Januare

Easa palahi a easenyi catre kowe la pune la fene celë, nge kolo palahi a elë trootro la etrune la itre atr ka ngazo. Kola mana “tune la hnënge haö.” (Sal. 92:7) Matre, tha sesëkötre kö së laka, alanyimu la itre atr ka thipetrij la itre trepene meköti Iehova. Hnei Paulo hna eamone la itre keresiano ka hape: “Ange tejine fe, the hni ne nekönate kö ngöne la mekun ; loi pe hni ne medenge ngöne la iangazo, ngo hni ne nyipi ate pi ngöne la mekun.” (1 Kor. 14:20) Nemene la aqane tro sa trongëne la eamo celë? Önine la xötre ka nyitrepene la tane mekune celë, ka hape: “Itete thele Iehova a trotrohnin’ asë.” Kola hape, angatr a trotrohnin la nöjei ewekë asë ka nyipiewekë catr göi troa amadrinë Iehova. Kolo fe a mama la mekune cili ngöne Ite Edomë 2:7, 9, Iehova “a amë la inamacane thatraqai ange ka meköt.” Celë hi matre, angatr a “trotrohnine la ka meköt, memine la hna amekötin, me ka ijij ; me ite jëne ka loi asë.” Hetrenyi thei Noa, me Daniela, me Iobu la inamacan qaathei Akötresie. (Ezek. 14:14) Nge, hetrenyi fe la thiina cili thene la itre hlue i Akötresie enehila. Tune kaa fe eö? Hetrenyi fe kö thei eö la inamacan qaathei Akötresie? E aja i eö troa hetre “trotrohnin’ asë” troa amadrinë Iehova, loi e tro eö a atrepengöi Nyidrëti hnyawa. w18.02 9 par. 1-3

Eje hi laka, tha tro pi kö sa musinëne la nekönatr, maine la ka ini Tusi me easë troa xomi bapataiso. Ame Iehova, tha ka imusinë kö troa nyihlue i Nyidrë. (1 Ioane 4:8) Ame la easa ini Tusi memine la nekö së, maine ini Tusi pena me itre xan, loi e tro sa xatua angatr troa trotrohnine la enyipiewekën la troa imelekeu me Iehova. Nge, maine tro la ka ini Tus a hetre hni ne ole kowe la itre nyipici göi Akötresie, me hetre aja troa trongëne la itre hna amekötin thatraqane la keresiano, tro hë angeice lai a hetre aja troa xomi bapataiso. (2 Kor. 5:14, 15) Tha hna amekötine kö la macatre ne troa xomi bapataiso. Ame la itre xa ka ini Tus tre, ka canga kökötre kö angatr hune la itre xan. Ketre drai ne madrine la drai ne bapataiso. Nge, ijine fe hi lai troa mekune hnyawa la hnëqa së, ene la troa catre mele thenge la hna sa xepu me xomi bapataiso. Tha ka hmaloi kö troa trongëne la hnëqa cili. Celë hi kepine matre, “tha tro hmaca kö [la itretre drei Iesu] a mele koi angate kö ange ka mel, ngo loi pe koi nyidëti ate meci nge mele hmaca ha thatraqai angat.”​—2 Kor. 5:15; Mat. 16:24. w18.03 6-7 par. 14-17

Hapeu, hnei epuni kö hna cile hnö e itre xa ijin troa ikep? Maine nyipici ke, triane hë epun la ketre ijine troa ce madrin, nge ka troa xatua epun troa hetre itre nyipi sinee ka epine palua. Ame la troa ikep, tre, celë hi aqane tro sa elë hun lo mekun ka hape, pëkö ka hnimi së. Pine nemene hö matre hetre itre trejin ka cile hnö troa ikep? Tro sa ce wang la itre xa kepin. Nyimutre catre la itre huliwa ne la itre hlue i Iehova, nge itre ka trene hnëqa asë hi angatr. Matre, itre xan a mekun laka, pëkö traem, me trengecatre i angatr troa ikep. Maine celë hi aqane mekuna i epun, loi e tro epuni a wange hmaca la porogarame i epun matre ijij troa ikep, maine troa kapa la ihë ne la ketre trejin. Ka nyipiewekë catre lai ke, Tusi Hmitrötr la ka upi së troa ikep. Maine epuni a ajan troa ikep, loi e tha tro kö epuni a aluzi traem ngöne la itre huliwa ka tha nyipiewekë kö. w18.03 16 par. 13-14

Iesu la tulu ka sisitria göi troa ce mekun me Akötresie. Hnei nyidrëti hna nyitipune la Keme i nyidrë ngöne la aqane mel, me catre cainöje i nyidrë. Casi hi la aqane mekun, me aqane ujë, me aliene hni nyidrë me Iehova. Hnei nyidrëti hna kuca la aja i Iehova, me trongëne la itre hna amekötin. (Ioane 8:29; 14:9; 15:10) Hanawange la aqane qejepengöne Isaia la utipine i Iehova, memine la aqane qejepengöne Mareko la utipine i Iesu. (Is. 63:9; Mar. 6:34) Hapeu, easë kö a nyitipu Iesu, me amamane la utipine së kowe la itre atr ka ajan? Tui Iesu, easë kö a wangatrune la huliwa ne cainöjëne la maca ka loi? Ame la atr ka ce mekun me Akötresie, angeic a utipine la itre atr me xatua angatr. w18.02 21 par. 12

