Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane

MAY 2-8

BAABOLE POƆ YELNIMIZEERE | 1 SAAMIUEL 27-29

“Sori Deevid Naŋ Da Maŋ Tu Kyɛ Gaa Zɔɔre”

it-1 41

Eekis

Gbɛre buyi zaa ka Deevid da zo gaa Naa Eekis paaloŋ na a te bɔ lirizie saŋa na Sɔɔl naŋ da boɔroo ka o ko o na. A dɛndɛŋ saŋa na oŋ da zo gaa be na, a paaloŋ noba da teɛre ka o e la ba dɔndɔmɔ, azuŋ Deevid da piili erɛɛ yɛlɛ aŋa yɛŋyaa. Beŋ la ka Eekis da yelka ba baroo ka o gaa bonso o e la yɛŋyaa. (1Sa 21:10-15; Ym 34:Sup; 56:Sup) A yiiloŋ saŋa na, Deevid ane dɔbɔ naŋ da e zɔɔzɔɔreba a be o zie ka ba noɔre ta 600 neŋ ba yideme zaa la da gaa Naa Eekis paaloŋ. Eekis da yelko baŋ ka ba te kpeɛrɛ Ziikilag. A yi a yuoni gbuli ane kyuuri anaare na zaa baŋ da kpeɛrɛ Ziikilag na, Eekis da teɛrɛɛŋ ka Deevid da zɔɔrɔŋ ka o deɛ a Gyuuda teŋbilii na so. Kyɛ, Deevid da te zɔɔrɔ neŋ la a Giisur noba, Geezer noba, ane a Aamalɛk noba. (1Sa 27:1-12) Deevid da toɔ̃ bɛnlɛɛ Eekis te ta ka Eekis gba iroo ka o e o sogyare na neŋkpoŋ saŋa na a Filiisitiya noba naŋ da nara ba menne ka ba te zɔɔ neŋ Naa Sɔɔl na. Aŋ da kyɛre fẽẽ ka a zɔɔre piili na, a Filiisitiya “noba nembɛrɛ” na da arɛɛ kpeɛŋaa a yelko Eekis ka o vɛŋ ka Deevid ane o noba na leɛ gaa Ziikilag. (1Sa 28:2; 29:1-11) Saŋa na Deevid naŋ da wa leɛ Izerayɛl naa na, o da te zɔɔtoɔ̃ la a Gaat paaloŋ, kyɛ a waa ŋa o da ba ko Eekis. Eekis da naŋ bebeŋ saŋa na Soolomoŋ naŋ wa piili o naaloŋ diibu na.​—1Nm 2:39-41; kanne GAAT.

w21.03 4 wɛl. 8

Bi-Pɔlɔ​​—Wala Yɛŋ Na Toɔ̃ E Ka Noba Dɛle Yɛ?

⁸ Te lɛ nyɛ yelkpeɛŋaa kaŋa Deevid naŋ da tuore. Saŋa na baŋ da sɔ o naaloŋ kãã ka o wa e naa na, Deevid da seŋ ka o di kannyiri a kyɛnle yuomo yaga sɛre kyɛ na wa di naaloŋ a kaara a Gyuuda paaloŋ. (1 Saa. 16:13; 2 Saa. 2:3, 4) Boŋ da soŋ Deevid oŋ di kannyiri a kyɛnlɛ ka a lɛ saŋa na ta? Deevid da ba de o teɛroŋ eŋ yɛlɛ naŋ na vɛŋ ka o eŋɛ kyoɔre, kyɛ o da de la o teɛroŋ zaa eŋ yɛlɛ na oŋ na toɔ̃ e na eŋɛŋ. Aŋa mannoo poɔŋ, saŋa na oŋ da zo gaa bɔ sɔgle zie a Filiisitiya noba paaloŋ na, Deevid da deɛ a lɛ vuo ŋa te zɔɔrɔ neŋ a Izerayɛl paaloŋ dɔndɔnne. Oŋ da e lɛ na, o da toɔ̃ go la a Gyuuda noba teŋgama na.​—1 Saa. 27:1-12.

it-2 245 wɛl. 6

Zirii

A Baabole wuleeŋ ka, ka neɛŋ baŋ perɛ kyɛ ŋma zirii lɛ ba soma fẽẽ zaa. Kyɛ, lɛ ba wuli ka a e la ferebo ka te de duoro ko noba mine naŋ ba seŋ neŋ ka ba baŋ yelmeŋɛ naŋ bebe a kyaare a lɛ duoro na. Yezu Krista da ko teŋ kawane ka: “Ta de bonsoŋ eŋ baare, bee a de fo boma naŋ taa yuori lɔɔ eŋ dobaare. A na neɛ a la sãã bare, kyɛ nyɔge fo meŋ tage kyore.” (Mt 7:6) Lɛŋ vɛŋ saŋa kaŋa ka Yezu maŋ zagre ka o manne duoro mine a ko noba naŋ ba seŋ neŋ ka ba baŋaa, bee a zagre ka o iri noba mine soorebie nɔɛ a ko ba aŋa lɛ ba naŋ boɔrɔ na, bonso o baŋɛɛŋ ka ka o naŋ e lɛ a na de la toɔrɔ naŋ ba seŋ neŋ a waneŋ noba mine zuŋ. (Mt 15:1-6; 21:23-27; Gyn 7:3-10) Aminekaŋaŋ a yɛlɛ ŋa neŋ o zu la so ka Aboraham, Aziki, Reehab ane Iliaisa da zagre ka ba yel yelmeŋɛ zaa naŋ bebe a ko noba naŋ ba puoro Jehoova na.​—Mn 12:10-19; zu 20; 26:1-10; Js 2:1-6; Gyi 2:25; 2Nm 6:11-23.

Baabole Poɔ Yelsonne

w10 1/1 20 wɛl. 5-6

Kũũni Na Toɔ̃ Soŋɛɛ Neŋvobo Bee?

Hooŋ leɛteɛre a yɛlɛ ŋa soŋ a nyɛ. A Baabole yeleeŋ ka ka neɛŋ wa kpi o soba maŋ ‘leɛ kpɛɛ tɛne,’ a Baabole lɛ yeleeŋ ka “yɛlɛ oŋ gyɛre biŋ maŋ baareŋ.” (Yieme 146:4) Sɔɔl ane Saamiuel zaa da baŋɛɛŋ ka Naaŋmen bege na ba tere sori ka a Izerayɛl bie kaŋa zaa gaa kɔntɔŋboɔlaa zie. Lɛ zuŋ ka a piilee saŋa na ka Sɔɔl da mɔɔ o moɔbo zaa ka o iri neɛzaa naŋ erɛ kɔntɔŋboɔlaa yɛlɛ yi a Izerayɛl paaloŋ!​—Liivai 19:31.

Hooŋ leɛteɛre a yɛlɛ ŋa soŋ a nyɛ. Saamiuel da e la dɔɔ naŋ puoro Jehoova yelmennoŋ poɔŋ, ka onaŋ da taa seɛ naŋ be zie kaŋaŋ, ka lɛ o da na zagreŋ ka o tu Naaŋmen bege na a kyɛ tu kɔntɔŋboɔlaa eŋɛŋ ka o neŋ Sɔɔl a di dama bee? Jehoova da ba lɛ boɔrɔ ka o yel yɛlɛ ko Sɔɔl. Ka lɛ neɛ naŋ erɛ kɔntɔŋboɔlaa yɛlɛ na baŋ ferɛɛ a Kpeɛ̃o Zaa Daana Naaŋmen na ka o tu Saamiuel naŋ kpi eŋɛŋ ka o neŋ Sɔɔl di dama bee? Ai. A pɛlɛɛŋ ka a “Saamiuel” ŋa da ba e Naaŋmen daŋyele na naŋ da kpi na. Malkifaa kaŋa la da erɛ o yɛlɛ aŋa Saamiuel naŋ kpi na.

