Angetre Amekötin
10 Thupei Abimelek, hnei Tola nekö i Pua nekö i Dodo, ketre atre Isakara hna thel troa amele Isaraela. Ka lapa angeic e Samira ngöne la itre wetr e Eferaima. 2 Hnei angeic hna ameköti Isaraela koi 23 lao macatre.Thupene lai, hnei angeic hna mec, nge hna kelemi angeic e Samira.
3 Thupei angeic, hna ië Iaira atre Gileada; hnei angeic hna ameköti Isaraela koi 22 lao macatre. 4 Traqa koi 30 lao nekö i angeice trahmany ka tithe la 30 lao boliko, nge traqa koi 30 lao traone i angatr. Hna hën pala hi la itre traone cili ka hape, Havoth-Iaiara; itre ej ngöne la nöje Gileada. 5 Thupene lai, hna meci hnei Iaira, nge hna kelemi angeic e Kamon.
6 Ngo hnene hmaca kö la angetre Isaraela hna kuca la ngazo qëmekei Iehova. Hnei angatr hna nyihluene la itre Baala, me itre hnasaatr i Aseira, me itre haze ne Suria,* me Zidona, me Moaba, me itre haze ne la angetre Amona, me angetre Filisiti. Hnei angatr hna nuetriji Iehova, nge tha nyihlue i nyidrëti hë hnei angatr. 7 Ame hna palulu la elëhni i Iehova kowe la angetre Isaraela, matre hnei nyidrëti hna nue* angatr kowe la angetre Filisiti, me Amona. 8 Ngöne la macatre cili, hnene la lue nöj cili hna wajahuj me axösisine la angetre Isaraela. Hnei angatr hna axösisin la angetre Isaraela koi 18 lao macatre, ene lo itre ka lapa ngöne la nöje Gileada, hmekune la hneopegejë Ioridrano, lo götran hna lapan ekö hnene la angetre Amora. 9 Nge hnene fe la angetre Amona hna thupa la hneopegejë Ioridrano, matre troa lepe la itre tribu ne Iudra, me Beniamina, me Eferaima. Matre ketre akötre ka tru kowe la angetre Isaraela. 10 Ame hnene la angetre Isaraela hna treije koi Iehova me hape: “Hne huni hna ngazo koi nyipë, ke hne huni hna nuetriji nyipë Akötresi hun, matre nyihluene la itre Baala.”
11 Ngo öni Iehova kowe la angetre Isaraela: “Hapeu, tha hnenge kö lo hna amele epun qaathene la angetre Aigupito, me angetre Amora, me angetre Amona, me angetre Filisiti, 12 me angetre Zidona, me angetre Amaleka, me angetre Midiana lo angatr a axösisi epun? Ame lo epuni a treije koi ni, hnenge hna thepe epun qa ngöne la ime i angatr. 13 Ngo hnei epuni pe hna nuetriji ni me nyihluene la itre xaa haze. Qa ngöne lai, tha tro hmaca kö ni a amele epun. 14 Hëne jë hë lo itre haze hnei epun hna iën, nge sipo ixatua jë koi angatr. Loi e tro angatr a amele epun enehila, la epuni a akötr!” 15 Ngo önine la angetre Isaraela koi Iehova: “Ase hë huni ngazo koi nyipë, matre kuca jë la hnei nyipëti hna ajan koi hun. Ngo casi hi, pane amele huni jë ngöne la drai celë.” 16 Ame hnei angatr hna apatren la itre haze trenyiwa qa ngöne la nöj, me nyihlue i Iehova. Celë hi matre, thatreine hë nyidrëti xomihnin la kola akötrë angatr.
17 Thupene lai, hnene la angetre Amona hna hëne la itre trongene isi i angatr, me acile la lapa ne soc i angatr e Gileada. Nge hnene la angetre Isaraela hna traqa itronyi e Mizepa matre acile la lapa ne soc i angatr. 18 Ame hnene la nöj me itre joxu ne Gileada hna iqajakeun ka hape: “Drei la ka troa elemeken ngöne la isi së me angetre Amona? Loi e troa acili angeic troa tan ne la angetre Gileada asë!”