Tha ka hmaloi kö troa hiane la itre nekönatr enehila. (2 Tim. 3:1-5) Ame la kola hnahone la nekönatr, thatre pala kö nyën la loi me ngazo, nge tha hna inine kö la mekuthethewe i nyën. Celë hi matre, nyipiewekë troa haji nyën. (Rom. 2:14, 15) Hnene la ketre atr ka qejepengöne la Tusi Hmitrötr hna qaja ka hape, ame la qene Heleni ne la hnëewekë “ihaji” tre, kolo fe a qaja la “aqane macaje trootro la nekönatr” utihë la kola nyipi atr. Tingetinge la hni ne la nekönatr, e hna haji nyën hnei keme me thin, cememine la ihnim. Ketre, nyën a trotrohnine laka, tha tro kö nyën a sipu kuci mekun. Nge, tro kö nyën a xeni pun la itre huliwa i nyën. Celë hi matre, nyipiewekë catre kowe la keme me thin keresiano troa mejiune kowe la inamacane i Iehova ngöne la kola hiane la nekönatr. Isapengöne kö la aqane hiane la itre nekönatr thenge la itre götrane hnei angatr hna mele ngön. Ketre, kolo palahi a saze la aqane hiane la itre nekönatr. Ngo, ame la kem me thin ka drengethenge Akötresie, tha nyidroti kö a saze lapane la aqane hiane nyidroti la nekönatr, maine mejiune pena kowe la inamacane i fen. w18.03 30 par. 8-9

Loi e tro la thöth Keresiano ka bapataiso hë, a ketre sipu akötrehnine la imelekeu i angeic me Iehova, ngacama angeice pala kö thei kem me thin. Pine nemene matre ka nyipiewekë catre lai? Pine laka saze hë la itre ewekë ka ej e kuhu hni angeic, nge hetre itre jol ka hnyipixe ka traqa koi angeic. Önine la ketre jajiny: “Ame la nekönatr, xele kö angeic ma xeni gato ne aniverser ke, ame koi angeic, ketre Atre Anyipici Iehova angeic. Ngo, ame ngöne la itre macatre thupen, kola nyiqaane mejë la itre aja ne ngönetrei, matre loi e troa xecie koi angeic ka hape, nyine loi koi angeic la troa trongëne la itre trepene meköti Iehova.” Hna tupathe fe la lapaun ne la itre ka tru hnene la itre jol ka traqa e hnine la hnepe lapa, maine hnei itre sine mec, maine ngöne la hnë huliwa pena. Itre ka tru ju hë së maine thöth, ngo loi e tro së isa ala cas a thel tro palahi a nyipici koi Iehova ngöne la nöjei pengöne itupath.​—Iako. 1:12-14. w17.12 24 par. 4-5

Alanyimu la itre atr ka tha hane kö melëne la itre jol ka traqa koi Davita. Ngo, tha hnei angeice pi kö hna nue la itre ewekë cili troa aelëhni angeic. Öni angeic: “Aseju elëhni, nge the iwesitë kö ; the aköte kö, wanga kuca la ngazo.” (Sal. 37:8) Ame la nyipi kepine matre easa nue la elëhni, tre, hnene laka, easa ajan troa nyitipu Iehova. “Tha hnei nyidëti kö hna kuca koi shë cei tune memine la ite ngazo shë.” (Sal. 103:10) Hetre itre xa kepin matre tha tro kö sa lapa fë elëhni. E tru palaha la elëhni së, tro ha elë la tasio së, me meci fë hmanono. Tro fe lai a hetre ethan kowe la idre me izene së, memine fe la trengenane së. Ketre, ame la easa elëhni, tha maca kö la itre mekune së. Nge tro hë së lai a hleuhleu. Öni Tusi Hmitrötr: “Ame la wenethëhmi ka [menyik], te, mele ne la ngönetei.” (Ite edomë 14:30) Haawe, nemene la nyine tro sa kuca e hna akötrë së hnene la ketre trejin? Loi e tro sa trongëne la itre eamo ne la Tusi Hmitrötr. w18.01 10 par. 14-15

Tha Davita kö e celë a qaja ka hape, tha tro pi kö angeic a mec, me öhne la hua. Öni Tusi Hmitrötr, hnei Davita hna utipië trootro me mec, ame “hna ce meköle memine la ite xötapane i nyidë, nge hna kelemi nyidë ngöne la lapa i Davita.” (1 Ite jo. 2:1, 10) Nga, kola qeje drei kö hnene la Salamo 16:10? Hnei Peteru hna qejepengöne la aliene la xötre celë. Thupene la kola meci hnei Iesu, me amele nyidrë hmaca, hnei Peteru hna cainöj kowe la angetre Iudra, me kowe la itre trenyiwa ka lö kowe la hmi Iudra. Hnei angeic hna amexeje koi angatr laka, hna mec, me kelemi Davita. Nge, atre hnyawa hi angatre lai. (Ite hu. 2:29, 30) Ketre, tha hnei Tusi Hmitrötre kö hna qaja ka hape, hnei angatr hna icilekeu memine la itre ithanata i Peteru lo kola hape: “Atre hë [Davita] ekö laka, troa amele Keriso [maine, Mesia] hmaca, ame hnei angeic hna ithanatan.” Hnei Peteru hna anyipicine lai la angeic a amexeje lo itre hna qaja hnei Davita ngöne Salamo 110:1. (Ite hu. 2:33-36) Hnene laka, hnei Peteru hna qejepengöne hnyawa, ame hna atre hnene la ka alanyimu laka, Iesu hi la “Joxu me Keriso.” Mama hnyawa ha kowe la itre atr laka, eatre hë lo hna qaja ngöne Salamo 16:10, lo kola amele Iesu hmaca qa hna mec. w17.12 10 par. 10-12

