Troa Xome La Ita Ne Thup Celë e 6 Semitrepa Me Wiike Cili
Thiina Nyine Tro Nyipunieti a Xom!
“Ngöne hi la troa pate la nöjei ewekë asëjëihë cili, ijije tro nyipunie a nöjei ate ka nyipici ngöne la thina ka hmitöte me thina ka ijiji Akötesie!”—2 PET. 3:11.
1. Pine nemene matre ka traqa ijije hnyawa la hnaaluene tusi Peteru kowe la itre Keresiano ne la hneijine i angeic?
AME ngöne la aposetolo Peteru a cinyihane la hnaaluene tusi angeic, nyimutre hë la itre iaxösisi hna xomihnine hnene la ekalesia i Keresiano, ngo thaa hna ananazijëne kö la trenge catre i angatr, maine sewe angatre pena troa kökötr. Haawe hnei Diabolo hna xome la ketre aqane nyinyithiina ka hetre thangane catre ekö. Tune lo hna qaja hnei Peteru, hnei Satana hna thele troa axösisine la nöje i Akötresie, jëne la itre atr ka hamë ini ka thoi ka “tiqa la ite lue meke i angate hnei pi kuci ngazo” nge “ite hni angat’ a majemi meciunyi ewekë.” (2 Pet. 2:1-3, 14; Iuda 4) Qa ngöne lai, kola ithuecatre hnei Peteru ngöne la hnaaluene tusi angeic, troa catre mele nyipici pala hi koi Akötresie.
2. Nemene la hna wanga atrune ngöne la mekene 3 ne la hnaaluene tusi Peteru, nge nemene la itre hnying nyine tro së a isa thel?
2 Hnei Peteru hna cinyihan, ka hape: “Ini a mekune laka meköti e troa thue cate nyipunie hnene la kola amekunë nyipunie, e ini pete kö ngöne la uma ne heta celë; ate hë ni, laka saqe hi tro ni a una tije la uma ne hetang . . . Nge tro ni a cate mate ateine nyipunie mekune pala kö la nöjei ewekë celë, e meci hë ni.” (2 Pet. 1:13-15) Nyipici, atre hnyawa hi Peteru laka, calemi hë la ijine tro angeic a mec, ngo ame la hnei angeice hna ajan, tre, ene la tro la itre atr a lapa mekune la itre nyine amekunën qaathei angeic. Nge eje hi lai laka hna cinyihane itre ej hnine la Tusi Hmitrötr, matre ijije së hë enehila troa e. Nyipi ewekë catre tro sa wanga atrune la mekene 3 ne la hnaaluene tusi Peteru, ke, ej a qaja la “nöjei drai hnapin”, ene la itre drai tixenuë ne la fene celë, memine fe la aqane troa lepe apaatrene la itre hnengödrai me fene hnengödrai ngöne la götrane la ua. (2 Pet. 3:3, 7, 10) Nemene la eamo hnei Peteru hna hamëne koi së? Maine tro sa trongëne la eamo i Peteru, tro lai a ixatua së tune kaa matre troa kepe së hnei Iehova?
3, 4. (a) Nemene la mekun hnei Peteru hna hamë së, nge nemene la ithuemacanyi hnei angeice hna hamë së? (b) Nemene la köni mekun nyine tro sa ce ithanatan?
3 Thupene la hnei Peteru hna qaja la aqane troa ethitr la fene i Satana, öni angeice ka hape: “Ijije tro nyipunie a nöjei ate ka nyipici ngöne la thina ka hmitöte me thina ka ijiji Akötesie” (2 Pet. 3:11, 12) Peteru a amamane hnyawa jëne la trenge ewekë celë, laka, tro hmekuje hi a mele la itre atr ka kuca la aja i Iehova nge ka eëne la itre thiina ka amadrinë Nyidrë, ngöne la “drai ne nyi thupen” ka calemi hë. (Is. 61:2) Haawe, kola sisedrëne hnene la aposetolo, ka hape: “Qa ngöne lai, ange hnimina fe, wai nyipunieti kö, ke ate hë nyipunie ekö, wanga kei nyipunie ngöne la cile huti nyipunie e hna e nyipunie hnene la menu ne la nöjei ka ngazo.”—2 Pet. 3:17.
