Ezera
5 Thupene lai, hnene la lue perofeta, Hagai me Zakaria lo api Ido, hna qaja la itre hna perofetan koi angetre Iudra, e Iudra me Ierusalema, ngöne la ëjene la Akötresi Isaraela ka musi hui angatr. 2 Celë hi matre hnei Zerubabela nekö i Sealetiela me Iesua nekö i Iozadaka, hna nyiqaane xupe hmaca lo uma ne hmi i Akötresie e Ierusalema. Nge hnene la lue perofeta hna ce me nyidro me xatua nyidro. 3 Ngöne la ijine cili, hnei Tatenai gavena ne la götran Tröne La Hneopegejë,* me Setarabozenai, me itre sine huliwa i nyidro, hna traqa troa hnyinge koi angatr, me hape: “Drei la ka upi epuni troa xupe la uma celë me afenesin?”* 4 Nge öni angatre hmaca: “Hamë huni pi la ëjene la itre ka huliwa ngöne la uma celë.” 5 Ngo Akötresieti pala hi a thupëne* la itre qatr ne la angetre Iudra, matre tha hna ajolë angatre kö troa huliwa, e tha hna pane iupi fë tusi kö koi Dariu, me kapa la hnei nyidrëti hna sa.
6 Hane hi la ketre kopi ne la tusi hna iupi fë koi Dariu joxu, hnei Tatenai gavena ne la götran Tröne La Hneopegejë, me Setarabozenai, me itre sine huliwa i nyidro, itre xa gavena ka co ne la götran Tröne La Hneopegejë. 7 Hnei angatr hna iupi fë tus, nge hane hi la hnei angatr hna cinyihan:
“Koi Dariu joxu:
Epi tro nyipëti a tingeting! 8 Epi tro la joxu a atre laka, qai eahuni hë ngöne la nöje Iudra, ngöne la uma ne la Akötresie ka draië catr. Kola xup ej hnei itre etë atraqatr, itre etë hna ukune trongën kowe la göhnen, nge hna acil la itre poto ngöne la ngöne uma. Kola nyimenyime la huliwa, ke itre atr a catre huliwa. 9 Matre hne huni hna hnyinge kowe la itre qatre i angatr ka hape: ‘Drei la ka upi epuni troa xupe la uma celë me afenesin?’* 10 Nge hne huni fe hna hnyingëne la ëje i angatr me fejan, matre atre jë nyipë la ëjene la itre ka xomiujine la itre huliwa.
11 “Hane hi la aqane sa i angatr: ‘Eahuni la itre hlu ne la Akötresie ne hnengödrai me ihnadro, nge eahuni a xupe hmaca lo uma hna acil ekö hnene la ketre joxu ka tru e Isaraela. 12 Ngo hnene la itre keme huni hna amejëne la trenge hni ne la Akötresie ne hnengödrai, matre hnei nyidrëti hna nue angatr kowe la lue ime i Nebukaneza joxu ne Babulona, lo atre Kaledaia ka lep apatrene la uma cili, me xome la nöj a tro Babulona. 13 Ngo ame hë ngöne la pane macatre ne mus i Koreso joxu ne Babulona, hnei Koreso joxu hna amekötin troa acile hmaca la uma i Akötresie. 14 Ketre, hnei Koreso joxu hna xome qa ngöne la uma ne hmi e Babulona lo itre trengene gool, me sileva. Itre ewekë lai ne la uma i Akötresie, lo hnei Nebukaneza joxu hna thapa qa hnine la uma ne hmi e Ierusalema, me amë hnine la uma ne hmi e Babulona. Hna hamëne la itre ewekë cili koi Sesebazara,* lo hnei Koreso hna acil troa gavena. 15 Öni Koreso koi angeic ka hape: “Xome jë la itre trengene celë, nge tro fë jë kowe la uma ne hmi e Ierusalema, nge loi e troa xupe hmaca la uma ne hmi i Akötresie ngöne lo göhnen.” 16 Ame hnei Sesebazara hna traqa, me ami trepene la uma i Akötresie e Ierusalema. Nge qaane ju hi lai, kolo pala hi a xupe la uma nge tha fenesi pala kö.
17 “Enehila, maine aja i joxu, epi troa ithel hnine la itre itusi joxu, lo ka ej e Babulona, matre wange ka hape, nyipici kö laka, hnei Koreso joxu hna amekötin troa xupe hmaca la uma ne hmi e Ierusalema. Nge epi tro la joxu a iupi fë koi huni la hna amekötin hnei nyidrë.”