Hnei Angatr Hna ‘Öhne La Ketre Penina Ka Tru Alameken’

“Kola nyenyape ithepene la baselaia ne hnengödrai, nge ame hna thapa pi hnene la itete cat.”​—MATAIO 11⁠:⁠12.

HETRENYI kö la ketre ewekë hnei nyipunieti hna piin, ene pe nyipunieti a nue la mele i nyipunie matre troa thele ej, me nue la itre mo i nyipunie matre troa kapa la ewekë cili? Hna qaja hnene la itre xan ka hape, angatr a kuca asë la hnei angatr hna atrein matre troa aejën la itre hnei angatr hna ajan: maine troa trene mani, troa hlemu e cailo, troa mus, maine troa cilën la ketre götrane qa ka tru ngöne la nöj; ngo xalaithe hi la itre atr ka nue asë la itre hnei angatr hna hetreny, matre troa kapa pena ha la ketre ewekë ka tru alameken. Hnei Iesu Keriso hna qaja la thiina ka sisitria cili hna piin, ngöne la ketre ceitun ka tru aliene catr hna hamën göne la Baselaia i Akötresie.

2 Celë hi ketre ceitune lai hnei Iesu hna hamëne kowe hmekuje hi la itretre drei nyidrë; hna majemine hën la ceitune cili, ka hape, ceitun ne la penina ka tru alameken. Drei la hna qaja hnei Iesu, kola hape: “Ame la baselaia ne hnengödrai, te, tune la ate itö, kola thele la ite penina ka lolo; nge öhne hë angeice la kete penina ka tru alameken, ame hnei angeice hna tro me itöne la ite ewekë i angeice asë nyine thupen’ ej.” (Mataio 13⁠:​36, 45, 46) Jëne la ceitune celë, nemene la ini hnei Iesu hna ajan tro la itre ka drei nyidrëti a kapa? Nge nemene la aliene ej koi së enehila?

1, 2. (a) Nemene la thiina ka sihngödr hnei Iesu hna pi amamane jëne la ketre ceitun ka qaja la Baselaia? (b) Nemene la hnei Iesu hna qaja jëne la ceitun hna hamën ngöne la penina ka tru alameken?

Esisitrian La Itre Penina

3 Ekö catre hë la itre atr wangatrune la itre penina ceitune me itre ewekë ka sisitria nyine troa thaip. Kola mama ngöne la ketre itusi la hna qaja hnei Pline, ketre atr ka inamacan ne Roma göne la itre penina, ka hape, itre eje la “ka tro pa hune la itre xaa ewekë ka tru alameken.” Thaa ceitune kö la itre penina memine la gool, me manie maine itre xaa etë ka tru alamekene pena; ame la itre penina, tre, ka xulu itre ej qaathene la itre hna xup ka mel. Atre hnyawa hi së lo pengöne lo itre xaa fizi, laka, atreine hi tro itre ej a calothe la ketre wene ngöni me pelethe ej hnei wenge xötre iëz uti hë la nyi penina. Hetrenyi ekö la itre penina ka mingöminge catr, ngöne la itre götran hna hape, Hnagejë Ka Palulu, me golfe Persique, me océan indien, itre hnagejë lai ka nanyi qaa Isaraela. Celë jë hi kepine lai matre hnei Iesu hna qaja la ketre ka salem “ka tro” troa “thele” la itre penina ka lolo. Ame la atr ka ajan troa öhnyi penina ka tru alameken, tre, loi e tro angeic a catr.

3. Pine nemene matre sisitria catr la itre penina ka mingöming ngöne la itre hnedrai ekö?

4 Eje hi lai laka, ka tru thupene catre pala hi la itre penina ka lolo, nge hna ithanatane atrun la thupene itre ej, ngo thaa hnene kö la etrun la thupene itre ej la Iesu a hamëne la ceitun. Ame ngöne la ceitune celë, thaa Iesu kö a aceitunëne la Baselaia i Akötresie memine la penina ka tru alameken; nyidrëti pe a pi amamane hnyawa la pengöne la “ate itö kola thele la ite penina ka lolo” memine la madrine i angeic ngöne la kola öhne la caa penina. Thaa ceitui angeice kö memine la ketre trene setroa; ka atreine angeic wanga atrehmekune la penina ka lolo, nge maca la lue meke i angeic troa atrehmekune la itre eloine me itre hnepe götrane ka sihngödre ne la penina. Acaa tro hi angeic a goeën la nyipi penina, thaa tro jë kö angeic a imenun la penina ka lolo memine la penina ka ngazo.

