Kola Sa La Itre Hnyinge i Nyipunie
◼ Ame ngöne la kola hëne la ekalesia troa hane sine la itre nyi pengöne göi kele wezipo, nyimutre la itre hnyinge hna ajane troa sa:
Drei la ka troa kuca la cainöje ne kele wezipo? Mekune lai hna troa xome hnene la itre atrene la fami. Ma tro angatre a iëne la ketre trejine ka amamai tulu ka loi. Maine hna sipo ka cainöje kowe la koleji ne la itre qatre thup, haawe, tro hë angatre a iëne hnyawa la ketre qatre thupe ka maca troa kuca la cainöje thenge la aqane hnëkëne hnei Sasaiatri, ngo thaa tro kö a qaja aloine menune palaha la ka meci hë; loi e tro pe së a qaja amamane la itre thiina me itre tulu ka loi hna kuca hnene la ka paatre hë.
Hapeu loi kö e troa huliwane la uma ne Baselaia? Atreine hi troa huliwane ej, e hna nue hnene la koleji ne la itre qatre thup, nge thaa kolo kö a xome pena ha la göhnene la itre icasikeu hna majemine kuca hnene la ekalesia. Ketre, loi e pëkö ethane la thiina ne la atrene la ekalesia ka mec, maine neköne pena la ketre trejin, nge ka coco petre kö nyën. Maine ka mama kowe la nöjei atr laka, ka ngazo la aqane ujë ne la keresiano, maine hetrenyi pena la itre xaa thiina i angeice hna thaa kapa kö hnene la ekalesia, haawe, thatreine kö tro la itre qatre thupe a nue troa huliwane la uma ne Baselaia.—Wange ju la itus Ministère, götrane 61-62.
Eje hi laka, thaa hna kuca kö la itre Uma ne Baselaia thatraqane la kele wezipo i angetre thaa ce hmi kö me easë. Ngo tro hi a hane kapa la atr ka mec, e hna catre ce mele memine la itretre cainöje hna bapataison, nge hlemu loi la aqane ujë kowe la nyipici, me lolo la thiina i angeice qëmekene la itre atrene la ekalesia, nge pëkö kutimi ne fen hna hane amë hnine la porogarame ne kele wezipo.
Maine hna kapa hnene la itre qatre thupe troa huliwane la Uma ne Baselaia, tro hë angatre a wange maine hna majemine ngöne la nöje troa traqafë la ka meci e hnine la uma. Haawe, maine loi hi, atreine hi tro angatre a nue troa xome la ikesi ne la wezipo kowe la uma ne Baselaia.
Nge tuneka kö e atrene fen la ka mec? Maine ka hlemu loi la thiina ne la ka mec, kowe la itre atr, haawe, tro la trejine a kuca la ketre cainöje nyine ixatua qa hnine la Tusi Hmitrötr, ngöne la ijine kola hmi wezipo ngöne la hnalapa, maine ngöne la hna kele wezipo. Ngo thaa tro kö la ekalesia a hmine la wezipo e ka kuci ngazo la atr ka mec, me ka eni wathebo, maine isazikeu catre la aqane ujë memine la itre trepene meköti ne la Tusi Hmitrötr. Maine nyipici laka, ngazo e troa hmi wezipo ngöne la ketre uma hmitrötre i babulona, haawe, ketre thaa loi kö e tro la ketre trejine a ce thawa memine la ketre hene hmi pena ha, la porogarame ne hmi wezipo.
Tuneka e hna upetrije hë la ka mec qa hnine la ekalesia? Thaa tro kö la ekalesia a cilëmekene la huliwa, nge thaa tro jë kö a huliwane la Uma ne Baselaia. Maine kola mama ngöne lo mele petre kö la atr laka, angeice hë a ietra me ajane hmaca troa bëeke koi Iehova, haawe, ame e cili, qanyine kö la mekuthethewe ne la trejine troa axeciëne maine ijije troa kuca la ketre cainöje qa hnine la Tusi Hmitrötr, ngöne la kola hmine la wezipo ngöne la hnalapa maine ngöne la hna kele wezipo pena, matre troa hane cainöje kowe la itre ka thaa hmi kö, nge troa akeukawane la itre sinee. Ngo qëmekene troa axeciëne la mekune cili, loi e tro la trejine a wange la koleji ne la itre qatre thup, me hane wangatrune fe la mekune i angatr. Maine hetrenyi la itre xaa hnepe jole ka sawa la trejine troa hmine la wezipo, haawe, maine ketre atrene angeice la fami ne la ka mec, ma loi e tro pe hi angeice a kuca la ketre cainöje nyine akeukawane la itre sinee.—Troa xome la hna amekötine cili ngöne La Tour de Garde ne 15 okotropa 1990, götrane 30-1
Troa xome la hna amekötine cili qa ngöne La Tour de Garde ne 15 okotropa 1990, götrane 30-1; 15 diseba 1981, götrane 29-30; 1 semitrepa 1978 götrane 7-8; 1 semitrepa 1977, götrane 5-8; nge Réveillez-vous! ne 8 semitrepa 1990, götrane 22-3 me 22 julai 1977, götrane 12-15.