Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2024 Watch Tower Bible and Tract Society of Pennsylvania
MARCH 3-9
BAABOLE POƆ YELNIMIZEERE YENG YELIBIE 3
De Ho Yel-Eree Wuli Ka Ho Dɛlɛɛ Jehoova
ijwbv yelzu 14 wɛl. 4-5
Yeng Yelibie 3:5, 6—“Ta Dɛle Ho Meŋɛ Yɛlɛ Bammo”
“Dɛle Jehoova neŋ ho sukyiri zaa.” Ka teneeŋ maŋ moɔrɔ ka te erɛ yɛlɛ Naaŋmen naŋ boɔrɔ wagre zaa, lɛ wuleeŋ ka te dɛlooŋ. Aseŋ ka te de te sukyie zaa dɛle Naaŋmen kpɛlɛŋkpɛlɛŋ. A Baabole poɔŋ, a yelbiri sukyiri maŋ are ko la neɛ na te naŋ waa meŋɛmeŋɛ. A na baŋ wulee o soba teɛrɛ, o gyogo, yɛlɛ oŋ de biŋ o nimitɔɔreŋ, ane poteɛrɛ na oŋ maŋ de erɛ neŋ yɛlɛ. Ka a naŋ be te sukyie poɔŋ ka te dɛle Naaŋmen a somaŋ, kyɛ aseŋ ka te de te yel-eree meŋ wuli ka te dɛlɛɛ Naaŋmen. Te menne la maŋ de ana gbɛre na, bonso, te taaɛ sagediibu ka Naaŋmen baŋɛɛ yɛlɛ naŋ soma ko te.—Urom 12:1.
“Ta dɛle ho meŋɛ yɛlɛ bammo.” Aseŋ ka te dɛle Naaŋmen bonso, a ba soma ka te dɛle te menne teɛrɛ naŋ ba pɛgeyi na. Ka teneeŋ dɛle te menne, kyɛbee a vɛŋ ka te poteɛrɛ wulo te yɛlɛ naŋ seŋ ka te erɛ te zemmo poɔŋ, te na de la gbɛɛ naŋ waa ŋa gbɛ-sonne, kyɛ a baaraa zaa toɔrɔ naŋ e kpoŋ na baŋ wa la te zuŋ. (Yeng Yelibie 14:12; Jeremaiya 17:9) Naaŋmen yɛŋ na eɛ zuluŋ yaga zaa a gaŋ yɛŋ na teŋ taa na. (Aizeeya 55:8, 9) Ka teneeŋ maŋ vɛŋ ka a yɛlɛ ŋa be te teɛroŋ poɔŋ wagre zaa, a na vɛŋeŋ ka te taa zemmo naŋ soma.—Yieme 1:1-3; Yeng Yelibie 2:6-9; 16:20.
ijwbv yelzu 14 wɛl. 6-7
Yeng Yelibie 3:5, 6—“Ta Dɛle Ho Meŋɛ Yɛlɛ Bammo”
“De o poɔ ho yel-eree zaa poɔŋ.” Ka teneeŋ waana ka te de gbɛre kaŋa naŋ e nimizeɛ, kyɛbee a e yelnimizeɛ kaŋa, aseŋ ka te maŋ bɔ teɛroŋ na Jehoova naŋ taa kyaare a yɛlɛ. Te na toɔ̃ eɛ lɛ ka teneeŋ maŋ puore sɔroo ka o soŋ te, a maŋ lɛ de sowuli naŋ be o Yelbiri a Baabole poɔŋ meŋ tonɔ neŋ toma.—Yieme 25:4; 2 Timoti 3:16, 17.
“O na vɛmeŋ ka ho soe zaa tori.” Naaŋmen maŋ sonnɔ teŋ teŋ derɛ o sontuubu bege na tonɔ neŋ toma. A sori ŋa poɔŋ oŋ maŋ tu a vɛŋ ka te soe zaa tori. (Yeng Yelibie 11:5) Lɛ maŋ soŋ teŋ teŋ tage te menne yi yɛlɛ naŋ ba seŋ neŋ poɔŋ, ka lɛ vɛŋ teŋ taa zeŋ laafeɛ.—Yieme 19:7, 8; Aizeeya 48:17, 18.
be 76 wɛl. 4
Moɔrɔ Ho Moɔbo Zaa A Nyɛrɛ Nimitɔɔre Gaabo
Ka neɛŋ wa tuore yɛlɛ mine gbɛɛ yaga o zemmo poɔŋ, a na baŋ eɛ mɔlɔ koo ka o teɛre ka: ‘N daaŋ tuoree a yɛlɛ ŋa taa saŋa kaŋa naŋ pare. Azuŋ, N baŋɛɛ yɛlɛ naŋ seŋ ka N e.’ Ka neɛŋ teɛrɛ lɛ a wuleeŋ ka o soba taaɛ yɛŋ naŋ e zuluŋ bee? Yeng Yelibie 3:7 kpãã teŋ ka: “Ta e yɛmbaŋna ho meŋɛ nimieŋ.” Ka teneeŋ tuore yɛlɛ yaga te zemmo poɔŋ, a na baŋ soŋ teŋ ka te maŋ gyieli yɛlɛ gaa tɔɔre sɛre kyɛ derɛ gbɛɛ te zemmo poɔŋ. Kyɛ, ka teneeŋ boɔrɔ ka te nyɛrɛ nimitɔɔre gaabo Jehoova puoruu poɔŋ, aseŋ ka te maŋ leɛteɛre ka, ka Jehoova maaloo naane, yɛlɛ bammo zaa kyebe a na toɔ̃ vɛŋ ka te yɛlɛ nyɛrɛ nimitɔɔre gaabo. Azuŋ, ka teneeŋ wa tuore yɛlɛ mine te zemmo poɔŋ, a ba seŋ ka te de te yɛlɛ bammo toŋ neŋ toma, kyɛ aseŋ ka te leɛ gaa Jehoova zie a te bɔ sowuli, lɛ yoŋ la na vɛŋ ka te yɛlɛ nyɛrɛ nimitɔɔre gaabo. Ka teneeŋ dɛle te sazu Saa na kpɛlɛŋkpɛlɛŋ, a lɛ taa nɔmmo naŋ e zuluŋ koo, a na vɛŋeŋ ka te sagedi ka o na baŋ soŋ teŋ ka te e yelzaa te zemmo poɔŋ.
Baabole Poɔ Yelsonne
w06 9/15 17 wɛl. 7
Yelnimizeere Naŋ Be A Yeng Yelibie Gane Poɔŋ
3:3. Aseŋ ka te de yelmeŋɛ nɔmmo ane yelmennoŋ tegroŋ yaga zaa te zemmo poɔŋ. Aseŋ ka te wulo a gyogri ŋa te yel-eree zaa poɔŋ. Lɛ eebo na wuliŋ ka te de la a gyogri ŋa le te kɔkɔɛŋ. Aseŋ ka te ŋmaa a gyogri ŋa eŋ te sukyieŋ, lɛ wuleeŋ ka aseŋ ka te de a gyogri ŋa su pɔge te menne, ka a leɛ te gyogo meŋɛmeŋɛ.
MARCH 10-16
BAABOLE POƆ YELNIMIZEERE YENG YELIBIE 4
“Go Ho Sukyiri”
w19.01 15 wɛl. 4
Wala Teŋ Na Toɔ̃ E A Go Te Sukyie?
4 A yelbiri “sukyiri” be la yɛlɛ naŋ be Yeng Yelibie 4:23 poɔŋ. Sukyiri wulee lɛ na “neɛ naŋ waa meŋɛmeŋɛ o poɔŋ” kyɛbee “a nensaal-sɔglaa” na. (Kanne Yieme 51:6.) A yelbiri “sukyiri” na baŋ lɛ wulee yɛlɛ teŋ maŋ teɛrɛ te zuŋ, te poteɛrɛ, ane te yelboɔree. Sukyiri ba e lɛ na teŋ waa yeŋeŋ ka noba baŋ na, kyɛ lɛ na teŋ waa meŋɛmeŋɛŋ te poɔŋ la te sukyiri.
w19.01 17 wɛl. 10-11
Wala Teŋ Na Toɔ̃ E A Go Te Sukyie?
10 Ka teneeŋ boɔrɔ ka te go te sukyie, aseŋ ka te baŋ yɛlɛ na mine naŋ na baŋ sãã te sukyie, a lɛ moɔ a tage te menne yi a eŋɛŋ wieoŋ. A yelbiri na ba naŋ de toŋ neŋ toma Yeng Yelibie 4:23 ka “go” na, leɛteɛre teŋ toma na kaakaareba naŋ maŋ tonɔ na. Naa Soolomoŋ saŋa na, kaakaareba da maŋ arɛɛ a teŋkpɛŋ daŋkyime zuŋ a kaara zie zaa. Ka ba naŋ wa nyɛ yelfaa kaŋa naŋ waana ka o e, ba da maŋ ŋmɛɛ kpɛlle ka a teŋkpɛŋ noba baŋ. A yɛlɛ ŋa vɛŋɛɛŋ teŋ baŋ yɛlɛ na aŋ seŋ ka te erɛ, ka lɛ vɛŋ ka Setaana ta wa sããna te teɛroŋ.