4 Pine laka hna e Peteru mina fe thene la itre atr ka “ate hë . . . ekö,” ene pe atrehmekune hi angeice laka, ame ngöne la itre drai tixenuë, nyipi ewekë catre tro la itre Keresiano a hmek, matre tro pala hi a pë ethan la mele i angatr. Hnei Ioane aposetolo hna qaja pë hë e thupen la kepine lai. Hnei Ioane hna meköle goeëne la kola helë Satana qaa hnengödrai, nge “tru la tenge elëhni” i angeic kowe la “angete denge thenge la nöjei wathebo i Akötesie, me angete xome la nyine anyipici Iesu Keriso.” (Hna ama. 12:9, 12, 17) Tro hë la itre hlue i Akötresieti a hun, itre hna iën ka mele nyipici memine lo itre sine tronge i angatr, ene lo itre xaa mamoe ka nyipici mina fe. Ngo tune kaa fe së, easë isa ala caas? Tro kö a pë ethan pala hi la mele së? Tro ha xatua së troa ujë tune lai, e hne së hna catre troa (1) eëne la itre thiina ka lolo i Akötresie, me (2) thele troa pë ethan me pë engazone la thiina së me mele së ngöne la götrane la ua, me (3) hetrenyi la aqane waiewekë ka loi göne la itre itupath. Loi e tro sa ce ithanatane la itre götrane cili.
Loi e Tro Sa Eëne La Itre Thiina Ka Lolo i Akötresie
5, 6. Nemene la itre thiina nyine tro sa catre eën, nge pine nemene matre nyipi ewekë tro sa “nyipi cat”?
5 Hnei Peteru hna nyiqaane la hnaaluene tusi angeic, ka hape: “Loi e tro nyipunie a nyipi cat, me nyi thina ka loi xane la lapaune i nyipunie, nge nyi inamacan xane la thina ka loi; nge nyi xom’ acone xane la inamacan; nge nyi xomi hni xane la xom’ acon; nge nyi thina ka ijiji Akötesie xane la xomi hni; nge nyi ihnimi tejine xane la thina ka ijiji Akötesie; nge nyi ihnimi xane la ihnimi tejin. Ke maine eje thei nyipunie la nöjei ewekë cili, nge kola mana, celë hi kola celohmë nyipunie mate tha ite hminyaje kö, me tha ite ka tha wa kö, uti hë la ate hmekune la Joxu shë Iesu Keriso.”—2 Pet. 1:5-8.
6 Eje hi laka, nyipi ewekë tro sa “nyipi cat” matre troa kuca la itre huliwa ka troa xatua së troa eëne la itre thiina ka lolo i Akötresie. Drei la ketre ceitun, nyipi ewekë tro sa catr matre troa sine la itre icasikeu i Keresiano, me e la Tusi Hmitrötr o drai, me ketre sipu ini Tusi lapaa jëne la ketre porogarame hne së hna eköthe hë. Ketre, maine jë thaa ka hmaloi kö troa eköthe la ketre porogaram, matre troa xomiujine pala hi la Hmi Ne La Hnepe Lapa së cememine la madrin. Ngo maine tro sa majemine kuca la itre ewekë cili, tro ha hmaloi koi së troa eatrëne itre ej, ke easa mina fe a öhne la itre eloin itre ej.
7, 8. (a) Nemene la hna qaja hnene la itre xan göne la heji ne la Hmi Ne La Hnepe Lapa? (b) Tune kaa la aqane tro nyipunieti a kepe thangane ka loi qa ngöne la hmi ne la hnepe lapa i nyipunie?