Ka nyipici me ka inamacane la aqane huliwane la itre ahnahna hnene la Lapa Ne Xomi Meköt. (Mat. 24:45) Itre atrene la Lapa Ne Xomi Meköt a thith matre tro angatr a axecië mekune hnyawa, me huliwane hnyawane la itre ahnahna hna kapa. (Luka 14:28) Hnei Paulo aposetolo hna xawane la itre manie nyine troa xatuane la itre trejin e Iudra. Nge hnei angeic hna thupëne matre troa xawan me thawa la manie hnene la itre atr ka meköt ngöne ‘la nöjei ewekë, tha qëmeke i [“Iehova, MN”] hmekuje hi, ngo qëmeke ne la nöjei atre fe.’ (2 Kor. 8:18-21) Ame enehila, kola nyitipu Ezera me Paulo hnene la organizasio göne la aqane troa huliwane la itre ahnahna. (Ezera 8:24-33) Ame ngöne la hnedrai së, nyimutre la itre huliwa hna kuca hnene ej. Celë hi matre hetre aja ne la organizasio troa huliwane hnyawane la itre ahnahna i epun. Matre, ej a thele troa ahmaloeëne la itre huliwa, nge tha tro kö a nue menune la mani. w18.01 19-20 par. 12-13

Ame la ka troa upi së troa nue la ngazo i ketre tre, ene la ihnim me thiina ka menyik. E traqa ju akötrë epun hnene la aqane ithanata, maine aqane ujë i ketre, mekune ju lo itre ijine hnei epuni hna hane akötrë ketre, nge hna nue la ngazo i epun hnei angeic. Eje hi laka, tru la madrine së la hna hnimi së! (Ate cai. 7:21, 22) Easa olene koi Keriso la casi ka ej the së, itre hlue i Iehova. Easë asë hi a hnim la Akötresie ka cas, me cainöjëne la maca ka cas, nge ceitune hi la itre jole hne së hna cile kow. E ka ihnimi së, me thiina ka menyik, me atreine nue la ngazo i ketre, tro hë la ekalesia a cas, nge tro palahi sa wangatrune la edrö së. Ame la atr ka zalu tre, tro fe lai a hane luzi la edrö i angeic. Celë hi hna amamane hnei Tusi Hmitrötr. Hnene laka, hnei Kaina hna zalu koi Abela, ame hnei angeic hna humuthi Abela. Hnei Kora, Dathana, me Abirama hna zalu koi Mose, ame hnei angatr hna icilekeu me angeic. Hnei Saulo joxu hna zalu koi Davita, ame hna thel troa humuthi angeic. w17.11 27 par. 9-10

Maine kola sine la komite ne iameköti hnene la itre qatre thup, loi e troa mama fe koi angatr ka hape, ka ietra la trejin. Troa mama la ietra ne la atr jëne la aqane waiewekë, me thiina, memine la mekuna ne la hni angeic. Celë hi matre, tha ka hmaloi kö kowe la itre qatre thup. (Hna ama. 3:3) E ajane la trejin troa utipi angeic, loi e tro angeic a pane ietra. Atre hnyawa hi Iehova me Iesu la ewekë ka ej e kuhu hni ne la atr. Ngo, thatreine kö la itre qatre thup troa öhne la aliene hni së. Maine ketre qatre thup epun, nemene la aqane troa mama koi epun laka, ka nyipi ietra la ketre trejin? Pane thithi jë troa hetre inamacan. (1 Ite jo. 3:9) Thupene lai, ithele jë jëne la Wesi Ula i Akötresie, me jëne la itre itus qaathene la hlue ka nyipici. Tro ha mama hnyawa koi epun la eisapengönene la “aköte [maine, hace] ne fen” memine la “hace ka ihmeku memine la aja i Akötresie,” celë hi nyipi ietra. (2 Kor. 7:10, 11) Thele jë troa atrepengöne jëne la Tusi Hmitrötr la atr ka ietra, maine tha ka ietra. Nge, thele jë troa atre la itre mekun, me huliwa, me itre aliene hni angeic. w17.11 17 par. 16-17

Ame enehila, hna wangaloine la aqane ujë cili e hnine la itre itus, me film, me ngöne tele. Ngo, hnene la tha idrei matre kola isa thë la itre hnepe lapa. Nge atre hnyawa hi së laka, ame la hnepe lapa tre, trepene hi la nöj. Tha ka sihngödri kö lai kowe la atr qaane hë ekö. Ame thene la angetre Heleni ekö, ame la atr ka lepi keme me thin tre, hna xom ceitu angeic me atr ka hnëjin. Nge, ame fene la musi angetre Roma, ame la atr ka lepi kem, tre, hna tranyi angeic ceitu memine la atre ihumuth. Ame ngöne la Itre Hna Cinyihan Qene Heberu me Qene Heleni tre, kola thuecatrene la itre nekönatr troa metrötrë keme me thin. (Eso. 20:12; Efe. 6:1-3) Nemene la ka troa xatuane la itre nekönatr troa drei keme me thin, ngacama itre xa nekönatr a tha idrei? E tro la nekönatr a mekun la nöjei ewekë ka lolo hna kuca thatraqai angeic hnene la keme me thin, tro angeice lai a hetre hni ne ole koi nyidro, nge tro fe lai a upi angeic troa idrengethenge. Loi e tro la nekönatr a trotrohnine laka, aja i Iehova, Keme së, tro angeic a drei keme me thin. Ame la angeic a qaja aloinyi nyidro, kolo hi lai a upe la itre sinee i angeic troa metrötrëne fe la keme me thine i angatr. w18.01 29 par. 8-9

