Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane

JANUARY 3-9

BAABOLE POƆ YELNIMIZEERE | SARINGMAARIBA 15-16

“Noba Iri Teroo Gyogo Ba Soma Fẽẽ Zaa!”

w12 4/15 8 wɛl. 4

Noba Iri Teroo E La Gyog-Faa Noba Naŋ Taa Te Saŋa Ŋaŋ!

⁴ A dɛndɛŋ, te leɛ nyɛ a pɔge na naŋ nɔŋ libie baŋ boɔlɔ Dilaila na yɛlɛ. O na ka Sɛreŋmaara Samsen da nɔŋ yaga zaa na. Samsen da boɔrɔŋ ka o zɔɔ a faa Naaŋmen noba na a yi a Filiisitiya noba nuureŋ. Aminekaŋaŋ a Filiisitiya namine banuu na da baŋɛɛŋ ka Dilaila da ba taa yelmeŋɛ nɔmmo ko Samsen. Azuŋ, ba da yeleeŋ ka ba na ko o la libie yaga ka o naŋ toɔ̃ peɛre baŋ zie na Samsen naŋ nyɛ o faŋa na yi, ka lɛ vɛŋ ka ba toɔ̃ iri o nyɔvore. Dilaila naŋ da nɔŋ libie zuŋ na, o da sagɛɛŋ a deɛ a libie. Azuŋ o da mɔɛŋ gbɛre bota ka o baŋ zie na Samsen naŋ nyɛrɛ o faŋa na yire, kyɛ a kaŋa zaa da ba toɔ̃ nyɛ eebo. Beŋ la “oŋ da maŋ dɔnnoo bebiri zaa ane o yelyaga a ŋmɛnnoo.” A baaraa zaa, “o dɔŋooŋ ka o lɔgɔ wa yi bee ka o bammo zaa te baare.” Azuŋ, Samsen da yelkooŋ ka a yi o biiloŋ saŋa zaa ba daŋ ba ŋma o zukɔɔloŋ. A kyɛ pãã lɛ yelkoo ka, ka ba naŋ ŋma o zukɔɔloŋ na o faŋa na baareŋ. Dilaila naŋ da wa baŋ lɛ baare na, o da vɛŋɛɛŋ ka Samsen gbiri o gbɛɛ zuŋ, oŋ pãã da ŋma o zukɔɔloŋ na zaa. A kyɛ pãã da iri Samsen a ko o dɔndɔnne ka ba e o lɛ zaa ba naŋ boɔrɔ. (Sar. 16:4, 5, 15-21) Yɛlɛ na oŋ da e na da ba soma fẽẽ zaa! Bombɔ-ganneŋ gyogo da vɛŋɛɛŋ ka Dilaila iri dɔɔ naŋ nɔmoo yaga zaa na tere.

w05 1/15 27 wɛl. 5

Yelnimizeere Naŋ Be A Sɛreŋmaareba Gane Poɔ

14:16, 17; 16:16. Ka teneeŋ maŋ kono a kyɛ lɛ de yelfaare yeloo a de ferɛ noba ka lɛ na vɛŋ ka ba erɛ te boɔbo yoŋ korɔ te, lɛ na toɔ̃ sãã la te ne ba niiloŋ na.​—Yeng Yelibie 19:13; 21:19.

w12 4/15 11-12 wɛl. 15-16

Noba Iri Teroo E La Gyog-Faa Noba Naŋ Taa Te Saŋa Ŋaŋ!

¹⁵ Wala ka kultaa deme na toɔ̃ e a dire yelmennoŋ a korɔ taa? Naaŋmen Yelbiri na yelka: “Nyagna ane ho laŋpɔlipɔge bee ho baapaaloŋ pɔge [bee serɛ]” a kyɛ lɛ yelka, “Kpeɛrɛ nyɛŋka poɔŋ ane pɔge [bee serɛ] na hoŋ nɔŋ na.” (Yeng. 5:18; Ikil. 9:9) A yi saŋa na a kultaa deme yuomo naŋ gɛrɛ nimitɔɔre na, aseŋ ka ba de ba “menne zaa” eŋ ba kultaa na poɔŋ. Aseŋ ka ba de ba eŋgane zaa ane ba teɛroŋ zaa eŋ ba kultaa na poɔŋ. Lɛ wuleeŋ ka ba na maŋ kyɛllɛɛ taa zieŋ, a taa wagre ko taa, a kyɛ tagra peɛlɛ taa meŋ. Aseŋ ka ba mɔɔ ba mɔɔbo zaa a vɛŋ ka ba kultaa na e kpeɛŋaa a kyɛ lɛ vɛŋ ka ba neŋ Jehoova niiloŋ na meŋ e kpeɛŋaa. A lɛ zuŋ kultaa deme seŋ ka ba maŋ lantaa a zanna a Baabole, a maŋ lantaa a gɛrɛ a naaŋ moɔloo, a maŋ lantaa puore sɔre Jehoova maaloo.

NAŊ DIRE YELMENNOŊ KORƆ JEHOOVA

¹⁶ Noba mine naŋ be a lantaapuoruu poɔŋ maŋ toŋ la faaloŋ naŋ e nimizeɛ ka lɛ vɛŋ baŋ kpãã “ba nimizeɛ zaa, ka ba na leɛ taa yeldeebo naŋ waa meŋɛ.” (Tiitu 1:13) Ba mine yɛŋ, ba gyogo maŋ wuliŋ ka ba ba e kaŋdabaŋkalɛ azuŋ a maŋ wa fɛreŋ ka ba iri ba bare a lantaapuoruu poɔŋ. Dɛnnoo maŋ toɔ̃ soŋɛɛŋ “bana ba naŋ tage a ba tobo” na ka ba leɛ maale ba neŋ Jehoova niiloŋ na. (Hib. 12:11) Kyɛ te de ka ba iree ho dɔgrɔ kaŋa bee ho zɔmeŋa kaŋa naŋ peɛle bo yaga bare a lantaapuoruu poɔŋ. Lɛ na baŋ vɛmeŋ ka a e kpeɛŋaa ko te ka te dire yelmennoŋ, a ba e ŋa teŋ na dire yelmennoŋ korɔ o soba la, kyɛ teŋ na dire yelmennoŋ korɔ Naaŋmen na yɛlɛ teŋ yele. Jehoova maŋ kaara teŋ ka o nyɛ ka te na sagɛɛ o noɔre, a tage te menne a yi neɛzaa ba naŋ iri bare a lantaapuoruu poɔŋ bee.​—Kanne 1 Korinti 5:11-13.

Baabole Poɔ Yelsonne

w05 3/15 27 wɛl. 6

Jehoova Da Ko La Samsen Faŋa Oŋ Zɔɔtoɔ̃ O Dɔndɔnne!