7 Hanawange la hna cinyihane hnene la ketre trejine föe göne la hna amekötine cili, ene la Hmi Ne La Hnepe Lapa, kola hape: “Ej a aijijë hun troa atrepengöne la itre taan mekun ka nyimutre.” Kola qaja hnene la ketre trejin, ka hape: “Eni a qaja la nyipici, thaa ajane kö ni ekö troa nyipune la ini tus. Celë hi lo icasikeu hnenge hna piin. Ngo pine laka eahuni enehila a kuca la Hmi Ne La Hnepe Lapa e hej, haawe, eni a wanga atrehmekune laka atre hnyawa hi Iehova la itre aja ka eje the hun, memine la ijine eahuni a ajane itre ej.” Kolo fe a qaja hnene la ketre he ne la fami, ka hape: “Atraqatre la ixatua hnei nyiho hna kapa qa ngöne la Hmi Ne La Hnepe Lapa. Sisitria catre koi ni me föi eni troa eköthe la ketre icasikeu ka ihmeku hnyawa memine la itre aja ka eje thei nyiho! Drenge hi nyiho laka, nyiho a kökötre ngöne la troa eëne la wene ne la uati hmitrötr, nge atraqatre la madrine i nyiho troa xome la huliwa ne cainöj.” Kola qaja hnene la ketre he ne fami, ka hape: “Kola isa thele ewekë me isa xomi ini hnene la itre neköng, nge madrine angatr troa kuca lai. Kola acatrene la mejiune hun koi Iehova hnene la hna amekötine cili, laka, atre hnyawa hi Nyidrë la itre ewekë hne hun hna hnehengazon, nge Nyidrëti fe a kapa la itre thithi hun.” Hapeu, celë fe aliene hni me aqane mekune i epuni lai göne la hna amekötine ka lolo cili?
8 The tro pi kö nyipunieti a nue la itre hnepe ewekë ka co hi troa sewe nyipunie troa eatrën la hmi ne la hnepe lapa i nyipunie. Hnene la ketre trefëne hna qaja, ka hape, “Ame ngöne la nöjei heji ne Drai Ka Co ngöne lo foa lao wiike ka ase hë, tre, hna traqa la ketre ewekë ngöne la hnepe lapa i nyiho; maine ju tro ej a sewe nyiho troa kuca la ini tusi nyiho, ngo thaa hnei nyiho kö hna nue la ewekë cili troa ahmacanyi nyiho.” Eje hi laka, maine jë ame itre xaa ijin, nyipi ewekë tro nyipunieti a eköthe hmaca la porogarame i nyipunie. Ngo loi e xecie koi nyipunie laka tro pala hi a eatrëne la Hmi Ne La Hnepe Lapa ngöne la wiik!
9. Hnei Iehova hna xatua Ieremia tune kaa, nge pine nemene matre kola akeukawane la hni së hnene la tulu i angeic?
9 Ketre tulu ka lolo koi së la hna amë hnei Ieremia perofeta. Nyipi ewekë koi angeice la göxeni ngöne la ua hna kapa qaathei Iehova, nge atraqatre la hni ne ole i angeice kowe lai. Hnene la göxeni cili hna aijijë angeice troa cainöj cememine la xomihni ahoean kowe la ketre nöje ka xeti hni. Öni angeice ka hape: “Wesi ula i Iehova . . . ej’ e kuhu hninge kösë eë ka mele hna thinge hnine la ite juneng.” (Iere. 20:8, 9) Hnene ej mina fe hna xatua angeice troa xomihnine la itre ijine jol, ke kola mama laka easenyi catre hë la drai ne troa lepe apaatrenyi Ierusalema. Ame easë enehila, tre, hetrenyi hë së la Wesi Ula i Akötresieti ka pexej. Maine tro sa inine eje hnyawa me xome la aqane waiewekë i Akötresie, haawe, tro hë sa ujë tui Ieremia, ene la troa atreine xomihni ahoeane cememine la madrin ngöne la huliwa ne cainöj, me mele nyipici ngöne la itre itupath, me thele troa pë ethan pala hi la thiina së me mele së ngöne la götrane la ua.—Iako. 5:10.
Loi e Tro Sa Thele Troa “Pë Ethan Me Pë Engazon” La Mele Së
10, 11. Pine nemene matre nyipi ewekë tro sa catre matre troa “pë ethan me pë engazon” la mele së, nge nemene la aliene lai koi së?
