Yɛlɛ Naŋ Na Toɔ̃ Soŋ Bo Ka Ho Zɔɔtoɔ̃ Vɔlfaare

1. Bo yelkpeɛŋaa ka nensaaleba zaa naŋ ba pɛgeyi maŋ tuoro?

SAŊA kaŋa a maŋ eɛ kpeɛŋaa ko bo ka ho ta wa erɛ yelkaŋa Jehoova naŋ ba boɔrɔ bee? Ka a taaŋ daaŋ pɔge bo, ta vɛŋ ka ho eŋɛ kyoɔre, ka ho teɛre ka ho yoŋ la tuoro ana yelkpeɛŋaa na. A Baabole yeleeŋ ka: “Pigrinyɛ zaa daŋ ba pɔge yɛ ka ana na naŋ maŋ pɔge nensaaleba zaa na naane.” (1 Kor. 10:13) Lɛ wuleeŋ ka vɔlfaare zaa naŋ dɔɔnɔ bo, dɔɔnɛɛ ho taaba meŋ. Azuŋ, a ba e ho yoŋ, Jehoova na toɔ̃ soŋ boŋ ka ho zɔɔtoɔ̃ ho vɔlfaare na.

2. Bo yelkpeɛne mine ka Kristabiiri ane Baabole zannezanneba na baŋ tuore? (Kaa a fotori.)

² A Baabole yeleeŋ ka: “Neɛ vɔlaa o naŋ taa la maŋ bɛnloo a tagoo te kpɛ neŋ pigrinyɛ poɔ.” (Gyi. 1:14) A Baabole zie ŋa vɛŋɛɛŋ teŋ baŋ ka neɛzaa taaɛ yɛlɛ naŋ na baŋ de o kpɛ neŋ pigrinyɛ poɔŋ. Aŋa mannoo poɔŋ, dɔɔ na baŋ taaɛ a vɔlaa ka o neŋ pɔge kaŋa toŋ peɛ̃mo toma. Dɔba mine meŋ maŋ taaɛ a vɔlaa ka ba neŋ ba dɔɔ-taa toŋ peɛ̃mo toma. Lɛ meŋ aŋ maŋ waa ko pɔgeba mine meŋ. Noba naŋ bare pornography kaabo na baŋ lɛ taaɛ a vɔlaa ka ba lɛ piili kaaraa. Noba naŋ da nyuuro tẽẽfaare ane dããnyukuoliba na toɔ̃ lɛ taaɛ a vɔlaa ka ba de ba menne lɛ eŋ a poɔŋ. A vɔlfaare ŋa mine ka Kristabiiri neŋ Baabole zannezanneba maŋ mɔɔrɔ ka ba zɔɔtoɔ̃. Bitontona Pɔɔl da sɛgɛɛŋ ka: “Ka maa wa boɔrɔ ka N e yeli naŋ soma, faaloŋ maŋ peɛle ma la yaga.” (Uro. 7:21) Saŋa kaŋa lɛ naane teŋ meŋ maŋ teɛre bee?

3. Ka neɛŋ taa vɔlfaa kaŋa a moɔrɔ faana neŋ, wala oŋ na baŋ piili teɛrɛ?

³ Ka hooŋ moɔrɔ faana ka ho zɔɔtoɔ̃ vɔlfaa kaŋa, ho na baŋ teɛreŋ ka ho daaŋ koŋ toɔ̃ zɔɔtoɔ̃ a vɔlfaa zaa, bonso a vɔlfaa maŋ daara boŋ ka ho e yɛlɛ naŋ ba soma. A na toɔ̃ vɛŋeŋ ka ho teɛre ka teɛretɔ zaa kyebe a ko bo. Ho na baŋ teɛrɛŋ meŋ ka Jehoova na sãã boŋ ho naŋ taa ana vɔlfaa na zuŋ. Ka hooŋ taa a teɛrɛ ama, te boɔrɔŋ ka ho baŋ ka a kaŋa zaa ba e yelmeŋɛ. A zannoo ŋa na soŋ teŋ ka te nyɛ bon nanso teŋ yeli lɛ. Te na nyɛɛ soorebie ayi nɔɛ iribo a zannoo ŋa poɔŋ. A dɛndɛŋ soba, nembuoŋ boɔrɔ ka ho teɛre ka teɛretɔ zaa kyebe ka ho na toɔ̃ zɔɔtoɔ̃ la ho vɔlfaare na? Ayi soba, boŋ na toɔ̃ soŋ bo ka ho zɔɔtoɔ̃ ho vɔlfaare na?

