Januare

Mama hnyawa hi kowe la itretre thupëne la sirkoskripsio ka hape, nyipiewekë tro la itre qatre thup a ami ijine göi troa inine me hnëkëne la itre trejine trahmany, thöth me itre ka tru, matre troa hane ixatua thupëne la ekalesia. Ngo, jole pi hë. Pine nemene matre nango jole pi hë? Maine epuni fe la ketre qatre thup, atre hnyawa hi epun laka, nyipiewekë tro epuni a ami ijine matre troa inine me hnëkëne la itre trejine trahmany. Ketre, nyipiewekë catre hmaca kö enehila troa hetre trejine trahmanyi göi tro pala hi a acatrene la itre ekalesia, me sajuëne la itre ekalesia ka hnyipixe elany. (Is. 60:22) Öni Tusi Hmitrötr, loi e tro epuni a “ini ite xane fe.” Ngo eje hi laka, jole pi hë troa xomi ijine troa eatrëne lai. Ke tro epuni lai a thupëne la hnepe lapa i epun, me ­huliwa i maseta. Ketre, tro fe epuni a thupëne la ekalesia, me itre xa jole ju kö ka nyipiewekë catr. E troa tru hnei trejine trahmanyi hna inin me hnëkën, eje hi lai laka, troa kepe eloin hnene la nöjei atrene la ekalesia. w15 15/4 1:​2, 3

Maine epuni la ketre trejin ka nyipi kapa la itre hnëqa ngöne la ekalesia, the mekune kö ka hape, tro hë epuni a kuca ketre pengönëne la itre ewekë hune ekö. The thëthëhmine kö ka hape, e troa saze, tre hnene laka, hetre ewekë nyine kuca ngöne la ekalesia, maine pena, ketre hna amekötine qaathene la organizasio i Iehova. Tha tro kö a kuci mekunëne la itre hnëqa cili. Ame hë la epuni a maca trootro, ijiji epuni hë troa xatuane la ekalesia matre tro angatr a xötrethenge hnyawa la itre hna amekötine hna xötrei kapa qaathene la organizasio i Iehova. Ketre, tro kö Iehova a xatua epuni troa kuca la itre huliwa ka tru catre kö hune la itre ka hamë ini koi epun.​—Ioane 14:12. w15 15/4 2:​17

Maine jë hace catre pala ha koi epuni la jole ka traqa, matre ceitu hi la aja i epuni me Paulo, ene la troa thepe epuni qa ngöne la “qe i Liona.” (2 Tim. 4:​17) Ame ngöne la itre ijine ka tune lai, nyipi ewekë catre troa mejiune koi Iehova. Maine jë, epuni a thupëne la ketre atrene la hnepe lapa i epuni ka wezipo. Nge epuni a thithi koi Iehova matre xatua epuni troa axecië mekune hnyawa, me cile catr. Drenge ju hi epuni e cili la tingetinge la epuni a mekune hmaca laka, Iehova a goeëne la hace i epun, me trotrohni epun. Tro Nyidrëti lai a xatua epuni troa cile hut me mele nyipici koi Nyidrë. Ame itre xa ijin, tha mama kö koi epuni la ixatua i Iehova. Ame la itre droketre ka troa inyë, tre isazikeu la itre mekun. Ame pena la itre sinee ka troa akeukawanyi epun, angatr a akötrëne la mele i epun. Mejiune catre jë pe koi Iehova matre tro Nyidrëti a hamë trenge catre koi epun. Easenyi Nyidrëti jë! (1 Sam. 30:​3, 6) Ame hë e thupen, tro ha acatrene catrëne la aqane imelekeu i epuni me Iehova la epuni a öhne la aqane xatua epuni hnei Nyidrë. w15 15/4 4:​10, 11

Pine laka, itre hlue i Iehova së, tha hna hane fe kö amenu së tune la itre xa atr ka mekune laka, pëkö Satana. Atre hnyawa hi së ka hape, hetre Diabolo. Hne së hna atre tune kaa? Tusi Hmitrötr a ini së laka, hnei Satana hna iaö Eva jëne la ketre un. (Gen. 3:​1-5) Hnei angeice fe hna qeje gelene la lapaune i Iobu koi Iehova. (Iobu 1:​9-​12) Hnei angeice fe hna thele troa tupathi Iesu. (Mat. 4:​1-​10) Nge thupene la kola acili Iesu troa Joxu lo 1914, hnei Satana hna nyiqaane “ishi” memine la thelene la itre hna iën. (Hna ama. 12:17) Satana pala hi a isine troa ananazijëne la lapaune ne la itre hna iëne me itre xa mamoe. Maine easa ajane troa cile catre me ngaa Satana, loi e tro pala hi sa acatrene catrëne la lapaune së. Satana hi la atre pi mama me pi draië. Hnene la angela ka ngazo cili hna qeje gelene la musi cile i Akötresie, me thele jëne tro la itre atr a thili koi angeic me troa nuetriji Iehova. Celë hi matre, angeice hnyawa hi la tane la pi mama me pi tru. Haawe, e aja së troa isi me ngaa Satana, loi e tro pala hi sa thipetrije la pi mama nge thele pe troa ipië.​—1 Pet. 5:5 w15 15/5 2:​3, 4

