Okotropa

Hapeu ka jole kö koi epun e itre xaa ijin troa idrengethenge? Celë fe hi ka traqa koi Dravita joxu. Matre, hnei angeic hna sipo Iehova ka hape: “Ahlëne pi la aja e kuhu hning troa drengethenge nyipë.” (Sal. 51:​12) Ngacama tru la ihnimi angeic koi Akötresie, ngo jole koi angeic e itre xaa ijin troa drengethenge Nyidrë. Ceitu së fe hi me Dravita. Pine nemen? Ame la hnapan, ke itre atr ka ngazo së, matre canga tro hi sa tha idrei. Ame la hnaaluen, ke Satana palahi a uku së troa icilekeu me Iehova, tui angeic. (2 Kor. 11:3) Ame la hnaakönin, ke hna haöthe la fen hnene la itre mekun ka icilekeu, ene “la aqane waiewekë ka ej thene la itre ka tha idrei.” (Efe. 2:2) Celë hi matre, loi e tro sa isi memine la pengö së ka ngazo, me cile koi Satana memine la fen i angeic ka uku së troa tha idrei. Nyipiewekë tro fe sa drengethenge Iehova memine la itre atr hnei Nyidrëti hna nue troa musi koi së. w23.10 6 par. 1

Nemene la ini hne së hna xom qa ngöne la iamamanyikeu hnei Iesu hna kuca e Kana? Kola ini së troa ipië. Tha hnei Iesu kö hna pi mama. Tha ase kö nyidrë selëne la itre hnei nyidrëti hna kuca. Ngo hnei nyidrëti palahi hna atrune la Keme i nyidrë cememine la ipië. (Ioa. 5:​19, 30; 8:​28) Maine aja së troa ipië tui Iesu, ke tha tro kö sa selëne la itre hne së hna kuca. Tha tro pi kö sa selëne la itre hne së hna kuca ngöne la huliwa i Iehova. Loi e tro pe sa atrune la Akötresi së hne së hna nyihluen. (Iere. 9:​23, 24) Meköt tro Nyidrëti a kapa la iatruny, ke Nyidrëti la ka atreinë së troa kuca la nöjei ewekë ka loi. (1 Kor. 1:​26-​31) Ame la easa kuca la loi koi itre xan, ke nyipiewekë tro sa ipië, nge tha tro kö sa thele troa selë së. Ame la ka nyipiewekë, ke ene la tro Iehova a öhne me madrine kowe la itre hne së hna kuca. (Wange ju fe la Mataio 6:​2-4; Heb. 13:16) Maine tro sa ipië tui Iesu, ke tro hë së lai a amadrinë Iehova.​—1 Pet. 5:6. w23.04 4 par. 9; 5 par. 11-​12

Hnei Paulo aposetolo hna ithuecatr kowe la itre keresiano troa thele la ka loi koi itre xan. Tro sa trongëne tune kaa la eamo celë ngöne la itre ijine icasikeu? Tha tro kö sa thëthëhmine laka, tui easë, ajane fe la itre xan troa hane qeje mekun. Pane mekune jë la: Ame la epuni a porotrik me itre sinee i epun, epun casi kö la ka ithanata? Waea! Aja i epun tro fe angatr a hane qeje mekun. Ketre tune mina fe ngöne la itre icasikeu, easa ajan tro asë hi la itre trejin a hane sa. Eje hi, ame la ketre aqane troa ithuecatr kowe la itre trejin, ke ene la troa hane nue angatr troa qaja la lapaune i angatr. (1 Kor. 10:24) Haawe loi e tro sa majemine ahopatrene la itre mekun, matre hetre ijin koi itre xan troa hane sa. Ngacama hopatre hi la itre hnei epuni hna qaja, ngo tha tro kö a qaja asë la itre mekun. Maine tro epuni a qaja asë la itre mekun ka ej ngöne la paragaraf, ke pë hë nyine tro itre xan a sa. w23.04 22-​23 par. 11-​13

Tha tro kö sa thëthëhmine laka, nyipiewekë troa xatuane la itre xan jëne la huliwa ne cainöj. Loi e tro sa atreine tulu ewekë la easa cainöj. Ame la itre atr hne së hna cainöje kow, ke isa hmi, me nöj, me qenenöje i angatre kö. Loi e tro sa xomi ini qaathei Paulo aposetolo. Hnei Iesu hna ië Paulo troa “ketre aposetolo hna upe kowe la itre xa nöj.” (Roma 11:13) Celë hi matre hnei Paulo hna cainöj kowe la angetre Iudra, kowe la angetre Geres, kowe la itre ka inamacan, me itre ka eëny, me itre joxu, me itre hene ne mus. Hnei angeic “hna isine troa xome la nöjei pengön asë, thatraqane la nöjei atr asë,” matre ketr la hni angatr. (1 Kor. 9:​19-​22) Hnei angeic hna pane mekune la qenenöj, me hmi, memine la hna melën ekö hnene la itre atr, qëmeken troa cainöje koi angatr. E tro sa thele la aqane troa ketr la hni ne la itre atr, ke tro së lai a öhnyi thangan ngöne la huliwa ne cainöj. w23.07 23 par. 11-​12