11 Takoreŋ saŋa na, kaakaareba neŋ denɔkaareba zaaŋ da maŋ laŋ tonɔ toma. (2 Saa. 18:24-26) Ba zaa da maŋ moɔŋ a pɔge a teŋkpɛŋ denoɔre saŋa na baŋ nyɛ ba dɔndɔma kaŋa naŋ tagra peɛle a teŋkpɛŋ na. (Niih. 7:1-3) Te zaa taaɛ zoma naŋ maŋ soŋ te teŋ de Baabole poɔ yɛlɛ tonɔ neŋ toma. A zoma ŋa na baŋ kpãã teŋ ka te go te menne saŋa na Setaana naŋ wa boɔrɔ ka o sãã te sukyie na. Te zoma na na baŋ soŋ teŋ ka te tage te menne yi yelzaa Setaana naŋ boɔrɔ ka o de sãã te teɛrɛ, poteɛrɛ, a lɛ tage te menne yi vɔlfaare zaa eŋɛŋ meŋ. Ka te zomaŋ wa kpããna te ka yelkaŋa eɛ yelfaa, aseŋ ka te kyɛlle woŋ, a e yɛlɛ naŋ wuli ka te go la te sukyie.
w19.01 18 wɛl. 14
Wala Teŋ Na Toɔ̃ E A Go Te Sukyie?
14 Ka teneeŋ boɔrɔ ka te go te sukyie, aseŋ ka te pɔge te sukyie ka yelfaa zaa ta kpɛ be. Kyɛ, a lɛ eɛ nimizeɛ ka te yuo te sukyie ka yelsonne meŋ kpɛ. Te lɛ de a teŋkpɛŋ na baŋ mɛ daŋkyiŋ gyeere na manne neŋ a yɛlɛ ŋa. Ka a denɔkaaraŋ wa nyɛ neŋfaa naŋ te waana, o maŋ pɔgɛɛ a denoɔre, kyɛ saŋa kaŋa aseŋ ka o yuo a denoɔre ka ba de bondirii ane bontaree mine kpɛ neŋ a teŋɛ poɔ. Ka ba naŋ daaŋ ba yuo a denɔɛ zaa, kɔŋ na ko la a teŋkpɛŋ noba zaa. Lɛ neŋ o zu la, aseŋ ka te yuo te sukyie wagre zaa ka Naaŋmen teɛrɛ toɔ̃ kpɛ be.
w12 5/1 32 wɛl. 2
“Go Ho Sukyiri!”
Bonso aŋ seŋ ka te go te sukyie? Naaŋmen da soŋɛɛ Naa Soolomoŋ oŋ sɛge ka: “Go ho sukyiri neŋ nimizeɛ zaa, bonso o eŋɛŋ ka nyɔvore yeltaree yire.” (Yeng Yelibie 4:23) Yɛlɛ naŋ be te sukyiri poɔŋ la na wuli lɛ te zemmo naŋ na waa pampana. Yɛlɛ naŋ be te sukyiriŋ la na wuli ka te na nyɛɛ nyɔvore naŋ ba taa baaraa, kyɛbee ka te koŋ nyɛ nyɔvore. Ananso la wala? Ananso la ka, Naaŋmen baŋɛɛ yɛlɛ naŋ be te sukyieŋ. (1 Saamiuel 16:7) “A sukyiri poɔ nensaal-sɔglaa na” la neɛ na te naŋ waa meŋɛmeŋɛ. Yɛlɛ naŋ be te sukyie poɔŋ la ka Naaŋmen maŋ kaa ka lɛ vɛŋ o nɔŋ te yɛlɛ, kyɛbee a kyiire te.—1 Piita 3:4.
Baabole Poɔ Yelsonne
w21.08 8 wɛl. 4
Ho Eɛ Siri Ka Ho Kyɛnlɛ Jehoova Bee?
4 Yeng Yelibie 4:18 yeleeŋ ka, “sontuuribo sori waa ŋa kyaanee naŋ kyaana beguo saŋa, a kyaanee maŋ kyaanaŋ fẽẽfẽẽ lɛ a te ta saŋa na ŋmenaa naŋ wa puri.” A sɛgre ŋa wulee sori na Jehoova naŋ maŋ tu a wulo o puorebiiri o poboɔbo yɛlɛ. O maŋ wulo baŋ fẽẽfẽe fẽẽfẽẽ. Kyɛ, a sɛgre ŋa na baŋ lɛ wulee lɛ na Kristabie naŋ maŋ nyɛrɛ nimitɔɔre gaabo, ka lɛ vɛŋ ka o soba neŋ Jehoova niiloŋ wa e kpeɛŋaa. Neɛzaa koŋ baŋ page o meŋɛ a yɛlɛ ŋa poɔŋ. A maŋ de la wagre kyɛ ka lɛ na toɔ̃ nyɛ eebo. Ka teneeŋ moɔ̃ niŋe a maŋ de kawane na teŋ nyɛrɛ yire Naaŋmen Yelbiri, ane o lantaapuoruu na poɔŋ tonɔ neŋ toma, a na sonnɔ teŋ fẽẽfẽẽ ka te wa taa a Krista gyogo na. Te na wa baŋɛɛ Naaŋmen meŋ soŋ. Te nyɛ yelmannaa kaŋa Yezu naŋ da de wuli a yɛlɛ ŋa muni.
MARCH 17-23
BAABOLE POƆ YELNIMIZEERE YENG YELIBIE 5
Tage Ho Meŋɛ Yi Peɛ̃mo Toma Poɔŋ Kpɛlɛŋkpɛlɛŋ
w00 7/15 29 wɛl. 1
Ho Na Baŋ Eɛ Forifori A Yi A Donɛɛ Ŋa Naŋ Paale Neŋ Peɛ̃mo Toma Na Poɔŋ
A yɛŋ yelbie gane zie ŋa boɔlɛɛ a pɔg-gyɛnterɛ ka “pɔg-saana.” Yelbie na oŋ de bɛnle neŋ a dɔɔ na nomaŋ aŋa segane, a lɛ e baaloo aŋa ɔlif kãã. Lɛ naane ka peɛ̃mo toma kpoŋ zie zaa maŋ piili bee? Aŋa mannoo poɔŋ, te de te yɔɔpɔg-veɛlaa kaŋa baŋ boɔlɔ Amy naŋ nyɛ yuomo 27 zemmo yɛlɛ wuli a yɛlɛ ŋa muni. O yeleeŋ ka: “Dɔɔ kaŋa da be la N tomazieŋ, o da maŋ teɛrɛɛ N yɛlɛ wagre zaa, ka o naŋ wa nyɛ vuo meŋ, o maŋ pugiro maŋ. Ka neɛŋ wa boɔrɔ ho yɛlɛ lɛ, a maŋ noma koro boŋ yaga. Kyɛ, N da nyɛɛŋ peɛlaaŋ ka gaŋneŋ taa yɛlɛ zuŋ oŋ da boɔrɔ N yɛlɛ yaga zaa lɛ. N da ba tere sori meŋ oŋ nyɛ bon na oŋ boɔrɔ na.” Ka dɔɔŋ wa boɔrɔ pɔge, kyɛbee ka pɔgeŋ wa boɔrɔ dɔɔ, ba maŋ yelee yɛlɛ naŋ noma korɔ o soba. Kyɛ, aseŋ ka te baŋ bon na o soba naŋ sereŋ boɔrɔ. Ka teneeŋ na toɔ̃ e lɛ, aseŋ ka te maŋ teɛre yɛlɛ gaa tɔɔre.
w00 7/15 29 wɛl. 2
Ho Na Baŋ Eɛ Forifori A Yi A Donɛɛ Ŋa Naŋ Paale Neŋ Peɛ̃mo Toma Na Poɔŋ
Yɛlɛ naŋ maŋ yi peɛ̃mo toma poɔŋ a wa na maŋ eɛ tuo aŋa tĩĩ-tuo. A maŋ lɛ de la toɔrɔ waneŋ neɛ zuŋ aŋa ba naŋ de zɔɔzɔɔsoɔ a kyɔgi neŋ o soba. A maŋ de la sukyiri kyɛre neŋ kũũ waneŋ. Te zoma na baŋ dɔɔnɔ teŋ, ka a pɔge taa poɔ saŋa na oŋ ba boɔrɔ poɔ taabo. Te na baŋ nyɛɛ baaloŋ faare yi peɛ̃mo toma meŋ poɔŋ. Nyɛ lɛ na aŋ maŋ kyɛrɛ sukyiri aseŋ, saŋa na kultaa deme naŋ wa baŋ ka o kultatɔ na yi la o puoriŋ a te toŋ peɛ̃mo toma. Ka a kultaa deme kaŋa toŋ peɛ̃mo toma dayeni gba, kyɛ a na baŋ ŋmaaɛ feli o tɔsoba na sukyiriŋ a te ta saŋa na oŋ na kpi. Yelmeŋɛ zaa, sããmmo yoŋ ka peɛ̃mo toma maŋ de waneŋ.
w00 7/15 29 wɛl. 5
Ho Na Baŋ Eɛ Forifori A Yi A Donɛɛ Ŋa Naŋ Paale Neŋ Peɛ̃mo Toma Na Poɔŋ
Aseŋ ka te tage te menne kpɛlɛŋkpɛlɛŋ a yi noba naŋ boɔrɔ ka ba bɛnle te ka te toŋ peɛ̃mo toma zieŋ. A ba seŋ ka te tere sori ka ba bɛnle te a tuuro sɛŋsɛŋ yiele eŋɛŋ, nimipɛle yɛlɛ naŋ taa peɛ̃mo toma a poɔŋ, kyɛbee a kaara sɛŋsɛŋ fotori neŋ vidiori. (Yeng Yelibie 6:27; 1 Korinti 15:33; Efesu 5:3-5) Ho ba nyɛ ka a koŋ soma ka te erɛ te yɛlɛ aŋa te naŋ boɔrɔ neɛ kaŋa, saŋa na teŋ ba boɔroo meŋɛmeŋɛ bee? Lɛ neŋ o zu la aŋ ba seŋ ka te maŋ su boma naŋ iri te eŋgama ziiri mine meŋ bare.—1 Timoti 4:8; 1 Piita 3:3, 4.
