neŋ a zu eŋ a yieme gane poɔŋ. Yɛlɛ na oŋ sɛge eŋ be na na baŋ soŋ teŋ ka te sagedi ka Jehoova di la suuri ko te. Yɛ vɛŋ ka te nyɛ.

TA WA INNE YƐLƐ NA JEHOOVA NAŊ MAŊ TEƐRE A KYAARE TE NA

12-13. Aŋa lɛ na Yieme 103:14 naŋ wuli na, bo ka Jehoova maŋ teɛre a kyaare te? Yɛlɛ na Jehoova naŋ maŋ teɛre na zuŋ, wala oŋ maŋ e a ko te?

¹² Kanne Yieme 103:14. Deevid yeleeŋ a kyaare Jehoova ka “O maŋ teɛreŋ ka te eɛ tɛne.” Yɛlɛ na Deevid naŋ yeli na wulee bon nanso Jehoova naŋ maŋ e siri ka o di o puorebiiri naŋ leɛre ba eebo yelfaare suuri ko ba. Wagre zaa Jehoova maŋ teɛreŋ ka faaloŋ be la te enneŋ. Ka teneeŋ mãã te menne a peɛre yɛlɛ na Deevid naŋ sɛge biŋ na gaa tɔɔre, a na soŋ teŋ ka te woŋ a yɛlɛ muni soŋ.

¹³ Deevid yeleeŋ ka Jehoova “baŋɛɛ lɛ o naŋ maale te.” Jehoova da maalɛɛ Adama ‘a yi teŋɛ tɛneŋ.’ (Mun. 2:7) Azuŋ, Jehoova baŋɛɛŋ ka nensaaleba naŋ pɛgeyi taaɛ yɛlɛ mine baŋ koŋ toɔ̃ e. O lɛ baŋɛɛŋ meŋ ka nensaaleba naŋ pɛgeyi seŋ ka ba di bondirii, a gaŋ gbiri, a nyɛrɛ sasɛ-soŋ meŋ a voorɔ. Kyɛ, saŋa na Adama neŋ Hawaa naŋ wa zagre Naaŋmen noɔre na, a yɛlɛ da wa sããŋɛɛŋ. Adama biiri zaa nyɛɛ faaloŋ yi o zieŋ, azuŋ a maŋ eɛ mɔlɔ ka ba erɛ yelfaare. Jehoova baŋɛɛ a yɛlɛ ŋa. Kyɛ lɛ yoŋ naane, o maŋ teɛreŋ ka lɛ teŋ waa. A Hiburu yelbiri na baŋ de toŋ neŋ toma ka o maŋ teɛreŋ na wulee neɛ naŋ teɛre yɛlɛ a de gbɛre ka o e yelkaŋa naŋ soma a kyaare yɛlɛ na oŋ teɛre na. Yɛlɛ na Deevid naŋ da boɔrɔ ka o wuli la ka: Jehoova baŋɛɛŋ ka te na maŋ ŋmeɛrɛɛ gbɛɛ, ka teneeŋ wa ŋmɛ gbɛre a leɛre te eebo, o maŋ zo la te nembaaloŋ a di suuri ko te.—Yiem. 78:​38, 39.

14. (a) Bo yɛlɛ ka Deevid lɛ yeli a kyaare lɛ na Jehoova naŋ maŋ di suuri ko te? (Yieme 103:12) (b) Bo yɛlɛ teŋ na baŋ zanne a yi lɛ na Jehoova naŋ di suuri ko Deevid na? (Kaa a daga, “Lɛ Jehoova Naŋ Maŋ Di Suuri A Ko Te A Inni A Yɛlɛ Kpɛlɛŋkpɛlɛŋ.”)