Ame la atr ka menyik, ke ka catre angeic, ngo tha ka puje kö. Eje hi, ame la atr ka catr, ke tha angeice kö a enienije menu la kola traqa la ketre jol. Ame la menyik, ke ketre igötranene “la wene ne la ua.” (Gal. 5:​22, 23) Ame itre xaa ijin, hna huliwane la hnaewekë qene Geres hna hape, “menyik” matre troa qaja la ketre hoos wael hna amemën. Pane mekune jë la ketre hoos wael hna amemën. Ngacama menyike hë ej, ngo tha hape kö ka hape, patre hë la trengecatrene ej. Tune kaa fe easë? Nemene la aqane tro sa menyik me catr? Tha tro hmekuje kö sa ajan. Ngo loi e tro fe sa sipo Iehova la uati hmitrötr, matre xatua së troa hetrenyi la thiina ka lolo cili. Alanyimu la itre Temoë Iehova ka inine troa menyik. Ame enehila, atreine hë angatre menyik kowe la itre ka icilekeu me angatr. Angatr e cili a amamai tulu ka lolo kowe la itre ka goeë angatr.​—2 Tim. 2:​24, 25. w23.09 15 par. 3

Hnei Ioane aposetolo hna meköle goeëne la 24 lao qatr ka atrunyi Iehova e koho hnengödrai. Angatr a atrunyi Nyidrë me qaja ka hape, “Ijiji nyipë . . . troa kapa la lolo, me iatruny, me men.” (Hna Am. 4:​10, 11) Nyimu kepin matre itre angela fe a nyihlue i Iehova me atrunyi Nyidrë. Ce angatr me Nyidrë e koho hnengödrai matre atrepengöi Nyidrëti hnyawa hi hnei angatr. Öhne hi angatr la itre thiina i Nyidrë ngöne la itre ewekë hnei Nyidrëti hna xup. Nge ame la angatr a öhne la aqane ujë i Nyidrë, ke kola uku angatr troa atrunyi Nyidrë. (Iobu 38:​4-7) Aja i easë fe troa atrunyi Iehova ngöne la itre thithi së, me qaja la itre ewekë hne së hna hain thei Nyidrë. Ame la epuni a e me lapa mekune la Tusi Hmitrötr, thele jë la itre thiina i Iehova. Nemene la itre thiina i Nyidrë ka ketri epun? (Iobu 37:23; Roma 11:33) Qaja jë koi Nyidrë la itre thiina ka ketri epun, memine la kepin matre kola ketri epun. Loi e tro mina fe sa atrunyi Iehova pine la itre hnei Nyidrëti hna kuca koi së me kowe la itre trejin.​—1 Sam. 2:​1, 2. w23.05 3-4 par. 6-7

Ame lo 1919, pëhë thangane la itre ini qaathei Babulona Atraqatr, kowe la nöje i Akötresie. Ame ngöne la macatre cili, hna acile fe “la hlue ka nyipici me ka inamacan,” matre troa xatuane la itre atr ka ajane troa trongën la “Gojenyi Ka Hmitrötr” hna xötrei fe. (Mat. 24:​45-​47; Isa. 35:8) Jëne la huliwa hna kuca hnene lo itre ka jigojenyi ekö, hna xatuane la itre atr ka xötrei tro ngöne la gojenyi cili troa trotrohnine la aja i Iehova. (It. Ed. 4:​18) Nge ijiji angatr hë troa mele thenge la itre hna amekötin hnei Iehova. Ngo tha hnei Iehova kö hna upe la itre hlue i Nyidrë troa canga saze la aqane ujë me aqane hmi angatr. Ame ngöne la itre macatre, hnei Nyidrëti hna amekötine trootro la aqane ujë i angatr. Drei jë kö la madrine së elanyi troa kuca asë la itre ewekë ka amadrinë Iehova! Nyipiewekë troa nyidrawane lapane la itre gojeny. Qane lo 1919, kolo palahi a nyidrawane la “Gojenyi Ka Hmitrötr” matre aijijëne la itre atr troa trotriji Babulona Atraqatr. w23.05 17 par. 15; 19 par. 16

Ame kö la ini thatraqane la itretre ixatua ngöne la itre komite ne la Lapa Ne Xomi Meköt, ke hna iujine hnene la itre atrene la Lapa Ne Xomi Meköt. Itretre ixatua fe hë a xome la itre hnëqa ka tru ngöne la organizasio. Kola ini angatre la aqane troa sisedrëne la huliwa ne thupën la itre mamoe i Keriso. Qëmekene troa nyipune la akötr atraqatr, ngacama elë asë hë la itre hna iën a tro hnengödrai, ngo tro palahi a ej la hmi ka wië e celë fen. Pine laka, Iesu Keriso la ka iujine la itre hlue i Iehova e celë fen, tha tro kö a patre la hmi Iehova. Ame ngöne la ijine cili, troa cile koi së hnei Gog Atre Magog, ene la itre nöj hna acasin. (Ezek. 38:​18-​20) Ngo tha tro kö la isi cili a apatrene la hmi ka wië. Tro kö Iehova a amelene la itre hlue i Nyidrë! Hnei Ioane aposetolo hna meköle goeëne la “ka ala nyimu atraqatr” ene lo itre xaa mamoe i Keriso. Öni Tusi Hmitrötr, angatr a “xulu qa ngöne la akötr atraqatr.” (Hna Am. 7:​9, 14) Haawe, kolo hi lai a amamane ka hape, hna thupë angatre hnyawa hnei Iehova! w24.02 5-6 par. 13-​14