Ame enehila, nyipiewekë tro la keresiano ka kei kowe la ngazo, a wang la itre qatre thup. Tro angatre a xatua angeic matre troa lolo hmaca la aqane imelekeu i angeic me Iehova. Pine nemen matre ka nyipiewekë catre lai? Ame la hnapan, Iehova la ka upe la itre qatre thup troa amekötin la itre ngazo ka tru hna kuca. (Iako. 5:14-16) Ame la hnaaluen, qa ne la itre qatre thup troa xatuan la itre ka ietra matre troa kepe angatr hmaca hnei Iehova, nge matre tha tro kö angatr a kei hmaca kowe lai ngazo. (Gal. 6:1; Heb. 12:11) Ame la hnaakönin, qa ne la itre qatre thup, nge hna ini angatr troa xatuane la itre ka ietra, nge matre tha tro kö a hleuhleu menu la hni angatr. Iehova a hëne la itre qatre thupe cili ka hape, “hnapo ene la wene.” (Is. 32:2) Celë hi hna hnëkëne lai hnei Iehova, nge ka amamane la utipine i Nyidrë koi së. Alanyimu la itre hlue i Iehova ka öhne laka, uqa pi hi angatr la kola traqa hnene la itre qatre thup me hamë ixatua koi angatr. w17.11 10 par. 8-9

Maine nyipici laka, kola akötr la kola hajin la atr hne së hna hnim, ngo tha tro pi kö sa thel troa ihë, me iupi fë maca jëne mobilis, maine tus, maine e-mail, maine porotrik jëne Ëternet pena. Catre pi pe me mejiun! Ame la ihnim, tre, “ate mejiune la nöjei ewekë asë,” matre catre jë mejiune laka, tro kö la atr hnei epuni hna hnim a bëeke koi Iehova. (1 Kor. 13:7) Maine epuni a öhne laka, angeic a nyiqaane amekötine la mele i angeic, thithi jë matre tro angeic a hetrenyi pala hi la trengecatr qa hnine la Tusi Hmitrötr, me kapa la ihë i Iehova kola hape: “Hmacaju koi ni.” (Is. 44:22) Hnei Iesu hna upi së troa hnime catrë nyidrë hune la itre xa atr. Xecie hnyawa koi nyidrë laka, tro la itretre drei nyidrë a nyipici koi nyidrë, ngacama kola icilekeu hnene la hnepe lapa i angatr. Matre, e traqa jë la icilekeu ne la hnepe lapa i epun pine laka epuni a xötrethenge Iesu, haawe, qale jë koi Iehova. Sipo ixatua jë koi Nyidrë matre troa cile hut. (Is. 41:10, 13) Loi e tro epuni a lapa atre laka, Iehova me Iesu a kepe epun, nge tro nyidroti a amanathithi epun. Celë hi ka troa thue madrine i epun. w17.10 14 par. 19-21

Hetre utipine së la easa goeëne la atr, kola akötre fë la itre ethane la ngazo, tune la itre sine mec, memine la kola utipië trootro. Easa ajane catrën la ijine troa patr la itre ewekë cili, celë hi matre easa thith matre traqa pi la Baselaia i Akötresie. Ngo ame enehila, easa isine troa xatuane la itre ka wezipo, me itre qatr. Hnene la ketre atre cinyihan hna qaja ka hape, ame la ketre ijin, hnene la thine i angeic ka qatre föe hë, nge ka meci fë thëthëhmi, hna adrone la iheetre i eahlo. Eahlo petre kö a köle hnyawan, nge fenafena jë hi la qëhnelö. Kolo lue Atre Anyipici Iehova ka majemine wai eahlo. Hnene la lue trejin föe hna sipon matre tro nyidroti a xatua eahlo. Öni eahlo jë hi: “Öö! Ngo ma eni a ajolë epon.” Hnene la lue trejin hna xatua eahlo troa nyihnyawa eahlo. Thupene lai, hnei angatr hna iji tri, me ce porotrik. Tru la ole ne la nekö i eahlo trahmany, matre öni angeic, Itretre Anyipici Iehova a “trongëne la hnei angatre hna cainöjën.” Hapeu, tro kö la utipine i epun a upi epun troa catr xatuane la itre ka wezipo me itre qatr?​—Fil. 2:3, 4. w17.09 9 par. 5; 12 par. 14

Loi e tro sa kuca la loi koi ketre, ngo tha tro pe a atre. (Mat. 6:1-4) Amamai tulu jë fe göi troa atrunyi ketre. (Rom. 12:10) Celë hi hna kuca hnei Iesu lo nyidrëti a köle la itre lue ca ne la ange aposetolo. (Ioane 13:3-5, 12-15) Tro sa catre thele troa ipië matre tro sa atrune la itre atr tune lai. Hna trotrohnine hi hnene la ange aposetolo la hna kuca hnei Iesu lo ijine angatr a kapa la uati hmitrötr. (Ioane 13:7) Tha tro kö sa mekun ka hape, ka sisitria kö së hui itre xan, ke, hne së hna kapa la itre ini ka tru, maine ka trenamo së, maine pena ka trene hnëqa ngöne la huliwa i Iehova. Eje hi lai laka, easë hi lai atrune la itre atr. (Rom. 12:3) Maine hetre itre trejin hna atrun, nge ame koi së, tre, easë fe la ka ijiji troa hane kapa la iatruny, haawe, tha tro kö sa zalu, ngo tro pe sa ce madrine me angeic. w17.10 9 par. 9-10

