Maac

Easa drengethenge Akötresie ke, tru la ihnimi së koi Nyidrë me kowe la Trengewekë i Nyidrë. Tha easë kö a kei thenge la mekuna ne la itre atrene la fami së, ngöne la angatr a uku së troa xome la itre hna majemine kuca kowe la itre ka mec. Tha ka ihmeku kö la itre hna majemine cili memine la hna qaja hnei Tusi Hmitrötr. Maine jë, tro angatr a ahmahmanyi së me qaja ka hape, tha easë kö a hnim maine metrötrëne pena la itre ka mec. Maine pena, tro angatr a qaja ka hape, hnene la aqane ujë së, matre tro lai a akötrë së hnene la fami së ka mec. Nyimutre la itre atr e Caraïbes ka mekun, ka hape, e meci hë la atr ke, mele pe kö la u.Tro lai u a qanangazon la itre atr ka akötrë angeic, ngöne lo mele petre kö angeic. Kolo fe a qaja ka hape, ijije fe hi tro la u i angeic a akötrëne la itre atrene la tribu. Ame pena e Afrique ke, hna majemine hakuthe la itre ithulu hnei mano ngöne la uma ne la ka mec, me ujëne la itre foto matre troa qëmeke pena kowe la ngöne uma. Nemene la kepin? Matre tha tro kö a goeë angatr hnene la atr ka mec! Ame easë, itre hlue i Akötresie, tha easë hmaca kö e hnine la itre huliwa cili ka isigölin la itre ini ka thoi Satana!—1 Kor. 10:21, 22. w19.04 16 par. 11-12

Hnei Iesu hna hamëne la itre trepene meköt kowe la itretre drei nyidrë, matre troa xatua angatr troa hnime la itre xan cememine la meköt. Pane mekune jë lo Wathebo Ka Sisitria. Nyipici laka, ajan asë hi së troa hnimi së ceitu me itre xan. Ngo maine tro sa hnime ceitune la itre atr, tro hë angatr a hane hnimi së tune la itre xan. Ngo tune kaa e tha ka meköti kö la itre hna kuca koi së? Hnei Iesu hna inine la itretre drei nyidrë, troa catre mejiune laka, tro kö Iehova a “isenyine thatraqane la itretre treije koi nyidrë e lai me jidr.” (Luka 18:6, 7) Celë hi itre hna thingehnaean, laka: atre hnyawa hi Iehova Akötresi së, la itre jole hne së hna cile kow, ngöne la itre drai tixenuë. Nge tro kö Nyidrëti a amekötine la nöjei ewekë ngöne la nyipi ijin. (2 Thes. 1:6) Ame la easa trongëne la itre trepene meköti hna hamën hnei Iesu ke, hetre thangane la aqane ujë së kowe la itre xan. Ngo maine jë hna akötrë së ngöne la fene i Satana, hnene la aqane ujë ne la itre xan, ka tha meköti kö. Haawe, loi e tro sa mejiune laka, tro kö Iehova elanyi a amekötine me të la ngazo hna kuca koi së. w19.05 5 par. 18-19

Pane mekune jë la ketre thöth e koilo hna ini. Ka mejiun asë hi la itre sine ini angeic, kowe la ini évolution. Angeic a ajane troa amamane la mekuna i Tusi Hmitrötr, ngo thatreine kö angeic la aqane troa kuca. Haawe, hane hi la nyine troa inin! Hane hi la lue kepin ka upi angeic troa ini tus: (1) troa acatrene la lapaune i angeic laka, Akötresieti hi la ka xup la nöjei ewekë asë, me (2) troa atreine qejepengöne la nyipici qa hnine la Tusi Hmitrötr. (Rom. 1:20) Eje hi, loi e tro angeic a pane mekun ka hape, ‘Nemene la hna qaja hnene la itre xaa nekönatr, matre troa qejepengöne la ini évolution?’ E cili, angeic a ithel me sine thel ngöne la itre itusi së. Maine celë hi la hnei angeic hna kuca, haawe, tro ha hmaloi koi angeic troa qejepengöne la lapaune i angeic. Ame itre xan, angatr a mejiune kowe la ini évolution ke, hna qaja koi angatr hnene la ketre atr ka cilë hnëqa ka tru. Maine tro sa öhne la caas maine lue mekun ka jelethoine la ini cili ke, ijije hi tro sa xatuane la itre atr ka thele la nyipici.—Kol. 4:6. w19.05 29 par. 13

Hace catre la mele i Elia perofeta, lo nyidrëti a kötrene lo itre ka thele troa humuthi nyidrë, nge göi ajane fe nyidrëti troa mec. Hnei Iehova hna upe la ketre angela koi nyidrë. Hnene la angela hna xatua me aegöcatrenyi Elia, me hnëkë xen koi nyidrë, me upi nyidrë troa xen. (1 Ite jo. 19:5-8) Hetre eloine koi së la ceitune celë. Ame itre xaa ijin, tha tru kö la hne së hna kuca matre troa xatua ketre, ngo ame pe, ka tru koi angeic. Maine jë, tro sa kuci xen, maine nyi ahnahna, maine pena tro sa cinyanyi tus koi angeic. Itre ewekë lai ka troa xatua së, e thatreine kö së ithanata meköti koi angeic. Nge itre aqane tro fe së lai a amamane la ihnimi së koi nyudren. Hnei Iehova hna xatua Elia troa elë hune la wetr e Horeba, matre nanyi hë la itre ka thel troa humuthi nyidrë. Nemene la ini koi së? Maine easa ajane troa xatuane la itre hna qanangazon, loi e tro sa pane thel troa tingeting la hni nyudren, e koilo hnalapa me ngöne la Uma Ne Baselaia. w19.05 16 par. 11; 17 par. 13-14