Hetre ewekë fe hnei Iehova hna thingehnaeane thatraqai së. Ame la easa mekune la itre hna thingehnaeane cili, easa madrin, nge hetre trenge catre së mina fe troa huliwa catre koi Iehova. Hnei epuni kö hna hane lapa mekune la ijine troa eatre la itre hna thingehnaeane hnei Iehova? Maine eje hi, pane mekune jë la huliwa hnei epuni hna troa kuca memine la itre sinee i epun, göne la troa aparadraisone hmaca la fen. Ame e cili, kola hnimi epuni hnene la itre ka elemekene la huliwa cili, nge epuni a mele madrin. Ketre, epuni a ce nyihlue i Iehova memine la itre ka lapa xötreithi epun. Pëkö sine meci epun, nge epuni a egöcatr nge pëkö nyine troa hnehengazon. Atraqatre la madrine i epuni troa huliwane la atreine i epun, göi troa xatuane la itre atr me atrunyi Iehova. Tro fe epuni elanyi a hane xatuane la itre hna troa amelene hmaca, matre tro angatr a hane atre Iehova. (Ioane 17:3; Ite hu. 24:15) Tha pu ne jidri kö la troa mekune la itre manathithi cili. Itre ewekë lai ka troa traqa, ke celë hi lai hna qaja ha hnei Tusi Hmitrötr göne la itre drai elany.​—Is. 11:9; 33:24; 35:​5-7; 65:22. w15 15/5 3:​15

Tru la waina hnei Iesu hna hamëne jëne la iamamanyikeu, matre ijije kowe la ka ala nyim. Pane mekune jë la ewekë ka traqa lo Diabolo a tupathi Iesu, ene la troa ujëne la etë nyine falawa. Hnei Iesu hna thipën, ke xele nyidrëti troa huliwane menune la mene thatraqane la itre sipu mekuna i nyidrë. (Mat. 4:2-4) Ngo, canga saqe Iesu pe huliwane la mene i nyidrë nyine ixatua kowe la itre atr. Tro sa xötrethenge tune kaa la tulu i Iesu göi troa meku itre xan? Öni nyidrë, “hamënejë.” (Luka 6:​38) Easa trongëne lai ngöne la easa hëne la itre xan troa hane ce xeni me easë. Ijije tro fe sa nue la traeme së thupene la hna icasikeu matre troa xatuane la ketre trejin, tune la troa drenge la ketre trejine trahmanyi a amacane la cainöje i angeic. Maine pena, ijije tro sa xatuane la itre trejin ngöne la hna cainöje trootro. Easë hi lai a nyitipune la aqane hame i Iesu la easa canga xatuan e nöjei ijine la itre atr. w15 15/6 1:​3, 4, 6

Maine tro sa mele nyipici koi Iehova, tro hë sa hane melëne la ketre iamamanyikeu ka tru catre hmaca kö, ene la troa mele pe qa ngöne la akötre atraqatr! Thupene ju hi la isi Amagedo, tro sa öhne la itre iamamanyikeu ka nyimutre catre hmaca kö. Ame ngöne la ijine cili, pexeje asë hë la nöjei atr. (Is. 35:​5, 6; Hna ama. 21:4) Pane mekune jë la itre atr, angatr a trije la itre thulue i angatr, me itre tö, me itre icea nyine ukun, me itre appareil koi itre ka sim. Nge ame la itre ka troa mel elanyi thupene e Amagedo, ke, tru catre la huliwa nyine tro angatr a kuca. Angatre hi la itre ka troa nyidrawane la ihnadro matre paradraiso asë hmaca pi. (Sal. 115:16) Kola ithuecatrene la “ka ala nyimu atraqat” enehila la angatr a e la aqane aloine Iesu la itre trene mec. (Hna ama. 7:9) Jëne la itre iamamanyikeu celë, kola acatrene la mejiune së ka hape, tro ha aloine la itre meci së elany. Itre eje fe a amamane la etrune la ihnimi ne la Hupuna i Akötresie kowe la itre atr. (Ioane 10:11; 15:​12, 13) Ame la etrune la utipine i Iesu, tre, celë hi hatrene la ejuine la ihnimi Iehova kowe la itre hlue i Nyidrë asë, easë isa ala cas.​—Ioane 5:​19. w15 15/6 2:​16, 17

Ame lo 1914, hna nyiqaane la isi e Europe memine fe hë e cailo fen. Ame hna traqa la itre jiin qa ngön. Nge ame pena ngöne la pune la isi, tre, tru catre hmaca kö la itre ka mec e cailo fen hnene la ketre mec hna mecin, hune lo itre ka mec hnei isi. Ame asë hi la itre ewekë cili, tre, ketre igötranene la “haten” hna qaja hnei Iesu. Haawe, kola anyipicine hnene la hatren ka hape, Joxu hë Iesu lo 1914. (Mat. 24:​3-8; Luka 21:​10, 11) Ame ngöne la macatre cili, hnei nyidrëti hna “tro pi kola catre me troa cat.” (Hna ama. 6:2) Iesu a ukapië Satana pi me itre dremoni angeic qaa hnengödrai kowe la fen. Thupene lai, kolo ha nyiqaane eatre lo hna perofetane tune la hna qaja ngöne la topik ne la drai celë. w15 15/6 4:​13

