ZANNOO 56
Wala Hoŋ Na Toɔ̃ E Ka Noɔreyeni Naŋ Kyɛnɛ Be A Lantaapuoruu Poɔŋ?
Naa Deevid da yeleeŋ ka: “Nyɛ aŋ e soŋ a e noɔ̃ lɛ, ka babiiri laŋ kpeɛrɛ neŋ noɔreyeni!” Ka teneeŋ wa laŋ neŋ te yɔɔmine, lɛ teŋ meŋ maŋ nyɛ. (Yieme 133:1) Kyɛ, te ba taa a noɔreyeni ŋa weɛ lɛ. Aseŋ ka te zaa mɔɔ te mɔɔbo zaa a erɛ yɛlɛ naŋ na vɛŋ ka noɔreyeni naŋ kyɛnɛ be te kpakyagaŋ.
1. Bo yɛlɛŋ vɛŋ ka Naaŋmen puorebiiri e ba yoŋ lɛ?
Ka hooŋ gaa paaloŋ yuo kaŋa, a gaa a lantaapuoruu lammo, aminekaŋaŋ ho koŋ wono kɔkɔre na baŋ yele na, kyɛ ba na ko boŋ waayaane a wuli bo nɔmmo meŋ. Ananso la wala? Bonso, yel yenaa ka te zaa maŋ zanna, gama na teŋ maŋ de zanna a Baabole na e la bonyeni a donɛɛ lombori zaa. Te maŋ mɔɔrɔŋ ka te wulo taa nɔmmo meŋ. A donɛɛ lombori zie zaa te naŋ be, kyɛ te “maŋ boɔle la Jehoova yuori, a [puoruu] neŋ noɔreyeni.”—Zefanaiya 3:9.
2. Wala hoŋ na baŋ e a vɛŋ ka te noɔreyeni na maaleŋ e kpeɛŋaa?
A Baabole yeleeŋ ka: “Yɛ nɔnɔ taa ne yɛ sukyie zaa.” (1 Piita 1:22) Wala teŋ na baŋ e a de a kawane ŋa toŋ neŋ toma? A ba seŋ ka te maŋ teɛrɛ te taaba gyog-faare yoŋ yɛlɛ, kyɛ aseŋ ka te maŋ kaara gyog-sonne na baŋ taa na. A somaŋ ka ho neŋ ho yɔɔmine naŋ boɔrɔ ho yelboɔree laŋ erɛ yɛlɛ, kyɛ ho neŋ ho yɔɔdɔba ane ho yɔɔpɔgeba naŋ boɔrɔ yelyobo mine meŋ na toɔ̃ laŋ eɛ yɛlɛ. Ane meŋ, ka teneeŋ taa teɛroŋ faa kaŋa a kyaare paaloŋ kaŋa, teŋɛ kaŋa noba, bale kaŋa, bee nemboorɔ mine, aseŋ ka te mɔɔ kyɛ iri a teɛroŋ faa ŋa bare kpɛlɛŋkpɛlɛŋ.—Kanne 1 Piita 2:17.a
3. Ka ho neŋ ho Kristabitɔ kaŋaŋ taa nɔkpeɛne yɛ kpakyagaŋ, wala hoŋ na e?
Yelmeŋɛ la, te taaɛ noɔreyeni te kpakyagaŋ, kyɛ teŋ ba pɛgeyi na zuŋ, saŋa kaŋa te na baŋ yelee yɛlɛ mine ka a kpɛ te yɔɔ kaŋa yaga zaa, kyɛbee ka te e yɛlɛ mine a vɛŋ ka o poɔ a sãã. Lɛ zuŋ ka Naaŋmen Yelbiri na ko te kawane ka, “yɛ dire suuri korɔ taa aŋa lɛ a Daana [Jehoova] naŋ da di suuri ko yɛ; lɛ meŋ ka a fere ka yɛ dire suuri korɔ taa.” (Kanne Kolosi 3:13.) Bebiri zaa, te maŋ eɛ yɛlɛ naŋ maŋ vɛŋ ka Jehoova poɔ sãã, kyɛ Jehoova maŋ di la suuri ko te. Jehoova boɔrɔŋ ka te meŋ dire suuri korɔ te yɔɔmine. Ka hooŋ wa nyɛ ka ho e la yɛlɛ mine naŋ sãã ho yɔɔ kaŋa poɔ, mɔɔ kyɛ de gbɛre a gaa ka ho ne o te maale taa.—Kanne Matio 5:23, 24.b
ZANNE YƐLƐ YAGA POƆ
Ho na zanne nyɛɛ yɛlɛ hoŋ na toɔ̃ e a vɛŋ ka noɔreyeni ane emmaaroŋ be a lantaapuoruu poɔŋ.