Nemene la nyine tro sa kuca matre troa kapa la uati hmitrötr? Sipone jë koi Iehova, inine jë la Tusi Hmitrötr, nge hane jë sine la itre huliwa ne la organizasio i Nyidrë. Celë hi aqane tro sa huliwane “la wene ne la ua.” (Gal. 5:​22, 23) Tro hi Iehova a hamëne la uati hmitrötre i Nyidrë, e ka wië la mekun me aqane ujë së. Tha tro kö Nyidrëti lai a hamë së, e tro palahi sa mekun maine kuca la ngazo. (1 Thes. 4:​7, 8) Nge maine easa ajan troa kapa la uati hmitrötr, ke ‘tha tro kö sa wange sixane la itre hna perofetan.’ (1 Thes. 5:​20) Ame la “itre hna perofetan” celë, ke kola qaja la maca i Iehova, göne la drai Nyidrë memine la itre drai ne la pun. Tha tro kö sa mekune ka hape, nanyi palakö la drai cili, maine tha tro kö a traqa la isi Amagedro. Ngo easë pe a mekune lapane la drai cili, me loi thiina, me catre kuca “la itre huliwa ka nyipici koi Akötresie.”​—2 Pet. 3:​11, 12. w23.06 12 par. 13-​14

Nemene la nyine tro sa kuca e traqa mama la ketre iatr ka sis ngöne la tablete maine mobilisi së? Meke ju! Tha tro pi kö sa goeën. Tro sa atreine nuetrije la itre iatre cili, e troa xecie koi së ka hape, pëkö ketre ewekë ka sisitria hune la imelekeu së me Iehova. Ame la itre xaa iatr ke, tha itre iatr ka sisi kö, ngo itre ej a amejëne the së la aja troa ce meköl. Pine nemen matre tha tro kö sa goeën itre ej? Pine laka, tha aja i easë kö troa traqa kowe la kuci ngazo. (Mat. 5:​28, 29) Öni David, ketre qatre thup qa Thaïlande: “Eni a ketre hnying ka hape: ‘Ngacama tha iatr ka sisi kö la hnenge hna goeën, ngo hapeu, madrine kö Iehova koi ni?’ Ame la eni a hnyinge tun, ke kola xatua ni troa inamacan.” Maine tro sa akökötrene the së la xoue troa akötrë Iehova, ke tro lai a xatua së troa ujë tune la itre ka inamacan. Ame la xoue Akötresie, ke, “qane” maine trepen ne “la inamacan.” w23.06 23 par. 12-​13

Maine jë, ame la hnaewekë “hnahage” e celë, ke kola qaja la itre ekalesia së. Ame ngöne la akötr atraqatr, tro kö Iehova a thupë së, e tro sa cas memine la itre trejin me easë. Celë hi matre enehila hi la ijin tro sa cas me hnime la itre trejin. Aqane tro hi së lai a mel ngöne la akötr atraqatr! Tha aqane tro kö a akötr la itre atr, ngöne la “drai ka tru i Iehova.” (Zefa. 1:​14, 15) Nge tro fe lai a hane ketr la itre hlue i Nyidrë. Ngo maine tro sa canga hnëkë enehila, ke tha tro kö sa nyiape hmohmo, ngo tro pe sa xatuane la itre xan. Tro së lai a atreine cile hut qëmekene la itre jol. Ame la kola traqa la jol kowe la itre trejin, tro së lai a utipi angatr me hamë angatr la ka nyipiewekë. E tro sa catre hnime la itre trejin enehila, ke hmaloi hi troa hnimi angatr elany ngöne la ijine jol. E cili, tro hë Iehova a amanathithi së me hamë së la mel ka pë pun ngöne la fen laka, pëhë akötr.​—Isa. 65:17. w23.07 7 par. 16-​17

Hnei Tusi Hmitrötr hna qaja la itre xaa hlue i Akötresie ka tru trengecatr. Ngo hnei angatre fe hna hane pë trengecatr. Tui Dravita Joxu, ka catr angeic tune la wetr, ngo ame itre xaa ijin, angeic a “shesheu.” (Sal. 30:7) Ngacama atr ka catr Samasona, ngo öni angeic, e patre hë la uati hmitrötre i Iehova, ke tro fe a ‘patr thei angeic la egöcatr, nge tro angeic a kucakuca tune la nöjei atr.’ (A. ame. 14:​5, 6; 16:17) Lue ka catr nyidro, ke Iehova la ka hamë trengecatr koi nyidro. Öni Paulo aposetolo ka hape, nyipiewekë fe koi angeic la mene i Iehova. (2 Kor. 12:​9, 10) Hna hane tithi angeice fe hnene la itre sine mec. (Gal. 4:​13, 14) Ame itre xaa ijin, angeice fe a isine troa kuca la loi. (Roma 7:​18, 19) Nge angeice fe a seseu me luelu. (2 Kor. 1:​8, 9) Ngo ame la Paulo a kucakuca ke, kolo hi a tru la trengecatre i angeic. Pine nemen? Pine laka Iehova a hamë angeic la trengecatre ka ijij. Nyidrë a aegöcatrenyi angeic. w23.10 12 par. 1-2

