Juun

Nyimutre la itre jol ka traqa koi Hana, thine i Samuela perofeta. Itre macatre ne akötre Hana ke, ka safëj eahlo. (1 Sam. 1:2) Ame koi angetre Isaraela, tha hna amanathithine kö la föe ka tha hnaho. Celë hi nyine hmahmane koi Hana. (Gen. 30:1, 2) Ketre, ka hnaho Penina, lo hnaaluene föe i Elekana. Hace catre Hana ngöne lo xötrei, matre hnei eahlo “hna teije nge tha hane kö xen.” Ketre, “aköte la hni” Hana. (1 Sam. 1:7, 10) Nemene la ka akeukawane la hni Hana? Hnei Hana hna xëwe fë la itre akötre i eahlo koi Iehova, ngöne la thith. Thupene lai, hnei eahlo hna ithanata koi Eli, atre huuj ka sisitria. Öni nyidrë koi eahlo: “Trojë memine la tingeting, nge tro Akötesi angete Isaraela a hamëne la ewekë hnei ’ö hna sipone thei nyidë.” Nemene hë la thangan? Hnei Hana “hna tro, me xen, nge ame la qëmeke i angeic, te, tha iëzi hmaca kö.” (1 Sam. 1:17, 18) Hnene la thith hna xatua Hana, matre tingeting la hni eahlo. w20.02 21 par. 4-5

Easenyi hë la ijine tro Iehova a nyipune la fene celë ka ngazo. Tro ha mele pe hnene la “itre ka hmalahnine troa kapa la mele ka pë pun.” (Itre hu. 13:48) Easë fe a cainöj kowe la itre fami së, matre tro fe angatr a hane nyihlue i Iehova. Ame Iehova, Keme së ka tru ihnimin, tre, “xele kö Nyidrë troa apatrene la ketre e [easë], ngo loi e tro pe [së] asë a ietra.” (2 Pet. 3:9) Tha tro pi kö sa thëthëhmine laka, hetre nyine troa kuca me tha nyine tro kö a kuca, matre troa tro fë hnyawa la maca ne iamele. Maine jë, troa menyik la aqane ithanata së ngöne la easa cainöj kowe la itre atr hne së hna thatre. Ngo ame pena la easa cainöj kowe la itre fami së, catrehnine la aqane ithanata së. Mekune hi së lo easa xötrei cainöj kowe la itre fami së. Maine jë, easa kucakuca pine laka, tha ka loi kö la aqane tro fë së la maca. Nyipiewekë tro sa trongëne la eamo hna hamën hnei Paulo aposetolo ngöne la topik ne la drai celë, ngöne la easa troa cainöj kowe la itre sinee së. Maine tha hmeke kö së, tro hë angatr lai a xele ma drei së. w19.08 14-15 par. 3-5

Nemene la thangane koi së ngöne la easa atre la itre nyipici göi Iesu? Iesu la hnaaluene ka sisitria ngöne la fen asë, me e hnengödrai. Hnei Iesu hna huujëne la mele i nyidrë thatraqai së. Nge hnei nyidrëti hna nue xecie la mele i nyidrë. Celë hi matre, loi e tro sa amamane ngöne la aqane ujë së laka, easa lapaune kowe la thupene mel. E cili, tro ha nue la itre ngazo së, me nyi sinee i Akötresie, me hetrenyi la mel ka pë pun. (Ioane 3:16) Eje hi, Iesu la Atre Huuj Ka Tru, nge nyidrëti a ajane tro sa kapa la itre eloine qa ngöne la thupene mel. Iesu a ajane tro sa acatrene la aqane imelekeu së me Iehova Akötresie. (Heb. 4:15; 7:24, 25) Iesu la Joxu ne la Baselaia i Iehova. Hna aijijë nyidrëti hnei Iehova troa ahmitrötrëne la ëje i Nyidrë, me apatrene la itre atr ka ngazo. Easenyi hë matre tro sa kapa la itre manathithi ka epine palua ngöne la Paradraiso. (Mat. 6:9, 10; Hna ama. 11:15) Celë hi matre, loi e tro sa xötrethenge la tulu i Iesu. Hnei nyidrëti hna nue la mele i nyidrë, matre troa kuca la aja i Akötresie. (Ioane 4:34) Eje hi, ame la easa kapa la itre ini e hnine la Tusi Hmitrötr göi Iesu, easë hi lai a amamane la ihnimi së kowe la Nekö hnimina i Akötresie. Ihnimi la ka upi së troa nue la mele së me kuca la aja i Iehova, tui Iesu. w20.03 10 par. 12-13