10 Ame easë itre Keresiano, atre hnyawa hi së laka, easa mele ngöne la itre drai tixenuë. Haawe, thaa tro pi kö sa sesëkötr, laka, kola piine hnene la fene celë la itre ewekë hna methinëne hnei Iehova, tune la meciu ewekë, me kuci ngazo, me isi. Ijije hi tro sa qeje pengöne la nyinyithiina i Satana tune la: ‘Maine thatreine kö troa axouene la itre hlue i Akötresie, maine jë atreine hi troa angazone la itre hni angatr.’ (Hna ama. 2:13, 14) Haawe, nyipi ewekë tro sa wanga atrune la eamo hnei Peteru hna hamëne cememine la ihnim, kola hape: “Catejë mate öhnyi nyipunieti jë ngöne la tingeting, ka pë ethan, me pë engazon xajawa i nyidë.”—2 Pet. 3:14.
11 Ceitune hi la hnëewekë hna hape, “catejë” memine lo ithuecatre hnei Peteru hna hamëne hë, ene la troa “nyipi cat.” Eje hi laka atre hnyawa hi Iehova lo Atre upi Peteru troa qaja la itre mekune celë, laka, nyipi ewekë tro sa isine troa “pë ethan me pë engazon” la mele së ngöne la fene i Satana. Ame la tro sa isin, tre, kolo lai a hape, loi e tro sa thupëne hnyawa la hni së, wanga lapane pi hnene la itre aja ka ngazo. (E jë la Ite edomë 4:23; Iakobo 1:14, 15.) Kolo fe lai a hape, loi e tro sa cile catre qëmekene la itre atr ka thaa trotrohnine kö la kepine matre easa xome la aqane mele ne la Keresiano, nge ka “jele ngazo [së].”—1 Pet. 4:4.
12. Nemene la mekune ka akeukawane la hni së ka eje ngöne Luka 11:13?
12 Hnene laka thaa itre atr ka pexeje kö së, ene pe jole catre koi së troa kuca la ewekë ka meköt. (Rom. 7:21-25) Maine tro sa lapa qale koi Iehova lo Atre hamëne gufane la uati hmitrötr kowe la itre atr ka sipo Nyidrë cememine la hni ka nyipici, eje hi lai laka, tro ha loi xölene la mele së. (Luka 11:13) Tro la ua cili a akökötren e kuhu hni së la itre thiina hna kapa hnei Akötresie, me xatua së troa cile kowe la itre itupath ka eje ngöne la mele së, memine fe la itre jole ka troa catrehnine trootro ngöne la kola easenyi catre kowe la drai i Iehova.
Loi e Tro Sa Nue La Itre Itupathi Troa Acatrene La Lapaune Së
13. Nemene la ka troa xatua së troa xomihnine la itre itupath ka traqa kowe la mele së?
13 Tro pala hi a traqa koi së la itre itupathi ka nyimu pengöne ngöne la mele ne la fene celë. Maine nyipici laka, ijije hi tro sa kucakuca, ngo tune kaa matre tro sa goeëne itre ej ceitu me ketre jëne ka sisitria troa anyipicine la ihnimi së koi Akötresie, me acatrene la lapaune së koi Nyidrë me kowe la Wesi Ula i Nyidrë? Hnei Iakobo lo atre drei Iesu hna cinyihan, ka hape: “Ange tejine me ini fe, loi e tro nyipunie a mekune, laka nyine amadin’ atraqat’ e traqa koi nyipunie la nöjei itupathi ka nyimu pengön; ke ate hë nyipunie, laka ate aciane la xomi hni la kola tupathe la lapaune i nyipunie.” (Iako. 1:2-4) Ketre, loi e tro sa lapa mekune hnyawa laka, “ate kö Iehova la aqane amelene la itete thina ka ijiji Akötesie qa ngöne la nöjei itupath.”—2 Pet. 2:9.