Samsen da de la o teɛroŋ zaa eŋ yɛlɛ na o naŋ boɔrɔ ka o e na eŋɛŋ, o da boɔrɔŋ ka o zɔɔtoɔ̃ a Filiisitiya noba. A lɛ zuŋ o da te gaŋ la pɔge-gyɛnterɛ kaŋa naŋ da be Gaza teŋkpɛŋ na dieŋ, o da eɛ lɛ o naŋ boɔrɔ ka o zɔɔ neŋ Naaŋmen dɔndɔnne zuŋ. Samsen naŋ da gaa o dɔndɔnne teŋkpɛŋ poɔ na, o da boɔrɛɛ zie oŋ na gaŋ a zisoɔree saŋa. Azuŋ o da te kpɛ la pɔge-gyɛnterɛ kaŋa die. Peɛ̃mo toma zuŋ naane ka Samsen da gaa be. A lɛ zuŋ teŋsogɔ saŋa o da yi la a pɔge-gyɛnterɛ die na, a te vigi a teŋkpɛŋ denɔɛ ane a ziiri ayi na ba naŋ kpaare a denɔɛ mare na. O da de aŋ gaa te biŋ taŋkpɛŋ kaŋa naŋ peɛle Hiibiroŋ zuŋ. A yi Gaza a gɛrɛ Hiibiroŋ e la maalihi 37 bee kilometare 60. Naaŋmen la da somoo a kyɛ ko o a faŋa oŋ toɔ̃ e lɛ.​—Saringmaariba 16:1-3.

JANUARY 10-16

BAABOLE POƆ YELNIMIZEERE | SARINGMAARIBA 17-19

“Ka Teneeŋ Zagre Ka Te Tu Naaŋmen Bege A Maŋ De La Toɔrɔ Wa Eŋ Te”

it-2 390-391

Maika

1. Maika da e la dɔɔ naŋ yi Iifiriam. O da ba tu a Bege Pie na Naaŋmen naŋ da de ko Moosis na anii soba (Yi 20:15), Maika da sɔgle de la waribie naŋ ta 1,100 a yi o ma zie. O da te yelko la o ma ka o naŋ de a waribie a kyɛ leɛ de a waribie ko o. Azuŋ, o ma da yelka: “N de la a waribie ŋa zaa naŋ yi N nuŋ ŋa biŋ ko Jehoova N bidɔɔ ŋa yɛlɛ, N boɔrɔŋ ka ba kpaali bee a maale bagre kaŋa ko N bidɔɔ a nyɛli wari a maale bagre ko o; lɛ zuŋ N na leɛrɛɛ a libie ko bo.” O ma da de la waribie 200 a de gaa neŋ kurkuro zie. Ka a kurkuro “maale bagre kaŋa a nyɛli wari maale bagre kaŋa,” a puoreŋ Maika da de la a bon na ba naŋ maale na wa biŋ o deoŋ. Maika daaŋ taaɛ “bagre deo,” a kyɛ da lɛ maale iifod ane tɛrafiim, o da lɛ iree o bidɔɔ na kaŋa oŋ tona toma aŋa ŋmenpuore wedeɛrɛ. Aneazaa ka o da erɛɛ a yɛlɛ a boɔrɔ ka a yɛlɛ waa ŋa o naŋ boɔrɔ ka o de emmo korɔ Jehoova, kyɛ a yɛlɛ ŋa da ba soma fẽẽ zaa, o da saaŋɛɛ a bege naŋ yelka ba ta wa puoro baga na, (Yi 20:4-6) o da ba lɛ de gyeremɛ ko Jehoova ŋmenpuoredie na ane a ŋmenpuore wedeɛreba o naŋ da iri na. (Sar 17:1-6; Du 12:1-14) A puoreŋ, Maika da de la Joonataŋ naŋ da e Moosis bidɔɔ Gɛɛsom yaaŋaa waneŋ o deo, o da vɛŋɛɛŋ ka a bipɔlee ŋa naŋ da e Liivai neɛ na tonɔ korɔ o aŋa ŋmenpuore wedeɛrɛ. (Sar 18:4, 30) Maika naŋ da teɛre ka o erɛɛ yɛlɛ naŋ soma zuŋ na, o da yeleeŋ ka: “Pampana N baŋɛɛŋ ka Jehoova na e la soŋ ko ma.” (Sar 17:7-13) Kyɛ Joonataŋ da ba e Eeroŋ yaŋaa na kaŋa, azuŋ o da ba seŋ neŋ ka o tonɔ toma aŋa ŋmenpuore wedeɛrɛ. Lɛ na Maika naŋ da e na da vɛŋɛɛŋ ka o faaloŋ na maaleŋ e kpoŋ.​—So 3:10.

it-2 391 wɛl. 2

Maika

A lɛ puoreŋ Maika ane dɔbɔ naŋ da be o zieŋ na da iri karɛɛ a Daan noba bɔɔ. Saŋa na baŋ da kare te pɔge ba na, a Daan noba da soore baŋ ananso ba naŋ kara ba bɔɔ. Ka Maika da yelko ba ka: “Yɛ deɛ N ŋmema maŋ maale, a nyɔge N ŋmenpuore wedeɛrɛ a gɛrɛ neŋ. Bo maŋ la taa?” O naŋ da wa yel lɛ baare na, a Daan noba da kpãã la Maika ka, ka o naŋ moɔ̃ nimiri tuuro ba a yele ka ba e la yelfaa kaŋa ba na zɔɔ ne o la. Maika naŋ da wa nyɛ ka a Daan noba e la kpeɛne a gaŋ o noba na, o da leɛ gaa la o yire. (Sar 18:22-26) Beŋ la ka a Daan noba da gaa zɔɔtoɔ̃ Leeis a kyɛ nyege o neŋ vũũ. A kyɛ leɛ mɛ teŋkpɛŋ kaŋa a lɛ zie na a boɔloo Daan teŋkpɛŋ. Joonataŋ ane o bidɔbɔ na da wa leɛ la ŋmenpuore wedeɛreba a ko a Daan noba, baŋ “daaŋ biŋ bagre na baŋ kpaali bee a maale na, o na ka Maika daaŋ maale na. Lɛ baŋ daaŋ erɛ wagre na zaa Naaŋmen deo naŋ daaŋ be Sailo poɔŋ na.”​—Sar 18:27-31.

