Ijije Hi Tro Sa Mele Madrin Enehila
TROA traqa la ijine laka, tha tro hmaca kö a tithi së hnei mec, maine qatre trootro me mec. Celë hi ka treqe së! Ngo, ame enehila, kola tranyi së hnei itre jol me itupath. Nemene la ka troa xatua së? Tusi Hmitrötr a xatua së troa hetre madrin, me mele ka loi enehila. Hanawang la itre xaa jol hne së hna melën, memine la ixatua hna hamën hnei Tusi Hmitrötr.
TROA ATREINE MELËN LA HNA HETRENY
Eamo ne la Tusi Hmitrötr: “Ngöne la aqane mele i nyipunie, the tro kö a hni koi mani, ngo tro pe a melëne la ka ijij.” —Heberu 13:5.
Ame enehila, nyimutre la itre ewekë hna ajane hnene la itre atr. Ngo öni Tusi Hmitrötr, ‘troa melëne la ka ijij.’ Troa tune kaa?
The “hni [kö] koi mani.” Itre atr a “hni koi mani” me nue mel troa thele mani, ngacama troa hetre ethan kowe la mele i angatr, me hnepe lapa, me itre sinee, me aqane ujë i angatr, me sipu pengöi angatr. (1 Timoteo 6:10) Ka luuzi hnyawa angatr! Ame la pun, “tha meji kö” angatr hnei mani.—Ate Cainöj 5:10.
Ka nyipiewekë kö la atr hune la mo. Eje hi laka, ka nyipiewekë la itre ewekë. Ngo, thatreine kö itre ej troa hnimi së, me olene koi së; itre atr hmekuje hi. Maine tro sa hetre nyipi “enehmu,” tro angatr a xatua së troa melëne la hna hetreny.—Ite Edomë 17:17.
IJIJE HI TRO SA MELE MADRIN ENEHILA, E TRO SA TRONGËNE LA ITRE EAMO NE LA TUSI HMITRÖTR
TROA XOMIHNINE LA ITRE SINE MEC
Eamo ne la Tusi Hmitrötr: “Ame la hni ka madin, te, kola ameune hnyawa.” —Ite Edomë 17:22.
Ceitune hi la madrin memine la “drösinöe,” kola xatua së troa xomihnine la itre sine mec. Ngo, nemene la aqane tro sa madrin, nge kolo pe a tithi së hnei mec?
Troa hetre hni ne ole. Maine tro pala hi sa mekune la itre jole së, kösë kola ngazo la “nöjei drai.” (Ite Edomë 15:15) Öni Tusi Hmitrötr, “amamane jë la hni ne ole i nyipunie.” (Kolose 3:15) Olene jë kowe la itre ewekë ka co hnei epuni hna öhn. Olene jë la epun a goeëne la kola lö la jö, maine drei eny, maine dredrehnyima hnene la atr hnei epuni hna hnim! Itre ewekë lai ka amingömingöne la mele së.
Xatuane jë la itre xan. Nyipici laka, maine ka wezipo catr epun, ngo öni Tusi Hmitrötr, “sisitria catre kö la madrine ne la atre ham, hune la atre kapa.” (Itre Huliwa 20:35) Ame la kola olene koi epun hnene la itre xan, tro epuni lai a madrin, nge tha mekun atrune hmaca kö epun la itre jole i epun. Troa tro loi la mele së, e tro sa xatua itre xan troa mele ka loi.
TROA ACATRENE LA OTRENE LA FAIPOIPO
Eamo ne la Tusi Hmitrötr: Troa “tuluthe la ka nyipiewekë.”—Filipi 1:10.
Maine tha ka majemine kö ce tro la lue trefën, troa hetre ethan koi nyidro. Nyipiewekë tro la lue trefën a goeëne la faipoipo nyidro, ceitu me ketre ewekë ka sisitria catr ngöne la mele i nyidro.
Ce madrine jë. Ami ijine jë matre tro epon a ce kuca la ketre ewekë. Öni Tusi Hmitrötr, “Loi la ala lue hune la ala cas.” (Ate Cainöj 4:9) Thele jë troa ce kuci xen, me ce spor, me ce tro helep, me ce sië hnagejë.
Amamane jë la ihnimi epun kowe la föi epun. Tusi Hmitrötr a upe la trahmanyi me föe ka faipoipo troa ihnimikeu, me imetrötrë. (Efeso 5:28, 33) Ame la epon a nango dredrehnyima, maine iaba, maine hamë ahnahna, epone hi lai a acatrene la otrene faipoipo i epon. Eje hi laka, ame la troa ce meköle trefën, tre, thatraqai epon hmekuj.—Heberu 13:4.