TEƐROŊ NA SETAANA NAŊ BOƆRƆ KA TE TAA

4. (a) Bonso ka Setaana boɔrɔ ka te teɛre ka te daaŋ koŋ toɔ̃ zɔɔtoɔ̃ te vɔlfaare na zaa? (b) Bonso teŋ na baŋ sagedi ka te na toɔ̃ zɔɔtoɔ̃ la te vɔlfaare?

⁴ Setaana boɔrɔŋ ka te teɛre ka te daaŋ koŋ toɔ̃ zɔɔtoɔ̃ te vɔlfaare na zaa. Yezu baŋɛɛ a yɛlɛ ŋa, azuŋ o da wulee o potuuribo na ka ba maŋ puore ka: “Ta e ka te kpɛ pigrinyɛ poɔ, kyɛ faa te a yi a neŋfaa na nuuriŋ.” (Mat. 6:13) Setaana yeleeŋ ka nensaalaa zaa kyebe a na yi o poɔ zaa a sagra Naaŋmen nɔɛ saŋa na oŋ wa tuoro pigrinyɛ. (Joob 2:​4, 5) Kyɛ, mãã ho meŋɛ a teɛre a yɛlɛ ŋa soŋ. Nembuoŋ vɛŋ ka vɔlfaa na oŋ taa na nyɛ kpeɛ̃o o zuŋ, ka lɛ vɛŋ oŋ zagre Jehoova noɔre bare? Setaana. Kyɛ ho nyɛɛ a yɛlɛ seɛlee zie, Setaana teɛrɛɛŋ ka lɛ na oŋ waa na, lɛ teŋ meŋ waa. Azuŋ, ka teneeŋ meŋ wa tuore pigrinyɛ, te na zagrɛɛ Jehoova bare. Setaana gba da teɛrɛɛŋ ka o na toɔ̃ bɛnlɛɛ Naaŋmen Bidɔɔ naŋ pɛgeyi ka o e yɛlɛ naŋ ba soma. (Mat. 4:​8, 9) Lɛ teɛre a yɛlɛ ŋa soŋ: Yelmeŋɛ la ka te daaŋ koŋ toɔ̃ zɔɔtoɔ̃ vɔlfaare na teŋ taa na bee? Ai! Bitontona Pɔɔl da sɛgɛɛŋ ka: “N na toɔ̃ eɛ yelzaa a tuuro soba na naŋ korɔ ma kpeɛ̃o na zuŋ.” (Fil. 4:13) A yɛlɛ ŋa na baŋ nyɛɛ eebo te meŋ zie.