Hnei Iesu hna catre thith ngöne la drai tixenuë i nyidrë. Ame lo nyidrëti a amamane kowe la angetre dreng la aqane troa atrune la drai ne meci nyidrë, hnei Iesu hna thith thatraqane la falawa me waina. (1 Kor. 11:23-25) Qëmekene troa tro qa ngöne la götrane hnei angatr hna atrune la Paseka, hnei Iesu hna thithi memine la itretre drei nyidrë. (Ioane 17:1-26) Nge ame la angatr a traqa hune la Wetre Elaio ke, hnei nyidrëti hna anyimua thith. (Mat. 26:36-39, 42, 44) Hnei Iesu mina fe hna thith qëmekene tro nyidrëti a mec hune la sinöe. (Luka 23:46) Eje hi, qëmekene tro Iesu a mec, hnei nyidrëti hna catre thith koi Iehova. Hnei Iesu hna atreine xomihnine la itre akötr ke, ka catr la lapaune i nyidrë kowe la Keme i nyidrë. Hnei nyidrëti hna catre thith koi Iehova. Ame pena la itre aposetolo ke, tha hnei angatre kö hna catre thith ngöne la jidri cili. Ame la pun, hna pë trengecatre i angatr, nge hnei angatr hna xou me kei kowe la itupath. (Mat. 26:40, 41, 43, 45, 56) Eje hi, maine tro sa xötrethenge la tulu i Iesu me catre “thith,” haawe, tro hë së lai a atreine mele nyipici ngöne la itre jol. w19.04 9 par. 4-5

Xele Iehova ma wange la kuci iöni! Öni Nyidrëti koi angetre Isaraela: “The tro kö a hetenyi thei ’ö la ate ate upe la nekö i angeice trahmanyi me jajinyi troa tro nyipine la eë, me ate nyi haze, me nyinyithiina, me sa xepu, me tene haze, me ate xahmi, me tene u ne ta, me perofeta thoi, me ate ithanata me u ne wezipo. Ke sisi koi Iehova la itete kuca la ite ewekë cili; nge pine la ite ewekë ka sisi cili tro Iehova Akötesi ’ö a helë angate qëmeke i ’ö.” (Deu. 18:10-12) Nyipici laka, tha easë hmaca kö fene lo Wathebo hnei Iehova hna hamëne kowe la angetre Isaraela. Ngo tha saze kö la mekuna i Nyidrë göne la kuci iöni. Iehova a hmekë së göne la kuci iöni ke, atre hi Nyidrëti laka, ketre jëne tro hi Satana a akötrëne la itre atr. Jëne la kuci iöni, Satana a amenune la itre atr me sili trengathoi ka hape, e meci hë la atr ke, mele pe kö la u. (Ate cai. 9:5) Satana mina fe a thele troa axouene la itre atr me ananyi angatr qaathei Iehova. Angeic a ajane tro la itre ka kuci iöni a mejiune kowe la itre u ka ngazo, me nuetriji Iehova. w19.04 21 par. 5-6

Ketre ngazo ka tru la troa angazone la itre nekönatr. Troa hetre ethane ngöne la mele ne la nekönatr hna angazon. Nge kösë kola thapa la ketre ewekë qaathei nyën, matre hace me akötr la mele i nyën. Celë hi matre, loi e tro sa thupëne hnyawa la itre nekönatr qa ngöne la huliwa ka sisi cili, me hnim la itre nekönatr hna angazon. (1 Thes. 5:14) Maine tro la ketre atr e hnine la ekalesia a angazone la nekönatr ke, angeic a adrone la ekalesia. (Mat. 5:16; 1 Pet. 2:12) Tha hna kapa kö e hnine la ekalesia, la itre atr ka tha ietrane kö la itre huliwa i angatr ka ngazo, me ka adrone la ekalesia. Maine tro la ketre atr e hnine la ekalesia a ena la wathebo i mus, tune la troa angazone la nekönatr, haawe, tria hë angeic qëmekene la mus. (Wange ju fe la Itre Huliwa 25:8.) Eje hi laka, tha itre qatre thupe kö la ka troa amekötine la itre atr ka ena la wathebo i mus. Ngo ame pe, tha angatre kö a nyixölene la itre ka angazone la itre nekönatr. w19.05 9 par. 4-7

Pine laka Iehova la Atre Ini së, haawe, pëkö jol hne së hna thatreine xomihnin. (Is. 30:20, 21) Nyimutre la itre eamo hna hamën hnei Tusi Hmitrötr, nge ka xatua së troa “atreine huliwa hnyawa” me “hnëkë hnyawa kowe la nöjei huliwa ka loi.” (2 Tim. 3:17) Ka inamacane catre kö së hune la itre ka xötrethenge la “inamacane i fen” ke, easa mel thenge la hna qaja hnei Tusi Hmitrötr.” (Sal. 119:97-100) Ngo, inamacane i fen a huli së troa xötrethenge la itre aja ne ngönetrei. Celë hi matre, jole koi së troa nuetrije la itre aqane mekun me aqane ujë ne la itre atrene fen. Öni Tusi Hmitrötr: “Wange pala kö wanga tro ketre a tra thethi nyipunie jëne la inamacane i fen, me itre mekune ka pë alien thenge la qenenöje i atr.” (Kol. 2:8) Tune la hna qaja hnei Tusi Hmitrötr göne la itre drai ne la pun, tro la itre atr a “ajane catrëne la nyine iamadrinë.” (2 Tim. 3:4) Ame la pune lai ke, kolo ha tithi angatr hnene la itre mec ka solesole tune la sida. Eje hi, ka hmo la atr ka xötrethenge la inamacane i fen.​—2 Pet. 2:19. w19.05 21 par. 1-2; 22 par. 4-5