Baabole Poɔ Yelsonne
Bo Ka A Baabole Yel Kyaare Gaŋneŋ Taa Yɛlɛ?
Gaŋneŋ taa eɛ kyɔɔtaa Jehoova naŋ de ko dɔɔ neŋ pɔge naŋ kultaa. O ko baŋ a kyɔɔtaa ŋa ka lɛ na vɛŋ ka ba taa popeɛloŋ. Gaŋneŋ taa maŋ soŋɛɛ dɔɔ neŋ pɔge baŋ dɔge biiri, kyɛ lɛ yoŋ naane, gaŋneŋ taa eɛ sori kaŋa dɔɔ neŋ pɔge naŋ maŋ tu kyɛ wulo taa nɔmmo sori naŋ seŋ neŋ poɔŋ. A lɛ zuŋ ka Naaŋmen Yelbiri na yelka: “Nyagina neŋ ho baapaaloŋ saŋa pɔge.” (Yeng Yelibie 5:18, 19) Jehoova boɔrɔŋ ka Kristabie zaa e yelmeŋɛ soba ko o kultatɔ, Jehoova ba boɔrɔ ka kultaa deme tonɔ moɔrɔ toma, bee peɛ̃mo toma.—Kanne Hiburu 13:4.
MARCH 24-30
BAABOLE POƆ YELNIMIZEERE YENG YELIBIE 6
Bo Yɛlɛ Teŋ Na Baŋ Zanne Yi Nyire Zieŋ?
it-1 115 wɛl. 1-2
Nyire
‘A Maŋ Erɛɛ A Yɛlɛ Neŋ Yɛŋ.’ Jehoova maalɛɛ nyire aŋ maŋ erɛ yɛŋ yɛlɛ. Kyɛ, lɛ ba wuli ka nyire maŋ teɛrɛɛ yɛlɛ gaa tɔɔre ka lɛ vɛŋ aŋ erɛ a yɛlɛ neŋ yɛŋ. Nyire ba taa ana teɛroŋ zuluŋ na. Kyɛ, Jehoova la maalaa aŋ maŋ toɔ̃ erɛ a yɛlɛ neŋ yɛŋ. A Baabole yeleeŋ ka nyire ‘maŋ bɔ la a bondirii seɛ̃ saŋa, a maŋ lagre a bondirii boma kyeɛbo saŋa.’ (Ye 6:8) Nyire boorɔ na kaŋa naŋ be Palisitaŋ teŋɛŋ yaga zaa la nyire naŋ maŋ be weɛŋ na, (Science noba maŋ boɔlaaŋ ka Messor semirufus). Ka wagre mineŋ wa ta a maŋ lagrɛɛ bondirii a biŋ, ka a naŋ pãã wa ta saŋa kaŋa ka bondirii yɛlɛ e kpeɛŋaa, a maŋ leɛ diree a bondirii na aŋ lagre biŋ na. Ziiri na baŋ maŋ ŋmeɛrɛ kyi la ka a nyire ŋa maŋ be, bonso, bonbie maŋ bebeŋ yaga zaa. Ka saaŋ wa mi eŋ a bonbie ka a uli, a nyire maŋ de aŋ te deɛle ŋmenaa poɔŋ aŋ ko. Noba mine yeleeŋ ka ba peɛre nyɛɛŋ ka, nyire maŋ duŋ la a bonbie zie naŋ maŋ vɛŋ aŋ toɔ̃ buli na bare, ka lɛ vɛŋ ka a bonbie ta wa bulo. A maŋ eɛ mɔlɔ ka neɛ baŋ ziiri na a nyire ŋa naŋ be, bonso, a maŋ maalɛɛ sori naŋ gɛrɛ a bɔgi, a maŋ lɛ de a bonbi-pɛgre meŋ wa lɔɔ a bɔgi noɔreŋ.
Te Na Baŋ Zannɛɛ Yɛlɛ Yi A Yel-Eree Poɔŋ. Ka neɛŋ peɛre nyire yɛlɛ gaa tɔɔre, o na wa nyɛŋ ka yɛlɛ na a Baabole naŋ yeli na seŋ nɛɛŋ. A Baabole yelka: ‘Gaa nyire zie, hooŋ eŋtuo soba. Teɛre o yel-eree yɛlɛ gaa tɔɔre a baŋ yɛŋ.’ (Ye 6:6) Nyire maŋ toɔ̃ narɛɛ a nendaare kaŋa yɛlɛ biŋ, a maŋ lɛ tonɔ tonkpeɛne meŋ a ba bala. A maŋ toɔ̃ de la boma naŋ e tegroŋ gaŋ a menne gbɛre boyi tuo, saŋa kaŋa a maŋ tagrɛɛ a boma a moɔrɔ lɛ zaa aŋ na toɔ̃ ka a boma toɔ̃ ta zie na aŋ de a gɛrɛ neŋ na. Haali ka a naŋ le, bee a sare sigi bɔgi kaŋa, kyɛ a naŋ maŋ moɔrɔŋ ka a de a bon na aŋ tuo na gaaneŋ. A maŋ laŋ tonɛɛ toma meŋ. A zaa maŋ laŋ toŋɛɛ toma a maale a kpɛzie na oŋ soma. Ka a nyiraa kaŋaŋ wa pere, o taaba na maŋ somooŋ. Ka a naŋ wa te de boma ka a kaŋa bale, o taaba na maŋ somooŋ a de a boma gaaneŋ.
w00 9/15 26 wɛl. 3-4
Go Yosoŋ Na Hoŋ Taa Na
Aseŋ ka te meŋ tɔglɔ nyire a maŋ tonɔ tonkpeɛne. Ka teneeŋ maŋ tonɔ tonkpeɛne a moɔrɔ ka te nyɛrɛ nimitɔɔre gaabo a toma poɔŋ, a na soŋ teŋ yaga zaa. Aseŋ ka te maŋ erɛ lɛ, haali saŋa na neɛzaa naŋ ba kaara te. Ka teneeŋ wa be sakuuŋ, tomazieŋ, kyɛbee a tonɔ Jehoova puoruu toma na, aseŋ ka te maŋ de te faŋa zaa tonɔ a toma. Nyire maŋ nyɛɛ tɔnɔ yaga zaa yi a tonkpeɛne na poɔŋ. Naaŋmen meŋ boɔrɔŋ ka te maŋ ‘di te tonkpeɛne noɔ̃.’ (Ikilisiasitiz 3:13, 22; 5:18) Ka teneeŋ tonɔ tonkpeɛne a maŋ vɛŋeŋ teŋ taa zoma naŋ e forifori ane popeɛloŋ.—Ikilisiasitiz 5:12.
Soolomoŋ da wulee soorebie mine aŋ seŋ ka neɛ soore o meŋɛ ka lɛ vɛŋ ka o bare eŋtuo yɛlɛ. O da soorɛɛŋ ka: ‘Wala hoŋ na gaŋ kɔɔre seŋ, oo eŋtuo soba? Bo wagre hoŋ na iri ho goɔŋ ŋa poɔŋ?’ Naa Soolomoŋ da tɔglɛɛ yɛlɛ na o soba naŋ yele a yelka: ‘Goɔŋ fẽẽ, ka ho nimieŋ paale neŋ goɔŋ fẽẽ lɛ, nuuri guruu fẽẽ lɛ a na gbiri, lɛ la ka ho nandaaloŋ na wa aŋa yuoɔraa, ka ho yelwonii wa aŋa neɛ naŋ nare o meŋɛ ko zɔɔre.’ (Yeng Yelibie 6:9-11) Saŋa na eŋtuo soba naŋ gaŋ gbire na, nandaaloŋ na wa la o eŋɛŋ aŋa naŋnyig-kpeɛŋaa naŋ wa zu neɛ, kyɛbee zɔɔzɔɔrɔ naŋ wa uri neɛ. Eŋtuo soba weɛ zaaŋ maŋ te paale neŋ moore neŋ goore yoŋ. (Yeng Yelibie 24:30, 31) O toma yɛlɛ meŋ ba maŋ lɛ taa nimiri. Wala ka tomazie neŋkpoŋ na baŋ di kannyiri ko eŋtuo soba kɔɔre seŋ? Sakuubie naŋ taa eŋtuo neŋ boma zannoo na baŋ nyɛɛ nimitɔɔre gaabo sakuu poɔŋ bee?
Baabole Poɔ Yelsonne
w00 9/15 27 wɛl. 3
Go Yosoŋ Na Hoŋ Taa Na
Neɛ naŋ sɛge a yɛŋ yelbie zie ŋa wulee yelfaare ayɔpoi tɛɛtɛɛ noba naŋ maŋ erɛ. A mine la ‘zɛgemeŋɛ niŋesogɔ’ ane ‘sukyiri naŋ teɛrɛ yelfaare eebo,’ neɛ teɛroŋ poɔŋ oŋ maŋ toŋ a faaloŋ ŋa. Neɛ yelyagaŋ maŋ wuli ka o taaɛ ‘zele naŋ ŋmaara zirii,’ kyɛbee a e ‘zirii sieree daana naŋ ŋmaara zirii.’ Neɛ yel-eree oŋ maŋ de wuli ka o ‘nuuri kyiree noba naŋ ba taa sããnaa zĩĩ,’ a lɛ e neɛ meŋ ‘gbɛɛ naŋ lonno ka a zo te toŋ faaloŋ.’ Jehoova boɔrɔŋ ka te taa emmaaroŋ te kpakyagaŋ, azuŋ, neɛ na Jehoova naŋ ba nɔnɔ o yɛlɛ fẽẽ zaa la neɛ naŋ tɔ noba eŋ taaŋ baŋ zɔɔrɔ. A Baabole sɛgsɛgrɛ naŋ yelka a eɛ ayoɔbo, a lɛ yelka a eɛ yɛlɛ ayɔpoi na wuleeŋ ka, yelfaare zaa nensaaleba naŋ tonɔ naane oŋ boɔle, bonso wagre zaa nensaaleba maŋ piili erɛɛ yelfaare mine naŋ daaŋ ba bebe.