5. Wala teŋ e baŋ ka Jehoova sage teŋ di ka te na toɔ̃ zɔɔtoɔ̃ la te vɔlfaare na?

⁵ Jehoova ba waa ŋa Setaana. Jehoova sage teŋ di ka te na baŋ zagrɛɛ te vɔlfaare na bare. Bonso teŋ yeli lɛ? Ananso la ka, Jehoova daŋyeleeŋ ka nembeɛoŋ naŋ e yelmeŋɛ deme na nyɛɛ nyɔvore a dɔgroŋ kpoŋ saŋa. Wala ka lɛ wuli? Te zaa baŋɛɛŋ ka Jehoova koŋ toɔ̃ ŋma zirii. O yeleeŋ meŋ ka nembeɛoŋ mine na “pɛge la a ba kparre a Pilee zĩĩ poɔ a e ka a e pelaa.” (Yel. 7:​9, 13, 14) Lɛ wuleeŋ ka ba na eɛ forifori a kpɛ Naaŋmen donpaalaa na poɔŋ. Azuŋ, a pɛlɛɛŋ ka Jehoova sage teŋ di ka te na toɔ̃ zɔɔtoɔ̃ la vɔlfaare na teŋ taa na.

6-7. Bonso ka Setaana boɔrɔ ka te sagedi ka teɛretɔ zaa kyebe ka te na baŋ zɔɔtoɔ̃ la te vɔlfaare na?

⁶ Setaana ba boɔrɔ ka te teɛre ka te koŋ toɔ̃ zɔɔtoɔ̃ te vɔlfaare na yoŋ, o lɛ boɔrɔŋ ka te teɛre ka teɛretɔ zaa kyebe a ko te. O boɔrɔŋ ka te teɛre ka Jehoova na sãã teŋ teŋ taa vɔlfaare zuŋ. Kyɛ, lɛ teɛre a yɛlɛ ŋa soŋ a nyɛ. Nembuo ka Jehoova ŋmaa o sɛrɛɛ ka o koŋ nyɛ nyɔvore naŋ ba taa baaraa, ka o soba ba taa teɛretɔ zaa meŋ? Setaana. (Mun. 3:15; Yel. 20:10) Te yɛlɛ erɛɛ Setaana nyuuri, bonso o daaŋ koŋ nyɛ nyɔvore naŋ ba taa baaraa Jehoova naŋ eŋ noɔre ka o na ko teŋ na. Azuŋ oŋ moɔrɔ ka o vɛŋ ka te teɛre ka te ba taa teɛretɔ zaa na. Kyɛ, te taaɛ teɛretɔ. A Baabole gba vɛŋɛɛŋ teŋ baŋ ka Jehoova ba boɔrɔ ka o sãã te, kyɛ o boɔrɔŋ ka o soŋ te. Jehoova “ba boɔrɔ ka neɛzaa wɛ, kyɛ O boɔrɔ la ka neɛzaa leɛ o eebo.”—2 Pit. 3:9.

⁷ Ho nyɛɛ, ka teneeŋ teɛrɛ ka te daaŋ koŋ toɔ̃ zɔɔtoɔ̃ te vɔlfaare na, kyɛbee teɛretɔ zaa kyebe a ko te, te teɛrɛɛ yɛlɛ aŋa lɛ na Setaana naŋ boɔrɔ ka te teɛrɛ na. Ka teneeŋ sereŋ baŋ a yɛlɛ ŋa pare velaa, a na soŋ teŋ ka te zagre Setaana teɛrɛ na bare.—1 Pit. 5:​8, 9.

TEƐROŊ NA TEŊ NA BAŊ TAA TE NAŊ TAA FAALOŊ ZUŊ

8. A yi toŋfatoŋ puoriŋ, ka a Baaboleŋ wa yelka faaloŋ wala aŋ wuli? (Yieme 51:5) (Kaa ‘Yɛlɛ Mine Ba Naŋ Wuli A Muni’ zie na.)

⁸ A yi Setaana puoriŋ, yelkaŋa meŋ lɛ bebeŋ a na toɔ̃ vɛŋ ka te teɛre ka te daaŋ koŋ toɔ̃ zɔɔtoɔ̃ te vɔlfaare na zaa. Bo yɛlɛ la lɛ? Ona la faaloŋ na teŋ nyɛ yi Adama neŋ Hawaa zie na.a—Joob 14:4; kanne Yieme 51:5.

