Ita Ne Thup göi 8 JULAI
Nyima 11 me 5 Qene Drehu
Pine Nemen Matre Easenyi Catre Hë Troa Apatrene La Itre Akötr
“Giti anganyidë, nge pexeje la huliwa.”—DEUTERONOMI 32:4.
1, 2. (a) Pine nemene la epuni a wanga atrune catrën la mejiune kowe la mele ka epine palua? (b) Nemene la ka sawa la itre atr ka nyimutre troa mejiune koi Akötresie, Atre hnëkëne la itre hna thingehnaeane ka lolo catr thatraqane la itre drai elany?
HAPEU nyipunieti kö a hane madrine ngöne la epuni a mekune la mele elanyi hnine la Paradraiso? Maine jë tro nyipunieti a ihamë e cailo fen me ngenu ngöne la hune ihnadro asë ka mingöming me hane öhne la itre xaa pengöne ka mel. Ma drei jë kö la tro nyipunieti a mekune hnyawa la madrine elanyi ngöne la epuni a troa ce huliwa memine la itre xan, matre troa nyihnyawane la ihnadro me ixatua matre ceitu me ketre igatran asë ka lolo la fene hnengödrai. Maine jë tro fe nyipunie a madrine elanyi troa kökötre la atreine i nyipunieti troa kuca la itre ewekë ka nyimutre tune la troa kuca la itre iatr, maine kuci uma pena, maine elo miuzik, maine itre xaa ewekë ju kö hnei nyipunieti hna ajan troa kuca enehila, ngazo pe pëkö ijin, nge nyimenyime la itre drai, ke tru la itre jole nyine kuca. Eje hi lai laka, nyipunieti a nyipiewekëne la mejiun, ene la mel hna hëne hnei Tusi Hmitrötr ka hape, “nyipi mel”; celë hi mele lai hnei Iehova hna ajane koi së, ketre mele ka epine palua.—1 Timoteo 6:19.
2 Tune kaa, thaa ketre madrine ka tru jë kö lai me ketre hnëqa ka sisitria catr, la troa ce thawa memine la itre xaa atr la mejiune ka eje e hnine la Tusi Hmitrötr? Ngo nyimutre la itre atr ka thipetrije la mejiune cili, ke angatr a xomeceitune ej me ketre pu ne jidr, maine mejiune ka menu; nge matre öni angatr ka hape ame le mejiune cili, tre, thatraqane la itre atr ka drenge drenge menune koilo. Ka jole catre mina fe koi angatr troa mejiune koi Akötresie, lo Atre thingehnaeane la mele ka thaa ase palua kö ngöne la Paradraiso. Pine nemen? Ame kowe la itre xan, ame la ka ajolë angatr, tre, ene la ngazo ka eje e celë fen. Angatr a mekune ka hape, maine ka mele Akötresie, ka pucatin asë Nyidrë nge ka ihnim, haawe, thatreine kö tro sa qeje pengöne laka hetre ngazo me iakötrë e celë fen. Pë fe kö akötresie ka nue la ngazo; öni angatr e qaja ka hape, maine ka mele Akötresie, tre, luetre hi lai, thaa ka pucatin asë kö Nyidrë, maine pena thaa ka nyipi ewekë kö së koi Nyidrë. Ame koi itre xan, tre angatr a kapa me mejiune la aqane mekune cili. Kola mama hnyawa laka Satana la ka ati mekëne la hni ne la itre atr.—2 Korinito 4:4.
3. Nemene la hnyinge ka jole catr nyine tro sa xome matre troa xatuane la itre atr troa sa, nge pine nemen matre easë hi la ka ijije troa kuca la ewekë cili?
3 Pine laka Itretre Anyipici Iehova së, easë hi la ka ijije troa xatuane la itre atr hna amenune hnei Satana me hna hule hnene la inamacanene la fene celë. (1 Korinito 1:20; 3:19) Easë a trotrohnine la kepine matre ala nyimu la angetre thaa mejiune kö kowe la itre hna thingehnaeane hnei Tusi Hmitrötr. Thatre Iehova kö hnei angatr. Maine jë thatre kö angatr la ëje i Nyidrë, maine aliene pena la ëje i Nyidrë; nge ma thatre hnyawa jë kö angatr la itre thiina i Iehova, maine pë pena kö thiina i Nyidrë hna atre; celë hi matre itre xan thatre fe kö angatr ka hape, tru hnei ewekë hnei Nyidrëti hna thingehnaeane me eatrën. Ame easë, tre, thaa itre ka thatre kö së, atre Iehova hnyawa hi së. Ame ngöne la itre xaa ijin, ka lolo catr tro sa wange hmaca la aqane tro sa xatuane la itre atr “hna ajidine la mekun” troa sa la ketre hnying ka jole troa sa hnene la itre atr; tune la hna hape, “Pine nemen matre Akötresieti a nue la ngazo memine la akötr?” (Efeso 4:18) Ame la hnapan, tre, loi e troa wanga atrune la aqane tro sa eköthe hnyaqa la aqane tro së a sa la hnying. Thupene lai, tro sa ithanatane la aqane mama la itre thiina i Iehova, ngöne la aqane xome Nyidrëti la itre ewekë matre troa cile kowe la ngazo.
