Aqane Troa Apëne La Itre Isi Me Ihumuth

TRO AKÖTRESIE A APATRENE PALUAN LA ITRE MUSI ATR

Tro Akötresie a apatren la itre musi atr jëne la ketre isi hna hëne hnei Tusi Hmitrötr ka hape, Amagedro.a (Hna Amaman 16:16) Ngöne la ijine cili, troa acasine la “nöjei joxu ne fen . . . kowe la isi ne la drai ka tru i Akötresie, ka Tru Trenge Men.” (Hna Amaman 16:14) Jëne Amagedro, lo isi Akötresie, tro Nyidrëti a apëne la nöjei isi e celë fen.

Tro Akötresieti a nyihnane la itre musi atr, hnene la Baselaia i Nyidrë. Baselaia i Nyidrë a mus qa hnengödrai, nge tha tro jë kö a apatrene ej. (Daniela 2:44) Hnei Akötresieti hna acil la Nekö i Nyidrë, Iesu Keriso troa Joxu ne la Baselaia. (Isaia 9:6, 7; Mataio 28:18) Cili hi Baselaiab, lo hnei Iesu hna upe la itretre drei nyidrë troa thithi kow. (Mataio 6:9, 10) Tro la nöjei atr asë a cas fene la Baselaia i Akötresie, hna musinëne hnei Iesu.

Tha ceitu Iesu kö memine la itre atr ka mus enehila. Tha tro kö nyidrëti a huliwane la musi nyidrë thenge la sipu aja i nyidrë. Pine laka, tha ka ië hna hnime kö Iesu, tha tro kö la itre atr a eetr, ke kola wangatrune la ketre hane ngönetrei maine ketre nöj. (Isaia 11:3, 4) Pë hmaca kö atr ka troa isigöline la meköti angeic. Pine nemen? Pine laka, tro Iesu a akötrehnine la aja ne la nöjei atr. “Tro angeic a amelene la ka pë ewekë ka sipo ixatua, memine la ka co, me nöjei atr ka pë atre xatuan. . . . Tro hë angeic a amele angatr qa ngöne la iangazo me isi.”—Salamo 72:12-14.

Tro la Baselaia i Akötresie a apatrene la nöjei jia ne isi. (Mika 4:3) Tro fe ej a apatrene la itre atr ka ngazo, ka pi isi me ka thel troa thë la tingeting. (Salamo 37:9, 10) Ame ngöne la fen asë, tro la itre trahmany, me itre föe, me itre nekönatr a mele tingeting.—Ezekiela 34:28.

Fene la Baselaia i Akötresie, tro la itre atr a mele ka loi. Tro la Baselaia cili a apatrene la itre jol ka ukune la itre atr troa isi, tune la pë mo, me mecijin, me pë uma.—Salamo 72:16; Isaia 65:21-23.

Fene la Baselaia i Akötresie, tro fe a nyinyine la itre jol hna axulun hnene la itre isi. Tro ej a nyinyine la itre eatr ne la itre atr, memine la itre sine mec ka fetra thupen la itre isi. Nge tro fe a amelene la itre atr e celë fen. (Isaia 25:8; 26:19; 35:5, 6) Tro hë la itre fami a iöhnyi hmaca memine la itre sinee i angatr ka mec. Ame la itre akötr ka xulu qa ngöne la itre isi, ke tro hë itre ej a “patre” elany.—Hna Amaman 21:4.

TRO AKÖTRESIE A APATRENE LA NGAZO

Jëne la Baselaia i Akötresie, tro la itre atr a cas ngöne la hmi ne la nyipi Akötresie, Iehovac, “Akötresie ne ihnim me tingeting.” (2 Korinito 13:11) Tro angatr a inine troa ce mele tingeting. (Isaia 2:3, 4; 11:9) Troa ha thapa qa ngöne la ngazo la itre atr ka mel tingeting.—Roma 8:20, 21.

TRO AKÖTRESIE A APATRENYI SATANA ME ITRE DREMONI

Tro la Baselaia i Akötresie a apatrenyi Satana me itre dremoni, lo qaane la itre isi. (Hna Amaman 20:1-3, 10) E patre hë angatr elany, “tro ha tru la tingeting.”—Salamo 72:7.

Tha luelue kö së laka, tro Akötresie a eatrëne la hnei Nyidrëti hna thingehnaean, ene la troa apëne la itre isi me ihumuth. Celë hi aja i Nyidrë, nge ijiji Nyidrëti hi.

• Ka inamacan nge ka trene mene Akötresie, matre atreine hi Nyidrë troa apëne la itre isi me ihumuth. (Iobu 9:4) Pëkö hnei Nyidrëti hna thatreine kuca.—Iobu 42:2.

• Tha ajane kö Akötresie troa goeëne la itre atr a akötr. (Isaia 63:9) Ketre Nyidrëti a methinëne la “atr ka pi isi.” —Salamo 11:5.

• Tro Akötresieti a eatrëne la hnei Nyidrëti hna qaja, thatreine kö Nyidrëti thoi.—Isaia 55:10, 11; Tito 1:2.