Baabole Poɔ Yelsonne

w15 12/15 10 wɛl. 6

Naaŋmen Yelbiri Ba Naŋ Leɛre Eŋ Kɔkɔ Yobo Ka A Muni Gaŋ Velaa Zaa

⁶ Sieree yaga bebeŋ a wuli ka Naaŋmen yuori seŋ ka o be a Baabole poɔŋ. Naaŋmen yuori be la a 2013 New World Translation ba naŋ leɛ sɛgre o poɔ yɛlɛ na a ta gbɛre 7,216. Naaŋmen yuori be la a 2013 toɔre na gbɛre ayoɔbo a gaŋ a 1984 toɔre na. Ziiri anuu mine ba naŋ leɛ sɛge Naaŋmen yuori na eŋ be la 1 Saamiuel 2:25; 6:3; 10:26; 23:14, 16. Ba de la Naaŋmen yuori eŋ a ziiri ŋa bonso a Maŋkũũ Gama na naŋ kore a Hebrew Masoretic gama na aŋa yuomo turi na taa la Naaŋmen yuori a Baabole ziiri ŋa zaaŋ. Ane meŋ, saŋa na baŋ peɛre a takoreŋ saŋa gama na yɛlɛ gaa tɔɔre na, ba wa nyɛɛŋ ka Naaŋmen yuori be la Saringmaariba 19:18.

JANUARY 17-23

BAABOLE POƆ YELNIMIZEERE | SARINGMAARIBA 20-21

“Moɔ̃ Nimiri A Boɔrɔ Jehoova”

w11 9/15 32 wɛl. 2

Ka Lɛ Ho Na Tɔglɛɛ Fiiniyas Saŋa Na Hoŋ Wa Tuoro Yelkpeɛne Na Bee?

A Bɛŋgyamen bale na noba la da kpeɛrɛ Giibiya, ba da nyɔgɛɛ Liivai dɔɔ kaŋa sɛne a fere gaŋ ne o lɛɛŋ oŋ te kpi. Lɛ zuŋ a Izerayɛl bale naŋ kyɛre na da narɛɛ ba menne ka ba te zɔɔ neŋ a Bɛŋgyamen bale na. (Sar. 20:1-11) Ba da puore sɔrɛɛ Jehoova ka o soŋ ba ka ba te zɔɔtoɔ̃ ba, kyɛ a Bɛŋgyamen bale na da zɔɔtoɔ̃ baŋ gbɛre buyi, a gba da ko ba noba yaga zaa. (Sar. 20:14-25) Ka lɛ ba na teɛreŋ ka Jehoova ba kyɛllɛ ba puoro na bee? Ka lɛ Jehoova sereŋ da boɔrɔŋ ka ba iri a faaloŋ ŋa ba naŋ toŋ na bare bee?

w11 9/15 32 wɛl. 4

Ka Lɛ Ho Na Tɔglɛɛ Fiiniyas Saŋa Na Hoŋ Wa Tuoro Yelkpeɛne Na Bee?

Bo yɛlɛ teŋ na baŋ zanne yi a yɛlɛ ŋa poɔŋ? A lantaapuoruu nembɛrɛ maŋ mɔɔrɔ la ba mɔɔbo zaa a puoro nimizeɛ̃ a boɔrɔ Naaŋmen sommo ka ba toɔ̃ sɛgre yelkpeɛne mine naŋ be a lantaapuoruu poɔŋ, kyɛ a lɛ yelkpeɛne ŋa naŋ maŋ bebeŋ. Ka lɛŋ wa e, a lantaapuoruu nembɛrɛ seŋ ka ba leɛteɛre Yezu yelbie ŋa: “Yɛ sɔre [bee puoro sɔrɔ], ba na ko yɛ la, yɛ bɔ, yɛ na nyɛ la, yɛ kpaare a pane, ba na yuo ko yɛ la ka yɛ kpɛ.” (Luka 11:9) Ka Jehoova gbaŋ ba iri ba puoro na noɔre wieoŋ, a lantaapuoruu nembɛrɛ seŋ ka ba baŋ ka wagre naŋ seŋ poɔŋ Jehoova na sɛgrɛɛ a yɛlɛ.

Baabole Poɔ Yelsonne

w14 5/1 11 wɛl. 4-6

Ho Da Baŋɛɛŋ?

Takoreŋ saŋa na, sobuo baŋ da maŋ de kpalaa toŋ ne toma zɔɔre poɔŋ?

Kpalaa ka Deevid da de ko a dɔɔ gandaa na ba naŋ boɔlɔ Golaiyat na. Aminekaŋaŋ saŋa na Deevid naŋ da e bibile a da kyeenɛ o saa peere na la oŋ da zanne lɛ oŋ na baŋ de kpalaa toŋ ne toma.​—1 Saamiuel 17:40-50.

Ka ba naŋ drɔɔ lɛ yɛlɛ naŋ da waa Ijipiti ane Asiiriya paalonne poɔŋ saŋa na baŋ da sɛgre a Baabole na. Ba maŋ drɔɔ la sogyare naŋ taa kpalaa meŋ poɔ. Kpalaa da e la bonkaŋa naŋ waa ŋa wuoɔ ba naŋ de gbaŋo bee tane a maale neŋ, a kyɛ da maŋ de ŋmeere ayi lɛŋ mare o lomboe ayi naŋ. Neɛ naŋ taa a kpalaa na pãã da maŋ de la kusalansalaŋ naŋ e gbuloŋgbuloŋ a e kpɛŋ ta inches ayi bee inches ata (bee 5 cm te ta 7.5 cm) bee ka a kuurii tegroŋ ta ounces awae (bee 250 g). O pãã da maŋ de la a kpalaa de do sazu a virevire kyɛ bare a ŋmeere bonyeni, ka o naŋ wa e lɛ a kuurii maŋ vere yiŋ ane kpeɛ̃o a gɛrɛ zie na o naŋ za o bare na.

A yi a paalonne naŋ be a donɛɛ Sapare seŋ na, noba naŋ maŋ tuuro teŋɛ a peɛrɛ yɛlɛ na tugi la teŋɛ a nyɛ kubo na baŋ da maŋ de eŋ kpalaa poɔŋ a zɔɔrɔ takoreŋ saŋa na yaga zaa. Neɛ naŋ kyili zɔɔre poɔŋ na baŋ viiree o kpalaa kuurii na ka o gaa tɔɔre a seŋ maalihi 100 te ta maalihi 150 awa bonyeni kpakyagaŋ (bee kilometare 160 awa bonyeni kpakyagaŋ te ta kilometare 240 awa bonyeni kpakyagaŋ). Gaŋbanneba mine ba sagedi ka kpalaa na baŋ gaa la tɔɔre aŋa tammo, kyɛ kpalaa e la zɔɔzɔɔ bon baŋ na toɔ̃ de ko noba yaga zɔɔre poɔŋ.​—Saringmaariba 20:16.