Wala hoŋ na e a vɛŋ ka emmaaroŋ be ho neŋ ho taaba kpakyagaŋ?
4. Ka hooŋ taa teɛroŋ faa a kyaare nemboorɔ mine, mɔɔ kyɛ iri a teɛroŋ bare
Te boɔrɔŋ ka te wulo nɔmmo korɔ te yɔɔmine zaa. Kyɛ, ka neɛ kaŋaŋ ba yi paaloŋ na teŋ yi na, kyɛbee ka o sobaŋ ba yi te yiri, saŋa kaŋa a maŋ e la kpeɛŋaa ka te ne ba laŋ e yɛlɛ. Bo yɛlɛŋ na toɔ̃ soŋ te? Kanne Toma 10:34, 35, a kyɛ gyieli a soorebie ŋa yɛlɛ:
Jehoova ba wɛlɛ noba, neɛzaa na baŋ wa leɛ la o puorebie. Wala teŋ na baŋ e tɔgle Jehoova a meŋ taa teɛroŋ soŋ a kyaare noba naŋ yi ziyuo kaŋa?
Bo teɛroŋ faare la ka noba taa kyaare noba naŋ yi paaloŋ yuo kaŋa, teŋɛ kaŋa, bale kaŋa, bee nemboorɔ mine, hoŋ boɔrɔ ka ho tage ho meŋɛ yi a poɔŋ?
Kanne 2 Korinti 6:11-13, a kyɛ gyieli a soorebiri ŋa yɛlɛ:
Wala hoŋ na baŋ e ka nɔmmo na hoŋ taa ko ho yɔɔdɔba ane ho yɔɔpɔgeba naŋ yi ziyuo kaŋa na maaleŋ e zuluŋ yaga zaa?
5. Maŋ yi ho poɔ zaa a dire suuri korɔ ho yɔɔmine, a kyɛ boɔrɔ emmaaroŋ meŋ
Jehoova koŋ baŋ e te yelfaa zaa, azuŋ, o ba boɔrɔ te sudi. Kyɛ, Jehoova naŋ maŋ yi la o poɔ zaa a dire suuri korɔ te. Kanne Yieme 86:5, a kyɛ gyieli a soorebie ŋa yɛlɛ:
Bo ka a Baabole sɛgre ŋa wulibo a kyaare Jehoova sudi?
Bonso ka ho poɔ pɛle yaga zaa a kyaare lɛ na Jehoova naŋ maŋ dire suuri korɔ te na?
Bo yɛlɛ mine la maŋ vɛŋ aŋ e kpeɛŋaa ko te ka te vɛŋ ka emmaaroŋ be te neŋ te yɔɔmine kpakyagaŋ?
Wala teŋ na baŋ e a tɔglɔ Jehoova a vɛŋ ka noɔreyeni be te neŋ te yɔɔmine kpakyagaŋ? Kanne Yeng Yelibie 19:11, a kyɛ gyieli a soorebiri ŋa yɛlɛ:
Ka neɛ kaŋaŋ wa e bo yelkaŋa ka ho suuri iri, wala hoŋ na toɔ̃ e a vɛŋ ka emmaaroŋ naŋ be yɛ kpakyagaŋ?
Saŋa kaŋa te maŋ e la yɛlɛ mine ka lɛ vɛŋ ka te yɔɔ kaŋa suuri iri. Ka lɛŋ wa e, wala aŋ seŋ ka ho e? Ŋmɛ a VIDIO, a kyɛ gyieli a soorebiri naŋ tu na yɛlɛ.
A vidio poɔŋ, bo ka te yɔɔpɔge na e a vɛŋ ka emmaaroŋ be o neŋ o yɔɔpɔge na kpakyagaŋ?
6. De ho teɛroŋ eŋ ho yɔɔmine gyog-sonne eŋɛŋ
Ka teneeŋ peɛle te yɔɔmine, a maŋ vɛmeŋ teŋ baŋ ba gyog-sonne ane ba gbɛ ŋmɛ zaa. Wala teŋ na toɔ̃ e a de te teɛroŋ eŋ gyog-sonne na ba naŋ taa na eŋɛŋ? Ŋmɛ a VIDIO, a kyɛ gyieli a soorebiri ŋa yɛlɛ.