Tha traqa ju kö kowe la 100 lao macatre thupene la hna acile la pane ekalesia ekö, nge kökötre hë la iamenumenu tune lo aqane ahnithe amë. (Ite hu. 20:​29, 30; 2 Thes. 2:​3, 4) Thupene lai, jole hë troa atrehmekune la itre ka nyihlue i Akötresie hnine la ēnē ne la u. Itre hadredre hë lao macatre thupen, traqa ha la ijine koi Iehova troa amekötine la itre ewekë, jëne Iesu Keriso, Joxu hna hnyipi acil. Ame lo macatre 1919, mama ha la itre ka nyipi nyihlue i Akötresie hnine la ēnē i Nyidrë. Hetre itre ewekë hnei angatre hna amekötine matre ihmeku hnyawa la aqane hmi angatr, memine la aja i Iehova. (Is. 4:​2, 3; Mal. 3:​1-4) Celë hi aqane eatre lo hna meköle goeëne hnei Paulo. Hna qeje pengöne la hna meköle goeëne hnei Paulo ngöne 2 Korinito 12:​2-4. Ame ngöne la hna meköle goeëne cili, hnei Iehova hna amamane koi Paulo la ketre ewekë ka troa traqa elany. w15 15/7 1:​6-8

Ala nyimu la itre atr qa hnine la itre hmi Keresiano Göi Ëjen ka mekune ka hape, troa xomi angatre fë ngönetrei hnengödrai eë. Angatre fe a mekune ka hape, tro angatr a öhnyi Iesu la ­nyidrëti a bëeke hmaca troa mus kowe la fen. Ngo Tusi Hmitrötr a amamane hnyawa ka hape, tha ka mama kö koi lue mek la kola bëeke hnei Iesu, kola hape: “Ame hna mamapi e hnengödrai la hatene la Nekö i ate” nge, tro Iesu a “traqa hune la ite iawe ne hnengödrai.” (Mat. 24:30) Tusi Hmitrötre fe a qaja ka hape, “tha ’teine kö la ijöne me madra troa hetenyi la baselaia i Akötesie.” Haawe, ame koi itre hna troa xome hnengödrai eë, tre, nyipi ewekë troa pane “ujë [angatr] asë ; nyipi saqe hi, tune sameke la alamek, ngöne la ufi trutru hnapin.” (1 Kor. 15:​50-​53) Eje hi laka, kösë kola sameke la kola icasinekeune hnengödrai eë la itre hna iën ka mele petre kö e celë fen. w15 15/7 2:​14, 15

Ame la Uma Ne Baselaia, tre celë hi götrane ka tru hnë icasikeu ne la itre atr göi troa atrunyi Iehova. Ketre ahnahna qaathei Akötresie la itre icasikeu, nge itre ej a xatua së troa acatrene la aqane imelekeu së me Nyidrë. Ame ngöne la itre icasikeu, organizasio i Iehova a thuecatre së me hamëne la ixatua ka ijije koi së. Ketre manathith ka tru koi së troa könë së hnei Iehova me Iesu troa xeni ngöne la ‘laulau i Iehova’ e nöjei wiik. (1 Kor. 10:21) Tha tro pi kö sa thëthëhmine la enyipiewekëne la ihë cili. Iehova a amamane hnyawane koi së la aja i Nyidrë tro sa sine la itre icasikeu göi troa atrunyi Nyidrë me troa ithuecatrekeu. (Heb. 10:​24, 25) Pine laka, easa metrötrë Iehova, tha tro pi kö sa ­triane la ketre icasikeu, loi e hetre nyipi kepin. Easa amamane la ole së kowe la itre icasikeu la easa hnëkëne hnyawa itre ej, me ajane troa canga sin göi troa ce thawa la itre mekun e cili. w15 15/7 4:​3, 4

Celë hi matre nyipi ewekë tro sa lapa treqene hnyawane la pun, ke calemi hë. Ketre, organizasio i Iehova a qaja lapane koi së ka hape, tro sa “teqene me ajane troa traqa la drai [Iehova]” matre tha tro kö a patre e kuhu hni së la fene ka hnyipixe, lo hna thingehnaeane hnei Iehova. (2 Pet. 3:​11-​13) Maine ka nyipi ewekë ekö kowe la itretre drei Iesu troa lapa treqene hnyawa la drai Iehova, haawe tro pala kö a nyipi ewekë catre koi së enehila. Pine nemen? Pine laka mama ha jëne la hatrene hna qaja hnei Iesu ka hape, Joxu hë nyidrë ngöne la Baselaia i Akötresie qaane lo 1914. Ketre, easë hë enehila ngöne la itre drai tixenuë, ene lo “hneijin ne kola troa nyipune la fen.” Ame enehila, kolo pala hi a ngazo catre la fen, nge kola cainöjëne la maca ka loi e cailo fen. Itre ewekë lai hna perofetane hnei Iesu. (Mat. 24:​3, MN, 7-​14) Tha hnei Iesu kö hna qaja la etrune la itre drai ne la pun, celë hi matre nyipi ewekë tro sa lapa itreqe. w15 15/8 2:​4, 5