Alanyim la itre ka öhne la emenene la Tusi Hmitrötr la kola huliwane ej ngöne la hna cainöje trootro. Hnene la ketre trejin trahmanyi hna majemine wange la ketre qatr ka xome lapane la itre zonale së, a traqa ha koi nyimu macatre. Ame ju hi la ketre drai, lo angeic a tro fë mina la Ita Ne Thup ka hnyipixe, mekune jë hi angeic troa e la ketre xötr koi nyidrë. Hnei angeic hna e la 2 Korinito 1:3, 4, kola hape: “Tetetroti ka ihnimi me Akötesieti ate akeukawan’ asë ; lo ate akeukawa huni ngöne la aköte huni asë.” Hna ketri nyidrëti hnyawa hnene la lue xötre celë, ame hnei nyidrëti hna sipone la trejin troa e hmaca lue ej. Nyidrëti a qaja jë kowe la trejin ka hape, celë hnyawa hi la hnei nyidrë me föi nyidrëti hna ajan. Hnene la lue xötre cili, matre hetre aja i nyidrëti jë troa kapa la itre xa ithuemacanyi qa hnine la Tusi Hmitrötr. Hetre menene catr la troa huliwane la Tusi Hmitrötr ngöne la hna cainöje trootro!​—Ite hu. 19:20. w17.09 26 par. 9-10

Pane mekune jë së la aqane ujë Iehova la kola icilekeu hnei Satana ngöne la hlapa e Edena. Hnene la itre hlue i Iehova e hnengödrai hna wesitr, me ngazo fë la itre ithanata hna sil hnei Satana. Ngo, lolo la aqane ujë Iehova me tulu ewekë i Nyidrë. Hnei Nyidrëti hna hmitr elëhni, nge meköt la aqane nyinyine Nyidrë la icilekeu i Satana. (Eso. 34:6; Iobu 2:2-6) Pine nemen? Hnei Iehova hna nue ijin, ke, tha ajane kö Nyidrëti tro la itre atr a mec, “loi pe tro angat’ asëjëihë a ietra.” (2 Pet. 3:9). Kola amamane koi së hnene la tulu i Iehova laka, nyipiewekë tro sa pane mekune hnyawa la itre ithanata me aqane ujë së la kola traqa koi së la ketre jol. Haawe, e traqa ju epuni axeciëne la ketre mekune ka tru, xomi ijine jë troa pane mekune hnyawa. Thithi jë koi Iehova matre troa hetrenyi la itre ithanata me aqane ujë ka loi. (Sal. 141:3) E ka wesitre së, maine hna akötrë së pena, canga tro hi së lai a qaja me kuca la itre ewekë nge tha hna mekune kö. Alanyimu la itre atr ka ujë tune lai, nge angatre pë hë a ietra e thupen!​—Ite edomë 14:29; 15:28; 19:2. w17.09 4 par. 6-7

Hapeu, joxu fe hë Iosua la kola të la korona hune la he i angeic? Ohea. Tha ketre matra i Davita kö angeic, matre tha ijiji angeice kö troa joxu. Ame la korona i angeic, tre, kola nyihatrene la ewekë ka troa traqa elany, me kowe la joxu, lo atre huuj, nge ka epine palua. Celë hi hna hën ka hape, Zine. Öni Tusi Hmitrötr, Iesu Keriso la Zine. (Is. 11:1; Mat. 2:23) Iesu la Joxu me Atre Huuj Ka Sisitria. Nge, nyidrëti la ka elemekene la itre angela, lo trongene isi Iehova. Haawe, tro nyidrëti lai a thele jën matre tro la nöje i Iehova a lapa tingeting ngöne la fene ka iakötrë celë. (Iere. 23:5, 6) Easenyi catre hë matre tro Keriso a ngaan la itre mus, ngöne la nyidrëti a isigöline la musi Iehova, memine la nöje i Nyidrë. (Hna ama. 17:12-14; 19:11, 14, 15) Qëmekene la ijine cili, atraqatre la huliwa nyine tro Iesu, lo Zine a kuca. w17.10 29 par. 12-14

Tune kaa e öhne jë epun laka, ka dro, nge ka punepun la iheetre i epun? Tro epuni lai a canga unatrij. Ketre tune mina fe, e öhne hi së laka, hetre itre huliwa hne së hna kuca, nge hna methinën hnei Iehova, loi e tro sa canga ujë. Hnei Paulo hna amexeje la itre huliwa ka sis cili, me hape: “Tijepi qa thei nyipunie la nöjei ewekë celë.” Ame la ketre huliwa ka sis, tre, ene la kuci ngazo. (Kol. 3:5-9) Ame la “kuci ngazo” e hnine la Tusi Hmitrötr tre, kolo fe a qaja la kola ce meköle trefëne la trahmanyi me föe ka tha faipoipo kö. Hnei Paulo hna upe la itre keresiano troa ‘humuthe la itre hnepe ngönetrei’ i angatr, e traqa ju koi angatr la aja troa kuci ngazo. Kolo lai a hape, tro angatr a isin troa lepetrij la itre aja ka sis thei angatr. Nyipici laka, tha ka hmaloi kö, ngo ijiji së hi troa traqa kow! w17.08 18 par. 5-6