9-10. (a) Saŋa na Adama neŋ Hawaa naŋ wa e yelfaa na, wala ka yɛlɛ da waa ko ba? (Kaa a foto.) (b) Sobuo ka faaloŋ nyɛrɛ kpeɛ̃o te zuŋ?

⁹ Teɛre nyɛ lɛ na yɛlɛ naŋ da waa ko Adama neŋ Hawaa saŋa na baŋ da e yelfaa na. Saŋa na baŋ wa zagre Jehoova noɔre na ba da zoro sɔglɔŋ, a pɔgrɔ ba eŋkponkpolo na. Ka hooŋ kaa Insight on the Scriptures gane na poɔŋ, ŋaaŋ oŋ yeli kyaare yɛlɛ na baŋ da e na: “Faaloŋ da vɛŋɛɛŋ ka nyaaba, dabeɛ̃ ane tuo-tegroŋ kaŋa a wa dɔgle ba zuŋ.” Adama neŋ Hawaa niiloŋ na baŋ da taa neŋ Jehoova na da sããŋɛɛŋ. Azuŋ, lɛ zaa ba naŋ erɛ ba yɛlɛ, kyɛ ka ba naŋ wa woŋ Jehoova yɛlɛ, nyaaba, dabeɛ̃, ane posããnaa yoŋ baŋ na maŋ taa, bonso ba koŋ toɔ̃ iri faaloŋ naŋ be ba enneŋ na bare.

¹⁰ Yelmeŋɛ la, yɛlɛ naŋ da pɔge Adama neŋ Hawaa na neŋ a zu naaneŋ pɔgrɔ te. Bonso Adama neŋ Hawaa yɛŋ koŋ nyɛ Yezu yɔɔdeɛbo sareka na tɔnɔ. Kyɛ, tenee yɛŋ baŋɛɛŋ ka Jehoova tu la a yɔɔdeɛbo sareka eŋɛŋ a di te yelbebe suuri ko te, ka lɛ vɛŋ ka te ne o taa niiloŋ naŋ e kpeɛŋaa. (1 Kor. 6:11) Kyɛ, te naŋ eɛ noba naŋ nyɛ faaloŋ yi Adama neŋ Hawaa zieŋ. Azuŋ, a ba e seɛlee nyaaba, dabeɛ̃, ane posããnaa naŋ maŋ kpɛ te te faaloŋ na zuŋ. A Baabole gba yeleeŋ ka faaloŋ leɛ la naa a dire naaŋ nensaaleba zuŋ. Haali noba na “zaa naŋ da ba e a Adama yelbieri na tɔ” eɛ noba naŋ be faaloŋ puliŋ. (Uro. 5:14) Ka hooŋ teɛre a yɛlɛ soŋ a na baŋ kyoɔrɛɛ ho eŋɛ, kyɛ a ba seŋ ka te teɛre ka teɛretɔ zaa kyebe ka te na toɔ̃ zɔɔtoɔ̃ la faaloŋ. Te na baŋ zɔɔtoɔ̃ la a teɛroŋ faare ŋa meŋ. Sobuoŋ?