Aqane Troa Sa Hnyawa La Hnying
4, 5. Nemene la ka nyipi ewekë tro sa pane kuca e hnyingëne jë la ketre atr la kepin matre Akötresieti a nue la akötr? Qeje pengöne jë.
4 Maine ketre atr a thele ka hape nemene jë la kepin matre Akötresieti a nue la akötr, nemene la aqane tro së a sa la hnyinge cili? Canga thuemacanyi angatre jë la ewekë ka traqa ekö e Edena. Ame ngöne la itre xaa ijin, tre, celë hi aqane tro lai a kuca. Ngo loi e tro pala hi a thupëne la aqane troa tro fë la itre mekune ka sa lai hnying. Nyipi ewekë troa pane hnëkë hnyawa. (Ite Edomë 25:11; Kolose 4:6) Loi e tro sa ce wange la köni mekune qa hnine la Tusi Hmitrötr, matre nyine aijijë së troa sa la hnying.
5 Ame la hnapan, maine kola hleuhleu la ketre atr pine laka hna ahacene la hni angeice hnene la etrune la ngazo e cailo fen, maine hnene jë fe laka hna ketri angeic hnene la ngazo maine itre atr pena hnei angatr hna hnime hnyawa. Haawe, loi e troa inamacan, me thele troa nyiqaane ithanata cememine la hni ka lolo. Hnei Paulo aposetolo hna eamone la itre Keresiano, me hape: “Ce teije jë me angete teij.” (Roma 12:15) Maine tro sa hetrenyi la hni ka lolo, maine “ihnimikeu,” haawe, tro ha ketr lai atr. (1 Peteru 3:8) Maine tro angeic a trotrohnine ka hape easë a hnehengazo angeice fe, tro hë angeic a hmala troa drenge la itre hne së hna qaja koi angeic.
6, 7. Pine nemen matre loi e tro sa qaja aloine la atr ka hni ka menyik nge ka trene hnying ngöne la itre ewekë ne la ua?
6 Ame la hnaaluen, loi e tro sa kapa madrine me olene la aqane hnyinge i angeic. Ame la itre xaa atr tre, öni angatre ju hi e mekune ka hape, pine lai aqane hnyinge cili, haawe, kolo hi lai a amamane ka hape itre ka pë lapaune nge itre ka hane kö metrötrë Akötresie. Maine jë kola xulu lai mekune cili qathene la itre hene hmi. Ngo, thaa hnene kö laka hna hnyinge tune lai, tre, aqane ujë i atre pë lapaune lai. Eje hi laka, ame mina fe lo itre atr ka mele ekö ngöne lo hneijine i Tusi Hmitötr, tre, hna tune fe hi la aqane hnyinge i angatre lai. Hanawang la ketre ceitun, hna hnyinge hnei Davita ka hape: “Iehova fe, hna uëne laka cilieti a cil’ ananyin, me za ngöne la ijine aköt?” (Salamo 10:1) Ketre tune mina fe, hna hnyinge hnei Habakuka ketre perofeta ka hape: “Iehova fe, tro ni a xëwe koi enëtilai uti hë eu, nge tha dei ni kö hnei enëtilai; me teije koi enëtilai fë la iangazo, nge tha amelene hnei enëtilai? Ngöne nemene enëtilai a amamane koi ni la ngazo me ötetëtine la aköt? Nge eje qëmekenge la ithöeë me iangazo; nge ite xan’ a aciane la ikelikelë me iwatratra?”—Habakuka 1:2, 3.