Hnei Satana hna iaö angetre Isaraela me upi angatr troa nyitipune la itre hna majemine kuca hnene la itre nöje trenyiwa. Ame koi angatr, loi e troa thili kowe la itre haze, matre troa axulune la manie. Tha angatre kö a ajane troa qaqacile la ihnadro. Hnei Satana mina fe hna huliwane la itre aja ka sis. Ame ngöne la itre nöje ka tha nyihlue i Iehova kö, ke, kola atrune la itre haze. Angatr a kuca la itre huliwa ka sis, tune la troa nyi föe me trahmanyi ne gojeny. Kolo fe a ce meköl hnene la lue trahmany maine lue föe pena, me itre xaa huliwa ju kö ka sis. Eje hi, ame koi angatr, ka loi hi la itre huliwa cili! (Deu. 23:17, 18; 1 Ite jo. 14:24) Ame koi angatr, troa kuca tune lai matre troa mele la itre zi angatr hnene la itre haze. Alanyimu thene la itretre Isaraela ka hane piine la itre hna majemine cili. Celë hi matre, hnei angatre hna hane thili kowe la itre xaa haze. w19.06 2 par. 3; 4 par. 7-8

Alanyimu la itre ka huliwa ngöne la drai ka pexej me ka huliwa ngöne la Bethela ka xome la ketre hnëqa, ke hna saze la huliwa i angatr. Celë hi matre, jole catre kowe la itre trejin troa nue la huliwa hnei angatr hna hnim. Nemene la ka troa xatua angatr troa saze huliwa? Tro sa acatrene la aqane imelekeu së me Iehova, e hne së hna e me lapa mekun la Tusi Hmitrötr e nöjei drai. Ketre, loi e tro palahi sa catre cainöj memine la itre trejin ne la ekalesia së ka hnyipixe. Tha tro jë kö Iehova a thëthëhmine la itre ka catre nyihlue i Nyidrë, ngacama kucakuca ha angatr enehila. Loi e tro sa ahmaloeëne la mele së. Tha tro pi kö sa nue la itre ewekë ne la fene i Satana, troa “thahe” la mele së me ajolë së troa nyihlue i Iehova. (Mat. 13:22) Tha tro kö sa dreng la itre ka tha hmi kö, me itre fami së ka qaja ka hape, tro hë sa madrine e troa hetre huliwa hna nyithupene hnyawa. (1 Ioane 2:15-17) Loi e tro sa mejiune koi Iehova, Atre hamë së la ka ijij “ngöne la nyipi ijin.” Tro kö Iehova a xatua së troa acatrene la lapaune së, me mele tingeting, me hamë së la nöjei ewekë hne së hna ajan.​—Heb. 4:16; 13:5, 6. w19.08 20 par. 4; 21-22 par. 7-8

Hapeu, epuni kö a hnehengazo me akötr? Kola akeukawanyi së, pine laka trotrohni së fe hi hnei Iehova. Atre hnyawa hi Iehova laka, ijije hi tro sa kuca la ketre ewekë maine pena thatreine kö së. Ketre, atre hi Nyidrëti la itre mekuna së memine la itre aliene hni së. (Sal. 103:14; 139:3, 4) Maine tro sa catre mejiune koi Iehova, tro hë Nyidrëti a xatua së troa nyinyine la nöjei jole ka ahacenyi së me akötrë së. Maine tro palahi sa hnehengazo, tro hë sa mekun laka, pëkö nyin la itre jole së. Maine tro fe a traqa tune lai koi së, tha tro pi kö sa thëthëhmine laka, Iehova hi la ka troa xatua së troa atreine xomihnine la itre akötre së. Tro Iehova a xatua së tune kaa? Nyidrëti a ajane tro sa qaja la itre akötre së me itre aliene hni së. Tha sihngödri kö koi Iehova la itre trenge timidra së. Tro kö Nyidrëti a dreng la itre treije së. (Sal. 5:3; 1 Pet. 5:7) Celë hi matre, nyipiewekë tro sa catre thith, matre troa qaja koi Iehova la itre hne së hna hnehengazon. Eje hi laka, tha tro jë kö Iehova a ithanata meköti koi së. Tro pe Nyidrëti a ithanata koi së jëne la Tusi Hmitrötr memine la organizasio i Nyidrë. Tro ha aegöcatrenyi së me hamë mejiune koi së. Ketre, kola ithuecatre koi së, hnene la itre trejin me easë, trahmanyi me föe.​—Rom. 15:4; Heb. 10:24, 25. w19.06 16 par. 7-8