¹⁴ Bo yɛlɛŋ na toɔ̃ lɛ vɛŋ ka te sagedi peɛlaaŋ ka Jehoova di la suuri ko te? (Kanne Yieme 103:12.) Deevid yeleeŋ ka Jehoova maŋ de la te yelfaare na te biŋ tɔɔre zaa saŋa na oŋ wa di suuri ko te na. O yeleeŋ ka Jehoova neŋ yelfaare na teŋ e na maŋ eɛ taa tɔɔre aŋa lɛ na zie na ŋmenaa naŋ maŋ te puri naŋ e tɔɔre neŋ zie na ŋmenaa naŋ maŋ te kpɛ na. Bo ka a yɛlɛ ŋa wulo te a kyaare lɛ na Jehoova naŋ maŋ di suuri ko te na? Yelpeɛre gane kaŋa yeleeŋ ka: “Naaŋmen maŋ iree yelfaa na teŋ e na a de lɔɔ bare tɔɔre zaa. A maŋ waa ŋa oŋ ba lɛ wono yelfaa na teŋ e na nyuu gba. Azuŋ, te na baŋ taaɛ sagediibu ka Naaŋmen daaŋ koŋ lɛ teɛre, kyɛbee a are ana yelfaa na zuŋ a e te yelkaŋa.” Teɛre a yɛlɛ ŋa soŋ. Saŋa kaŋa ka teneeŋ wa woŋ boma mine nyuu, te maŋ teɛrɛɛ yɛlɛ mine naŋ da e saŋa kaŋa naŋ pare. Kyɛ, Jehoova yɛŋ ka onaŋ wa di suuri ko te a maŋ waa ŋa yelfaare na teŋ e na nyuu gaa yɛŋ kpɛlɛŋkpɛlɛŋ. Azuŋ, o daaŋ koŋ lɛ teɛre a yelfaare yɛlɛ, a are a zuŋ a tage te toorii.—Izik. 18:​21, 22; Tom. 3:19.

15. Ka yelfaare mine te naŋ e saŋa kaŋa naŋ pareŋ wa dɔɔnɔ te yaga zaa te gaali, wala teŋ na baŋ e?

¹⁵ Sobuo ka yɛlɛ na Deevid naŋ sɛge aŋ be Yieme 103 na na baŋ soŋ te ka te sagedi peɛlaaŋ ka Jehoova di la suuri ko te? Ka teneeŋ vɛŋ ka yɛlɛ na teŋ e saŋa kaŋa naŋ pare naŋ dɔɔnɔ te yaga zaa te gaali, te na baŋ soorɛɛ te menne ka: ‘N innee yɛlɛ na Jehoova naŋ teɛre na bee? N inneeŋ ka Jehoova baŋɛɛŋ ka faaloŋ be la N eŋɛŋ, ka lɛ vɛŋ oŋ e siri ka o di noba naŋ leɛre ba eebo yelfaare suuri ko ba bee?’ Leɛteɛre meŋ ka Jehoova de la gbɛre ka o daaŋ koŋ lɛ teɛre yelfaa na hoŋ e na. Azuŋ, lɛ soore ho meŋɛ ka: ‘N lɛ teɛrɛɛ yelfaare na maŋ e ka Jehoova di suuri ko ma a innaa bare kpɛlɛŋkpɛlɛŋ na yɛlɛ bee?’ Jehoova ba maŋ de o teɛroŋ zaa eŋ yelfaare na teŋ e saŋa kaŋa naŋ pare na eŋɛŋ. A ba seŋ ka te meŋ erɛ lɛ. (Yiem. 130:3) Ka teneeŋ sagedi peɛlaaŋ ka Jehoova di la suuri ko te, te koŋ lɛ vɛŋ ka yelfaare na teŋ e saŋa kaŋa naŋ pare na dɔɔnɔ te yaga zaa te gaali. Aseŋ ka te inni a yɛlɛ, a kyɛ moɔ̃ niŋe puoro Jehoova.

16. De yelmannaa kaŋa wuli bon nanso aŋ ba soma ka te vɛŋ ka yelfaare na teŋ e saŋa kaŋa naŋ pare na dɔɔnɔ te yaga zaa te gaali. (Kaa a foto.)