4. Nemene la ini ka sisitria hna xome qa ngöne la ceitune i Iesu göne la atre salem?

5 Hetrenyi mina fe la ketre ewekë ka lolo thene la atre salem: hna majemine hnene la itre ka salem troa pane goeën la etrune la thupene la penina qëmekene troa itöne ej, matre troa salemëne pena me kepe thupen. Maine jë tro fe angeic a pane wange la etrune la itre ka ajan troa itö, ketre, matre troa canga salemën e ijine petre kö. Eje hi lai laka, ame la aja i angeic, tre, thaa ene kö la troa hetrenyi la penina cili, ngo troa canga salemëne hmaca matre troa hetre hna kapa qa ngön. Ngo thaa ceitune kö memine la atre salem ne la ceitune i Iesu. Ame la ka nyipi ewekë, ke thaa ene kö la troa hetre manie qa ngön maine ketre ewekë pena. Ohea, angeice pe a nue la ‘nöjei ewekë asë i angeic’, maine jë itre sipu mo i angeic, tune la dro i angeic, matre troa kapa lo lai ewekë hna nyinyape thel.

6 Tro jë la itre ka salem a mekune ka hape, ka pë inamacanen lo lai atr ne la ceitune i Iesu. Thatreine kö troa canga sesë troa itö hnene la atr ka salem ka macamek. Ngo isapengöne kö lai memine la ewekë hna wanga atrun hnene la atre salem ne la ceitune i Iesu. Thaa manie kö la hna kapa, ngo kolo pe a atraqatr la madrine i angeic troa hetrenyi la ketre ewekë ka tru alamekene catr. Kola mama hnyawa la mekune cili ngöne la ketre ceitun hna hamën hnei Iesu ka ihmeku memine lo lai ceitun ne la atre salem; öni Iesu ka hape: “Ame la baselaia ne hnengödrai, te, tune la tenga mo hna juetëne ngöne la hlapa; hna öne pena hnei kete at, ame hna juetënepi hnei angeic; ame hnei angeice hna troju me itöne la nöjei ewekë asë i angeice ke madinë hë, me itöne la hlapa cili.” (Mataio 13⁠:44) Atraqatre catre pala ha la madrine ne la atr qa ngöne la hnei angeic hna öhne la ketre trenga mo nge trenge nyi angeice hë, ene pe angeice a nue asë la itre hnei angeic hna hetreny. Hetrenyi kö la itre atr ka tune lai enehila? Hetrenyi kö la ketre trenga mo ka tru hna troa piin hne së, ene pe easë a troa nue asë la itre nyi së?

5, 6. (a) Nemene la aqane ujë ka lolo thene la atre salem ne la ceitune i Iesu? (b) Ame göi trenga mo hna juetrën, nemene la hna amamane hnene la ceitune cili, ngöne la hna nyipi thel hnene la atre salem?

Thaa Sihngödre Kö Koi Angatr La Esisitrian La Baselaia

7 Ame ngöne lo Iesu a qaja la ceitune celë, nyidrëti lo a ithanatan la “baselaia ekoho hnengödrai.” Ka xecie hnyawa fe koi nyidrëti laka, ka tru alamekene la Baselaia. Kola anyipicine lai hnene la itre Evangelia. Thupene la hna bapataiso nyidrë ngöne lo macatre 29 M.K. hnei Iesu hna “qane lai troa cainöj, ka hape, Ietraju nyipunie, ke eashenyi hë la baselaia ne hnengödrai. ” Köni macatre nge sin ne inine nyidrë la itre atr la pengöne la Baselaia. Hnei nyidrë hna “trongëne la nöjei lapa, me nöjei hnalapa, kola cainöjën, me amamane la maca ka loi ne la baselaia i Akötesie.”​—Mataio 4:​17; Luka 8⁠:⁠1.

