Photo by Zhai Yujia/China News Service/VCG via Getty Images
YƐ KAARA VELAA!
Kɔmpiiri Sããnɛɛ Boma Yaga Zaa—Wala Ka A Baabole Yeli Kyaare A Yɛlɛ Ŋa?
A yi a donɛɛ lombori zaa, kɔmpiiri sããnɛɛ noba yaga ziiri ane ba bontaree. Nyɛ lɛ duoro mine naŋ wuli:
“Bebie awala mine naŋ pare, saa kaŋa da mieŋ yaga zaa China paaloŋ teŋkpɛŋ naŋ. Asibiti Daare ane Alariba Daare bebie na kpakyagaŋ, a koɔ̃ naŋ da zoro na zuluŋ da ta ŋa . . . 744.8 millimeters (kyɛbee 29.3 inches). Yuomo 140 mine naŋ pare, a saa ŋa tɔ daaŋ ba mi China paaloŋ teŋkpɛŋ na zaa.”—AP News, August 2, 2023.
“Alaamisa Daare la a yiiloŋ bebiri typhoon Khanun naŋ vɛŋ ka saa mi yaga zaa, a lɛ vɛŋ ka sasekpeɛŋaa meŋ fu yaga Japan paaloŋ samun-duri sɛŋ. Noba bayi kɔŋ la ba nyɔvoɛ a yɛlɛ ŋa poɔŋ. . . . A sasekpeɛŋaa ŋa na vɛmeŋ ka saa naŋ na mi Taiwan paaloŋ ziiri na tanne naŋ be na koɔ̃ naŋ zoro e zuluŋ ta ŋa 0.6 meters (kyɛbee gbɛɛ mannoo 2.)”—Deutsche Welle, August 3, 2023.
“Saa miiree yaga zaa Canada paaloŋ ziiri naŋ peɛle a maŋ-noɔre na, lɛŋ vɛŋ ka kɔmpiiri wa sãã noba [naŋ be Nova Scotia] boma a daagbuli ŋa baaraa saŋa. Yuomo 50 mine naŋ pare, lɛ naane ka saa da miire a Canada paaloŋ maŋ-noɔre ziiri naŋ.”—BBC News, July 24, 2023.
Bo ka a Baabole yeli kyaare a yɛlɛ ama taa?
A eɛ sieree naŋ wuli ka te be la “a bebi-baaree saŋa”
A Baabole vɛŋɛɛŋ teŋ baŋ ka te wagre ŋa te naŋ be na la a “a bebi-baaree saŋa.” (2 Timoti 3:1) Yezu da daŋyeleeŋ ka te saŋa ŋaŋ, te na nyɛrɛɛ “dabeɛ̃ yɛlɛ,” kyɛbee yɛlɛ naŋ eŋnɛ dabeɛ̃. (Luka 21:11) Lɛ na a saluoni naŋ leɛrɛ eɛ yel na kaŋa naŋ vɛŋ ka a yɛlɛ ama te naŋ ba kaara soriŋ na erɛ yaga zaa, a maŋ lɛ de saammo kpɛŋ meŋ waneŋ.
Te taaɛ ananso ka te taa teɛretɔ
A Baabole yeleeŋ ka yelfaare na zaa te naŋ nyɛrɛ aŋ erɛ a tendaa zuŋ na seŋ ka a korɔ te teɛretɔ. Ananso la wala? Yezu yeleeŋ ka: “Ka yɛneeŋ wa nyɛ a yɛlɛ ama zaa naŋ nyɛrɛ eebo, yɛ baŋ ka a Naaŋmen Naaloŋ peɛlɛɛ la.”—Luka 21:31; Matio 24:3.
Yɛlɛ na teŋ nyɛrɛ aŋ erɛ na vɛŋɛɛŋ teŋ baŋ ka a koŋ kɔɔre, Naaŋmen Naaloŋ na na wa sɛgrɛɛ a tendaa yɛlɛ zaa ka a kyɛnɛ velaa, a sɛgre a tendaa koɔ̃ yɛlɛ meŋ velaa zaa, ka lɛ vɛŋ ka koɔ̃ ta lɛ sããna noba boma.—Joob 36:27, 28; Yieme 107:29.
Ka hooŋ boɔrɔ ka ho zanne yɛlɛ yaga a kyaare lɛ na Naaŋmen Naaloŋ naŋ na sɛgre a saluoni yɛlɛ velaa zaa, kanne a yelzu ŋa, “Who Will Save the Earth?” (Nembuoŋ Na Faa A Tendaa?)