Iehova a Amamane La Pune Qa Ngöne La Qaan
“Ate amamane la pune qa ngöne la qan; nge kola qaja ekö la ite ewekë ka tha hna kuca pete kö; kola hape, Troa cile huti la musing, nge tro ni a kuca asë la ajang.”—ISAIA 46:10.
1, 2. Nemene la hne së hna hain göne la itre ewekë hna troa ce apatren me Babulona, nge nemene la hnene la itre ewekë cili hna amamane göi Iehova?
JIDRI ka pexeje hë, nge kola tro zae hnene la itre sooc ngöne la xötre öline la hneopegejë ne Euferata; caasi hi la hna goeën hnene la itre sooc, Babulona, ketre traone ka catr. Angatr a easenyi trootro kowe la traon, nge angatr a pane cile me hai, hetre ketre ewekë. Hna fe angangane la lue iqëhnelö ne la traon! Ase hë angatr sasaith la hneopegejë, angatr a elë jë kowe la traon me lö e hnin. Thaa jole ju kö e troa thapa ej. Canga cile hi e cili la musi Koreso, tane la itre sooc, nge ame pë hë thupen, nyidrëti a nue gojenyine pi lo itretre Isaraela ka po e Babulona. Ene pe alanyimu la itre ka bëeke hmaca, itre thauzane la etrun, troa acile hmaca la hmi Iehova e Ierusalema.—2 Aqane Lapa i Ite Joxu 36:22, 23; Ezera 1:1-4.
2 Ame hë enehila, kola jelenyipicine hnyawa lai itre ewekë ka traqa ekö ngöne la itre macatre 539 koi537 M.P.K., hnene la itre ka qejepengöne la aqane trongene la mele ne la atr me nöj. Ame la ketre ewekë hna hain, tre, ekö petre kö ahnithe lai itre ewekë cili qëmekene tro itr’ ej a eatr, 200 lao macatre qëmeken. Hnei Iehova hna upi Isaia perofeta troa canga qejepengöne la aqane troa kei hnei Babulona. (Isaia 44:24–45:7) Thaa Akötresieti hmekuje kö a canga ahnith amë la aqane troa thepe Babulona, ngo ene mina fe la ëje ne la ka tane isi ka troa lepe la traon.a Hnei Iehova hna qaja kowe lo angetre Isaraela ka anyipici Nyidrëti ekö, ka hape: “Mekune jë lo ite ewekë hnapane ekö ; ke ini Akötesie, nge pëkö kete ; Akötesie, nge pëkö ka tung ; ate amamane la pune qa ngöne la qan ; nge kola qaja ekö la ite ewekë ka tha hna kuca pete kö ; kola hape, Troa cile huti la musing, nge tro ni a kuca asë la ajang ; ate hëne la öni ka sheshë ka pi öni qa kohië, qa ngöne la nöje qa nany, lo ate hnenge hna musinën, ase hë ni qaja, nge tro ni a aeaten’ ej ; ase hë ni hne i hnin, nge tro ni a kuca ej. Ate amamane la pune qa ngöne la qan ; nge kola qaja ekö la ite ewekë ka tha hna kuca pete kö.” (Isaia 46:9, 10a) Iehova hnyawa hi la Akötresie ka ijije troa canga atre la itre ewekë ka troa traqa.
3. Nemene la itre hnying nyine tro sa thele troa sa enehila?
3 Nemene la aqane amamane la hnei Akötresieti hna atre göne la itre drai elany? Hapeu, canga atre hi Iehova la itre hne së isa ala caas hna troa kuca elany? Nge tune kaa, hna ahnith amë hë la pengö së elany? Tro sa ce wange la aqane sa hnene la Tusi Hmitrötr la itre hnyinge celë, ngöne la ini së enehila me ngöne la ini ka troa xulu.
