Loi e Troa Amamai Tulu Hnei Aqane Ithahnata Me Aqane Ujë
1 Hnei Paulo aposetolo hna xatua Timoteo troa nyi tulu ka loi hnei aqane ithahnata, me aqane ujë. (1 Tim. 4:12) Loi e tro fe a eje the së la tulu cili ngöne la easë a troa nyiqaane cainöje trootro, matre atreine hi tro së a wangatrehmekune thene la itre hne së hna iöhnyi memin, la atr hna ketr hnene la itre hne së hna qaja.
2 Loi eje the së la nöjei aqane troa thiina ka loi, tune la troa iwangatruny, me troa menyik. Maine tro së a thele koi së la itre thiina celë, easë hi lai a thupën, wanga akötrëne jë la itre xane hnene la itre huliwa së. Ijije troa aceitunëne la itre thiina ka loi hna kuca ngöne la hna cainöje trootro, memine la itre ewekë nyine apuiloine la xen. Ngo e paatre kö la itre ewekë cili ngöne la xen, ke, thaa tro kö eje a pui loi, nge thaa pi tro kö së a xen. Haawe, ketre tune mina fe, maine paatre kö the së la itre thiina ka loi, ame la easë a ithahnata memine la itre xaa atr, ke, tro lai a mama la thangane laka, thaa pi tro kö angatre drenge la maca ka loi.—Kol. 4:6.
3 Amamai Tulu Jë Hnei Aqane Ithahnata: Nyimu aqane ujë ka loi tro së a amamane ngöne la easë a troa tro fë la maca ka loi, ene la troa hetrenyi the së la iqëmeke ka hnyimahnyima, me troa canga thele troa ibozu. Nge thupene lai, maine tro së a nyiqaane la itre trenge ithahnata së hnene la itre trenge ewekë ka keukawa hnin, nge hna qaja menyikën, me qa ngöne la hni ka loi, ke, easë lai a amamane kowe lai atr ka hape, easë a hane nyipiewekë angeic. Maine angeice a ithahnata, ke, drei angeice hnyawa ju nge nyipiewekëne ju la mekune i angeic. Nge maine epuni a ithahnata, ke, loi e eje thei epuni la menyik.—wange ju fe Ite Huliwa 6:8.
4 Ame itre xaa ijin, ke, easë a ithahnata memine la itre atr ka thaa madrine kö, nge ka thele troa isi ithahnata. Nemene ju hë la aqane tro së a ujë? Hnei Peteru hna xatua së troa ithahnata ngöne “la menyike me qou.” (1 Pet. 3:15; Rom. 12:17, 18) Hnei Iesu hna qaja ka hape, maine ketre atr ka thipetrije la maca ne la Baselaia, ke, loi e tro së a ‘jume la dro ne la itre hnatrapaca së.’ (Mata. 10:14) Nge tro la thiina së ka loi ngöne la itre ijine cili, a amenyikene la hni ne la atr ka thele troa icilekeu.
5 Amamai Tulu Jë Hnei Aqane Ujë: Loi e tro së a atreine iwangatrunyi me itrotrohni ngöne la easë a cainöjëne la maca ka loi ngöne la itre gojenyi me itre gotrane gaa tru atr, ngo thaa tro pi kö a catre la hne nyinawa, me una iele angatr, nge thaa tro kö a ithungijë ngöne la kola ixelë. Ame ngöne la itre uma ka kepe së, ke, loi e tro së a thupëne la aqane heetre së, me thiina së, memine fe la aqane metrötre së ngöne la angatre a kepe së, easë hi lai a amamane laka easë madrine la aqane kapa angatre la trehnyiwa i angatr. Loi e tro la itre nekönatre ka ce tro me easë ngöne la hna cainöje trootro, a metrötrëne la hnalapa memine la itre atren, nge loi e tro fe së a hetrenyi la thiina ka loi, me drenge hnyawa ngöne la easë a porotrik. Maine thaa idrei kö la itre nekönatre ngöne la itre ijine kola porotrik, tro ha wanga angazone lai hnene la atr hne së hna ithahnata memin.—Ite Edo. 29:15.
6 Troa mama kowe la itre xaa atr jëne la aqane heetre së me aqane ujë së ka hape, easë la itretre hlue ne la Wesiula i Akötresie. Tro pala hi la aqane heetre së me thiina së a atrune la maca ka loi. (Wange ju la Filipi 1:27.) Maine hne së hna thupëne la aqane heetre së me thiina së, me itre itusi hne së hna tro xome, ke, thaa tro kö së a athixötrëne la itre xan, maine thaa tro kö angatre a öhnyi engazone la hna cainöje trootro së. (2 Kor. 6:3, 4) Maine tro së a wange la aqane ithahnata së, me aqane ujë së, ke, tro ha ahmitrötrëne la maca na la Baselaia, nge kolo lai a atrunyi Iehova.—1 Pet. 2:12.