MARCH 31–APRIL 6
BAABOLE POƆ YELNIMIZEERE YENG YELIBIE 7
Tage Ho Meŋɛ A Yi Yɛlɛ Naŋ Na Baŋ De Bo Eŋ Pigrinyɛ Poɔŋ
w00 11/15 29 wɛl. 5
“Tuuro N Nɔkurii, A Tare Nyɔvore”
Soolomoŋ da arɛɛ o tokoro noɔreŋ a kaara yeŋe. Saŋa na zie naŋ wa soɔrɔ na, o da nyɛɛ pɔlbile kaŋa naŋ waa bambaala naŋ kyɛnɛ a sori zuŋ. A pɔlbile ŋa ba teɛrɛ yɛlɛ gɛrɛ tɔɔre, a lɛ taa vɔlfaare meŋ o sukyiriŋ. O baŋɛɛŋ ka pɔg-gyɛnteree la maŋ be sobiri na oŋ kyɛnɛ na zuŋ, kyɛ oŋ baŋ perɛ a te kyɛnɛ beŋ. A pɔlbile pãã da kyɛŋɛɛŋ a wa peɛle zie na a pɔge naŋ kpeɛrɛ. Nembuo la a pɔge ŋa? Boŋ ka a pɔge ŋa boɔrɔ ka o e?
w00 11/15 30 wɛl. 4-6
“Tuuro N Nɔkurii, A Tare Nyɔvore”
A pɔge ŋa nɔgbama eɛ baaloo. O de la nyaa yele yɛlɛ korɔ a pɔlbile. O mãã la o meŋɛ a kyɛ yele yɛlɛ koroo, bonso, o boɔrɔŋ ka o bɛnloo ka o ne o toŋ peɛ̃mo toma. A pɔge yelko la a pɔlbile ka o iree o maaroŋ sarekare, a paale nɔɛ na oŋ eŋ na meŋ. O da boɔrɔŋ ka o wuli ka o ne Jehoova niiloŋ eɛ kpeɛŋaa. Nɛne, zɔŋ, kãã, ane waiŋ baŋ da maŋ de ire neŋ maaroŋ sareka a ŋmenpuoredie naŋ da be Gyɛruzɛlɛm poɔŋ. (Liivai 19:5, 6; 22:21; Soribu 15:8-10) Neɛ naŋ ire a sareka neŋ o booree deme maŋ di la a maaroŋ sareka boma mine. Azuŋ, a pɔge naŋ yelka o iree o maaroŋ sareka na wuleeŋ ka bondirii neŋ waiŋ be la o dieŋ yaga zaa. O da boɔrɔŋ ka a pɔlbile baŋ ka, ka o naŋ sage a kpɛ o die, o na di la boma a tigi, a pɛle o niŋe yaga zaa meŋ. A pɔge da baŋɛɛŋ perɛ a yi boɔrɔ a pɔlbile ŋa. Ka neɛŋ yeli a yɛlɛ ama taa ko bo, ho ba nyɛ ka a na tɔɛ ho sukyiri yaga zaa bee? Baabole gaŋbanna kaŋa yeleeŋ ka: “Yelmeŋɛ la ka a pɔge da yi boɔrɛɛ dɔɔ o ne o naŋ na toŋ peɛ̃mo toma, kyɛ a pɔlbile ŋa yɛlɛŋ da be o teɛroŋ poɔŋ saŋa na oŋ yire o yiri na bee? Azuŋ, ho ba nyɛ ka a na eɛ dambol yɛlɛ ka a pɔlbile ŋa teɛre ka o naŋ e neŋtegroŋ kaŋa zuŋ ka a pɔge yeli a yɛlɛ ama koo bee?”
A pɔge da su la boma naŋ veɛlɛ yaga, a yele yelbi-noɔ̃ne korɔ a pɔlbile, a maŋ seene a pɔlbile eŋgama ziiri naŋ na vɛŋ ka o eŋɛ noma, a lɛ mugre o noɔre meŋ. Kyɛ, o da lɛ eɛ yelkaŋa meŋ poɔ, o da yeleeŋ ka o taaɛ bonnyu-noɔne meŋ. A pɔge da yeleeŋ ka: “N de la pɛmɛ naŋ veɛlɛ yaga zaa tɛ N gado zuŋ, a eɛ pɛmɛ naŋ veɛlɛ a yi Igyipiti paaloŋ. N de la mɛɛ, aloe ane sinamon miremire N gado na zaa.” (Yeng Yelibie 7:16, 17) O mãã la o meŋɛ a de pɛmɛ naŋ veɛlɛ a yi Igyipiti paaloŋ maale neŋ o gado na. A de bonnyu-noɔne miremire a pɛmɛ zaa aŋ nyuuro soŋ zaa.
A pɔge da lɛ yeleeŋ ka: “Wa ka te bɔ taa yaga zaa a waana beguo saŋa; wa ka te gaŋneŋ taa ka te enne mãã yaga zaa.” Bondirii yoŋ naane ka a pɔge da boɔrɔ ka o neŋ a pɔlbile di. O da boɔrɔŋ ka a pɔlbile baŋ ka ba na gaŋnɛɛ taa meŋ. A pɔlbile teɛrɛɛŋ ka a pɔge toŋboɔle na somaŋ, a lɛ noma koroo meŋ. A pɔge lɛ gaaɛ nimitɔɔre a yelka: “Bonso N serɛ ba kye yiriŋ; o gaa la sotɔɔre kaŋa. O de la o libi wuoɔ gaaneŋ, O koŋ wa sɛre a te ta saŋa na a kyuu gbuli naŋ na sãã.” (Yeng Yelibie 7:18-20) A pɔge yelko la a pɔlbile ka yelfaa zaa koŋ wa o zuŋ, bonso, o serɛ tu la sori a gaa ka o te toŋ toma mine, azuŋ a na de la wagre kyɛ ka o leɛ wa. Nyɛ nyaammo sori na a pɔge ŋa naŋ tu a bɛnlɛ a pɔlbile ŋa. A Baabole yeleeŋ ka, “A pɔge maŋ tu la mɔgloo yaga zaa eŋɛŋ kyɛ bɛnloo. O maŋ de la yelbi-noɔ̃ne a bɛnloo.” (Yeng Yelibie 7:21) Ka neɛŋ ba taa nyɔge meŋɛ aŋa Gyoosɛf, a na eɛ kpeɛŋaa ka o zagre a pɔge peɛ̃mo toma toŋboɔle na bare. (Munpiilee 39:9, 12) A pɔlbile ŋa toɔ̃ nyɔgɛɛ o meŋɛ bee?
w00 11/15 31 wɛl. 2
“Tuuro N Nɔkurii, A Tare Nyɔvore”
A pɔlbile ba toɔ̃ zagre a pɔge toŋboɔle na. O da barɛɛ o meŋɛ aŋa dambol, a tu a pɔge gaa aŋa “nadɛre ba naŋ nyɔge gɛrɛ ka ba te kɔre.” Aŋa lɛ na baŋ maŋ de banzɔlɔ le neŋ neɛ a gɛrɛ ka ba te dɔgre na, lɛ ka a pɔlbile ŋa da bare o meŋɛ a te kpɛ a faaloŋ ŋa poɔ. O da ba baŋ ka yelfaa kaŋa na yi la a poɔŋ wa a te ta saŋa na “tampĩĩ naŋ kyɔge o sɔɔreeŋ.” Lɛ wuleeŋ ka ba da perooŋ oŋ kɔŋ o nyɔvore. Aminekaŋaŋ, baaloŋ na o nyɛ yi a peɛ̃mo toma poɔŋ la vɛŋ oŋ kɔŋ o nyɔvore. Kyɛbee aminekaŋaŋ, o neŋ Jehoova niiloŋ naŋ sãã kpɛlɛŋkpɛlɛŋ na zuŋ baŋ yelka o kpieŋ. Bonso, o de la o meŋɛ eŋ a yɛlɛ ŋa poɔŋ ka toɔrɔ naŋ e kpoŋ yi be wa o zuŋ a sãã o zemmo yɛlɛ zaa. Naaŋmen nimitɔɔreŋ meŋ o lɛ eɛ yelfaa naŋ e nimizeɛ. A waa ŋa oŋ kyere o meŋɛ te kpɛ kũũ poɔ aŋa lɛ na nuulee naŋ maŋ zo te kpɛ kyɛbaa poɔŋ na.
Baabole Poɔ Yelsonne
w00 11/15 29 wɛl. 1
“Tuuro N Nɔkurii, A Tare Nyɔvore”
Soolomoŋ da sɛgɛɛŋ ka: “De [N nɔkurii] leŋ mare ho nubieŋ, sɛgaa eŋ ho sukyiriŋ.” (Yeng Yelibie 7:3) Te nubie teŋ maŋ de erɛ yelzaa te bebiri zaa yel-eree poɔŋ. Azuŋ, yɛlɛ na ho dɔgreba naŋ wuli bo yi a Baabole poɔŋ, ane yɛlɛ na hoŋ zanne yi a Baabole poɔŋ na seŋ ka a maŋ be ho teɛroŋ poɔŋ wagre zaa, a maŋ wulo bo sori ka ho erɛ yɛlɛ zaa ho zemmo poɔŋ. Ka ba naŋ yelka te sɛge a yɛlɛ eŋ te sukyieŋ, a wuleeŋ ka te vɛŋ ka a yɛlɛ leɛ te gyogo meŋɛmeŋɛ.