Pane mekune jë laka, easa e la mekene 12 ne la tusi Zakaria, lo kola perofetane la meci ne la Mesia. (Zaka. 12:10) Ame la easa traqa kowe la xötre 12, easa e ka hape, tro la “lapa i Nathana” a treije pine la Mesia. E cili, epuni a pane cil me isa hnying ka hape: ‘Ka ihmeku kö la Mesia memine la lapa i Nathana?’ E cili, easë ha ithel, ceitu me ketre polis. Hnene la ithuemacany hna amë ngöne la xötr, hna upi së troa e la 2 Samuela 5:13, 14. Kola qaja ka hape, ame Nathana, tre, ketre nekö i Dravita Joxu hi angeic. Hnene la ketre ithuemacanyi hna upi së troa e la Luka 3:23, 31, ka amamane laka, jëne Maria, ketre matra i Nathana hi Iesu. Kolo ha huliwa la mekuna së! Ase hë perofetane ka hape, Iesu la ketre matra i Dravita. (Mat. 22:42) Ngo kola traqa koi 20 la itre nekö i Dravita trahmany. E cili, Zakaria a amamane la kepin matre, itre lapa i Nathana a treije la meci Iesu. Easa madrine la easa trotrohnine lai! w19.05 30 par. 17

Nemene la nyine tro sa kuca? Maine tro palahi sa catre inine la Tusi Hmitrötr, tha tro hmaca kö sa luelu. Tro ha xecie koi së laka, ka nyipici la itre ini qa hnine la Tusi Hmitrötr. Nge xecie fe koi së laka, ka meköti la itre trepene meköti Iehova. Haawe, tune la isinöe ka catr hnene la iwan, tro fe hë sa hane ‘catr ngöne la lapaun.’ (Kol. 2:6, 7) The thëthëhmine kö laka, tha qanyine kö la itre xan troa acatrene la lapaune së, ngo isa qanyi së kö. Haawe, loi e tro palahi sa thele troa ahnyipixene la itre aqane waiewekë së. The mano kö së thith me sipone la uati hmitrötre i Iehova. Loi e tro fe sa lapa mekune la itre hne së hna e qa hnine la Tusi Hmitrötr, me saze la itre mekuna së me itre aliene hni së. Nyipiewekë mina fe tro sa iëne la itre sinee ka troa xatua së troa eënyine la itre thiina ka loi. Eje hi laka, tro ha thupë së qa ngöne la itre ethanyine la fene i Satana. Nge tro hë sa atreine “lepetrije la nöjei mekun, me nöjei ewekë asë ka draië, nge ka cil kowe la atrehmekune qaathei Akötresie.”—2 Kor. 10:5. w19.06 13 par. 17-18

Nyipiewekë tro sa nyitipune la aqane ujë i Rutha, ngöne lo kola meci hnene la itre sinee i Naomi. Loi e tro sa catre xatuane la itre ka meci sineen. (Rutha 1:16, 17) Hnei Pauline, hna qaja ka hape: “Ame ngöne lo thupene la kola meci la föeng, alanyimu la ka traqa troa xatua ni me ithuecatre koi ni. Ame hë e thupen, angatr hmaca ha tro troa isa kuci jolen. Ngo ame ni, saze hë la meleng. Ame koi ni, loi e troa xatuane la itre ka meci sineen koi itre treu, me itre macatre thupene la kola meci hnene lai sinee së hna hnim. Ketre ixatua ka tru lai koi angatr.” Nyipici laka, isapengö së kö. Ame itre xan, canga xomihnine hi angatr la meci ne la sinee i angatr. Ngo ame koi itre xan, thatreine kö angatr canga thëthëhmine la sinee i angatr ka meci hë ke, hetre hnei nyidroti hna majemine ce kuca. Tha tro kö sa thëthëhmine laka, ame la hnëqa së qaathei Iehova, tre, ene la troa xatuane la itre föe maine trahmanyi hna mecitrij. w19.06 24 par. 16

Ame ngöne la icilekeu, tha tro kö sa thëthëhmine laka, hetre “ijine lapa thaup.” (Ate cai. 3:7) Tha tro kö sa qaja la itre xaa ithuemacany, tune la ëjene la itre trejin, me hnë icasikeu, me aqane cainöje së, me aqane kapa së la itre itus. Tha tro kö sa qaja la itre ithuemacany cili kowe la itre mus, maine kowe la itre sinee së ka lapa ngöne la nöje së, maine ngöne la itre xaa nöj. Maine tha hmekëne kö së, tro ha hetre thangane ka ngazo kowe la itre trejin. Tha tro kö sa nue la itre hnepe jol troa thë la caasi së. Atre hi Satana laka, tha tro kö a cile hut la fami, e ka isa mele la itre atren. (Mar. 3:24, 25) Celë hi matre, angeice palahi a thele troa thë la caasi së. Ame la aja i angeic, tre, tro sa iwesitrë me isi. Ngo tha tro kö sa thëthëhmine laka, Satana la ithupëjia me easë. Ngacama ka hekö hë së ngöne la nyipici, ngo loi e tro palahi sa hmek. Maine tro sa canga iloi memine la itre trejin, tha tro kö sa nue Satana troa thë la aqane imelekeu së.—Kol. 3:13, 14. w19.07 11-12 par. 14-16