Ame ngöne la fene ka hnyipixe elany, hetrenyi asë hi së la ka nyipi ewekë matre tro sa mele madrin. Ngo, ame la ka amadrinë së catr, tre ene la troa kapa la itre ewekë i Akötresie. (Mat. 5:3) Tro ha tru hnei jole së elanyi ngöne la huliwa i Iehova, nge tro fe a tru la madrine së troa nyihlue i Nyidrë. Celë hi matre, e tro sa amë panë Iehova ngöne la mele së enehila, easë hi lai a hnëkë kowe la mele ka tha ase palua kö. (Mat. 6:​19-​21) Nemene la nyine tro sa kuca matre tro pala kö a sisitria la madrine së ngöne la huliwa i Ieho­va? Ame la ketre nyine kuca, tre ene la troa eköthe la itre mekune nyine troa eatrën. Maine thöth epun, pane mekune hnyawa jë la aqane tro epuni a huliwane la mele i epuni göi troa huliwa i Iehova. Thele mekune jë ngöne la itre xa itusi së göi itre xa pengöne aqane huliwa i Akötresie o drai, nge iëne jë la ketre nyine tro epuni a eatrën. Ce ithanatane jë memine la itre xa trejine ka hekö hë huliwa i Akötresieti o drai. Maine tro epuni a huliwane la mele i epuni troa huliwa i Iehova, tro hë lai a ini epun me hnëkë epun troa huliwa i Iehova elanyi ngöne la fene ka hnyipixe. w15 15/8 3:​13, 14

Tha ihnimi casi kö la wene ne la ua thiina ka lolo hna melën hnene la keresiano ka macaj. (Gal. 5:​23) Kolo fe a mama thei angeic la thiina ka menyik, me xomehnöth, me xomihni ahoeany. Itre thiina lai ka xatua angeic tro pala hi a hetre madrin me mejiun, ngacama angeice ju hë hnine la itre itupath. Angeic pala hi a thele troa atrepengöne la itre trepene meköt jëne la ini Tusi angeic; ewekë lai ka aijijë angeic troa atrehmekune la loi me ngazo. Ame hë e cili, e tro angeic a xomi mekun, tro hë angeic a huliwane la mekuthetheu i angeic hna inine hnyawan. Ka ipië angeic, matre xecie hnyawa koi angeic ka hape, ka sisitria kö la mekuna i Iehova me aqane waiewekë i Nyidrë hui angeic. Ketre, angeic a catre cainöjëne la maca ka loi me kuca asë la hnei angeic hna atreine matre tro pala hi la ekalesia a cas. Ngacama ka hekö ju hë së nyihlue Iehova, ngo loi e tro sa isa waipengö së me hape: ‘Hetre nyine tro kö ni a saze matre xötrethenge Iesu hnyawa? Ame ngöne la meleng, tre, hetre itre götrane kö nyine tro ni a huliwan?’ w15 15/9 1:​6, 7

Hnene la angetre dreng hna öhnyi Iesu e tro hune la hnagejë ne Galilaia. Peteru a hë Iesu jë, me sipone matre tro fe angeic a hane tro koi nyidrë hune la hnagejë. Ame hë la kola hë angeic hnei Iesu, uti pi hi angeic qa hune la he me tro koi nyidrë. Ngo tha qea ju kö, nge kola ha lö hnei Peteru. Pine nemen? Pine laka, hnei angeic hna goeëne la enyi ka catr me itre hoke ne gejë, nge xou i angeic ju hi. Peteru a hë jë koi Iesu me hape, “Joxue, amele ni.” Ame hnei Iesu hna canga li im, me xolouthi angeic, me qaja koi angeic, la hna qaja caha hun. (Mat. 14:​24-​32) Ka tru catre ekö la lapaune i Peteru. Pine nemene matre qaja jë së tune lai? Ame la Iesu a hë Peteru, canga sesë hi angeic qa hune la he, me tro hune la hnagejë. Mejiune catre angeic kowe la mene i Akötresie, ka hamëne la atreine troa tro tune la atreine hnei Nyidrëti hna hamën koi Iesu. Ketre tune mina fe, ame la Iesu a hë së troa xötrethenge nyidrë, easë hi lai a nue la mele së koi Iehova me xomi bapataiso. Pine nemen? Pine laka ka lapaune së koi Iehova me koi Iesu, nge pine laka ka mejiune së laka tro nyidroti a xatua së.​—Ioane 14:1; 1 Pet. 2:​21. w15 15/9 3:​1, 3

Ame la kem ka ihnim, tre ka thupëne angeic la hnepe lapa i angeic qa ngöne la itre ewekë ka troa angazone la mele i angatr. Celë hi hna kuca lai hnei Iehova Keme së. Pane mekune jë së la ewekë celë: Tune la dremune alamek laka, canga tro hi sa thupën wanga eatre pi, haawe, ketre tui Iehova laka, saqe hi Nyidrëti thupëne la itre hlue i Nyidrë, ke, ka tru angatr koi Nyidrë. (Zaka. 2:​8, MN ) Ngo hetrenyi fe la itre xa hlue i Iehova ka tui Setefano me itre xane ju kö, ka mele nyipici uti hë mec. Maine nyipici laka, hna hane meci la itre xa hlue i Iehova, ngo tha hnei Nyidrëti kö hna nue troa meci asë la itre hlue i Nyidrë. Hnei Nyidrëti pe hna hmekë angatr qa ngöne la nöjei aqane nyinyithiina i Satana. (Efe. 6:​10-​12) Kola hmekë së hnei Tusi Hmitrötr memine la itre itus hne së hna kapa qaathene la organizasio i Iehova. Drei la ketre ceitun: Atre hnyawa hi së la itre ethane la troa huliwane menune la ëternet, me aja mani, me film me itus me elo ka amamai kuci ngazo, me isi. Celë hi aqane hnimi së lai hnei Iehova, nge aja i Nyidrëti troa thupë së. w15 15/9 4:​15, 17