7 Celë hi itre atr lai ka mele nyipici nge atraqatre la metrötre i angatr koi Akötresie. Hapeu, hna goeëne angazonyi angatre kö pine la itre hnyinge i angatr? Ohea, hnei Iehova hna hane amë fe la itre hnyinge i angatr ka lolo e hnine la Wesi Ula i Nyidrë. Ame la atr ka sesew pine la aqane elëne la ngazo enehila, tre, maine jë ka mecijine angeic ngöne la götrane la ua, kola ajan catrëne troa kapa la itre mekune ka sa la itre hnyinge i angeic; nge Tusi Hmitrötre hmekuje hi la ka ijije troa sa itre ej. Pane mekune ju së, hnei Iesu hna qaja aloine la itre atr ka mecijine ngöne la götrane la ua, maine ka “pë ewekë ngöne la ua.” (Mataio 5:3) Ketre aqane iatruny ka tru, la troa xatuane la itre atr cili troa hane hetrenyi la manathith hna thingehnaeane hnei Iesu!
8. Nemene la itre ini ka menu ka upe la itre atr troa mekune menun ka hape, Akötresie la atrekë zöne la kola akötr la itre atr, nge tune kaa la aqane troa xatua angatr?
8 Ame la hnaakönin, tre, nyipi ewekë troa xatuane la itre atr troa atrehmekune hnyawa laka, thaa Akötresieti kö la atrekë zöne la kola elë la ngazo ngöne la fen enehila. Hna inine la itre atr ka nyimutre ka hape, Akötresieti la ka musinëne la fene celë, nge ase petre kö Akötresieti ekö ahnithe amë la itre ewekë ka troa traqa koi së, nge qaathei Nyidrëti la itre kepine ka sihngödr matre kola hleuhleu la itre atr. Trengathoi la itre ini cili. Itre ej a ahmahmanyi Akötresie me upe zö Nyidrë la kola ngazo me akötre la itre atr e celë fen. Celë hi matre, loi e tro sa xome la Wesi Ula i Akötresie matre wenë mekötine la itre mekune cili. (2 Timoteo 3:16) Thaa Iehova kö la Atre musinën la fene hnengödrai ka ngazo celë, ngo Satana diabolo pe. (1 Ioane 5:19) Thaa hnei Iehova kö hna siji hatrene la itre ewekë ka troa traqa kowe la itre hnei Nyidrëti hna xup ka inamacan, matre tro pe hi angatr a xötrethenge trongëne itre ej; hnei Nyidrëti hna nue së isa ala caas troa isa ië hna ajan, me aijijë së troa iën la loi qa ngöne la ngazo, memine la meköt qa ngöne la ka qali. (Deuteronomi 30:19) Nge thaa Iehova fe kö la qaan la ngazo; Nyidrëti a sisine la ngazo nge ame itre ka akötr pine laka hna qanangazo angatre menu, tre Nyidrëti a thupë angatr.—Iobu 34:10; Ite edomë 6:16-19; 1 Peteru 5:7.
9. Nemene la itre xaa jiane huliwa hna hamëne hnene la “hlue ka nyipici me ka inamacan” göi troa xatuane la itre atr troa trotrohnine la kepine matre Akötresieti a nue la akötr, nge nemene la aqane tro sa xome hnyawa la itre jiane huliwa cili?
9 E ase hë epuni ami trepene hnyawa tune lai, maine jë tro hë epuni a öhne laka canga tro ha drei epuni hnene lai atr, me thele troa hane atre la kepin matre Akötresieti a nue la akötr. Hnene la “hlue ka nyipici me ka inamacan” hna hamëne la itre itusi ka nyimutre nyine jiane huliwa së. (Mataio 25:45-47) Ame ngöne lo Kovasio Ne Distrik hna hape, “Loi e Troa Drengethenge Akötresie” macatre 2005/06, tre hna tro fë la ketre tarak hna nyi taan ka hape Easenyi Hë Matre Paatre Pi La Nöjei Akötre Asë! Maine hetrenyi la tarak cili ngöne la qene hlapa i epun, hnauëne laka thaa e kö matre atre la aliene ej? Ketre tune mina fe lo itus Nemene La Nyipi Ini Hna Hamën Hnei Tusi Hmitrötr? hna ujëne ej enehila kowe la 157 lao qene hlapa; caa mekene ka sa hnyawa la hnyinge celë ka nyipi ewekë. Catre pi së troa xome hnyawa la itre jiane huliwa celë. Itre ej a qeje pengöne hnyawa la itre ewekë hna qaja hnei Tusi Hmitrötr matre atrepengöne la aqane traqa kowe lo jol göne lo musi ka pë san hna acile troa amekötin e cailo fen hna amejëne ekö e Edena, memine la hna kuca hnei Nyidrë troa nyinyin la jole cili. Mekune hnyawa pala hi së,laka, ame la easë a ithanatane la topike cili, easë hi lai a qaja amamane kowe la itre ka drei së la etrune la atrehmekun. Celë hi atrehmekune i Iehova memine la itre thiina ka lolo i Nyidrë.
