Nembuoŋ Na Faa Noba Na Naŋ Ba De Ba Menne Eŋ A Zɔɔre Poɔŋ A Kyɛ Kpiire A Zɔɔre Zuŋ Na?—Wala Ka A Baabole Yeli Kyaare A Yɛlɛ Ŋa?

Duoro naŋ yire a United Nations wuleeŋ ka:

• A yi October 7 te ta October 23, 2023, zɔɔre naŋ be Gaza paaloŋ noba ane a Izerayɛl paaloŋ noba vɛŋɛɛŋ ka noba naŋ pare 6,400 kɔŋ ba nyɔvoɛ, ka noba naŋ ta 15,200 meŋ pere. A noba ŋa kpoŋ zie zaa ba de ba menne eŋnɛ zɔɔre yɛlɛ poɔŋ. Ane meŋ, a zɔɔre zuŋ, noba turituri zo yi la ba yie pooreŋ a gaa ziyobo.

• A wa ta September 24, 2023, zɔɔre naŋ be Russia paaloŋ ane Ukraine paaloŋ na vɛŋɛɛŋ ka noba naŋ ba de ba menne eŋ a zɔɔre yɛlɛ poɔŋ naŋ ta ŋa 9,701 a kpi, ka noba naŋ ta ŋa 17,748 meŋ pere Ukraine paaloŋ poɔŋ.

Bo teɛretɔ ka a Baabole korɔ noba naŋ dire dɔgɛɛ a zɔɔre ŋa zuŋ?

A Baabole poɔ yɛlɛ naŋ korɔ te teɛretɔ

A Baabole daŋyeleeŋ ka Naaŋmen na “vɛmeŋ ka zɔɔre baare a tendaa lombori zaa.” (Yieme 46:9) O na de la o sazu naaloŋ na, kyɛbee gɔmenante na a wa leɛre neŋ nensaaleba gɔmenantere ŋa zaa. (Daaniel 2:44) Naaŋmen Naaloŋ na na ko la nensaaleba zaa pɛnnoo a yi ba yelwonii zaa poɔŋ.

Nyɛ lɛ Yezu Krista naŋ e Naaŋmen Naaloŋ na Naa naŋ na e ko nensaaleba:

• “O na faa la nandaaneba naŋ kono boɔrɔ sommo na, o na deɛ la nembaalba meŋ ane noba na naŋ ba taa sonnɔ na. O na zoe nembaalba ane nandaaneba nembao, o na faa la nandaaneba meŋ nyɔvoɛ. O na deɛ baŋ yi dɔgrebo ane kpaŋkpaŋkpeɛ̃o toma poɔŋ.”​—Yieme 72:12-14.

Naaŋmen na tu la o Naaloŋ na eŋɛŋ a iri woore ane dɔgɛɛ na zaa zɔɔre ane kpaŋkpaŋkpeɛ̃o toma naŋ de waneŋ nensaaleba zuŋ na bare.

• “O na eɛrɛɛ nentaŋ zaa bare ba nimieŋ, kũũ koŋ la kyebe, woore, konni, ane kpɛlle ŋmeɛbo koŋ la bebe. A na e la yelkorɔ naŋ pare wa gaa.”​—Yel-iriwulaa 21:4.

A koŋ kɔɔre Naaŋmen Naaloŋ na na leɛrɛɛ yɛlɛ na naŋ erɛ a teŋɛzuŋ na. A Baabole daŋyeleeŋ ka te saŋa ŋaŋ, te na wonee “zɔɔre yɛlɛ ane zɔɔre yɛlɛ ba naŋ moɔlɔ.” Zenɛ ŋa, te nyɛrɛɛ a yɛlɛ ama zaa naŋ nyɛrɛ eebo. (Matio 24:6) A yɛlɛ ama zaa ane yelyobo mine vɛŋɛɛŋ teŋ baŋ ka te be la nensaaleba naaŋ diibu “bebi-baaree saŋa”.​—2 Timoti 3:1.