Ame la kola traqa la itre jol, loi e tro sa thith me ‘nenge la hni së kösë tim’ koi Iehova, me qaja kowe la Keme së ka tru ihnimin, la itre hne së hna xouen me hnehengazon. (Ite teije 2:19) Maine tro sa catre thith, tro hë sa easenyi catr koi Iehova. (Rom. 8:38, 39) Loi e troa xecie koi së laka, tro kö a eatre la itre hna thingehnaean hnei Akötresie. (Num. 23:19) Maine tha mejiune kö së kowe la itre hna thingehnaean hnei Akötresie, tha jole hë koi Satana me itre dremoni troa axouenyi së. (Ite edomë 24:10; Heb. 2:15) Loi e tro sa xomi ijine troa inine la itre hna thingehnaeane hnei Akötresie, göne la Baselaia i Nyidrë, me thel la itre ewekë ka anyipicine laka, tro kö Nyidrëti a eatrën elany. Nemene la thangane lai? Hanawang la hna melën hnei Stanley Jones. Hna akalabusi angeic pi hmi koi sevene lao macatre. Nemene la ka xatua angeic troa mele nyipici? Öni angeic: “Ka catre la lapauneng ke, atre hi ni la hna troa kuca elany hnene la Baselaia i Akötresie, nge xecie hnyawa koi ni laka, tro kö a eatr. Pëkö ewekë ka atreine troa sewe ni troa nyihlue i Iehova.” Eje hi, maine ka catrecatre la lapaune së kowe la itre hna thingehnaean hnei Akötresie, tha tro hë sa xou troa nyihlue i Nyidrë.​—Ite edomë 3:25, 26. w19.07 2 par. 1; 3 par. 6-7

Pine nemene matre nyipiewekë troa inine la itre atr? Pine laka, itre sinee i Akötresieti hi la itre ka drengethenge la itre hna amekötin hnei Keriso. Lolo la mele i angatr enehila, nge angatr a mejiune troa mel epine palua elany. (Ioane 14:6; 17:3) Hnei Iesu hna ahnithe koi së la ketre hnëqa ka tru. Ngo tha easë caasi kö la ka xome la huliwa cili. Hnei Paulo aposetolo hna qeje nyidrë me itre ka ce huliwa me nyidrë, ka hape: “Easë la itre ka ce huliwa me Akötresie.” (1 Kor. 3:9) Drei la ketre hnëqa ka tru hnei Iehova me Iesu hna hamën koi së, itre ka tha pexeje kö! Ketre, tru la madrine së ngöne la easa inine la itre atr. Ame la nyine troa pane kuca, tre, troa thele la itre atr ka hetre aja troa atre Iehova. Loi e tro sa cainöj koi angatr. Ame la easa qeje Iehova kowe la nöjei atr, easë hi lai a amamane laka, itre Temoë Iehova së. Ame la easa cainöj tune la hna amekötin hnei Keriso, easë hi lai a amamane laka, itre nyipi Keresiano së. w19.07 15 par. 3-5

Nyimutre la itre atr ka haine la itre eamo qa hnine la Tusi Hmitrötr. Ame e Neweyok, hnene la ketre trejine föe hna cainöj kowe la itre atr ka qene Mandarin. Öni angeic: “Eni a amamane kowe la atr laka, ka nyipiewekë angeic koi ni, nge eni a drei angeice hnyawa. Maine ka xötrei traqa angeic e cili, eni a hnying, ka hape: ‘Nemene la ka xatua epun troa saze nöj? Hetre huliwa i epuni hë? Hapeu, ka loi la thiina ne la itre atr e cili?’ ” Ame itre xaa ijin, kola nyiqane ini tusi hnei itre xan. Nge hnene mina fe lai trejin hna qaja ka hape: “Ame koi epun, nemene la nyine troa kuca matre troa imelekeu hnyawa memine la itre xan? Hane hi la eamo hna hamën hnei Tusi Hmitrötr: ‘Ame la qāne la iwatratra, te, kola si jëne la tim; hawe, tijepi la ikelikelë e tha kaca pete kö.’ Hapeu la eamo celë, kolo kö a xatua së troa imelekeu hnyawa me itre xan?” (Ite edomë 17:14) Celë hi itre xaa tulu ne aqane nyiqane ithanata ka troa amamane laka, hetre aja ne la atr troa porotrik. w19.07 23 par. 13

Ame la ka nyipiewekë kowe la itre ka saze hnëqa, tre, troa trotrohni angatr. Maine jë, troa tithi angatr hnei mec, maine troa meci pena la ketre atrene la fami angatr. Ketre, angatr a kucakuca pine laka, angatr a mekune lo itre sinee i angatr, ngöne la götrane hnei angatr hna huliwa ekö. Loi e tro sa trotrohni angatr, pine laka, angatr a cile kowe la ketre jol ka tru. Ijije fe hi tro sa xatua angatr ngöne la easa ce cainöje me angatr me amamai tulu. Önine la ketre trejin ka cainöj ngöne la ketre nöj koi nyimu macatre: “Nyimutre la itre atr ka ini tusi me eni e nöjei drai. Ngo ame enehila, jole koi ni troa e la ketre xötr ne la Tusi Hmitrötr, maine troa amamane la ketre video ngöne la eni a cainöj. Hnene la itre trejin ne la ekalesiang ka hnyipixe hna hane hë ni troa sine la itre ini tusi angatr. Celë hi ka thue ajange troa cainöj ngöne la teritoare ka hnyipixe. Atreine hë ni la aqane troa nyiqane ithanata memine la itre atr. Madrine hë ni troa huliwa e celë.” w19.08 22 par. 10; 24 par. 13-14