MAY 9-15

BAABOLE POƆ YELNIMIZEERE | 1 SAAMIUEL 30-31

“Eŋ Ho Meŋɛ Faŋa A Tuuro Jehoova Ho Naaŋmen Eŋɛŋ”

w06 8/1 28 wɛl. 12

Zoro Jehoova​—A Kyɛ Taa Popeɛloŋ!

¹² Deevid naŋ da zoro Jehoova na zuŋ, o da ba erɛ yɛlɛ naŋ ba soma. Kyɛ lɛ yoŋ naane, oŋ da zoro Jehoova na zuŋ a da maŋ somooŋ oŋ erɛ yɛlɛ naŋ soma, a kyɛ lɛ derɛ gbɛɛ yɛŋ poɔŋ meŋ haali saŋa na gba oŋ tuoro yelkpeɛne na. Saŋa na Sɔɔl naŋ da boɔrɔ Deevid ka o ko na, Deevid ane dɔbɔ naŋ da be o zie na da zo bɔ la sɔgle zie a Filiisitiya noba teŋbile kaŋa baŋ boɔlɔ Ziikilag poɔŋ. Ba da te kpeɛrɛɛ be yuoni gbuli ane kyuuri anaare. (1 Saamiuel 27:5-7) Bebiri kaŋa a dɔbɔ zaa da yi la a yiri poɔ a gaa zie kaŋa, beŋ la ka a Aamelɛk noba da wa kyɔŋ a yiri zaa neŋ vũũ, a kyɛ nyɔge ba pɔgeba, ba bibiiri ane ba peere zaa a gaa neŋ. Saŋa na baŋ da leɛ wa nyɛ yɛlɛ na naŋ e na, Deevid ane o dɔbɔ na da koŋeeŋ haali. A yɛlɛ ŋa da dɔŋɛɛ Deevid dɔbɔ na yaga ka lɛ vɛŋ ka ba suuri zaa te iri, baŋ gba da yelka ba na de la kubo za neŋ Deevid. Aneazaa ka Deevid eŋɛ da kyoɔrɛɛŋ yaga zaa, kyɛ o da naŋ taaɛ tamaa. (Yeng Yelibie 24:10) Deevid naŋ da zoro Naaŋmen zuŋ na, o da gaaɛ Jehoova zie a te bɔ sommo, o “daaŋ eŋ la o meŋɛ sekpeɛŋaa Jehoova Naaŋmen eŋɛŋ.” Naaŋmen da soŋɛɛ Deevid ane o dɔbɔ na baŋ zo te pɔge a Aamelɛk noba, a zɔɔtoɔ̃ ba a kyɛ lɛ deɛ bon la bonzaa ba naŋ de a gaa neŋ na.​—1 Saamiuel 30:1-20.

w12 4/15 30 wɛl. 14

Jehoova Maŋ Go Teŋ A Na E Lɛ A Faa Te

¹⁴ Deevid da tuoree yelkpeɛne yaga zaa o zemmo poɔŋ. (1 Saa. 30:3-6) Yɛlɛ na vooroŋ soŋ naŋ da somoo oŋ sɛge biŋ na wuleeŋ ka Jehoova da baŋɛɛ yelkpeɛne na zaa oŋ da tuoro na. (Kanne Yieme 34:18; 56:8.) Naaŋmen baŋɛɛ yelkpeɛne na teŋ meŋ tuoro. Ka te “sukyieŋ wa dɔɔnɔ te yaga zaa” bee ka te “suhu bee sukyiriŋ wa dɔɔnɔ [te] gaali [te] faaloŋ yɛlɛ,” Jehoova maŋ tage peɛle teŋ. A yɛlɛ ŋa yoŋ gba seŋ ka a dii te sukyie, aŋa lɛ aŋ da dii Deevid sukyiri na. Deevid da yieleeŋ a yelka: “N na taaɛ popɛle a nyagina ho nɔmmo naŋ ba baara poɔŋ, bozuŋ ho nyɛ la N dɔgɛɛ. Ho baŋɛɛ N toɔrɔ.” (Yiem. 31:7) Kyɛ lɛ ba wuli ka te dɔgɛɛ yoŋ la ka Jehoova maŋ nyɛ. O maŋ mɔɔrɔŋ ka o dii te sukyie a kyɛ eŋ te faŋa meŋ. Sori kaŋa oŋ maŋ tu kyɛ e lɛ la a Kristabiiri lammore na.

Baabole Poɔ Yelsonne

w05 3/15 24 wɛl. 8

Yelnimizeere Naŋ Be A Dɛndɛŋ Saamiuel Gane Poɔ

30:23, 24. Gbɛre na Deevid naŋ da de na da kyaarɛɛ yɛlɛ naŋ be Soribu 31:27 na. A zie ŋa wuleeŋ ka Jehoova nimiri paɛ toma na zaa neɛzaa naŋ tonɔ ka o soŋ a lantaapuoruu na. Azuŋ, toma zaa yɛ naŋ tonɔ, yɛ “tonɔ a ne yɛ poore zaa aŋa a Daana la ka yɛ tonɔ terɛ, kyɛ ka a ta waa ŋa nensaaleba la ka yɛ tonɔ terɛ.”​—Kolosi 3:23.

MAY 16-22

BAABOLE POƆ YELNIMIZEERE | 2 SAAMIUEL 1-3

“Bo Yɛlɛ Teŋ Na Baŋ Zanne Yi ‘A Tammo Yieloŋ’ Na Poɔŋ?”

w00 6/15 13 wɛl. 9

Taa Emmo Ko Noba Naŋ E Ho Wederebɛ Na

⁹ Ka lɛ Deevid eŋɛ da kyoɔrɛɛŋ yaga saŋa na Sɔɔl naŋ da dɔgroo na bee? Deevid da koŋeeŋ a yelko Jehoova ka, “nimikuonii deme boɔrɛɛ N nyɔvore iribo.” (Yieme 54:3) O da yelee yelzaa naŋ be o sukyiri poɔŋ a ko Jehoova, a da yelkoo ka: “Oo N Naaŋmen, deɛ ma a yi N dɔndɔnne sɛŋ . . . Oo Jehoova, gandaba lagrɛɛ taa a tuore ma N bege saammo bee N yelfaare zuŋ naane. N ba sãã yelzaa, kyɛ baŋ zoro a sɛgre ba menne. Naŋ iri soŋ ma, a nyɛ lɛ na naŋ la.” (Yieme 59:1-4) A yɛlɛ ŋa taa daaŋ pɔge boŋ zaa, saŋa na hoŋ ba e neɛ kaŋa naŋ e neŋkpoŋ ho zuŋ yelfaa zaa kyɛ oŋ moɔ̃ nimiri a erɛ bo nimikuonii? Deevid da naŋ taa la gyeremɛ a ko Sɔɔl. Saŋa na Sɔɔl naŋ wa kpi na, aŋ da seŋ ka Deevid kyillɛ neŋ popeɛloŋ na, kyɛ Deevid da sɛgɛɛ laadimii bee kuore yieloŋ a yelka: “Sɔɔl ane Gyoonataŋ vorihoŋ saŋa, ba da deɛ ba yɛlɛ baŋ e menne ko noba meŋ . . . Ba da e la nyagroŋ a gaŋ kakyugri bee gyugini, ba da taaɛ faŋa a gaŋ gbɛgime. Oo Izerayɛl pɔgeba, yɛ koŋ Sɔɔl.” (2 Saamiuel 1:23, 24) Aneazaa ka Sɔɔl da eɛ Deevid nimikuonii yaga, kyɛ Deevid eɛ ewuli soŋ yaga a ko te a kyaare lɛ aŋ seŋ ka te taa gyeremɛ naŋ e kpoŋ a ko neɛ na Jehoova naŋ sɔ naaloŋ kãã na!

w12 4/15 10 wɛl. 8

Noba Iri Teroo E La Gyog-Faa Noba Naŋ Taa Te Saŋa Ŋaŋ!

