Hnaaluene Tus i Aqane Lapa Itre Joxu

6 E cili, öni Solomona jë hi: “Iehova fe, öni nyipëti lo ka hape, tro nyipëti a lapa ngöne la gaa mit. 2 Enehila, hnenge hna acil la uma atraqatr nge ka mingöming, ketre göhnë ka hut nyine tro nyipëti a lapane uti hë epine palua.”

3 Thupene lai, hnene la joxu hna xei kowe la angetre Isaraela ka cil e cili, nge nyidrëti a amanathithi angatre jë. 4 Öni Solomona: “Epi troa atrunyi Iehova Akötresi Isaraela, ke hnei nyidrëti hna sisinyi* koi Dravita kemeng, me eatrën hnene la lue ime i nyidrë. Öni nyidrëti lo, 5 ‘Qaane lo eni a thapa la nöjeng qa Aigupito, tha hnenge kö hna iën la ketre traon ngöne la nöjei zi i angetre Isaraela, matre acile la ketre uma thatraqane la ëjeng. Nge tha hnenge kö hna ië atr, troa tixene la nöjeng Isaraela. 6 Ngo enehila, ase hë ni ië Ierusalema, matre troa ej e cili la ëjeng. Nge hnenge hna ië Dravita troa elemekene la nöjeng Isaraela.’ 7 Nge aja i Dravita kemeng, troa acile la uma thatraqane* la ëje i Iehova Akötresi Isaraela. 8 Ngo öni Iehova koi Dravita kemeng, ‘Eö a pi xupe la uma kowe la ëjeng, mekun ka loi lai. 9 Ngo tha eö kö, ngo nekö i ö* pe la ka troa xupe la uma kowe la ëjeng.’ 10 Nge hnei Iehova hna eatrëne la hnei nyidrëti hna sisiny, ke hnenge hna nyihna i Dravita kemeng, nge eni la ka lapane la therone i Isaraela, thenge lo aqane qaja i Iehova. Nge ase hë ni xupe la uma thatraqane la ëje i Iehova Akötresi Isaraela. 11 Nge ase hë ni amë la Pua, lo ka qatrenge la lue sine etë ne isisinyikeu i Iehova, memine la nöje Isaraela.”

12 Thupene lai, hnei Solomona hna cile qëmekene la ita ne huuje i Iehova, me qëmekene la icasikeu asë i angetre Isaraela, nge hnei Solomona hna xejë la lue ime i nyidrë, 13 (Ke hnei Solomona hna acili ita ne cainöj kopa, nyipine la götrane gaa pë ihakun.* Traqa koi 5 kubit* la eqean, nge 5 kubit la eisaisan, nge 3 kubit la edraiën. Nyidrëti a cil hune la ita.) Solomona a sa iwatingöneca pi qëmekene la icasikeu i angetre Isaraela, me xejë draië la lue ime i nyidrë, 14 nge öni nyidrë: “Iehova fe Akötresi Isaraela, pëkö haze ka tui nyipë e celë fen me e koho hnengödrai. Nyipëti a amamane la ihnimi nyipici i nyipë kowe la itre ka nyihlue i nyipë hnene la hni ka pexej, nge nyipëti a metrötrëne la isisinyikeu i nyipë me angatr. 15 Hnei nyipëti hna metrötrëne lo isisinyikeu i nyipë me Dravita hlue i nyipë, nge kemeng. Hnei nyipëti hna sisinyi hnene la ukeineqë i nyipë, nge enehila, ase hë nyipëti eatrën hnene la ime i nyipë. 16 Ngo enehila, Iehova Akötresi Isaraela, epi tro nyipëti a eatrëne lo hnei nyipëti hna sisinyi koi Dravita hlue i nyipë nge kemeng, lo öni nyipë: ‘Maine tro la itre nekö i eö a thupëne la aqane ujë i angatr, me drengethenge* la itre wathebong tune la aqane kuca i ö, haawe, tro pala hi a hetre matra i ö ka troa cile qëmekeng, me lapane la theron ne Isaraela.’ 17 Ngo enehila Iehova fe, Akötresi Isaraela, epi troa eatre la hnei nyipëti hna sisiny koi Dravita hlue i nyipë.