Eje hi, ame itre xaa ijin, tha ka hmaloi kö troa hnime la itre trejin. Easa wangatrune la itre ngazo hna kuca koi së, tui Euodia me Sunetuke. Ketre, ka tria palahi së. Celë hi matre, maine tro sa goeëne hi la itre ngazo hna kuca hnei itre xan, tro ha nanazije la ihnimi së. Maine jë, tro sa wesitr kowe la ketre trejin ke, tha hnei angeice kö hna xatua së troa nyidrawane la Uma Ne Baselaia. Maine tro sa mekune la nöjei tria ne la trejin, tro hë sa elëhni, nge tro ha nanazije trootro la ihnimi së koi angeic. Ngo loi e troa pane mekun ka hape, atre hnyawa hi Iehova la itre tria së memine la itre ngazo ne la trejin. Atraqatre la ihnimi Iehova koi së. Celë hi matre, loi e tro sa tui Iehova, tro sa hnime la itre trejin me goeëne hi la itre thiina ka lolo i angatr. Maine tro sa acatrene la ihnimi së kowe la itre trejin, tro hë sa caas.​—Fil. 2:1, 2. w19.08 9-10 par. 7-8

Iehova a hnime la itre atr ke hetre ipië. Angatr hi la ka ijij troa imelekeu hnyawa me Iehova. Ketre, Nyidrëti a “ate hmekune la ate pi tru e ga nany.” Ajan asë hi së troa amadrinë Iehova, me acatrene la aqane imelekeu së me Nyidrë. Celë hi matre, nyipiewekë tro sa hetre ipië. Ame kowe la atr ka hetreny la ipië, tre, ka nyipiewekë catre kö itre xan hui angeic. Tha ka pi mama kö angeic. Ame koi angeic, ka draië catre kö Iehova hui angeic. Ketre, trotrohnine hi angeic la enyipiewekëne la göhnë ne la itre xan. Atre hi angeic laka, ka nyipiewekë catre kö itre xan hui angeic. (Fil. 2:3, 4) Ame itre xan, angatr a qaja ka hape, itre atr ka ipië angatr, ngo tha mama kö. Maine jë, ka pë mej me ka lapa thaup angatr. Maine pena, angatr a metrötrë itre xan ke, hna ini angatr hnei kem me thin. Ngo ame pe, itre atr ka pi mama angatr. Tro kö a mama e ketre ijin, la nyipi pengöi angatr.​—Luka 6:45. w19.09 2 par. 1, 3-4

Ame “la maca ka loi göne la Joxu së Iesu,” tre, kola qaja la nöjei ini hna hamën hnei Iesu. Easa drengethenge Iesu, ngöne la easa trongën itre ej, me amë panëne la Baselaia ngöne la mele së. Loi e tro fe sa drengethenge la itre hna amekötin hnei Akötresie, me cainöjëne la Baselaia i Nyidrë. (Mat. 6:33; 24:14) Ketre, loi e tro sa cememine la itre trejin me Keriso ngöne la huliwa i angatr ka sisitria. (Mat. 25:31-40) Easenyi hë tro angatr a amanathithine la “itre xa mamoe” göne la ixatua i angatr. (Ioane 10:16) Tune kaa? Qëmekene troa nyiqane la isi Amagedro, elë asë hë la ala 144 000 hnengödrai eë, me kapa la mel ka pë pun. Tro angatr a sine la trongene isi Akötresie ka troa lep apatrenyi Gog, me amelene “la ka ala nyimu atraqatr,” itre hlue i Iehova. (Hna ama. 2:26, 27; 7:9, 10) Eje hi, ketre manathith ka tru kowe la ka alanyimu troa ce memine la itre hlue i Iehova hna iën e celë fen! w19.09 12-13 par. 16-18

Pine nemene matre kola aegöcatrenyi së la easa kuca la huliwa hna hamën hnei Iesu? Pine laka, easa ce huliwa memine la itretre thup ka lolo. Iehova, la Atre Thup Ka Sisitria, nge tha ka iakötrë kö Nyidrë. Nyidrëti a wangatrune la itre huliwa hne së hna kuca. (Heb. 6:10) Ketre, Iehova a hamë së la trengecatr ka ijij, matre troa eatrëne la huliwa së. (2 Kor. 4:7; Gal. 6:5) Hnei Iesu Joxu së, hna amamai tulu göne la aqane troa ujë kowe la itre xan. (Ioane 13:15) Itre qatre thup a thele troa nyitipu Iesu, lo “atre thupë mamoe ka sisitria.” (Heb. 13:20; 1 Pet. 5:2) Angatr a loi thiina me ithuecatr, me catre ini së me thupë së. Ketre, easa ce huliwa memine la itre sinee ka loi thiina. Nyipiewekë catre kö la huliwa së me itre sinee së. Pane mekune jë laka, easa ce huliwa memine la itre trejin ka thiina ka menyik me ka ipië. Ame koi angatr, nyipiewekë catre kö la itre xan. Tha itre sine huliwa hmekuje kö së. Angatr a goeë së ceitu me itre nyipi sinee. Tru la ihnimi angatr koi së, matre tha xoue angatre kö troa meci pi së! w19.09 20 par. 1; 23 par. 12-14