JANUARY 24-30

BAABOLE POƆ YELNIMIZEERE | RUUT 1-2

“Moɔ̃ Nimiri A Boɔrɔ Yelmeŋɛ Nɔmmo”

w16.02 14 wɛl. 5

Tɔglɔ Jehoova Zɔmenne Naŋ Da Peɛloo Yaga Zaa Na

⁵ A da naŋ e la mɔlɔ ko Ruut ka o leɛteɛre ka o yideme be la Mooab paaloŋ. Ruut ma ane o dɔgreba zaaŋ da bebe a na ko o waayaane a kaaroo a kyɛ sonnoo meŋ. Mooab teŋɛ na ka Ruut da yi. Ba saaŋkonyɛlɛ oŋ da baŋ, a Mooab kɔkɔre meŋ oŋ da wono, a Mooab noba da la o noba. Ka o naŋ tu Neomi a gaa Beetilehem o koŋ baŋ te ko o a boma ŋa zaa. A yɛlɛ nembao zie gba la ka, Neomi da yelko la Ruut ka o leɛ gaa o teŋɛ Mooab. Neomi da yelkooŋ ka, o ba taa serɛ bee deo zaa a na ko o naa-pɔge ŋa. Wala ka Ruut pãã na e? Ruut da ba e o yɛlɛ aŋa Oorpa. Oorpa yɛŋ da “leɛ gaaɛ o noba sɛŋ ane o ŋmema sɛŋ.” (Ruut 1:9-15) Ka lɛ Ruut meŋ da boɔrɔŋ ka o leɛ te puoro o noba zirii ŋmema na bee? Ai, o da ba e lɛ.

w16.02 14 wɛl. 6

Tɔglɔ Jehoova Zɔmenne Naŋ Da Peɛloo Yaga Zaa Na

⁶ A waa ŋa Ruut da zannɛɛ Jehoova yɛlɛ a yi o serɛ bee Neomi zie. Jehoova da ba waa ŋa a Mooab noba ŋmema na. Ruut da baŋɛɛŋ ka Jehoova la Naaŋmen naŋ seŋ ka o nɔnɔ a kyɛ puoruu meŋ. Kyɛ a lɛ bammo na yoŋ da ba seŋ. Ruut da seŋ ka o de gbɛre kaŋa. Ka lɛ o na kaa iri la Jehoova ka o e o Naaŋmen bee? Ruut da kaa iree yɛlɛ naŋ soma. O da yelko la Neomi ka, “ho noba na e la N noba, ho Naaŋmen meŋ na e la N Naaŋmen.” (Ruut 1:16) Ka teneeŋ leɛteɛre nɔmmo na Ruut naŋ da taa ko Neomi na, a maŋ tɔ la te sukyiri yaga zaa. Kyɛ a yelnimizeɛ meŋɛ da la nɔmmo na o naŋ taa ko Jehoova na. Dɔɔ kaŋa naŋ da e tendaana baŋ boɔlɔ Boaz da de la puubu a ko Ruut a kyaare lɛ o naŋ bɔ lirizie a yi Jehoova kpaŋkpama bee begɛ loɔŋ na. (Kanne Ruut 2:12.) A yɛlɛ ŋa leɛteɛre teŋ lɛ na nuulee naŋ maŋ bɔ lirizie ane guubu a yi o ma kpaŋkpama na loɔŋ. (Yiem. 36:7; 91:1-4) Jehoova da e ŋa bi-saa a ko Ruut. O da kooŋ kyɔɔtaa yaga zaa o sagediibu na zuŋ, azuŋ Ruut da ba taa ananso zaa ka o e kaŋdabaŋkalɛ a kyaare gbɛre na o naŋ da de na.

Baabole Poɔ Yelsonne

w05 3/1 27 wɛl. 1

Yelnimizeere Naŋ Be A Ruut Gane Poɔ

1:13, 21​—Ka lɛ Jehoova la da vɛŋ ka zemmo e tuo a ko Neomi a kyɛ lɛ vɛŋ oŋ dire dɔgɛɛ bee? Ai, Neomi da ba yelka Naaŋmen la da vɛŋ ka yelfaare pɔgoo. Yɛlɛ na zaa naŋ da pɔgoo na zuŋ o da teɛre ka Jehoova la da zɔɔrɔ ne o. A yɛlɛ da dɔnnooŋ yaga zaa oŋ da teɛre ka o ba lɛ taa tamaa zaa. Kyɛ lɛ yoŋ naane a lɛ saŋa na, ka pɔgeŋ wa toɔ̃ dɔge bie, ba da maŋ yelka o nyɛ la maaloo a yi Naaŋmen zie. Kyɛ ka pɔgeŋ ba toɔ̃ dɔge bie ba da maŋ yelka Naaŋmen la pɔ eŋoo. Neomi biiri bayi na zaa da kpieŋ, o da ba taa yaaŋaa zaa meŋ. Azuŋ, o da teɛre ka Jehoova la da eŋnoo a lɛ nyaaba na.

JANUARY 31–FEBRUARY 6

BAABOLE POƆ YELNIMIZEERE | RUUT 3-4

“Mɔɔrɔ Ka Ho Taa Yosoŋ”

w12 10/1 22 wɛl. 5

“O Da E La Pɔge Meŋɛ”

Lɛ na Boaz naŋ da mãã o meŋɛ a kyɛ de kɔkɔmaaroŋ a yel neŋ yɛlɛ ko Ruut na da dii la o sukyiri yaga zaa. Boaz da yelka: “N bi-pɔge, Jehoova pɛgre bee maaloo be ho eŋɛŋ. Bozuŋ ho wulee mennoŋ a baaraa a gaŋ a munpiilee ane hoŋ ba tuuro bi-pɔlɔ, ka nandaaneba la bee ka bondaaneba la.” (Ruut 3:10) “A munpiilee” saŋa na e la yelmeŋɛ nɔmmo na Ruut naŋ wuli Neomi saŋa na oŋ poɔ o eŋɛŋ baŋ leɛ wa Izerayɛl paaloŋ na a kyɛ naŋ moɔ̃ niŋe a kaara o zieŋ na. “A baaraa” saŋa la yɛlɛ na Ruut naŋ da erɛ a lɛ saŋa na. Boaz meŋɛ da baŋɛɛŋ ka Ruut naŋ da e pɔg-saraa zuŋ na, a da naŋ e la mɔlɔ ko o ka o te boɔrɔ dɔɔ bondaana bee nandaana a yi a bi-pɔlɔ naŋ da bebe a lɛ saŋa na poɔŋ. Kyɛ, Ruut da boɔrɔŋ ka o tonɔ soŋ a korɔ Neomi ane Neomi serɛ naŋ kpi na gba. O da ba boɔrɔ ka Neomi serɛ na yuori bɔre o noba poɔŋ. Ruut naŋ da e pɔge naŋ taa meŋɛ deteroo gyogo naŋ vɛŋ ka Boaz da boɔrɔ o yɛlɛ yaga zaa lɛ.