14. Kola ithuecatre koi së tune kaa hnene la tulu hna amë hnei Iosefa?
14 Tro sa pane ce wange la tulu i Iosefa lo nekö i Iakobo hna salemën hnene la itre trejine me angeic matre troa ketre hlu. (Gen. 37:23-28; 42:21) Hapeu, hna ananazijëne kö la lapaune i Iosefa hnene lai aqane akötrë angeic? Hnei angeice kö hna elëhni koi Akötresie pine la hnei Nyidrëti hna nue troa traqa koi angeice la ngazo cili? Kola sa hnyawa hnene la Wesi Ula i Akötresie ka hape, ohea! Ketre, thaa celë kö la pune la itre itupath hna melëne hnei Iosefa. Eje hi, ame e thupen, hna sili trenga thoi angeic, ka hape, hnei angeice hna thele troa angazone la ketre föe, ame hna akalabusi angeic. Ngo hnei angeice pala hi hna catre troa pë ethan la mele i angeic xajawa i Akötresie. (Gen. 39:9-21) Hnei angeice pe hna nue la itre itupathi troa acatrene la lapaune i angeic, nge pine lai, nyimutre la itre manathithi hnei angeice hna kapa.
15. Nemene la ini hne së hna xom qa ngöne la tulu hna amë hnei Naomi?
15 Nyipici laka, ijije hi tro la itre itupath a ahleuhleune la mele së maine uku së pena troa lapa fë la akötr e kuhu hni së. Maine jë hnei Iosefa hna melëne la ewekë cili e itre xaa ijin. Hna hane melëne fe lai hnene la itre xaa hlue i Akötresie ka nyipici koi Nyidrë. Tro sa pane ce wange la tulu i Naomi, ketre föe hna meci trij hnene la föi eahlo memine la lue nekö i eahlo trahmany. Öni eahlo, ka hape: “The qeje ni Naomi. Ngo qeje ni pe, Mara [kola hape, “Haitr”], ke haite atraqate la thina i Kapucatinasë koi ni.” (Ruth 1:20, 21.) Trotrohnine hi së la aqane ujë i Naomi, ke, celë hi la pengöne la atr. Ngo tui Iosefa, thaa hnei eahlo kö hna thixötre ngöne la götrane la ua, me nuetrije la aqane mele i eahlo ka pë ethan. Nge eje hi lai laka, hnei Iehova hna amanathithine la föe cili ka sisitria. (Rutha 4:13-17, 22) Ketre, tro hë Akötresieti elany ngöne la Paradraiso e celë fen, a apaatrene hnyawa la nöjei pengöne akötr hna axulune hnei Satana memine la fene i angeic ka ngazo. “Nge tha tro hmaca kö a mekune la hnapan, me xulu e kuhu hni at.”—Is. 65:17.
16. Tro sa goeëne tune kaa la thith, nge pine nemen?
16 Ngacama easa melëne la itre itupath ka nyimu pengön, ngo ame la troa atre laka Akötresieti pala hi a hnimi së, tre, tro lai a xatua së troa xomihnine itre ej. (E jë la Roma 8:35-39.) Maine nyipici laka tro pala hi Satana a thele troa ananazijë së, ngo thaa tro pi kö angeic a hun, e hne së pala hi hna “inamacan” me “hmeke me thith.” (1 Pet. 4:7) Hnei Iesu hna qaja, ka hape: “Hmekëneju nyipunie, me lapa thith, mate ateine nyipunie troa kötene la nöjei ewekë asë ka tro ha traqa, me troa icilenyi qëmeke ne la Nekö i ate.” (Luka 21:36) Kola mama laka, hnei Iesu hna xome la hnëewekë hna hape, “thithi [iele],” kola qaja la ketre pengöne thith. Ame la kola ithuecatre koi së troa thithi iele, tre, Iesu hi lai a amamane hnyawa laka, celë hi la ijine tro sa wanga atrune la pengö së xajawa i nyidrë memine la Tretretro i nyidrë. Ame ngöne la kola traqa la drai Iehova, tro hmekuje hi a mele la itre atr hna jele mekötine me hna kapa hnei Akötresie.
Catre Jë Së Xome La Huliwa i Iehova
17. Maine jole koi së troa cainöje ngöne la teritoare së, tune kaa la aqane tro sa kepe thangane qa ngöne la tulu ka lolo hna amë hnene la itre perofeta ekö?