Paulo a qaja la “drai Iehova.” (1 Thes. 5:1-6) Troa nyiqane la drai cili ngöne la kola troa apatrenyi “Babulona Atraqatr,” ene la hmi ka thoi, nge troa nyipune hnei Amagedro. (Hna ama. 16:14, 16; 17:5) Paulo mina fe a qaja la itre nyine tro sa kuca, matre troa hnëkë kowe la “drai Iehova.” Tha tro pi kö sa “meköl tui itre xan.” Loi pe tro sa “hmek,” matre tha tro kö sa lö hnine la kuci politik. Maine tro sa sine la kuci politik, tro hë sa ‘sine la fen.’ (Ioane 15:19) Atre hi së laka, Baselaia i Akötresieti casi hi la ka troa hamëne la tingeting e cailo fen asë. Easë fe a ajane troa xatuane la itre xan troa atre la hna perofetan hnei Tusi Hmitrötr, göne la ka troa traqa e celë fen. Celë hi nyine tro sa canga kuca qëmekene la akötr atraqatr. Enehila hi la ijine troa catre cainöj. Ame hë e thupen, tha ijine hmaca kö troa easenyi koi Iehova! w19.10 8 par. 3; 9 par. 5-6

Ame la nyidroti a ase cinyihane la tusi hna ewath, hnei Ieremia hna mejiune koi Baruka troa tro fë la maca. (Iere. 36:5, 6) Hnei Baruka hna kuca hnyawane la huliwa i angeic. Atraqatr la madrine i Ieremia ngöne la Baruka a e la tusi cili qëmekene la nöjei atr. (Iere. 36:8-10) Hnene la itre joxu ne Iudra hna dreng la hna kuca hnei Baruka, nge hnei angatr hna sipo nyidrëti troa e koi angatr! (Iere. 36:14, 15) Aja i angatr troa qaja koi Iehoiakima joxu lo hna qaja hnei Ieremia. Ame la Iehoiakima joxu a drenge la tusi Ieremia, hnei nyidrëti hna elëhni, me iupi troa dreuthetrij la tus me akalabusi Ieremia me Baruka. Ngo hnei Ieremia hna hamë Baruka la ketre tusi hna ewath, me qaja koi angeic la maca i Iehova. Nge hnei Baruka hna cinyihane “la nöjei wesi ula asë ne la tusi lo hnei Iehoiakima joxu ne Iuda hna deuthe tije ngöne la eë.”​—Iere. 36:26-28, 32. w19.11 3-4 par. 4-6

Atreine hi Iehova eatrëne la aja i Nyidrë. Iehova la Atre Ini Ka Sisitria, me Atre Akeukawan, me Atre Cainöj. Hetre itre xaa ewekë palakö hnei Nyidrëti hna kuca. (Is. 48:17; 2 Kor. 7:6; Gal. 3:8) Ngo hnei Iehova mina fe hna aijijëne la itre atr troa eatrëne la aja i Nyidrë. (Mat. 24:14; 28:19, 20; 2 Kor. 1:3, 4) Nge Nyidrëti a hamë së la inamacan me trengecatr ka ijij göne lai. Celë hi la aliene la ëje i Iehova, tune la aqane trotrohnine hnene la itre ka inamacan. Easa ajane troa hane kuca la aja i Iehova, ngo maine jë tro sa luelu. Pine nemen? Pine laka, easa uti ipië trootro maine kucakuca, me itre xaa jole ju kö. Itre xan a mekun laka, tru catre hë la hnei angatr hna kuca. w19.10 20 par. 1-2

Maine tro sa aja mo, tro ha nanazije la lapaune së, nge tro hë sa wangacone la huliwa i Iehova. Öni Paulo aposetolo: “Pëkö atr ka sooc nge ka xomi ketre huliwa nyine mele koi angeic, ke aja i angeic troa amadrinëne la atre alö angeic.” (2 Tim. 2:4) Hna wathebone la itre sooc ne Roma troa xome hmaca la ketre huliwa. Ceitu së hi memine la itre sooc. Easa ajane troa amadrinëne la lue tane isi së, Iehova me Iesu Keriso. Ka nyipiewekë catre kö lai hune la nöjei ewekë ne la fene i Satana. Celë hi matre, easa nue traem me trengecatre së troa catre nyihlue i Iehova me thupën matre tro palahi a lolo la petre ne la lapaune së. Loi e tro palahi sa hmek! Pine nemen? Öni Paulo aposetolo, “ame la itre ka isine troa trenamo” ke, angatr a “nanyi qa ngöne la lapaun.”​—1 Tim. 6:9, 10. w19.11 17 par. 12, 14-15