Ame itre xaa ijin, itre atr a kapa hnyawa la maca. Tha hnene kö la hne së hna qaja, ngo hnene pe la aqane tro fë së la maca. Tro angatr a kepe së, e hne së hna thiina ka menyik me metrötr, me wangatrunyi angatr. Tha easë kö a musinë angatr troa drei së. Easë pe a thele troa trotrohnine la mekuna i angatr göi hmi, me itre aliene hni angatr. Ame lo Paulo a ithanata koi angetre Iudra, hnei nyidrëti hna xome la Itre Hna Cinyihan. Ngo tha celë kö aqane kuca i nyidrë, ngöne lo nyidrëti a ithanata kowe la itre ka inamacan ne Geres ngöne la Areopago. (Itre hu. 17:2, 3, 22-31) Nemene la aqane tro sa nyitipu Paulo? Maine easa cainöj kowe la ketre atr ka tha kapa kö la Tusi Hmitrötr, tha tro kö sa fe Tusi Hmitrötr koi angeic. Maine ketre atr pena ka hmahma troa ce e Tusi Hmitrötr me easë, loi e tro sa amamane la itre xötr ngöne mobilis. w19.07 21 par. 5-6

Hnei Satana hna tupathi angetre Isaraela troa thili koi idrola. Hnei angeic hna huliwane la itre aja i angetre Isaraela, tune la xen. Celë hi matre, hnei angeic hna tupathi angatr. Ame ngöne la Nöje Hna Thingehnaean, hnei angetre Isaraela hna thele la itre xaa aqane troa eëny. Ame ngöne lo angatre palakö e Aigupito, hnei angatr hna kuci jë i tim qa ngöne la hneopegejë hna hape, Nil, matre troa fi la itre feja. Ngo pë fe kö tim ngöne la Nöje Hna Thingehnaean. Nyipiewekë tro angatr a nyialiene me xome la tim ne hmahmakanyi. (Deu. 11:10-15; Is. 18:4, 5) Eje hi, troa saze la aqane eënyi angatr. Ngo pine nemene matre Iehova a hmekë angatr, göne la itre idrola me itre iöni, nge Nyidrëti fe a qaja koi angatr troa saze la aqane troa eëny? Atre hi Nyidrë laka, tro la nöje i Nyidrëti a sipo ixatua kowe la itre nöje trenyiwa ka atreine eënyi e cili. Ketre, ame koi angetre Kanana, Baala la atre xupe la hnengödrai me ka axulune la manie.—Num. 25:3, 5; A. ame. 2:13; 1 Ite jo. 18:18. w19.06 3 par. 4-6

Kola traqa hnei Paulo, Sila, Luka me Timoteo e Filipi, ketre traon hna musinën hnei angetre Roma. Tru la itre atr e cili ka thele troa atre la maca ka lolo. Hnei angatr hna ixatua matre troa acile la ekalesia. Hna nyiqaane icasikeu hnene la itre trejin, ngöne la uma i Lidia, ketre trejin ka ikep. (Itre hu. 16:40) Ngo hna traqa la ketre jol kowe la ekalesia hna hnyipi acil. Hnei Satana hna upe la itre atr ka xele ma wang la nyipici, troa icilekeu me qajangazo Paulo memine la itre sinatronge i nyidrë. E cili, hna othi Paulo me Sila me lepi nyidro. Ngo thupene la hna nue nyidroti hmaca, hnei nyidroti hna wang la itre trejin ka xötrei atre la nyipici me ithuecatr koi angatr. Thupene lai, hnei Paulo, Sila me Timoteo hna tro qa ngöne la traon, ngo hna lapa pe hnei Luka. Nemene la hna troa kuca hnene la itre trejin? Jëne la uati hmitrötr, hnei Iehova hna xatua angatr, matre tro palahi angatr a catre nyihlue i Nyidrë. (Fil. 2:12) Atraqatre la madrine i Paulo koi angatr! w19.08 8 par. 1-2

Hnei epuni kö hna tro troa mel ngöne la ketre götran? Ka tru thupene catr la troa saze uma. Canga tro hi sa xomi gufa. Ngo loi e tro sa thupën, matre tha tro kö a xomi gufa troa itöne la itre ewekë ka tha nyipiewekë kö. (Ite edomë 22:3) Eje hi laka, ame itre xaa ijin, jole koi së troa mekun la etrune la manie nyine troa sipon. Maine jë, easa hnehengazo ke, easa thupëne la ketre atrene la sinee së ka wezipo. Ngo tha tro pi kö sa thëthëhmin laka, jëne “la itre thith me xëwe,” ijije hi tro sa axecië mekune hnyawa. Tro kö Iehova a sa la itre thithi së, me kuca matre troa tingeting la hni së me mekuna së. E cili, tro hë sa atreine axecië mekune hnyawa. (Fil. 4:6, 7; 1 Pet. 5:7) Loi e troa sa ce tro memine la itre atr ka thiina ka loi. Loi e tro sa qaja kowe la itre sinee së, la itre aliene hni së me itre jol hne së hna cile kow. Maine tro sa fe la hni së kowe la itre sinee së ka hane melëne hë la jol ka eje the së, tro hë sa madrin. (Ate cai. 4:9, 10) Ketre, ame lo itre sinee së ngöne lo nöj hne së hna cainöje kow ekö ke, itre sinee së palahi angatr. w19.08 22 par. 9-10