3. Nemene la itre hnyinge nyine tro sa ce wang?
Iehova La Akötresi Ne La Itre Hna Perofetan
4. Drei la Qeqene la itre hna perofetan e hnine la Tusi Hmitrötr?
4 Pine laka canga atre hi Iehova la itre drai elany, haawe, hnei Nyidrëti hna upe la itre hlue i Nyidrë ngöne lo itre hneijine i Tusi Hmitrötr, troa cinyihane la itre hna perofetane ka nyimutre, ka aijijë së troa canga atre la hnei Nyidrëti hna mekune troa kuca. Hnei Nyidrëti hna qaja ka hape: “Hana wang, eatë hë la itre ewekë hnapan, nge ini a amamane la ite ewekë ka hnyipixe ; a tha cia pete kö it’ eje ini a pane amamane koi nyipunie.” (Isaia 42:9) Drei la ketre manathithi ka tru kowe la nöje i Akötresie!
5. Nemene la hnëqa ne la ketre atr ka canga atre la itre hnei Iehova hna troa kuca?
5 Kola qaja hnyawa koi së hnei Amosa perofeta, laka: “Tha tro kö Joxu Iehova a kuca la kete ewekë, maine tha hna pane amamane la hanengë i nyidë kowe la ite perofeta ite hlue i nyidë.” Ame koi itre ka canga kapa la atrehmekun, tre, hetre nyine tro fe angatr a kuca. Drei la ketre ceitune ka tru hna hamën hnei Amosa: “Ase hë ho la liona, dei la ate tha qouen?” Hna aceitunëne la itre perofeta, Amosa fe e hnin, memine la liona; ame la ej a ho easenyine la itre atr memine la itre öni, ene pe kola canga hmek hnei angatr; ame la itre perofeta, tre, angatr a canga qaja la itre trengewekë i Iehova. “Ase hë Joxu Iehova ulatin, dei la ate ka tha tro kö a perofeta?”—Amosa 3:7, 8.
Ka “Hetre Thangan” La “Trengewekë” i Iehova
6. Nemene la aqane tro loi la hnei Iehova hna “qaja” a ka ihmeku memine lo kola lepi Babulona?
6 Hnei Iehova hna qaja jëne Isaia, perofeta i Nyidrë, ka hape: “Ase hë ni qaja, nge tro ni a aeaten’ ej ; ase hë ni hne i hnin, nge tro ni a kuca ej.” (Isaia 46:10b) Ame la hnei Akötresieti hna “qaja,” laka, aja maine mekuana i Nyidrë göi Babulona, tre, ene la troa hë Koreso qaa Peresi matre troa lepe akeinyi Babulona. Ase petre kö Iehova ekö ahnithe la ewekë cili. Tune la hna amamane hë, kola eatre hnyawa lai ngöne la macatre 539 M.P.K.
7. Pine nemen matre easa mejiune laka tro pala hi a eatre hnyawa la “trenge ewekë” i Iehova?
7 Kola troa foa hadredre lao macatre qëmekene la tro Koreso a thepe Babulona, hnei Ieosafata Joxu ne Iudra hna isi memine la itre sooc ne Amona me Moaba. Hnei nyidrëti hna thithi me hape: “Iehova fe, Akötesieti ne la ite keme hun, hape u, tha enëtilai la Akötesi ne hnengödrai, nge ate musinëne la nöjei baselaia asë ne la nöjei nöj? Hape u, tha cate me mene la iwanakothemie i enëtilai, nge deti la ate cate hui enëtilai?” (2 Aqane Lapa i Ite Joxu 20:6) Hnei Isaia mina fe hna qaja la lapaune i angeic, kola hape: “Ase hë Iehova ne sabaothi hne i hnin, nge drei la atre troa atrian? Nge ime i nyidrë la hna xejë, nge drei la atr troa sa ej?” (Isaia 14:27) Ame ngöne lo kola loi hmaca hnei Nebukaneza Joxu ne Babulona, thupene lo hna traqa koi nyidrë la menu, haawe, hnei nyidrë hna pane ipië me atrehmekune laka: “Pëkö ate troa shawa la ime i [Akötresie], me hape koi nyidë, Nyidëti a kuci nemen? ” (Daniela 4:35) Iehova a ahnithe hnyawa kowe la nöje i Nyidrë ka hape: “[Ame la] tenge ewekënge . . . tha tro kö a hmaca gufa koi ni, loi pe tro ej’a kuca la ajang, me eate ngöne la ewekë hnenge hna up’eje kow.” (Isaia 55:11) Thatreine kö tro sa luelue, tro pala hi a eatr la “trenge ewekë” i Iehova. Pë qa mekuana i Akötresie ka thaa eatre kö.