w12 10/1 23 wɛl. 1

“O Da E La Pɔge Meŋɛ”

Saŋa na zaa Ruut naŋ maŋ leɛteɛre yɛlɛ na Boaz naŋ yelkoo na, o eŋɛ zaaŋ da maŋ mãã. Boaz da yelka noba na zaa naŋ be ba teŋɛ na da baŋɛɛŋ ka Ruut e la “pɔge meŋɛ”! Nɔkpeɛne zaa kyebe ka, boɔbo na o naŋ da taa ka o baŋ Jehoova a kyɛ puoruu na la da somoo oŋ toɔ̃ taa a lɛ yosoŋ na. O da e la neɛ naŋ da wuli nimimaaroŋ naŋ e kpoŋ ane nembazo a ko Neomi ane o noba na. O da yi la o meŋɛ poboɔbo poɔŋ a sage a kyɛ tuuro soe mine ane sããkoŋyɛlɛ mine o naŋ da ba baŋ o zemmo zaa poɔŋ. Ka teneeŋ boɔrɔ ka te tɔglɔ Ruut sagediibu na, aseŋ ka te taa gyeremɛ naŋ e zuluŋ a ko neŋ yobo ane soe na ba naŋ maŋ tu kyɛ erɛ ba yɛlɛ ane ba sããkoŋyɛlɛ meŋ. Ka teneeŋ erɛ lɛ, te meŋ na wa taa la yosoŋ ka te e la neŋ menne.

w12 10/1 24 wɛl. 3

“O Da E La Pɔge Meŋɛ”

Boaz da de la Ruut oŋ e o pɔge. A puoreŋ, a Baabole da yelka: “Ka Jehoova vɛŋ oŋ taa poɔ, a dɔge bidɔɔ.” A Beetilehem pɔgeba na da de la maaloo ko Neomi a kyɛ lɛ de puubu ko Ruut meŋ. Ba da yelka Ruut e la neɛ naŋ gaŋ bidɔbɔ ayɔpoi a ko Neomi. A puoreŋ te wa kannɛɛŋ a Baabole poɔŋ ka, Ruut bidɔɔ na da wa e la a nakpɛŋ Deevid sããkoma. (Ruut 4:11-22) Ka Deevid meŋ da e Yezu Krista sããkoma.​—Matio 1:1.

Baabole Poɔ Yelsonne

w05 3/1 29 wɛl. 3

Yelnimizeere Naŋ Be A Ruut Gane Poɔ

4:6​—Sobuo ka yɔɔdeɛrɛ na baŋ “sãã” o meŋɛ kyɛŋ saŋa na oŋ yɔɔdeɛ neɛ kaŋa kyɛŋ na? A dɛndɛŋ soba, ka nandaaloŋ wa kpɛ neɛ kaŋa ka o koɔre o teŋgane naŋ e o kyɛŋ a ko neŋ yuo kaŋa, a yɔɔdeɛrɛ na toɔ̃ iree libie a leɛ da a teŋgane na o soba naŋ koɔre na. Ba da maŋ sɔrɛɛ yuomo naŋ kyɛre sɛre kyɛ ka a son-meŋɛ yuoni na ta, kyɛ pãã wuli a sane ko o soba oŋ yɔɔ. (Liivai 25:25-27) Ka yɔɔdeɛrɛŋ e lɛ, a na vɛmeŋ ka o meŋɛ kyɛŋ na daa leɛ sigi teŋɛ. Kyɛ lɛ yoŋ naane, ka Ruut wa dɔge bidɔɔ o naŋ na leɛ di a kyɛŋ, kyɛ a yɔɔdeɛrɛ dɔgrɔ kaŋa zaa koŋ baŋ di a kyɛŋ.

FEBRUARY 7-13

BAABOLE POƆ YELNIMIZEERE | 1 SAAMIUEL 1-2

“Maŋ Yel Yelzaa Naŋ Be Ho Sukyiriŋ A Ko Jehoova Puoro Poɔŋ”

ia 55 wɛl. 12

O Da Yelee Yelzaa Naŋ Be O Sukyiriŋ A Ko Naaŋmen Puoro Poɔŋ

¹² Haana e la ewuli soŋ a kyaare puoro a ko Naaŋmen puorebiiri zaa. Jehoova yi la nimimaaroŋ poɔŋ a toŋboɔle o puorebiiri zaa ka ba wa o seŋ a wa yeli yelzaa naŋ dɔnnɔ ba ane yelzaa naŋ ferɛ ba a ko o. Aŋa lɛ bibile naŋ maŋ yel yelzaa naŋ fɛroo a korɔ o dɔgreba naŋ nɔnoo na. (Kanne Yieme 62:8; 1 Tɛsalonika 5:17.) Vooroŋ soŋ da soŋɛɛ bitontona Piita oŋ sɛge a sukyiri dii yɛlɛ ŋa a kyaare puoro na teŋ maŋ puoro korɔ Jehoova na ka: “Yɛ de a yɛ yelwonni zaa ko O, bonso, O taa la yɛ yɛlɛ.”​—1 Pit. 5:7.

w07 3/15 16 wɛl. 4

Zie Haana Naŋ Da Nyɛ Sukyiri Maaroŋ

Bo yɛlɛ teŋ na baŋ zanne yi a yɛlɛ ŋa poɔŋ? Ka teneeŋ wa puore ko Jehoova a yel yelkaŋa naŋ dɔnnɔ te a ko o, te na toɔ̃ vɛmeŋ ka o baŋ lɛ a yɛlɛ naŋ kpɛ te seŋ, a kyɛ lɛ sɔroo meŋ ka o e yelkaŋa a soŋ te. Ka teneeŋ koŋ baŋ e yelzaa a iri te yelkpeɛŋaa na te naŋ tuoro na bare, lɛ yɛŋ aseŋ ka te bare a yɛlɛ zaa eŋ Jehoova nuureŋ. Ka teneeŋ e lɛ a na soŋ teŋ yaga zaa.​—Yeng Yelbie 3:5, 6.

