Ini Tusi Ne La Ekalesia a Xatua Së Troa Kapa La Itre Ini Ka Sisitria

¹ Ketre ewekë ka iamele, la icasikeu ne ini tusi ngöne la porogarame ne ini ne la organizasio i Iehova. Hna isa thawa la itre atrene la ekalesia ngöne la itre hna ini tusi ne la teritoar, matre ijije kowe la nöjei atr troa sin. Nge, qangöne laka tha nanyi kö la hna ini tus, hmaloi hi kowe la itre ka ajane troa canga kapa la ihë.

² Troa thupëne hnyawane matre tha tro kö a nyimutre lao atrene ngöne la ca gurup. Matre hmaloi kowe la taane ini tusi troa xatuane la isa alacas. Pine laka, tha ceitu së asë kö, ca­nga trotrohnine hi itre xan, nge hmitre koi itre xan. Maine ka jole koi së troa trotrohnine la ketre mekun, ngacama hne së hë hna hnëkën, hawe ijije tro la atr cilëne la etid a ce itha­hnataane me easë thupene la hna ini tus. Ketre mina, pine laka ala xalaithe hi, ijije asë hi la itre atrene troa hamëne la itre mekun, maine tro pena a e la itre mekene tus. Hapeu, maje­mine kö së troa hane sa lapaane la itre hnying? Hane kö së tupathe troa sa, tha ene kö la tro hi a e, ngo tro fe a qaja la itre mekune thenge la sipu a­qane ewekë së? Qangöne lai, pine laka tha easë hmaca kö a e, troa hetre thangane ka loi koi së, me itre xane fe. Ngöne la easë a hnëkë, ke, loi e troa wange hnya­wa la itre mekune matre atreine së wangatrehmekune la aqane tro së isa alacasi a trongëne la itre mekune hne së hna inin. — Heb. 5:14.

³ Maine tro së a goeëne hnyawane la aqane ini hnene la taane ne ini tus, ke, tro fe së a atreine inine la Tusi Hmitrötre kowe la itre atr ngöne itre hnalapa, matre nyipiewekëne hnei a­ngatre me hetre wangatrehmekune i angatr. Thupene la hna e la itre paragaraf, ke, troa ce ithahnatane la itre hnying. Tro la taane ne ini tusi a xa­tuane la itre ka qeje mekune matre ijije kowe la nöjei atrene asë la icasikeu troa drenge qangöne la aqane mexemi hnyawa ne la itre trenge e­wekë. E ijije hi, ke, tro nyidrëti a qejepengöne hnya­wane la aliene la itre mekene tusi hna cinyihan, matre mama hnyawa koi së la aqane troa trongën (Goeëne ju Nehemia 8:8.) Nge e ijij, tro nyidrëti a qejepengöne hmaca koi së, maine tro pena hnyinge matre troa trotrohnine la sipu mekun. Tro la ketre ceitun, maine ketre iatr a xatua së troa me­kune la itre hne së hna inine ka ihmeku memine la mele së.

⁴ Kola uti la etrune la itre ka sine la icasikeu ne ini tus. Hapeu, ka traqa lapa kö së? Maine pëkö, ke, easë lai a paatre ngöne la ketre ewekë ka sisitria hna hnëkëne koi së. Hna hnëkëne la itre ini tusi matre nyine amamane koi së la ketre aqane thupë ka loi së hnei Iehova. (1 Pet. 5:7) Nyidrëti a ajane tro së a kökötre ngöne la atrehmekune me inamacan, matre catre së ngöne la ua. Nge, ame ngöne ketre götran, ke, Satana a ajane troa thingijë së troa kökötre ngöne la ua, me akucakuca­nyi së matre tha tro hmaca kö së a huliwa catre koi Iehova ngöne la organizasio i nyidrë. Loi e tha tro kö a traqa koi së la ewekë celë! Loi pe, tro la keukawa, me ihnimekeu e hnine la gurupe ka cas, a eje e kuhu hni së, matre upi së troa thithi palahi koi Iehova. — Goeëne ju Salamo 111:1.

⁵ Hna majemine amë la itre hna icasikeu ne cainöje trootro ngöne la itre hnalapa ne ini tus, matre co hi la jolene kowe la itre ka cainöje trootro. Nge, hna icasikeu lai, ngöne la nyipine wiik, me mecixeni me sabath memine fe e itre xaa hej. Tro la taane ne ini tusi a wange matre hetre teritoare ngöne ihnatrapaime i angeic, nge wai ketre trejin, matre cilë mekene la huliwa ne cainöje trootro. Tha tro kö la icasikeu a sasaithe la 10 maine 15 menetr. Maine ka ihmeku la topike ne la drai memine la huliwa ne cainöje trootro, ke, tro la ka cilën’a ce ithahnataan, ngo tha tro pe a aqean, maine pena troa hamëne la casi maine lue mekune ka ijije göi troa cainöje trootro, maine pena troa amacaane la itusi nyine trofë la treu celë, tha tro pe a aqean.

⁶ Tro la taane ne ini tusi a thele jëne troa ce huliwa memine la itre atrene la gurup, matre hamëne kowe la isa alacasi la ixatua me ini ka ijij. — Goeëne ju Marko 3:14; Luka 8:1.