Hnei Iehova fe hna xatuane la itre hlue i Nyidrë troa isigöline la meköti angatr troa cainöj. (Fil. 1:7) Ame la kola thele troa wathebone la huliwa ne cainöj hnene la itre mus, easa tro koi gaa tru. Matre, hna jele meköti së ngöne la 268 lao hnakootr ka tru e cailo, nge 24 ngöne la hnakootr ne Europe lo macatre 2000. Haawe, kola mama hnyawa laka, pëkö ketre ewekë ka troa sawa la ime i Akötresie! (Is. 54:17) Ame la ketre hatrene la ime i Akötresie, tre ene la huliwa ne cainöjëne la maca ka loi e cailo fen. (Mat. 24:14; Ite hu. 1:8) Ketre, kola casi la itre hlue i Iehova ka traqa qa ngöne la nöjei nöj, hnene hi la ixatua i Iehova. Ka ketre pengöne kö la casi cili! Kolo fe hane qaja hnene la itre ka tha ce hmi kö me easë, ka hape: “Thei nyipunieti la Akötesie.” (1 Kor. 14:25) Nyimu ewekë ka amamane ka hape, ce Akötresie memine la itre hlue i Nyidrë.​—Is. 66:14. w15 15/10 1:​13, 14

Hnei Tusi Hmitrötr hna hmekë së matre tha tro kö sa huliwan atrune la itre ewekë ne fen. Kola qaja la troa xome menune pala ha la traeme së kowe la itre ewekë ka mama ngöne la fen. (1 Kor. 7:​29-​31.) Pëkö engazone la itre xan, ngo thupëne kö matre tha tro pe itre ej a aluzine la traeme së. Ka tune la itre ijine mano së, ene la kola e tus, maine goeë televizio, maine troa ihamë ngöne la itre xa götran, maine troa itö, maine troa thele lo itre ewekë ne fen ka hnyipi mama, tune lo mobilis maine itre xa ewekë ju kö ka tune lai. Nyimutre la itre atr ka ithanata ngöne ëternet, maine iupifë maca jëne mail, maine pena goeë nuvel lapa me goëne la itre ka hun ngöne la itre elo. (Ate cai. 3:​1, 6) Maine tro sa nue menune pala ha la traeme së kowe la itre huliwa ka tha nyipi ewekë, pëhë ijine së kowe la itre ewekë ka tru, ene la troa kuca la huliwa i Iehova. (Efe. 5:​15-​17) Satana a thele jëne matre troa huli së kowe la itre ewekë ka troa ajeanyi së qa ngöne la huliwa i Iehova. Hnei angeice hë hna ujë tune lai ngöne lo hneijine ne la itre pane keresiano, ngo catrehnine catre pala kö enehila. (2 Tim. 4:​10) Haawe, the wange sixane pi kö së la hna qaja hnene la topik ne la drai celë. w15 15/10 3:​7, 8

Ame la ketre ijin, hnene la angela i Iehova hna qaja kowe la föi Manoa ka hape, tro angeic a hnahone la ketre nekönatr trahmany. Kola sesëkötre hnei föe, ame hnei angeic hna thuemacanyi Manoa. Ketre, tha lapa hnyawa kö Manoa, me lapa mekune la hnëqa ne keme ka troa ej thei angeic. Tro jë nyidro a tune kaa matre tro la nekö i nyidro a hnimi Iehova me nyihlue i Nyidrë, ngacama itretre Isaraela pe kö a kuca la itre ewekë ka ngazo? Hnei Manoa hna sipone iele koi Iehova troa upe hmaca koi nyidro la angela i Nyidrë me hape: “Joxunge fe, epi traqa hmaca koi ho la ate i Akötesie hnei cilieti hna iup, mate ini ho la ewekë tro nyiho a kuca kowe la nekönate ka tro ha hnahon.” (A. ame. 13:​1-8) Maine ketre keme maine thine epun, ma trotrohnine hi epuni la mekuna i Manoa. Hnëqa i epuni fe troa xatuane la itre nekö i epun troa atre Iehova me hnimi Nyidrë. (Ite edomë 1:8) Ame ngöne la ijine Hmi Hnepe Lapa, xatua angatre jë tro pala hi a atrepengöi Iehova memine la Tusi Hmitrötr. Nyipici laka, hetre xa nyine kuca hune hi la troa ini Tusi Hmitrötr me angatr e nöjei wiik.​—Deu. 6:​6-9. w15 15/11 1:​1, 2

