Angetre Amekötin
8 Ame hnene la itre trahmany ne Eferaima hna eetr koi Gideona me hape: “Nemene la hnei ö hna kuca koi hun? Hnauëne laka, tha hnei ö kö hna hë hun lo eö a tro troa isi me angetre Midiana?” Nge hnei angatr hna catrë angeic. 2 Ngo sa jë hi angeic ka hape: “Ka pë pengön la hnenge hna kuca hun la hnei epun hna kuca. Hapeu, tha sisitria kö la itre wamine rezë hna menuën e Eferaima, hune la hnënge rezë hna menuën e Abiezera? 3 Koi epuni hi la Akötresie hna nue Oreba me Zeba, lue nekö i joxu ne Midiana, matre ka pë pengöne la hnenge hna kuca.” Hnene la aqane sa* i angeic matre upu ju hi la elëhni i angatr.
4 thupene lai, hnei Gideona hna traqa me sasaithe la hneopegejë Ioridrano. Ngacama kucakuca catr angeic memine lo ala 300, ngo tha cile kö angatr wej la itre ithupëjia. 5 Ame hnei angeic hna sipo kowe la itre trahmanyi ne Sukotha ka hape: “Pane hamë falawa pi kowe la itre soceng, ke kucakuca catr angatr. Nge eni a weji Zeba me Zalemuna, lo lue joxu ne Midiana.” 6 Ngo önine jë hi la itre nekö i joxu ne Sukotha ka hape: “Hnauëne pena la tro huni a ithuane la trongene isi i ö? Hapeu, ase kö eö ee Zeba me Zalemuna?” 7 Matre öni Gideona jë hi: “E tro Iehova elany a nue Zeba me Zalemuna koi ni, ke tro ni a thaucë epun memine la itre ka ithinyi ne la hnapapa.” 8 Qa cili, hnei angeic hna elë a tro Penuela, me sipon pena kowe la itre trahmanyi e cili. Ngo casi pala hi la aqane sa i angatr memine lo angetre Sukotha. 9 Matre öni angeic jë hi kowe la itre trahmanyi ne Penuela: “Ame hë la eni a troa bëek cememine la tingeting, ke tro ni a thëtrij la ita ne thup ne la traone i epun.”
10 Ame pena Zeba me Zalemuna, nyidroti e Karekora memine la trongene isi i nyidro, traqa koi 15 000 lao soc. Angatre pe hi la ka mel thene la trongene isi ne la angetre Koië, ke hna humuthe la 120 000 lao soc ka cile fë taua. 11 Ame hnei Gideona hna elë qa ngöne la gojenyine la itre ka feke trootro, ngöne la götrane koië ne Noba me Iogebea, matre troa lep la lapa ne soce i angatr, lo götran hnei angatr hna mejiune kow. 12 Ame pe, hna kötre hnei Zeba me Zalemuna, lue joxu ne Midiana, ngo hnei Gideona hna weji nyidro me ee nyidro. Matre hna traqa la xou ngöne la lapa asë.
13 Thupene lai, hnei Gideona nekö i Ioasa hna bëek qa hna isi, me xome la gojenyi ka elë a tro Heres. 14 Nge e cahu gojeny, hnei angeic hna ea la ketre nekö trahmanyi qa Sukotha, me upi angeic troa cinyianyin la ëjen la itre nekö i joxu me itre qatr ne Sukotha; traqa jë kö koi 77 lao atr. 15 Thupene lai, hnei Gideona hna tro troa wang la itre trahmanyi ne Sukotha me hape: “Hane hi lae Zeba me Zalemuna, lo hnei epun hna thele iwesitrë me eni, me hape: ‘Hnei ö kö hna ee Zeba me Zalemuna, matre tro huni a thue falawa kowe la itre soce i ö ka kucakuca?’” 16 Ame hnei angeic hna theng la itre qatr ne Sukotha, me thaucë angatr hnei itre sinöe ka ithiny ne la hnapapa, matre troa ini angatr. 17 Ase jë hi lai, hnei angeic hna thëtrij la ita ne thup i Penuela, me humuth la itre trahmanyi ne la traon.
