Jehoova Maŋ Be La Te Zieŋ Wagre Zaa

1-2. (a) Bonso teŋ na baŋ yelka ka teneeŋ wa tuoro yelkpeɛne te ba maŋ e te yoŋ? (b) Bo yɛlɛ teŋ na zanne a zannoo ŋa poɔŋ?

KA TENEEŊ wa tuoro yelkpeɛne yaga zaa te zemmo poɔŋ, te na baŋ piili teɛrɛŋ ka te eɛ te yoŋ a be tuukpoŋ kaŋa poɔŋ a ba baŋ zie teŋ na tu yi o poɔ. Kyɛ, ka teneeŋ wa tuoro yelkpeɛne te ba maŋ e te yoŋ. Bonso te sazu Saa na maŋ be la te zieŋ wagre zaa. O maŋ nyɛrɛɛ yelkpeɛne na zaa teŋ tuoro na meŋ. O lɛ eŋɛɛ noɔre ka, o na soŋ teŋ ka te are a yelkpeɛne zaa noɔreŋ. Jehoova yi la nɔmmo poɔŋ a eŋ o yelmeŋɛ puorebie kaŋa zaa noɔre ka: “N na soŋ boŋ.”—Aiz. 41:10.

² A zannoo ŋa poɔŋ, te na zannɛɛ soe anaare mine Jehoova naŋ maŋ tu a sonnɔ te saŋa na teŋ wa tuoro yelkpeɛne. A dɛndɛŋ soba, Jehoova maŋ wulo teŋ sori. Ayi soba, Jehoova maŋ kaarɛɛ te zu. Ata soba, Jehoova maŋ goro teŋ. Anaare soba, Jehoova maŋ diiree te sukyie. Jehoova eŋɛɛ noɔre ko te ka, yelkpeɛne zaa teŋ na tuore te zemmo poɔŋ, haali ka a naŋ e kpeɛŋaa seŋ wala, kyɛ o daaŋ koŋ gyɛ te bare zaa. Azuŋ, te ba e te yoŋ, bonso Jehoova be la te zieŋ.

JEHOOVA MAŊ WULO TEŊ SORI

3-4. Sobuo ka Jehoova maŋ tu a wulo te sori? (Yieme 48:14)

³ Kanne Yieme 48:14. Jehoova baŋɛɛŋ ka te koŋ baŋ wulo te menne sori. Azuŋ, te boɔrɛɛ o sommo ka o wulo te sori. Sobuo ka Jehoova maŋ tu a wulo o yelmeŋɛ puorebiiri naŋ bebe zenɛ ŋa sori? O maŋ tu la a Baabole eŋɛŋ a wulo te sori. (Yiem. 119:105) Jehoova maŋ tu la o Yelbiri a Baabole eŋɛŋ a sonnɔ te teŋ derɛ gbɛɛ naŋ soma. Yɛlɛ naŋ be a Baabole poɔŋ maŋ soŋ teŋ teŋ taa gyog-sonne. A yɛlɛ ama maŋ vɛŋeŋ teŋ taa popeɛloŋ pampana, a lɛ vɛŋ teŋ baŋ ka te na nyɛɛ nyɔvore naŋ ba taa baaraa nendaare kaŋa.a Aŋa mannoo poɔŋ, Jehoova wulo teŋ ka te maŋ dire suuri korɔ taa, a e yelmeŋɛ deme yelzaa poɔŋ, a maŋ lɛ yi te sukyie poɔŋ meŋ a nɔnɔ taa. (Yiem. 37:8; Hib. 13:18; 1 Pit. 1:22) Ka teneeŋ wa wulo te taaba a gyog-sonne ŋa, a maŋ vɛŋeŋ teŋ e bidɔgreba, kultaa deme, ane zɔmenne naŋ soma.