Pine nemene matre Iehova a aceitunëne la isi ka tru tixenuë me Megido? Nyimutre la itre isi hna kuca ekö e Megido me ngöne la hnathup e Iezerela. Ame itre xaa ijin, hnei Iehova hna xatuane la nöje i Nyidrë troa hun ngöne la itre isi. Hane hi la ketre ceitun. Ame “ngöne la ite tim’ e Megido,” hnei Akötresieti hna xatua Baraka, lo atre amekötin e Isaraela, troa lep la trongene isi Kanana, hna elemeken hnei Sisera. Hnei Baraka me Debora perofeta hna olene koi Iehova. Hnei nyidroti hna nyima ka hape: “Hetete hane ishi qa hnengödrai . . . me Sisera. . . . Iehova fe, tro ha meci asë tune lai la itre ithupëjia me enëtilai; ngo tro la itretre hni nyidrë a tune la jö a xulujë memine la catre ne ej.” (A. ame. 5:19-21, 31) Ame ngöne la isi Amagedro, kola troa lep apatrene la itre ithupëjia me Akötresie, nge troa amelene la itre ka hnimi Nyidrë. Ngo hetre ketre ewekë ka isapengöne kö ngöne la lue isi cili. Ame e Amagedro, tha tro kö la nöje i Akötresieti a isi ke, pëkö jiane isi angatr! Tro pe angatr “a egöcate hnene la tingetinge me lapaun” koi Iehova me trongene isi Nyidrë.—Is. 30:15; Hna ama. 19:11-15. w19.09 9 par. 4-5

Ame la ketre aqane tro sa ‘tro’ koi Iesu, tre, troa inine la itre hnei nyidrëti hna qaja me kuca. (Luka 1:1-4) Isa qanyi së kö thele la hna qaja hnei Tusi Hmitrötr göi Iesu. Ketre, easa ‘tro’ koi Iesu, ngöne la easa xomi bapataiso me hane ketre atre drei Keriso. Easë fe a ‘tro’ koi Iesu, ngöne la easa thele ixatua thene la itre qatre thup. Angatre hi la itre “ahnahna” hna upe hnei Iesu, matre troa thupëne la itre mamoe i nyidrë. (Efe. 4:7, 8, 11; Ioane 21:16; 1 Pet. 5:1-3) Loi e tro sa tro troa sipo ixatua kowe la itre qatre thup. Tha tro kö sa mekun laka, atre hë angatr la itre mekun me itre aja së. Hanawang la hna qaja hnei Julian: “Hnenge hna sipo ixatua kowe la lue qatre thup. Ketre ahnahna ka tru la nyidroti a wai ni.” Tune la lue qatre thup ka wai Julian, itre qatre thup a xatua së troa atre la “aqane waiewekë i Keriso.” Angatr a xatua së troa trotrohnine la tulu i Iesu me nyitipu nyidrë. (1 Kor. 2:16; 1 Pet. 2:21) Eje hi, ketre ahnahna ka tru la kola xatua së hnene la itre qatre thup. w19.09 21 par. 4-5

Kola qaja hnei Tusi Hmitrötr la nöjei trahmany me föe ka mele nyipici koi Iehova, nge hna eatrongëne hnei uati hmitrötr. Tha angatre fe kö a hane sine lo ala 144 000. Ioane Bapataiso la ketre. (Mat. 11:11) Ketre tui Dravita mina fe. (Itre hu. 2:34) Kola troa amele angatr, matre troa mel ngöne la Paradraiso e celë fen. Celë hi matre, loi e tro sa isa amamane laka, easa mele nyipici koi Iehova, me isigöline la musi cile i Nyidrë. Ame enehila, ketrepengöne kö la aqane acasine Akötresieti la itre milio lao atr ka xulu qa ngöne la nöjei nöj, matre troa atrunyi Nyidrë. Ngacama easa troa mel e hnengödrai maine e celë fen, ngo loi e tro sa xatuane la nöjei atr asë matre tro angatr a hane sine la ka alanyimu ne la “itre xa mamoe.” Calemi hë la akötre atraqatr hna perofetane hnei Iehova. Kola troa apatrene la nöjei musi me nöjei hmi ka thoi ka akötrëne la mele ne la itre atr. Drei la ketre manathithi ka tru hna hamën kowe la itre ka sine la ka alanyim, ene la troa nyihlue i Iehova epin epine palua e celë fen!—Hna ama. 7:14. w19.09 31 par. 18-19