18 Nge öni angeice jë hi koi Zeba me Zalemuna ka hape: “Ka tune kaa lo itre atr hnei epon hna humuth ngöne la wetre Tabora?” Öni nyidroti jë hi: “Ceitu i angatre hi me eö, kösë itre nekö i joxu.” 19 Matre öni angeic: “Itre trejine hi lo me eni, casi hi la thine i eahun. Eni hi la a qaja qëmekei Iehova Akötresie ka mel, maine tha humuthi angatre ju hnei epon, ke tha tro kö ni a humuthi epon.” 20 Thupene lai, öni angeice koi Iethero, lo pane nekö i angeic: “Trohemi, nge humuthi nyidroti pi.” Ngo xele kö nyën ma uthe la taua i nyën; xou i nyën ke nekönatr pala kö nyën. 21 Matre öni Zeba me Zalemuna jë hi: “Ketre cile jë kö eö troa humuthi nyio, matre mama pi ka hape, trahmanyi ö.” Ame hnei Gideona hna easenyi Zeba me Zalemuna, me humuthi nyidro, me xome la itre nyine thaip* qa ngöne la nyinawa ne la itre kamela i nyidro.
22 Thupene lai, önine la itre trahmanyi ne Isaraela koi Gideona: “Musi jë koi hun, eö me nekö i ö, me api ö, ke ase hë eö amele hun qaathene la angetre Midiana.” 23 Ngo öni Gideona jë hi: “Tha tro kö ni me neköng a musi koi epun, ngo qanyi Iehova kö.” 24 Öni Gideona hmaca jë hi: “Ca sipong koi epun. Isa hamë ni pi la ca otrene hnafij qa ngöne la hnei epun hna thapa.” (Eje hi, hetre otrene gool ngöne asë hi la itre hnafij ne itre hna ngaan, ke angetre Isamaela angatr.) 25 Matre sa jë hi angatr ka hape: “Ka loi, tro huni a hamë eö.” Ame hnei angatr hna seluth la ketre iheetr ka qea, me isa kuië otrene hnafij qa ngöne la hnei angatr hna thapa. 26 Ame la ehacene la itre otrene hnafij gool hnei angeic hna sipon, ke traqa jë kö koi 1 700 sekel*; nge hna nyixan fe hnene la itre hna thaip, me itre otrene nyinawa, me itre iheetre lino ka maeangön hna heetrën hnene la itre joxu ne Midiana, me itre fini cein ne la itre kamela.
27 Ame hnei Gideona hna kuca la ketre iefoda* memine la itre ewekë cili, me acil amaman ngöne la traone i nyidrë e Ofera. E cili, hnene la angetre Isaraela asë hna kuci ngazo, ngöne la angatr a nyihluen la iefoda. Celë hi ketre hnö koi Gideona me fami i angeic.
28 Celë hi aqane ngaan la angetre Midiana hnene la angetre Isaraela, nge tha thele isi* hmaca kö angatr memine la angetre Isaraela. Matre hnene la nöj hna mele tingeting koi 40 lao macatre ngöne la ijine i Gideona.
29 Ame hnei Ierubaala nekö i Ioasa, hna bëeke hmaca kowe la hnalapa i angeic, me mel e cili.
30 Traqa koi 70 lao nekö i Gideona trahmany, ke nyimu föi angeic. 31 Nge hnene la ketre föi angeic e Sekema hna hnaho nekö trahmany, me ati ëjen Abimelek. 32 Hnei Gideona nekö i Ioasa hna mec lo angeic a qatr, nge lolo la mele i angeic. Hna kelemi angeic ngöne la hua ne la keme i angeic Ioasa, e Ofera i angetre Abiezera.
33 Ngo ame ju hi la Gideona a mec, hnene hmaca kö la angetre Isaraela hna kuca la ngazo, me nyihluen la itre Baala, me ië Baala-Berith nyine haze i angatr. 34 Thëthëhmi Iehova ha hnei angatr, lo Akötresi angatr, atre amele angatr qaathene la itre ithupëjia ka lapa xötreith. 35 Nge goi tha hnime* fe angatr la fami i Ierubaala, ene Gideona, ngacama hnei angeice lo hna kuca la loi thatraqane la nöje Isaraela.