Hnei Mika perofeta hna xomihnine la itre jole ka tru, tu së fe hi enehila. Hnei angeice hna mele ngöne la ijine musi Ahaza joxu. Ketre joxu ka ngazo thiina. Tru la hna huliwa atrekënö ngöne la nöj. Tru catre la ngazo hna kuca, matre öni Tusi Hmitrötr, ‘hna hnëkëne la itre atr thatraqane la ngazo.’ (Mika 7:1-3) Atre hi Mika laka, tha ijiji angeice kö troa sazene la aqane mele ne la nöj. E ka lapaune së tui Mika, troa hetre aja së troa itreqe. Tha ceitu së kö memine la atr hna akalabusin, kola treqene la ijin troa humuthi angeic. Nge tha ajane kö angeic troa traqa kowe la ijine cili. Ngo ame pena së, hetre aja së troa treqe Iehova, ke, xecie hnyawa koi së laka, tro Nyidrëti elany a eatrën la hnei Nyidrëti hna thingehnaean koi së, ene la troa mele epine palua. Nge tro Nyidrëti lai a eatrën ngöne la nyipi ijin. Celë hi matre, easa “cengöne xomi hni me xomihni ahoeanyi memine la madin.” (Kol. 1:11, 12) Ame la easa itreqe, tha tro kö sa eetr me hape, tha canga aeatrëne kö Iehova la hnei Nyidrëti hna thingehnaean. Tha easë kö e cili a amadrinë Nyidrë.​—Kol. 3:12. w17.08 4 par. 6-7

Nemene la nyine tro sa kuca matre troa kapa la ixatua i Iehova? Nyipiewekë tro sa imelekeu hnyawa me Nyidrë. Ngo loi e tro sa hetre hni ne ipië. (Zef. 2:3) Ame la atr ka ipië, ka mejiune angeic, laka, tro kö Iehova a amekötin, e hna kuca koi angeic la ewekë ka tha meköti kö, nge tro fe a xatua angeic ngöne la akötre i angeic. Nge Iehova a madrine la aqane ujë i angeic. Iehova a “ukapiëne hnadro eë la nöjei ka ngazo.” (Sal. 147:6b) Tha ajane kö së troa kuca tun koi së! Easë pe a ajane tro Nyidrëti a hnimi së me nyipici koi së. Matre, nyipiewekë tro sa sisine la hnei Nyidrëti hna sisin. (Sal. 97:10) Tro sa sisin la kuci ngazo. Kola hape, tro sa neëne la nöjei ewekë ka troa tro xomi së kowe ej, ene mina fe la itre iatr ka sis. (Sal. 119:37; Mat. 5:28) Nyipici laka, tro së lai a isi memine la itre aja së ka ngazo, ngo nyipiewekë tro sa catr matre troa amadrinë Iehova. Tha ijiji së kö troa isi cas. Loi e tro sa thele ixatua thei Iehova jëne la thith. w17.07 19-20 par. 11-13

Ame la easë a huliwan la itre mo së thatraqane la huliwa ne cainöj, easë hi lai a xatuane la itre trejine me së. Haawe, maine tha ijiji së kö troa huliwa i Akötresie o drai, maine fek kowe la ketre götrane ka aja ixatua pena, hetre loi nyine tro fe sa kuca kowe la itre trejin. Ame la itre ahnahna hne së hna kuiëne tre, nyine troa kuca la itre itus, me sajuëne la huliwa ne cainöj ngöne la itre götrane gaa pë ewekë. Matre, ala nyimu e cili la itre ka lö kowe la nyipici hnene lai. Ame ngöne la itre nöj tune e Congo, me Madagascar, me Rwanda, ka tru thupene catr la Tusi Hmitrötr. Ame itre xa ijin, ceitune hi la thupene ej memine la etrune la hna kapa hnene la atr ka huliwa i maseta ngöne la treu. Ngöne la itre macatre ka nyimutre, hnene la itre xa trejin hna axeciëne troa itö Tusi Hmitrötr hune la troa itö xen. Ngo, hnene la itre ahnahna hna hamën hnene la ka ala nyim, matre “cei tune” asë. Celë hi ka aijijëne la organizasio i Iehova troa ujën me hamëne gufan la Tusi Hmitrötr kowe la nöjei atrene la hnepe lapa, me itre ka ini Tus.​—2 Kor. 8:13-15. w17.07 9 par. 11

Pine nemene matre kola akeukawanyi së, e tro sa mekune la aqane mele nyipici Iobu? Pine laka, ka hetre aliene la itre akötre së. Tha Iehova kö e cili a amamane la wesitre i Nyidrë, ngo itre eje pe a aijiji së troa amamane laka, easa sajuëne la musi cile i Nyidrë. Ame la easa mele nyipici me xomihnine itre ej, easë hi lai a amadrinë Iehova. Ketre, kola acatrene la mejiune së kowe la itre drai elany. (Rom. 5:3-5) Kola mama hnene la hna melëne hnei Iobu laka, “[Iehova] la ate utipine me hnime atraqat.” (Iako. 5:11) E tro sa sajuëne la musi cile i Iehova, tro hë Nyidrëti lai a amanathithi së. Loi e tro sa lapa mekune lai, matre tro sa atreine “xomi hni me xomi hni ahoeanyi memine la madin.” (Kol. 1:11) Nyipici laka, tha ka hmaloi kö troa wangatrune la musi cile i Iehova la kola traqa koi së la itre jol. Ngo, loi e tro pala hi sa mekune la enyipiewekën troa sajuëne la musi cile i Iehova ngacama traqa ju hë koi së la itre akötr. w17.06 15 par. 15-16