⁸ A Baabole wulee noba mine meŋ naŋ da dire yelmennoŋ. Yɛ vɛŋ ka te manne ba bayi yɛlɛ a kyɛ lɛ nyɛ yɛlɛ teŋ na baŋ zanne yi ba zieŋ. Te na piiliŋ a manne dɔɔ na naŋ da di yelmennoŋ a ko Deevid na. Ona la Gyoonataŋ, Naa Sɔɔl bidɔɔ kpoŋ na. Gyoonataŋ da seŋ ka o di naaloŋ a kaara a Izerayɛl paaloŋ Sɔɔl kũũ puoreŋ, kyɛ yel bonyeni yoŋ la da pigoo sori. Jehoova da kaa iree Deevid ka o di naaloŋ a kaara a Izerayɛl paaloŋ Sɔɔl kũũ puoreŋ. Gyoonataŋ da ba iri zɔɔrɔ neŋ a yɛlɛ na Jehoova naŋ da sɛgre biŋ na. Nyuuri da ba vɛŋ ka Gyoonataŋ nyɛ Deevid ka o e la o dɔndɔma. Kyɛ, Gyoonataŋ “daaŋ nɔmooŋ aŋa o meŋɛ,” o da emooŋ noɔre ka o na diree yelmennoŋ a koroo. O gba da de la o bonsuurii, o zɔɔzɔɔsoɔ, o tammo ane o bɛlɛŋte a ko Deevid, a yɛlɛ ŋa oŋ da e ŋa wuleeŋ ka o de la a naaloŋ gyeremɛ zaa a korɔ Deevid. (1 Saa. 18:1-4) Gyoonataŋ da mɔɔ la o moɔbo zaa ka o ‘eŋ Deevid faŋa,’ saŋa kaŋa gba a da kyɛre fẽẽ lɛ ka Gyoonataŋ kɔŋ o nyɔvore Sɔɔl nuureŋ o naŋ da dire yelmennoŋ a korɔ Deevid zuŋ. Gyoonataŋ da yi la yelmennoŋ poɔŋ a yelko Deevid ka: “Ho na e la naa Izerayɛl poɔŋ, ka N tɔre ho eŋɛŋ bee a tuuro ho puoreŋ.” (1 Saa. 20:30-34; 23:16, 17) Azuŋ, a ba e seɛlee saŋa na Gyoonataŋ naŋ wa kpi na, ka Deevid da dire woore a kyɛ da sɛge laadimii bee kuore yieloŋ a wuli lɛ o naŋ nɔmoo seŋ.​—2 Saa. 1:17, 26.

Baabole Poɔ Yelsonne

it-1 369 wɛl. 2

Babie

Ka nobaŋ wa de noɔreyeni, a de ba teɛroŋ zaa eŋ yel bonyenaa kaŋa eŋɛŋ, a taa poboɔbo bonyeni meŋ, ba na toɔ̃ boɔlɛɛ ba menne ka ba e la “babiiri.” Aŋa mannoo poɔŋ, Taaya Naa Hairam da boɔlɛɛ Naa Soolomoŋ ka o babie. A ba wuli ka ba zaa naŋ da e namine na zuŋ la so oŋ da boɔloo ka o babie, kyɛ aminekaŋaŋ ba zaa naŋ da laŋ noɔre ka Naa Hairam na de la daare ane bontaaree a wa ko Soolomoŋ ka o mɛ a ŋmenpuoredie na zuŋ la so oŋ da boɔloo ka o babie. (1Nm 9:13; 5:1-12) Deevid da sɛgɛɛŋ ka: “Nyɛ aŋ e soŋ a e noɔŋ lɛ, ka babiiri laŋ kpeɛrɛ ane noɔreyeni!” Yɛlɛ na oŋ da sɛge na wuleeŋ ka a ba e ŋa noba naŋ laŋ saa ane ma bonyeni yoŋ la na baŋ taa noɔreyeni ane emmaaroŋ ba kpakyagaŋ aŋa babiiri. (Ym 133:1) Ka hooŋ gba teɛre a yɛlɛ soŋ, lɛ na Deevid ane Gyoonataŋ naŋ da taa nɔmmo ane noɔreyeni ba kpakyagaŋ la da vɛŋ ka Deevid da boɔle Gyoonataŋ ka o babie, kyɛ a ba e ka ba zaa naŋ da laŋ saa ane ma bonyeni zuŋ la. (2Sa 1:26) Zɔmenne gyogo naŋ yitaa ka ba yel-erre meŋ a yitaa, haali gba ka ba yel-erre naŋ e yelfaare kyɛ ba na baŋ boɔlɛɛ taa ka babiiri.​—Ye 18:9.

MAY 23-29

BAABOLE POƆ YELNIMIZEERE | 2 SAAMIUEL 4-6

“Zoro Jehoova A Ta Erɛ Yɛlɛ Naŋ Na Sãã O Poɔ”

w05 5/15 17 wɛl. 8

Yelnimizeere Naŋ Be A Yiiloŋ Saamiuel Gane Poɔ

6:1-7. Aneazaa ka Deevid da taaɛ poteɛre soŋ, kyɛ o da ba tu Naaŋmen bege na saŋa na oŋ vɛŋ ka nadɛɛ de a Nɔlaŋ Daga na, azuŋ ka toɔrɔ da wa o zuŋ lɛ. (Yiibu 25:13, 14; Soribu 4:15, 19; 7:7-9)[10] Uzza naŋ da zagre Naaŋmen bege kyɛ nyɔge a Daga saŋa na oŋ da lere na wuleeŋ ka, ka teneeŋ taa poteɛre soŋ gba, kyɛ lɛ ba ko te sori ka te zagre ka te tu Naaŋmen bege na oŋ biŋ na.