11. Ka teneeŋ teɛre ka te koŋ toɔ̃ zɔɔtoɔ̃ te vɔlfaare, sobuo ka yɛlɛ naŋ be Urom 6:12 na baŋ soŋ te?

¹¹ Te naŋ e noba naŋ taa faaloŋ na zuŋ, te na baŋ teɛreŋ ka te daaŋ koŋ toɔ̃ zɔɔtoɔ̃ te vɔlfaare zaa. A maŋ waa ŋa bonkaŋa naŋ be te enneŋ a yele korɔ te ka te koŋ toɔ̃ zɔɔtoɔ̃ vɔlfaare naŋ be te enneŋ na. Kyɛ, a ba seŋ ka te sage lɛ di. Ananso la ka, a Baabole eŋ teŋ faŋa ka te ta tere sori ka faaloŋ naŋ kyɛnɛ ‘dire kpeɛ̃o’ te zuŋ. (Kanne Urom 6:12.) Lɛ wuleeŋ ka te na baŋ arɛɛ kpeɛŋaa a zagre ka te e yɛlɛ na te vɔlfaare naŋ daara te eŋnɛ ka te e na. (Gal. 5:16) Jehoova taaɛ sagediibu ka te na toɔ̃ zagrɛɛ te vɔlfaare na bare. Ka lɛ naane, o daaŋ koŋ sage yeli ka te e lɛ zaa. (Dut. 30:​11-14; Uro. 6:6; 1 Tɛs. 4:3) A pɛlɛɛŋ ka te na toɔ̃ zɔɔtoɔ̃ la te vɔlfaare na.

12. Ka teneeŋ wa teɛre ka te ba taa teɛretɔ zaa ka te na toɔ̃ zɔɔtoɔ̃ la te vɔlfaare, wala aŋ seŋ ka te e? Bonso aŋ seŋ ka te e lɛ?

¹² Ka teneeŋ wa teɛre ka te ba taa teɛretɔ zaa ka te na zɔɔtoɔ̃ la te vɔlfaare na, azuŋ Jehoova na sãã teŋ, aseŋ ka te lɛ teɛre ka faaloŋ naŋ be te enneŋ na la boɔrɔ ka te teɛrɛ lɛ. Aseŋ ka te zagre a teɛroŋ ŋa bare kpɛlɛŋkpɛlɛŋ. Ananso la ka, a Baabole vɛŋɛɛŋ teŋ baŋ ka Jehoova baŋɛɛŋ ka te eɛ noba naŋ taa faaloŋ. (Yiem. 103:​13, 14) Jehoova ‘baŋɛɛ yelzaa’ a kyaare te. O baŋɛɛ lɛ na faaloŋ naŋ be te enneŋ na naŋ maŋ daara te ka te erɛ yelfaare. (1 Gyn. 3:​19, 20) Ka teneeŋ nyɔge te menne a zagre ka te e yɛlɛ na te vɔlfaare naŋ daara te eŋnɛ ka te e na, te neŋ Jehoova niiloŋ na maaleŋ eɛ kpeɛŋaa yaga. Bonso teŋ na baŋ sage lɛ di peɛlaaŋ?

13-14. Ka teneeŋ taa vɔlfaare lɛ wuleeŋ ka te koŋ baŋ lɛ pɛlɛ Jehoova poɔ bee? Wuli a muni.

¹³ A Baabole vɛŋɛɛŋ teŋ baŋ ka wɛltaa be la neɛ naŋ taa vɔlfaa, ane neɛ naŋ de o meŋɛ eŋ vɔlfaa poɔŋ. Teŋ e noba naŋ taa faaloŋ na zuŋ, vɔlfaare na maŋ waɛ te enneŋ, te koŋ toɔ̃ pigi lɛ sori. Kyɛ, te na baŋ arɛɛ kpeɛŋaa a zagre ka te de te menne eŋ a vɔlfaa poɔŋ. Aŋa mannoo poɔŋ, sɛre ka noba mine naŋ da bebe a dɛndɛŋ yuoŋ kɔɔ na saŋa na wa leɛ Kristabiiri na, ba da de la ba menne eŋnɛ dɔɔ neŋ dɔɔ ane pɔge neŋ pɔge gaŋneŋ taa yɛlɛ poɔŋ. Pɔɔl da sɛgɛɛŋ a kyaare ba ka: “Lɛ ka yɛ mine da waa.” Lɛ wuleeŋ ka ba daaŋ ba lɛ taa a vɔlaa ka ba de ba menne eŋ ana yɛlɛ na poɔŋ bee? Te koŋ baŋ yeli te baare. Kyɛ, ka neɛŋ wa e a yɛlɛ ama taa minli, a maŋ eɛ kpeɛŋaa ka o bare. Kristabiiri naŋ da baŋ ba menne taabo, a zagre ka ba de ba menne eŋ a yɛlɛ ŋa poɔŋ neŋ Jehoova niiloŋ da eɛ kpeɛŋaa. Jehoova nimitɔɔreŋ ba da eɛ noba naŋ e “forifori.” (1 Kor. 6:​9-11) Ho meŋ na toɔ̃ eɛ lɛ.