Wanga Atrune Jë La Itre Thiina i Iehova
10. Nemene la hna thatreine troa trotrohnine hnene la itre atr ngöne laka Akötresieti a nue la akötr, nge nemene la atrehmekune ka troa xatua angatr?
10 Ame ngöne la easa xatuane la itre atr troa trotrohnine la kepin matre Iehova a nue tro la itre atr a ketre kuca la musi angeic fene la ihnatrapaime i Satana, loi e tro mina fe sa thele troa xatua angatr troa hane wanga atrune hnyawa la itre thiina ka lolo i Iehova. Nyimutre la itre atr ka atre ka hape ka trene mene Akötresie; hnei angatr hna majemine drenge la kola qeje Nyidrëti ka hape, Ka Pucatin Asë. Ngo maine jë jole catre koi angatr troa trotrohnine la kepin matre thaa xome kö Nyidrëti la mene i Nyidrë troa apaatrene la itre ewekë ka thaa meköti kö memine la akötr. Maine jë thatrepengöne kö angatre la itre xaa thiina i Iehova, ene la ehmitrötre i Nyidrë, me meköt, me inamacan, me ihnimi Nyidrë. Pexeje la aqane melëne Iehova la itre thiina cili, nge lolo la aqane nyi ifegone Nyidrë itre ej. Celë hi matre Tusi Hmitrötr a qaja ka hape: “Pexeje la huliwa [i Nyidrë].” (Deuteronomi 32:4) Tune kaa la aqane troa qaja atrune la itre thiina cili ngöne la easa sa la itre hnyinge hna amejën ngöne la hna cinyihane celë? Tro sa ce wange la itre xaa hnepe ceitun.
11, 12. (a) Pine nemen matre thaa nyine tro kö a iën me kuca, la troa senge la ngazo i Adamu me Eva? (b) Pine nemen matre thaa tro kö Iehova a nue paluane la ngazo?
11 Maine ju tro hi Iehova a senge la ngazo i Adamu me Eva, ngo hnauëne la thaa kuca kö Nyidrë? Pine laka thaa nyine tro kö lai a kuca kowe la lue atr ka tui Adamu me Eva. Lue atr ka pexeje nyidro, nge thaa nyidroti kö a kuca thatrene la itre ewekë, nge hnei nyidroti hi hna thë troa thipetrije la musi cile i Iehova me nue tro Satana a ameköti nyidro. Eje hnyawa hi lai, ke, pë pi kö caa hatrene ietra thene lai lue ka kuci mekun. Ngo, ame la kola thele hnene la itre atr la kepine matre thaa senge kö Iehova la ngazo i Adamu me Eva, tre, maine jë angatr a hnyingëne thel la kepine matre thaa nango wanga acone kö Nyidrëti la itre hna amekötin me nue la ngazo me icilekeu. Ka ihmeku hnyawa la mekun ka sa lai hnyinge cili, memine la ketre thiina ka sisitria catre koi Iehova, ene la ehmitrötre i Nyidrë.—Esodo 28:36; 39:30.
12 Anyimua qaja hnei Tusi Hmitrötr la ehmitrötre Iehova. Ngo xalaithe hi la itre atr ngöne la fene celë ka ngazo, ka trotrohnine hnyawa la thiina cili. Ka pë ethane me ka wië Iehova, nge ka iananyi catre Nyidrë memine la ngazo. (Isaia 6:3; 59:2) Traqa pi hi la ngazo nge eköthe jë hi Nyidrë la jëne troa senge trije ej me apaatrene ej, ngo thaa hnei Nyidrëti kö hna nue la ngazo troa cile huti epine palua. Maine tro Iehova a nue troa cile huti la ngazo, haawe, pë hë mejiune së kowe la itre drai elany. (Ite Edomë 14:12) Ngöne la ijine hnei Iehova hna sa, tro Nyidrëti a kuca matre tro hmaca la itre hna xupe asë a hmitrötr xajawa i Nyidrë. Celë hi ewekë lai ka xecie hnyawa, pine laka, aja i Iehova kö, Nyidrë lo Atre Ka Hmitrötr.