Maine eö fe hi a hane mekun tui nyidro, the thëthëhmine kö laka, Iehova la ka ee eö koi Nyidrë. (Ioa. 6:​44) Maine tha öhne kö eö la ka loi thei eö, ngo öhne kö Nyidrë ke, atre eö hnyawa hi hnei Nyidrë. (2 Aq. Jo. 6:​30) Matre the luelue kö laka, ka tru eö koi Nyidrë. (1 Ioa. 3:​19, 20) Ame la itre xan, angatr palahi a hmahman lo itre ewekë hnei angatr hna kuca ekö, qëmeken troa atre Iehova. (1 Pet. 4:3) Ame la itre xaa trejin, angatr a isi memine lo itre hnei angatr hna majemin kuca ka ngazo. Ame eö ke, kolo kö a jelengazo eö hnene la hni eö? Maine eje hi, tha eö casi kö. Kolo fe a hace la hni Paulo aposetolo la angeic hmaca a mekun lo itre tria i angeic. (Roma 7:​24) Nyipici, hnei angeice lo hna ietra me bapataiso. Ngo angeice palahi a mekun ka hape, angeic “la aposetolo ka co catr,” nge “ka tru ngazon thei angatr.”​—1 Kor. 15:9; 1 Tim. 1:​15. w24.03 27 par. 5-6

Ame la ketre ini hne së hna xome qaathei Ioasa joxu, ke nyipiewekë tro sa nyisineene la itre atr ka uku së troa kuca la loi, ka hnimi Iehova, nge ka amadrinë Nyidrë. Tha nyipiewekë kö tro la itre hne së hna nyisineen a ce xötr me easë. Ngacama tru catre kö Iehoiada hui Ioasa, ngo lue treme sineene nyidro. Haawe, isa hnyinge jë ka hape: ‘Itre sineenge kö a uku ni troa acatrene la lapauneng koi Iehova? Angatre kö a ithuecatre koi ni troa trongëne la itre trepene meköti Nyidrë? Aja i angatre kö troa qeje Nyidrë me ithanatane la itre ini qa hnine la Tusi Hmitrötr? Angatre kö a metrötrëne la itre wathebo i Nyidrë? Angatre kö a cile troa haji ni, maine angatr pena a ameköti ni la eni a tria?’ (It. Ed. 27:​5, 6, 17) Maine tha hnimi Iehova kö hnene la itre sinee i eö, ke nuetriji angatre pi! Ngo, e ka hnimi Iehova angatr, ce tro jë me angatr, ke itre nyipi sinee hi lai!​—It. Ed. 13:20. w23.09 9-​10 par. 6-7

Ame la mataitus alefa ke, pane mataitus qene Geres, nge omega ke, mataitus tixenuë. Ame la Iehova a qaja la hnëewekë “Alefa me Omega,” ke Nyidrëti a amamane ka hape, e ase hë Nyidrë nyiqane la ketre huliwa, tro kö Nydrëti a afenesin. Thupene la Iehova a xupi Adramu me Eva, hnei Nyidrëti hna qaja ka hape: “Hnaho pi me mana, nyialiene jë la ihnadro me musinën.” (Gen. 1:​28) Kösë e cili la Iehova a qaja ka hape, “Alefa.” Hnei Nyidrëti hna qaja hnyawan la aja i Nyidrë: Tro la itre matra i Adramu me Eva ka pexej me idrengethenge a nyialiene la ihnadro me aparadraisone ej. Nge e eatrëne hë elanyi la aja i Nyidrë, kösë tro Nyidrëti a qaja ka hape, “Omega.” Ketre, thupene la Iehova a “afenesine la hnengödrai me ihnadro, me itre ewekë e hnin,” ke hnei Nyidrë hna qaja la ketre ewekë ka amamane laka, tro kö Nyidrëti a eatrën la aja i Nyidrë. Tro kö Iehova a eatrëne la aja i Nyidrë kowe la atr me kowe la ihnadro ngöne la pun ne la hna 7 ne drai.​—Gen. 2:​1-3. w23.11 5 par. 13-​14