¹⁴ Vɔlfaare zaa naŋ be ho eŋɛŋ a dɔɔnɔ bo, kyɛ ho na toɔ̃ zɔɔtoɔ̃ la. Aminekaŋaŋ ho koŋ baŋ iri a vɔlfaare bare, kyɛ ka hooŋ taa meŋɛ bantaabo gyogo, ana soŋ boŋ ka ho ta ‘be a ho eŋgane vɔlfaare poɔ, a tuuro a ho eŋɛ ane ho yɛŋ yelboɔre.’ (Efe. 2:3) Boŋ na toɔ̃ soŋ bo ka ho e lɛ a toɔ̃ zɔɔtoɔ̃ ho vɔlfaare?

YƐLƐ NAŊ NA TOƆ̃ SOŊ BO KA HO ZƆƆTOƆ̃ VƆLFAARE

15. Ka teneeŋ boɔrɔ ka te zɔɔtoɔ̃ te vɔlfaare na, bonso aŋ e nimizeɛ ka te peɛre te menne velaa?

¹⁵ Ka hooŋ boɔrɔ ka ho zɔɔtoɔ̃ ho vɔlfaare, aseŋ ka ho peɛre ho meŋɛ velaa a baŋ yɛlɛ na hoŋ e bambaala a poɔŋ. Kaara soŋ a ta wa bɛllɛ ho meŋɛ. (Gyi. 1:22) Aŋa mannoo poɔŋ, neɛ kaŋa naŋ e bambaala dããkpeɛne nyuubu poɔŋ na toɔ̃ bɛnlɛɛ o meŋɛ a yelka, ‘Noba mine maŋ nyu la dããkpeɛne a gaŋ ma.’ Neɛ kaŋa meŋ naŋ kaara pornography na toɔ̃ bɛnlɛɛ o meŋɛ a yelka neɛ kaŋa la vɛŋ oŋ kaaraa. Azuŋ, o soba na baŋ yeliŋ ka, ‘Ka N pɔgeŋ da wulo ma nɔmmo yaga, N koŋ kaara pornography.’ A teɛrɛ ŋa taa maŋ vɛŋeŋ aŋ e mɔlɔ ka te de te menne eŋ vɔlfaare poɔŋ. Azuŋ, ta wa derɛ yelzaa ire neŋ yɛlɛ noɔre a kyɛ de ho meŋɛ eŋnɛ vɔlfaare poɔŋ. Ta wa erɛ lɛ ho teɛroŋ poɔŋ gba. Baŋ peɛlaaŋ ka neɛzaa bee bonzaa koŋ baŋ fere bo ka ho e yɛlɛ ho naŋ ba boɔrɔ ka ho e.—Gal. 6:7.