Pine laka easenyi hë la pune la fene i Satana, haawe, tro lai a tupath la aqane mele nyipici së koi Akötresie me kowe la Baselaia i Nyidrë. Tro palahi la itre atr a hnyimasai së. Haawe, maine tro sa mele nyipici koi Iehova enehila, tro hë së lai a catre mele nyipici elany ngöne la akötr atraqatr. Ame ngöne la akötr atraqatr, hetre ewekë ka troa saze thene la itre trejin ka elemekene la nöje i Iehova e celë fen. Troa traqa la ijine troa acasine la itre hna iën e hnengödrai, matre troa sine la isi Amagedro. (Mat. 24:31; Hna ama. 2:26, 27) E cili, pëhë lo Lapa Ne Xomi Meköt. Ngo tro palahi a lolo la aqane eköthe la huliwa ne la ka alanyim. Itre trejin ka maca la ka troa elemeken. Easa troa amamane laka, easa mele nyipici koi Iehova ngöne la easa ce huliwa me angatr me idrengethenge. Nyipici, mele së hi lai! w19.10 17 par. 13-14

Ame Naomi, tre, ketre föe ka mele nyipici me ka hnimi Iehova. Ngo thupene la kola meci la föi Naomi memine la lue nekö i eahlo trahmany, hnei eahlo hna qaja ka hape, troa saze la ëje i eahlo, matre tro pena a hë eahlo ka hape, “Mara,” kola hape “haite atraqate.” (Rutha 1:3, 5, 20, 21) Hnei Rutha, tresi Naomi, hna ce lapa me eahlo, ngöne la kola traqa la itre akötre cili. Hnei Rutha hna xatua eahlo troa hetrenyi la ka ijij, me qaja la itre ithanata ka akeukawane la hni Naomi. Hna amamane palahi hnei Rutha la ihnimi angeic koi Naomi. Nyipici laka, ame la kola mecitrije la ketre trejin e hnine la ekalesia, tro angeice lai a aja ixatua. Hna aceitunëne la lue trefëne memine la lue sinöe ka ce cia. Thupene la itre macatre, kola ilöthe la itre waan. Ngo ame la kola fejetrij me meci la sinöe, ke, hetre thangane koi ketre. Ceitune hi lai memine la lue ka faipoipo. Maine troa meci hnei ketre e nyidro, tro pë hë lai a hace me jol kowe la ketre. w19.06 23 par. 12-13

Loi e tro sa iëne hnyawa la pengöne la itre nyine iamadrinë. Nge loi e tro fe sa thupëne la etrune la traem hna nue koi itre ej. Maine tha hmeke kö së, tro ha xome la traeme së me sewe së troa nyihlue Iehova hnyawa. Loi e tro sa pane axeciëne la hawa hne së hna troa xom, maine jë koi caa wiik. Loi e tro fe sa cinyanyin ngöne la idrai, la etrune la hawa hne së hna goeë tele, maine tro koi Ëternet, maine elo mobilis. Maine tru palaha la hawa hne së hna xom, loi e tro sa eköth la ketre porogaram. Loi e tro sa pane kuca la itre ka nyipiewekë, nge pine pë hë la itre nyine iamadrinë. Loi e tro fe sa sipo Iehova troa xatua së troa eatrëne la mekuna së. E cili, tro hë sa hetre traem me trengecatr, matre troa ini tusi caas, me kuca la hmi ne la fami, me hnëkëne la itre icasikeu, me cainöj. Ketre, tro hë sa madrine troa kuci nyine iamadrinë ke, hne së hna amë panë Iehova. w19.10 30 par. 14, 16; 31 par. 17

Ame lo 55 M.K., hnene la angetre Korinito hna kuca la ketre ewekë ka lolo catr. Atre hi angatr laka, kola aja ixatua hnene la itre trejin e Ierusalema me Iudra. E cili, hnei angatr hna kuië ahnahna matre troa ixatua. (1 Kor. 16:1; 2 Kor. 8:6) Ngo itre treu thupen, hna thuemacanyi Paulo aposetolo laka, pëkö manie hna kuiën hnei angetre Korinito. Ame la pun, tha hna xome kö la manie i angatr a tro Ierusalema tune lo itre xaa ekalesia. (2 Kor. 9:4, 5) Eje hi, ka lolo la aqane axecië mekune i angetre Korinito. Hnei angatr hna catre lapaun me catre ham, matre hnei Paulo hna qaja aloinyi angatr. Ngo hnei Paulo mina fe hna ithuecatre koi angatr troa umuthe la huliwa hnei angatr hna mekun troa kuca. (2 Kor. 8:7, 10, 11) Kola amamane koi së laka, ngacama itre Keresiano ka mele nyipici së, ngo ame itre xaa ijin, jol koi së troa eatrën la hne së hna mekun troa kuca. Pine nemen? Pine laka itre atr ka ngazo së, matre easë palahi a uthe koi ketre drai. Maine pena, hna traqa la ketre ewekë, matre jole koi së troa eatrëne la mekuna së.—Ate cai. 9:11. w19.11 26-27 par. 3-5