Ka nyipiewekë catr kowe la ka ala nyimu enehila troa hetrenyi la itre iheetr, me itre mobilis, me itre ordinatör, me itre xa ewekë ju kö ka xötrei mama. Hna löthi angatr hnene la aja mo, aqane mele lai laka, kola wangatrune catrëne la mo me mani. Ngo, ame easë itre keresiano, nemene la ka nyipiewekë ngöne la mele së? Isa waipengöi epuni jë me hape: ‘Hapeu, tru kö la traem hnenge hna xom matre troa thel la itre loto, maine itre iheetr ka xötrei mama, hune la traem hnenge hna xom göi troa hnëkëne la itre icasikeu? Hapeu, tru catre pala ha la joleng e nöjei drai matre, pë hë ijineng troa thith me e Tusi Hmitrötr?’ Maine tha hmeke kö së, tro ha tro pa la itre mo ngöne la mele së hune la ihnimi së koi Keriso. Loi e tro sa lapa mekun la trengewekë i Iesu hna amamane ngöne la topik ne la drai. Öni Iesu, “pëkö ate ateine troa nyi hlue ne la lue joxu.” Öni nyidrëti hmaca jë: “Tha ’teine kö nyipunie troa nyi hlue i Akötesieti me mamona.” Thatreine kö tro sa hamëne koi Iehova la ka sisitria, me isine catr mina fe troa hetre mo. (Mat. 6:24) Pine laka itre atr ka tha pexeje kö së, nyipiewekë tro pala hi sa isi memine la “ite aja i ngönetei shë,” ene mina fe la aja mo.​—Efe. 2:3. w17.05 25-26 par. 15-16

Itre atr ka tha pexeje kö së matre kösë itre inege dro së. Ngo, ceitune la maca hne së hna tro fë memine la trengamo ke, celë hi ka troa tro xom la itre atr kowe la mel ka tha ase palua kö, easë me itre atr ka drei së. Paulo a isine troa qejepengöne la Baselaia i Akötresie kowe la itre atr. (Rom. 1:14, 15; 2 Tim. 4:2) Ka tru koi angeic la maca ka loi, matre hnei angeic hna catre cainöj, ngacama akötrë angeice ju hë. (1 Thes. 2:2) Tro fe sa wangatrune tune kaa la huliwa ne cainöj? Hnei Paulo hna amamane ka hape, ka tru koi angeic la huliwa ne cainöj. Angeic a qaja la maca ka loi kowe la itre atr ngöne la nöjei ijine ka ijij. Tui Paulo me itre keresiano ekö, loi e tro fe sa hane cainöjëne la maca ka loi kowe la itre atr, ngöne la itre hnalapa trootro, me ngöne la gaa tru atr, me ngöne la itre xa götrane ju kö. (Ite hu. 5:42; 20:20) Easë pala hi a thele jëne troa cainöj kowe la ka ala nyimu. Maine ijij, loi e tro sa xom la huliwa ne pionie ka ixatua maine pionie lapa. Maine pena, loi e tro sa inine la ketre qene hlapa maine feke hi kowe la ketre götrane la nöje së, maine feke kowe la ketre nöje pena.​—Ite hu. 16:9, 10. w17.06 10-11 par. 8-9

Nyimutre la itre ngazo enehila laka, tha hna kuca kö hnei ketre atr, ngo hnene la itre organizasio. Itre milio lao atr hna amenune hnene la itre organizasio i hmi. Itre ej a qaja la trenga thoi göi Akötresie, me hape, tha ijije kö troa mejiune kowe la Tusi Hmitrötr. Itre eje fe a amenune la itre atr göne la pengöne la ihnadro elany memine la itre atr. Ame la itre mus ka huliwa qene atrekënö, itre ej a ukune la itre atr troa isi, me xele ma wange la itre atr ka isa hane ngönetrei kö. Itre eje fe a qanangazone la itre ka pë ewekë me ka pë atre xatuan. Kola hlemu, me trenamo la itre organizasio cili ke, hnene itre ej hna ië hna hnim, me kapa la itre thupene hna hamëne juetrën. Hnene la itre xa organizasio ka thele mani hna adrone la ihnadro, me angazone la itre aliene ej. Nge itre ej a nyijëne la itre atr matre troa trenamo hnene la ala xalaith. Tusi Hmitrötr a qaja ka hape, troa apatrene asë la itre mus, me itre organizasio ka tha hane kö sajuëne la Baselaia i Akötresie.​—Iere. 25:31-33. w17.04 11 par. 7-8