Qëmekene la “drai Iehova,” kola troa qaja ka hape, “Tingetinge hë nge pë hë hna mecin.” (1 Thes. 5:1-6) Ame la “drai Iehova” ngöne 1 Thesalonika 5:2, tre, kola qaja “la akötr atraqatr.” (Hna ama. 7:14) Nemene la aqane tro sa atre la ijine kola troa nyiqane la akötr cili? Tusi Hmitrötr a qaja ka hape, troa tro fë la ketre maca ka ketrepengön. Celë hi ka troa amamane laka, easenyi hë matre nyiqane pi la akötr atraqatr. Kola qaja ka hape, “tingetinge hë nge pë hë hna mecin.” Tro fe kö la itre hmi a tro fë la maca cili? Maine jë, eje hi. Ame pe, atre hi së laka, ketre trengathoi lai hna qaja hnene la itre dremoni, nge ka hetre thangane ka ngazo catr. Tro la itre atr a mekun laka, tingetinge hë la mele i angatr, ngo ame pe, kolo hi lai a nyiqane la akötr atraqatr. “Canga traqapi koi angate la hnëjin, tune la aköte sile kowe la föe ka upune.” Nge tune kaa kowe la itre hlue i Iehova ka mele nyipici? Maine jë, troa asesëkötrë angatr ngöne la kola troa nyiqane la drai Iehova, ngo ame pe, ka hnëkë hë angatr. w19.09 9 par. 7-8

Qëmekene troa axecië mekun, loi e troa eköthe hnyawa la itre mekuna së. Tro hë së lai a atreine eatrëne itre ej. Maine jë tro sa mekun troa e lapane la Tusi Hmitrötr. Ngo maine tha hne së kö hna eköthe la ketre porogaram, haawe, thatreine kö tro sa e asë la Tusi Hmitrötr. Maine jë hnene la itre qatre thup ne la ekalesia hna mekun troa wang me eatrongëne hnyawa la itre mamoe i Iehova. Ngo thupene la itre drai, pëkö hnei angatr hna kuca. Maine aja i angatr troa eatrën la mekuna i angatr, loi e tro angatr a hnying ka hape: “Hapeu, hne së kö hna sija la ëjen ne la itre trejin nyine troa wang? Hne së kö hna amë la drai me hawa, matre troa wai angatr?” Ketre, loi e tro sa atreine waiewekë. Pëkö ala caasi the së ka hetre ijin, me trene mo, maine trengecatr troa kuca asë la itre hne së hna ajan. Celë hi matre, loi e tro sa atreine waiewekë me inamacan. Maine jë tro sa saze la itre mekuna së, pine laka, thatreine kö së troa eatrëne la mekuna së. w19.11 29 par. 11-12

Kola qejepengöne la mel elany, hnene la tusi Isaia 65:21-23. Tha kolo kö lai a hape, tro hi sa lapa nge pëkö hne së hna troa kuca. Tusi Hmitrötr a qaja ka hape, tro la nöje i Iehova a madrine troa huliwa. Ame la kola troa nyipune la Musi Iesu Ka Caa Thauzane Lao Macatre, easa mejiune laka, “tha tro hmaca kö a othe la itre ewekë hna xup hnene la ngazo me mec, ngo tro ha nuamacanyi angatr tune la itre nekö i Akötresie.” (Rom. 8:21) Eje hi, hnei Iehova ekö hna aijijë angetre Isaraela troa huliwa me mano. Tro fe Nyidrëti a hane kuca tune lai koi së fene la Musi Iesu Ka Caa Thauzane Lao Macatre. Nge tro fe a nue ijine koi së troa atrunyi Iehova. Ketre ewekë lai ka sisitria, nge ka troa thue madrine së. Tro la nöjei atr a atrunyi Iehova ngöne la fene ka hnyipixe. Tro ha madrin elany fene la Musi Iesu Ka Caa Thauzane Lao Macatre, pine laka, easa madrine troa huliwa me nyihlue i Akötresie. w19.12 12 par. 15; 13 par. 17-18

Ame la troa “inin,” tre, kola qaja la troa “inin me amexeje palahi.” Nyipiewekë tro la itre kem me thin a nue ijine troa cememine la itre nekönatr. Ame itre xaa ijin, angatr a kucakuca ke, angatr palahi a amexeje la itre hna amekötin koi nyudren. Ngo aqane tro hi angatre lai a inine la itre nekönatr, troa trotrohnin me trongëne la hna qaja hnei Tusi Hmitrötr. Ketre loi e troa atrepengöne hnyawa la itre nekönatr. Ame ngöne Salamo 127, kola aceitunëne la nekönatr me uke pehna. (Sal. 127:4) Nyimutre la itre ewekë hna xom matre troa kuca la uke pehna, nge isa eqeane kö itre ej. Ceitune hi lai memine la itre nekönatr. Isapengöi nyudreni kö, matre isapengöne fe la aqane troa ini nyudren. Önine la lue trefën qa Israël, göne la lue nekö i nyidroti trahmany me jajiny: “Hnei nyio hna isa kuca la ini tusi nyidro.” Qanyine kö la itre hene la fami troa axeciëne la aqane troa ini tus. w19.12 26-27 par. 18-20