⁴ Kyɛ lɛ yoŋ naane, Jehoova lɛ vɛŋɛɛŋ baŋ sɛge yelkpeɛne noba mine naŋ da tuore, ane lɛ na a yɛlɛ naŋ da dɔɔnɔ ba aseŋ eŋ a Baabole poɔŋ. (1 Kor. 10:13; Gyi. 5:17) Ka teneeŋ wa kanne a noba ŋa yɛlɛ, a de yelnimizeere na teŋ zanne yi be na tonɔ neŋ toma, a maŋ toɔ̃ soŋ teŋ soe ayi mine poɔŋ. A dɛndɛŋ soba, te maŋ wa nyɛŋ ka noba mine meŋ daaŋ tuoree yelkpeɛne na teŋ tuoro na a kyɛ toɔ̃ are a noɔreŋ te ta a baaraa. Azuŋ, te maŋ nyɛŋ ka te ba e te yoŋ. (1 Pit. 5:9) Ayi soba, a maŋ soŋ teŋ teŋ baŋ yɛlɛ teŋ na baŋ e a toɔ̃ are te yelkpeɛne na noɔreŋ.—Uro. 15:4.

5. Aŋ mine ka Jehoova maŋ tu ba zie a wulo te sori saŋa na teŋ kyɛnɛ a nyɔvore sori zuŋ na?

⁵ Jehoova maŋ lɛ tu la te yɔɔdɔba ane te yɔɔpɔgeba zieŋ a wulo te sori.b Aŋa mannoo poɔŋ, gbandige zukaareba maŋ gɛrɛɛ lantaapuoree a eŋnɛ ba faŋa. Yelyaga na baŋ maŋ tere na maŋ eŋɛɛ te sagediibu faŋa, a lɛ soŋ ka noɔreyeni na teŋ taa na maaleŋ e kpeɛŋaa. (Tom. 15:40–16:5) A lantaapuoruu nembɛrɛ meŋ maŋ moɔrɛɛ ba moɔbo zaa ka ba soŋ te ka te neŋ Jehoova niiloŋ na maaleŋ e kpeɛŋaa. (1 Pit. 5:​2, 3) Bidɔgreba meŋ maŋ wulee ba biiri Jehoova yɛlɛ, a sonnɔ ba baŋ maŋ teɛrɛ yɛlɛ gɛrɛ tɔɔre, a maŋ lɛ soŋ ba baŋ kanna a Baabole bebiri zaa, a gɛrɛ a lammore, ane a naaŋ moɔloo wagre zaa. (Yeng. 22:6) Te yɔɔpɔgeba naŋ kyille meŋ ewuli soŋ maŋ toɔ̃ soŋɛɛ pɔgsaree naŋ be a lantaapuoruu poɔŋ na. Te yɔɔpɔgeba naŋ kyille kawaŋ-sonne ane ba faŋa emmo na baŋ soŋɛɛ te yɔɔpɔgeba naŋ e baapaalba na.—Tit. 2:​3-5.

6. Ka teneeŋ boɔrɔ ka te nyɛ tɔnɔ yi sowuli na Jehoova naŋ korɔ te na poɔŋ, wala aŋ seŋ ka te?

⁶ Jehoova maŋ mɔɔ la o moɔbo zaa a derɛ sowuli naŋ seŋ neŋ korɔ te. Wala teŋ na baŋ e a de wuli ka te niŋe paalɛɛ yɛlɛ na zaa Jehoova naŋ e ko te na? Yeng Yelibie 3:​5, 6 yeleeŋ ka: “Dɛle Jehoova neŋ ho sukyiri zaa, ta dɛle ho meŋɛ yɛlɛ bammo.” Ka teneeŋ wa e lɛ, “O na vɛmeŋ ka [te] soe zaa tori.” Lɛ wuleeŋ ka o na soŋ teŋ ka te tage te menne yi yɛlɛ naŋ na baŋ de toɔrɔ waneŋ te zuŋ, ka lɛ vɛŋ ka te taa zeŋ laafeɛ. Te poɔ pɛlɛɛŋ yaga zaa Jehoova naŋ baŋ te, a lɛ nɔŋ te yaga zaa, ka lɛ vɛŋ oŋ maŋ de sowuli naŋ seŋ neŋ korɔ te.—Yiem. 32:8.