Tro lai a 4 lao treu ne trongë i hnadro qa Babulona a tro Isaraela, nge tha ka loi kö la gojeny. Ngo hnei Iehova hna qaja kowe la angetre Iudra ka hape, tro kö Nyidrëti a apatrene la itre ewekë ka ajolëne la tronge i angatr. Ame kowe la angetre Iudra ka mele nyipici koi Iehova, tru catre kö la itre manathithi hnei angatr hna troa kapa elanyi e Isaraela hune la itre trengecatr hnei angatr hna kuca. Nge ame la ketre manathithi ka tru, ke ene la troa acile hmaca la hmi angatr. Ame e Babulona, pëkö ca uma ne hmi thatraqai Iehova. Goi pë fe ita ne huuj me itretre huuj matre tro fë huuj thenge lo hna amekötine hnene la Wathebo i Mose. Ketre, ame la itre atr e cili, ke ka thili koi haze nge pëkö metrötre i angatr koi Iehova me kowe la itre trepene meköti Nyidrë. Matre tha alanyim kö la ka nyihluene la nyipi Akötresie. Celë hi matre angatr pe hi a treqene la ijine troa bëeke a tro Isaraela, me acile hmaca la hmi ka wië. w23.05 14-​15 par. 3-4

Nyipiewekë tro sa kapa la ixatua ne la uati hmitrötre i Akötresie, matre tro pala hi sa tro “tune la itre nekö ne la lai.” Pine nemen? Pine laka, jole catr troa pë ethan, ngöne la fene celë ka ngazo. (1 Thes. 4:​3-5, 7, 8) Tro la uati hmitrötr a xatua së troa nuetrij la itre ini me aqane mekune i fen ka tha ihmeku kö memine la mekuna i Akötresie. Eje fe a xatua së troa “loi hni ngöne la nöjei ewekë asë, me meköt.” (Efe. 5:9) Ame la ketre aqane tro sa kapa la uati hmitrötr, ke ene la troa thith. Öni Iesu ka hape, Iehova a “hamë uati hmitrötr kowe la angetre sipo nyidrë.” (Luka 11:13) Easë mina fe a kapa la uati hmitrötr, la easa atrunyi Iehova ngöne la ijine icasikeu. (Efe. 5:​19, 20) Tro la uati hmitrötr a xatua së troa mele thenge la itre aja i Iehova. w24.03 23-​24 par. 13-​15

Epuni kö a ajan troa atreine itreqe? Nga thithi jë. Ame la troa atreine itreqe, ke ketre igötranene la wene ne la ua. (Gal. 5:​22, 23) Celë hi matre nyipiewekë tro sa sipo Iehova la uati hmitrötre i Nyidrë, matre xatua së troa huliwane la thiina cili. E jole koi easë troa atreine itreqe, ke ‘the mano kö sipon’ la uati hmitrötr. (Luka 11:​13) Loi e tro fe sa sipo ixatua koi Iehova matre troa xome la aqane waiewekë i Nyidrë. Nge thupene la easa thith, ke loi e tro sa isine troa huliwane la thiina cili e nöjei drai. Maine tro palahi sa thith göne troa atreine itreqe, me thel troa huliwane la thiina cili, ke tro kö Iehova a xatua së. Lapa mekune jë fe la tulu ne la itre ka itreqe e hnine la Tusi Hmitrötr. Alanyim la itre atr hna qaja e hnine la Tusi Hmitrötr ka atreine itreqe. Maine tro sa lapa mekun la tulu i angatr, ke tro lai a xatua së troa huliwane la thiina cili. w23.08 22 par. 10-​11

Hnei Iesu hna amamane koi Peteru aposetolo laka, tro kö Iehova a xatua angeic. Thupene la hna amele Iesu hmaca, hnei nyidrëti hna kuca la ketre iamamanyikeu lo Peteru me itre xaa aposetolo a nue ifile. (Ioa. 21:​4-6) Ketre iamamanyikeu lai ka jelenyipicine koi Peteru laka, tro kö Iehova a hamën la ka nyipiewekë kowe la mele i angeic. Ame e cili, ma angeice hmaca jë a mekun lo hnei Iesu hna qaja göi Iehova laka, tro kö Nyidrëti a hamëne la ka nyipiewekë kowe la itre ka ‘thele panëne la Baselaia.’ (Mat. 6:​33) Celë hi ka uku Peteru troa amë panëne la huliwa ne cainöj, nge pine pë hë la huliwa ne nyi i. Ame lo Penetekos macatre 33 M.K., hnei angeic hna catre cainöj, matre alanyimu catr la itre atr ka kapa la maca ka loi. (It. Hu. 2:​14, 37-​41) Ame e thupen, hnei angeic hna xatuane la angetre Samaria me itre atre ne fen, troa atre me xötrethenge Iesu. (It. Hu. 8:​14-​17; 10:​44-​48) Eje hi, Iehova la ka aijijë Peteru troa xatuane la nöjei pengöne atr troa lö kowe la ekalesia. w23.09 20 par. 1; 23 par. 11