Hnei Akötresie Hna “Hne i Hnine Ka Ekö Palua”
8. Nemene la hnei Akötresie hna “hne i hnine ka epine palua”?
8 Ame ngöne la tusi nyidrëti kowe la itre Keresiano ne Efeso, hnei Paulo aposetolo hna qeje Akötresieti ka hape, hetrenyi Nyidrë la ketre ewekë hna “hne i hnine ka ekö palua.” (Efeso 3:11) Thaa kolo kö la a qaja la ketre ewekë hnei Iehova hna mekune troa kuca, matre Nyidrëti a thele jëne la nöjei aqane troa eatrën. Ohea, ame lai hnei Iehova hna hne i hnin, tre, celë hi lo mekuana i Nyidrëti lai ekö ngöne la qaan, nge eje thei Nyidrëti la ajane troa eatrën ej thatraqane la atr memine la ihnadro. (Genese 1:28) Kola troa xatua së hnene la pane ewekë hna perofetan ekö e hnine la Tusi Hmitrötr, troa trotrohnine hnyawa la emelene la mekuana i Akötresie.
9. Nemene la aqane qaja Genese 3:15 la aja i Akötresie?
9 Kola amamane hnene la hna thingehnaeane ngöne Genese 3:15, laka, ame ju fe kö lo thupene kola eni wathebo hnei Adamu me Eva, Iehova fe hi a amekötine laka, tro lo organizasio ne la itre angela ka hmitrötr hna aceitunën memine la föe i Nyidrë, a hnahon la ketre matran, maine neköne trahmany. Canga öhne hë Nyidrëti la thangan la icilekeu ne la föe me Satana me itre matra i angeic. Ngo tro Iehova a nue la Matran la föe i Nyidrë troa akötr qa ngöne la hna athe la tidroca, nge ngöne la ijine hna sa hnei Nyidrë, tro la Matran a athe la he ne la un, maine Satana Diabolo. Ame ngöne la ijine cili, kola kökötre la mekuana i Iehova me mama trootro jëne lo itre xötre atr hnei Nyidrëti hna iën, uti hë la mama Iesu, lo Mesia hna thingehnaean.—Luka 3:15, 23-38; Galatia 4:4.
Aqane Axeciën Amë Iehova La Itre Ewekë
10. Hapeu, hnei Iehova hë ekö hna ahnith amë ngöne la qaan laka troa eni wathebo hnei Adamu me Eva? Qejepengöne jë.
10 Hnei aposetolo Peteru hna qaja la hnëqa hnei Iesu hna xome hmekune la mekuana i Akötresie; hnei angeic hna cinyihane ka hape: “[Iesu] lo hna wangate hmekun’ekö nge tha hna ami tepene pete kö la fene hnengödrai, ngo mamapi thatraqai nyipunie ngöne la ite drai hnapine enehila.” (1 Peteru 1:20) Hapeu, kolo lai a hape, hnei Iehova hë ekö hna ahnith amë laka tro Adamu me Eva a ena la wathebo, nge troa nyipi ewekë la mel hna huujën hnei Iesu Keriso? Ohea. Ame la hnëewekë hna hape “ami trepen”, tre, kola ujëne la ketre hnëewekë qene Heleni; ame la alien, tre, “kola jumi itine feja hnadroeë.” Hapeu, hetre “jumi itine feja,” maine hnaho nekönatre kö ekö, qëmekene troa eni wathebo hnei Adamu me Eva? Ohea. Kola hnaho hnei Adamu me Eva thupene lo hnei nyidroti hna ena la wathebo. (Genese 4:1) Haawe, thupene la hna icilekeu, nge qëmekene troa hnaho hnei Adamu me Eva, hnei Iehova hna thingehnaean amë la pengöne la “matran” hna qaja ngöne Genese 3:15. Kola aijijën hnene la meci memine la mele hmaca i Iesu, la ketre ewekë hna hnëkën cememine la ihnim, ene la thupene mel; hna jëne mina fe la thupene mel, matre kola troa apëne la ngazo me sewe Satana troa athixötrë së.—Mataio 20:28; Heberu 2:14; 1 Ioane 3:8.