w05 2/1 27 wɛl. 20

Yelzaa Jehoova Naŋ E Maŋ Toriŋ

²⁰ Aseŋ ka te leɛteɛre ka Uzza da seŋ ka o baŋ yɛlɛ nimiri soŋ. A Nɔlaŋ Daga na da are ko la Jehoova nimitɔɔre. A Bege da wuleeŋ ka neɛzaa naŋ ba seŋ neŋ ba seŋ ka o de o nu seene a Nɔlaŋ Daga. A Bege da lɛ wuleeŋ peɛlaaŋ ka ka neɛzaaŋ e tokpeɛne kyɛ de o nu seene a Nɔlaŋ Daga, aseŋ ka ba ko o soba. (Soribu 4:18-20; 7:89) Azuŋ, a da e la yelnimizeɛ yaga ka ba de a Nɔlaŋ Daga a yi zie kaŋa gɛrɛ neŋ ziyuo kaŋa. Uzza da e la Liivai neɛ (kyɛ o da ba e ŋmenpuore wedeɛrɛ), azuŋ o da baŋɛɛ a Bege soŋ. Kyɛ lɛ yoŋ naane, yuomo yaga sɛre ka Deevid na ko noɔre ka ba de a Nɔlaŋ Daga waneŋ Gyɛruzɛlɛm na, a Nɔlaŋ Daga ŋa da be la Uzza saa yiriŋ oŋ kaara o zu. (1 Saamiuel 6:20–7:1) A Nɔlaŋ Daga ŋa da bebeŋ yuomo 70, azuŋ a yi o bibiiloŋ saŋa zaa, Uzza da baŋɛɛ Jehoova bege na oŋ biŋ a kyaare a Nɔlaŋ Daga na.

w05 2/1 27 wɛl. 21

Yelzaa Jehoova Naŋ E Maŋ Toriŋ

²¹ Aŋa lɛ te naŋ nyɛ a piilee saŋa na, Jehoova baŋɛɛ yɛlɛ naŋ be noba sukyieŋ. O Yelbiri a Baabole meŋ yeleeŋ ka, yɛlɛ na Uzza naŋ da e na da ba wuli “nanebo bee gyeremɛ.” Aminekaŋaŋ Jehoova da nyɛ la gyog-faa kaŋa Uzza sukyiriŋ kyɛ baŋ ba sɛgaa eŋ a Baabole poɔŋ. Ka lɛ Uzza zɛgemeŋɛ la da vɛŋ oŋ e yɛlɛ naŋ ba seŋ ka o e bee? (Yeng Yelibie 11:2) Kyɛbee a Nɔlaŋ Daga naŋ da be o saa yiriŋ baŋ kaara o zu na, ka saŋa na meŋ baŋ da de o gɛrɛ neŋ Gyɛruzɛlɛm oŋ de a noba zaa weɛ a tuuro a nadɛɛ puoreŋ na da vɛŋɛɛŋ oŋ erɛ pɔloo yaga zaa bee? (Yeng Yelibie 8:13) Ka lɛ Uzza da ba taa sagediibu ka ka a Nɔlaŋ Daga naŋ are ko Jehoova nimitɔɔre naŋ waana ka o le, Jehoova meŋɛ na baŋ nyɔgooŋ taa bee? Lɛ zaa naŋ la, te baŋɛɛŋ ka Jehoova da e la yɛlɛ naŋ tori. Aminekaŋaŋ o da nyɛɛ yelkaŋa Uzza sukyiriŋ, ka lɛ da vɛŋ Oŋ lonni a di o sɛrɛɛ lɛ.​—Yeng Yelibie 21:2.

Baabole Poɔ Yelsonne

w96 4/1 29 wɛl. 1

De Ho Toɔrɔ Zaa Dɔgle Jehoova Zuŋ Tegitegilɛ

Deevid naŋ da e a naa zuŋ, o meŋ nu da poɔ la a yɛlɛ ŋa eebo poɔŋ. Lɛ na Deevid naŋ da e o yɛlɛ na wuleeŋ ka, neɛ naŋ taa niiloŋ naŋ soma neŋ Jehoova na toɔ̃ eɛ o yɛlɛ sori naŋ ba seŋ neŋ poɔŋ saŋa na o naŋ tuore yelkpeɛŋaa kaŋa na. A piilee saŋa na, Deevid suuri da ireeŋ yaga. A puoreŋ, dabeɛ̃ da kpɛ oŋ yaga. (2 Saamiuel 6:8, 9) A da kyɛre fẽẽ ka o neŋ Jehoova niiloŋ na sãã. Saŋa na Deevid naŋ da ba tu Jehoova bege ka lɛ vɛŋ ka toɔrɔ wa o zuŋ na, a waa ŋa o da ba de o toɔrɔ na ko Jehoova. Ka lɛ a yɛlɛ ŋa taa na baŋ pɔgɛɛ te meŋ bee? Ka lɛ te daaŋ zagrɛɛŋ ka te tu Jehoova sowuli ka lɛ vɛŋ ka toɔrɔ wa te zuŋ, teŋ pãã leɛ piili paana Jehoova bee?​—Yeng Yelibie 19:3.

MAY 30–JUNE 5

BAABOLE POƆ YELNIMIZEERE | 2 SAAMIUEL 7-8

“Jehoova Da Eŋɛɛ Noɔre Ko Deevid”

w10 4/1 20 wɛl. 3

“Ho Naaloŋ Na Arɛɛ Kpeɛŋaa”

Jehoova poɔ zaaŋ da pɛle neŋ yɛlɛ na Deevid naŋ da yi o sukyiri poɔŋ a boɔrɔ ka o e na. Lɛ na Deevid naŋ da de o sukyiri zaa a puoro Jehoova ane lɛ a Baabole daŋyelbo naŋ wuli zuŋ na, Naaŋmen da eŋɛɛ noɔre a ko Deevid ka O na vɛmeŋ ka Deevid yaaŋaa kaŋa di o naaloŋ na kyɛŋ a gɛrɛ wagre naŋ ba taa baaraa. Neetaŋ da mannɛɛ Naaŋmen noɔre emmo ŋa yɛlɛ a ko Deevid, a yelkoo ka: “Ho deo ane ho naaloŋ meŋ na areŋ kpeɛŋaa a gɛrɛ wagre zaa ho nimitɔɔreŋ. Ho nakogo na na arɛɛ kpeɛŋaa a gɛrɛ wagre zaa.” (Wɛlbo 16) Nembuo la a Yaaŋaa ŋa naŋ na bebe tegitegilɛ a dire naaloŋ a gɛrɛ wagre naŋ ba taa baaroo na?​—Yieme 89:20, 29, 34-36.

w10 4/1 20 wɛl. 4

“Ho Naaloŋ Na Arɛɛ Kpeɛŋaa”

Yezu naŋ da e a Naazɛrɛ neɛ da e la Deevid yaaŋaa. Saŋa na a malki naŋ da manna lɛ Mareya naŋ na dɔge Yezu na, o da yelka: “A Daana Naaŋmen [Jehoova] na ko O la a O Sããkoma Deevid nakogi. O na di la naaloŋ a Gyekɔb boorɔ zu tegitegilɛ, ka a o naaloŋ koŋ taa baaroo.” (Luka 1:32, 33) Azuŋ, a noɔre emmo Jehoova naŋ da eŋ ko Deevid na da nyɛɛ eebo Yezu Krista eŋɛŋ. Lɛ wuleeŋ ka nensaaleba naaneŋ kaa iri Yezu ka o e Naa, kyɛ Naaŋmen la eŋ noɔre a ko Yezu sori ka o di naaloŋ a gɛrɛ wagre naŋ ba taa baaraa. Yɛ vɛŋ ka te leɛteɛre meŋ ka yelzaa Naaŋmen naŋ eŋ noɔre ka o na eŋ naaŋ nyɛɛ eeboo.​—Aizeeya 55:10, 11.