Nebukaneza Joxu a puje la ketre hnasaatr ka tru, lue macatre thupene la kola apatrenyi Ierusalema. Hnei nyidrëti hna qaja kowe asë hi la itre ka inamacan, ene Daniela fe ka hape, tro nyidrëti a humuthi angatr e tha qejepengöne kö angatr la aliene la pu i nyidrë. (Dan. 2:​3-5) Loi e tro Daniela a canga kuca la ketre ewekë, wanga humuthi angatre pi. Matre hnei “Daniela hna löjë, me sipone qa thei joxu laka tro nyidëti a nue koi angeice la ijin, mate tro angeic’ a amamane la pengöne la pu kowe la joxu.” (Dan. 2:​16) Hnei Daniela hna amaman e cili laka, ka catr me lapaune angeic. Tha hnei Tusi Hmitrötr kö hna qaja ka hape, hnei angeic ekö hna hane qejepengöne la itre pu. Hnei Daniela hna sipone kowe la itre sinee i angeic, troa thith kowe la Akötresie ne hnengödrai, matre troa xatua angatr göne “la ewekë ka sihngödi cili.” (Dan. 2:​18) Hnei Iehova hna sa la itre thithi angatr. Ame hnei Daniela hna qejepengöne la pu i Nebukaneza jëne la ixatua i Nyidrë. Matre mele ju kö Daniela me itre sinee i angeic. w23.08 3 par. 4

Mekune jë la itre thangan ka loi, la troa atreine xomihni. Ame la atr ka atreine xomihni, ke ka madrine me tingeting. Ka lolo la mekune me ngönetrei angeic. Nge ka lolo la imelekeu i angeic me itre xan. Angeice fe a acatrene la cas ne la ekalesia. Ame la kola jele la trengehni angeic, tha angeice kö a canga elëhni, matre pë ju kö jol. (Sal. 37:8; It. Ed. 14:29) Ngo ame la ka sisitria, ke angeic a nyitipu Iehova me easenyi catr koi Nyidrë. Ketre thiina ka lolo me ka hetre thangan, la troa atreine xomihni! Tha ka hmaloi kö troa xomihni, ngo tro kö Iehova a xatua së troa huliwane la thiina cili. Lapa treqene hnyawa ju la fen ka hnyipixe, nge the luelue kö laka, “eje la lue [meke] i Iehova hui angete qoue nyidë, lo angete teqene la ihnimi nyidë.” (Sal. 33:18) Haawe, catre jë së heetrëne la xomihni! w23.08 22 par. 7; 25 par. 16-​17

Iakobo a amamane laka, maine tro la atre cili a qaja ka hape, ka lapaun angeic koi Akötresie, ke troa jelethoi angeic hnene la itre huliwa i angeic. (Iako. 2:​1-5, 9) Iakobo fe a qaja la ketre atr ka öhne la trejin me angeic ka pë iheetr me nyine xen, ngo pëkö hnei angeic hna kuca. Maine tro la atre cili a selën ka hape, ka lapaun angeic, nge pë pe huliwa, ke gufa kö la lapaune i angeic. (Iako. 2:​14-​16) Hnei Iakobo hna qeje Rahaba matre troa amamane ka hape, ka nyipiewekë troa ce tro la lapaun me itre huliwa. (Iako. 2:​25, 26) Hnei Rahaba hna drei mejen la itre huliwa ka mene i Iehova, nge atre hi angeic ka hape, ce Nyidrë memine la angetre Isaraela. (Ios. 2:​9-​11) Ame lo ketre ijin, hnei angeic hna amamane la lapaune i angeic, la angeic a juetrëne la lue atre Isaraela ka kötre mel. Ame e cili, hna jelemeköti angeic tui Aberahama, ngacama tha ka pexeje kö angeic, nge tha föe ne Isaraela pena kö. Kolo hi lai a amamane hnene la tulu i Rahaba laka, nyipiewekë tro sa amamane la lapaune së hnene la itre huliwa. w23.12 5-6 par. 12-​13

Ame easë itre keresiano, tha easë hmekuje kö a thel troa trotrohnine la itre ini ka tëtë ne la Tusi Hmitrötr. Jëne la uati hmitrötr, easë fe a ajan troa trotrohnine “la itre ewekë ka jui i Akötresie.” (1 Kor. 2:​9, 10) Ame la epuni a ini Tusi cas, nemene jë la ketre mekun ka troa easenyi epun koi Iehova? Maine jë, tro epuni a thel la aqane amamane Iehova la ihnimi Nyidrë kowe la itre hlue i Nyidrëti ekö. Celë hi ka troa anyipicine ka hape, Nyidrëti fe a hnimi epun. Maine pena, tro epun a thel la ka ceitu ngöne la itre hna amekötine kowe la angetre Isaraela ekö göne la hmi Iehova, me aqane hmi easë enehila. Ijije fe hi tro epun a thel la aqane eatrëne Iesu la itre hna perofetane lo nyidrëti e celë fen. Tro epuni a madrine troa ithel jëne la Index des publications des Témoins de Jéhovah maine jëne la Nyine Thele Mekun Ne La Itretre Anyipici Iehova. Ame la easa sine ajuin la Tusi Hmitrötr, ke kola acatrene la lapaune së me xatua së troa “ate Akötesie” hnyawa.​—It. Ed. 2:​4, 5. w23.10 18-​19 par. 3-5