Hnei Iehova, “ate tupathe la ite hni,” hna utipi Ahaba, me nue la ngazo i angeic. (Ite edomë 17:3) Ketre itupath ka tru kowe la lapaune ne la hnepe lapa i Nabotha me itre sinee i angeic la angatr a dreng laka, tha tro kö a nyithupene kowe la hnepe lapa i Ahaba uti hë la tro angeic a mec. Ngo e tro angatr a ipië, tha tro pi kö a ajolëne la lapaune i angatr. Nge, tro pala hi angatre lai a nyihlue i Iehova, me mejiune laka, ka meköti pala hi Iehova. (Deu. 32:3, 4) Hetre manathith hna troa melën hnene la hnepe lapa i Nabotha elany, ene la troa öhne la itre atrene la hnepe lapa i angatr hna troa amelene hmaca. Celë hi meköti lai ka pexeje hna troa kuca koi Nabotha me itre nekö i angeic trahmany. (Iobu 14:14, 15; Ioane 5:28, 29) Atre hnyawa hi la atr ka ipië ka hape, “tro Akötesieti a hnyingëne la nöjei huliwa asë, me nöjei ewekë asë ka sihngöd, ite loi me ite ngazo.” (Ate cai. 12:14) Öhne asë hi Iehova uti fe hë la itre ewekë hne së hna thatre. Haawe, e tro sa ipië, tha tro pi kö a ajolëne la lapaune së koi Iehova. w17.04 24 par. 8-9

Ngazo catr la fen enehila, celë hi matre nyimutre la itre trejin me easë ka mele ngöne hunapo. Ketre jole ka tru catre lai koi angatr. Hanawang la itre ewekë nyine tro angatr a aca tro inin asë: qene hlapa, qenenöj, me itre hna amekötin, tune la itre taxes, me troa ini, me aqane hajine la itre nekönatr! Loi e tro sa xatuane la itre trejin ka cil kowe la itre jol ka tune lai, nge tro fe sa hetrenyi la xomihni me metrötr. (Fil. 2:3, 4) Ame itre xa ijin, hnene la itre musi hna sawa la itre trejin troa iöhnyi memine la itre atrene la ekalesia ne la nöj. Hnene la itre xa mus hna axouene la itre trejin me qaja ka hape, tha tro hmaca kö a xatua angatr. Ketre, e tha kapa kö angatr la huliwa ke ka sewe angatr troa icasikeu, tro ha upi angatr qa ngöne la nöj. Hnene la itre xan hna kapa la itre huliwa cili ke, angatr a xou, nge kösë pë hë xa jëne ixatua koi angatr. Matre, nyipiewekë troa canga iöhnyi memine la itre trejin ka po ngöne la angatr a traqa. Loi e tro angatr a öhne laka, easa nyipiewekë angatr. E tro sa wangatrunyi angatr tune lai, me hamëne la ixatua ka ijij, tro hë lai a acatrene la lapaune i angatr.​—Ite edomë 12:25. w17.05 5 par. 9-10

Ame lo Iesu e celë fen, hnei nyidrëti hna amamane la aqane tro la itre atr a atrehmekune la “hneijin ne kola troa nyipune la fen.” Hnei nyidrëti hna perofetan e cili ka hape: “Tro ha nanazije la ihnimi ne la ka ala nyimu.” (Mat. 24:3, MN) Hnene la angetre Iudra ngöne la ijine cili hna selëne ka hape, itre hlue i Akötresieti angatr, ngo hnei angatre pe hna thel matre nanazije pi la ihnimi angatr koi Nyidrë. Ngo, ame la itre keresiano, hnei angatr hna catr “cainöjë Iesu Keriso,” me amamane la ihnimi angatr koi Iehova, me kowe la itre trejin, memine fe la itre ka thatre petre kö la nyipici. Hnei angatre pala hi hna thel troa acatrene la ihnimi angatr koi Iehova. (Ite hu. 2:44-47; 5:42) Ngo ame pe, hetrenyi la itre keresiano ekö ka thel matre nanazije pi la ihnimi angatr koi Nyidrë. Pine nemene matre qaja jë së tune lai? Öni Iesu kowe la itre keresiano ne Efeso ekö ka hape: “Hnei ’ö hna nue tije la [ihnim] i ’ö hnapan.” (Hna ama. 2:4) Kola mekune laka, hna löth la itre keresiano ne Efeso hnene la aqane mele ne la itre atr ka lapa xötreithi angatr, itre ka nyinyape thele la sipu aja i angatre kö.​—Efe. 2:2, 3. w17.05 17 par. 1-3

Iefetha la ketre tane isi ka catr. Nge, Hana la ketre föe ka ipië, ka nyipiewekëne la föi angeic, nge ka thupëne hnyawa la hnalapa i angeic. Lue ka nyihlue i Iehova asë hi nyidro, nge hetre ewekë ka ceitu hnei nyidroti hna melën. Hnei nyidroti hna isa sisinyi koi Iehova, nge hnei nyidroti hna isa catr eatrëne hnyawan. Lue tulu ka lolo catr kowe la itre trahmanyi me föe enehila ka sisinyi koi Iehova. Ame la kola sisinyi koi Iehova e hnine la Tusi Hmitrötr tre, kolo hi lai a qaja hnene la atr koi Nyidrë la ewekë hna axeciën troa kuca. Maine jë, tro ketre a sisinyi koi Iehova troa kuca la ketre huliwa, maine troa hamëne la ketre ahnahna, maine troa xome la ketre huliwa i Akötresie. Maine pena, easa sisinyi koi Nyidrë ka hape, hetre itre ewekë tha tro kö sa kuca. Ame la kola sisinyi, tre, hne së hna sipu mekun troa kuca. Tha tro kö ketre atr a musinë së troa sisiny. Ngo, e mekune hë ketre troa sisiny koi Iehova, Nyidrëti a goeëne lai ceitu me ketre ewekë nyine troa eatrën.​—Gen. 14:22, 23; Heb. 6:16, 17. w17.04 3 par. 1-2