JEHOOVA MAŊ KAARƐƐ TE ZU

7. Sobobo poɔŋ ka Jehoova maŋ tu a kaara te zu? (Filipae 4:19)

⁷ Kanne Filipae 4:19. Jehoova maŋ wulo teŋ yɛlɛ naŋ na vɛŋ ka te neŋ o niiloŋ na maaleŋ e kpeɛŋaa. Kyɛ lɛ yoŋ naane, o maŋ lɛ soŋ teŋ teŋ nyɛrɛ bondirii, bonsuurii, ane gaazie. (Mat. 6:33; 2 Tɛs. 3:12) Aneazaa ka a boma ama yɛlɛ fɛrɛɛ te zaa, kyɛ Jehoova eŋnɛ teŋ faŋa ka te ta vɛŋ ka a yɛlɛ dɔɔnɔ te te gaali. Bonso ka Jehoova yeli lɛ? Ananso la ka, Jehoova daaŋ koŋ gyɛ o yelmeŋɛ puorebiiri bare saŋa na baŋ wa boɔrɔ o sommo nimizeɛ̃ na. (Mat. 6:8; Hib. 13:5) Azuŋ, a yelnimizeɛ meŋɛ la ŋa, a ba seŋ ka te daaŋ taa bonnoo zaa ka Jehoova na baŋ kaaɛ te zu velaa.

8. Bo ka Jehoova da e ko Deevid?

⁸ Te na baŋ zannɛɛ yelkaŋa yi sori na Jehoova naŋ da tu a kaara Deevid zu na. Saŋa na Deevid naŋ da zo kpɛ moɔ na, zemmo da ba e mɔlɔ koo fẽẽ zaa. Kyɛ, Jehoova da kaarɛɛ o neŋ o dɔba na zu, a korɔ ba boma yɛlɛ naŋ fɛrɛ ba meŋ. Yuomo mine puoriŋ, Deevid da zeŋɛɛŋ a leɛteɛre soe na Jehoova naŋ tu a kaa o zu na yɛlɛ. Lɛ da vɛŋɛɛŋ oŋ sɛge ka: “N daaŋ eɛ baapaalaa kyɛ pampana ŋa yɛŋ N leɛ la neŋnyaaŋaa, kyɛ N naŋ ba nyɛ baŋ gyɛ sontuuro bare zaa, kyɛbee ka o bibiiri yoɔrɔ sɔrɔ bondirii ka ba di.” (Yiem. 37:25) Aminekaŋaŋ, ka hooŋ meŋ leɛteɛre yɛlɛ na zaa Jehoova naŋ e ko bo ho zemmo poɔŋ na yɛlɛ gaa tɔɔre, ho na wa nyɛŋ ka Jehoova sereŋ maŋ kaarɛɛ o yelmeŋɛ puorebiiri zaa zu velaa.

9. Sobuo ka Jehoova maŋ tu a kaara o puorebiiri naŋ tuoro sããmmo bɛrɛ zu zenɛ ŋa? (Kaa a fotori.)

⁹ Ka teneeŋ wa tuore sããmmo kpoŋ kaŋa, Jehoova maŋ kaaɛ te zu velaa. Aŋa mannoo poɔŋ, a dɛndɛŋ yuoŋ kɔɔ na saŋa, kɔŋ kaŋa da leeŋ. Azuŋ, Kristabiiri naŋ da be ziyobo da de la boma toɔle ka ba de te ko ba yɔɔmine naŋ tuoro a yelkpeɛŋaa ŋa. (Tom. 11:​27-30; Uro. 15:​25, 26) Zenɛ ŋa meŋ, lɛ ka Jehoova puorebiiri yuoro ba nuuri a terɛ boma. Ka sããmmo kpoŋ kaŋaŋ wa e, Jehoova maŋ tɔɛ o puorebiiri sukyie baŋ de boma aŋa koɔ̃, bondirii, bonsuurii, ane tẽẽnɛɛ te ko te yɔɔmine naŋ tuore a sããmmo kpoŋ na. Te yɔɔmine naŋ tonɔ a meɛbo toma meŋ maŋ leɛ maalɛɛ te yɔɔmine yie ane a Lammoziiri naŋ sãã na. Te yɔɔmine na maŋ mɔɔŋ a dii ba yɔɔmine naŋ tuore a sããmmo kpoŋ na sukyie, a lɛ soŋ ba baŋ moɔ̃ niŋe a naŋ puoro Jehoova.c

10-11. Bo yɛlɛ teŋ na baŋ zanne yi Borys zemmo yɛlɛ na poɔŋ?