Ame la Peteru aposetolo a qaja lai, ke kolo hi lai a hape, “ka kökötr.” Ame ngöne la hnaaluene götrane la xötr, kola qaja la thangane la ihnim cili. Ej a he la nöjei ngazo ne la itre trejin. Tro sa xom la ketre ceitun: Maine jë hetre laulau i easë hna sijasija. Matre easa xom la ketre imaano me seluth hune la laulau. Tha eje kö a heetrëne la cas maine lue hna sijasija, ngo ej a heetrën asë. Ketre tune mina fe, e ka catr la ihnimi së kowe la itre trejin, tro së lai a “he [maine nu] la nöjei pengöne ngazo.” Loi e troa catr la ihnimi së kowe la itre trejin, matre tro sa atreine nue la ngazo i angatr, ngacama ame itre xaa ijin, tha ka hmaloi kö. (Kol. 3:​13) Ame la easa nue la ngazo i itre xan, easë hi lai a amamane ka hape, ka catr la ihnimi easë, nge aja së troa amadrinë Iehova. w23.11 11-​12 par. 13-​15

Ame lo kola 26 lao macatre i Iosea joxu, hnei angeic hna nyiqane nyihnyawane la uma ne hmi. Ame ngöne la ijine cili, hna öhne la “Tusi Wathebo i Iehova, lo hna hamën jëne Mose.” Ame la joxu a dreng la kola e la tusi cili, ke hnei angeic hna canga trongëne la hna qaja hnene la wathebo. (2 Aq. Jo. 34:​14, 19-​21) Ajane kö eö troa e lapane la Tusi Hmitrötr? Maine celë hi hnei eö hna kuca, ka madrine kö eö? Nemene la aqane tro eö a canga xolouth la itre xötr ka troa xatua eö? Ame lo Iosea a 39 lao macatre, hnei angeic hna kuca la ketre ewekë ka ngazo matre meci pi hi angeic. Tha hnei angeic kö hna pane thel troa atre la mekuna i Iehova, ngo hnei angeice pe hna ketre kuci mekun. (2 Aq. Jo. 35:​20-​25) Nemene la ini koi së? Jeune ju hë së maine qatr, ka xötrei ini Tus Hmitrötr maine ka hekö hë, ngo loi e tro palahi sa thel la mekuna i Iehova. Haawe, loi e tro sa sipo Iehova troa eatrongë së, me inine la Tusi Hmitrötr me thele ixatua thene la itre trejin ka macaj. Ame hë e cili, tro sa atreine neëne la itre ewekë ka ngazo me mele madrin.​—Iako. 1:​25. w23.09 12 par. 15-​16

Alanyim la itre föe ka hnim, me nyihlue i Iehova, hna qaja e hnine la Tusi Hmitrötr. Itre föe lai ka “atreine tulu ewekë, me nyipici ngöne la nöjei götran asë.” (1 Tim. 3:​11) Ketre, hetre trejin föe ka macaj ngöne la ekalesia, nge loi e tro la itre trejin jajinyi a xomi ini qaathei angatr. Itre trejin jajiny, hetre trejin föe kö hnei epuni hna atre, ka amamai tulu me hetre thiina ka loi? Nga nyitipu angatre jë. Thele jë la aqane tro fe epuni a huliwan la itre thiina ka ej thei angatr. Ame la trejin föe ka macaj, ke ka ipië. Ame la föe ka ipië ke, ka loi la aqane imelekeu i angeic me Iehova, memine la itre xan. Hnene la ihnimi angeic koi Iehova, matre angeic a metrötrën la itre atr hna acil. (1 Kor. 11:3) Celë hi hnei angeic hna kuca ngöne la ekalesia me ngöne la fami angeic. w23.12 18-​19 par. 3-5

Iehova a ajan tro la itre trahmanyi a hnim la itre föi angatr, me thupë nyudren, me acatrene la aqane imelekeu i nyudren me Nyidrë. Eje hi, nyipiewekë tro la trahmanyi ka faipoipo a atreine waiewekë, me metrötrën la itre föe, me ketre atr hna mejiune kow. Thupene la faipoipo, ijije hi tro eö a hetre nekönatr. Nemene la itre ini nyine tro eö a xom qaathei Iehova, matre xom hnyawa la hnëqa ne kem? (Efe. 6:4) Hnei Iehova hna qaja amamane la ihnimi Nyidrë me madrine i Nyidrë koi Iesu. (Mat. 3:​17) Eje hi, loi e tro la kem a qaja amamane la ihnimi nyidrë kowe la itre nekö i nyidrë. Nge tha tro kö nyidrëti a cil troa qaja aloinyi angatr. Ketre, nyidrëti a nyitipu Iehova la nyidrëti a xatuane la itre nekö i nyidrë troa macaj ngöne la huliwa i Akötresie. Ame la ketre aqane troa hnëkë kowe la hnëqa cili, ke ene la troa amaman enehila, la ihnim me madrine i eö kowe la fami eö me kowe la ekalesia.​—Ioa. 15:9. w23.12 28-​29 par. 17-​18