7. Tune kaa la aqane amamane Iesu laka xecie hnyawa koi nyidrëti la esisitriane la Baselaia?

8 Hnei Iesu hna kuca la itre iamamanyikeu tune lo kola aloine la meci ne la itre ka wezipo, me ithuane la itre ka mecijiin, me musi hune la itre ewekë tune la eny, me amelene la itre ka mec; Jëne la itre iamamanyikeu cili, nyidrëti a amamane la itre hna troa kuca elanyi hnene la Baselaia. (Mataio 14⁠:​14-​21; Mareko 4:​37-​39; Luka 7:​11-​17) Thupene lai, hnei nyidrëti hna amamane la aqane mele nyipici nyidrëti koi Akötresie me kowe la Baselaia, ngöne laka, hna axösisi nyidrë nge hnei nyidrëti hna meci hune la sinöe. Tune lo atre salem laka hnei angeic hna nue asë la itre trenge nyi angeic matre troa hetrenyi la “penina ka lolo,” haawe, hnei Iesu mina fe hna mel me meci thatraqane la Baselaia.​—Ioane 18⁠:⁠37.

8. Nemene la aqane amamane Iesu la itre hna troa kuca elanyi hnene la Baselaia?

9 Hnei Iesu hna ketre sipu nue hnyawa la mele i nyidrë thatraqane la Baselaia, nge hnei nyidrëti fe hna iacaasinekeun la ketre hnepe gurup ne la itretre drei nyidrë. Ka xecie hnyawa mina fe kowe la itre atr cili la esisitrian la Baselaia. Anederea la ketre e angatr, angeice hi lo ketre atre drei Ioane bapataiso. Ame ngöne lo angatr a drei Ioane e qejepengöne ka hape, “Arenio i Akötresie,” canga tro hi Anederea memine la ketre atre drei Ioane (maine jë ketre nekö i Zebedaio hna hëne fe ka hape Ioane), nge lue xaa ka lapaune fe hë nyidro. Ngo thaa hna nyipune kö e cili. Hna tro nyimenyime hnei Anederea troa wang la trejine me angeic, ene Simona me qaja koi angeic ka hape: “Öhnë hë huni la Mesia.” Thaa hmitre ju kö nge kolo fe hë a hane wanga atrehmekunyi Iesu ceitu me Mesia hnei Simona (lo hna hëne pë hë thupen ka hape Kefa, maine Peteru), me Filipo, memine la enehmu i angeic, Nathaniela la ëjen. Ene pe canga öni Nathaniela jë hi koi Iesu ka hape: “Cilieti la Hupuna i Akötesie ; cilieti la Joxu ne Isaraela.”​—Ioane 1:​35-​49.

9. Nemene la thiina ka lolo hna eën hnene la itre pane atr ka xötrethenge Iesu ekö?

Hna Uku Angatr Troa Huliwa

10 Kola troa ceitu la aqane madrine i Anederea me Peteru me Ioane, me itre xane ju kö, memine la madrine ka eje thene lo atre salem ka öhne la ketre penina ka tru alameken. Nemene la hnei angatr hna troa kuca enehila? Thaa hna edromëne kö hnene la itre Evangelia la hnei angatr hna canga kuca thupene lo hnei angatr hna xötrei iöhnyi me Iesu. Kola mama laka, ala nyimu la itre ka bëeke hmaca kowe lo itre hnei angatr hna majemine kuca. Thupene hë la sikisi lao treu kola easenyi troa caa macatre, hnei Iesu hmaca hna bëeke troa wai Anederea me Peteru me Ioane, me Iakobo lo trejine me Ioane; angatr a huliwa ngöne la ezine la Hneopegejë ne Galilaia.a Ame la nyidrëti a öhnyi angatr, öni nyidrëti koi angatr ka hape: “Xöte thenge ni jë, nge tro ni a celohmë nyipo nyine axena at.” Nemene la hnei angatr hna sa? Kola qaja hnei Mataio göi Anederea me Peteru, ka hape: “Hnei nyidoti hna canga nue pe la ite eöt, me xöte thenge nyidë.” Ame koi Iakobo me Ioane, easë a e ka hape: “Hnei nyidoti hna canga nue pe la he me keme i nyido me xötethenge nyidë.” Hnei Luka hna anyipicine lai, öni angeic ka hape hnei angatr hna “nue pe la nöjei ewekë asë, me xöte thenge nyidë.”​—Mataio 4:​18-​22; Luka 5:​1-​11.