¹⁰ Ka noba naŋ ba puoro Jehoova meŋ, Jehoova maŋ kaarɛɛ ba meŋ zu bee? Ɛɛ. Azuŋ, te meŋ maŋ boɔrɛɛ soe teŋ na baŋ tu a wulo noba naŋ ba puoro Jehoova nimimaaroŋ. (Gal. 6:10) Lɛ maŋ vɛŋeŋ teŋ toɔ̃ soŋ noba baŋ wa baŋ Jehoova yɛlɛ. Te de Borys zemmo yɛlɛ ŋa wuli a muni. O eɛ sakuu kaŋa neŋkpoŋ Ukraine paaloŋ. Aneazaa ka Borys da ba e Jehoova Sieree Deme kaŋa, kyɛ o maŋ wulee o sakuubiiri naŋ e Jehoova Sieree Deme nimimaaroŋ, a da taa gyeremɛ meŋ ko yɛlɛ na baŋ sagedi na. Saŋa na a zɔɔre naŋ wa piili Ukraine paaloŋ na, zie na Borys naŋ da be na da ba taa gomeŋɛ. Azuŋ, o da boɔrɔŋ ka o zo yi be a gaa a paaloŋ lombori kaŋa naŋ taa gomeŋɛ. Te yɔɔmine na da mɔɔ la ba moɔbo zaa a somoo. A puoriŋ, Borys da gaaɛ a Yezu kũũ Leɛteɛroo lammo na. Saŋa na Borys naŋ wa teɛre a yɛlɛ ama zaa na, ŋaaŋ oŋ yeli: “Jehoova Sieree Deme da wuleeŋ ka ba boɔrɛɛ N yɛlɛ, ba da kaaɛ N zu meŋ velaa. N niŋe paalɛɛ yɛlɛ na zaa baŋ e ko ma na.”

¹¹ Ka teneeŋ wa nyɛ noba naŋ puoro Jehoova neŋ noba naŋ ba puoro Jehoova naŋ wa be awonaa poɔŋ, aseŋ ka te mɔɔ a de sommo naŋ seŋ neŋ ko ba. Lɛ eebo na wuliŋ ka te tɔglɛɛ Jehoova nimibaaloŋ na. (Luk. 6:​31, 36) Te maŋ taaɛ teɛretɔ ka sommo na teŋ de korɔ noba na na tɔɛ ba sukyie, ka lɛ vɛŋ ka ba wa leɛ Yezu potuuribo. (1 Pit. 2:12) Kyɛ lɛ zaa naŋ la, ka teneeŋ wa soŋ ba, a maŋ vɛŋeŋ teŋ taa popeɛloŋ, bonso neɛ naŋ terɛ taaɛ popeɛloŋ yaga.—Tom. 20:35.

JEHOOVA MAŊ GORO TEŊ

12. Bo noɔre ka Jehoova eŋ a kyaare lɛ na oŋ na go o puorebiiri na? (Yieme 91:​1, 2, 14)

¹² Kanne Yieme 91:​1, 2, 14. Te wagre ŋa poɔŋ, Jehoova eŋɛɛ noɔre ko te ka o na go teŋ a yi yelzaa naŋ na baŋ sãã te ne o niiloŋ na. Azuŋ, Jehoova koŋ sage ka Setaana sãã yelmeŋɛ puoruu kpɛlɛŋkpɛlɛŋ. (Gyn. 17:15) Ka “a dɔgroŋ kpoŋ” wa piili, te na baŋ taaɛ sagediibu naŋ e kpeɛŋaa ka Jehoova na faa teŋ.—Yel. 7:​9, 14.

