Pine nemene matre Akötresieti a nue la ketre atr troa axösisine la ketre?

Kola mama e hnine la Tusi Hmitrötr laka, hetrenyi la itre atr hna axösisine hnene la itre xan. Tro sa pane wange la pengö i Nabotha. Hnei Ahaba, joxu ne Isaraela ngöne lo itre macatre 900 M.P.K.a, hna nue Iezebela föe i nyidrë, troa iupi troa humuthi Nabotha memine la itre nekö i angeic trahmany, matre tro pë hë la joxu a xom la hnënge vine i angeic. (1 Ite Joxu 21:1-16; 2 Ite Joxu 9:26) Hnauëne la Akötresieti a nue la joxu troa ngazo thiina?

Tro sa ithanatane la ketre kepine ka tru: thatreine kö Akötresieti thoi. (Tito 1:2) Matre nemene la aliene lai? Ame ngöne la xötrei qaane la mele ne la atr, ase hë Akötresieti canga ithuemacany ka hape, ame la atr tha drei Nyidrë, tre tro ha mec. Nge pine laka, ka nyipici la trenge ewekë i Akötresie, qaane ju hi lo kola tha idrei hnene la atr e Edena, edrö i nöjei atr hë la mec. Nge ame la pane atr ka mec, tre kola mec pine laka hna axösisine hi; Abela la ëje i angeic, lo hna humuth hnei Kaina mama i angeic.—Genese 2:16, 17; 4:8.

Celë hi kepine matre hane hi la pengöne la mele ne la atr, thenge la hna qaja hnene la Wesi Ula i Akötresie; kola hape: “Kete ate a musinëne la kete mate angazo nyëne kö.” (Ate Cainöj 8:9) Nyipici kö? Ase hë Iehova canga thuemacane ekö lo nöje Isaraela, sipu nöje i Nyidrë ka hape, tro la itre joxu i angatr a axösisi angatr, nge tro hë angatr a treije koi Akötresie, pine la aqane ujë ne la itre joxu. (1 Samuela 8:11-18) Goi hace fe la aqane thue ehnefëne Solomona Joxu la itre jini hmunë, ngacama joxu ka inamacane hi nyidrë. (1 Ite Joxu 11:43; 12:3, 4) Nge ngazo catre pala kö la aqane iaxösisi ne la itre xa joxu ka ngazo thiina, tui Ahaba. Maine hnei Akötresieti ju hna sawa la itre atr troa musi angazony, tre Nyidrëti hmaca kö lai a jelethoi Nyidrëti kö.

Mekune hnyawa kö së ka hape, hnei Satana fe hna qaja ka hape, itre atr a nyihlue i Akötresie göi thupen. (Iobu 1:9, 10; 2:4) Maine hnei Akötresieti ju hna kuca matre troa triane la itre hlue i Nyidrë hnene la nöjei pengöne akötr, tre Nyidrëti hi lai a xatuane la mekuna i Satana. Nge maine pë ju ala casi ne la itre atr hna ketr hnene la nöjei pengöne iaxösisi, tre, Akötresieti hmaca kö lai a jelethoi Nyidrë. Maine ju, tro la itre atr a mekune ka hape, ijije hi tro la atr a sipu mus matre tro loi la mele i angeic, nge tha nyipi ewekë kö koi angeice la ixatua i Akötresie. Ngo tha aqane qaja i Akötresieti kö lo lai; öni Nyidrëti pe ka hape, thatreine kö tro la atr a sipu amekötine la jë i angeic. (Ieremia 10:23) Nyipi ewekë koi së la Baselaia i Akötresie, ke eje hi la ka troa apatrene la iaxösisi.

Ngo kolo kö lai a qaja ka hape, pë pi kö hnei Akötresie hna troa kuca göne la atr ka iaxösisi? Ohea. Hane hi la lue xa ewekë hnei Nyidrëti hna kuca: Ame la hnapan, tre Nyidrëti a qajaqaja la thiina cili. Ame e hnine la Wesi ula i Nyidrë, easa öhne hnyawa la aqane nyinyithiina i Iezebela koi Nabotha. Nge Tusi Hmitrötr mina fe a amamane la qaane lai aqane ujë ka ngazo cili, atre juetrëne la nyipi pengö i angeic. (Ioane 14:30; 2 Korinito 11:14) Tusi Hmitrötr a amamane ka hape, angeice hi la Satana nge Diabolo. Ame la Akötresieti a qaja amamane la thiina ka ngazo me iaxösisi, memine la qaane lue ej, tre Nyidrëti hi lai a xatua së troa ananyine la iaxösisi. Nyidrëti a thupë së göne la itre drai elany.

Ame la hnaaluene ewekë hna kuca hnei Akötresie, tre ene la troa hamë mejiune koi së laka, tha tro hmaca kö a hetre iaxösisi. Ame la aqane qajaqaja me amekötine hnei Nyidrëti la thiina i Ahaba me Iezebela, me nyithupene la ngazo i nyidro, me itre atr ka tui nyidro, tre celë hi ka thue mejiune koi së lai laka, tro Nyidrëti a nyithupene kowe la itre ka ngazo thiina e ketre ijin. (Salamo 52:1-5) Akötresieti mina fe a amamane koi itre ka hnimi Nyidrë la itre kepine matre ijije tro sa mejiune laka, tro fe Nyidrëti a apatrene trije la itre thangane ka ngazo, ka xulu qa ngöne la thiina ka ngazo.b Tro Nabotha me itre nekö i angeic elany a öhne la pengöne la mele ngöne la paradraiso gaa pë iaxösisi.—Salamo 37:34.