Maine eje hi laka, thatreine kö epuni, goeëne la ka eje e kuhu hni ne la ketre atr, ngo ijiji epuni hi a hane macamek tui Iesu. Tro kö Iehova a xatua epun, itre keme me thin, troa atrehmekune la itre thiina ka loi thene la nekö i epun. Ngacama epuni a elëhni pine la aqane ujë ne la nekö i epuni thöth, ngo the xöjetriji nyëne kö, maine jele jëne gejë nyën. Nge goi tha tro fe a mekune tun. Akeukawanyi nyëne jë pe, me qaja ka hape, öhne hi epuni la itre thiina ka loi thei nyën, me aja i nyën troa kuca la loi. Wange ju la itre götrane nyine tro nyën a huliwan, ngo mekune kö qaja aloinyi nyën. Xatua nyëne jë troa akökötrene la atreine ka eje hë thei nyën jëne la hna thue huliwa i nyën. Aqane kuca i Iesu hi lai kowe la itretre drei nyidrë. Ca macatre nge sin thupene lo Iesu a iöhnyi me Nathaniela, hnei nyidrëti hna thue hnëqa i angeic. Hna acili angeic troa ketre aposetolo, nge hnei angeic hna eatrëne hnyawa la huliwa cili. (Luka 6:​13, 14; Ite hu. 1:​13, 14) Haawe, kuca jë matre tha tro kö la nekö i epuni a drenge ka hape, ka ngazo pala hi la hnei nyën hna kuca. The cile kö troa qaja aloinyi nyën. Loi e tro nyën a atrehmekun la enyipiewekën troa huliwane la itre hnei nyën hna atrein matre amadrinë epuni me Iehova. w15 15/11 2:​15, 16

Qaane lo 1914, ijine kola nyiqaane la itre drai ne la pun, xalaithe hi la itre hlue i Iehova. Hnene la ixatua ne la uati hmitrötr, memine la ihnimi angatr kowe la atre lapa easenyi angatr, matre hnene la itre trejin cili hna iën hna catre cainöjëne la maca ne Baselaia, ngacama traqa ju hë la itre jol koi angatr. Nemene ju hë la thangane lai? Hna acasine la “ka ala nyimu atraqat,” itre ka mejiune troa mel e celë fen. Enehila kola e la ala 8 000 000 lao itretre Anyipici Iehova ngöne la 115 400 nge hetre munën lao ekalesia e cailo fen. Ngo tro pala kö a kökötre la nöje i Iehova. Hanawange la hna e kowe la macatre ­2014: ase hë sasaithe la 275 500 lao atr ka xomi bapataiso lo macatre cili. Kösë ala 5 300 lao atr hna bapataison e nöjei wiik. Kolo pala hi a kökötre lolo la organizasio i Iehova, pine laka easa mejiune koi Nyidrë me kowe la Wesi Ula i Nyidrë, ene la Tusi Hmitrötr. (1 Thes. 2:​13) Nge ketre, Iehova pala hi a amanathithi së ngacama catrehnine catre la icilekeu me imethinë i Satana.​—2 Kor. 4:4. w15 15/11 4:​12, 14, 16

Nyipici laka, hetrenyi la itre hnepe götrane ka tria hna öhne ngöne la itre xa Tusi Hmitrötr ka hekö. Ngo, hnene la itre ka atrepengöne hnyawa la itre tusi cili hna wange hnyawa la itre thauzane lao tus hna ewath, me itre hnepe igötranen, me itre xa Tusi Hmitrötr hna ujëne hë ekö. Thupene la hna ce wange asë, xalaithe hi la itre xötre ka nango isapengön, ngo tha ka patre kö la aliene la maca ne la Tusi Hmitötr. Haawe, ka xecie hnyawa kowe la itre ka ini Tusi Hmitrötr laka, Wesi Ula i Iehova hnyawa hi la Tusi Hmitrötr hnei angatre hna hetrenyi enehila. Ngacama tru ju hë la itre trenge catre hna kuca matre troa apatrene trije la Tusi Hmitrötr, ngo hna ujëne ej enehila koi 2 800 lao qene hlapa; pëkö ketre itus ka atreine wajan ej. Maine nyipici laka, nyimutre catre la itre atr ka tha lapaune kö koi Akötresie, ngo ame pe, hna haöthe la fen enehila hnene la Wesi Ula i Nyidrë. Hetre itre Tusi Hmitrötr ka nango jole pi hë troa e, maine tha ka nyipi meköti kö, ngo ame pe, ame asë hi la itre Tusi Hmitrötr, tre, casi hi la maca hna qatreng, ene la troa hetrenyi elany la mele ka tha ase palua kö. w15 15/12 1:​13, 14

Ame la hne së hna qaja, tre ijije hi troa ithuecatre kowe la atr maine pena troa ahleuhleun. Ala nyimu la itre atr ngöne la fene i Satana ka qaja la itre “tenge ka hait,” ene la itre hnaewekë ka akötr hna aceitunën me “pehna” maine “taua,” ke aja i angatr troa akötrëne la itre atr. (Sal. 64:3) Angatr a ithanata tune lai, ke kola nyitipune la aqane ithanata ngöne la itre sinema, maine tele pena. Ngo ame itre keresiano, tha tro pi kö angatr a qaja la itre trenge ewekë ka iakötrë, ngacama kola qaja qenehnyiman. Tha ngazo kö e troa qenehnyima, ke, lolo e tro sa dreng. Ngo tha tro pi kö a hetre iakötrë ngön, ene la troa qaja la itre trenge ewekë ka troa ahmahmane me thaipiëne la ketre atr, göne hi matre troa hnyimasai angeic. Hna amekötine hnei Tusi Hmitrötr kowe la itre keresiano ka hape, tha tro kö angatr a qaja la itre “trenge ewekë ka iakötrë.” Eje fe a qaja ka hape: “The xulu kö qa ngöne la itre ukeineqë i nyipunie la trenge ka sis, ngo loi pe la trenge ka loi, la nyine troa eamon, matre aciane la loi koi angetre dreng.”​—Efe. 4:​29, 31, MN. w15 15/12 3:​10