w14 10/15 10 wɛl. 14

Taa Sagediibu Naŋ E Kpeɛŋaa Yaga Zaa A Naaloŋ Eŋɛŋ

¹⁴ Hooŋ leɛ nyɛ noɔre na Jehoova naŋ da eŋ ko Naa Deevid naŋ da dire naaloŋ a kaara a takoreŋ saŋa Izerayɛl paaloŋ na. A noɔre emmo ŋa la baŋ boɔlɔ ka a Deevid nɔlaŋ na. (Kanne 2 Saamiuel 7:12, 16.) Saŋa na Deevid naŋ da be Gyɛruzɛlɛm a dire naaloŋ kaara a Izerayɛl paaloŋ na la ka Naaŋmen da eŋ a noɔre ŋa ko o. Jehoova da eŋɛɛ noɔre ko o ka a Mɛzaaya na e la o yaaŋaa. (Luka 1:30-33) Jehoova noɔre emmo ŋa da vɛŋɛɛŋ teŋ baŋ booree na poɔŋ a Mɛzaaya naŋ na yi, a kyɛ lɛ wuli te ka a Deevid yaaŋaa ŋa la “so” sori ka o zeŋ a Mɛzaaya Naaloŋ nakogi na zuŋ. (Izik. 21:25-27) A tuuro Yezu eŋɛŋ Deevid naaloŋ na “na arɛɛ kpeɛŋaa a gɛrɛ wagre zaa.” Yelmeŋɛ la, Deevid yaaŋaa ŋa “na areŋ a gɛrɛ wagre zaa. O nakogi na areŋ aŋa ŋmenaa.” (Yiem. 89:34-37) Ɛɛ, a Mɛzaaya naaloŋ ŋa daaŋ koŋ sãã zaa, maaloo na meŋ zaa a naaloŋ naŋ na waaneŋ na na bebeŋ tegitegilɛ!

Baabole Poɔ Yelsonne

it-2 206 wɛl. 2

Bebibaaree

Balaam Daŋyelbo. Sɛre ka a Izerayɛl biiri na gaa a Noɔre Emmo Teŋgane na, daŋyele Balaam da yelko la Mooab Naa Balake ka: “Wa N na yelko boŋ lɛ na a noba ŋa [a Izerayɛl biiri] naŋ na e a bebie bee bebibaaree naŋ waana poɔŋ. . . . Ŋmarbiri na yi la Gyekɔb eŋɛŋ, naaloŋ daŋgbale na iri yi la Izerayɛl poɔŋ. O na ŋmarɛɛ Mooab lomboe zaa, a nyuoŋ Seet bee zɔɔre bidɔbɔ na zaa.” (So 24:14-17) A daŋyelbo ŋa da piili nyɛrɛɛ eebo saŋa na Naa Deevid naŋ are ko a “ŋmarbiri” naŋ da zɔɔtoɔ̃ a Mooab noba na. (2Sa 8:2) A “bebie bee bebibaaree” da piileeŋ saŋa na Deevid naŋ da wa leɛ naa na, a saŋa ka a daŋyelbo da piili nyɛrɛ eebo. Deevid are ko la a Mɛzaaya Naa Yezu, a daŋyelbo ŋa na lɛ nyɛ la eebo saŋa na Yezu naŋ na wa zɔɔtoɔ̃ o dɔndɔnne zaa na.​—Ai 9:7; Ym 2:8, 9.

JUNE 6-12

BAABOLE POƆ YELNIMIZEERE | 2 SAAMIUEL 9-10

“Deevid Da Wulee Yelmeŋɛ Nɔmmo”

w06 6/15 14 wɛl. 6

Ho Na Baŋ Taaɛ Popeɛloŋ Meŋɛmeŋɛ

Deevid da sɛgɛɛŋ ka: “Neɛ baga bee teɛroŋ naŋ be nembaalba zieŋ taaɛ popɛle.” O da lɛ yeleeŋ ka: “Jehoova maŋ deɛ o la o toɔrɔ wagreŋ. Jehoova na kaarooŋ a vɛŋ ka o taa nyɔvore. O na nyɛ la pɛgre bee maaloo.” (Yieme 41:1, 2) Lɛ na Deevid naŋ da wuli nimibaaloŋ a ko o zɔmeŋɛ Gyoonataŋ bidɔɔ Mefiiboset naŋ da e gbɛree na, e la ewuli soŋ teŋ na baŋ tɔgle a meŋ maŋ wulo nimibaaloŋ korɔ nembaalba.​—2 Saamiuel 9:1-13.

w05 5/15 17 wɛl. 12

Yelnimizeere Naŋ Be A Yiiloŋ Saamiuel Gane Poɔ

9:1, 6, 7. Deevid da paalɛɛ noɔre na oŋ da eŋ na. Azuŋ, aseŋ ka te meŋ maŋ mɔɔ te moɔbo zaa ka te paale nɔɛ zaa te naŋ eŋ.

w02 2/15 14 wɛl. 10

Ba Da Toɔ̃ Arɛɛ Yelkpeɛne Na Zaa Baŋ Da Tuoro Na Noɔreŋ

¹⁰ Naa Deevid da taaɛ nɔmmo naŋ e kpoŋ a ko Gyoonataŋ, azuŋ yuomo yaga mine puoreŋ o da wulee nɔmmo a ko Mefiiboset. Deevid da de la Sɔɔl boma na zaa a ko Mefiiboset, a da kaa iri Sɔɔl tontona Ziiba ka o kaara Mefiiboset teŋgane na koroo. Deevid da yelko la Mefiiboset ka: ‘Ho na maŋ diree bondirii wagre zaa N tabule zuŋ.’ (2 Saamiuel 9:6-10) Nɔkpeɛne zaa kyebe ka nɔmmo na Deevid naŋ da wuli Mefiiboset na da dii la o sukyiri yaga zaa, a kyɛ da lɛ somoo oŋ taa sukyirimaaroŋ aneazaa ka o da e la gbɛree. Te na baŋ zannɛɛ yɛlɛ yaga a yi be! Te meŋ na baŋ wulee a nimibaaloŋ ŋa tɔ a ko noba naŋ tuoro yelkpeɛne yaga ba zemmo poɔŋ.

Baabole Poɔ Yelsonne

it-1 266

Teɛ̃ Koɔloŋ

A Izerayɛl biiri ane noba naŋ da be a donɛɛ Sapare seŋ na da maŋ de la teɛ̃ koɔloŋ tegroŋ yaga zaa. Bonso, a maŋ eɛ sieree naŋ wuli ka o soba ta la dɔɔ aŋ seŋ ka ba de emmo a koroo. Naaŋmen bege na da ba tere sori ka a Izerayɛl biiri maŋ kyɛ ba “teɛne lomboe,” ane koɔloŋ naŋ be ba tobo ane ba nimie kpakyagaŋ ane ba teɛ̃ koɔloŋ lomboe meŋ. (Lv 19:27; 21:5) Ananso la ka a koɔloŋ ŋa kyeɛbo da poɔ la noba mine bagmaale yɛlɛ poɔŋ.

JUNE 13-19

BAABOLE POƆ YELNIMIZEERE | 2 SAAMIUEL 11-12

“Ta Vɛŋ Ka Vɔlfaare Nyɛ Kpeɛ̃o Ho Zuŋ”

w21.06 17 wɛl. 10

Ho Na Toɔ̃ Faa La Ho Meŋɛ Yi Setaana Bɛrre Na Poɔŋ!