Atraqatr la hni ne ole së kowe la itre ka xatua së ngöne la itre ijine jol! Hna eatr la keme i Ryan ngöne loto. Öni Ryan: “Ame la easa akötr, kösë thatreine hë së kuca la itre ewekë hna majemine kuca e nöjei drai. Ngacama co hi la ixatua hna hamën, ngo ka nyipiewekë catr.” The wangacone kö la enyipiewekëne la ixatua hna hamën, ngacama co ju hë. Tru catre hnei huliwa i Mareko, ketre trejin ka mel ngöne la hneijine i Iesu. Ngo, hnei Mareko hna xomi ijine matre troa xatua Paulo, nge atre hi Paulo laka, ijije hi tro nyidrëti a hë Mareko ngöne la nyidrëti a aja ixatua. Tru catre la hni ne ole i Angela kowe la itre ka ixatua, ngöne lo kola meci la ketre atrene la fami angeic. Öni angeic: “Hmaloi hi troa ithanata koi angatr. Tha xoue i angatre kö troa xatua ni.” Isa hnyinge jë ka hape, ‘Eni kö a canga xatuane la ketre trejin ka aja ixatua?’ w20.01 11-12 par. 14-16

Nemene la aqane tro la ketre hna iën a xom la falawa me iji waina “ngo tha ijij” pe? Maine jë, hnei angeic hna xen la falawa me ije la waina ngo tha trongëne pe angeic la itre wathebo i Iehova. (Heb. 6:4-6; 10:26-29) Atre hi la itre hna iën laka, nyipiewekë tro angatr a mele nyipici, e aja i angatr troa kapa la “thupen, ene la ihë i Akötresie, ihë qa hnengödrai jëne Keriso Iesu.” (Fil. 3:13-16) Uati hmitrötre i Iehova a xatuane la itre hlue i Nyidrë troa hetre hni ne ipië, nge tha tro kö a pi tru. (Efe. 4:1-3; Kol. 3:10, 12) Celë hi matre, ame kowe la itre hna iën, tha sisitria kö angatr hune la itre xan. Atre hi angatr laka, ceitune hi la aqane amanathithi angatre hnei Iehova memine la itre xaa hlue i Nyidrë. Tha angatre kö a mekun laka, atrepengöne hnyawa kö angatr la Tusi Hmitrötr hune la itre xan. Ketre, tha tro angatre kö a qaja koi ketre ka hape, ketre hna iën angeic matre loi e tro fe angeic a xom la falawa me waina ngöne la Drai Ne Amekunën. Angatre pe a hetre hni ne ipië. Atre hi angatr laka, Iehova hmekuje hi la ka iëne la itre atr troa tro hnengödrai eë. w20.01 27-28 par. 4-5

Iehova a ajane tro sa nyi sinee i Nyidrë, me ithanata me Nyidrë. Öni Iehova: “Thithi jë the mano kö,” nge Nyidrëti a dreng la itre thithi së. (Rom. 12:12) Tha Iehova kö a wangacone itre ej. Ketre, easa drei Nyidrë ngöne la easa e Tusi Hmitrötr memine la itre xaa itus, me drenge hnyawa ngöne la hna icasikeu. Maine tro palahi sa thithi koi Iehova, tro hë sa easenyi catre koi Nyidrë. Iehova a ajane tro sa fe la itre mekun me itre aliene hni së. (Sal. 62:8) Loi e tro sa isa hnying ka hape: ‘Ame la eni a thith, eni kö a e gufan maine qaja la itre aliene hning?’ Tru la ihnimi së koi Iehova, matre easa ajane troa acatrene la aqane imelekeu së me Nyidrë. Celë hi matre, loi e tro palahi sa ithanata koi Iehova. Tro sa qaja la itre aliene hni së, tune la itre ewekë ka amadrinë së me itre hne së hna hnehengazon. Loi e xecie koi së laka, ijije hi tro sa sipo ixatua koi Nyidrë. w20.02 9 par. 4-5

Hnei Iehova hna acile la itre qatre thup, matre troa thupëne la nöje i Nyidrë. Hetre ini hna troa xom hnene la itre qatre thup qa ngöne la aqane nyihnyawane Nehemia la nöje i Iehova. Nehemia ekö la ketre gavena e Iudra, nge nyimutre la itre hnëqa i angeic. (Neh. 1:11; 2:7, 8; 5:14) Pane mekune jë la itre jol ka traqa koi Nehemia. Hnei angeic hna öhn laka, tha metrötrëne kö la uma ne hmi hnei angetre Iudra. Angatr a kuca la itre ewekë ka ngazo. Tha hnei angatre kö hna hamëne la edrö i angetre Levi, tune lo hna amekötin e hnine la Wathebo i Iehova. Nge tha hnei angatre kö hna metrötrëne la sabath. Ketre, hnei angatr hna faipoipo memine la itre föe ka tha nyihlue i Iehova kö. Loi e tro Nehemia a kuca la ketre ewekë. (Neh. 13:4-30) Tha hnei Nehemia kö hna musinëne la nöj, matre troa tro thenge la itre mekuna i angeic. Hnei angeice pe hna sipo ixatua koi Iehova jëne la thith, me inine la nöje i Iehova jëne la Wathebo i Nyidrë. (Neh. 1:4-10; 13:1-3) Hnei Nehemia mina fe hna metrötr. Hnei angeic hna ce huliwa memine la nöj, ngöne lo angatr a ce xup la itre hag e Ierusalema.​—Neh. 4:15. w19.09 16 par. 9-10