11. Nemene la ketre ewekë hnei Iehova hna thingehnaean amë hë göi troa eatrëne la aja i Nyidrë?
11 Hnei Akötresieti hna ahnith amë hë la ketre hnei nyidrëti hna ajan troa kuca. Hna amexeje la ewekë cili hnei Paulo ngöne la nyidrëti a cinyanyi koi angetre Efeso me hape, tro Akötresieti a kuca matre “casiju hi la nöjei ewekë asë koi Keriso, nöjei ewekë e hnengödrai, me nöjei ewekë e celë fen.” Thupene lai, hnei Paulo hna qejepengöne la itre “ewekë e hnengödrai,” laka, angatre hi lo itre hna iën ka troa ce me Keriso; öni nyidrë: “Hna ami shë ekö thenge la aja i nyidë, ene la atre huliwane la nöjei ewekë asë thenge la mekune la aja i nyidë.” (Efeso 1:10, 11) Nyipici, hnei Iehova hna thingehnaean amë laka ame lai itre atr cili ka ala xalaithe hi, tre, angatre hi lo ka cile hnaaluene ne lo itine feja ne la föe i Akötresie. Nge tro nyudren a hane ce cile me Iesu, matre troa hamën la itre manathith nyine kapa qa ngöne la thupene mel. (Roma 8:28-30) Kola qeje angatr hnei aposetolo Peteru ka hape, ceitune me “nöje ka hmitötr.” (1 Peteru 2:9) Kola madrine hnei Ioane aposetolo la nyidrëti a meköle goeëne la itre ka troa ce cile me Keriso, laka, ala 144000 angatr. (Hna amamane 7:4-8; 14:1, 3) Angatr a caasi me ce cile me Keriso Joxu, nge kola catre kuca la “nyine atrune la lolo i [Akötresie].”—Efeso 1:12-14.
12. Easa atre tune kaa laka thaa hna isa ahnith amë kö la itre atrene la 144000?
12 Ame la kola thingehnaean amë la ala 144000, tre, thaa kolo kö lai a hape, ase hë amekötine ka hape drei la itretre ka troa nyihlue i Iehova tune lai. Ame la pane kepin matre kola amë la itre eamo me itre ihaji e hnine la itre hna cinyihane qene Heleni, tre, göi troa eatrongë angatr, me acatrene la lapaunene la itre hna iëne cili, matre tro angatr a nyipici me cila xome hnyawa lo mejiune i angatr, ene la troa mele ekoho hnengödrai. (Filipi 2:12; 2 Thesalonika 1:5, 11; 2 Peteru 1:10, 11) Canga atre kö Iehova la pengöne lo lai itre ka troa sine elanyi la ala 144000, ka atreine trongëne la itre hna amekötine matre troa kuca la aja i Nyidrë. Drei la itretre traqa kowe la hna ie? Qanyine kö la hna kuca hnene la itre hna iën, me aqane iëne angatre isa alacaas troa melëne la mele enehila, memine la aqane amekötine angatre la mele iangatr.—Mataio 24:13.
Ewekë Hnei Iehova Hna Atre Hë
13, 14. Ka ihmeku me nemene la Iehova a thingehnaean amë la itre ewekë, nge pine nemen?