Ame ngöne la itre xa qene hlapa, ame la hnaewekë hna hape, “epine hë”, tre, hna ujëne ka hape, “ange catre pi.” Matre trotrohnine hi së laka, pengö i atr hi lai la troa ajane troa egöcatr. Hnene laka ka tha pexeje kö së, thatreine kö troa trianyi së hnene la itre mec. E ka wezipo së, tha easë kö a treqene tro Iehova a kuca la ketre iamamanyikeu matre troa aloinyi së. Easë pe a trengeneune la ijine tro Nyidrëti a aloine asë la itre mec elany. Ame ngöne Hna Amamane 22:​1, 2, hnei Ioane aposetolo hna qaja la “timi ne mel” me itre “sinöe hna melen” ka troa aloine la meci ne la nöjei atr asë. Tha kolo kö lai a qaja la itre trepe drösinöe hne së hna xome enehila nyine troa aloinyi së. Kolo pe a qaja la nöjei ewekë hnei Iehova me Iesu hna troa kuca matre aijijë së troa mele epine palua.​—Is. 35:​5, 6. w15 15/12 4:​17, 18

Öni Iehova göne la hnedrai së ka hape, “troa xölehuje hnene la ala luepi [maine treen] qa ngöne la ite qene hlapa asë, nge tro angat’ a xölehuje la pune la ixete ne la ate Iuda, me hape, tro huni a ce tro me nyipunie, ke ate hë huni laka thei nyipunie la Akötesie.” (Zaka. 8:​23) Kola nyihatrene la “atre Iudra” hnene itre hna iën hnei uati hmitrötr. Hna hë angatre fe ka hape, “Isaraela i Akötesie.” (Gal. 6:​16) Öni Iesu fe, tro la nöje i Akötresieti a cas. Hnei nyidrëti hna qeje itre ka mejiune troa mel e hnengödrai ka hape, “hnënge mamoe ka xalaithe.” Nge ame itre ka mejiune troa mel e celë fen, tre hna qeje angatr ka hape, “ite xa mamoe.” Ngo, öni Iesu göi angatr asë, “casi hi la hna axö mamoe” nge “casi hi la ate thupën.”​—Luka 12:32; Ioane 10:16. w16.01 4:​1, 2

Nyipi ewekë tro sa thupëne hnyawa la aqane imelekeu së me Iehova. Easa mele ngöne la fene i Satana, nge itre ka tha pexeje kö së, matre tro hi a canga löthi së hnene la aqane mekun, me thiina ne la fen. Ceitune hi lai memine la easa aj, nge kola huli së hnene la thelec. Tro së lai a catre aj me isi me thelec. Ketre tune mina fe, loi e tro sa kuca asë la hne së hna atreine matre tha tro kö a huli së hnene la fene i Satana. Matre, tro la huliwa ne cainöje a thupë së tune kaa? Ame la easa qeje Iehova me Tusi Hmitrötr, kola mama cile hnyawa koi së la itre mekune ka lolo nge ka sisitria; nge co pë hë la itre ewekë ka troa athixötrëne la lapaune së. Kola acatrene la lapaune së hnene la huliwa ne cainöj, ke, ej a amexeje lapane koi së la itre hna thingehnaeane hnei Akötresie me itre trepene meköti Nyidrë. Eje fe a aijijë së troa melëne la itre thiina ka sisitria matre thupë së qaathei Satana me fene i angeic. (Efe. 6:​14-​17) Ame la easa catre kuca la itre huliwa i Iehova, kolo hi lai a thupë së matre tha tro kö sa hnehengazo menu la kola traqa koi së la itre jol. w16.01 5:​12, 13

Kola ketri së la aqane hnimi Iehova hnei Rutha. Celë fe hi la ka ketri Boaza, atre qaja aloinyi angeic e thupen, ke, hnei angeic hna thele ixatua ‘fene la lue iape i Iehova.’ (Rutha 2:​12) Easa mekune la aqane thele hna zae hnene la neköi waco fene la lue iape ne la thine i nyën. (Sal. 36:7; 91:​1-4) Hnei Iehova hna nyi Keme koi Rutha. Ketre tune mina fe, hnei Iehova hna thupëne la mele i Rutha, me nyijune koi angeic. Matre, tru la madrine i angeice qa ngöne la aqane axecië mekune i angeic. Ala nyimu la itre atr enehila ka atrepengöi Iehova, ngo tha mekune kö angatr troa nyihlue i Nyidrë. Angatr a luelue troa nue la mele i angatr koi Nyidrë me xomi bapataiso. Maine celë hi mekuna i epuni lai, pane mekune ju la ewekë celë: Hetre hazen asë hi la nöjei atr. (Ios. 24:15) Matre, loi e tro pe a thele troa nyihluene la nyipi Haze. E tro epuni a nue la mele i epuni koi Iehova, epuni hi lai a amamane la mejiune i epuni koi Nyidrë. Nge tro kö Nyidrëti a xatua epuni troa catre nyihlue i Nyidrë, ngacama traqa ju hë la itre jol. Celë hi lai hna kuca hnei Akötresie koi Rutha. w16.02 2:​6, 7