13. Sobobo poɔŋ ka Jehoova maŋ tu a goro te yeni yeni zaa?

¹³ Jehoova maŋ go la te yeni yeni zaa bee? Ɛɛ. Sobobo poɔŋ oŋ maŋ tu a e lɛ? O maŋ tu la o Yelbiri a Baabole eŋɛŋ a soŋ te teŋ baŋ faaloŋ neŋ soŋ tɛɛtɛɛ. (Hib. 5:14) Ka teneeŋ wa de sowuli naŋ be a Baabole poɔŋ na tonɔ neŋ toma, a maŋ soŋ teŋ teŋ tage te menne yi yelzaa naŋ na baŋ sãã te neŋ Jehoova niiloŋ na eŋɛŋ. Te maŋ lɛ tagɛɛ te menne yi yelzaa naŋ na baŋ de toɔrɔ waneŋ te zuŋ. (Yiem. 91:4) Jehoova maŋ lɛ tu la a lantaapuoruu noba zie a korɔ te gomeŋɛ. (Aiz. 32:​1, 2) Ka teneeŋ wa laŋna neŋ noba naŋ nɔŋ Jehoova, a maŋ lɛ de o sowuli meŋ tonɔ neŋ toma, ba maŋ eŋnɛ teŋ faŋa, a lɛ soŋ te teŋ tage te menne yi yelzaa naŋ na baŋ pere te eŋɛŋ.—Yeng. 13:20.

14. (a) Bonso ka Naaŋmen maŋ tere sori teŋ tuoro yelkpeɛne? (b) Bo ka yɛlɛ naŋ be Yieme 9:10 vɛŋ teŋ baŋ peɛlaaŋ? (Kaa a muni zie yɛlɛ.)

¹⁴ Saŋa kaŋa naŋ pare, ka noba mineŋ wa wa ka ba pere kyɛbee a ko Jehoova puorebiiri, o da maŋ go baŋ. Kyɛ, wagre zaa naane oŋ da maŋ erɛ lɛ. Saŋa kaŋa, ‘yɛlɛ te naŋ ba kaara soriŋ maŋ toɔ̃ pɔge’ teŋ. (Ikil. 9:11) Ane meŋ, saŋa kaŋa Jehoova maŋ terɛɛ sori ka o puorebiiri tuore dɔgroŋ ane kũũ gba. Yelmennoŋ na o puorebiiri naŋ maŋ di koo na maŋ wuliŋ ka Setaana eɛ ziri-ŋmaara. (Joob 2:​4-6; Mat. 23:34) Lɛ neŋ o zu ka Jehoova erɛ zenɛ ŋa. Yelmeŋɛ la, Jehoova koŋ iri yelkpeɛne na teŋ tuoro na bare, kyɛ te na baŋ taaɛ sagediibu ka o daaŋ koŋ gyɛ noba naŋ nɔmoo bare zaa.d—Yiem. 9:10.

JEHOOVA MAŊ DIIREE TE SUKYIE

15. Sobuo ka puore sɔroo, a Baabole, ane te Kristabitaaba maŋ tu a diire te sukyie? (2 Korinti 1:​3, 4)

¹⁵ Kanne 2 Korinti 1:​3, 4. Saŋa kaŋa, te maŋ tuoree eŋkyere yɛlɛ ane yɛlɛ naŋ dɔɔnɔ sukyiri. A yɛlɛ ama zaa na baŋ vɛŋeŋ ka te dire woore. Aminekaŋaŋ, ho tuoree a sukyir-dɔŋ yɛlɛ ŋa mine ka lɛ vɛŋ hoŋ teɛre ka ho eɛ ho yoŋ. Aminekaŋaŋ, ho na baŋ soorɛɛ ho meŋɛ ka, ‘Neɛ kaŋa baŋɛɛ lɛ na a yɛlɛ ŋa naŋ dɔɔnɔ ma seŋ bee?’ Ɛɛ. Jehoova baŋɛɛ lɛ na a yɛlɛ naŋ dɔɔnɔ bo aseŋ. Azuŋ, o maŋ ‘moorɔ korɔ boŋ a ho woore zaa poɔ.’ Sobuo oŋ maŋ tu a e lɛ? Ka teneeŋ wa koŋ sɔre Jehoova, o maŋ ko teŋ a “Naaŋmen maaroŋ naŋ gaŋ bammo zaa na.” (Fil. 4:​6, 7) Ka teneeŋ wa kanna Naaŋmen Yelbiri na, o maŋ dii la te sukyie. A yi a Baabole poɔŋ, Jehoova maŋ vɛŋeŋ teŋ baŋ ka o nɔŋ teŋ, a maŋ lɛ wuli te yɛlɛ naŋ vɛŋ teŋ waa yɛmbaŋneba, a lɛ korɔ te teɛretɔ meŋ. Ka teneeŋ wa gaa a lammozie meŋ, te maŋ zannɛɛ yɛlɛ naŋ eŋnɛ faŋa, ka te yɔɔmine meŋ maŋ eŋnɛ te faŋa.