Easë asë hi a cile kowe la itre itupath me itre sine mec. Ketre, pine laka itre Temoë Iehova së, easa qëmeke kowe la icilekeu me iaxösisi qaathene la itre atr ka xele ma wai së. Tha Iehova kö a apatrene la itre jole cili. Ngo ase hë Nyidrëti qaja ka hape, tro kö Nyidrëti a xatua së. (Isa. 41:10) Jëne la ixatua i Nyidrë, tro sa madrin, me atreine axecië mekune hnyawa, me mele nyipici koi Nyidrë, ngacama tru catr la itre itupath.Ase hë Iehova qaja ka hape, tro kö Nyidrëti a hamë së, la “tingetinge qaathei Akötresie.” (Fil. 4:​6, 7) Ame cili, kola lapa hnyawa la hni së, ke ka lolo la aqane imelekeu së me Iehova. Tingetinge lai “hna thatreine trotrohnine hnei atr,” nge ka sisitria. Ase hë epuni drenge la kola tingetinge la hni epun, thupene la hnei epun hna thith? Celë hi hna hëne ka hape, “tingetinge qaathei Akötresie.” w24.01 20 par. 2; 21 par. 4

Ihnim koi Iehova, la ka ukune la itre hlue i Nyidrë troa atrune la ëje i Nyidrë qa kuhu hni.Trotrohnine hi Dravita joxu laka, ame la easa atrune la ëje i Iehova, ke easë hi lai a atrunyi Nyidrë. Ame la easa dreng la ëje i Iehova, ke canga mama hi koi së la pengöi Nyidrë, me itre thiina i Nyidrë me itre huliwa ka men i Nyidrë. Atre hi Dravita laka, ka hmitrötr la ëje i Nyidrë, matre aja i angeic troa atrune ej. Celë hi aja ka ej e kuhu ‘hni’ angeic. Celë fe hi hna kuca hnene la itre nekö i Levi. Atre hi angatr ka hape, tha ijije kö la itre trengewekë i angatr troa atrune la ëje ka hmitrötr i Iehova. (Neh. 9:5) Ame pe, hnene la itre trengewekë i angatr ka qa kuhu hni hna amadrinë Iehova. w24.02 9 par. 6

Tha tro kö Iehova a nuaxöji epun, ke tha hnei epuni kö hna eatrëne la mekuna i epun, nge ketre tha ijiji epuni kö. (2 Kor. 8:​12) Maine tha eatrëne ju kö epuni la mekuna i epun, ke xomi ini jë qa ngön. The thëthëhmine kö la itre mekun hnei epuni hna eatrëne hë. Öni Tusi Hmitrötr, “Ka meköti pala hi Akötresie, matre thatreine kö nyidrëti thëthëhmine la itre huliwa së.” (Heb. 6:​10) Haawe, ketre tui easë mina fe, tha tro kö sa thëthëhmine la itre hne së hna kuca. Lapa mekune jë la itre hnei epuni hë hna kuca, maine jë la aqane acatrene epun la imelekeu i epun me Iehova, me nyiqane qeje Nyidrë koi itre xan, maine xomi bapataiso pena. Maine ase hë epun eatrëne la itre xaa mekuna i epun ngöne la huliwa i Iehova, ke ijiji epuni hi troa hane eatrëne la mekuna i epuni enehila. Jëne la ixatua i Iehova, ijiji epuni hi troa eatrëne la mekuna i epun. Ame la epuni a isine troa eatrëne la mekuna i epun, xomi ijine jë troa goeëne la aqane xatua epun me amanathithi epuni hnei Iehova. (2 Kor. 4:7) Maine tro epuni a catr, ke tro epuni lai a kapa la itre manathith ka tru hmaca kö.​—Gal. 6:9. w23.05 31 par. 16-​18

Tha cile kö Iehova troa amamane la madrine i Nyidrë, kowe la itre hnimina i Nyidrë. Alua qeje Iesu hnei Nyidrë ka hape, Nekönge hniminang, eni a madri nyën. (Mat. 3:​17; 17:5) Aja i eö fe kö troa drenge la Iehova a qaja ka hape, ‘Ka madrine ni koi eö’? Tha tro kö Iehova a ithanata meköti koi eö, ngo tro pe Nyidrëti a ithanata jëne la Tusi Hmitrötr. Tro eö a dreng la Nyidrëti a qaja ka hape, Nyidrëti a madrine koi eö, la eö a e la itre trenge ithanata i Iesu, ngöne la itre Evangelia. Ka ceitune hi la pengöi Iesu me Keme i nyidrë. Anyimua qaja Iesu kowe la itretre dreng ka hape, nyidrëti a madrine koi angatr, ngacama tha ka pexeje kö angatr. Ame la eö a e la itre hna qaja hnei Iesu, ke kösë Iehova hi lai a ewekë koi eö. (Ioa. 15:​9, 15) Maine kola traqa koi eö la itre itupath, tha kolo kö lai a hape, tha madrine hë Iehova koi eö. Itre ijine lai, tro eö a amamane la etrune la ihnimi eö me mejiune i eö koi Nyidrë.​—Iako. 1:​12. w24.03 28 par. 10-​11