18 “Ngo ame nyipë Akötresieti fe, nyipici kö laka, tro nyipëti a lapa ngöne la ihnadro memine la itre atr? Ke eje hi, atraqatre ju hë la hnengödrai,* ngo tha ijije pala hi koi nyipë, matre the qaja pala ha la uma celë hnenge hna xup! 19 Enehila, Iehova Akötresing, epi drenge ju la thithing, me treijeng. Drenge ju la xëweng, memine la hnenge hna thithi fë koi nyipë, eni hlue i nyipë. 20 Epi troa fe la luemeke i nyipë e lai me jidr, nge epi tro nyipëti a goeëne la uma celë, lo öni nyipë, ‘E cili hi la ëjeng.’ Matre e traqa jë ni* thith me goeëne la uma celë, tro nyipëti a drenge la thithing. 21 Epi tro nyipëti a drenge la kola sipo ixatua hnene la hlue i nyipë, me nöje i nyipë Isaraela, e traqa jë angatr thithi koi nyipë me goeëne la uma celë. Nge epi tro nyipëti a dreng qa ngöne la hnalapa i nyipë e hnengödrai. Drenge ju, nge nue pi la itre ngazo.

22 “Nge e traqa jë nyizöne la ketre atr pine angeic ngazo koi ketre, nge kola upi angeic troa sisiny* wanga eji angeice jë, nge e tro angeic a traqa kowe la ita ne huuje i nyipë hnine la uma celë, pine la hnei angeic hna sisiny, 23 epi drenge ju qa hnengödrai, nge kuca jë la ketre ewekë, amekötine jë la itre hlue i nyipë. Nyithupene jë kowe la atr ka ngazo la ngazo i angeic, nge të jë koi angeic la ngazo i angeic; ngo jele mekötine jë* la atre ka meköt, nge nyithupene jë koi angeic thenge la meköti angeic.

24 “Nge e tro la itre ithupëjia a ngaa angetre Isaraela, pine angatr kuca lapaane la ngazo koi nyipë, nge e tro angatr a bëeke koi nyipë, me atrune la ëje i nyipë, me thith me xëwe koi nyipë hnine la uma celë, 25 epi drenge ju qa hnengödrai, nge nue pi la ngazo ne la nöje i nyipë Isaraela, nge bëeke sai angatre jë kowe la nöj hnei nyipëti hna hamëne koi angatr, me itre qaaqaa i angatr.

26 “Nge e traqa jë thinge la hnengödrai, nge pëkö mani pine angetre Isaraela kuca lapaane la ngazo koi nyipë, nge tro angatr a thithi me ujë kowe la uma celë, me atrune la ëje i nyipë, nge maine tro angatr a trije la itre ngazo i angatr, ke hnei nyipëti hna ahmahmanyi* angatr, 27 epi drenge ju qa hnengödrai, nge nue pi la ngazo ne la itre hlue i nyipë, me nöje i nyipë Isaraela. Ke tro nyipëti a köjane la nyipi gojenyi nyine tro angatr a trongën, me axulune la mani hune la zi i nyipë, lo nöj hnei nyipëti hna nyi edrön kowe la itre hlue i nyipë.