Baabole Poɔ Yelsonne

w05 3/15 21 wɛl. 5

Yelnimizeere Naŋ Be A Dɛndɛŋ Saamiuel Gane Poɔ

2:10​—Bonso ka Haana da puore ko Jehoova ka “o ko o naa na faŋa” saŋa na nensaalaa zaa naŋ da ba dire naaloŋ a kaara a Izerayɛl paaloŋ na? A Moosis Bege na da taa la daŋyelbo kaŋa naŋ yelka nendaare kaŋa neɛ kaŋa na dire la naaloŋ a kaara a Izerayɛl paaloŋ. (Duturoonomi 17:14-18) Aŋ da kyɛre fẽẽ ka Gyekɔb kpi na, o da daŋyeleeŋ ka: “Naaloŋ daŋkpali [a daŋkpali are ko la a naaloŋ diibu kpeɛ̃o] na kpɛnlɛɛ Gyuuda poɔŋ.” (Munpiilee 49:10) Kyɛ lɛ yoŋ naane, Jehoova da yeleeŋ a kyaare Saara naŋ da e a Izerayɛl biiri makoma na ka: “Noba namine na yi la o eŋɛŋ.” (Munpiilee 17:16) Azuŋ, Haana puoro na da kyaarɛɛ a nendaare kaŋa naa naŋ na wa na yɛlɛ.

FEBRUARY 14-20

BAABOLE POƆ YELNIMIZEERE | 1 SAAMIUEL 3-5

“Jehoova E La Nimibaaloŋ Soba”

w18.09 24 wɛl. 3

O E La Kpeɛ̃o Zaa Daana Kyɛ Lɛ E Nimibaaloŋ Soba Meŋ

³ Saamiuel da piileeŋ “tonɔ korɔ Jehoova” a ŋmenpuoredieŋ saŋa na o naŋ da e bibile. (1 Saa. 3:1) Bebiri kaŋa saŋa na Saamiuel naŋ da gbiri gaa tɔɔre a zisoɔree saŋa na, yelkaŋa o naŋ da ba kaara soriŋ da eɛŋ. (Kanne 1 Saamiuel 3:2-10.) O da woŋ la kɔkɔre kaŋa naŋ boɔlɔ o yuori. Saamiuel da teɛre ka a dɔɔ nyaaŋaa naŋ da e a Ŋmenpuore Wedeɛrekpoŋ baŋ boɔlɔ Iilai la boɔloo. Azuŋ Saamiuel da lonneeŋ a zo gaa o zie a te yelka: “Nyɛ ma ho boɔle maŋ.” Iilai da yelkooŋ ka o ba boɔloo. Kyɛ a lɛ zisoɔree na a yɛlɛ ŋa neŋ o zu da lɛ eɛŋ gbɛre buyi. Beŋ la ka Iilai da baŋ ka Naaŋmen la boɔlɔ Saamiuel. Azuŋ, o da wulee Saamiuel lɛ oŋ na sage a boɔlɔ. Ka Saamiuel meŋ da tu o noɔre. Bonso ka Jehoova da ba tu a maleke na o naŋ da tu o eŋɛŋ, kyɛ yele yɛlɛ korɔ Saamiuel na a vɛŋ oŋ baŋ ka o na la boɔloo a yi a dɛndɛŋ saŋa na? A Baabole ba wuli, kyɛ yɛlɛ naŋ tu a yɛlɛ ŋa puoreŋ a e na wuli teŋ yelnimizeɛ kaŋa. A wuli teŋ ka Jehoova da taa la nimibaaloŋ a ko Saamiuel naŋ da e bibile na. Bonso teŋ yel lɛ?

w18.09 24 wɛl. 4

O E La Kpeɛ̃o Zaa Daana Kyɛ Lɛ E Nimibaaloŋ Soba Meŋ

⁴ Kanne 1 Saamiuel 3:11-18. Jehoova Bege na da wuleeŋ ka aseŋ ka bibiiri taa gyeremɛ a ko neŋnyaane, a gaŋaa zaa ka o sobaŋ wa e nabie. (Yiib. 22:28; Liiv. 19:32) Ka lɛ ho teɛre ka Saamiuel da na toɔ̃ iree beguo saŋa a de nyaa a gaa Iilai zie a te manne a sɛrɛɛ diibu yɛlɛ na Jehoova naŋ yel kyaare Iilai na ko o bee? Ai o koŋ baŋ e lɛ! Azuŋ a Baabole yelka, ka Saamiuel daaŋ “zoro dabeɛ̃ ka o yeli a yelnyɛroo ko Iilai.” Kyɛ lɛ na Naaŋmen naŋ da e na da vɛŋɛɛŋ ka Iilai baŋ ka o na la boɔlɔ Saamiuel. A lɛ zuŋ na, Iilai da mɔɔrɛɛ o mɔɔbo zaa ka o baŋ yɛlɛ naŋ kyɛnɛ, azuŋ o da yelko la Saamiuel ka o yeli yɛlɛ naŋ bebe ko o. Iilai da yelko la Saamiuel ka “[ta wa] sɔgle ma yelzaa a yi yɛlɛ na zaa oŋ yel ko bo na eŋɛŋ.” Saamiuel meŋ da tu la Iilai noɔre a “yeli yelzaa ko o.”

Baabole Poɔ Yelsonne

w05 3/15 21 wɛl. 6

Yelnimizeere Naŋ Be A Dɛndɛŋ Saamiuel Gane Poɔ

3:3​—Ka lɛ a Zi-Forifori Zaa Zi-Forifori na la ka Saamiuel da maŋ kpɛ te gaŋ bee? Ai, be naane oŋ da maŋ gaŋ. Saamiuel da e la Liivai neɛ naŋ da yi Koohat booree na poɔŋ, a Koohat booree na noba koŋ baŋ e ŋmenpuore wedeɛreba. (1 Tungkori 6:33-38) A lɛ zuŋ na, Saamiuel da ba taa sori zaa ka o “liinni bee a nyɛ . . . a bonpɛgiyirii bee a bon-forifori na.” (Soribu 4:17-20) A ŋmenpuoredie zie na Saamiuel naŋ na baŋ kpɛ te ta la a ŋmenpuoredie zi-gbangbali na bee a davoro na. Aminekaŋaŋ a dere naŋ da be a zi-gbangbali bee a davoro na poɔŋ la oŋ da maŋ kpɛ te gaŋ. A waa ŋa Iilai meŋ da maŋ gaŋ la a ŋmenpuoredie zi-gbangbali na bee a davoro zie kaŋaŋ. A yelbiri ba naŋ de toŋ ne toma ka “beŋ ka Naaŋmen layiri bee nɔlaŋ daga na daaŋ be na” wulee a ŋmenpuoredie na lombori zie kaŋa.

