Pane Tus i Aqane Lapa Itre Joxu

5 Hane hi la itre nekö i Reubena, pane nekö i Isaraela. Angeice hi lo hna pane hnahon, ngo pine angeic angazone* la ili ne la keme i angeic, hna hamëne pë hë la edrö ne ka tru kowe la itre nekö i Iosefa, lo nekö i Isaraela. Celë hi kepin matre, ngöne la itusi ne la itre xötr atr ne la fami angeic, tha hna qaja kö ka hape, angeic la ka tru. 2 Sisitria kö Iudra hune la itre trejin me angeic, nge troa xulu qaathei angeic la atre hna iën troa amamai gojeny. Ngo ewekë i Iosefa pe la edrö ne ka tru. 3 Itre nekö i Reubena, lo pane nekö i Isaraela: Enoka, me Palu, me Hezerona, me Karemi. 4 Itre nekö i Ioela: Semaia nekö i angeic, Gog nekö i angeic, me Simei nekö i angeic, 5 me Mika nekö i angeic, me Reaia nekö i angeic, me Baala nekö i angeic, 6 me Beera nekö i angeic. Hnei Tigelathe-pilesera joxu ne Asuria, hna xolouth me xometrongë Beera, ketre tixe i angetre Reubena. 7 Nge thenge la itus ne xötr atr ne la fami angeic, ame la itre trejin me angeic ke: Ieiela la tixen, me Zakaria, 8 me Bela nekö i Azaz, nekö i Sema, nekö i Ioela. Ame la fami Beela, angatr a lapa qaan e Aroera, uti hë e Nebo me Baalameon. 9 Nge pine laka, ala nyimu la itro öni i angatr ngöne la nöje Gileada, hnei angatr hna tro troa nyiqane lapan e koië, uti hë la hnapapa, hmekune la hneopegejë Euferate. 10 Eje hi, ngöne la ijine mus i Saulo, hnei angatr hna isi me ngaane la angetre Hagara. Celë hi matre angatr a lapa itat ngöne la götrane koië ne Gileada.

11 Hnene la itre nekö i Gada hna lapa ezi angatr, ngöne la nöje Basana uti hë Saleka. 12 Nge ngöne la nöje Basana, Ioela la tan, nge Sefama la hnaaluen; Nge Ianai me Safata fe la lue trene hnëqa e Basana. 13 Nge hane hi la itre trejin me angatr, itre atrene la lapa i angatr: Mikaela, me Mesulama, me Sheba, me Iorai, me Iakan, me Zia, me Heberu, ala 7. 14 Itre nekö i Abihaila asë hi angatr, lo nekö i Huri, nekö i Iaroa, nekö i Gileada, nekö i Mikaela, nekö i Iesisai, nekö i Iado, nekö i Buza. 15 Nge Ahi nekö i Abediela, nekö i Guni, la tixe ne lapa i angatr. 16 Hnei angatr hna lapa ngöne la nöje Gileada, me ngöne la nöje Basana, me ngöne la itre hlapa ezin, me ngöne la nöjei hnë axö öni e Sarona, uti hë ngöne la itre ifegon. 17 Hna siji ëje i angatr asë hnine la itre itus ne itre xötr atr, hmekune la ijine mus i Iotham joxu ne Iudra, me Ieroboama* joxu ne Isaraela.

18 Ame thene la angetre Reubena, me Gada, memine la sine la tribu i Manase, hetrenyi la 44760 lao soc ka catr. Itre atre lai ka cile fë taua me petr, nge ka feni tane pehna, nge ka maca ngöne la isi. 19 Angatr a isi jë me angetre Hagara, me itre matra i Ietura, me itre matra i Nafiso, me itre matra i Nodab. 20 Hnei Akötresie hna xatua angatr ngöne la isi, matre hnei angatr hna ngaane la angetre Hagara, me itre ka ce xöl me angatr. Hnei angatre lo hna sipo Akötresie troa xatua angatr ngöne la isi, nge hnei nyidrëti hna drenge la treije i angatr, ke hnei angatr hna mejiune koi nyidrë. 21 Angatr a thapa pi la itre öni—50000 lao kamela, me 250000 lao mamoe, me 2000 lao boliko—me 100000 lao atr. 22 Ala nyimu la itre ithupëjia hnei angatr hna humuth, ke hnene la nyipi Akötresie hna isigöli angatr. Nge angatr a lapane ju la zi ne la itre ithupëjia me angatr, uti hë la ijine xomi angatr kowe la nöje trenyiwa.

23 Nge hnene la itre matra ne la sine la tribu i Manase, hna lapane la nöj qaan e Basana uti hë Baala-heremona, me Senir, me ngöne la wetre Heremona. Ala nyimu catr angatr. 24 Hane hi la itre tixe ne lapa thei angatr: Efera, me Ishi, me Eliela, me Azeriela, me Ieremia, me Hodavia, me Iadiela. Itre atre ka catre isi, nge ka hlemu, nge itre tixe ne lapa. 25 Ngo tha nyipici kö angatr kowe la Akötresi ne la itre qaaqaa i angatr. Hnei angatr hna nyixetë triji nyidrë me itre xa haze ne la itre nöj, itre nöj hnei Akötresie hna apatren, matre hamë zi i angetre Isaraela. 26 Ame hnene la Akötresi Isaraela hna uku* Pula joxu ne Asuria (ene Tigelathe-pilesera joxu ne Asuria) troa xomi angetre Reubena kowe la nöje trenyiwa, me angetre Gada memine la sine la tribu i Manase. Hnene la joxu hna xomi angatr a tro Hala me Habora, me Hara, me ezine la hneopegejë Gozana. Nge angatr pala hi a lapa e cili uti hë enehila.