10. Ame ngöne la Iesu a bëeke hmaca thupene lo hnei angatr hna pane iöhny, nemene la aqane ujë ne la itretre dreng ngöne la nyidrëti a hë angatr?

11 Hapeue la aqane ujë ne la itretre dreng, thaa hane ju kö angatre thele troa mekun me axeciën? Ohea! Maine nyipici laka, hnei angatr hna bëeke hmaca troa ce huliwa memine la fami angatr troa nyi ie, ngo hna ketr hnyawa la mekune me hni angatr hnene la itre hnei angatr hna öhn me dreng. Maine jë ame lo lai itre treu qëmekene troa hnaaluene hë angatr hnei Iesu, tre, hnei angatr hna pane mekune hnyawa la nyine tro angatr a kuca. Ngo enehila, ijine tro hë angatr a axecië mekun. Tro kö angatr a ujë tune lo atre salem ka madrin qa ngöne laka hna öhne la ketre penina ka lolo, nge tune la hna qaja hnei Iesu, hnei angeic hna “[“canga,” MN] tro” troa kuca asë la hnei angeic hna atrein matre troa itöne lai penina? Eje hi. Hna ketr la itre hni angatr, hnene la itre hnei angatr hna öhne me dreng. Angatr a trotrohnine laka, traqa ha la ijine troa enij. Celë hi matre, tune la hna qaja hnei tus, thaa luelue kö angatr troa nuetrije la itre hnei angatr hna majemine kuca, me hane xötrethenge Iesu matre troa itretre drei nyidrë.

11. Nemene la ka qejepengöne hnyawa la aqane canga kapa la itretre dreng la ihë i Iesu?

12 Drei la eisapengönen la itre thupëtresiji celë ka lapaun, memine la itre xan hna qaja pë hë e thupen hnene la itre evangelia! Ala nyimu angatr itre hna aloine mecin me ithuan hnei Iesu, ngo hnei angatre pala hi hna lapa ngöne lo itre ewekë hnei angatr hna majemine kuca. (Luka 17⁠:​17, 18; Ioane 6:​26) Ame itre xan, tre hnei angatr hna thipën la Iesu a hë angatr troa hane xötrethenge nyidrë. (Luka 9:​59-​62) Ka isapengöne catre kö memine la itretre drei nyidrë; hnei Iesu pë hë hna qaja thupen, ka hape: “Qane ngöne la nöjei drai Ioane bapataiso uti hë enehila kola nyenyape ithepene la baselaia ne hnengödrai, nge ame hna thapapi hnene la itete cat.”​—Mataio 11⁠:⁠12.

13 “Nyenyap”; nemene la aqane troa trotrohnine la hnëewekë celë? Kola qejepengöne hnene la ketre itus (Vine’s Expository Dictionary of Old and New Testament Words) la alien la hnëewekë qene heleni ka ujëne la nyenyap, “kola qaja la itre trenge catr hna kuca.” Drei la hna cinyihane hnei Heinrich Meyer, ketre atr ka thele ewekë e hnine la Tusi Hmitrötr, nyidrë a ithanatane lai xötr, kola hape: “Celë hi aqane qaja la hna isin me hna catre kuca cememine la hni ne aja nge thatreine kö troa xomehnöth, ngöne la kola xei kowe la Baselaia i Akötresie laka calemi hë . . . Haawe, hnei hni ka ajan me hni ka catr (ngo thaa hni ka meije kö nge ka lapa itreqe) la kola thele ielen la baselaia.” Ceitune la itre atr cili memine lo atre salem, laka, hnei angatr hna canga atrehmekune la ewekë ka sisitria catr, ene pe angatr a nue asë pi la itre hnei angatr hna hetrenyi thatraqane la Baselaia.​—Mataio 19⁠:​27, 28; Filipi 3⁠:⁠8.

12, 13. (a) Tune kaa la aqane ujë la itre atr ka ala nyimu ka drei Iesu? (b) Nemene la hnei Iesu hna qaja göne la itretre drei nyidrë ka mele nyipici, nge nemene la aliene la itre trenge ewekë cili?