16. Bo yɛlɛ hoŋ zanne yi Nathan neŋ Priscilla zemmo yɛlɛ na poɔŋ?

¹⁶ Aŋa lɛ te naŋ yeli na, Jehoova maŋ tu la a Baabole eŋɛŋ a diire te sukyie, a lɛ eŋnɛ te faŋa meŋ. Te de Nathan neŋ Priscilla naŋ be United States paaloŋ zemmo yɛlɛ manne neŋ a yɛlɛ ŋa. Yuomo mine naŋ pare, ba da gaaɛ zie ba naŋ boɔrɔ naaŋ moɔleba yaga ka ba te soŋ a naaŋ moɔloo toma. Nathan yeleeŋ ka: “Te da baŋɛɛŋ ka Jehoova na soŋ teŋ ka yelzaa kyɛŋ soŋ.” Kyɛ, saŋa na baŋ wa ta a zie na baaloŋ kaŋa da kpɛ baŋ saŋa na baŋ ba kaara soriŋ, ka ba libi-yɛlɛ meŋ da e basaa. Lɛ da vɛŋɛɛŋ ka Nathan neŋ Priscilla leɛ gaa yiri. Kyɛ, libi-yɛlɛ da naŋ eɛ kpeɛŋaa ko ba. Nathan lɛ yeleeŋ ka: “N da maŋ soorɛɛ N meŋɛ ka bonso ka Naaŋmen ba vɛŋ ka yɛlɛ kyɛŋ soŋ ko te aŋa lɛ na teŋ da kaara soriŋ na. N da teɛrɛɛŋ ka, N eɛ yelfaa kaŋa bee.” Wagre naŋ gɛrɛ poɔŋ na, Nathan neŋ Priscilla wa nyɛɛŋ ka Jehoova ba zagre ba bare saŋa na baŋ wa be awonaa poɔŋ na. Nathan yeleeŋ ka: “Saŋa na teŋ da tuoro a yelkpeɛne ŋa zaa na, a Baabole da la zie na teŋ maŋ nyɛ sowuli ane faŋa emmo. Te da de la te teɛroŋ eŋ lɛ na Jehoova naŋ sonnɔ te teŋ toɔ̃ are a yelkpeɛne noɔreŋ, lɛ vɛŋɛɛŋ teŋ baŋ ka nendaare kaŋa naŋ waana Jehoova na lɛ soŋ teŋ saŋa na teŋ wa tuoro yelkpeɛne na.”

17. Sobuo ka te yɔɔpɔge Helga maŋ tu a nyɛ faŋa emmo? (Kaa a foto.)

¹⁷ Te yɔɔmine meŋ na baŋ dii la te sukyie. Sobuoŋ? Te yɔɔpɔge Helga be la Hungary paaloŋ. Yɛ vɛŋ ka te de o zemmo yɛlɛ ŋa manne neŋ a yɛlɛ. Te yɔɔpɔge Helga tuoree yelkpeɛne yaga zaa o zemmo poɔŋ yuomo yaga, azuŋ saŋa kaŋa o pulaa zaaŋ maŋ teɛrɛ, a maŋ lɛ vɛŋeŋ oŋ teɛre ka o ba dɔgle bonzaa zuŋ. Kyɛ, o wa nyɛɛ lɛ na Jehoova naŋ tu a lantaapuoruu noba zieŋ a dii o sukyiri. Ŋaaŋ oŋ yeli: “N da tonɛɛ toma a kaara N meŋɛ, ane N bie naŋ beɛrɛ, a da lɛ tuoro yelkpeɛne yaga meŋ, saŋa na zaa N faŋa naŋ wa baara na, Jehoova da maŋ ko maŋ faŋ-paalaa. A yi a yuomo 30 ŋa zaa poɔŋ, N wa nyɛɛŋ ka Jehoova maŋ diiree N sukyiri bebiri la bebiri zaa. Saŋa kaŋa o maŋ tu la yelbi-sonne na N yɔɔmine naŋ maŋ yeli a de eŋ ma faŋa eŋɛŋ a dii N sukyiri. Saŋa na zaa maŋ wa boɔrɔ faŋa emmo, neɛ kaŋa maŋ sɛgɛɛ text message a de toɔle ma fone zuŋ, kyɛbee a sɛge yɛlɛ eŋ gane poɔŋ a de wa ko ma, ba mine meŋ maŋ pugi maŋ a eŋ ma faŋa.”