¹⁰ Bombɔ ganneŋ gyogo da vɛŋɛɛŋ ka Naa Deevid a inni boma na zaa Jehoova naŋ da ko o na yɛlɛ, a mine la bondaaloŋ, yo-tegroŋ ane lɛ oŋ toɔ̃ zɔɔtoɔ̃ o dɔndɔnne yaga zaa na. Deevid meŋɛ da yeleeŋ ka kyɔɔtaare na Naaŋmen naŋ ko o na eɛ “gyamaa ka [o] sɔre!” (Yiem. 40:5) Kyɛ a wa ta la saŋa kaŋa ka Deevid da inni boma na zaa Jehoova naŋ ko o na yɛlɛ. O nimiri da ba lɛ paale neŋ boma na oŋ da taa na, o da boɔrɛɛ mine poɔ. Aneazaa ka Deevid da taaɛ pɔgeba yaga, kyɛ o da vɛŋɛɛŋ ka vɔlfaare nyɛ kpeɛ̃o o zuŋ ka lɛ vɛŋ oŋ te boɔrɔ dɔɔ zaala kaŋa pɔge. A pɔge yuori da la Batisiiba, o serɛ da la Yuraiya a Hiit neɛ na. Bombɔ ganneŋ gyogo da vɛŋɛɛŋ ka Deevid gaŋ neŋ Batisiiba, ka lɛ vɛŋ oŋ taa poɔ. Deevid da saaŋɛɛ kultaa, aŋ da seŋ ka o bare lɛ na, Deevid gba da lɛ sɛgrɛɛ yɛlɛ a vɛŋ baŋ ko Yuraiya! (2 Saa. 11:2-15) Bo yɛlɛ ka Deevid da teɛrɛ? Ka lɛ o da teɛre ka Jehoova ba nyɛrɛ yɛlɛ na oŋ erɛ na bee? A dɔɔ ŋa naŋ da puoro Jehoova yelmennoŋ poɔ na da vɛŋɛɛŋ ka bombɔ ganneŋ gyogo vɛŋ oŋ e yɛlɛ naŋ ba soma, ka lɛ vɛŋ ka toɔrɔ naŋ e kpoŋ wa o zuŋ yaga. Kyɛ a popɛle yɛlɛ zie la ka wagre naŋ gɛrɛ poɔŋ na, Deevid da sage deɛ la o saammo na a leɛ o eebo. O eŋɛ zaaŋ da mãã saŋa na Jehoova naŋ da di suuri ko o na!​—2 Saa. 12:7-13.

w19.09 17 wɛl. 15

Bonso Aŋ Seŋ Ka Te Maŋ Lonni Wieoŋ A Sigri Te Menne A Ko Jehoova?​—Ka Sobuo Teŋ Na Baŋ Tu Kyɛ E Lɛ?

¹⁵ Jehoova da kaa iree Deevid ka o e o booree ane a Izerayɛl paaloŋ zaa zudaana. Deevid naŋ da e a naa na zuŋ, o daa taaɛ kpeɛ̃o yaga. Saŋa kaŋa o da ba maŋ de a lɛ kpeɛ̃o ŋa toŋ neŋ toma soŋ, ka lɛ vɛŋ oŋ ŋmɛ gbɛɛ naŋ e nimizeere yaga. (2 Saa. 11:14, 15) Kyɛ, ka o naŋ wa nyɛ dɛnnoo yi Jehoova zie, o maŋ yi la sigrimennoŋ poɔŋ a sage a dɛnnoo. O da yelee yelzaa naŋ be o sukyiri poɔŋ a ko Jehoova puoro poɔŋ. O da mɔɔrɛɛ o moɔbo zaa ka o de Jehoova kawane na tonɔ neŋ toma. (Yiem. 51:1-4) Deevid da sigree o meŋɛ yaga, azuŋ dɔbɔ yoŋ kawane naane oŋ da maŋ kyɛllɛ wono, kyɛ o da maŋ kyɛlle woŋ la pɔgeba meŋ kawane. (1 Saa. 19:11, 12; 25:32, 33) Deevid da zannɛɛ yelkaŋa a yi o gbɛ ŋmɛ na poɔŋ, o da puoree Jehoova o nyɔvore zemmo zaa poɔŋ.

w18.06 17 wɛl. 7

Vɛŋ Ka Naaŋmen Bege Ane O Sowuli Na Wulo Ho Zoma Na Sori

⁷ A popɛle yɛlɛ naŋ bebe la ka, a ba seŋ ka te sãã Naaŋmen bege na ka toɔrɔŋ pãã wa wa te zuŋ, ka te pãã zanne yɛŋ. Te na baŋ zannɛɛ yɛlɛ yi noba na naŋ da de gbɛ-faare baŋ sɛge ba yɛlɛ eŋ Naaŋmen Yelbiri na poɔŋ na zieŋ. Yeng Yelibie 1:5 yelka: “Sereŋ meŋɛ yɛŋbaŋna na woŋeŋ ka o bammo maaleŋ do, ka neɛ naŋ baŋ yɛlɛ muni taa yɛŋ kawane.” Yelmeŋɛ la, Naaŋmen yoŋ na baŋ ko te kawane naŋ soma yaga, ka teneeŋ wa kanna a Baabole a kyɛ maŋ teɛre noba na yɛlɛ ba naŋ sɛge eŋ a Baabole poɔ na yɛlɛ gaa tɔɔre, a na baŋ soŋ teŋ yaga. Aŋa mannoo poɔŋ, leɛteɛre nyɛ toɔrɔ na naŋ da wa Naa Deevid zuŋ saŋa na oŋ da e tokpeɛne a zagre Jehoova bege na, a kyɛ da gaŋ neŋ dɔɔ kaŋa pɔge baŋ boɔlɔ Batisiiba na. (2 Saa. 12:7-14) Ka hooŋ wa kanna a yɛlɛ ŋa a kyɛ leɛ zeŋ teɛrɛ a yɛlɛ ŋa na, ho na baŋ soorɛɛ ho meŋɛ ka: ‘Deevid naŋ da gaŋ neŋ dɔɔ kaŋa pɔge baŋ boɔlɔ Batisiiba na zuŋ la so ka a toɔrɔ ŋa zaa da wa o zuŋ, kyɛ wala ka Deevid da naŋ toɔ̃ e a tage o meŋɛ yi a toɔrɔ ŋa zaa poɔŋ? Ka maaŋ tuore a enyaabo ŋa tɔ, ka lɛ N na toɔ̃ taaɛ a faŋa ka N tage N meŋɛ a yi be bee? N na zo yi la be aŋa Gyoosef kyɛbee N na barɛɛ N meŋɛ aŋa Deevid?’ (Mun. 39:11-15) Ka teneeŋ leɛ zeŋ teɛre nyɛ toɔrɔ naŋ na wa te zuŋ saŋa na teŋ e yelfaa kaŋa na, a na toɔ̃ eŋɛɛ te sukyiri faŋa ka te “ha beu bee faaloŋ.”