13 Pine laka ame Iehova, tre, ketre Akötresie ne la itre hna perofetan memine la itre hna mekune troa traqa kow, tune kaa la aqane huliwane i Nyidrëti la atreine i Nyidrë matre troa canga atre la itre ewekë ka troa traqa elany? Ame la hnapan, tre loi e xecie hnyawa koi së laka, ame la itre jë i Iehova, ka nyipici me meköti me ka cengöne ihnimi asë hi itre ej. Ame ngöne la Paulo aposetolo a cinyanyi kowe la itre Keresiano ne Heberu ngöne lo hneijine i Iesu, hnei nyidrëti hna qaja hnyawa laka, ame la isisinyikeu i Akötresie memine la hnei Nyidrëti hna thingehnaean, tre, “lue ewekë ka tha uke kö, me ka tha’teine kö Akötesieti troa thoi ngön.” (Heberu 6:17, 18) Ame ngöne la tusi nyidrë koi Tito, hnei Paulo mina fe hna amexeje la mekune cili ngöne la nyidrëti a cinyihane ka hape, ame Akötesie “ka tha’teine thoi” Nyidrë.—Tito 1:2.
14 Ketre, ka pucatin’asë Iehova, ngo thaa hnei Nyidrëti kö hna huliwane menune la mene i Nyidrë. Hnei Mose hna qejepengöi Iehova, ceitune me “Akötesie ka nyipici, nge pë engazon, nge meköti me uthautha nyidë.” (Deuteronomi 32:4) Ame asë hi la hnei Iehova hna kuca, tre, ka ihmeku memine la pengöi Nyidrë. Ka ihmeku hnyawa la itre huliwa i Nyidrë memine la itre thiina i Nyidrëti ka tru, ene la ihnim, me inamacan, me meköt, me mene i Nyidrë.
15, 16. Nemene la itre hnei Iehova hna amë qëmeke i Adamu ngöne la hlapa e Edena, itre ewekë nyine tro angeic a iëne hnyawa?
15 Tro sa ce wange la aqane mama la itre thiina i Nyidrëti cili, ngöne lo itre ewekë ka traqa ekö ngöne la hlapa e Edena. Tretretro ka ihnimi Iehova, kola mama ngöne la aqane hamëne Nyidrë kowe la lue atr hnei Nyidrëti hna xup, la itre ka nyipi ewekë kowe la mele i nyidro. Hnei Nyidrëti hna hamën me aijijë Adamu troa atreine mekun, me atreine thele ewekë, nge troa iene la mekune hna ajan. Isapengöi Adamu kö memine la itre öni, ngöne laka, ame angeic, tre, ka atreine angeic troa ië ewekë. Thupene la hna xupi Adamu, hnei Akötresie hna xajawatine qa hune la therone i Nyidrë ekoho hnengödrai me öhne la “nöjei ewekë asëjëihë lo hnei nyidëti hna kuca, nge hana wang, nyipi loi.”—Genese 1:26-31; 2 Peteru 2:12.
16 Ame ngöne lo Iehova a wathebo Adamu troa xeni “qa ngöne la sinöe ne ate hmekune la loi me ngazo.” Hnei Nyidrëti hna hamëne la ketre ini ka ijije koi Adamu matre tro angeic a atreine troa ketre axeciën la nyine troa kuca. Hnei Nyidrëti hna nue Adamu troa xeni “qa ngöne la nöjei sinöe asëjëihë ngöne la hlapa,” ngo caasi pe hi la hna troa thaa xeni wen; nge tune la aqane hmekë angeic hnei Nyidrë, hetre thangane ka ngazo koi angeic, e troa xeni wen la isinöe cili. (Genese 2:16, 17) Hnei Nyidrëti hna canga ahnithe koi Adamu la itre ethane elanyi e thaa idrei pi i angeic. Nemene hë la hna troa kuca hnei Adamu?
