Pane Tus i Aqane Lapa Itre Joxu

18 Thupene lai, hnei Dravita hna ngaane la angetre Filisiti, me lepi angatr asë. Nge hnei angeic hna thapa la traon ne Gatha me itre hnepadro ezin. 2 Ame hnei Dravita hna ngaane la angetre Moaba, matre hnei angatr hna nyihlue i Dravita, me kuië mani koi nyidrë.

3 Ezine Hamath, hnei Dravita fe hna ngaa Hadadeza joxu ne Zoba. Ngöne la ijine cili, hnei Hadadeza hna tro troa acatrene la musi angeic e Euferate. 4 Matre Dravita a thapa pi la 1000 lao ikatr, me 7000 lao soc ka ti hos, me 20000 lao soc ka trongë ihnadro. Thupene lai, angeic a sa pi la itre wacane la itre hos ka huli ikatr, ngo hna nue pe hi la 100 lao hos. 5 Nge hnene la angetre Suria e Damaseko, hna traqa troa xatua Hadadeza, joxu ne Zoba. Ngo hnei Dravita hna humuthe la 22000 lao soc i angetre Suria. 6 Thupene lai, Dravita a acile jë la itre soc thene la angetre Suria e Damaseko, nge angatr a nyihlue i Dravita jë, me kuië mani koi nyidrë. Nge ngöne la nöjei jë i Dravita, Iehova pala hi a xatua Dravita, matre hune* jë Dravita. 7 Nge Dravita a xome pi la itre ipetre gool ka raon ne la itre soc i Hadadeza, me bëeke fë a tro Ierusalema. 8 Nge nyimutre fe la itre kopa hnei Dravita hna bëeke fë qa Tibath me Kuni, lue traon i Hadadeza. Nge hnei Solomona hna huliwane lai kopa troa kuca la Hnagejë kopa, me itre poto, me itre xa ewekë kopa.

9 Nge drenge hë Toi, joxu ne Hamath laka, ase hë Dravita lepe la trongene isi i Hadadeza joxu ne Zoba. 10 (Hnei Hadadeza hna majemine isi me Toi), matre hnei Toi hna canga upi Hodorama, nekö i angeic koi Dravita joxu. Hna upi Iorama troa hnyingë pengöi Dravita, me qaja aloine la hnei nyidrëti hna ngaa Hadadeza. Iorama a traqa fë pi koi Dravita la itre ewekë gool, me sileva, me kopa. 11 Nge Dravita joxu a amë acone* ju la itre mo cili thatraqane la hmi Iehova, memine la sileva me gool, hna traqa fë qaathene la itre xa nöj: Qaathei Edoma, me Moaba, me Amona, me Filisiti, me Amaleka.

12 Nge ame Abisai nekö i Zeruia, hnei angeic hna humuthe la 18000 lao atre Edoma, ngöne la Hnathupe Sotr. 13 Dravita a acile ju la itre soc e Edoma, matre itre hlue i nyidrëti pë hë la nöjei atre Edoma. Haawe, ngöne la nöjei jë i Dravita, Iehova pala hi a xatua Dravita, matre hune* jë Dravita. 14 Dravita pala hi a mus e Isaraela asë, me amekötine la nöje i nyidrë, me isigöline la meköt kowe la nöjei atrene la nöj. 15 Ioaba nekö i Zeruia la tane soc, nge Iehosafata nekö i Ahiluda la atre feja tus,* 16 nge Zadoka nekö i Ahituba, me Ahimelek nekö i Abiathara la lue atre huuj, nge Savesa la sekreter. 17 Nge Benaia nekö i Iehoiada la tane la angetre Kerethi me Pelethi, nge itre nekö i Dravita la itre atre ka hlemu catr thupei Dravita.