APRIL 7-13
BAABOLE POƆ YELNIMIZEERE YENG YELIBIE 8
Kyɛllɛ Yezu Yɛŋ Yelbie Na
cf 131 wɛl. 7
“N Nɔŋ La A Saa”
7 A yi o wɛlbo 22, yɛŋ yeleeŋ ka: ‘Jehoova maale maŋ o toma munpiileeŋ, saŋa na o takoreŋ saŋa toma naŋ da naŋ ba bebe.’ Ka hooŋ kaa a sɛgre soŋ, a waa ŋa neɛ kaŋa ka a Baabole de manna neŋ yɛŋ. Bonso teŋ yeli lɛ? Ananso la ka, yɛŋ ba e gyogo Jehoova naŋ “maale.” Yɛŋ ba taa piilee, o ba taa baaraa meŋ, bonso Jehoova naŋ waa yɛŋ zaa soba ba taa piiluu, o ba taa baaraa meŋ. (Yieme 90:2) Naaŋmen Bidɔɔ na la “a bidɛndɛŋ a bon-iri zaa poɔ.” Jehoova la maale Yezu saŋa na oŋ wa piili ire boma na. (Kolosi 1:15) Yezu da bebeŋ saŋa na Jehoova naŋ maale a sazu neŋ a teŋgane, aŋa lɛ na a Yeng Yelibie gane naŋ wuli na. Azuŋ, Yezu da wa leɛ la Naaŋmen Yelbiri, a da maŋ are Jehoova gbɛbɔgriŋ a manna o yɛŋ naŋ e zuluŋ na yɛlɛ korɔ malekere neŋ nensaaleba zaa.—Gyɔɔn 1:1.
cf 131-132 wɛl. 8-9
“N Nɔŋ La A Saa”
8 Bo toma ka Yezu da tonɔ sazuŋ a yuomo ŋa zaa poɔŋ serɛ kyɛ waana a teŋɛzu? O wɛlbo 30 vɛŋɛɛŋ teŋ baŋ ka o da eɛ “neɛ naŋ baŋ toma nimiri yaga.” Wala ka lɛ wuli? Kolosi 1:16 wulee a muni ka: “Bonso, O zie la ka Naaŋmen tu iri boma zaa, boma naŋ be sazu ane a tendaa zu, . . . Naaŋmen tu la O zie kyɛ iri a boma zaa a O zuŋ.” Azuŋ, Jehoova da tu la o Bidɔɔ na naŋ baŋ toma nimiri yaga na zieŋ a iri boma zaa naŋ bebe. A boma mine la a malekere naŋ be sazuŋ, a aŋdonɛɛ naŋ e kpoŋ yaga zaa, a teŋgane naŋ waa seɛlee a taa dunni neŋ teere na, ane nensaaleba. Te na baŋ de la lɛ na Yezu neŋ o Saa naŋ laŋ toŋ toma na manne ne teela neŋ o toŋtonɔ naŋ tonɔ toma. A teela na baŋ wulee a toŋtonɔ lɛ oŋ na ŋmaa a pɛne, a wuloo lɛ oŋ na sɛ o meŋ. Ka a toŋtonɔŋ wa kyɛlle woŋ o neŋkpoŋ na yɛlɛ soŋ, o na sɛ la a kparoo ka o waa ŋa lɛ na a neŋkpoŋ naŋ boɔrɔ na. Ka teneeŋ wa nyɛ bonkaŋa yɛlɛ naŋ e seɛlee yaga zaa, sori kaŋa poɔŋ na te nyɛrɛɛ Jehoova Naaŋmen nuuri toma. (Yieme 19:1) Kyɛ, aseŋ ka te leɛteɛre lɛ na Jehoova neŋ o Bidɔɔ naŋ laŋ toŋ toma, a de popeɛloŋ maale a boma ama zaa meŋ yɛlɛ.
9 Ka nensaaleba bayi naŋ ba pɛgeyiŋ wa laŋ tonɔ toma, a maŋ eɛ kpeɛŋaa ka ba taa noɔreyeni wagre zaa. Kyɛ, lɛ naane ka yɛlɛ da waa ko Jehoova neŋ o Bidɔɔ na! A Bidɔɔ neŋ o Saa na de la yuomo turiturituri laŋ toŋ toma, kyɛ Yezu yeleeŋ ka: ‘Maŋ da maŋ kyillɛ wagre zaa o nimitɔɔreŋ.’ (Yeng Yelibie 8:30) Yezu da nɔŋɛɛŋ ka o maŋ be o Saa zieŋ. Jehoova meŋ da boɔrɛɛ o Bidɔɔ na yɛlɛ. A Bidɔɔ da tɔglɛɛ o Saa gyog-sonne na, ka lɛ vɛŋ oŋ da erɛ yɛlɛ aŋa o Saa na. A ba e seɛlee a Saa neŋ a Bidɔɔ naŋ nɔŋ taa yaga zaa! Nɔmmo naŋ be ba kpakyagaŋ na la nɔmmo naŋ kore, a lɛ e kpeɛŋaa yaga zaa a gaŋ nɔmmo zaa naŋ be a aŋdonɛɛ poɔŋ.
w09 4/15 31 wɛl. 14
Wuli Ka Ho De La Yezu Tegroŋ—Ona La A Deevid Kpoŋ Ane Soolomoŋ Kpoŋ
14 Yezu Krista la nensaalaa na yoŋ naŋ da taa yɛŋ naŋ e zuluŋ a gaŋ Soolomoŋ. Yezu yeleeŋ a kyaare o meŋɛ ka o waa la “neɛ naŋ gaŋ Soolomoŋ.” (Mat. 12:42) Yezu da maŋ yelee “nyɔvore naŋ ba taa baaroo yelbie.” (Gyn. 6:68) Aŋa mannoo poɔŋ, yɛlɛ na Yezu naŋ da yeli o Taŋazu Yelyaga na poɔŋ da wulee Soolomoŋ yɛŋ yelbie na muni gaa tɔɔre. Soolomoŋ da wulee yɛlɛ naŋ maŋ vɛŋ ka Jehoova puorebie taa popeɛloŋ. (Yeng. 3:13; 8:32, 33; 14:21; 16:20) Yezu da vɛŋɛɛŋ aŋ pɛle ka Jehoova puoruu la maŋ vɛŋ teŋ taa popeɛloŋ, a lɛ vɛŋ aŋ pɛle ka ka teneeŋ wa nyɛ Jehoova naŋ paale nɔɛ na oŋ eŋ na, a maŋ vɛŋeŋ teŋ taa popeɛloŋ. Yezu da yeleeŋ ka: “Noba naŋ boɔrɔ Naaŋmen nimizeɛ̃ taaɛ popeɛloŋ, bonso ba naŋ so a sazu Naaloŋ na.” (Mat. 5:3) Noba naŋ de a yɛlɛ ŋa tonɔ neŋ toma ba zemmo poɔŋ maŋ tage peɛlɛɛ Jehoova. Jehoova “zie ka nyɔvore maŋ yi wa.” (Yiem. 36:9; Yeng. 22:11; Mat. 5:8) Krista la “Naaŋmen yɛŋ.” (1 Kor. 1:24, 30) Yezu la Naaŋmen Naaloŋ na Naa, azuŋ te na baŋ yeliŋ ka o taaɛ ‘yɛŋ vooroŋ.’—Aiz. 11:2.
Baabole Poɔ Yelsonne
Wala Ka Yezu Waa?
A Baabole yeleeŋ ka Yezu “nimipɛl daaŋ be la nensaaleba eŋɛŋ.” (Yeng Yelibie 8:31) Yezu da maŋ wulee a nɔmmo ŋa saŋa na oŋ da maŋ eŋnɛ noba faŋa a kyɛ yi o poɔ zaa a sonnɔ noba na. Toŋseɛlɛ na Yezu naŋ da toŋ na da ba wulo o kpeɛ̃o yoŋ, kyɛ a da lɛ wulee o nyonono meŋ. (Marko 1:40-42) Yezu da taaɛ nimimaaroŋ a ko noba, o da ba wɛlɛ noba meŋ. O yelyaga da maŋ dii la sukyiri sonne deme sukyie a kyɛ lɛ ko ba tamaa meŋ. Nɔmmo na Yezu naŋ da taa ko nensaaleba na da vɛŋɛɛŋ oŋ yi o poɔ zaa a di dɔgɛɛ, a kyɛ kpi ko nensaaleba meŋ. Yezu taaɛ nɔmmo naŋ e zuluŋ a ko noba naŋ de o wuluu na tonɔ neŋ toma.—Kanne Gyɔɔn 15:13, 14.
