NYINE ININ

Hetre hnëqa ka tru qaathei Iehova kowe la itre keme me thin. Aja i Nyidrëti tro la keme me thin a xatuane la nekö i nyidro troa nyihlue i Nyidrë. Tro la lue tane mekune celë a amaman, jëne la aqane inine Iesu la itretre drei nyidrë, la aqane tro la itre keme me thin a xötrethenge la tulu ne ihnim, me ipië, me inamacane i Iesu ngöne la angatr a inine la itre nekö i angatr.

Tro la pane tane mekun a amamane hnyawa ka hape, Iehova la Akötresie ne ihnim. Tro fe ej a qaja la aqane amamane Iehova la ihnimi Nyidrëti kowe la nöjei atr asë. Nge tro pë hë la hnaaluen, a qaja la aqane tro la itre hlue i Iehova enehila, a amamane la ihnimi angatr kowe la atr lapa easenyi angatr.

Tro la tane mekune celë a amamane la itre hna kuca ha ngöne 100 lao macatre ne musi ne la Baselaia matre troa catre cainöj. Wange ju la itre jia ne huliwa me itre aqane cainöje ka hnyipixe. Ketre, wange ju fe la itre thangane la hna eköthe la itre ini thatraqane la itre ka cainöj.