FEBRUARY 21-27

BAABOLE POƆ YELNIMIZEERE | 1 SAAMIUEL 6-8

“Nembuo La Ho Naa?”

it-2 163 wɛl. 1

Naaŋmen Naaloŋ Na

A Izerayɛl Biiri Da Yeleeŋ Ka Ba Boɔrɛɛ Nensaalaa Naŋ Na Dire Naaloŋ A Kaara Ba. A Izerayɛl biiri naŋ da wa yi Ijipiti yuomo 400 puoreŋ, a da la e la yuomo 800 saŋa na Naaŋmen ne Aboraham naŋ da laŋ nɔlaŋ na. A lɛ saŋa la ka a Izerayɛl biiri da yelka ba boɔrɛɛ nensaalaa naŋ na dire naaloŋ a kaara ba. Ba da boɔrɔŋ ka ba waa ŋa a paalonne naŋ ŋmaa ba gyeere a taa nensaaleba namine naŋ kaara ba na. Kyɛ, yɛlɛ na baŋ da sɔre na da wuleeŋ ka Jehoova la baŋ zagre ka o dire naaloŋ a kaara ba. (1Sa 8:4-8) Yelmeŋɛ la, a Izerayɛl biiri da kaarɛɛ soriŋ ka Naaŋmen naaloŋ na waŋ, aŋa lɛ o naŋ da eŋ noɔre ko Aboraham ane Gyekɔb na. Aŋa lɛ te naŋ nyɛ a yelzu piilee zie na. Ba da lɛ taa la a lɛ teɛretɔ ŋa a yi daŋyelbo na Gyekɔb naŋ da yel a kyaare Gyuuda saŋa na aŋ da kyɛre fẽẽ ka o kpi na. (Mn 49:8-10) Ba da lɛ taaɛ a teɛretɔ a yi yɛlɛ na Jehoova naŋ da yelko a Izerayɛl biiri saŋa na baŋ da yi Ijipiti na. (Yi 19:3-6) A Bege nɔlaŋ na meŋ da wulee a yɛlɛ ŋa. (Du 17:14, 15) Yɛlɛ na meŋ Naaŋmen naŋ da vɛŋ ka daŋyele Balaam da yel na da wulee a yɛlɛ ŋa. (So 24:2-7, 17) Saamiuel ma Haana meŋ puoro na da wuleeŋ ka o taa la a lɛ teɛretɔ ŋa. (1Sa 2:7-10) Kyɛ lɛ zaa naŋ la, Jehoova da ba iri o Naaloŋ “yelsɔglɔ” na wuli o noba na te baare. O da ba wuli saŋa na a Naaloŋ naŋ na wa, o da ba wuli lɛ oŋ na sɛgre a Naaloŋ yɛlɛ ka o waa. O da ba lɛ wuli meŋ ka a Naaloŋ na be la a teŋɛ ŋa zuŋ bee o na be la sazuŋ. A lɛ zuŋ, a Izerayɛl biiri naŋ da yelka ba boɔrɔ la nensaalaa naŋ na dire naaloŋ a kaara ba na, ba da ba wuli sigrimennoŋ gyogo fẽẽ zaa.

w11 1/1 27 wɛl. 1

O Da Di La Kannyiri Aneazaa Ka O Da Tuoree Yɛlɛ Naŋ Da Vɛŋ Ka O Eŋɛ Kyoɔre

Nyɛ lɛ Jehoova naŋ da yelko Saamiuel saŋa na oŋ de a yɛlɛ wa biŋ o nimitɔɔreŋ puoro poɔŋ na: “Kyɛlle a noba yelyaga aŋa lɛ na zaa baŋ yel ko bo na; bozuŋ hooŋ naane baŋ zagre, maaŋ yɛŋ la baŋ zagre ka eŋ ta e ba naa.” Nyɛ lɛ a yɛlɛ ŋa naŋ da dii Saamiuel sukyiri seŋ lɛ, kyɛ hooŋ leɛ nyɛ zoma na a Izerayɛl biiri naŋ to a Kpeɛ̃o Zaa Daana Naaŋmen na! Jehoova da yelko la Saamiuel ka o yelko a Izerayɛl biiri ka, ka ba naŋ iri nensaalaa ka o dire naaloŋ a kaara ba, a na de la dɔgɛɛ waneŋ ba zu. Saŋa na Saamiuel naŋ da yel a yɛlɛ ŋa ko a Izerayɛl biiri na, ba da naŋ arɛɛ kpeɛŋaa a kyɛ yelka: “Akai, te naaŋ taaɛ naa te eŋɛŋ.” Azuŋ Saamiuel da tu la Naaŋmen noɔre, a da te iri dɔɔ na Jehoova meŋɛ naŋ kaa iri a sɔ o naaloŋ kãã oŋ e ba naa.​—1 Saamiuel 8:7-19.

w10 1/15 30 wɛl. 9

Sieree Zaa Wuleeŋ Ka Jehoova La Seŋ Ka O Dire Naaloŋ!

⁹ A Izerayɛl biiri takoreŋ saŋa yɛlɛ wuleeŋ ka yɛlɛ na Jehoova naŋ da yel na e la yelmeŋɛ. A Izerayɛl biiri naŋ da iri nensaalaa oŋ dire naaloŋ a kaara ba na da vɛŋɛɛŋ baŋ da tuore yelkpeɛne yaga zaa. A gaŋaa zaa, saŋa na a naa naŋ maŋ wa e tokpeɛne soba na. A Izerayɛl biiri yɛlɛ ŋa vɛŋɛɛŋ teŋ baŋ ananso naŋ vɛŋ ka nensaaleba namine naŋ ba baŋ Jehoova na, koŋ baŋ waneŋ zeŋ laafeɛ wa ko nensaaleba. Yelmeŋɛ la, a donɛɛ ŋa zu namine maŋ puore sɔrɛɛ Naaŋmen sommo ka lɛ na vɛŋ ka ba toɔ̃ waneŋ emmaaroŋ ane zeŋ laafeɛ, kyɛ bonso ka Naaŋmen na de sommo ko noba naŋ ba sigri ba menne a ko o naaloŋ na?​—Yiem. 2:10-12.

Baabole Poɔ Yelsonne

w02 4/1 12 wɛl. 13

Bonso Aŋ Seŋ Ka Te De Suobu?