18. Sobuo teŋ na baŋ tu a dii te taaba sukyie?

¹⁸ Te meŋ taaɛ apoɔsori ka te tɔglɔ te Naaŋmen na a meŋ diire taa sukyie. Sobuo teŋ na baŋ tu a e lɛ? Ka ba naŋ wa yele yɛlɛ korɔ te aseŋ ka te maŋ mãã te menne a kyɛllɛ ba yɛlɛ na soŋ. Aseŋ ka te maŋ de kɔkɔmaaroŋ yele neŋ yɛlɛ korɔ ba. Te na baŋ lɛ eɛ yɛlɛ mine meŋ a de soŋ ba. (Yeng. 3:27) Aseŋ ka te maŋ moɔrɔ ka te diire noba naŋ dire dɔgɛɛ sukyie. Noba naŋ ba e Jehoova puorebiiri meŋ poɔ la be. Ka noba mine te naŋ baŋ wa dire woore, a beɛrɛ, kyɛbee a tuoro eŋkyere yɛlɛ mine, te na baŋ gaa te puore baŋ, a mãã te menne a kyɛlle woŋ ba yɛlɛ, a lɛ moɔ a manne a Baabole poɔ yɛlɛ naŋ diire sukyiri na ko ba. Jehoova la a “mooreteroo zaa Naaŋmen,” azuŋ ka teneeŋ tɔgloo te na soŋɛɛ te yɔɔmine ka ba are ba yelkpeɛne noɔreŋ, a lɛ soŋ sukyiri-sonne deme ka ba boɔrɔ ka ba wa puoro Jehoova.—Mat. 5:16.

JEHOOVA NA MAŊ SONNƆ TEŊ WAGRE ZAA

19. Bo yɛlɛ ka Jehoova maŋ erɛ korɔ te? Bo yɛlɛ teŋ na baŋ e a de wuli ka te tɔglooŋ?

¹⁹ Jehoova maŋ kaarɛɛ noba naŋ nɔmoo zu velaa zaa. Ka teneeŋ wa tuoro yelkpeɛne, a saŋa oŋ maŋ kpimare te. Aŋa lɛ na bidɔgrɔ naŋ maŋ kaara o bie zu velaa na, lɛ neŋ o zu ka Jehoova meŋ maŋ kaara o puorebiiri zu velaa. O maŋ wulo teŋ sori, a kaara te zu velaa, a goro te, a maŋ lɛ diire te sukyie meŋ. Ka te yɔɔmineŋ wa tuoro yelkpeɛne ka te sonnɔ ba, a eŋnɛ ba faŋa meŋ, lɛ na wuliŋ ka te tɔglɛɛ te Saa Jehoova naŋ taa nɔmmo yaga zaa na. Yelmeŋɛ la, te na tuoree yelkpeɛne ane sukyiri-kyɛre yɛlɛ, kyɛ Jehoova boɔrɔŋ ka te baŋ peɛlaaŋ ka, o daaŋ koŋ gyɛ te bare zaa. Jehoova meŋɛ eŋ teŋ noɔre ka: “Ta zoro dabeɛ̃, bonso N be la ho zieŋ.” (Aiz. 41:10) A Baabole sɛgre ŋa vɛŋɛɛŋ teŋ baŋ ka Jehoova be la te zieŋ, azuŋ te daaŋ koŋ e te yoŋ zaa.