16. Bo yɛlɛŋ na baŋ soŋ bo ka ho nare ho meŋɛ a erɛ yɛlɛ naŋ soma?

¹⁶ Ka hooŋ wa peɛre ho meŋɛ velaa a baŋ ho bambaaloŋ baare, a na somaŋ ka ho nare ho meŋɛ velaa. (1 Kor. 9:​26, 27; 1 Tɛs. 4:4; 1 Pit. 1:​15, 16) Peɛre baŋ vɔlfaa na naŋ maŋ dɔɔnɔ bo yaga zaa, ane saŋa na a vɔlfaa naŋ maŋ iri ho eŋɛŋ. Aminekaŋaŋ, pigrinyɛ kaŋa la hoŋ maŋ tuoro, kyɛbee ka wagre kaŋaŋ wa ta a bebiri poɔŋ hoŋ maŋ tuore ana pigrinyɛ na. Aŋa mannoo poɔŋ, ka hooŋ wa bale kyɛbee zisoɔree saŋa aŋ maŋ e mɔlɔ ka ho de ho meŋɛ eŋ a vɔlfaa poɔŋ bee? Nare ho meŋɛ ane yɛlɛ na hoŋ na e ka hooŋ wa tuore a pigrinyɛ. A na somaŋ yaga ka ho nare ho meŋɛ sɛre ka a pigrinyɛ wa.—Yeng. 22:3.

17. Bo yɛlɛ teŋ na baŋ zanne yi Gyoosɛf ewuli soŋ na poɔŋ? (Munpiilee 39:​7-9) (Kaa a fotori.)

¹⁷ Te nyɛ lɛ na Gyoosɛf naŋ da e o yɛlɛ saŋa na Pɔtifa pɔge naŋ da boɔrɔ ka o ne o gaŋneŋ taa na. Gyoosɛf da de la gbɛre wieoŋ a zagre o yɛlɛ na. (Kanne Munpiilee 39:​7-9.) Bo yɛlɛ teŋ na baŋ zanne yi be? Gyoosɛf daŋ narɛɛ o meŋɛ saŋa zaa ka o koŋ gaŋneŋ neɛ kaŋa pɔge, sɛre kyɛ ka Pɔtifa pɔge wa ka o bɛnloo na. Ho meŋ na baŋ tɔglɛɛ Gyoosɛf. Maŋ daŋ nare ho meŋɛ a kyaare lɛ hoŋ na e sɛre kyɛ ka pigrinyɛ waana. Ka hooŋ wa tuore pigrinyɛ, a pãã na eɛ mɔlɔ ko bo ka ho e yɛlɛ na hoŋ maale ho teɛroŋ ka ho na eŋ na.

MAŊ PEƐRƐ HO MEŊƐ WAGRE ZAA

18. Bo yɛlɛŋ na toɔ̃ soŋ bo ka ho zɔɔtoɔ̃ vɔlfaare? (2 Korinti 13:5)

¹⁸ Ka hooŋ na toɔ̃ zɔɔtoɔ̃ vɔlfaare, a na somaŋ ka ho naŋ “kyɛnɛ peɛrɛ” ho meŋɛ a nyɛrɛ. Lɛ wuleeŋ ka aseŋ ka ho maŋ peɛre ho meŋɛ a nyɛ lɛ na hoŋ nyɛrɛ nimitɔɔre gaabo aseŋ. (Kanne 2 Korinti 13:5.) Wagre naŋ gɛrɛ poɔŋ na, maŋ peɛre ho teɛrɛ ane ho yel-eree velaa. Mɔɔ a e leɛroo naŋ seŋ neŋ. Aŋa mannoo poɔŋ, ka hooŋ toɔ̃ are pigrinyɛ kaŋa noɔreŋ, kyɛ ho na baŋ soorɛɛ ho meŋɛ ka: ‘Wala aŋ kɔɔre seŋ sɛre kyɛ maŋ yelka ai?’ Ka hooŋ wa nyɛ ka a kɔɔrɛɛŋ kyɛ hoŋ yelka ai, ta wa korɔ ho meŋɛ sããnaa. Kyɛ, de gbɛɛ a maaleŋ nare ho meŋɛ velaa. Ho na baŋ soorɛɛ ho meŋɛ ka: ‘Ka teɛroŋ faaŋ wa kpɛ N teɛroŋ poɔŋ, N na baŋ lonneŋ wieoŋ a iruu bare bee? Yɛlɛ na maŋ de pɛlɛ N niŋe na vɛŋɛɛŋ aŋ maaleŋ e kpeɛŋaa ko ma ka N zagre vɔlfaare bare bee? Ka maaŋ wa nyɛ peɛ̃mo toma fotori, N maŋ iree N nimie wieoŋ bee? N sereŋ baŋɛɛ bon nanso Jehoova bege naŋ soma aneazaa ka a maŋ fɛreŋ ka N ŋmɛne N meŋɛ saŋa kaŋa a kyɛ tuuraa bee?’—Yiem. 101:3.