¹³ Aseŋ ka neɛ leɛre o eebo sɛre ka o na baŋ wa de suobu a wa e Jehoova Sieree Deme kaŋa. Ka neɛŋ boɔrɔ ka o de o sukyiri zaa tuuro Yezu Krista, aseŋ ka o yi o meŋɛ poboɔbo poɔŋ a leɛre o eebo kpɛlɛŋkpɛlɛŋ. Neɛ naŋ boɔrɔ ka o leɛre o eebo seŋ ka o bare yelfaare na zaa o naŋ da erɛ na, a kyɛ e siri ka o na erɛɛ yɛlɛ Naaŋmen naŋ boɔrɔ yoŋ. A yi a Baabole poɔŋ, a Hiburu ane a Giriki yelbie na baŋ de toŋ ne toma na wulee neɛ naŋ gɛrɛ zie kaŋa a kyɛ leɛ puore, bee ka o soba leɛ tori zi zaala kaŋa. Ka neɛŋ wa e lɛ, a wuleeŋ ka o soba maŋ bare la yelfaare na o naŋ erɛ na a kyɛ leɛ erɛ yɛlɛ Naaŋmen naŋ boɔrɔ. (1 Namine 8:33, 34) Ka nobaŋ wa leɛre ba eebo aseŋ ka ba “tonɔ toma naŋ wulo ka ba leɛ la ba eebo.” (Toma 26:20) A maŋ wa fɛreŋ ka o soba bare zirii puoruu a kyɛ erɛ yɛlɛ naŋ wuli ka o tuuro la Naaŋmen bege na. Aseŋ ka o de o sukyiri zaa meŋ a puoro Jehoova. (Duturoonomi 30:2, 8-10; 1 Saamiuel 7:3) Ka neɛŋ wa leɛre o eebo a maŋ leɛrɛɛ o teɛroŋ, a leɛre yɛlɛ naŋ e nimizeɛ ko o soba o zemmo poɔŋ ane o gyogo meŋ. (Iziikiel 18:31) Ka teneeŋ “wa leɛ te eebo” lɛ wuleeŋ ka aseŋ ka te bare gyog-faare na zaa te naŋ da taa na, a kyɛ leɛ de a gyog-paalaa na su pɔge te menne.​—Toma 3:19; Efesu 4:20-24; Kolosi 3:5-14.

FEBRUARY 28–MARCH 6

BAABOLE POƆ YELNIMIZEERE | 1 SAAMIUEL 9-11

“A Piilee Na Sɔɔl Da Sigree O Meŋɛ A Kyɛ Baŋ O E Ta Zie Meŋ”

w20.08 10 wɛl. 11

Sigri Ho Meŋɛ A Kyɛ Baŋ Ho E Ta Zie Saŋa Na Ho Neŋ Naaŋmen Naŋ Kyɛnɛ Na

¹¹ Hooŋ leɛteɛre yɛlɛ naŋ pɔge Naa Sɔɔl. A piilee saŋa na o da e la bi-pɔlee naŋ baŋ o e ta zie. O naŋ da baŋ o e ta zie zuŋ na, saŋa na baŋ da de apoɔsori koroo na o da naarɛɛŋ sɛre kyɛ sage. (1 Saa. 9:21; 10:20-22) Kyɛ, a yi wagre naŋ gɛrɛ na Sɔɔl da piili zɛgrɛɛ o meŋɛ. O da wuleeŋ ka o taa la a lɛ gyog-faa ŋa saŋa na o naŋ da wa leɛ naa na. Bebiri kaŋa, Sɔɔl kannyiri da baarɛɛŋ saŋa na o naŋ da kyɛnlɛ daŋyele Saamiuel na. Aŋ da seŋ ka o dɛle Jehoova ka o na go la o noba na, Sɔɔl da gaa la nimitɔɔre a te iri a sareka aneazaa ka a da ba seŋ ka o e lɛ. A lɛ zuŋ na, Sɔɔl neŋ Jehoova niiloŋ da saaŋɛɛŋ, a baaraa zaa a naaloŋ da yi la o nuureŋ. (1 Saa. 13:8-14) Sɔɔl yɛlɛ ŋa e la kpããmo ko te ka, a ba seŋ ka te vɛŋ ka zɛgemeŋɛ vɛŋ ka te e yɛlɛ naŋ ba tori. Ka te naŋ zanne yelkaŋa yi be, a na soŋ teŋ yaga zaa.

w14 3/15 9 wɛl. 8

Lɛ Teŋ Na Baŋ E A Naŋ Taa Te Meŋɛ Deteroo Gyogo Na

⁸ Izerayɛl Naa Sɔɔl naŋ da e ewuli faa na e la kpããmo ko te a kyaare lɛ meŋɛ nɔŋ te gaali naŋ na toɔ̃ sãã meŋɛ deteroo gyogo naŋ seŋ ka te taa na. A yi Sɔɔl naaloŋ diibu piiluu saŋa na, o da baŋ la o e ta zie a da sigri o meŋɛ meŋ. (1 Saa. 9:21) Saŋa na a Izerayɛl biiri mine naŋ da yel yelfaare a kyaare o naaloŋ diibu na, o da ba dɔgre ba aneazaa ka Naaŋmen da ko oŋ a kpeɛ̃o ka o na toɔ̃ eɛ lɛ. (1 Saa. 10:27) Naa Sɔɔl da sagɛɛ Naaŋmen vooroŋ soŋ na sowuli saŋa na oŋ da deɛ a Izerayɛl biiri weɛ baŋ te zɔɔ neŋ a Aamon noba. A puoreŋ, a zɔɔre naŋ da wa baare na, o da yi la sigrimennoŋ poɔŋ a de a zɔɔtoɔ̃ puubu zaa ko Jehoova.​—1 Saa. 11:6, 11-13.

w95 12/15 10 wɛl. 1

A Aamon Noba Da E La Noba Naŋ Da Maŋ De Zɔɔre A Yaa Neŋ Nimimaaroŋ Sane

Aneazaa ka Jehoova da taa la nimimaaroŋ ko a Aamon noba, kyɛ ba da maŋ de la zɔɔre yaa neŋ a sane. Jehoova da ba iri o nimiri yi lɛ na a Aamon noba naŋ da iri zɔɔre neŋ o noba na eŋɛŋ. “Beŋ la ka Naaŋmen seɛ bee vooroŋ soŋ daaŋ wa Sɔɔl eŋɛŋ saŋa na oŋ da wa woŋ a duoro ŋa [naŋ yi Neehas seŋ na], ka o suuri daaŋ iri haali.” Naaŋmen vooroŋ soŋ da eŋɛɛ Sɔɔl faŋa oŋ da kaa iri dɔbɔ naŋ baŋ zɔɔre ka ba noɔre ta 330,000 baŋ da gaa te zɔɔ neŋ a Aamon noba. Ba da zɔɔtoɔ̃ la a Aamon noba ka “ba bayi gba da ba maŋ lantaa.”​—1 Saamiuel 11:6, 11.

Baabole Poɔ Yelsonne

w05 3/15 22 wɛl. 8

Yelnimizeere Naŋ Be A Dɛndɛŋ Saamiuel Gane Poɔ

9:9​—“Ona na bee neɛ na baŋ boɔlɔ daŋyele na, kaakaara baŋ daaŋ boɔloo,” wala ka a yɛlɛ ŋa wuli? A yelbie ŋa wuleeŋ ka daŋyelba da e la yaga Saamiuel beri na poɔŋ ane a Izerayɛl namine beri na poɔŋ. A lɛ zuŋ a yelbiri “daŋyele” da wa leɛrɛɛ a yelbiri “kaakaara” voɔreŋ. Saamiuel la a daŋyelba dɛndɛŋ soba.​—Toma 3:24.