Tune la petr ka tru kola thupëne hnyawa la ngönetrei së, ketre tune fe, kola thupë së hnene la lapaune së, qa ngöne la itre huliwa ka sis me isi, me itre xaa ewekë ka icilekeu memine la itre hna amekötin hnei Akötresie. Ame easë itre Keresiano, easa isi memine la itre u ka ngazo. (Efe. 6:10-12) Hapeu, atreine jë kö së cile catr ngöne la itupath? Ame la hnapan, tro sa sipo ixatua koi Akötresie jëne la thith. Thupene lai, tro sa e Tusi Hmitrötr matre atreine jë së waiewekë tui Iehova. (Heb. 4:12) Öni Tusi Hmitrötr: “Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin.” (Ite edomë 3:5, 6) Tune kaa la itre mekun hne së hna isa axeciën? Maine jë, hne së hna cile kowe la ketre jol göi manie. Qëmekene troa thele nyine lai jol, hne së kö hna lapa mekune lo hna qaja hnei Iehova ngöne Heberu 13:5: “Tha tro jë kö ni a triji eö, nge tha tro jë kö ni a nuaxöji eö”? Hapeu la xötre celë, eje kö a acatrene la lapaune së koi Iehova? Maine eje hi, kolo lai a amamane laka, ka lolo la petre ne la lapaune së. w19.11 14 par. 1, 4

Aja ne la nekönatr tro la kem me thin a nue la traem me trengecatre i nyidro koi nyën. Celë hi matre, maine tru hnei nekönatr, troa jol kowe la kem me thin troa isa hamëne koi nyudren la hna ajan. Önine la itre trefën ka hnaho atruny nge iasenyi hi la itre nekönatr, ka hape, pëhë ihneimek i angatr. Kola kucakuca hnei thin, matre pëhë trengecatre i eahlo troa ini tus me thith me cainöj. Ketre tune fe ngöne la hna icasikeu. Thatreine kö eahlo troa lapa hnyawa, me kepe thangane qa ngön. Maine ka ihnimi la trahmany, tro angeic a xatuane la föe i angeic ngöne la hnalapa me ngöne hna icasikeu. Maine jë, troa ixatua nyihnyawane la uma, maine thele troa eatrëne palahi la Hmi Ne La Fami, me ce cainöj memine la fami angeic. w19.12 24 par. 8

Nemene la eloine la Iubeli kowe la angetre Isaraela? Pane mekune jë së la atre Isaraela ka tru gufa. Nyipiewekë tro angeic a salemëne la itre götrane zi angeic, matre troa të la itre gufa i angeic. Nge ame ngöne la ijine kola Iubeli ke, kolo hmaca a hamëne koi angeic “la ite zi” angeic, matre tro pë hë la itre matra i angeic a hetrenyi la götrane cili. Maine jë, tru palaha la gufa ne la ketre trahmany, matre hnei angeic hna sipu salemë angeice kö maine pena ketre nekö i angeic. Ame ngöne la Iubeli, tre, nyipiewekë tro la hlue a bëeke kowe la “lapa i [angeic].” (Lev. 25:10) Kola amamane laka, hetre mejiune ne la hlue ke, tha ka cile huti kö la troa nyihlue! Ketre, öni Iehova: “Pëkö ate pë ewekë thei ’ö, ke tro Iehova a nyipi amanathithinyi ’ö ngöne la nöje hnei Iehova Akötesi ’ö hna hamëne koi ’ö nyine zi ’ö mate hetenyi ej.” (Deu. 15:4) Ka isapengöne catr me enehila! Pine laka, itre trenamo palahi a thele mo, nge kolo palahi a tru catr hnei ka pë ewekë. w19.12 8-9 par. 3-4

Nge ame lo nyidrëti a cile kowe la itre jol ka tru, hnei nyidrëti hna thith me “sue catre fë ce me trenge timidra.” (Heb. 5:7) Kola mama ngöne la itre thithi Iesu la aqane mele nyipici nyidrë, memine la aja i nyidrë troa drengethenge Iehova. Ame koi Iehova, ceitune hi la itre thithi Iesu memine la itre ka pui loi. Tru la madrine i Iehova ke, hnei Iesu hna cilëgöline la Baselaia ne la Keme i nyidrë ngöne la mele i nyidrë. Loi e tro sa nyitipu Iesu, me catre drengethenge Iehova me mele nyipici koi Nyidrë. Ame la easa cile kowe la itre itupath, easa sipo ixatua koi Iehova jëne la thith ke, easa ajane troa amadrinë Nyidrë. Celë hi lai aqane tro sa cilëgöline la musi cile i Iehova. Maine tro sa kuca la itre ewekë ka ngazo, tha tro kö Iehova a drenge la itre thithi së. Ngo maine tro palahi sa kuca la itre ewekë ka lolo, tro ha pui lolo la itre thithi së koi Iehova. Xecie hnyawa koi së laka, Iehova a madrine la easa mele nyipici me drengethenge Nyidrë. w19.11 21-22 par. 7-8