19. Sobuo ka gbɛ-faare naŋ e bilii na toɔ̃ vɛŋ ka a e kpeɛŋaa ko te ka te zɔɔtoɔ̃ vɔlfaare?

¹⁹ Saŋa na hoŋ peɛrɛ ho meŋɛ na, kaara soŋ a ta wa bɛnlɛ ho meŋɛ. A Baabole yeleeŋ ka: “Sukyiri bɛnlɛŋ yaga zaa a gaŋ bonzaa a maŋ kyerɛ ka o de neɛ eŋ yɛlɛ poɔŋ.” (Jer. 17:9) Yezu yeleeŋ ka nensaalaa sukyiri poɔŋ ka “teɛre faare” maŋ yi. (Mat. 15:19) Aŋa mannoo poɔŋ, ka neɛ kaŋa mɔɔ a bare pornography kaabo wagre kɔɔroo kaŋa poɔŋ, o soba na baŋ piili teɛrɛŋ ka, ka onaŋ kaa sɛŋsɛŋ fotori naŋ taa peɛ̃mo yɛlɛ fẽẽ lɛ a poɔŋ, a ba sãã yelzaa. O soba na baŋ teɛreŋ ka a noba naŋ be a fotori poɔŋ naŋ ba iri ba bonsuurii a taa eŋkponkpoli zuŋ, a ba e faa. Kyɛbee o na baŋ lɛ teɛreŋ ka ka onaŋ maŋ teɛrɛ vɔlfaare yɛlɛ o teɛroŋ poɔŋ, a kyɛ ba de o meŋɛ eŋ a poɔŋ a ba e yelfaa zaa. Sori kaŋa poɔŋ na, o soba sukyiri na bɛnlooŋ oŋ ‘bare vuo ko o eŋɛ vɔlfaare ka a nyɛ a boɔbo.’ (Uro. 13:14) Boŋ na baŋ soŋ te ka te ta wa erɛ lɛ? Aseŋ ka ho baŋ ka gbɛ-faare naŋ e bilii hoŋ maŋ derɛ na la maŋ lagre lantaa a vɛŋ teŋ de gbɛ-faare naŋ e bɛrɛ, a de te menne eŋ yɛlɛ naŋ ba soma poɔŋ. Azuŋ kaara ho meŋɛ velaa.b Zagre “teɛre faare” naŋ boɔrɔ ka a bɛnle bo ka ho de yɛlɛ iri neŋ noɔre a kyaare gyog-faa kaŋa ho naŋ taa.

20. Bo maaloo teŋ na nyɛ nendaare kaŋa? Bo yɛlɛŋ na baŋ soŋ te pampana?

²⁰ Aŋa lɛ te naŋ zanne na, Jehoova na toɔ̃ soŋ teŋ ka te zɔɔtoɔ̃ vɔlfaare. Te puoree Jehoova bareka o naŋ ko te teɛretɔ ka o na ko teŋ nyɔvore naŋ ba taa baaraa a donpaalaa poɔŋ. Ana saŋa na vɔlfaare koŋ lɛ dɔɔnɔ te. Te na de la popeɛloŋ a puoro neŋ Jehoova. Saŋa na teŋ kyɛnlɛ ka ana saŋa na ta na, yɛ vɛŋ ka te taa sagediibu ka teɛretɔ bebeŋ ka te na toɔ̃ zɔɔtoɔ̃ la vɔlfaare na teŋ taa na. Ɛɛ, Jehoova sommoŋ te na zɔɔtoɔ̃ la!