13, 14. Pine nemen matre thaa hnei Iehova kö hna iën troa apaatrene lo köni ka icilekeu e Edena?
13 Hnauëne laka thaa apaatrene kö Iehova lai itre ka icilekeu e Edena nge nyiqaane hmaca jë xupi atr? Thaa ewekë ka jole kö koi Nyidrë la troa apaatrenyi Adamu me Eva; easenyi hë matre apaatrene pi Nyidrë la itre atr asë ka ngazo. Önine jë hi la itre xan ka hape, ‘Pine nemen matre thaa apaatrene kö Nyidrëti ekö lo itre ka ngazo, nge ala köni hi angatr e celë fen me e koho hnengödrai? Maine hna kuca ju tune lai, hapeu tro kö a haöthe la fen hnene la ngazo, memine la nöjei hleuheu asë?’ Hnauëne laka thaa iëne kö Iehova la aqane huliwa cili? Kola qaja ngöne Deuteronomi 32:4 ka hape: “Meköti asë la ite jë i nyidë.” Ka tru koi Iehova la thiina ka meköt. Eje hi laka, “Iehova a ajane la meköt.” (Salamo 37:28) Pine laka ka ajane Nyidrëti la meköt, haawe, hnei Nyidrëti hna upetrije la itre ka icilekeu qaa Edena. Pine nemen?
14 Pine la icilekeu i Satana, hane hi lai kola nyiqaane isenyine la emekötine la musi cile i Akötresie. Thaa hnei Iehova kö hna apaatrenyi Satana, ngo hnei Nyidrëti pe hna nue matre tro kö la aqane thiina ka qali i angeic a ketre amamane hnyawa la emeköti Nyidrë. Ame la troa canga apaatrene la itre ka icilekeu, tre, ngacama pune hi lai koi angatr, ngo ame pe, thaa tro kö lai a sa lo mekune hna isenyine ekö. Ketre kola mama hnyawa laka kapucatin asë Iehova nge trene mene Nyidrë, ngo ame pe, tre, thaa mene i Nyidrëti kö la hna isenyin. Ketre, ase hë Iehova qaja hnyawa la aja i Nyidrëti koi Adamu me Eva. Tro Nyidroti a hnaho me nyialiene la ihnadro, me xom’ acone ej, me musinëne la nöjei hna xupe asë. (Genese 1:28) Maine hnei Iehova ju hna apaatrenyi Adamu me Eva, tre, gufa ha lo itre trenge ewekë hnei Nyidrëti hna ahnithe koi nyidro göi troa nyialiene la ihnadro. Thatreine kö tro Iehova a ujë tune lai, pine laka, ame la itre hnei Nyidrëti hna mekun, tre hnei Nyidrëti pala hi hna eatrën.—Isaia 55:10, 11.
15, 16. Maine kola qeje “nyin” hnene la itre atr lo jol ka traqa e Edena, tune kaa la aqane tro sa xatua angatr?
15 Drei e trö i Iehova e koho hnengödrai me e celë fen, la ka trene inamacane ka tru me ka atreine troa cile kowe la icilekeu celë? Hetrenyi la itre xaa atr ka qaja la itre sipu mekuna i angatr göne la “itre nyin” kowe la icilekeu ekö e Edena. Ngo maine tro thenge ju la itre mekuna i angatr, hapeu, thaa kolo kö lai a hape, sisitria kö angatr hui Akötresie? Maine jë thaa ngöne hni ka ngazo kö, ngo thaa trotrohnine hnyawa kö angatr la pengöi Iehova memine la etrune la inamacane i Nyidrë. Ame ngöne la Paulo aposetolo a cinyanyi kowe la itre Keresiano ne Roma, hnei nyidrë hna sine thele la inamacane i Akötresie, memine fe la “ewekë ka sihngöd” göne la aja i Iehova troa acile la Baselaia ne la Mesia matre troa hamëne la mele ka pexeje kowe la itre atr ka mele nyipici, me troa ahmitrötrën la ëje i Nyidrëti ka hmitrötr. Nemene la mekuna i Paulo göne la inamacane i Akötresie, inamacane ka eköthe la aja cili? Kola nyipune hnei Paulo aposetolo la tusi nyidrë hnene la itre trenge ewekë celë, kola hape: “Atrunyi Akötesieti ka inamacane hmekuje kö epine palua, jëne Iesu Keriso. Amen.”—Roma 11:25; 16:25-27.
