Hane Jë Fe Qaja Kowe La Itre Xane La Jëne Madrine Kowe La Fami
1 Ame la fami ke celë hi trepene ka acaasine la itre atr e celë fen; celë hi matre kola hetre tribu, me traon, me itre nöje ka tru, me fene hnengödrai asë qa ngöne laka, hetre fami. Ngo ame enehila paatre hë la caasi cili, tëtë hë la trepene la fami, qa ngöne laka, mana la nöjei itupathi ka traqa kowe ej. Kola isa thele ka hape, maine jë tro pala kö a cile huti la fami, pine laka, catrehnine catre la itre itupathi. Ngo ame pe easë a olene koi Iehova, lo Atre ami trepene la fami, ke hnei Nyidrëti hna hamë së la itre ini, matre nyine manathithi kowe la fami së! Hetre thangane catre kowe la itre fami ka xötrethenge la itre hna amekötine cili, nango co me hmeje kötre la itre jol, nge caasi la itre atrene la fami. Ngöne la treu semitrepa, easë a troa hane trofë kowe la itre xaa atr la itus Le secret du bonheur familial. Inine jë troa ithahnatane xötreithe memine la itre atr, la itre mekune ka qejepengöne la fami. Loi e tro fe së a amamane laka, easë a ajane troa hane ixatua, kola mama jëne la iqëmeke së ka hnyimahnyima, me atreine waiewekë. Nemene la nyine troa qaja?
2 Atreine hi tro epuni a nyiqaane hnene la ketre hnying:
◼ “Hapeue la hnei epuni hna mekun, nyimutre kö la itre fami ka xomi akötre fë la itre itupathi ka tru ne la mel? [Nue pi troa sa.] Kola amamane hnyawa hnene la itre rapore laka, nyimutre la itre atr ka cile kowe la itre ejolene la mele ngöne la itre hnalapa. Nemene la ewekë hnei epuni hna hane mekune ka troa xatuane la itre fami matre cile catre angatre me manathith? [Nue pi troa sa.] Pine laka, Akötresieti la Atre acile la fami, hapeu, thaa meköti kö e troa xome la itre trepene meköti hnei Nyidrëti hna hamën? [E jë la 2 Timoteo 3:16, 17.] Eje e hnine la itusi celë, Le secret du bonheur familial, la ini cili ka hetre thangan.” Thupene lai, hnyingëne ju lai atr la jole hnei angeice hna öhne thene la nöjei fami asë, ithahnatane jë la mekene ka qaja la jole cili, nge hamëne ju la itus.
3 Ngöne la epuni a bëeke troa iwai hmaca, epuni a sisedrëne ju la porotrike me thele troa nyiqaane etid; öni epuni jë ka hape:
◼ “Hnenge hna mekune lo hnei nyipëti hna qaja ngöne la mele ne la fami, celë hi matre, hetrenyi thenge la ketre ewekë ka troa amadrinë epun. [Amamane jë la boroshüre Thele, fe jë kowe la götrane 16, nge e jë la sikisi lao hnyinge ngöne la qaan.] Ngo eje hi laka, isa qanyine kö la itre fami troa thele la aqane troa kuca matre troa hetrenyi la madine e hnine la lapa i angatr. Maine ijij, ke, eni a pane troa amamane koi nyipë ngöne la ketre hnepe menetre ka co hi la aqane tro nyipëti a kepe thangane ka loi qa ngöne la ini celë.” Thupene lai, nyiqaane jë troa etidi jëne la ini 8.
4 Ame la ketre aqane troa nyiqaane portrik, ke, ene la troa ithahnatane la ketre jol; troa qaja ka hape:
◼ “Maine nyipici laka, kola ajane hnene la nöjei atr troa hetrenyi la madrin, ngo kola mama laka, nyimutre catre la itre fami ka thaa traqa kö kowe la ewekë cili. Nemene la ewekë hnei epuni hna mekune ka troa xatua angatre troa hetrenyi fe la nyipi manathith? [Nue pi troa sa.] Hnei Tusi Hmitrötre hë hna qaja ekö la itre pengöne jole hna troa melëne hnene la itre fami ngöne la hneijine së enehila. [E jë la 2 Timoteo 3:1-3.] Nge Tusi Hmitrötre fe a qaja kowe la itre fami la nyine troa kuca matre troa cile kowe la itre jole cili, me hane kapa la manathithi ka epine palua. Hna amamane la itre trepene meköti ne la Tusi Hmitrötre e hnine la itusi celë, Le secret du bonheur familial.” Thupene lai, wange ju la itre mekune hna eköhagene ngöne la ketre mekene tusi ka ijij, e jë itre ej, nge hamëne jë la itus.
5 Ngöne la epuni a bëeke troa iwai hmaca, xome jë la boroshüre “Thele” matre troa nyiqaane etid. Ijije hi tro epuni a qaja ka hape:
◼ “Eni a madrine laka, hetre hni ne ajane thei epuni troa xome la itre trepene meköti Iehova thatraqane la mele ne la fami. Kola mama hnyawa enehila laka, hetre manathithi hna kapa hnene la itre fami ka xötrethenge la ihaji hna hamëne hnei Tusi Hmitrötr. Hanawange la aqane qeje pengöne la kepine matre kola tro loi tune lai.” E jë la pane paragarafe ne la ini 1 ngöne la boroshüre Thele, xome jë fe la Salamo 1:1-3 maine Isaia 48:17, 18. Maine ijij, wange ju fe la itre paragarafe ne la ini. Isa pui hmaca ju matre troa ce sisedrëne la ini hnaluen.
6 Itre Itusi Së: Hnene laka, sisitria asë hi la itre itusi së, nge tru la itre ewekë hna itöne matre troa kuca itre ej, hapeu, epuni a luelue troa tro fë kowe la itre atr hnei epuni hna iöhnyi memin, la itre zonal, me itre boroshür, maine itre itus? Nemene la aqane tro së a atre laka, thaa easë kö a hamëne la itre itusi kowe la itre atr ka thaa tro kö a e itre ej? Ame la ketre aqane troa atrepengöne lai, ke, ene la troa hnyingëne kowe la atr, maine nyipici laka, tro angeice a e la hna cinyihane hnei epuni hna amamane koi angeic.
7 Loi e tro së a kuca asë la hne së hna atreine troa tro fë fe kowe la itre xaa atr la jëne madrine kowe la fami—ene la troa xötrethenge la itre ini hna hamëne hnene la Wesi ula i Akötresie.—Sal. 19:7-10.