Ame lo Abisai a thele troa humuthi Saulo, angeice hi lai a amamane la aqane nyipici angeic koi Davita. Ngo, hnene laka, ame koi Davita, ngazo e troa akötrëne la “siana i Iehova,” ene pe sewe angeice pi hnei Davita troa humuthe la joxu. (1 Sam. 26:​8-​11) Hetre ini ka tru koi së qa ngön: Maine easa thele ngöne la ketre ijin ka hape: “Drei la atr nyine tro ni a pane nyipici kow?” nyipi ewekë tro sa pane thele la itre trepene meköt ka troa xatua së. Eje hi laka, tha ngazo kö troa nyipici kowe la atr hne së hna hnim, tune la ketre sinee maine ketre atrene la hnepe lapa së. Ngo, itre atr ka tha pexeje kö së, matre canga tro hi lai a amenune la itre hni së. (Iere. 17:9) Haawe, e kei pi kowe la ngazo hnene la ketre atr hne së hna hnim me upetrön eë, mekune pala kö së laka, Iehova hi la nyine tro sa pane nyipici kow, ngo tha ketre atre kö.​—Mat. 22:37. w16.02 4:​5, 6

Pine nemene matre nyipi ewekë tro la itre Keresiano ne Roma a waipengöne hmaca la itre ini hnei angatr hna lapaune kow ? Tro la tulu i Timoteo a amamane la enyipiewekëne lai. Atre hnyawa hi angeic la hna qaja ngöne la Itre Hna Cinyihan, ke tru jë hi angeic a inin ej qaathene la thin me qaaqa i angeic. Nge ketre, hnei Paulo hna thuecatre koi angeic ka hape: “Cile huti ju eö ngöne la nöjei ­ewekë hna ini’ ö me hna kapa hnei’ö.” (2 Tim. 3:⁠14, 15) Ame la qene Heleni la hna hape “kapa,” tre kola hape, “xecie e kuhu hni ne la atr laka, ka nyipici la ketre mekun.” Haawe, xecie hnyawa e kuhu hni Timoteo laka, nyipici hi la hna qaja ngöne la Itre Hna Cinyihan. Tha hnei angeic kö hna kapa la itre ini cili ke, qaathei thin me qaaqa hmunë, ngo hnene pe laka, hnei angeic hna ketre waipengöne hnyawa itre ej matre kapa jë angeic. (Rom. 12:1) Maine tro eö a sipu inine hnyawane la Tusi Hmitrötr, tro hë eö lai a atreine sa la itre hnyinge i eö, me apatrene la itre hnepe ewekë hnei eö pala kö hna lueluën. Ketre, tro fe lai a acatrene catrëne la mejiune i eö kowe la itre ini hnei eö hna kapa ha.​—Ite hu. 17:11. w16.03 2:​3, 4, 7

Ame lo angetre Isaraela ekö a tro kowe la itre pui ne xen e Ierusalema, hnei angatre hna majemine ce huliwa. Angatr a hnëkën asë la nöjei ewekë hna ajane thatraqane la tronge i angatr. Nge, angatre pë hë a ce trongëne jë la itre gojenyi me itö ixatua. Ame hë ngöne la ēnē, angatr asë a ce atrunyi Iehova. Easë enehila a troa lö kowe la fen ka hnyipixe, matre nyipi ewekë tro sa casi me catre ce huliwa. Pane mekune jë la itre manathithi hnei eö hna troa kapa elany. Easa olene koi Iehova laka, hnei Nyidrë hna xatua së troa hetrenyi la tingeting me hane atre la nyipici! Tune lo hna perofetane hë hnei Isaia me Mika, easa ce elë kowe “la wete i Iehova.” (Is. 2:​2-4; Mika 4:​2-4) Pine laka easa “ngöne la ite drai hnapine,” loi e tro pala hi sa catre ce huliwa. Nge, drei la madrine së elanyi la kola ce nyihlue i Iehova hnene la nöjei atr e celë fen! w16.03 3:​16, 17

Jole pi hë koi itre xa qatre thup troa xomi ijine troa inin me hnëkëne la itre trejine trahmany. Angatr a mekune ka hape: ‘Hetre itre xa huliwa ne la ekalesia nyine troa canga kuca, nge tha nyine tro kö a pane amë. Tha tro kö lai a ajolëne la ekalesia, e tha canga inine kö ni la itre trejine trahmanyi me hnëkë angatr.’ Eje hi laka, hetre itre huliwa nyine troa canga kuca hnene la itre qatre thup. Ngo, e tro epuni a uthe lapane troa inine la itre trejine trahmany, tro lai a hetre ethanyine elanyi kowe la ekalesia. Loi e tro la itre qatre thup a canga kuca la itre jole ka nyipiewekë catr. Ngo maine tro la itre qatre thup a uthe lapane la troa inine me hnëkëne la itre trejine trahmany, haawe, tro kö lai a traqa la ijine laka, tha ijije hë la itre trejine trahmanyi ngöne la ekalesia troa kuca asë la itre huliwa. Haawe, the mekune pi kö ka hape, tha nyine tro kö a sikusikune la troa inin me hnëkëne la itre trejin trahmany. Ame la itre qatre thup ka wangatrune la loi ne la ekalesia elany, nge ka xomi ijine troa inin me hnëkëne la itre trejin, tre itre hlue ka inamacan, nge ka nyipiewekë angatr kowe la itre trejine trahmanyi me föe.​—1 Pet. 4:​10. w15 15/4 1:​4, 6, 7