Baabole Poɔ Yelsonne

it-1 590 wɛl. 1

Deevid

Jehoova da nyɛɛ yɛlɛ na zaa Deevid naŋ da e na, azuŋ, o da vɛŋɛɛŋ ka a yɛlɛ olo da yi. Jehoova da ba tere sori ka nensaaleba di a yɛlɛ sɛrɛɛ, ka lɛ naane ba da naŋ ko la Deevid ane Batisiiba aŋa lɛ a Moosis Bege naŋ wuli na. A bilɛɛ meŋ naŋ da be Batisiiba poɔ na meŋ da na kpiŋ. (Du 5:18; 22:22) Kyɛ, Jehoova meŋɛ la da di a yɛlɛ sɛrɛɛ, a Naaloŋ nɔlaŋ na zuŋ, o da wulee Deevid nembazo. (2Sa 7:11-16) Aminekaŋaŋ, Deevid meŋ naŋ da wuli o taaba nembazo zuŋ la so ka Naaŋmen meŋ da wuli o nembazo, (1Sa 24:4-7; de manne neŋ Gyi 2:13) ane meŋ Naaŋmen meŋɛ da nyɛɛŋ ka Deevid ane Batisiiba leɛ la ba eebo. (Ym 51:1-4) Kyɛ lɛ da ba wuli ka toɔrɔ zaa koŋ wa ba zuŋ. Jehoova da tu la daŋyele Neetaŋ zie a yelko Deevid ka: “Nyɛ, N na vɛmeŋ ka toɔrɔ kpoŋ yi ho meŋɛ deo wa ho eŋɛŋ.”​—2Sa 12:1-12.

JUNE 20-26

BAABOLE POƆ YELNIMIZEERE | 2 SAAMIUEL 13-14

“Aaminoŋ Naŋ Da Boɔrɔ O Meŋɛ Yoŋ Boma Na Da De La Toɔrɔ Waneŋ”

it-1 32

Aabisalom

O da ko la Aaminoŋ. Aabisalom yɔɔpɔge Teemar da veɛlɛŋ yaga zaa, azuŋ Aabisalom saa Deevid bidɔɔ kaŋa baŋ boɔlɔ Aaminoŋ da boɔrooŋ yaga zaa. Aaminoŋ da ŋmaɛ zirii ka o ba taa laafeɛ, a da tu nyaammo sori meŋ a sɛgre yɛlɛ a vɛŋ ka Teemar wa o deo a na wa maale bondirii ko o. Beŋ la ka Aaminoŋ da nyɔge Teemar a fere gaŋ ne o. A puoreŋ, nɔmmo na zaa Aaminoŋ naŋ taa ko Teemar na da wa leɛ la haabo, azuŋ o da karɛɛ Teemar ka o iri yi o deoŋ. Teemar da kyeɛre la o bonsuurii na a naa pɔgeyaare naŋ maŋ su a wuli ka ba ba baŋ dɔɔ na bare, a kyɛ lɛ de tampɛloŋ yaare o zu zaa. Beŋ la ka Teemar da te tuore Aabisalom. Aabisalom da piili soorooŋ a yɛlɛ, a kyɛ lɛ yelka o baŋɛɛŋ ka Aaminoŋ la e o a yɛlɛ ŋa. Lɛ na Aabisalom naŋ da yel na wuleeŋ ka saŋa zaa o da baŋɛɛŋ ka Aaminoŋ boɔrɛɛ o yɔɔpɔge na. Aabisalom da yelko la o yɔɔpɔge na ka o ta wa manna a yɛlɛ korɔ neɛzaa, a kyɛ leɛ de o gaaneŋ o deo oŋ te kpeɛrɛ beŋ.​—2Sa 13:1-20.

w17.09 5 wɛl. 11

Mɔɔrɔ Ka Ho Taa Meŋɛ Nyɔgebo Gyogo

¹¹ A Baabole wuli teŋ noba mine naŋ da ba taa meŋɛ nyɔgebo gyogo a kyaare gaŋ neŋ taa yɛlɛ aŋ e kpããmo a ko te. A Baabole lɛ wuli teŋ toɔrɔ naŋ na baŋ yi a poɔ wa ka teneeŋ ba taa meŋɛ nyɔgebo gyogo a kyaare gaŋ neŋ taa yɛlɛ. A somaŋ ka neɛzaa naŋ tuoro a yelkpeɛne na mine Kim naŋ da tuore na kanne a bipɔlee na naŋ kɔŋ yɛŋ baŋ sɛge o yɛlɛ eŋ Yeng Yelibie zuri 7 na. Leɛteɛre yɛlɛ na meŋ Aaminoŋ naŋ da e na, ane toɔrɔ naŋ da yi o eebo na poɔŋ wa. (2 Saa. 13:1, 2, 10-15, 28-32) Ka bidɔgrebaŋ kaa iri a Baabole ziiri ŋa teŋ manne a yɛlɛ na waneŋ ba booree zannoo poɔŋ ka ba neŋ ba biiri di dama a kyaaraa, a na toɔ̃ soŋ baŋ ka ba taa meŋɛ nyɔgebo ane yɛŋ a kyaare gaŋ neŋ taa yɛlɛ.

it-1 33 wɛl. 1

Aabisalom

Yuomo ayi puoreŋ, tigri kaŋa da taɛ la baŋ da ko peere yaga zaa. Aabisalom da maalɛɛ diibu kaŋa Beeal-heezor naŋ da be Gyɛruzɛlɛm Sapare sɛŋ, be neŋ Gyɛruzɛlɛm da e la tɔɔre aŋa kilometare 22. O da toŋboɔlɛɛ Deevid ane o bidɔbɔ na zaa. O saa Deevid da yeleeŋ ka o koŋ toɔ̃ gaa a diibu zie, kyɛ ka Aabisalom da feroo ka lɛ vɛŋ oŋ e ka o bidɔɔ fɔrɔ Aaminoŋ are o gbɛbɔgreŋ a gaa a diibu zie. (Ye 10:18) A diibu zieŋ, saŋa na Aaminoŋ naŋ da “nyu waiŋ bee dãã a bugi” na, Aabisalom da vɛŋɛɛŋ ka o tontonneba na ko Aaminoŋ. Beŋ la ka a naa bidɔbɔ na zaa naŋ kyɛre na da iri zo gaa Gyɛruzɛlɛm. Aabisalom neŋ o sããkoma naŋ e Siiriya neɛ na da zo bɔ la sɔglezie a Giisur noba paaloŋ poɔŋ, Giisur da be la a Galili Mane na Sapare sɛŋ. (2Sa 13:23-38) Pampana ŋa, a “zɔɔzɔɔsoɔ” na yɛlɛ daŋyele Neetaŋ naŋ da yel na da wa kpɛɛ Deevid “deo” poɔ. O na bebeŋ te ta saŋa na Deevid naŋ na kpi.​—2Sa 12:10.

Baabole Poɔ Yelsonne

g04 12/22 8-9

Veɛloŋ Na Yɛlɛ Naŋ Fɛre Yaga Zaa

Yɛ vɛŋ ka te manne Aabisalom yɛlɛ. O da e la Deevid bidɔbɔ na kaŋa. Aneazaa ka o da veɛlɛŋ yaga zaa kyɛ o da taaɛ gyog-faare yaga. A Baabole da yeleeŋ a kyaare Aabisalom ka: “Izerayɛl zaaŋ neɛzaa daaŋ kyebe baŋ pugiroo o veɛloŋ yɛlɛ aŋa Aabisalom. A piili o gbɛpoɔ a duoro o zusɔgɔ, ŋmɛnnoo zaa daaŋ kye o eŋɛŋ.” (2 Saamiuel 14:25) Kyɛ Aabisalom naŋ da boɔrɔ yuori zuŋ na, a da vɛŋɛɛŋ oŋ iri zɔɔrɔ neŋ o saa a boɔrɔ ka o deɛ a naaloŋ yi o nuureŋ. O gba da gaŋ neŋ la o saa sɛneba na zaa. Yɛlɛ na Aabisalom naŋ da e na da vɛŋɛɛŋ ka Jehoova suuri iri yaga zaa, a baaraa zaa o da kpi la kũũ naŋ e kũũ faa yaga.​—2 Saamiuel 15:10-14; 16:13-22; 17:14; 18:9, 15.

