Kola Sa La Itre Hnyinge i Nyipunie

◼ Nemene la nyine troa mekune hnyawa, ngöne la kola troa e la itre paragarafe ngöne la itre ijine icasikeu?

Tru catre fe la traeme hna xome matre troa e la itre paragarafe ngöne la Ini ne La Tour de Garde, me Ini Tus ne la ekalesia. Kolo lai a hape, ame la trejine hna iëne troa e ngöne la ijine icasikeu, ke, eje thei angeice la ketre hnëqa ka tru, ene la troa hamëne la ini. Nyipiewekë la aqane tro angeice a e tus, matre ‘qeje pengöne’ ju fe hë la itre mekune hna e, thaa göi tro hmekuje kö a trotrohnin, ngo tro fe hë a hane upi angatre troa kuca la hnei angatre hna dreng. (Neh. 8:8) Qa ngöne lai, nyipiewekë catre tro la ka e a hnëkëne hnyawa la götraneqa hna athipe koi angeic. (1 Tim. 4:13; goeëne ju la ini 6 ne la itus Manuel pour l’École.) Hanawange la itre xaa mekune ka tru, nyine ixatua kowe la itre ka ajane troa atreine e tusi hnyawa koi nöjei atr.

Inine jë troa atreine ithahnata hnyawa. Canga wange ju la itre hnepe hnaewekë, maine itre hna ithahnata nyine troa qaja atrune matre troa hamëne la nyipi ini me trotrohnin.

Troa e hnyawa la itre hnaewekë. Nyipiewekë troa qaja, me e hnyawa la itre hnaewekë matre atreine tro la itre atrene la ekalesia, a trotrohnine la itre hna qaja hnine la itus. Goeëne ju hnine la dikisionere la itre hnaewekë hna thatre pengöne kö, me hna thaa majemine kö e, maine tro pena a drenge la itre kasete i Sasaiatri.

Ithahnata catre jë, me amamane la ajane troa ixatua. Maine tro la ka e tusi a ithahnata catr, tro ha hetre ajane la itre atr troa drei angeic, qa ngöne lai tro ha ketr la itre hni angatr, nge ijiji angatre troa trongëne la itre hnei angatre hna dreng.

Loi e troa keukawahnin, me atreine ifekeune la itre mekun. Loi e troa qa kuhu hni la itre mekune hna troa qaja. Maine tro la atr a hnëkë hnyawa, me inine troa e tusi pala hi, ke, atreine hi troa nunue la ngönetrei i angeic, nge tro hë a hmaloi koi angeice troa e, nge hetre ajane la itre xane troa dreng.​—Hab. 2:2.

Loi e troa pane e la itre mekune ngöne i pepa. Loi e tro fe a e catrëne la itre hna fejane e kuhu fene lai hna cinyihan, memine la itre mekune hna eköhagene hnine la itre paratez, maine kroche pena e epuni a ajane troa trotrohnine hnyawa lai hna fejan. Thaa tro kö a e lo itre ëjene itusi ka anyipicine la itre hna e. Troa e la itre hna fejane e kuhu fene la hna cinyihane maine hna cinyihane ngöne la paragarafe ka hape: “Troa e la itre hna fejane e kuhu fene la hna cinyihan . . .” Thupene la hna e lai, ke, sisedrëne jë hnene la itre xaa paragaraf.

Maine kola mama laka, hna e hnyawa koi nöjei atr la tus, ke, celë hi ketre jëne lai ka sisitria troa ‘ini angatr troa trongëne la nöjei ewekë asëjëihë’ hna hamëne hnene la atre Ini ka Tru nge ka sisitria.​—Mata. 28:20.