Tru Kö La Ka Tha Eatr

Pi tro fe kö nyipunieti a hane atrepengöne la itre drai elany? Celë hi aja ne la nöjei atr lai. Nge tru catr la itre hna thingehnaeane hnei itre atr. Hane hi cahu itre xan:

• ITRE KA INI SIAS a huliwane la itre masine me itre jia ne huliwa ka hnyipixe, nge tru la mani hna xom, göi troa cile kowe la itre ethanyine lo hna hape, pollution, nge matre troa qaja la pengöne la drai ka troa xulu; maine troa mani, maine jö pena.

• ITRE ANALYSTES a waipengöne la aqane trongene la itre ewekë thene la itre ka huliwa mani, me itre ka kuci politik. Hna ati ëje ne la ketre ka tru trenge mani, ene Warren Buffett ka hape, perofeta, ke hnei nyidrëti hna atreine waipengöne la itre huliwa, ka troa hamë wen. Ame pena Nate Silver, tre hnei angeice hna atreine wange jëne lo hna hape, itre statistiques, la itre ka troa cilëne la itre göhnë ka tru ngöne la politik e Amerika, memine la itre ka elo sinema, ka troa kepe itre manie ka tru.

• ITRE ATR EKÖ hna xom ceitune me itre hna perofetan. Kola mekune hnene la itre atr, ka hape, kola eatr enehila, la hna ahnithe ekö hnene la itre itus i Michel de Notredame (Nostradamus). Önine lo itre xa atr ka hape, ase hë ahnithe hnene la idrai ne la itre Mayas ka hape, hetrenyi la itre hulö ka troa traqa ngöne la drai 21 Diseba 2012.

• ITRE HENE NE HMI a thuemacane la itre atr ka hape, hetrenyi la itre ewekë ka troa traqa e cailo fen, nge angatre fe a thele atr. Ame Harold Camping, hnei nyidrë memine la itre ka xötrethenge nyidrë, hna qaja trongëne ka hape, troa patre la ihnadro ngöne la macatre 2011. Ngo easë pala hi la.

• ITRE TRENE DRÖSINÖE a qaja ka hape, atreine hi angatre troa thingehnaeane la itre ewekë ka troa traqa. Hna eatr la itre xa hna thingehnaeane hnei Edgar Cayce me Jeane Dixon, göne la hneijine së. Ngo tha eatre pë hë la itre xa hnei nyidroti hna thingehnaean. Ka tune lo hna thingehnaeane hnei Dixon ka hape, troa xulu la Hnaakönine Isi Ka Tru lo macatre 1958; nge öni Cayce ka hape, troa lö la traone New York e kuhu hnagejë, ngöne la sine lo itre macatre 1970.

Ngo hapeu, atreine kö tro sa atrepengöne la itre drai elany? Maine tro nyipunieti a atre la itre ewekë ka troa xulu, haawe, tro hë lai a hmaloi la mele i nyipunie.