¹⁶ Te de yelmannaa kaŋa wuli a muni. Ka teneeŋ vɛŋ ka yelfaare na teŋ e saŋa kaŋa naŋ pare na dɔɔnɔ te yaga zaa te gaali, a na waa ŋa neɛ naŋ mɔnɔ lɔɔre a gɛrɛ zie kaŋa, a kyɛ maŋ leɛ kaara o puori wagre zaa. Yelmeŋɛ la, a somaŋ ka o soba maŋ leɛ kaa puori saŋa kaŋa a nyɛ ka bonkaŋa yi la o puoriŋ a waana ka o ŋmɛ o lɔɔre na bee. Kyɛ, ka o naŋ boɔrɔ ka o ta zie na oŋ gɛrɛ na laafeɛ yɛŋ, aseŋ ka o kaara nimitɔɔre. Saŋa kaŋa te na baŋ leɛteɛrɛɛ gbɛɛ na teŋ ŋmɛ saŋa kaŋa naŋ pare na a zanne yelnimizeere yi be. Lɛ na soŋ teŋ ka te daaŋ ta lɛ paale a taa zaa. Kyɛ, ka teneeŋ de te teɛroŋ zaa eŋ yelfaare na teŋ e saŋa kaŋa naŋ pare ka a dɔɔnɔ te, te enne na kyoɔreŋ Naaŋmen puoruu poɔŋ. Azuŋ, aseŋ ka te de te teɛroŋ eŋ nendaare kaŋa yɛlɛ eŋɛŋ. Te zaa be la a nyɔvore sori zuŋ a kyɛnɛ gɛrɛ Naaŋmen donpaalaa na poɔŋ. Ka teneeŋ wa ta a donpaalaa poɔŋ, yelfaare na teŋ e na “koŋ lɛ wa te teɛroŋ poɔ.”—Aiz. 65:17; Yeng. 4:25.

SAGEDI NEŊ HO SUKYIRI ZAA KA JEHOOVA DI LA SUURI KO BO

17. Bonso aŋ e nimizeɛ ka te sagedi neŋ te sukyiri zaa ka Jehoova nɔŋ teŋ, a lɛ di suuri meŋ ko te?

¹⁷ A eɛ nimizeɛ ka te sagedi neŋ te sukyiri zaa ka Jehoova nɔŋ teŋ, a lɛ di suuri meŋ ko te. (1 Gyn. 3:19) Ananso la ka, Setaana naŋ na moɔ̃ la niŋe a moɔrɔ ka o bɛnle te ka te teɛre ka Jehoova ba nɔŋ te yɛlɛ, azuŋ o koŋ di suuri meŋ ko te. Yɛlɛ oŋ boɔrɔ la ka o vɛŋ ka te bare Jehoova puoruu. Pampana ŋa ka Setaana moɔ̃ niŋe a erɛ a yɛlɛ ŋa a gaŋ saŋa zaa naŋ pare, bonso o baŋɛɛŋ ka o wagre naŋ kyɛre eɛ fẽẽ lɛ. (Yel. 12:12) Ta tere sori ka o zɔɔtoɔ̃ bo!

18. Bo yɛlɛ hoŋ na baŋ e ka a vɛŋ ka ho sagedi peɛlaaŋ ka Jehoova nɔŋɛɛ ho yɛlɛ, a lɛ di suuri meŋ ko bo?

¹⁸ Ka hooŋ boɔrɔ ka ho sagedi peɛlaaŋ ka Jehoova nɔŋɛɛ ho yɛlɛ, de yɛlɛ na teŋ zanne a zannoo naŋ pare na poɔŋ tonɔ neŋ toma. Ka hooŋ boɔrɔ ka ho sagedi peɛlaaŋ ka Jehoova di la suuri ko bo, teɛre yɛlɛ na Jehoova naŋ yeli a kyaare o meŋɛ na. Teɛre yɛlɛ na a Baabole sɛgsɛgreba naŋ yeli a kyaare Jehoova sudi na. Ta wa inne meŋ ka Jehoova baŋɛɛŋ ka faaloŋ be la ho eŋɛŋ, azuŋ o na maŋ wulo boŋ nimibaaloŋ. Jehoova maŋ di la suuri ko te a inni yelfaa na teŋ e na kpɛlɛŋkpɛlɛŋ. Daŋ ta wa inne a yɛlɛ ŋa zaa. Ka hooŋ erɛ a yɛlɛ ama, a na soŋ boŋ ka ho sagedi peɛlaaŋ ka Jehoova na zoe ho nembaaloŋ. Ho meŋ na baŋ de la nyaa a yelka, “Bareka Jehoova, ho naŋ di ‘N yelfaare . . . suuri ko ma’!”—Yiem. 32:5.