Gɔmenante Kaŋa Bebeŋ A Be Dɛlebo A Na Baŋ Kaa A Teŋsare Ŋa Bee?​—Wala Ka A Baabole Yelkyaare A Yɛlɛ Ŋa?

Gɔmenantere naŋ be a donɛɛ lombori zaa tuoree yelkpeɛne. Haali paalonne na gba ba gɔmenantere yɛlɛ naŋ taa nimiri na kyɛ ba tuoree yelkpeɛne saŋa na ba maŋ wa ire ba paaloŋ kaareba kyɛ ka wɛltaa be ba kpakyagaŋ meŋ. Ka noba maŋ iri erɛ kpaŋkpaŋkpeɛ̃o yɛlɛ a iri zɔɔrɔ neŋ a gɔmenantere.

A Baabole vɛŋɛɛŋ teŋ baŋ ka gɔmenante kaŋa bebe a waa dɛlebo. Aminekaŋaŋ ho daŋ woŋ la a gɔmenante ŋa yɛlɛ. O yɛlɛ la ka Yezu da yel oŋ be Matio 6:9, 10.

• “Azuŋ, ŋaa aŋ seŋ ka yɛ maŋ puori: ‘Te Saa naŋ be sazuŋ, vɛŋ ka ho yuori pɛgeyi. Vɛŋ ka ho Naaloŋ wa. Vɛŋ ka ho poboɔbo nyɛ eebo a tendaa zuŋ aŋa lɛ a naŋ nyɛrɛ eebo sazuŋ na.’”​—Matio 6:9, 10.

Bo yɛlɛ ka a Baabole yelkyaare a Naaloŋ ŋa?

A Naaloŋ​—waa la gɔmenante naŋ taa dɛlebo

A Naaloŋ diree naaŋ a yi sazu.

• Yezu boɔlɛɛ a gɔmenante ŋa ka “a sazu Naaloŋ.” (Matio 4:17; 5:3, 10, 19, 20) Azuŋ oŋ da yelka: “N Naaloŋ ba yi a tendaa ŋa poɔ.”​—Gyɔɔn 18:36.

A Naaloŋ ŋa na wa leɛrɛɛ nensaaleba gɔmenantere na gbɛbɔgriŋ.

• A Baabole yeleŋ ka: “A naaloŋ . . . na ŋmarɛɛ a [nensaaleba] naalonne ŋa zaa a baare a yɛlɛ, kyɛ ka o yoŋ are a gɛrɛ wagre naŋ ba taa baaraa.”​—Daaniel 2:44.

Yezu la a Naaloŋ ŋa Naa, ba daŋ koŋ sãã a na naaloŋ ŋa zaa.

• A Baabole yeleŋ ka: “O naaloŋ kpeɛ̃o diibu na bebeŋ tegitegilɛ, o daaŋ koŋ baare zaa, ba koŋ sãã o naaloŋ na meŋ.”​—Daaniel 7:13, 14.

A Naaloŋ ŋa na vɛŋɛɛŋ ka emmaaroŋ aneŋ gomeŋɛ be a donɛɛ lombori zaa.

• A Baabole yeleŋ ka: “Neɛzaa na taa la emmaaroŋ, a zeŋ o waiŋ teɛ ane o kaŋkaŋ teɛ pareŋ, neɛzaa koŋ vɛŋ ka dabeɛ̃ kpɛ ba.”​—Maika 4:4, Good News Translation.

Zanne yɛlɛ yaga a kyaare a Naaloŋ ŋa

Saŋa na Yezu naŋ da be a donɛɛ zuŋ na, o da de la o wagre zaa “a moɔlɔ a Naaloŋ duorisoŋ.” (Matio 9:35) O da daŋyel biŋee ka:

• “Ba na moɔlɛɛ a Naaloŋ duorisoŋ ŋa a tendaa lombori zaa ka a e sieree ko a paalonne noba zaa, kyɛ ka a baaraa saŋa pãã ta.”​—Matio 24:14.

Zenɛ ŋa, ba moɔlɛɛ a Naaloŋ duorisoŋ paalonne naŋ gaŋ 240 poɔŋ. Te tɔnɔ boɔlɔ boŋ ka ho wa zanne a gɔmenante ŋa yɛlɛ a kyɛ nyɛ maaloo na mine oŋ na de waneŋ saŋa na oŋ wa piili dire naaŋ na.

Sɔrebo la kaa a vidio ŋa Bo La Naaŋmen Naaloŋ?