Kola Sa Hnei Tusi Hmitrötr
Atreine kö tro la ca baselaia a mus kowe la fen asë?
Troa acasine tune kaa la itre atr ne la nöjei nöj? Isaia 32:1, 17; 54:13
Nemene la eloine la troa mus hnene la ca baselaia kowe la fen asë? Tru la itre atr enehila ka xomiakötrëne laka, itre xan a trenamo, nge puafala pë hë angatr. Maine tro hi la ca baselaia a musi kowe la fen asë, troa ceitune la aqane hnim la nöjei atr. Atreine kö troa axulune me cilëne la baselaia ka tune lai hnene la itre atr?—E jë la Ieremia 10:23.
Kola mama qaane ekö laka, hnene pala hi la itre mus hna wang acone la itre jin ka puafala, nge ka iaxösisi pena la itre xa mus. (Ate Cainöj 4:1; 8:9) Ngo hnene la Akötresie Kapucatin asë hna thingehnaeane ka hape, tro ha nyihnane la nöjei musi asë hnene la musi ka cas. Nge ka meku nöjei atr la Joxu ka cilëne lai musi cili.—E jë la Isaia 11:4; Daniela 2:44.
Nemene la hna troa kuca hnene la Baselaia i Akötresie?
Iesu la Joxu hnei Iehova hna iën, ke nyidrëti la ka ijij troa cilëne la hnëqa cili. (Luka 1:31-33) Ame lo ijine Iesu e celë fen, tru catre la hnei nyidrëti hna xatuane la itre atr. Ame hë elany, tro Iesu a acasine la itre atrene la itre nöj asë, me apatrene la itre akötre i angatr.—E jë la Salamo 72:8, 12-14.
Tro kö la nöjei atr a kapa la musi Iesu? Ohea. Ngo Iehova a itreqe. (2 Peteru 3:9) Nyidrëti a pane nue ijine kowe la itre atr, matre tro angatr a kapa la musi Iesu. Easenyi hë tro Iesu a apatrene trije la itre atr ka ngazo qa la fen, me kuca matre troa lapaane la ihnadro hnene la tingetinge me mele xetietë.—E jë la Mika 4:3, 4.