17. Pine nemen matre ijije hi tro sa qaja ka hape Iehova a iëne la itre nyine tro Nyidrëti a thingehnaean amë?
17 Ngacama atreine hi Iehova troa canga atre la pengöne la ewekë nge thaa traqa pala kö ej, ngo thaa hnei Nyidrëti kö hna thel troa canga atre la pengöi Adamu me Eva. Matre thaa celë kö la jole lai koi Iehova, ke easa öhne laka atreine hi Nyidrë, ngo ame pe tre, Nyidrëti a ajan me iën troa thatre la ewekë ka troa traqa. Thaa tro kö së a thëthëhmine ka hape ame Iehova lo, tre, Akötresie ka ihnim, thaa tro jë kö Nyidrë a hnëkëne amë la ketre atr troa icilekeu, nge e thupenë hë, tro angeice a kepe thangane ka ngazo qa ngön. (Mataio 7:11; 1 Ioane 4:8) Ame pe, hetre itre ewekë hnei Iehova hna thingehnaean amë, nge atre kö Nyidrëti la nyine kuca.
18. Pine nemen matre ame la aqane iëne hnei Iehova la itre hnei Nyidrëti hna thingehnaean amë, tre, thaa kolo kö lai a amamane ka hape hetre hnepe ngazo thei Nyidrë?
18 Ame la Iehova a thingehnaeane amë la itre xaa ewekë, tre, tune kaa, hatrene hi lai ka hape, ka hetre ifegon hi la mene i Nyidrë, nge hna tuluthe hi la musi Nyidrë? Ohea, trene mene nge ka pë ifegon la musi Iehova. Hnei Mose hna aceitunë Iehova me ketre ‘git’, öni angeice ka hape: “Pexeje la huliwa i Nyidrë.” Thaa Nyidrëti kö la atrekë zöne la itre ethane la ngazo thene la atr. Ame la qaane la itre ewekë ka ngazo ka traqa koi së enehila, tre, hnene hi lo hna thaa idrei ekö hnene la lue pane atr. Hnei Paulo aposetolo hna amamane hnyawa laka “traqa ha la ngazo kowe la fene hnengödrai hnene la ate ka cas, nge meci pine la ngazo; tune lai hna traqa la meci kowe la nöjei at’asë, ke ngazo asë hë.”—Deuteronomi 32:4, 5; Roma 5:12; Ieremia 10:23.
19. Nemene la itre hnying hna troa ce wang ngöne la wiike ka troa xulu?
19 Tune la hne së hna ce ithanatane hë, easa öhne laka paatre fe kö la tria thei Iehova. (Salamo 33:5) Nge hnei Nyidrë hna huliwane la atreine i Nyidrë, me itre thiina ka lolo, me trongëne la itre wathebo i Nyidrë, matre troa eatrëne la aja i Nyidrë. (Roma 8:28) Pine laka Iehova la Akötresi ne la itre hna perofetan, haawe, Nyidrëti a qaja “la pune qa ngöne la qan; nge kola qaja ekö la ite ewekë ka tha hna kuca pete kö.” (Isaia 46:9, 10) Hne së hna ce wange fe laka, ame la itre ewekë hnei Nyidrëti hna canga atre hë, tre, itre hnei Nyidrëti lai hna iën. Haawe, nemene la aqane troa ketri së hnene lai? Tro sa atre hnyawa tune kaa laka, ame la itre mekune hne së hna axeciën, tre, ka ihmeku itre ej memine la itre mekunane la Akötresie ka ihnim? Nge nemene la itre manathithi hne së hna kapa e hne së hna huliwa tune lai? Tro pë hë a sa la itre hnyinge celë ngöne la ini ka troa xulu.
[Ithueamacany]
a Wange ju la boroshür Un livre pour tous götrane 28, hna cinyihane hnene la Itretre Anyipici Iehova.
Qejepengöne Jë?
• Nemene la itre ceitune ekö ka anyipicine laka ame la “trenge ewekë” i Akötresie, ke ka “eatre hnyawa” pala hi?
• Nemene la hnei Iehova hna canga thingehnaean ka ihmeku memine la hnei Nyidrëti hna “hne i hnine epine palua”?
• Nemene la aqane xome Iehova la ewekë hnei Nyidrëti hna atrein, ene laka ka canga atre Nyidrëti la itre ewekë ka troa traqa?