APRIL 14-20
BAABOLE POƆ YELNIMIZEERE YENG YELIBIE 9
E Yɛmbaŋna, Ta Wa Tɔglɔ E Laareba
w22.02 9 wɛl. 4
“Wono Yɛmbaŋneba Yelyaga”
4 Yelmeŋɛ zaa, ka neɛŋ boɔle te a ko te kawane a maŋ eɛ kpeɛŋaa ka te de a kawane toŋ neŋ toma. Te suuri gba na baŋ iri neŋ la o soba. Ananso la wala? Ananso la ka te zaa baŋɛɛŋ ka te eɛ noba naŋ ba pɛgeyi, kyɛ ka neɛŋ wa wuli te yɛlɛ mine te naŋ ba erɛ soŋ, a maŋ eɛ kpeɛŋaa ka te sage o kawane na. (Kanne Ikilisiasitiz 7:9.) Te na baŋ piili derɛɛ yɛlɛ ire nɔɛ, a boɔrɔ ka te wuli bon nanso teŋ e a yɛlɛ. Te na baŋ teɛreŋ ka poteɛre soŋ naane ka o soba de ko te a kawane, kyɛbee ka te teɛre ka sori na oŋ tu a ko te a kawane na ba soma. Te na baŋ piili teɛrɛɛ a soba naŋ ko te a kawane na gbɛ-ŋmɛ yɛlɛ. Te na baŋ teɛreŋ ka: ‘Nyɛ lɛ na hooŋ meŋɛ naŋ maŋ erɛ ho yɛlɛ, a kyɛ boɔrɔ ka ho ko ma kawane!’ Azuŋ, ka a kawane na baŋ ko te naŋ ba pɛle te poɔ, te na baŋ zagrɛɛ a kawane bare, kyɛbee ka te gaa zie teŋ na te woŋ yɛlɛ te naŋ boɔrɔ.
w22.02 12 wɛl. 12-14
“Wono Yɛmbaŋneba Yelyaga”
12 Boŋ na baŋ soŋ te ka te sagede kawane a de toŋ neŋ toma? Aseŋ ka te sigri te menne. Aseŋ ka te leɛteɛre ka te eɛ noba naŋ ba pɛgeyi, azuŋ saŋa kaŋa te maŋ eɛ dambol yɛlɛ. Aŋa lɛ te naŋ nyɛ a zannoo ŋa poɔŋ na, Gyoob da taaɛ teɛroŋ naŋ ba soma. Kyɛ, a puoriŋ o da leɛrɛɛ o teɛroŋ ka Jehoova da koo maaloo. Ananso la wala? Ananso la ka, Gyoob da sigree o meŋɛ. O da sagɛɛ Elaihu kawane na, aneazaa ka o da korɛɛ Elaihu yaga zaa. Lɛ da wuleeŋ ka Gyoob sereŋ da sigree o meŋɛ. (Joob 32:6, 7) Ka teneeŋ wa teɛre ka yɛlɛ na teŋ e na ba seŋ ka ba ko te kawane, kyɛbee ka teneeŋ wa kore neɛ naŋ ko te a kawane na, sigrimennoŋ na soŋ teŋ ka te de a kawane toŋ neŋ toma. A lantaapuoruu neŋkpoŋ kaŋa naŋ be Canada paaloŋ yeleeŋ ka, “Neɛ naŋ kyɛnɛ ba maŋ baŋ lɛ o gbɛ-binnii naŋ waa o puoriŋ, kyɛ neɛ naŋ tuuro o puoriŋ maŋ baŋeŋ. Azuŋ, wala teŋ na toɔ̃ e a nyɛ nimitɔɔre gaabo ka neɛzaaŋ ba korɔ te kawane?” Nembuoŋ be te poɔŋ a na baŋ yelka ona yɛŋ ba lɛ seŋ ka o nyɛ nimitɔɔre gaabo a yi a naaŋ moɔloo poɔŋ, kyɛbee ka o soba yelka o taaɛ a vooroŋ soŋ wɔnee gyogri na zaa te baare?—Kanne Yieme 141:5.
13 De a kawane ka a eɛ sori Naaŋmen naŋ maŋ tu a de wulo ka o nɔŋ teŋ. Jehoova baŋɛɛ yɛlɛ naŋ soma ko te. (Yeng. 4:20-22) Ka onaŋ wa tu o Yelbiri eŋɛŋ, te puoruu gama na poɔŋ, kyɛbee te Kristabitɔ kaŋa naŋ kyile zie a ko te kawane, a eɛ sori kaŋa oŋ wulo te ka o nɔŋ teŋ. Hiburu 12:9, 10 yeleeŋ ka, “te maaloo zuŋ” ka Jehoova maŋ e lɛ.
14 De ho teɛroŋ eŋ a kawane eŋɛŋ, ta de ho teɛroŋ eŋ sori na baŋ tu a ko bo a kawane na eŋɛŋ. Saŋa kaŋa, te na baŋ teɛreŋ ka sori na baŋ tu a ko te a kawane na ba soma. Yelmeŋɛ la, ka teneeŋ wa korɔ noba kawane, aseŋ ka te maŋ tu sori naŋ seŋ neŋ poɔŋ a ko o soba a kawane, ka lɛ vɛŋ ka a e mɔlɔ ka o de a kawane toŋ neŋ toma. (Gal. 6:1) Kyɛ, ka ba naŋ ko te kawane, aseŋ ka te de te teɛroŋ eŋ a kawane eŋɛŋ, a gaŋ teŋ na de te teɛroŋ eŋ sori na baŋ tu a ko te a kawane na eŋɛŋ. Te na baŋ soorɛɛ te menne ka: ‘Yelmeŋɛ la, sori na oŋ tu a ko ma a kawane na ba soma, kyɛ yelmeŋɛ fẽẽ kaŋa be la yɛlɛ na oŋ yeli na poɔŋ bee? A soba na naŋ ko ma a kawane na ba pɛgeyi, kyɛ N na baŋ de la N teɛroŋ eŋ tɔnɔ na maŋ na toɔ̃ nyɛ o kawane na poɔŋ bee?’ A na somaŋ yaga ka te maŋ bɔ sori teŋ na baŋ tu a de kawane na baŋ ko te na toŋ neŋ toma.—Yeng. 15:31.
w01 5/15 30 wɛl. 1-2
‘Yɛŋ Na Toɔ̃ Soŋ Teŋ Ka Te Bebie E Yaga’
Yɛmbaŋna maŋ de la kawane toŋ neŋ toma, kyɛ neɛ naŋ erɛ noba laara maŋ zagrɛɛ a kawane bare. Soolomoŋ da yeleeŋ ka: ‘Yeli neɛ naŋ e yɛmbaŋna nimiri yɛlɛ koo, o na nɔŋ boŋ. De wuluu ko yɛmbaŋna, ona maaleŋ taaɛ yɛŋ.’ (Yeng Yelibie 9:8b, 9a) Yɛmbaŋna maŋ baŋeŋ ka ‘dɛnnoo maŋ waa ŋa o naŋ buoro gaŋ o naŋ soma, kyɛ a puoriŋ, a maŋ yi la tɔnɔ naŋ maŋ waana ne maaroŋ ane mennoŋ a ko banaŋ ba naŋ de a dɛnnoo ko.’ (Hiburu 12:11) Yelmeŋɛ la ka kawane maŋ beɛrɛŋ, kyɛ ka teneeŋ maŋ de a kawane toŋ neŋ toma, a na vɛŋeŋ ka te leɛ yɛmbaŋneba. Azuŋ, ho teɛreŋ ka a na somaŋ ka te suuri iri, kyɛbee ka te zagre kawane bare bee?
Naa Soolomoŋ da yeleeŋ ka: ‘Wuli neɛ yɛlɛ naŋ tu sori, lɛ na vɛŋeŋ ka o bammo maaleŋ e kpoŋ.’ (Yeng Yelibie 9:9b) Lɛ zaa te naŋ baŋ yɛŋ kyɛbee a kore seŋ, kyɛ aseŋ ka te naŋ moɔ̃ niŋe a zanna boma. A maŋ eɛ popɛle yaga zaa ka te nyɛ baapaalba naŋ sagede a yelmeŋɛ, a lɛ de ba menne ko Jehoova meŋ. Azuŋ, yɛ vɛŋ ka te meŋ moɔ̃ niŋe a maŋ zanna yɛlɛ, ka lɛ vɛŋ ka te teɛroŋ maaleŋ yuo yaga zaa.
w01 5/15 30 wɛl. 5
‘Yɛŋ Na Toɔ̃ Soŋ Teŋ Ka Te Bebie E Yaga’
A eɛ te kaŋa zaa ferebo toma ka te moɔrɔ te moɔbo zaa ka te taa yɛŋ naŋ e zuluŋ. Soolomoŋ da vɛŋɛɛŋ ka a yɛlɛ ŋa pɛle saŋa na oŋ da yelka: ‘Ka hooŋ e yɛmbaŋna, ho na eɛ yɛmbaŋna ko ho meŋɛ; kyɛ ka hooŋ e neɛ naŋ erɛ noba laara meŋ, ho yoŋ na tuo a tuobu.’ (Yeng Yelibie 9:12) Ka neɛŋ e yɛmbaŋna, o meŋɛ la maŋ nyɛrɛ a tɔnɔ, kyɛ neɛ naŋ erɛ noba laara la maŋ vɛŋ ka toɔrɔ wa o meŋɛ zuŋ. Yelmeŋɛ zaa, bon na teŋ maŋ bore la teŋ maŋ kyɛ. Azuŋ, a somaŋ ka te ‘bɛge toorii a ko yɛŋ.’—Yeng Yelibie 2:2.
Baabole Poɔ Yelsonne
Ka Teneeŋ Zoro Naaŋmen, Bo Maaloo Teŋ Na Nyɛ?