Boŋ na baŋ soŋ bo ka ho de ho teɛroŋ eŋ ho yɔɔmine gyog-sonne eŋɛŋ?
Jehoova maŋ de la o teɛroŋ eŋ te gyog-sonne eŋɛŋ. Kanne 2 Tungkori 16:9a, a kyɛ gyieli a soorebiri ŋa yɛlɛ:
Jehoova maŋ de la o teɛroŋ eŋ ho gyog-sonne eŋɛŋ, wala hoŋ teɛre kyaare lɛ?
Ka hooŋ nyɛ diamond, o maŋ nyegrɛŋ soŋ zaa a veɛlɛ, kyɛ ka hooŋ mãã ho meŋɛ a kaa o soŋ, ho na nyɛŋ ka dɛgre fẽẽ be la o eŋɛŋ. Kyɛ, a dɛgre fẽẽ naŋ be o eŋɛŋ ba wuli ka o ba e nanee. Lɛ meŋ la, ho yɔɔmine na ba pɛgeyi, kyɛ ba e la nanee a ko Jehoova
NOBA MINE MAŊ YELEŊ KA: “Sɛre maŋ na di suuri ko neɛ kaŋa na, aseŋ ka o soba de o yel-erre wuli ka o boɔrɛɛ N sudi.”
Bonso aŋ seŋ ka ho maŋ e siri ka ho dire suuri korɔ ho taaba?
A ZANNOO YELNIMIZEERE
Ka hooŋ maŋ dire suuri korɔ ho yɔɔmine, a kyɛ lɛ wulo nɔmmo korɔ ba meŋ, a na vɛmeŋ ka noɔreyeni be a lantaapuoruu poɔŋ.
Bo Hoŋ Zanne
Boŋ na baŋ soŋ bo ka ho iri teɛroŋ faare hoŋ taa kyaare nemboorɔ mine yi ho teɛroŋ poɔŋ?
Ka ho neŋ ho Kristabitɔ kaŋaŋ taa nɔkpeɛne yɛ kpakyagaŋ, wala aŋ seŋ ka ho e?
Bonso hoŋ boɔrɔ ka ho tɔglɔ Jehoova a dire suuri korɔ ho taaba?
YƐLƐ MINE NAŊ LƐ BEBE
Boŋ na baŋ soŋ te ka te ta dire te taaba sɛrɛɛ? Kaa a vidio ŋa a nyɛ lɛ Yezu yelmannaa kaŋa naŋ na toɔ̃ soŋ te.
Ka te deme gbaŋ bebe, kyɛ aseŋ ka te sɔre te yelbebe sudi bee?
“Sɔrebo—Yelnimizeɛ Kaŋa Naŋ Waana Neŋ Emmaaroŋ” (A Watchtower, November 1, 2002)
Kaa a vidio ŋa a nyɛ yɛlɛ naŋ soŋ noba mine baŋ wulo nɔmmo korɔ nemboorɔ zaa.
Ka ho neŋ neɛ kaŋaŋ wa taa nɔkpeɛne kaŋa, wala hoŋ na toɔ̃ e a sɛgre a yɛlɛ wieoŋ sɛre kyɛ ka a sãã emmaaroŋ naŋ be a lantaapuoruu poɔŋ na? Kanne a yɛlɛ ŋa a nyɛ a noɔre iribo.
“Yɛ De Nɔmmo A Sɛgre Neŋ Nɔkpeɛne Zaa Yɛ Naŋ Taa” (A Watchtower, May 2016)
a Ka Kristabieŋ wa taa baaloŋ lɔnnaa kaŋa, wala oŋ na toɔ̃ e a wuli ka o nɔŋ la o yɔɔmine? Yɛlɛ Mine Ba Naŋ Wuli A Muni 6 na soŋ teŋ ka te nyɛ a noɔre iribo.
b Ka te neŋ te Kristabitaabaŋ laŋ tonɔ toma ka nɔkpeɛne kpɛ te kpakyagaŋ a kyaare a toma yɛlɛ, wala aŋ seŋ ka te e? Aseŋ ka te de a yɛlɛ gaaneŋ sɛrɛɛ diibu zie a te sɛgraa beŋ bee? Yɛlɛ Mine Ba Naŋ Wuli A Muni 7 na soŋ teŋ ka te nyɛ a soorebie ŋa nɔɛ iribo.