17 Kola akeukawane la hni së hnene la hna catre xome la itre huliwa ngöne la götrane la ua. Kolo lai a amekunë së lo trenge ewekë i Peteru, ka hape: “Ijije tro nyipunie a nöjei ate ka nyipici ngöne la thina ka hmitöte me thina ka ijiji Akötesie!” (2 Pet. 3:11) Ame ngöne thiina ka ijiji Akötresie, tre, kola hane amexeje mina fe la itre huliwa ka mama thene la atr ka qale catre koi Akötresie, tune la huliwa ka sisitria, ene la troa cainöjëne la maca ka loi. (Mat. 24:14) Nyipici laka maine jë jole troa cainöj ngöne la itre xaa teritoar pine laka thaa semesine së kö hnene la itre atr, maine angatr a icilekeu, maine pena angatr a hnehengazone e nöjei drai la itre ejolene la mel. Hnene mina fe lo itre hlue i Iehova ekö hna hane cile kowe la itre aqane ujë cili. Ngo thaa hnei angatre pi kö hna hmacahmaca; hnei angatre pe hna catr me “ilë e sine jid” matre troa tro fë la maca qaathei Akötresie. (E jë la 2 Aqane lapa ite joxu 36:15, 16; Iere. 7:24-26) Nemene la ka xatua angatr troa xomihni ahoeany me kuca pala hi la hnëqa i angatr? Hnei angatre hna goeëne la hnëqa i angatr tune la aqane goeëne Iehova, ngo thaa tune kö la aqane goeën hnei fen. Ketre, angatr a wanga atrune lai ceitu me ketre manathithi ka tru, ene la troa xome la atresiwa i Akötresie.—Iere. 15:16.
18. Nemene la thangane la huliwa ne cainöjëne la Baselaia, kowe la aqane troa atrune elany la atresiwa i Akötresie?
18 Hetrenyi mina fe së la manathithi ka tru ene la troa cainöjëne la atresiwa i Iehova memine la aja i Nyidrë. Pane mekune jë së la ewekë celë: Ame la ketre thangane la huliwa ne cainöje së, tre, ene laka thaa tro kö la itre ithupëjia me Akötresieti a qaja xajawa i Nyidrë ngöne la drai atraqatre i Nyidrë, laka, thaa hna thuemacanyi angatre kö. Tui Farao ekö, tro hë angatr a atre laka, Iehova la ka isi me angatr. (Eso. 8:1, 20; 14:25) Ame ngöne la ijine cili, tro hë Iehova a atrune la itre hlue i Nyidrë ka nyipici, hnene la hna amamane hnyawa kowe la nöjei atr, laka, angatre hi lo itre ka nyi trenge ewekë i Nyidrë.—E jë la Ezekiela 2:5; 33:33.
19. Tro sa amamane tune kaa laka, easa ajane troa huliwane hnyawa la xomihni i Iehova?
19 Ame ngöne la pune la hnaaluene tusi Peteru, hnei angeice hna cinyihane kowe la itre sine ce hmi me angeic, ka hape: “Mekuneju nyipunie laka ame la xomi hni ahoeanyi i Joxu shë, te, mele lai.” (2 Pet. 3:15) Epi tro sa catre troa huliwane hnyawa la xomihni ahoeanyi Iehova. Hna tune kaa lai? Hnene la hna catre eëne la itre thiina ka amadrinë Nyidrë, me thele troa “pë ethan me pë engazon” la mele së, me xome la aqane waiewekë ka loi göne la itre itupath, me catre troa cainöjëne la Baselaia. Maine tro sa ujë tune lai, haawe, ijije hë tro sa mejiune troa kapa la itre manathithi ka pë pun ngöne la “hnengödrai ka hnyipixe memine la fene hnengödrai ka hnyipixe.”—2 Pet. 3:13.
Mekune Pala Kö Nyipunie?
• Tro sa eëne tune kaa la itre thiina ka lolo i Akötresie?
• Tune kaa la aqane troa “pë ethan me pë engazon” la mele së?
• Nemene la ini hne së hna kapa qa ngöne la tulu i Iosefa me Naomi?
• Pine nemene matre ketre manathithi ka tru la troa xome la huliwa ne cainöj?