18 Bonso aŋ e nimizeɛ ka te tage te menne yi peɛ̃mo toma poɔŋ? A “pɔge damboli” na yeleeŋ ka: ‘Koɔ̃ baŋ zu maŋ nomaŋ.’ Boŋ la a ‘koɔ̃ baŋ zu na’? A Baabole maŋ de la kultaa deme gaŋneŋ taa manne neŋ koɔ̃ naŋ korɔ ba pɛnnoo. (Yeng. 5:15-18) Ka dɔɔ neŋ pɔgeŋ tu sori naŋ seŋ neŋ poɔŋ kyɛ kultaa, ba na toɔ̃ gaŋnɛɛ taa. Kyɛ, a ‘koɔ̃ baŋ zu na’ yɛŋ ba waa lɛ. A ‘koɔ̃ baŋ zu na’ na baŋ are ko la peɛ̃mo toma naŋ ba seŋ neŋ. Aŋa lɛ na nannyige naŋ maŋ sɔgle a wa zu boma na, noba naŋ tonɔ peɛ̃mo toma maŋ sɔglɔ erɛɛ lɛ. Ka neɛzaaŋ ba nyɔge ba, ba maŋ teɛreŋ ka a ‘koɔ̃ baŋ zu na’ nomaŋ yaga. Kyɛ ba menne baŋ bɛnlɛ! Bonso Jehoova nyɛrɛɛ yelzaa. Ka teneeŋ kɔŋ Jehoova maaloo, te na kpɛɛ toɔrɔ yaga poɔŋ. Azuŋ, a koɔ̃ ŋa ba ‘noma’ fẽẽ zaa. (1 Kor. 6:9, 10) Kyɛ, a zaa naane lɛ.
14 Ka hooŋ de ho meŋɛ eŋ peɛ̃mo toma poɔŋ, a na toɔ̃ eŋ boŋ vi, ho na baŋ taaɛ poɔ saŋa ho naŋ ba boɔrɔ, ana baŋ sããŋɛɛ noɔreyeni naŋ be ho booree poɔŋ meŋ. Peɛ̃mo toma na toɔ̃ vɛmeŋ ka neɛ teɛre ka o ba taa tɔnɔ zaa. Azuŋ, a na somaŋ yaga ka te zagre a pɔge damboli na toŋboɔle. A ba seŋ ka te gaa o “die” na a te di bondirii. Ka teneeŋ e lɛ, te neŋ Jehoova niiloŋ na eɛ kpeɛŋaa. Noba yaga naŋ de ba menne eŋ peɛ̃mo toma poɔŋ maŋ toɔ̃ nyɛɛ baaloŋ naŋ na baŋ iri ba nyɔvore. (Yeng. 7:23, 26) Yeng Yelibie zuri 9 o wɛlbo 18 baaraa zie na yeleeŋ ka: ‘O die saamma be la yaa bɔgi-zuluŋ poɔŋ.’ Kyɛ, bonso ka noba yaga maŋ sage a pɔge damboli ŋa toŋboɔle na a te kpɛ a toɔrɔ ŋa poɔ?—Yeng. 9:13-18.
APRIL 21-27
BAABOLE POƆ YELNIMIZEERE YENG YELIBIE 10
Bo Yɛlɛŋ Maŋ Vɛŋ Ka Neɛ Taa Zemmo Naŋ Soma?
w01 7/15 25 wɛl. 1-3
‘Sontuuribo Na Nyɛɛ Maaloo’
Sontuuribo na lɛ nyɛɛ maaloo sori kaŋa poɔŋ. A Baabole yeleeŋ ka: ‘Neɛ naŋ nyɔrɔ o nu na leɛ la nandaana, kyɛ neɛ naŋ e nimizeɛ, o nuuri na waaneŋ la bondaaloŋ. Neɛ naŋ lagre boma seɛ̃ saŋa eɛ yɛmbaŋna bidɔɔ; kyɛ neɛ naŋ gbire boma kyeɛbo saŋa eɛ bidɔɔ naŋ waana neŋ vi.’—Yeng Yelibie 10:4, 5.
Yɛlɛ na Naa Soolomoŋ naŋ yeli na wulee lɛ na aŋ e nimizeɛ ka noba maŋ tonɔ tonkpeɛne boma kyeɛbo saŋa. A saŋa naane aŋ seŋ ka ba gbire. A saŋa aŋ seŋ ka ba moɔ̃ nimiri a de wagre yaga a tonɔ tonkpeɛne. Ɛɛ, a saŋa ka a toma maŋ e nimizeɛ yaga zaa.
Yezu da mannɛɛ a naaŋ moɔloo toma yɛlɛ korɔ o potuuribo. O da yeleeŋ ka: “A weɛ boma waa la yaga a seŋ kyeɛbo, kyɛ ka a kyɛkyeɛrebɛ waa fẽẽ lɛ. Azuŋ, yɛ puoro sɔrɔ a weɛ soba [Jehoova Naaŋmen] ka o toŋ tontonema ka ba gaa te de a weɛ boma ka a kpɛ die.” (Matio 9:35-38) Yuoni 2000 poɔŋ, noba naŋ pare turituri 14 la da wa a Yezu Kũũ Leɛteɛroo lammo na. A noba ŋa eɛ yaga gaŋ Jehoova Sieree Deme gbɛre boyi. Nembuoŋ na baŋ yelka ‘a weɛ boma ba seŋ kyeɛbo’? (Gyɔɔn 4:35) Yelmeŋɛ puorebiiri maŋ puoro sɔrɛɛ a weɛ Soba ka o toŋ tontonema ka ba kpɛ a weɛ poɔ. Azuŋ, ba maŋ moɔ̃ la niŋe a maaleŋ tonɔ a naaŋ moɔloo toma yaga zaa. (Matio 28:19, 20) Jehoova maalɛɛ tonkpeɛne na baŋ tonɔ na! Yuoni 2000 puoruu yuoni na poɔŋ, noba naŋ pare 280,000 la da de suobu a wa leɛ Jehoova puorebiiri. A nempaalba ŋa meŋ maŋ moɔrɛɛ ba moɔbo zaa a wulo ba taaba Naaŋmen Yelbiri na. Yɛ vɛŋ ka te de te menne eŋ a naaŋ moɔloo toma poɔŋ yaga zaa, ka teneeŋ e lɛ te na taaɛ popeɛloŋ ane zeŋ laafeɛ yaga zaa.
w01 9/15 24 wɛl. 3-4
Kyɛnɛ A Sontuubu Sori Zuŋ
Soolomoŋ wulee bon nanso ka sontuubu e nimizeɛ yaga zaa. O yeleeŋ ka: ‘Bondaana bondaaŋ boma la o yiri daŋkyime naŋ mɛ gyiloo. Nandaana nandaaloŋ maŋ vɛŋeŋ oŋ wɛ. Sontuuro toma saŋyɔɔ maŋ waaneŋ la nyɔvore. Neŋfaa saŋyɔɔ maŋ waaneŋ la dɔgɛɛ.’—Yeng Yelibie 10:15, 16.
Bondaaŋ boma na baŋ soŋɛɛ neɛ saŋa na oŋ wa tuoro zemmo yelwonii mine, aŋa lɛ na daŋkyini ba naŋ mɛ gyili teŋkpɛŋ naŋ maŋ go noba naŋ be o poɔŋ na. Kyɛ, ka yɛlɛ mine te naŋ ba kaara soriŋ wa e te zemmo poɔŋ, nandaaloŋ na toɔ̃ vɛŋeŋ ka a yɛlɛ maaleŋ e kpeɛŋaa ko te. (Ikilisiasitiz 7:12) Aminekaŋaŋ, Naa Soolomoŋ da lɛ wulee toɔrɔ naŋ na baŋ wa neɛ zuŋ ka o naŋ e bondaana bee nandaana. A na baŋ eɛ mɔlɔ ko bondaana ka o de o teɛroŋ zaa eŋ o bondaaloŋ na eŋɛŋ, a teɛrɛ ka a bondaaŋ boma ‘waa ŋa daŋkyini baŋ mɛ oŋ do.’ (Yeng Yelibie 18:11) Nandaana meŋ na baŋ teɛrɛŋ ka oŋ e nandaana na zuŋ, o ba taa teɛretɔ zaa. Lɛ wuleeŋ ka ba kaŋa zaa ba taa yosoŋ Naaŋmen nimitɔɔreŋ.
it-1 340
Maaloo
Maaloo Jehoova Naŋ Maŋ De Ko Nensaaleba. “Jehoova maaloo la maŋ vɛŋ ka neɛ e bondaana, o ba maŋ de eŋbaare meŋ poɔ a eŋɛŋ.” (Ye 10:22) Jehoova maŋ go la o puorebiiri, a sonnɔ ba ka ba yɛlɛ nyɛrɛ nimitɔɔre gaabo, a wulo ba sori, a lɛ vɛŋ baŋ baŋ ka yɛlɛ na kyɛŋɛɛ soŋ zaa ko ba. A sori ŋa poɔŋ la ka Jehoova maŋ tu a korɔ te maaloo.
