Nemene La Thina Nyine Tro Së a Melën?
1 Easenyi catre hë la ijine ihnyingë kowe la nöjei atr’asë. Tusi Hmitrötr’a hëne la ijine cili ka hape “la drai Iehova.” Ijine tro Akötresieti a amekötine la itre atr ka ngazo; nge ame koi itre atr ka meköt, ke, drai ne iamele koi angatr. Tro Akötresieti a kotrëne la itre atr, me hnyingë kepine la isa aqane ujë i angatre ngöne la mele i angatr. Hnei Peteru hna hnyinge thenge la mekune celë, me hape: “Nemene la thina nyine tro së a trongën?” (NW) Hnei nyidrëti hna amamane hnyawaane la enyipiewekëne la ‘thina ka hmitöte me thina ka ijiji Akötesie, kola teqene me ajane troa traqa la drai Akötesie,’ nge nyipiewekë fe troa ‘tingeting, pë ethan, me pë engazon.’—2 Pet. 3:11-14.
2 Thina Ka Hmitrötr, Me Thina Ka Ijiji Akötresie: Ame la thina ka hmitrötr, ke, kola qaja fe la itre huliwa nyine tulu ka amamane laka, hetre metrötre kowe la trepene meköti ne Tusi Hmitrötr. (Tito 2:7, 8) Tro la keresiano a neëne la aqane mele ne la fene ka fetra qa ngöne la sipu meku angeice kö, me itre aja ne ngönetrei.—Rom. 13:11, 14.
3 Ame la “thina ka ijiji Akötresie,” ke, kola qeje pengöne ka hape easë a “isa sipu fedre koi Akötresie, hna nyijëne hnene la hni ka tru madrine qa ngöne la itre thina i Nyidrë ka loi.” Troa mama laka, hetrenyi the së la thina celë, e hne së hna catre cainöje trootro. Tha tro kö së a mekune laka, kola cainöj pine laka hna upi së troa aeatrëne la huliwa cili, ngo loi e troa xulu la aja së qa ngöne laka, atraqatre me jui la ihnimi së koi Iehova. (Mareko 12:29, 30) E hna upi së hnene la ihnimi celë, ke, tro së a xome la huliwa ne cainöje trootro ceitu me ketre hatrene ka sisitria ne la thina së ka ijiji Akötresie. Ejehi laka, maine hne së palahi hna hni catre koi Akötresie, ke, tro fe hë së a catre cainöj. Nge loi e tro së a hane wangatrune me amë palahi ej, ngöne la porogarame ne huliwa së ngöne la wiik.—Heb. 13:15.
4 Ame la troa “catre mekune” palahi la drai cili, ke, kola hape tha tro kö së a thëthëhmin’ej, me wangacone la drai cili. Kola hape koi së troa amë panëne la itre huliwa ne Baselaia ngöne la mele së.—Mata. 6:33.
5 Pë Ethan, Me Pë Engazon, Me Tingeting: Tune la ketre atrene la ka alanyim, hne së hna ‘hnea la ite ixete së me awiën’it’eje ngöne la qaziëti ne la Arenio.’ (Hna Ama. 7:14) Ame la “pë ethan,” ke, kola hape tro së a catre thupëne la thina së ka wië, wanga adrone pi la mele hna nu’apexejene hnene la itre ewekë ka sisi ne la fene hnengödrai. Loi e tro së a sipu thupë së kö, ene la troa “pë engazon,” hnene la troa xelene la itre ewekë ka tha meköti kö koi Akötresie, itre ewekë ne fen, nge tha tro kö a nue itr’eje troa nyiengazone la thina ne keresiano the së. (Iak. 1:27; 1 Ioane 2:15-17) Ame la easë a melëne la “tingetinge qa thei Akötesie” ngöne la imelekeu së memine la itre xan, ke, easë lai a amamane laka easë a mele “tingeting.”—Fil. 4:7; Rom. 12:18; 14:19.
6 E tro së a catre hmekëne la iapoizinëne la fen, ke, tha tro jë kö së a “ce thina memin’ej,” nge hna ahnëjinën’eje hnei Iehova. Tro pe la itre huliwa së ka loi a xatuane la itre xane troa wangatrehmekune hnyawa “la ate nyi hlue i Akötesie me ate tha nyi hlue i nyidë.”—Rom. 12:2; Mal. 3:18.
7 Tha hmitre pe kö, nge easë a troa sine la kovasio ne distrik hna hape “Itre Aqane Atrunyi Akötresie Ngöne La Madrin,” nge tro la xeni ne ua a aegöcatrë së, me akökötrene the së la aja troa amamane la thina së ka ijiji Akötresie. Hetrenyi fe thene la itre ka xötrei öhne la nyipici, la aja cili. Celë hi matre loi e tro së a hane xatua angatre troa hane catre cainöje e treu ogas.
8 Ejehi laka, maine hne së hna thupëne hnyawaane la “nöjei huliwa ka loi,” ke, tro ha atrune la atresiwa i Iehova, tro fe ha acatrene la ekalesia, nge itre xan’a öhnyi loi qa ngön. (1 Pet. 2:12) Drei la thina hne së hna ajane palahi troa trongën.