28 “Nge e traqa jë jinë xen ngöne la nöj, maine ketre mec ka ixötrekeu, maine enyi ka aqaqacilëne la itre feja, maine xojene fao,* me itre sipa ka sesë, me itre sipa ka xeni asë, nge e tro itre ithupëjia a lapa xötreithe la ketre traon ne la nöje i nyipë, nge e traqa ju la ketre hulö, maine ketre mec, 29 ngo maine tro la ketre atr a thith troa nue la ngazo i angeic, maine tro la nöje Isaraela lo nöje i nyipë a thithi sai angatr (ke atre kö angatr la akötr e kuhu hni angatr) nge e tro angatr a xejë la ime i angatr kowe la uma celë, 30 epi drenge ju nyipë qa ngöne la hnalapa i nyipëti e hnengödrai, nge epi nue pi la ngazo. Të jë kowe la nöjei atr thenge la isa aqane ujë i angatr, ke atre kö nyipëti la hni ne la itre atr, (nyipëti hmekuje hi la ka atre la aliene hni ne la itre atr.) 31 matre tro la itre hlue i nyipë a xoue nyipë, me kuca la aja i nyipë, ngöne la angatr a mel ngöne la nöj hnei nyipëti hna hamën koi itre qaaqaa hun.

32 Nge e tro la ketre trenyiwa memine la nöje i nyipë Isaraela a traqa qa gaa nany, ke angeic a drei mejene la ëje ka draië* i nyipë, me ecatrene la wanakoime i nyipë, me men ne la ime* i nyipë, nge e traqa jë angeic thith me ujë kowe la uma celë, 33 epi drenge ju qa ngöne la hnalapa i nyipëti e hnengödrai, nge kuca asë jë la hna sipon hnene lai trenyiwa. Qa ngöne lai, tro la nöjei nöj e cailo fen a atre la ëje i nyipë,* me xoue nyipë, tui Isaraela nöje i nyipë. Nge tro angatr a atre laka, ame la uma celë hnenge hna xup, ke hna ati ëje i nyipë.

34 “Nge e tro nyipëti a upe la nöje i nyipë troa isi me itre ithupëjia ngöne la itre xa götran, ngo e tro angatr a thithi koi nyipë, me goeëne hmekune la traon celë hnei nyipëti hna iën, memine la uma hnenge hna xup kowe la ëje i nyipë, 35 epi drenge ju qa hnengödrai la thithi angatr, me xëwe i angatr, nge xatua angatre jë.

36 “Nge e tro la itre atrene la nöje i nyipëti a ngazo koi nyipë, (ke pëkö atr ka tha kuca la ngazo) nge e nyipëti a elëhni koi angatr, nge tro nyipëti a nue angatr kowe la itre ithupëjia me angatr, nge itre ithupëjia a othi angatr me xomi angatr kowe la ketre nöj, gaa easenyi maine gaa nany, 37 ngo e loi hmaca pi la mekuna i angatr ngöne la nöj hna othi angatr, nge e tro angatr a bëeke koi nyipë me xëwe koi nyipë ngöne la nöj hna othi angatr, me hape, ‘Hne huni hna ngazo,’ 38 nge e tro angatr, ngöne la nöj hna xomi angatre kow, a bëeke koi nyipë ngöne la nöjei götrane la mele i angatr, cememine la hni ka pexej, nge e tro angatr a thith, me goeëne hmekune la nöj hnei nyipëti hna hamën kowe la itre qaaqaa i angatr, me traon hnei nyipëti hna iën, me uma hnenge hna xup kowe la ëje i nyipë, 39 pane drenge ju qa ngöne la hnalapa i nyipëti e hnengödrai. Drenge ju la thithi angatr, me xëwe i angatr, nge xatua angatre jë. Nue pi la nöjei ngazo hna kuca koi nyipë hnene la nöje i nyipë.

40 Enehila Akötresinge fe, epi tro la luemeke i nyipëti a goeën, nge epi tro la lue hnangenyë i nyipëti a nyipiewekëne la thith hna tro fë e* celë. 41 Nge enehila Iehova fe, elë jë kowe la hnë mano i nyipë, nyipë me pua ne la mene i nyipë. Nge epi tro la itre atre huuj i nyipë Iehova fe, a heetrëne la iamele, nge epi tro la itre ka nyipici koi nyipë, a madrine la aqane loi hni* i nyipë. 42 Haawe Iehova Akötresie, the trije* kö la hnei nyipëti hna iën. Nge the thëthëhmine kö lo ihnimi nyipici i nyipë, koi Dravita hlue i nyipë.”