Pane Tus i Aqane Lapa Itre Joxu

20 Ngöne la kola xejë la macatre, hmekune lo itre joxu a tro troa isi, hnei Ioaba hna elemekene la ketre trongene isi, me lepe la nöje i angetre Amona. Angeic a tro ju troa cile xötreithi Raba, ngo lapa ju pë hë Dravita e Ierusalema. Ame hnei Ioaba hna lepi Raba me apatren. 2 Nge Dravita a xome pi la korona qa hune la he i Malekam,* nge ca talane* gool la ehacene lai korona, nge hna thaipin ej hnei itre etë ka tru thupen. Hna atë la korona cili hune la he i Dravita, nge nyidrëti a xome pi fe qa hnine la traon, la ketre trengamo ka tru. 3 Nge Dravita a xome pi la itre atrene la traon, me upi angatr troa huliwa. Qa i angatr troa gili etë, me huliwa me itre jia ne huliwa ka idrei hna kuca hnei fao, me itre ze fao. Celë hi hna kuca hnei Dravita ngöne la nöjei traon i angetre Amona. Ame hnei Dravita memine la trongene isi asë, hna bëeke hmaca a tro Ierusalema.

4 E thupen, hnei Isaraela hna isi me angetre Filisiti e Gezera. E cili hi lo hnei Sibekai, atre Husa hna humuthi Saf, ketre matra i angetre Refai, nge hna ngaa angetre Filisiti.

5 Nge hnei Isaraela hna isi hmaca me angetre Filisiti, nge hnei Eleanana nekö i Iaira, hna humuthi Lahmi trejin me Goliatha atre Gatha. Ame la eisaisane la tane jo ne la atre Filisiti celë, ke ka tune la inehe ne sili maano.

6 Nge hnei Isaraela hmaca hna isi e Gatha, lo traon ne la ketre matran atr. Kola e la 6 lao hene wanakoim ngöne la lue ime i angeic, nge 6 lao he ne wanakoca ngöne la lue ca i angeic, matre 24 la etrun. Angeice hi la ketre matra i angetre Refai. 7 Angeice pala hi a thele isi me angetre Isaraela, matre hnei Ionathana, nekö i Simea mama i Dravita, hna humuthi angeic.

8 Ame la itre atre cili, ke angatre la itre matra i angetre Refai ka mel e Gatha. Nge hna humuthi angatr hnei Dravita, me itre soce i nyidrë.