Itre Xan a Hane Thele La Baselaia

14 Ame hë ngöne la Iesu a cainöje trootro, hnei nyidrëti hna inin la itretre drei nyidrë me xatua angatr troa ajane me thele la Baselaia. Hnei nyidrëti hna pane iën la truelof qa ngöne la itretre drei nyidrë me acili angatr troa aposetolo, kola hape itre hna upe hnei nyidrë. Hnei Iesu hna hamëne koi angatr la itre ini ka nyimutre ngöne la aqane troa xome la huliwa ne cainöj, nge hnei nyidrëti fe hna hmekë angatre pine la itre jole hnei angatr hna troa cile kow. (Mataio 10:​1-​42; Luka 6:​12-​16) Lue macatre ne angatr a ce tro me Iesu ngöne la nyidrëti a cainöj ngöne la nöj, celë hi matre lolo catre la aqane imelekeu i angatr me nyidrë. Hnei angatr hna drenge la itre hnei nyidrëti hna qaja, me öhne la itre iamamanyikeu hnei nyidrëti hna kuca, nge hnei angatre fe hna goeën la tulu i nyidrë. (Mataio 13⁠:​16, 17) Celë hi matre hna ketr la mele i angatr; kola mama pë hë hnene la aqane thele ielene angatr la Baselaia hnene la hni ka pexej, kola xome lo aqane ujë ne lo atre salem.

14. Tune kaa la aqane hnëkëne Iesu la itre aposetolo thatraqane la huliwa ne cainöjën la Baselaia, nge nemene la thangan?

15 Hnei Iesu hna thele la itre xaa ka troa cainöj, matre troa nyi xane lo 12 lao aposetolo; hnei nyidrëti hna “iëne la ite xa ate ala köniate nge luepi, me upi angate isa ala lue troa tro pa kowe la nöjei lapa me nöjei hnepe lapa, la hnei nyidëti hna troa jötëti kow.” Hnei nyidrëti fe hna hane qaja koi angatr la itre jole hnei angatr hna troa cile kow, me upi angatr troa qaja kowe la itre atr ka hape: “Easenyi hë koi nyipunie la baselaia i Akötesie.” (Luka 10:​1-​12) Ame la kola bëeke hmaca la ala 70, atraqatre catr la madrine i angatr, nge angatr a qaja la thangane la huliwa i angatr me hape: “Joxu fe, ite demoni fe a dei huni hnene la atesiwa i cilie.” Ngo maine jë angatr a sesëkötr la aqane sa i Iesu, pine laka hnei nyidrëti hna qaja amamane ka hape, tro pala kö angatr a hetrenyi la ketre madrine ka sisitria catr nyine thupene la hnei angatr hna catre huliwa kowe la Baselaia. Öni nyidrëti koi angatr ka hape: “The madine kö qa ngöne la hna dei nyipunie hnene la ite [“ua,” MN] loi pe madine jë qa ngöne la hna cinyihane la ite ëje i nyipunie e hnengödrai.”​—Luka 10⁠:​17, 20.

15. Thenge la hna qaja hnei Iesu, nemene la nyine troa pane madrine kow hnene la itretre dreng?

16 Ame hë ngöne la jidri tixenuë i Iesu memine la itre aposetolo i nyidrë, ngöne lo 14 Nisan 33 M.K., hnei Iesu hna acile lo hne së hna hëne pë hë enehila, ka hape Pui Ne Xeni Ne La Joxu, nge hnei nyidrëti hna iupi troa atrune la ijine cili. Ame ngöne la jidri cili, hnei Iesu hna qaja kowe la ala levin ka lapa pe, ka hape: “Nyipunie la angete cile huti thenge ngöne la hna tupathi ni. Nge ini a hamëne koi nyipunie la baselaia, tune lo hnei Angakakati hna hamëne koi ni ; mate tro nyipunie a xeni me iji ngöne la laulaunge ngöne la baselaiang, me lapane la ite therone kola amekötine la ite tribu i angete Isaraela ka luako.”​—Luka 22⁠:​19, 20, 28-​30.