Ka lɛ ho boɔrɔŋ ka Aabisalom e ho zɔmeŋɛ? Ai. Yɛlɛ naŋ bebe la ka, o gyog-faare na da vɛŋɛɛŋ ka noba ba boɔrɔ ka o e ba zɔmeŋɛ. Aneazaa ka o da veɛlɛŋ yaga zaa, kyɛ o zɛgemeŋɛ ane oŋ da ba e yelmeŋɛ soba na da vɛŋɛɛŋ ka saammo wa o zuŋ. A Baabole wulee noba naŋ da taa yɛŋ yaga ane gyog-sonne meŋ, kyɛ a Baabole ba yel yelzaa a kyaare lɛ baŋ da veɛlɛ seŋ. Lɛ wuleeŋ ka ba gyog-sonne na baŋ da taa na yɛlɛŋ da fɛre yaga kyɛ ba veɛloŋ naane.

JUNE 27–JULY 3

BAABOLE POƆ YELNIMIZEERE | 2 SAAMIUEL 15-17

“Zɛgemeŋɛ Da Vɛŋɛɛŋ Ka Aabisalom Iri Zɔɔrɔ Neŋ O Saa”

it-1 860

Neɛ Naŋ Da Maŋ De A Naa Weɛ A Te Maale O Sori

Takoreŋ saŋa na a yi a donɛɛ Sapare sɛŋ na, sɛre ka naa na gaa zie kaŋa na, o maŋ daŋ iree noba baŋ de weɛ a maale o sori na a kyɛ lɛ moɔle ko noba ka a naa be la soriŋ a waana, a lɛ sɛgre boma zaa a naa naŋ boɔrɔ biŋ sɛre kyɛ ka o bomgbaga bee toriko na wa. (1Sa 8:11) Aabisalom ane Adonaigya naŋ da boɔrɔ ka ba tɔgle a yɛlɛ ŋa na, a boɔrɔ ka noba baŋ ka ba e la neŋtegrɛ yaga te gaali na, a kyɛ lɛ vɛŋ ka noba baŋ ka ba iri zɔɔrɔ neŋ la a naa na zuŋ, ba da vɛŋɛɛŋ ka noba naŋ ta lezaayi neŋ pie a de weɛ a zoro ba bomgbagre bee torikori na nimitɔɔreŋ.​—2Sa 15:1; 1Nm 1:5; kanne ZOZOREBA.

w12 7/15 13 wɛl. 5

Tonɔ Korɔ A Son-Meŋɛ Naaŋmen Na

⁵ A Baabole wuli teŋ noba mine naŋ da maŋ bɛnle noba baŋ e yɛlɛ naŋ ba seŋ neŋ. Ba kaŋa la Naa Deevid bidɔɔ Aabisalom. Aabisalom da e la dɔɔ naŋ veɛlɛ yaga zaa. Kyɛ aŋa lɛ Setaana naŋ da e na, o meŋ da vɛŋɛɛŋ ka bombɔ-gaŋne yɛlɛ da paale o sukyiri zaa. Lɛ da vɛŋɛɛŋ oŋ piili boɔrɔ ka o deɛ a naaloŋ yi o saa nuureŋ, kyɛ o da ba seŋ neŋ ka o di o saa naaloŋ na. Oŋ da boɔrɔ ka o tu nyaammo sori a deɛ a naaloŋ so na zuŋ, o da leɛ erɛɛ o yɛlɛ aŋa a Izerayɛl noba yɛlɛ naŋ fɛroo yaga zaa, a kyɛ leɛ tu a lɛ sori na poɔŋ a lɛ wulo ka a naa neŋ o noba na ba taa a noba yɛlɛ. Ɛɛ, aŋa lɛ a Dɛɛvul naŋ da e a Eedin gaadin poɔŋ na, Aabisalom meŋ da erɛɛ o yɛlɛ aŋa o naŋ waa neŋsoŋ kaŋa, kyɛ da baŋ perɛ a dɛgrɛ o saa yuori.​—2 Saa. 15:1-5.

it-1 1083-1084

Hiibiroŋ

Yuomo mine puoreŋ, Deevid bidɔɔ Aabisalom da leɛ waɛ Hiibiroŋ. Beŋ oŋ da piili sɛgre lɛ oŋ na e a deɛ a naaloŋ yi o saa nuureŋ, kyɛ o da ba toɔ̃ e lɛ. (2Sa 15:7-10) Aminekaŋaŋ, Hiibiroŋ naŋ da e teŋɛ naŋ de yuori, a da e a Gyuuda paaloŋ teŋkpɛŋ kaŋa takoreŋ saŋa naŋ pare zuŋ la so ka Aabisalom da kaa iri be. Ane meŋ, oŋ da yi Hiibiroŋ zuŋ la so oŋ da gaa be a te sɛgrɛ lɛ oŋ na e kyɛ deɛ a naaloŋ yi o saa nuureŋ. A puoreŋ, Deevid yaaŋaa baŋ boɔlɔ Naa Rihobooam da leɛ mɛ la Hiibiroŋ. (2Tu 11:5-10) A lɛ puoreŋ na a Baabilɔŋ noba da wa saaŋɛɛ Gyuuda zaa oŋ leɛ dabore, kyɛ saŋa na a Gyuumine naŋ da yi Baabilɔŋ gbaŋgbaaloŋ poɔ wa na, ba mine da te kpeɛrɛɛ Hiibiroŋ (o na baŋ da boɔlɔ Kiiriyataaba).​—Ni 11:25.

Baabole Poɔ Yelsonne

w18.08 6 wɛl. 11

Ho Baŋɛɛ A Yɛlɛ Yelmeŋɛ Zaa?

¹¹ Ka noba mineŋ ba yel yɛlɛ ka a ta, bee a tere duoro mine naŋ ba paale a kyaare te a ko noba mine, a na baŋ vɛmeŋ ka te tuore daŋkyagre. Yɛ vɛŋ ka te de Naa Deevid ane Mefiiboset yɛlɛ na wuli a yɛlɛ ŋa muni soŋ. Deevid da ko la Mefiiboset bontaree yaga a kyɛ wuli o nimimaaroŋ meŋ. O da de la Mefiiboset sããkoma teŋgane na ko Mefiiboset. (2 Saa. 9:6, 7) A puoreŋ, noba mine da wa yelee yelfaare a kyaare Mefiiboset a ko Deevid. Deevid da deɛ la Mefiiboset boma na zaa yi o nuureŋ saŋa na gba oŋ da ba peɛre a na nyɛ ka a yɛlɛ e la yelmeŋɛ bee. (2 Saa. 16:1-4) A puoreŋ, saŋa na Deevid neŋ Mefiiboset naŋ da di dama kyaare a yɛlɛ na, o da wa nyɛɛŋ ka lɛ na oŋ e na ba soma, azuŋ o da leɛrɛɛ a boma zaa ko Mefiiboset. (2 Saa. 19:24-29) Kyɛ ka o naŋ da mãã o meŋɛ a ba lonni de gbɛre a kyaare yelfaare na oŋ woŋ a kyaare Mefiiboset na, aminekaŋaŋ o da koŋ e Mefiiboset a yelfaa ŋa.