Itretre Thupe a Elemekene La Huliwa—Itretre Xomiujine La Ini Tusi Ne La Ekalesia
1 Ame la troa xomiujine la Ini Tus, celë hi ketre hnëqa ka tru, hna hamëne kowe la ketre qatre thupe maine ketre drikona ka maca troa hamëne la ini qa thei Akötresie. Ketre hnëqa la nyine tro angatre a ahmitrötrën, ene la troa wange hnyawa la itre aja ne la itre atrene la Ini Tus, ngöne la götrane la ua. Köni götrane nyine tro angeice a eatrëne ngöne la götrane qa i angeic.
2 Troa Atreine Hamëne La Ini: Nyipi ewekë troa hnëkë hnyawa hnene la atre xomiujine la ini Tus, matre troa hamëne la trotrohnine kowe la itre atrene la gurupe ngöne la nöjei wiik. Angeice a thele matre troa kökötre thene la itre atr la ajane kowe la itre mekune hna troa ini ngön. Thaa tro kö la atre cilëne la ini tus a tru la hna qeje mekun. loi pe tro angeice a amexeje la itre mekune ka tru jëne la itre hnyinge hmekun. Ame la jole ka tru koi angeic, ke, ene la troa kuca matre madrine nge hetre ini hna kapa hnene la itre atr qa ngöne la Ini; ketre, loi e troa aijijëne asë la itre atrene la Ini troa isa hane fe mekun. Ame la aja i angeic, ke, ene la troa xatuane la itre atr ngöne la götrane la ua, me troa amamane hnyawa la enyipiewekëne la ini kowe la mele së, me troa thele tro la itre ini a ketr la itre mekune së memine la itre hni së.—1 Thes. 2:13.
3 Troa Hamëne La Ixatua Ka Ijij: Ame la atre xomiujine la Ini Tus, ke, angeice a “tune la nyine zaene la eny, me hnapo ene la wene.” (Is. 32:2) Angeice a thupëne hnyawa la nöjei atrene la gurupe i angeic, me hamëne la ixatua ngöne la götrane la ua kowe la itre xane e angatre ka nanazij.—Ezek. 34:15, 16; 1 Thes. 2:7, 8.
4 Troa Catre Tro Fë La Evangelia: Kola atrehmekune hnyawa hnene la atre xomiujine la Ini Tus, laka, nyipi ewekë troa thele la itre aqane huliwa me wai ewekë ka lolo nge ka hmaloi kowe la nöjei atrene la gurupe i angeic, matre tro angatre a hane cainöjëne pala hi la maca ka loi. Angeice a elemekene pala hi la huliwa ne cainöj, me tro atre laka, tro la aqane catre tro fë angeice la maca ka loi, memine la madrine ka eje thei angeice a hane hetre thangane ka lolo kowe pë hë la itre atrene la gurupe i angeic. (Kol. 4:17; 2 Thes. 3:9) Ketre, angeice mina fe a thele troa ce cainöje memine la nöjei atrene la gurupe i angeic. Maine easë a ajane troa maca hnyawa la aqane tro së a cainöje trootro, me atreine hamëne fe la itre ini kowe la itre atr, haawe, ijije hi troa xatua së hnene la atre xomiujine la ini tus, matre tro së a eatrëne la aja së.—1 Tim. 4:16; 2 Tim. 4:5.
5 Nyipi lolo la itre manathithi hne së hna kapa, jëne la itre ahnahna, ene lai itre atr ka hnëkë pala hi troa hamëne koi së la ixatua ngöne la götrane la ua, me amamane pala hi koi së la ihnimi nyipici. (1 Thes. 5:14) Epi tro pala hi së a catre hane fe la itre mekune së ngöne la itre ijine ini tus, me catre cainöjëne fe la maca ka loi.—Heb. 10:25.