17 Pane mekune ju la madrine ka eje e kuhu hni ne la itre aposetolo, ngöne la angatr a drei Iesu e qaja la itre trenge ewekë cili! Kola troa hamë angatr la ketre iatruny me ketre manathithi ka sisitria hna thaa hane kö kapa hnene la itre atr. (Mataio 7:​13, 14; 1 Peteru 2⁠:⁠9) Tune la atre salem, hnei angatr hna nue la itre hnei angatr hna ajan matre troa xötrethenge Iesu, me thele la Baselaia. Enehila, xecie hnyawa ha laka, thaa ka gufa kö lo itre ewekë hnei angatr hna kuca ha.

16, 17. (a) Nemene la hnei Iesu hna qaja kowe la itre aposetolo i nyidrë ka mele nyipici ngöne lo jidri tixenuë i nyidrë me angatr? (b) Nemene la madrin me ewekë ka xecie hna kapa hnene la itre aposetolo jëne la itre trenge ewekë i Iesu?

18 Thaa ene hmekuje kö lo lai itre aposetolo ka ce me Iesu ngöne la jidri cili, la itre ka troa kapa la itre manathith qa ngöne la Baselaia. Hnei Iehova hna amekötin troa hane lö la ala 144 000 lao atr hnine la isisinyikeu kowe la Baselaia, matre troa ce musi me Iesu Keriso hnine la Baselaia ka draië e koho hnengödrai. Ketre, hna meköle goeën hnei Ioane aposetolo la “ka ala nyimu atraqat, lo ka tha ’teine kö kete ate e, . . . kola cile qëmeke ne la theron, me qëmeke ne la Arenio, . . . angat’ a qaja catën, ka hape: ‘Ame la mele, te, qa thei Akötesi shë, ate tuenietine la theron, me qa thei Arenio.’ ” Kolo hi lai a qaja la itre jinine la Baselaia.b​—Hna Amamane 7:​9, 10; 14:​1, 4.

18. Drei mina fe e tröne la itre aposetolo, la itre ka troa hane kapa la itre manathith qa ngöne la Baselaia?

19 Thaa qea kö qëmekene tro Iesu a elë hnengödrai eë, nyidrëti a upe la itretre drei nyidrë ka nyipici me hape: “Qa ngöne lai, tro jë nyipunie a inine la nöjei nöj’ asëjëihë, me bapataiso angat kowe la atesiwa i Tetetro me Hupuna me uati hmitötr ; ini angate jë troa trongëne la nöjei ewekë asëjëihë lo hnenge hna ahnith koi nyipunie ; nge hanawang, ini a ce me nyipunie ngöne la nöjei drai asëjëihë uti hë la pune la fene hnengödrai.” (Mataio 28⁠:​19, 20) Celë hi matre tro fe hë la itre atr e cailo ngöne la nöjei nöj, a hane itretre drei Iesu Keriso. Tro angatre fe a hane huliwa meci kowe la Baselaia, maine kepe thupene e hnengödrai maine e celë fene pena, tune la aqane huliwa meci ne lo atre salem ka thele troa hetrenyi la penina ka lolo.

20 Itre trenge ewekë i Iesu a amamane laka ame la huliwa ne troa inine la itre atr, tre troa sisedrëne ej uti hë “la pune la fene hnengödrai.” Hetrenyi kö ngöne la hneijine së la itre atr ka tune lai atre salem, ange ka ajane troa nue asë la itre hnei angatr hna hetreny, matre troa thele la Baselaia i Akötresie? Tro pë hë së a sa la hnyinge celë ngöne la hna ithanata ka troa xulu.

19, 20. (a) Nemene la hna aijijëne kowe la itre atr ne la nöjei nöj? (b) Nemene la hnyinge hna troa sa ngöne la ithanata së ka troa xulu?

Atreine Kö Nyipunie Qeje Pengön?

• Nemene la ini ka sisitria tro sa xome qa ngöne la ceitun ne la atre salemë penina?

• Tune kaa la aqane amamane Iesu laka ame koi nyidrë, ka tru alamekene catr la Baselaia?

• Nemene la kepin matre canga xötrethenge Iesu hi hnei Anederea, me Peteru, me Ioane me itre xan, ngöne lo kola hë angatr hnei Iesu?

• Nemene la ewekë hna aijijën kowe la itre atr ne la nöjei nöj?