16 Hna trotrohnine hnei Paulo ka hape, ka “inamacane hmekuje” Iehova, nge pëkö sane la inamacane i Nyidrë e celë fen me e koho hnengödrai. Drei la atr ka ngazo ka mekune ka hape ijiji angeice hi troa thele la nyin ka sisitria kowe la nöjei jole asë, tune lo jole ka tru hna isenyine hnei Satana troa wai engazone lo emekötine la musi cile i Akötresie? Nyipi ewekë fe tro sa xatuane la itre atr troa hetrenyi la metrötr kowe la Akötresie ka “inamacan la [hni].” (Iobu 9:4) Maine tro sa thele troa trotrohnine hnyawa la inamacane i Iehova, haawe, ketre tro fe hë së a mejiune hnyawa laka ka sisitria catre kö la aqane nyinyine Nyidrë la itre jol.—Itre Edomë 3:5, 6.
Loi e Tro Sa Wanga Atrehmekune La Thiina i Iehova Ka Sisitria
17. Hetrenyi la itre atr ka hnehengazo pine laka hnei Akötresieti hna nue la ngazo; ngo maine tro angatr a trotrohnine hnyawa la ihnimi Iehova, nemene hë la ixatua hnei angatr hna troa kapa?
17 “Akötresie la ihnimi.” (1 Ioane 4:8) Jëne la itre trenge ewekë ka tru celë, kola amamane hnei Tusi Hmitrötre la thiina ka tru i Iehova, ene la thiina ka sisitria catre kö hune la itre xan, nge ka akeukawane la hni ne la itre atr ka akötr qa ngöne laka kola haöth enehila la fen hnene la ngazo. Hnei Iehova hna amamane la ihnimi Nyidrë ngöne lo nöjei aqane thele Nyidrëti troa huletrije la itre ethane la ngazo thene la itre hnei Nyidrëti hna xup. Jëne la ihnim, Iehova a mejiune kowe la itre matra i Adamu me Eva ka ngazo, me aijijë angatr troa easenyi Nyidrë me kuca matre tro angatr a iloi me imelekeu hnyawa me Nyidrë. Pine la ihnimi ka eje thei Nyidrë, haawe hna hnëkëne la ketre thupene mel nyine troa he hnyawa la itre ngazo së, me aijijë së troa pexej, me mele epine palua. (Ioane 3:16) Nge ihnimi fe a upi Nyidrë troa xomihnin ahoean la itre atr, me ajijëne la ka ala nyim troa thipetriji Satana me ië Iehova me lapa fene la musi cile i Nyidrë.—2 Peteru 3:9.
18. Nemene la manathithi ka eje the së, nge nemene la hne së hna troa wang e wiike ka troa xulu?
18 Ame ngöne la kola cainöje hnene la ketre hnamiatr kowe la itre atr ngöne la ketre ijine kola amekunëne hmaca lo ijine kola kei lo lue iuma ka tru e America, öni nyidrëti ka hape: “Thatre kö së la kepine matre Akötresie a nue la ngazo memine la iakötrë.” Drei la ketre hleuhleu atraqatr! Hapeu thaa madrine kö së troa hetrenyi la inamacane ngöne la topike celë? (Deuteronomi 29:29) Nge pine laka ka inamacane Iehova, me meköt, me ihnim, haawe, atre hi së ka hape easenyi hë tro Iehova a apaatrene la akötr. Ketre, ase hë Nyidrëti thingehnaeane lo lai. (Hna Amamane 21:3, 4) Nge ame koi itre ka meci hë ekö, hetre mejiune fe kö koi angatr? Ame lo aqane cile Iehova kowe lo jol ekö e Edena, tre kolo cipa angatr troa hane hetrenyi la ketre mejiun? Ohea. Kola upi Iehova hnene la ihnimi troa hamëne koi angatre fe la ketre manathith, jëne la mele hmaca. Celë hi hne së hna troa wang hmaca pe ngöne la wiike ka troa xula.
Troa Sa Tune Kaa?
• Nemene la nyine troa qaja kowe la ketre atr ka hnyingëne thele la kepin matre Akötresieti a nue la akötr?
• Kola mama tune kaa la ehmitrötre i Iehova memine la emeköti Nyidrë, ngöne la aqane cile Nyidrëti kowe lo itre ka icilekeu e Edena?
• Pine nemen matre loi e tro sa xatuane la itre atr troa trotrohnine hnyawa pala hi la ihnimi Iehova?