Ame lo macatre 1919, hnei Iesu hna acil la “hlue ka nyipici me ka inamacan,” ketre lapa ka co ne la itre trejin hna iën. Eje la ka xomiujine la huliwa ne cainöj, me ithuane la itretre drei Keriso “ngöne la nyipi ijin.” Hapeu, mama hnyawa kö koi së ka hape, Iehova a kapa la hlue ka nyipici me ka inamacan hna acile hnei Iesu? Kola tupathe hnei Satana me itre sine xöle i angeic troa sawa la huliwa ne la hlue ka nyipici me ka inamacan. Maine tha hnei Iehova ju hna kapa la hlue cili, thatreine jë kö troa eatr la huliwa ne cainöj. Hetrenyi la lue isi ka tru ekö me itre jol göi manie e cailo fen. Hna qanangazone fe la nöje i Akötresie. Ngo hnene la hlue ka nyipici me ka inamacan hna catre hamëne la xeni ngöne la nyipi ijin kowe la itretre drei Iesu e celë fen. Pane mekune jë së la etrune la itre itusi enehila ka pëkö thupen, nge hna ujën koi 900 lao qene hlapa nge hetre munën! Eje hi, Iehova Akötresieti a sajuëne la hlue. Ketre tune fe, Iehova a amanathithin la huliwa ne cainöj. Kola cainöjëne la itre maca ka lolo “e cailo fen.”—Mat. 24:14. w19.11 24 par. 15-16

Ame e nöjei macatre ngöne lo Drai Ne Nyithupene Mel, nyipiewekë tro la atre huuj a pane dreuth la itre ka pui loi qëmekene troa huuj. Nemene la ini koi së? Ame lo Iesu e celë fen, hetre ewekë hnei nyidrëti hna pane kuca qëmekene troa huujëne la mele i nyidrë. Nemen? Nyipiewekë tro Iesu a drengethenge Iehova, matre tro Nyidrëti a kapa la huuje i Iesu. E cili, Iesu a amamane laka, ame la nyipi mel tre, ene la troa kuca la itre ewekë thenge la aja i Iehova. Ketre, nyidrëti a anyipicine laka, meköti troa musi hnene la Keme i nyidrëti e hnengödrai. Ame ngöne lo Iesu e celë fen, hnei nyidrëti hna drengethenge Iehova. Ngacama hna traqa la itre itupath koi nyidrë nge hnei nyidrëti hna mec ngöne la akötr, ngo hnei Iesu palahi hna cilëgöline la musi cile ne la Keme i nyidrë.—Fil. 2:8. w19.11 21 par. 6-7

Ame la itre aposetolo, tre, angatre hi la itre nyipi sinee i Iesu. Hnei angatr hna anyipicine la hna qaja hnei Tusi Hmitrötr, ka hape: “Hetre ketre sinee ka ihnim, kösë sipu trejin.” (Ite edomë 18:24) Ka tru angatr koi Iesu. Ame lo Iesu a cainöj, pëkö sipu trejin me nyidrë ka lapaune koi nyidrë. (Ioane 7:3-5) Ame la ketre ijin, hnei angatr hna jele hmo nyidrë. (Mar. 3:21) Tha ceitune kö memine la itre aposetolo. Ame lo jidr qëmekene tro Iesu a mec, hnei nyidrëti hna qaja koi angatr la topik ne la drai celë. Nyipici laka, hnene la itre aposetolo hna hane akötrë Iesu. Ngo tha celë kö la aqane goeëne nyidrë. Hnei nyidrëti pe hna wangatrune la lapaune i angatr. (Mat. 26:40; Mar. 10:13, 14; Ioane 6:66-69) Ame lo jidr qëmekene troa humuthi nyidrë, öni Iesu kowe la itre aposetolo: “Ngo eni pe a hë nyipunie ka hape, sinee, ke eni a qaja amamane koi nyipunie la nöjei ewekë hnenge hna drenge qaathei Kaka.” (Ioane 15:15) Eje hi, hnei angatr hna aegöcatrenyi Iesu. Hnene la ixatua i angatr ngöne la hna cainöj, matre tru la madrine i Iesu. w19.04 11 par. 11-12

Nemene la ka amamane kowe la ketre atr laka, hna ië angeic troa mel e hnengödrai? Hnei Paulo hna sa la hnying celë, ngöne lo nyidrëti a ithanata kowe la “itre hna iën troa hmitrötr” e Roma. Nge öni nyidrëti hmaca kö: “Ame la uati hmitrötre i Akötresie, tha eje kö a upi së troa itre hlu me xou, ngo eje pe a kuca matre nyi kuku së, nge matre tro sa suene ka hape: ‘Abba Kaka!’ Nge ua a anyipicine koi së ka hape, itre nekö i Akötresieti hë së.” (Rom. 1:7; 8:15) Jëne la uati hmitrötr, Akötresieti a amamane hnyawa kowe la itre hna iën laka, Nyidrëti a hë angatr troa elë e hnengödrai. (1 Thes. 2:12) Hnei Iehova hna kuca matre tha tro kö a luelu hnene la itre hna iën. Xecie koi angatr laka, hna hë angatr troa elë e hnengödrai. (1 Ioane 2:20, 27) Nyipiewekë tro Iehova a inine la itre trejin hna iën jëne la ekalesia, tune la nöjei trejin asë. Ngo pëkö ka atreine jelenyipici angatr. Jëne la uati hmitrötr, ene la mene i Nyidrë ka pëkö ifegon, Iehova a anyipicine koi angatr laka, hna ië angatr! w20.01 22 par. 7-8