Baabole Poɔ Yelsonne
w06 5/15 30 wɛl. 18
Popeɛloŋ Noba Naŋ Kyɛnɛ Yelmennoŋ Poɔŋ Naŋ Maŋ Nyɛrɛ
18 “Jehoova maaloo” la maŋ vɛŋ ka niiloŋ naŋ be o ne o puorebiiri kpakyagaŋ na maaleŋ e kpeɛŋaa. A Baabole vɛŋɛɛŋ teŋ baŋ peɛlaaŋ ka, “o ba maŋ de eŋbaare meŋ poɔ a eŋɛŋ.” (Yeng Yelibie 10:22) Kyɛ, bonso ka Naaŋmen yelmeŋɛ puorebiiri maŋ tuoro yelkpeɛne naŋ maŋ vɛŋ baŋ dire dɔgɛɛ yaga zaa? Yɛlɛ ata mine zuŋ ka yelwonii ane dɔgɛɛ maŋ wa te zuŋ. (1) Te eɛ noba naŋ ba pɛgeyi, azuŋ a maŋ eɛ mɔlɔ ka te erɛ yelfaare. (Munpiilee 6:5; 8:21; Gyimisi 1:14, 15) (2) Setaana neŋ o malekefaare na meŋ maŋ vɛŋeŋ teŋ tuoro yelkpeɛne. (Efesu 6:11, 12) (3) Te be la donfaa kaŋa poɔŋ, azuŋ te na baŋ tuoree yelkpeɛne. (Gyɔɔn 15:19) Jehoova maŋ terɛɛ sori ka yelfaare pɔgrɔ te, kyɛ ona naaneŋ maŋ de a yelfaare waneŋ te zuŋ. Yelmeŋɛ zaa, “mennoŋ kyɔɔtaare teroo zaa ane kyɔɔtaa zaa naŋ soma yi la sazu, a veɛloŋ Saa zie a sazu poɔ sigre waana.” (Gyimisi 1:17) Jehoova ba maŋ de eŋbaare poɔ neŋ o maaloo na poɔŋ.
APRIL 28–MAY 4
BAABOLE POƆ YELNIMIZEERE YENG YELIBIE 11
Ta Wa Yele Lɛ!
w02 5/15 26 wɛl. 4
Sontuuribo Maŋ Kyɛnɛɛ Yelmennoŋ Poɔŋ
Sontuuribo neŋ neŋfaare yel-eree maŋ toɔ̃ nyɛ la kpeɛ̃o ba taaba zuŋ. Izerayɛl paaloŋ naa kaŋa da yeleeŋ ka, ‘Neɛ naŋ ba tuuro Naaŋmen boɔbo maŋ de la o noɔre a sãã o tɔsoba, kyɛ a tuuro yɛlɛ bammo poɔŋ ka sontuuro na nyɛ faabo.’ (Yeng Yelibie 11:9) Nembuoŋ na baŋ yelka neɛ naŋ sããna o taaba yoe, a zuuro ba poe, a maŋ yele yel-laama neŋ yɛlɛ naŋ ba seŋ neŋ ba maŋ de sããmmo waneŋ o taaba zuŋ? Sontuuro yɛŋ maŋ mãã la o meŋɛ, a teɛre yɛlɛ gaa tɔɔre, a pãã de nimimaaroŋ yele neŋ yɛlɛ. Bammo na oŋ taa na maŋ vɛŋeŋ oŋ nyɛ faabo, bonso, o yel-eree maŋ vɛŋeŋ ka noba baŋ ka yɛlɛ na noba naŋ yele kyaaroo na eɛ zirii.
w02 5/15 27 wɛl. 2-3
Sontuuribo Maŋ Kyɛnɛɛ Yelmennoŋ Poɔŋ
Ka nobaŋ wa laŋkpeɛrɛ a erɛ ba yɛlɛ sontuubu soriŋ, a maŋ vɛŋeŋ ka emmaaroŋ, zeŋ laafeɛ, ane noɔreyeni be ba kpakyagaŋ. Lɛ maŋ vɛmeŋ ka yɛlɛ kyɛnɛ soŋ zaa ba gbandige na poɔŋ. Kyɛ, noba naŋ sããna ba taaba yoe, a yele potu-yɛlɛ, ane yelfaare maŋ vɛŋeŋ ka zɔɔre, posãã, tage-kaŋ-tage, ane yelbawoŋtaa be noba kpakyagaŋ. Ka a soba na naŋ erɛ lɛ naŋ wa taa arezi-kpoŋ, o na baŋ sãã la sããmmo gaa tɔɔre. Ka a noba ŋa taaŋ wa be noba poɔŋ, ba maŋ sãã la ba noɔreyeni, a faara ba taaba, a erɛ yelfaare, ka lɛ vɛŋ ka zie e kpeɛŋaa ko noba zaa.
Jehoova puorebiiri naŋ be a lantaapuoruu poɔŋ meŋ na baŋ de la sowuli naŋ be Yeng Yelibie 11:11 toŋ neŋ toma. Sontuuribo naŋ be a lantaapuoruu poɔŋ maŋ vɛŋeŋ ka ba yɔɔmine taa popeɛloŋ, a de eŋnyagroŋ sonnɔ ba taaba, ka lɛ vɛŋ ka Naaŋmen nyɛrɛ pugibu. Jehoova maŋ maalɛɛ a lantaapuoruu ka o yɛlɛ nyɛrɛ nimitɔɔre gaabo. Saŋa kaŋa, noba mine maŋ be la a lantaapuoruu poɔŋ a maŋ yele ba taaba yelfaare, a maŋ lɛ yele yɛlɛ naŋ ba seŋ neŋ a kyaara sori na a lantaapuoruu yɛlɛ naŋ kyɛnɛ. A noba ŋa waa ŋa “teɛ nyagre naŋ waa tuo.” O soba yelyaga neŋ o yel-eree na baŋ vɛŋeŋ ka o taaba teɛroŋ sãã. (Hiburu 12:15) Gbɛɛ yaga a noba ŋa taa maŋ boɔrɛɛ kpeɛ̃o neŋ yuori a lantaapuoruu poɔŋ. Ba maŋ ŋmaarɛɛ zirii korɔ ba taaba ka daŋkyagre be la a lantaapuoruu poɔŋ, a yele ka a lantaapuoruu noba ba nɔnɔ bale mine noba, ane a taataa. Ba na baŋ yelee a yɛlɛ ŋa korɔ a lantaapuoruu noba, kyɛbee a lantaapuoruu nembɛrɛ. Ba nɔɛ na baŋ wanɛɛ wɛltaa a lantaapuoruu poɔŋ. Ka teneeŋ kyɛllɛ wono a yɛlɛ ama taa, ho teɛre ka a na soŋ teŋ bee? Ho ba nyɛ ka ana somaŋ yaga ka te de te teɛroŋ zaa eŋ lɛ teŋ na toɔ̃ e ka te neŋ Jehoova niiloŋ e kpeɛŋaa, ka lɛ vɛŋ ka noɔreyeni be a lantaapuoruu poɔŋ bee?
w02 5/15 27 wɛl. 5
Sontuuribo Maŋ Kyɛnɛɛ Yelmennoŋ Poɔŋ
Ka neɛŋ ba wa teɛrɛ yɛlɛ gɛrɛ tɔɔre kyɛbee a “kɔŋ yɛŋ,” o na baŋ de la sããmmo naŋ e kpoŋ waneŋ o taaba zuŋ. O soba maŋ piili yelee yɛlɛ naŋ ba seŋ neŋ a sããna o taaba yoe. A lantaapuoruu nembɛrɛ seŋ ka ba maŋ lonne wieoŋ a kpãã o soba ka o bare yɛlɛ na oŋ erɛ na. Neɛ naŋ taa yɛŋ naŋ e zuluŋ, a maŋ teɛrɛ yɛlɛ gɛrɛ tɔɔre maŋ baŋɛɛ wagre na aŋ seŋ ka o pɔge o noɔre. O ba maŋ derɛ o taaba yelfaare yire neŋ ka noba na nyɛ, kyɛ o maŋ pɔgrɛɛ o taaba. Neɛ naŋ teɛrɛ yɛlɛ gɛrɛ tɔɔre baŋɛɛŋ ka o zele na baŋ de la sããmmo waneŋ, azuŋ o maŋ taaɛ ‘yelmennoŋ o sukyiriŋ.’ O maŋ diree yelmennoŋ korɔ o Kristabitaaba, o ba maŋ manna ba yelsɔglɔ naŋ na baŋ de toɔrɔ waneŋ ba zuŋ korɔ noba. A eɛ maaloo yaga zaa ka a lantaapuoruu taa a yelmeŋɛ deme ŋa taa!
Baabole Poɔ Yelsonne
g20.1 11, daga
Lɛ Hoŋ Na Toɔ̃ Are Eŋkyere Noɔreŋ
“DE NIMIMAAROŊ ZƆƆTOƆ̃ HO EŊKYERE NA”
“Dɔɔ naŋ taa nimimaaroŋ erɛɛ soŋ korɔ o meŋɛ, kyɛ dɔɔ naŋ taa potuo korɛɛ o meŋɛ toɔrɔ.”—YENG YELIBIE 11:17.
Dr. Tim Cantopher sɛge eŋɛɛ o gane kaŋa baŋ boɔlɔ ka Overcoming Stress yelzu naŋ la, “De Nimimaaroŋ Zɔɔtoɔ̃ Neŋ Eŋkyɛre” ka, ka teneeŋ wulo te taaba nimimaaroŋ, a maŋ vɛŋeŋ teŋ taa popeɛloŋ neŋ laafeeloŋ naŋ soma. Kyɛ neɛ naŋ ba wulo o taaba nimimaaroŋ kyɛbee a e potuo soba ba maŋ taa popeɛloŋ, bonso o maŋ tagɛɛ o meŋɛ yi o taaba zieŋ.
Ka teneeŋ wulo te menne nimimaaroŋ, a na toɔ̃ vɛŋeŋ ka te eŋkyere na ŋmaa bare. Aŋa mannoo poɔŋ, te koŋ fere te menne ka te e yɛlɛ mine naŋ gaŋ te faŋa. Te koŋ lɛ boɔlɔ te menne zaala, kyɛbee a teɛre ka te ba taa tɔnɔ meŋ. Yezu Krista yeleeŋ ka, “Nɔŋ ho tɔ a seŋ ho meŋɛ.”—Marko 12:31.