Hna nyitrepene la “wathebo i Keriso” hnene la ihnim. (Gal. 6:2) Ame asë hi la itre hnei Iesu hna kuca, tre, hna kuca cememine la ihnim. Ame la ketre aqane tro sa amamane la ihnimi së, tre, troa utipine la itre xan. Pine laka tru catre la utipine i Iesu, matre hnei nyidrëti hna inine la itre atr, me aloine la itre sine meci angatr, me thua i angatr, me amelene hmaca la itre ka mec. (Mat. 14:14; 15:32-38; Mar. 6:34; Luka 7:11-15) Ngacama kola xome la traem me trengecatre i Iesu, ngo hnei nyidrëti palahi hna amë panëne la itre aja ne la itre xan. Ame la ka amamane laka, ka sisitria la ihnimi Iesu, tre, kolo mel hnei nyidrëti hna huujëne thatraqane la nöjei atr asë. Easa nyitipu Iesu la easa amë panëne la itre aja ne la itre xan. Ketre, loi e tro sa utipine la itre atr ne la teritoare së. Maine ihnimi la ka upi së troa cainöj me hamë ini, haawe, kolo lai a amamane laka, easa drengethenge la wathebo i Keriso. w19.05 4 par. 8-10

Hnei Iesu, Nekö i Akötresie, hna amelene la itre atr qa ngöne la lue ewekë. Ame la hnapan, hnei Iesu hna amelene la itre atr qa ngöne la itre ini ka thoi ne la itre hene ne hmi. Ame ngöne la ijine cili, hna musinëne la itretre Iudra troa xötrethenge la itre wathebo i atr memine la itre ini ka thoi. (Mat. 5:31-37; 15:1-11) Ame itre xan, angatr a qaja ka hape, angatr a xatuane la itre atr troa nyihlue i Akötresie, ngo tha pane nyiqane kö angatr thei angatr. Angatr a tune la itre ka timek. Angatr a nuetrije la Mesia memine la nyipici hnei nyidrëti hna tro fë. Celë hi matre, thatre Akötresieti hnyawa kö hnei angatr, nge tha hna nue kö la itre ngazo i angatr. (Ioane 9:1, 14-16, 35-41) Hnei Iesu hna inine la nyipici me amamai tulu. Hnei nyidrëti fe hna amamane kowe la itre ka hni ka ipië la nyine kuca, matre troa thepe angatr qa ngöne la itre ini ka thoi. (Mar. 1:22; 2:23–3:5) Ame la hnaaluen, hnei Iesu hna amelene la itre atr qa ngöne la ngazo me mec. Hnei Iesu hna nue la mele i nyidrë thatraqai së. Celë hi matre, Iehova a köletrije la ngazo ne la itre atr ka lapaune koi Nyidrë, me kowe la thupene mel, ene la itre atr ka amamane la lapaune i angatr ngöne la nöjei ewekë hna kuca.—Heb. 10:12-18. w19.12 10 par. 8; 11 par. 10-11

Hnene la uati hmitrötr matre xecie koi angatr laka, hna ië angatr hnei Iehova. Ceitu hi la uati hmitrötr memine la ketre “hatrene [hna thingehnaean maine isisinyikeu]” ka anyipicine laka, tro kö angatr elany a mel epine palua e hnengödrai ngo tha e celë fene kö. (2 Kor. 1:21, 22) Maine hna iën la ketre trejin, hapeu, kolo kö lai a hape, ka tro hë angeic a mel e hnengödrai? Waea. Xecie hnyawa koi angeic laka, hna ië angeic troa tro hnengödrai eë. Ngo, tha tro kö angeic a thëthëhmin la hna hape: “Ange trejin, isine jë troa lapa xome catrëne la manathithi nyipunie, ene la troa itre hna hën me iën hnei Akötresie ke, maine tro nyipunieti a catre kuca tun, tha tro jë pi kö nyipunieti a kei.” (2 Pet. 1:10) Ngacama hna iën la ketre trejin troa tro hnengödrai eë, ngo tro angeic a kapa la manathith cili, e hnei angeic hna mele nyipici.—Fil. 3:12-14; Heb. 3:1; Hna ama. 2:10. w20.01 21-22 par. 5-6

Ka pëkö ihnim me utipin la köni sinee i Iobu. Hnei angatre hna axecië mekun thenge la hna goeën hnei lue mek. Ame hë la pun, ngazo la aqane axecië mekune i angatr. Hnei angatr hna upezö Iobu me jelengazo angeic. Nemene la nyine troa kuca matre tha tro kö sa nyitipu angatr? Loi e tro sa atre laka, öhne asë hi Iehova la nöjei ewekë ka traqa kowe la ketre atr. Loi e tro fe sa drenge hnyawa la ketre atr ka akötr, ngöne la angeic a fe la hni angeic. Tha tro kö sa dreng hi la itre hna qaja, ngo tro fe sa thele troa atre la itre akötre i angeic. Celë hi lai, aqane tro sa amamane la utipin me ihnimi së kowe la itre trejin ka akötr. Maine hetre ihnimi me utipine së, tha tro hë sa kötre fë ithanata me qaja angazone la itre xan. Ame la ka ixöjetrij ke, ka thë la caas me thapa la tingeting e hnine la ekalesia. (Ite edomë 20:19; Rom. 14:19) Angeic a nyixane la akötr ne lai atr. (Efe. 4:31, 32) Eje hi, loi e tro sa thele la itre thiina ka loi thene la itre atr, me thele la aqane tro sa xatua angeic, matre troa cile kowe la itre jol! w19.06 21-22 par. 8-9